1. Kon e hòmber samaritano ku Hesus a kura a mustra apresio?

E DIES hòmbernan tabata desesperá. Dikon? Pasobra nan tabatin lepra i nan no tabatin speransa di kura. Nan a tende ku Hesus, e Gran Maestro, tabata kura tur sorto di malesa, i nan tabata konvensí ku e por a kura nan tambe. P’esei, ora ku un dia nan a mir’é djaleu, nan a grita: “Hesus, Maestro, tene miserikòrdia di nos!” El a kura tur e dies hòmbernan. Sin duda, nan tur tabata masha gradisidu, pero ta un di nan so a ekspresá apresio * pa loke Hesus a hasi. E hòmber samaritano ei a sintié motivá pa “glorifiká Dios na bos haltu.”—Luk. 17:12-19.

2-3. (a) Kiko por stroba nos di mustra apresio? (b) Kiko nos lo trata den e artíkulo akí?

² Meskos ku e hòmber samaritano, nos tambe ke ekspresá apresio na hende ku ta trata nos bon. Pero tin biaha, nos ta lubidá di bisa danki òf di mustra un persona ku nos ta apresiá loke el a hasi.

³ Den e artíkulo akí, nos lo wak dikon ta importante pa nos ekspresá apresio ku palabra i echo. Ademas, nos lo trata ehèmpel di algun personahe bíbliko ku tabata gradisidu i otronan ku no tabata. Despues, nos lo analisá algun manera spesífiko ku nos por mustra apresio.

4-5. Dikon nos tin ku mustra apresio?

⁴ Yehova ta pone un bon ehèmpel den mustra apresio. Un manera ku e ta hasi esei ta di rekompensá hende ku ta agrad’é. (2 Sam. 22:21; Sal. 13:6; Mat. 10:40, 41) I Beibel ta animá nos pa “imitá Dios, komo yunan stimá.” (Efe. 5:1) Pues, un motibu importante dikon nos tin ku mustra apresio ta pasobra nos ke imitá Yehova.

⁵ Tin un otro motibu dikon nos ke mustra apresio pa otro hende. Nos ta keda kontentu ora nos ta sinti ku hende ta apresiá nos. Nos ta hasi otro hende kontentu ora nos ta mustra nan nos apresio. Dikon? Pasobra e ora ei nan sa ku e esfuerso ku nan a hasi pa yuda nos, òf pa duna nos algu ku nos tabatin mester, tabata bale la pena. Komo resultado, nos amistat ku nan ta bira mas fuerte.

6. Den ki sentido nos por kompará palabra di apresio ku apel di oro?

⁶ Nos palabranan di apresio ta hopi balioso. Beibel ta bisa: “Un palabra papiá na ora apropiá ta manera un apel di oro den montura di plata.” (Pro. 25:11) Imaginá bo kon bunita i balioso un apel di oro den montura di plata ta! Kon lo bo sinti bo si bo haña un regalo asina? Wèl, nos palabranan di apresio pa un hende por ta mes balioso. Ademas, meskos ku un apel di oro por dura pa hopi tempu, asina tambe hende por keda kòrda nos palabranan di apresio pa restu di nan bida.

7. (a) Segun Salmo 69:30, kon David a ekspresá su apresio? (b) Kon e desendientenan di Asaf a ekspresá nan apresio?

⁷ Hopi sirbidó di Dios den pasado a mustra apresio. Un di nan tabata David.  (Lesa Salmo 69:30.) David tabatin masha apresio pa adorashon berdadero i a demostrá esaki ku echo. El a kontribuí gran parti di su rikesa pa konstrukshon di e tèmpel. Un otro ehèmpel ta e desendientenan di Asaf. Nan a skirbi hopi salmo, òf kantika di alabansa, pa ekspresá nan apresio. Por ehèmpel, den un kantika nan a gradisí Yehova i a ekspresá nan atmirashon pa su “obranan maravioso.” (Sal. 75:1) Ta bisto ku David i e desendientenan di Asaf kier a mustra Yehova kuantu nan tabata apresiá tur e bendishonnan ku nan a risibí for di dje. Bo por pensa algun manera ku bo por imitá nan?

8-9. Kon apòstel Pablo a mustra apresio pa su rumannan, i kiko sin duda tabata e resultado?

⁸ Apòstel Pablo tabatin hopi apresio pa su rumannan, i el a mustra esei na e manera ku el a papia di nan. Semper el a gradisí Dios pa nan den su orashonnan personal. Ademas, den e kartanan ku el a skirbi, el a laga nan sa kuantu e ta apresiá nan. Na Romanonan 16:1-15, Pablo a menshoná 27 ruman pa nòmber. Por ehèmpel, el a bisa ku Priska ku Akila “a riska nan bida” p’e, i el a deskribí Febe komo un “defensor di hopi ruman,” inkluso di Pablo. El a elogiá e rumannan stimá ei, ku tabata traha hopi duru.

