1. Ia duwen ohlen Sameria men me Sises ketin kamwahwihala eh kasalehda kalahngan?

OHL ehk ko mi nan irair uhdahn apwal ehu. Irail ahneki soumwahu en tokutok oh sohte arail koapworopwor me irail pahn mwahula. Ahpw rahn ehu, irail kilangada Sises, Sounpadahk Lapalapo, sang wasa doh. Irail rong me Sises ketin kamwahwihala soangen soumwahu koaros, oh re kamehlele me e pil kak ketin kamwahwihala irail. Irail eri ngihl laudida patohwan: “Maing Sounpadahk Sises, komw kupwurei kiht!” Ohl ehk ko koaros mwahula sang arail soumwahwo. Irail koaros uhdahn kalahnganki sapwellimen Sises kadek. Ahpw emen irail sohte ihte ahneki pepehm en kalahngan​—e kasalehda eh kalahngan * ong Sises. Ohlen Sameria menet me mwahulahr mwekidki en kapinga Koht “ni ngihl laud.”​—Luk 17:12-19.

2-3. (a) Dahme kahrehda kitail kakete sohte kasalehda kalahngan? (b) Dahme kitail pahn koasoiapene nan iren onop wet?

² Duwehte mehn Sameriao, kitail men kasalehda kalahngan ong irail kan me kin kadek. Ahpw ekei pak, ele kitail kin manokehla en nda kalahngan de kasalehiong meteikan ia atail pepehm ong arail kadek.

³ Nan iren onop wet, kitail pahn koasoiapene dahme kahrehda e kesempwal ong kitail en kasalehda kalahngan sang ni dahme kitail kin nda oh wia. Kitail pahn sukuhlkihsang mehn kahlemeng en ekei sang nan Paipel me kasalehda kalahngan oh pil meteikan me  sohte kin. Mwuhr kitail pahn koasoiapene ahl mwahu kan me kitail kak kasalehda kalahngan.

4-5. Dahme kahrehda kitail en kasalehda kalahngan?

⁴ Siohwa ketikihda mehn kahlemeng ong kitail en kasalehda kalahngan. Ehu ahl me e kin ketin wia met iei sang ni eh ketin kapaiahda irail kan me kin kaperenda ih. (2 Sam. 22:21; Mel. 13:6; Mad. 10:40, 41) Paipel pil kangoange kitail en “kahlemengih Koht, nin duwen seri kompoak kei.” (Ep. 5:1) Eri kahrepe keieu kesempwalo me kitail en kasalehda kalahngan iei kitail men idawehn sapwellimen Siohwa mehn kahlemeng.

⁵ Pil medewehla ehu kahrepe me kitail kin men kasalehda kalahngan ong meteikan. Kasalehda kalahngan kin rasehng ahnsoun mwengepene​—ni me tohto kin ehupene mwenge, e kin ehute kaperenla. Ni atail ese me meteikan kin kalahnganki dahme kitail wia, kitail kin peren. Ni atail kasalehda atail kalahngan, kitail kin kahrehda meteikan en peren. Aramaso me kitail kasalehiong kalahngan ese me eh nantihong en sewese kitail, de kihong kitail mehkot me kitail anahne, uhdahn sewese kitail. Imwilahn met, nanpwungmwahu nanpwungen kitail oh aramaso kin kehlailla.

6. Ia duwen lokaiahn kalahngan eh duwehte apel me wiawihkihda kohl?

⁶ Atail kasalehda kalahngan kin kesempwal. Paipel mahsanih: “Lokaia ehu ni ahnsou me konehng duwehte apel me wiawihkihda kohl oh kapwatkihda silper.” (Lep. Pad. 25:11, NW) Medewehla ia uwen kaselel en apel ehu me wiawihkihda kohl oh kapwatkihda silper! Oh medewehla ia uwen met eh kesempwal! Ia pahn omw pepehm ma ke alehdi soangen kisakis wet? Omw ndaiong meteikan kalahngan pil kak kesempwal duwehte met. Oh medewehla ire mehlel wet: Apel ehu me wiawihkihda kohl kak mihmi ahnsou uhdahn werei. Duwehte met, emen me ke kasalehiong wiewiahn  kalahngan ele kin tamataman oh kesempwalki erein eh mour.

7. Nin duwen me Melkahka 30:12 kasalehda, ia duwen Depit oh ekei sounnting en melkahka kan ar kasalehda arail kalahngan?

⁷ Tohto sapwellimen Koht ladu kan mahso kin kasalehda kalahngan. Emen rehrail iei Depit. (Wadek Melkahka 30:12.) E kin uhdahn kalahnganki kaudok min oh met kin sansalda sang eh wiewia kan. E toukihda laud kepwe kesempwal kan ong kokoudahn tehnpas sarawio. Kadaudok en Asap kan kasalehda arail kalahngan sang arail ntingihada melkahka kan, de koul en kaping kan. Nan ehu koul, re patohwan kasalehda kalahngan ong Koht oh kasalehda arail kapinga sapwellimen Siohwa “wiewia kapwuriamwei kan.” (Mel. 75:1) E sansal me Depit oh kadaudok en Asap kan men kasalehiong Siohwa ia uwen arail kalahnganki kapai kan koaros me re alehsang reh. Ke kak medewehda soangen ahl kan me ke kak alasang sounmelkahka pwukat?

8-9. Ia duwen wahnpoaron Pohl eh kasalehda kalahngan ong rie Kristian kan, oh ia imwilahn met?

