Nkhani Yakupfunza 8
Thangwe Ranyi Tin’funika Kumbatenda?
‘Latizani kuti ndimwe wakutenda.’—WAKOLOSO 3:15.
NYIMBO 46 Tinkukutendani Yahova
BZOMWE TIN’PFUNZA *
1. Kodi Msamariya omwe adapozedwa na Jezu adalatiza tani kutenda kwace?
AMUNA khumi omwe akhana mapere, akhalibe cidikhiro ciri-cense cakuti nthenda yawo ingadadzapozedwa. Koma nsiku inango, iwo adawona Jezu na patali. Pa nthawe imweyi iwo akhadabva kale kuti Jezuyo akhapoza matenda ya mtundu uli-wense, ndipopa iwo akhana citsimikizo cense cakuti angadawapozambo. Tenepo, iwo adalira mwamphanvu aciti: ‘Jezu, Mpfunzisi, tibvereni nsisi!’ Ndipo wense adapozedwadi. Tinkupenukira lini kuti wense adatenda kwene-kwene kudeka mtima komwe Jezu adawalatiza. Koma ni m’bodzi yekha omwe adalatiza kutenda bzomwe adacitiridwabzo, mwa kuyenda kukauza * Jezu momwe akhabvera mu mtima mwace. Thangwe ra kupozedwako, mwamunayo adafika mpaka pa kutumbiza Mulungu ‘mwakucita kukuwa.’—Luka 17:12-19.
2-3. (a) Thangwe ranyi mpsakufunika kumbatenda? (b) Kodi mu nkhani ino tin’pfunza ciyani?
2 Ninga Msamariya ule, ifepano timbafuna kutenda wale omwe ambatidekera mtima. Koma nthawe zinango, tingayebwe kutenda mwa mafala na bzicito kwa wale omwe atidekera mtima.
3 Mu nkhani ino, tiniwona thangwe race mpsakufunika kwa ifepano kumbatenda mwa mafala na bzicito. Tin’pfunzambo na bziratizo bza wanthu wa m’Bibliya omwe adalatiza kutenda na omwe alibe kutenda. Patsogolo pace, tiniwona njira zakusiyana-siyana za momwe tingalatizire kutenda kwathu.
THANGWE RANYI TIN’FUNIKA KUMBATENDA?
4-5. Thangwe ranyi tin’funika kumbatenda munthu akatithandiza?
4 Yahova ni ciratizo cabwino kwa ifepano pa nkhani ya kutenda. Ndipo njira ibodzi ya momwe iye ambalatizira kutendako ni kusimba wale omwe ambacita bzinthu bzomwe bzimbamukondwesa. (2 Samuweri 22:21; Psalymo 13:6; Mateu 10:40, 41) Ndipo Bzinembo bzimbatilimbisa kuti tikhale ‘anyakutewezera Mulungu ninga wana wakufunidwa.’ (Wayefezo 5:1) Tenepo, thangwe likulu lomwe limbaticitisa kumbatenda winango ni kufuna kutewezera ciratizo ca Yahova.
5 Bwerani tiwone thangwe linango lomwe limbaticitisa kufuna kutenda winango. Kutenda kuli ninga cakudya cabwino, comwe cimbakoma kwene-kwene tikambadya pabodzi na anzathu. Ifepano timbakomedwa kwene-kwene tikadziwa kuti wanthu winango ankutenda bzomwe timbacita. Ndipo kutenda kwathu, kumbakondwesa winango. Tikambatenda munthu thangwe ra bzomwe waticitira iye ambawona kuti nyongo yomwe wacita kuti atithandize, iribe kuyenda papezi. Bzimwebzi bzin’dzacitisa kuti mbverano wathu na munthuyo ukhale wakulimba kwene-kwene.
