8. ARTIKJEL FA DAUT STUDIUM
Wuarom sell wie Dankboakjeit wiesen?
“Siet dankboa” (KOL. 3:15)
LEET 138 Greiwe Hoa sent eene Ierenkroon
WAUT WIE SEENEN WOAREN *
1. Woo wees een Samarita, dän Jesus jeheelt haud, Dankboakjeit?
DE TIEEN leprakranke Mana wieren en eene schlemme Loag un hauden nich Hopninj, daut et wudd bäta woaren. Oba eenen Dach sagen dee Jesus, dän besondren Liera, von een Enj auf. Dee hauden jehieet, daut Jesus veschiedne Krankheiten heeld, un dee wieren sikj secha, daut hee an uk heelen kunn. Un dee schrieejen lud: “Jesus, Meista, hab Metleet met ons!” De tieen Mana worden gaunz jeheelt. Secha wieren dee aula sea dankboa fa Jesus sien Metleet. Oba eena von dee feeld nich bloos Wieetschazunk, * hee wees Jesus dee uk. Dis Samarita wia soo oppjebrocht, daut hee “Gott met lude Stemm” lowd (Luk. 17:12-19).
2-3. (a) Wuarom wies wie eenjemol veleicht nich Dankboakjeit? (b) Waut woa wie en disen Artikjel seenen?
2 Soo aus de Samarita well wie dee Dankboakjeit wiesen, waut goot to ons sent. Oba eenjemol vejät wie daut veleicht, onse Wieetschazunk met Wieed ooda Woakjen to wiesen.
3 En disen Artikjel woa wie seenen, wuarom ons daut wichtich sennen saul, onse Dankboakjeit derch daut to wiesen, waut wie sajen un doonen. Wie woaren enne Schreft eenje Biespels seenen von soone, waut dankboa wieren, un soone, waut nich wieren. Wie woaren seenen, en waut fa Stekjen krakjt wie kjennen Dankboakjeit wiesen.
WUAROM SELL WIE DANKBOAKJEIT WIESEN?
4-5. Wuarom sell wie Dankboakjeit wiesen?
4 Jehova es ons Väabilt doarenn, Dankboakjeit to wiesen. Eene Wajch, woo hee daut deit, es doaderch, daut hee dee beloont, waut am jefaulen (2. Sam. 22:21; Psa. 13:6; Mat. 10:40-41). De Schreft sajcht: “Aus Gott siene leewe Kjinja, sträft am emma änelja to woaren” (Efs. 5:1). De Hauptsach, wuarom wie sellen dankboa sennen, es, daut wie wellen Jehova nodoonen.
5 Well wie noch eene aundre Uasoak seenen, wuarom wie aundre wellen dankboa sennen. Dankboa sennen es soo aus eene scheene Moltiet, waut väl scheena schmakjt, wan wie dee met aundre toop haben. Wie sent schaftich, wan aundre ons schazen. Un wan wie aundre wiesen, daut wie dee schazen, dan moak wie dee schaftich. Wan wie wäm wiesen, daut wie dankboa sent, weet deejanja, waut ons halpt ooda ons waut jeft, daut siene Aunstrenjunk nich fa nuscht es. Un soo woa wie uk jratre Frind unjarenaunda.
6. Woo kaun eena dankboare Wieed met eene goldne Figua vejlikjen?
6 Daut es väl wieet, wan wie dankboa sent. De Schreft sajcht: “Een Wuat to rajchte Tiet jerät, es soo aus eene goldne Figua opp een selwanet Mosta” (Spr. 25:11). Stal die mol väa, woo schmock eene goldne Figua opp Selwa loten wudd! Un denkj mol han, woo dia dee nich sennen wudd! Woo wurscht du die feelen, wan du soon Jeschenkj kjrieechst? Na, aundre derch onse Wieed wiesen, daut wie dankboa sent, kaun bie dee krakjt soo väl wieet sennen. Un eene goldne Figua kaun soogoa fa emma hoolen. Soo kaun daut fa dee sennen, waut du Dankboakjeit wiest; dee woaren daut kjeenmol vejäten un nich opphieren, daut to schazen.
DEE WIEREN DANKBOA
7. (a) Woo wees David siene Dankboakjeit? (b) Woo deeden aundre Psalmenschriewa daut?