⁹ Pablo tabata sa ku su rumannan tabata imperfekto, pero na final di su karta na e Romanonan, el a skohe pa enfoká riba nan bon kualidatnan. Imaginá bo kon bon e rumannan ei a sinti nan ora ku, dilanti di henter e kongregashon, nan a tende loke Pablo a skirbi tokante nan! Sin duda, esei a hasi nan amistat ku Pablo mas fuerte. Awor puntra bo mes: ‘Mi ta ekspresá apresio regularmente na e rumannan di mi kongregashon pa tur e kosnan bon ku nan ta bisa i hasi?’

10. Kiko nos por siña for di e manera ku Hesus a ekspresá apresio pa su siguidónan?

¹⁰ Den e mensahenan ku Hesus a duna algun kongregashon na Asia Menor, el a ekspresá apresio pa loke su siguidónan a hasi. Por ehèmpel, el a kuminsá su mensahe na e kongregashon di Tiatira ku e siguiente palabranan: “Mi konosé bo obranan, i bo amor, fe, sirbishi i perseveransia, i mi sa ku bo obranan di awor ta mas ku esnan di ántes.” (Rev. 2:19) Hesus no solamente a menshoná ku nan a oumentá nan aktividat, sino tambe el a elogiá nan pa e bunita kualidatnan ku a motivá nan echonan. Aunke Hesus mester a korigí algun di e rumannan na Tiatira, tòg el a kuminsá i kaba su mensahe ku animashon. (Rev. 2:25-28) Djis pensa kuantu outoridat Hesus tin komo kabes di tur kongregashon. E no tin nodi di gradisí nos pa e trabou ku nos ta hasi p’e. Tòg, e ta sòru pa mustra su apresio pa nos. Ki un bunita ehèmpel pa tur ansiano!

11. Segun Hebreonan 12:16, ki aktitut Esou tabatin relashoná ku kos sagrado?

¹¹ Lamentablemente, tin algun persona den Beibel ku no a mustra apresio. Por ehèmpel, Esou. Aunke su mayornan tabata stima i respetá Yehova, e no a apresiá kos sagrado. (Lesa Hebreonan 12:16.) Kon Esou a mustra ku e tabata malagradesí? El a kore bende su derecho di yu mayó ku su ruman, Yakòb, pa un simpel tayó di stobá. (Gén. 25:30-34) Mas despues, Esou a lamentá loke el a  hasi. Pero, komo ku e no a mustra apresio pa loke e tabatin, e no tabatin rason pa keha ora ku e no a haña e bendishon ku tabata pertenesé na e yu mayó.

12-13. Kon e israelitanan a mustra falta di apresio, i kiko tabata e resultado?

¹² E israelitanan tabatin hopi motibu pa mustra apresio. Yehova a manda dies plaga riba Egipto pa libra nan for di sklabitut. Despues, Yehova a destruí henter e ehérsito di Egipto den Laman Kòrá pa salba nan. E israelitanan tabata asina gradisidu ku nan a alabá Yehova ku un kantika di viktoria. Pero, akaso nan a keda gradisidu?

¹³ Nò, asina ku e israelitanan a haña nan ku difikultat atrobe, nan a lubidá tur e bon ku Yehova a hasi pa nan. Nan no a mustra apresio. (Sal. 106:7) Beibel ta bisa ku “henter e kongregashon di e yunan di Israel tabata murmurá den desierto kontra Moises i Aron.” Pero en realidat, nan tabata murmurá kontra Yehova. (Éks. 16:2, 8) E israelitanan tabata malagradesí. Esei a desapuntá Yehova asina tantu ku el a bisa ku henter e generashon ei di israelita lo muri den desierto, ku eksepshon di Hosue i Kalèb. (Num. 14:22-24; 26:65) Kon nos por evitá e mal ehèmpelnan akí i imitá e bon ehèmpelnan?

14-15. (a) Kon pareha kasá por mustra apresio pa otro? (b) Kon un mayor por siña su yu pa mustra apresio?

¹⁴ Den famia. Si kada miembro di famia mustra apresio, henter e famia ta benefisiá. Por ehèmpel, mas un pareha kasá ta mustra apresio pa otro, mas uní nan ta bira i mas fásil ta pa nan pordoná otro. Un esposo ku ta apresiá su esposa no solamente ta tuma nota di e bon kosnan ku e ta hasi i bisa, pero tambe “ta gab’é [òf, “elogi’é,” NW].” (Pro. 31:10, 28) Di otro banda, un bon esposa ta bisa su esposo spesífikamente kiko e ta apresiá di dje.