6. Thangwe ranyi tingalewe kuti mafala yakutenda yali ninga maçã yakukonzedwa na oro?
6 Mafala yakutenda njakufunika kwene-kwene. Bibliya limbalewa kuti: ‘Mafala yakulewa-lewedwa pa nthawe yakuthemera yali ninga cisapo ca maçã ya ouro mu mbale za siriva.’ (Mimwani 25:11) Ndokumbukirani momwe maçã yakukonzedwa na oro na siriva yambakhalira yakudeka! Ndipo kumbukiranimbo momwe yambakhalira yakufunika! Kodi imwepo mungabzibve tani munthu akakupasani mphaso ninga imweyi? Mwakusaya kupenukira, mungakomedwe kwene-kwene, ndipo mafala yakutenda yomwe mungauze munthuyo yangakhale yakufunika. Ndipo ninga momwe maçã ya oro yambakhalira nthawe izinji, mpsibodzi-bodzi na ifepano, mafala yakutenda yomwe tingalewe kwa munthu omwe watithandiza, angambayakumbukire na kuyatenda kwa moyo wace wense.
MOMWE WANTHU WINANGO ADALATIZIRA KUTENDA KWAWO
7. Mwakubverana na cinembo ca Psalymo 27:4, kodi n’ciyani comwe Davide adacita, ndipo anembi winango wa bukhu psalymo adalatiza tani kutenda kwawo?
7 Atumiki azinji wa Mulungu adalatiza kuti akhamutenda. M’bodzi wa iwo akhali Davide. (Werengani Psalymo 27:4. *) Iye akhatenda kwene-kwene kunamata kwakucena ndipo adalatiza kutenda kwaceko na bzicito. Iye adapereka bzinthu bzizinji kuti bzithandizire pa kumangidwa kwa templo. Winango omwe adalatiza kutenda kwawo ni mbadwo za Azafe, iwo adacita bzimwebzo mwa kunemba mapsalymo, ayai nyimbo zacitumbizo. Ndipo m’mafala ya nyimbo ibodzi, iwo adatenda Mulungu ndipo adafotokoza bza ‘mabasa [yace] yakudabwisa.’ (Psalymo 75:1) Kulewa cadidi, Davide pabodzi na mbadwo za Azafe akhafuna kulatiza kutenda kwawo pa bzisimbo bzense bzomwe Yahova akhadawapasa. Kodi imwepo mungatewezerembo tani ciratizo cawo?
Kodi tsamba lomwe Paulo adanembera gwere la Roma limbatipfunzisa ciyani pa nkhani yakutenda? (Onani ndime 8-9) *
8-9. Kodi n’ciyani comwe Paulo adacita bzomwe bzidalatiza kuti akhatenda abale na mpfumakazi, ndipo bzakutewera bzace bzidakhala bziponi?
8 Mpostolo Paulo akhatenda abale pabodzi mpfumakazi ndipo akhacita bzimwebzo na momwe iye akhalewera bza iwo. Nthawe zense iye akhambatenda Mulungu thangwe ra kumupasa abalewo ndipo iye akhacita bzimwebzi m’mipembo yomwe akhaicita payekha. Ndipo njira inango yomwe iye adaphatisa basa yakulatiza kuti akhawafuna ni kuwanembera matsamba. Mwa ciratizo, kuyambira vesi yakutoma mpaka vesi 15 ya Waroma kapitulo 16, Paulo adaguma madzina ya Akristau anzace wakukwana 27. Iye adakumbukira kwene-kwene bza Priska na Akila pakuti ‘adaikha moyo wawo pa ngozi’ thangwe ra iye, ndipo adafotokozambo bza Febe kuti akhali ‘mkhotco wa wanthu azinji,’ kuphatanidzambo iye kubodzi. Paulo adatenda kwene-kwene abale na mpfumakazi zomwe zikhaphata basa na nyongo.—Waroma 16:1-15.