7 Väl von Gott siene Deena ieeschtemma weesen Dankboakjeit. Eent von dee wia David (läs Psalm 30:13). Hee räakjend de woare Aunbädunk sea väl, un daut wia aun siene Woakjen to seenen. Hee jeef väl diere Sachen toom dän Tempel buen. Asaf siene Nokomen weesen Dankboakjeit derch de Psalmen, ooda Dankleeda, waut see schreewen. En een Leet dankten see Gott un säden, woo see siene “Wundawoakjen” bewundaden (Psa. 75:2). Daut es kloa, daut David un Asaf siene Nokomen Jehova wiesen wullen, woo dankboa see fa aul siene Säajnungen wieren. Faulen die Mäajlichkjeiten bie, woo du dise Psalmenschriewa nodoonen kaust?
Waut lieet Paulus sien Breef aun de Reema ons äwa Dankboakjeit wiesen? (See Varsch 8-9) *
8-9. (a) Woo wees de Apostel Paulus, daut hee siene Breeda un Sestren schazt? (b) Waut kjeem doa secha bie rut?
8 De Apostel Paulus schazt siene Breeda un Sestren sea, un daut wees hee doaderch, woo hee von an räd. Hee dankt Gott emma fa an en siene Jebäda. Hee wees daut uk, wan hee an schreef. En de ieeschte 15 Varzh von Reema 16 rät Paulus 27 Mol von siene Metchristen un nant dee biem Nomen. Paulus erwänt, woo Priszilla un Aquilla “äa Läwen fa . . . [am] opp Spell” jesat hauden, un hee sajcht von Feebe: “See haft väl aundre, un mie selfst uk, jeholpen.” Paulus lowd siene leewe Breeda un Sestren, waut schwoa schauften (Reem. 16:1-15).
9 Wan Paulus uk wist, daut siene Breeda un Sestren onvolkomen wieren, acht hee aum Enj von sienen Breef aun de Reema oba leewa opp äare goode Ieejenschoften. Stal die väa, woo väl Moot dee daut nich mott jejäft haben, aus de Breef, wua Paulus an lowd, en de Vesaumlunk väajeläst wort! Un secha worden see doaderch noch jratre Frind met Paulus. Wiest du de Breeda un Sestren en diene Vesaumlunk, daut du dankboa best fa daut, waut dee sajen un doonen?
10. Waut kjenn wie doavon lieren, woo Jesus wees, daut hee Wieetschazunk fa siene Nofolja haud?
10 Jesus siene Wieed aun eenje Vesaumlungen en Kjlien-Asien wiesen, daut hee Wieetschazunk haud fa daut, waut siene Nofolja doa deeden. Toom Biespel fungen siene Wieed aun de Vesaumlunk en Tiatira soo aun: “Ekj weet om diene Woakjen, diene Leew, dien Deenst, dien Gloowen un diene Jedult [om], un daut du emma mea aunfangst to doonen” (Opb. 2:19). Jesus erwänd nich bloos, daut see emma mea deeden, oba hee lowd an uk fa äare Ieejenschoften, waut an bat doa brochten, goodet to doonen. Wan Jesus uk eenje en Tiatira must Rot jäwen, wieren siene ieeschte un latste Wieed oba toom an lowen un Moot toospräakjen (Opb. 2:25-28). Denkj mol äwa de Macht no, waut Jesus aus Haupt von aule Vesaumlungen haft. Hee wudd sikj nich derwen bedanken fa de Oabeit, waut wie fa am doonen, oba hee wiest doawäajen, daut hee Wieetschazunk doafäa haft. Hee es een sea goodet Väabilt fa de Eltestasch.
DEE WIEREN NICH DANKBOA
11. Waut vonne Enstalunk haud Esau, soo aus Hebräa 12:16 sajcht?
11 Daut es truarich, oba eenje Menschen von de Bibeltiet weesen, daut see nich dankboa wieren. Wan Esau biejlikj uk von Elren oppjetrocken wia, waut Jehova leewden un respakjten, wia hee doawäajen nich dankboa fa heilje Sachen (läs Hebräa 12:16). Woo jinkj daut to seenen, daut hee ondankboa wia? Esau vekoft onbedocht sien Ieeschtjeburtsrajcht aun sienen jinjren Brooda Jakob; bloos fa een Komkje Borscht (1. Mo. 25:30-34). Lota beschod Esau daut bettalich. Oba hee wia ondankboa jewast fa daut, waut hee haud. Un doawäajen haud hee kjeene Uasoak, sikj to bekloagen, aus hee nich dän Säajen kjrieech, waut dän Ieeschtjebuarnen troff.
12-13. (a) Woo weesen de Israeliten, daut see ondankboa wieren? (b) Woo kjeem daut ut?
12 De Israeliten hauden väl Uasoaken Dankboakjeit to wiesen. Dee worden von de Sklowarie frie, nodäm aus Jehova de tieen Ploagen opp Ägipten brocht. Dan rad Gott an, aus hee aul de ägiptische Soldoten en daut Roode Mäa venicht. De Israeliten wieren soo dankboa, daut see een Leet sungen toom Jehova preisen. Oba bleewen dee dankboa?