¹⁵ Mayornan, kon boso por siña boso yunan mustra apresio? Kòrda ku boso yunan lo imitá loke boso ta bisa i hasi. Pues, pone un bon ehèmpel pa nan i bisa danki ora nan hasi algu pa boso. Ademas, siña boso yunan bisa danki ora otro hende hasi algu pa nan. Yuda nan komprondé ku gratitut mester bini di nan kurason i ku nan palabranan por tin un bon efekto riba otro hende. Por ehèmpel, un  mucha muhé ku yama Clary a konta: “Ku 32 aña, diripiente mi mama a hañ’é ta lanta tres yu su so. Ora ami a hasi 32 aña, mi a realisá ku esei lo mester tabata hopi difísil p’e. Pues, mi a bis’é kon gradisidu mi ta pa tur loke el a sakrifiká pa lanta ami ku mi ruman hòmbernan. Poko tempu pasá, mi mama a bisa mi ku el a apresiá mi palabranan mashá i ku e ta pensa hopi riba nan i ku e palabranan ei semper ta lag’é sinti felis.”

16. Duna un ehèmpel kon nos ta animá e rumannan ora nos ekspresá nos apresio pa nan.

¹⁶ Den kongregashon. Ora nos bisa nos rumannan ku nos ta apresiá nan, nos ta animá nan. Por ehèmpel, un ansiano di 28 aña ku yama Jorge a bira hopi malu. E no por a bai reunion pa un luna largu. Asta despues ku el kuminsá bai reunion bèk, e no por a duna parti. Jorge a bisa: “Debí na mi limitashonnan, mi tabata sinti ku mi no tabata sirbi pa nada pasobra mi no por a kumpli ku mi responsabilidatnan di kongregashon. Pero un biaha despues di reunion, un ruman hòmber a bisa mi: ‘Mi kier a gradisí bo pa e bon ehèmpel ku bo a pone pa mi famia. Bo no por imaginá bo kuantu bo diskursonan a animá nos durante e último añanan. Nan a hasi nos fe mas fuerte.’ Mi hemut a yena i mi wowo a yena ku awa. Su palabranan tabata eksaktamente loke mi tabatin mester.”

17. Segun Kolosensenan 3:15, kon nos por mustra Yehova ku nos ta apresiá su generosidat?

¹⁷ Pa nos Dios generoso. Yehova ta duna nos kuminda spiritual na abundansia. Por ehèmpel, nos ta haña bon instrukshon na nos reunionnan, den nos revistanan i riba nos websitenan. Bo a yega di tende un diskurso, lesa un artíkulo òf wak un programa di broadcasting i pensa: ‘Esei ta nèt loke mi tabatin mester’? Kon nos por mustra Yehova ku nos ta apresiá tur e regalonan akí? (Lesa Kolosensenan 3:15.) Un manera ta di gradisié regularmente den nos orashonnan.—Sant. 1:17.

18. Kon nos por mustra apresio pa nos Salòn di Reino?

¹⁸ Un otro manera di mustra nos apresio pa Yehova ta di mantené nos lugá di adorashon limpi i na òrdu. P’esei, nos ta partisipá regularmente den limpiesa i mantenshon di nos Salòn di Reino. Ademas, e rumannan ku ta traha ku ekipo di  zonido i vidio den kongregashon ta hasi esei na un manera kouteloso pa no daña e ekiponan ei. Si nos ta mantené nos Salònnan di Reino bon, nos por usa nan pa mas tantu tempu i lo tin ménos kos grandi pa drecha. Di e manera ei, lo tin mas plaka disponibel pa traha i renobá otro Salònnan di Reino rònt mundu.

19. Kiko nos por siña for di e eksperensia di un superintendente di sirkuito ku su kasá?

¹⁹ Pa e rumannan ku ta traha duru pa nos. Nos palabranan di apresio por kambia e manera ku un persona ta mira su difikultatnan. Esei ta loke a pasa ku un superintendente di sirkuito i su esposa. Despues ku nan a traha henter dia den sirbishi riba un dia hopi friu den wenter, nan a yega kas morto kansá. Tabata asina friu ku e esposa a drumi ku su yas di wenter bistí. Mainta, el a bisa su esposo ku e ta sinti ku e no por sigui den e trabou di sirkuito mas. E mesun mainta ei, e esposa a haña un karta for di sukursal. Den e karta, e rumannan a elogi’é pa su sirbishi i perseveransia. Nan a rekonosé kon difísil ta pa keda un kaminda diferente tur siman. Su esposo a bisa: “E palabranan ei a lag’é sinti asina bon ku nunka mas el a bisa ku e ke stòp ku e trabou di sirkuito. De echo, vários biaha ku ami tabata pensa pa stòp ku e trabou di sirkuito, ta e mes a animá mi pa sigui.” E pareha ei a keda den e trabou di sirkuito pa kasi 40 aña.

20. Kiko nos tin ku purba di hasi tur dia, i dikon?

²⁰ Laga nos hasi nos bèst tur dia pa mustra ku palabra sinsero i echo ku nos ta gradisidu. Loke nos bisa òf hasi por ta eksaktamente loke un otro hende mester pa sigui padilanti den e mundu malagradesí akí. I ora nos ta ekspresá apresio pa nos rumannan, nos lo sera amistatnan ku por dura pa semper. Mas importante ainda, nos ta imitá nos Tata, Yehova, kende ta generoso i yen di apresio.