9 Paulo akhadziwa kuti abale pabodzi na mpfumakazi zire zikhali zakuperewera, ndipo mu tsamba lace lomwe adanembera abale wa ku Roma, iye adandofotokoza bza makhalidwe yawo yabwino. Ndokumbukirani momwe abalewo adalimbisidwira pomwe adabva mafala yakutenda yomwe Paulo adawanembera yankuwerengedwa mwakukuwa m’gwere! Ninga bzakuteweza bzace, mbverano wa abalewo na Paulo udakhala wamphanvu kwene-kwene. Kodi imwepo mumbatenda abale wanu wa m’gwere akalewa na kucita bzinthu bzabwino?
10. Kodi tingapfunze ciyani na momwe Jezu adalatizira kutenda ateweri wace?
10 Tsamba lomwe adatumizira magwere ya ku Ásia Menor, Jezu adafotokoza mafala yakutenda basa lomwe ateweri wace adacita. Mwa ciratizo, tsamba lomwe adatumizira gwere la Tiyatira adayamba na mafala yakuti: ‘Ndikudziwa bwino mabasa yako, lufoyi lako, cikhulupiro cako, utumiki bwako na kupirira kwako ndipo ndikudziwa kuti bzicito bzako bzatsapano mpsizinji kwene-kwene kuposa bzakale-kale.’ (Cibvumbulutso 2:19) Jezu alibe kundofotokoza kokha bza kuthumizirika kwa mabasa yawo, koma adawatenda thangwe ra mikhalidwe yomwe ikhawacitisa kuti acite bzinthu bzabwino. Napo Jezu akhafunikira kutsimula wanthu winango wa ku Tiyatira, iye adayamba ndipo adamaliza na mafala yakulimbisa. (Cibvumbulutso 2:25-28) Ndokumbukirani bza udindo bomwe Jezu anabo ninga msolo wa magwere yense. Iye akhafunika lini kumbatitenda thangwe ra basa lomwe timbamucitira. Napo bziri tenepo, iye ambatitenda. Cimweci ni ciratizo cabwino kwene-kwene kwa akulu wa gwere!
MOMWE WANTHU WINANGO ADALATIZIRA KUSAYA KUTENDA
11. Mwakubverana na cinembo ca Wahebereu 12:16, kodi Esau adalatiza tani kusaya kutenda bzinthu bzakupambulika?
11 Mpsakupasa nsisi kuti, wanthu winango wa mu nthawe zakale adalatiza kusaya kutenda. Mwa ciratizo, napo Esau adaleredwa na abereki omwe akhafuna na kulemekeza Yahova, iye akhatenda lini bzinthu bzakupambulika. (Werengani Wahebereu 12:16. *) Kodi iye adacita tani bzimwebzo? Esau adagulisa ukulu bwace bwakuyamba kubadwa kwa m’bale wace ng’ono, Djakobi, mwa kucinjanisa ukulu bwacebo na mbale ya kamphodza. (Ciyambo 25:30-34) Patsogolo pace, Esau adasunama kwene-kwene thangwe ra cakusankhula caceco. Ndipo thangwe rakuti alibe kutenda udindo bomwe akhanabo, iye akhalibe mathangwe yakubveka yakudandaulira pomwe alibe kupasidwa bzisimbo thangwe ra kukhala wakuyamba kubadwa.
12-13. Kodi Ajirayeri adalatiza tani kusaya kutenda, ndipo bzakutewera bzace bzidakhala bziponi?
12 Ajirayeri akhana mathangwe mazinji yakulatizira kutenda Yahova. Iwo adatsudzulidwa ku ukapolo bwa ku Edjipito pomwe Yahova adabweresa Matsoka Khumi ku dzikolo. Patsogolo pace, Mulungu adawapulumusa mwa kupfudza anyankhondo wense wa Edjipito pa Nyanza Ifuira. Pomwe bzimwebzi bzidacitika Ajirayeri adatenda mwa kuimba nyimbo yakukunda yomwe ikhatumbiza Yahova. Kodi iwo adapitiriza kutenda?