13 Aus de Israeliten wada en Schwierichkjeiten wieren, vegauten dee bosich aul daut goode, waut Jehova fa an jedonen haud. See weesen dan, daut see nich dankboa wieren (Psa. 106:7). Woo weesen dee daut? “De Israeliten grumsaujden enne Wiltnis jäajen Moses un Aaron” – en Werkjlichkjeit grumsaujden dee jäajen Jehova (2. Mo. 16:2, 8). Jehova wia sea enteischt, daut sien Volkj soo ondankboa wia. Lota säd hee verut, daut dise Israeliten en de Wiltnis stoawen wudden, buta Josua un Kaleb (4. Mo. 14:22-24; 26:65). Well wie mol seenen, woo wie väabieejen kjennen, daut wie nich dise schlajchte Biespels nodoonen, oba de goode.
EN ONSE TIET DANKBOAKJEIT WIESEN
14-15. (a) Woo kjennen Ehepoatna sikj unjarenaunda Dankboakjeit wiesen? (b) Woo kjennen de Elren äare Kjinja lieren, dankboa to sennen?
14 Enne Famielje. Wan jieda eena enne Famielje dankboa es, haben aula eenen Nutzen doavon. Je mea de Ehepoatna unjarenaunda Dankboakjeit wiesen, je dolla woaren dee veeent. Un dee woat daut dan uk leichta sennen, dän aundren siene Fäla to vejäwen. Een Ehemaun, waut siene Fru schazt, woat daut goode, waut see deit un sajcht, nich bloos en, oba “hee loft ar” uk doafäa (Spr. 31:10, 28). Un eene weise Fru lat äaren Maun krakjt weeten, waut see bie am schazt.
15 Woo kjenn jie Elren june Kjinja lieren, dankboa to sennen? Denkjt doaraun, daut june Kjinja daut nodoonen, waut jie sajen un doonen. Doawäajen siet fa june Kjinja een goodet Väabilt un sajcht dankscheen, wan dee waut fa junt doonen. Un lieet de Kjinja uk, dankscheen to sajen, wan aundre waut fa dee doonen. Halpt dee to vestonen, daut Dankboakjeit vom Hoaten kjemt un daut äare Wieed väl goodet doonen kjennen. Eene junge Fru, waut Clary heet, sajcht biejlikj: “Aus miene Mame 32 Joa wia, bleef see auleen met äare dree Kjinja. Aus ekj 32 Joa wort, docht ekj doaräwa no, woo schwoa daut fa ar mucht en daut Ella jewast sennen. Doawäajen säd ekj to ar, woo dankboa ekj fa aul daut wia, waut see jedonen haud toom mie un miene Breeda opptrakjen. Korz säd see to mie, daut miene Wieed bie ar sea väl wieet wieren. See docht foaken aun dee un daut muak ar emma dän Dach schaftich.”
Lieet june Kjinja, Dankboakjeit to wiesen (See Varsch 15) *
16. Jeff een Biespel, woo aundre daut halpt, wan eena dankboa es.
16 Enne Vesaumlunk. Wan wie onse Breeda un Sestren Dankboakjeit wiesen, spräakj wie dee Moot too. Soo wia daut biejlikj bie Jorge, eenen 28-joaschen Eltesten. Hee wort schwoa krank un kunn fa eene Moonat nich no de Toopkomes wanken. Aus hee dan wada no de Toopkomes kjeem, kunn hee oba noch nich bie de Oppgowen oppem Plautform metmoaken. Jorge sajcht: “Ekj feeld mie soo, aus wan ekj to nuscht to brucken wia, wiels ekj miene Oppgowen en de Vesaumlunk wäajen miene Krankheit nich doonen kunn. Oba eemol säd een Brooda no een Toopkomen to mie: ‘Ekj well die dankscheen sajen fa dien feinet Väabilt, waut du miene Famielje jeefst. Du weetst nich, woo sea wie diene Räden jejleicht haben, waut du de latste poa Joa hautst. Dee haben ons jeholpen, em jeisteljen wiedatokomen.’ Daut jinkj mie soo to Hoaten, daut ekj blanke Uagen kjrieech. Siene Wieed wieren krakjt daut, waut mie fäld.”