13 Pomwe Ajirayeri adagumana na bzineso bzipsa, iwo adayebweratu bzinthu bzense bzabwino bzomwe Yahova akhadawacitira. Bzimwebzi bzidacitisa kuti iwo awoneke padeca kuti akhali wanthu wakusaya kutenda. (Psalymo 106:7) Kodi iwo adacita tani bzimwebzo? ‘Ajirayeri wense adayamba kung’ung’udzira Mozeji pabodzi na Aroni m’dambo.’ Koma cadidi n’cakuti, iwo akhang’ung’udzira Yahova. (Kufuluka 16:2, 8) Tenepo, Yahova adasunama kwene-kwene thangwe ra kusaya kutenda kwa wanthu wacewo. Na kupita kwa nthawe, iye adalewa kuti mtundu wense wa Jirayeri ungadafera m’dambo, koma angadasala ni Djosuwe na Kalebe yekha. (Mirewengo 14:22-24; 26:65) Tsapano bwerani tiwone momwe tingatcenkhere bziratizo bzakuipa ticitewezera bzabwino.
MOMWE TINGALATIZIRE KUTENDA NSIKU ZINO
14-15. (a) Kodi wanthu wakulowolana angalatize tani kuti ambatendana? (b) Kodi abereki angapfunzise tani wana wawo pa nkhani ya kutenda?
14 M’banja. Banja limbagumana phindu penu wanthu wense wa m’banjamo ambatendana. Wanthu wakulowolana akambatendana, uxamwali bwawo bumbakhala bwakulimba kwene-kwene. Bzimwebzi bzimbacitisa kuti akaphonyerana alekererane mwakusaya kunesa. Mwamuna an’funika kumbatumbiza mkazace sikuti kumbamutenda kokha penu walewa ayai wacita bzinthu bzabwino. (Mimwani 31:10, 28) Ndipo mkazi wanzeru ambauza bayace bzinthu bzabwino bzomwe ambadekedwa nabzo kwa bayaceyo.
15 Abereki, kodi mungapfunzise tani wana wanu pa nkhani ya kutenda? Lekani kuyebwa kuti wana wanu an’dzatewezera bzomwe imwepo mumbalewa na kucita. Tenepo, mbaperekani ciratizo cabwino kwa wana wanu mwa kuwatenda akakucitirani cinthu cabwino. Ndipo pfunzisani wanawo kuti ambatende munthu akawacitira ayai akawapa cinthu. Athandizeni kuti ambatende kucokera pansi pa mtima, aciwona kuti kucita bzimwebzi kumbacitisa kuti munthu omwe wawathandizayo abzibve bwino. Ciratizo pa nkhaniyi ni mtsikana munango wakucemeredwa Clary, iye adati: “Pomwe mai wangu akhana magole 32, adakhala na wana atatu ndipo akhawalera wokha. Ndipo pomwe inepano ndidapfitsambo magole 32, ndidakumbukira momwe bzinthu bzikhaliri bzakunesa kwa iwo pomwe akhana magole yamweya. Tenepo, ndidawauza kuti ndikutenda kwene-kwene bzinthu bzense bzomwe iwo adacita pa kulera ine pabodzi na abale wangu. Ndipo tsapanopapa, iwo adandiuza kuti mafala yomwe ndidalewayo njakufunika kwene-kwene kwa iwo, ndipo mpaka pano nthawe zense ambayakumbukira.”
Pfunzisani wana wanu momwe angalatizire kutenda (Onani ndime 15) *
16. Fotokozani ciratizo cakuwonesa kuti kutenda kumbalimbisa winango.
16 M’gwere. Tikambatenda abale na mpfumakazi zathu za m’gwere zimbalimbisidwa kwene-kwene. Ciratizo pa nkhaniyi ni Jorge, omwe ankutumikira ninga mkulu wa gwere ndipo ana magole 28 yakubadwa, iye adaduwala matenda makulu. Ndipo thangwe ra kuduwalako iye adamala mwezi ne kufika pa mitsonkhano ya gwere. Tsono pomwe iye adacira, aciyamba pomwe kumbayenda ku mitsonkhano, akhakwanisa lini kumbacita mbali pa mitsonkhanoyo. Jorge adalewa kuti: “Thangwe ra kutazira kucita mabasa yakusiyana-siyana pa mitsonkhano ndikhabziwona kuti ndine wapezi-pezi ndipo ndikhalibe na basa. Koma pambuyo pa mtsonkhano, m’bale munango adandiuza kuti: ‘Ndikufuna kukutendani thangwe ra ciratizo cabwino comwe mwapereka kwa banja langu. Ndikutenda kwene-kwene nkhani zanu zomwe mudazifotokoza m’magole ya mbuyomu. Nkhani zanu zidalimbisa cikhulupiro ca tensene m’banja lathu.’ Mafalaya yadanditokonya kwene-kwene ndipo ndidayamba kugwesa misozi. Inepano ndikhafunisisa kubva mafala ninga yamweya.”
17. Mwakubverana na cinembo ca Wakoloso 3:15, kodi tingatende tani Yahova thangwe ra bzinthu bzomwe ambatipasa?
17 Timbatende Mulungu wathu omwe ni mpasi. Yahova ambatipasa cakudya cizinji cauzimu. Mwa ciratizo, timbatambira malango yakutithandiza kucokera pa mitsonkhano, m’mabukhu na pa webisaite yathu. Kodi imwepo mudabvesera kale na kuwerenga nkhani, ayai kuwona vidiyo mu programa ya broadcasting, ndipo patsogolo pace mucilewa kuti, ‘Imweyi ni nkhani yomwe ndikhaifunisisa kwene-kwene’? Kodi tingatende tani Yahova thangwe ra bzinthu bzimwebzi? (Werengani Wakoloso 3:15. *) Njira ibodzi yakulatiza kutenda kwathu ni kumbaguma m’mipembo mwathu bzinthu bzabwino bzomwe iye ambatipasa.—Tiyago 1:17.
Kusamalira na kucenesa Nyumba ya Umambo kumbalatiza kutenda kwathu (Onani ndime 18)
18. Kodi tingalatize tani kuti timbatenda Nyumba yathu ya Umambo?
18 Timbalatizambo kutenda kwathu Yahova tikambacenesa na kusamalira bwino m’mbuto zomwe timbanamatira. Tenepo, tin’funika kumbacenesa na kusamalira Nyumba zathu za Umambo, ndipo wale omwe ambaphata basa na mitcini ya gwere yakukuzira mafala, an’funika kumbaisamalira bwino kuti ireke kudzongeka. Ndipo tikambasamalira bwino Nyumba zathu za Umambo, zin’dzakhala nthawe izinji ndipo pan’dzakhala lini na bzinthu bzizinji bzakufuna kukonzedwa. Tikacita bzimwebzi, tin’dzakhala na kobiri zizinji zomwe tingadzaziphatisire basa pa kumanga na kukonza Nyumba za Umambo zomwe zadzongeka pa dziko la pansi.