17. Woo kjenn wie Jehova no Kolossa 3:15 no wiesen, daut wie dankboa doafäa sent, daut hee soo friejäwrich es?
17 Onsen friejäwajen Gott danken. Jehova jeft ons äwajenuach jeisteljet Äten. Biejlikj lia wie enne Toopkomes, enne Tietschreften un opp onse Websieden väl goodet. Hast du mol eene Räd jehieet, eenen Artikjel jeläst ooda een Video jekjikjt un jedocht: “Dit es krakjt daut, waut mie fäld”? Woo kjenn wie Jehova wiesen, daut wie am dankboa sent? (Läs Kolossa 3:15.) Eene Wajch es, am en onse Jebäda emma wada fa aul dise Jeschenkja to danken (Jak. 1:17).
Methalpen, daut Vesaumlungshus reintomoaken, es eene goode Mäajlichkjeit, Dankboakjeit to wiesen (See Varsch 18)
18. Woo kjenn wie wiesen, daut wie onse Vesaumlungshiesa schazen?
18 Wie wiesen Jehova uk onse Dankboakjeit, wan wie de Städ, wua wie am aunbäden, rein un oppjeriemt hoolen. Wie halpen pinkjlich met, onse Vesaumlungshiesa reintomoaken un to unjahoolen. Un dee, waut met daut Lautspieker-Jereetschoft vonne Vesaumlunk omgonen, paussen no daut opp. Wan wie onse Vesaumlungshiesa fein unjahoolen, dan woaren dee lenja hoolen un dee woaren nich soo foaken brucken trajchtjemoakt. Soo spoa wie Jelt, daut doa oppe gaunze Welt kjennen mea Vesaumlungshiesa jebut un oppjefrescht woaren.
19. Waut lia wie von daut, waut een Kjreisoppsechta un siene Fru beläwden?
19 Soone danken, waut väl fa ons doonen. Wan wie Dankboakjeit wiesen, kaun aundre daut halpen, bäta met de Schwierichkjeiten foadich to woaren, waut dee derchgonen. Räd wie mol äwa daut, waut een Kjreisoppsechta un siene Fru beläwden. Aus dee em Winta dän Dach äwa wieren em Deenst jewast, kjeemen see gaunz meed no Hus. Daut wia soo kolt, daut de Fru äaren Wintawanikj aunhilt toom schlopen. Zemorjes säd see to äaren Maun, see feeld, daut see nich mea em Kjreisdeenst sennen kunn. Noch dän Zemorjes kjeem doa een Breef vom Betel, un dee wia aun ar jeschräwen. En dän Breef wort see fa äaren Deenst un äa uthoolen jeloft. Doa säd daut uk, daut de Breeda wisten, woo schwoa daut sennen kunn, jieda Wäakj opp eene aundre Städ to sennen. Äa Maun sajcht: “Daut dee ar lowden, jinkj ar soo to Hoaten, daut see kjeenmol mea doavon räd, dän Kjreisdeenst opptohieren. Een poa Mol spruak see mie mau rajcht Moot too wiedatomoaken, wan ekj doamet opphieren wull.” Dit Poa Lied bleef meist 40 Joa em Kjreisdeenst.
20. (a) Waut sell wie jieda Dach proowen to doonen? (b) Wuarom sell wie daut doonen?
20 Well wie jieda Dach onse Dankboakjeit wiesen derch daut, waut wie sajen un doonen. Onse opprechtje Wieed un Woakjen kjennen veleicht krakjt daut sennen, waut aundre halpt, en dise ondankboare Welt noch eenen Dach lenja uttohoolen. Un wan wie wiesen, daut wie Wieetschazunk haben, dan kjenn wie Frind kjrieen, waut fa emma bliewen. Un waut noch wichtja es – wie doonen doaderch onsen friejäwajen un dankboaren Voda Jehova no.
LEET 20 Du hast dienen leewen Sän jejäft
^ Varsch 5 Waut kjenn wie von Jehova, von Jesus un von dän leprakranken Samarita äwa Dankboakjeit lieren? En disen Artikjel woa wie von dise un noch aundre Biespels räden. Wie woaren seenen, wuarom daut soo wichtich es, Dankboakjeit to wiesen, un woo krakjt wie daut doonen kjennen.
^ Varsch 1 WIEED UTJELAJCHT: Wieetschazunk fa wäm ooda fa waut to haben meent to vestonen, woo wieetvoll eene Persoon ooda eene Sach es. Dit Wuat bediet uk, een deepet Jefeel von Dankboakjeit to haben.
^ Varsch 55 BILTBESCHRIEWUNK: Paulus sien Breef woat en de Vesaumlunk en Room väajeläst; Aquilla, Priszilla, Feebe un aundre sent schaftich, äare Nomes to hieren.
^ Varsch 57 BILTBESCHRIEWUNK: Eene Mame halpt äare Dochta, fa daut goode Biespel, waut eene elre Sesta jeft, Wieetschazunk to haben.