19. Kodi mungapfunze ciyani na bzomwe bzidacitika na nyakunyang’anira dera munango pabodzi na mkazace?
19 Timbatende wale omwe ambaphata basa na nyongo. Tikambatenda winango, mafala yathu yomwe timbalewa yambacitisa munthuyo kucinja momwe ankuwonera mabvuto yomwe ankugumana nayo. Ciratizo pa nkhaniyi ni bzomwe bzidacitika na nyakunyang’anira dera munango pabodzi na mkazace. Nsiku inango pomwe akhali mu utumiki bwa kumunda adabwerera wakuneta thangwe kukhadjedjera kwene-kwene. Ndipo thangwe ra kudjedjerako mkazace adacita kufunika batci kuti abve kuthuma. Pomwe kudacena, mkaziyo adauza mwamuna waceyo kuti angadakwanisa lini kupitiriza kutumikira. Tsono pomwe padapita nthawe yakucepa macibese yale, adatambira tsamba lakucokera ku nthambi ndipo tsambalo akhadanembera mkaziyo. Mafala ya mu tsambalo yakhatenda basa na kupirira kwa mkazi ule. Iro lidalewa pomwe kuti mpsakunesa kucinja-cinja mbuto yakukhala mdzinga uli-wense. Mwamuna wace adalewa kuti: “Mkazangu adatokonyedwa kwene-kwene na mafala ya m’tsambalo ndipo alibe kudzalewa pomwe bza kusiya kutumikira. Ndipo nthawe zizinji iye akhandilimbisa kupitiriza kutumikira ndikakumbuka bza kusiya kutumikira ninga nyakunyang’anira dera.” Banjali lidatumikira ninga nyakunyang’anira dera pafupi-fupi magole 40.
20. Kodi tin’funika kumbacita ciyani nsiku zense, ndipo thangwe ranyi?
20 Tin’funika kucita nyongo kuti timbatende winango nsiku zense mwa mafala na bzicito bzathu. Mafala yathu yakucokera pansi pa mtima na bzicito bzathu bzingacitise munthu kulimbana na mabvuto yomwe ankugumana nayo nsiku na nsiku, pomwe tinkukhala m’dziko lomwe wanthu azinji ambafuna lini kutenda. Ndipo mafala yathu ya kutenda yan’dzamangirira uxamwali bomwe bun’dzakhala mpaka kale-kale. Kuposa bzense, tin’dzatewezera mpasi wathu, Yahova.
NYIMBO 20 Mudapereka Mwana Wanu Wakubadwa Yekha
^ ndi. 5 Kodi tingapfunze ciyani kwa Yahova, Jezu pabodzi na Msamariya nyamapere pa nkhani ya kutenda? Mu nkhani ino tin’cezerana bziratizo bzimwebzi na bzinango. Tiniwona thangwe ranyi mpsakufunika kumbatenda na njira zomwe tingalatizire kutendako.
^ ndi. 1 KAFOTOKOZEDWE KA MAFALA MANANGO: Kutenda. Ni mafala yomwe yambalatiza kuzindikira kwa munthu akacitiridwa cinthu cabwino na munthu munango. Tenepo, kutenda ni mafala yomwe yambalatiza momwe munthu ankubvera mu mtima mwace.
^ ndi. 7 Psalymo 27:4 Cinthu cibodzi ndidakumbira Yahova, ni comwe ndidapsaga kuti ndikhale mu nyumba ya Yahova nsiku zensene za moyo wangu, kuti ndiwone ubwino bwa Yahova kuti ndinyang’anise templo yace mwakutenda.
^ ndi. 11 Wahebereu 12:16 Ndipo muwonesese kuti pakati panu paleke kuwoneka munthu wakucita upombo, ne munthu wakusaya kutenda bzinthu bzakupambulika ninga Esau, omwe adacinjanisa ugo bwace bwakukhala mwana wakuyamba kubadwa na cakudya comwe angadadya kabodzi kokha.
^ ndi. 17 Wakoloso 3:15 Ndipo mtendere wa Kristu unyang’anire mitima yanu, pakuti mudacemeredwera iwo mu thupi libodzi. Ndipo latizani kuti ndimwe wakutenda.
^ ndi. 58 BZOMWE BZINKUCITIKA PA CITHUNZI-THUNZI Tsamba: Paulo ankuwerengera tsamba gwere la Roma, Akila, Prisila, Febe na Akristau winango ankukomedwa thangwe ra kubva kuti madzina yawo yagumidwa mu tsambalo.
^ ndi. 60 BZOMWE BZINKUCITIKA PA CITHUNZI-THUNZI Tsamba: Mai ankuthandiza mwanace momwe angalatizire kutenda ciratizo ca mpfumakazi inango yacikulire.