⁸ Wahnpoaron Pohl kesempwalki rie Kristian kan oh e kin kasalehda met ni mwomwen eh kin koasoia duwen irail. Nan eh kapakap, e kin ahnsou koaros kalahngankihong Koht duwen irail. E pil kasalehda eh kalahngan ni ahnsou me e kin ntingla rehrail. Nan Rom 16:1-15, Pohl koasoia duwen rie Kristian meh 27 oh kasalehda adarail ko. Pohl koasoia duwen Persila oh Akwila me “mweidala ara mour en mihla nan keper” pwehki ih, oh e pil nda me Pihpe kin “sewese aramas tohto,” iangahki ih. E kasalehda eh kalahngan ong rie Kristian pwukat me kin doadoahk laud.

⁹ Pohl ese me rie Kristian kan sohte unsek, ahpw ni eh kaimwisekala nah kisinlikou ong mehn Rom kan, e pilada en koasoiahte arail irair mwahu kan. Medewehla ia uwen arail ale kangoang sang ni arail rong dahme Pohl ndao sang kisinlikowo me wadawadohng arail mwomwohdiso! Imwilahn met, arail nanpwungmwahu rehn Pohl uhdahn kehlailla. Ke kin kaukaule kasalehda kalahngan ong soahng mwahu kan me omw tohnmwomwohdiso kin nda oh wia?

10. Dahme kitail kak sukuhlkihsang mwomwen Sises eh ketin kasalehda kalahngan ong sapwellime tohnpadahk kan?

¹⁰ Nan eh mahsen kan ong ekei mwomwohdiso en Asia Minor, Sises ketin kasalehda eh kalahnganki doadoahk me sapwellime tohnpadahk ko wia. Karasepe, e ketin tepikihda mahsen pwukat ong mwomwohdiso en Daiadaira: “I ese omw wiewia kan, oh omw limpoak oh pwoson oh omw kin papah Koht oh dadaur, oh omw wiewia kan en rahn pwukat mwahusang me ke kin wia mahso.” (Kaud. 2:19) Sises sohte ihte mahsanih duwen kekeirdahn arail doadoahk ahpw e pil ketin kapingahkin irail irair kan me kamwakid arail wiewia mwahu kan. Mendahki Sises anahne ketin panawih ekei nan Daiadaira, e pil ketin doulahte tepikihda oh kaimwisekihla mahsen kangoang kan. (Kaud. 2:25-28) Medewehla manaman me Sises sapwellimanki nin duwen tapwin mwomwohdiso kan. E sohte anahne ketin kalahngankihong kitail doadoahk me kitail kin wia ong ih. Ahpw mendahki met, e kin ketin nsenohki en kasalehdahte kalahngan. Ia uwen met eh wia mehn kahlemeng mwahu ong elder kan!

11. Nin duwen me Ipru 12:16 kasalehda, soangen madamadau dah me Esau ahneki me pid soahng kan me sarawi?

¹¹ E kansensuwed me ekei irail nan Paipel sohte kin kasalehda kalahngan. Karasepe, mendahki Esau tikida rehn eh pahpa oh nohno me kin poakohng oh wauneki Siohwa, e sohte kasalehda eh kalahnganki soahng kan me sarawi. (Wadek Ipru 12:16.) Ia duwen eh soh kalahngan eh sansalda? Ni soh lamalam, Esau netikihong rie  pwutak tikitiko, Seikop, eh sohso pwehn ale kene sali weitahtaho. (Sen. 25:30-34) Mwuhr Esau inenen nsensuwedkihla pilipil me e wiahdao. Ahpw e sohte kalahnganki dahme e ahnekio, eri sohte kahrepen eh kaulim ni ahnsou me e sohte alehdi kapaipen eh sohso.

12-13. Ia duwen mehn Israel kan ar kasalehda arail soh kalahngan, oh ia imwilahn met?

¹² Mehn Israel ko ahneki kahrepe tohto en kasalehda kalahngan. Irail saledekla sang kalidu mwurin Siohwa ketin kalokehki Isip Kalokolok Eiseko. Mwuhr, Koht ketin doareirailla sang kahpwal ni eh ketin kamwomwala sounpei en Isip ko pwon nan Sehd Weitahtaho. Mehn Israel ko uhdahn kalahnganki met me kahrehda ren koulkihong Siohwa koul en kaping ehu. Ahpw ia duwe, re kolokolete arail kalahngan?

¹³ Ni mehn Israel ko ar lelohng kahpwal teikan, re mwadang manokehla soahng mwahu kan koaros me Siohwa ketin wiahda ong irail. Irail eri kasalehda arail soh kalahngan. (Mel. 106:7) Ia duwen? “Irail koaros eri kaulimala oh lipahnedihada Moses oh Aaron”​—ahpw ni mehlel, irail kaulime Siohwa. (Eks. 16:2, 8) Siohwa ketin kupwursuwedkihla madamadau en soh kalahngan me sapwellime aramas ako kasalehda. Mwuhr e ketin kohpada me dih en Israel pwon pahn mehla nan sapwtehno, ahpw kaidehn Sosua oh Kalep. (Nemp. 14:22-24; 26:65) Kitail pahn tehkpene ia duwen atail kak soikala idawehn mehn kahlemeng suwed pwukat oh alasang mehn kahlemeng mwahu kan.

14-15. (a) Ia duwen pwopwoud kan arail kak kasalehda arail kalahnganki emenemen? (b) Ia duwen pahpa nohno kan arail kak padahkihong neirail seri kan en kasalehda kalahngan?

¹⁴ Nan peneinei. Peneinei pwon kin paiekihda ni emenemen tohn peneineio eh kasalehda kalahngan. Ni pwopwoud ehu ara kalaudehla ara kalahnganki emenemen, met pil kalaudehla ara karanihala emenemen. E pil mengeila ong ira en mahkohng ahn emenemen sapwung. Ohl pwopwoud men me kin kalahnganki eh pwoudo sohte kin ihte kilang soahng mwahu kan me eh pwoudo nda oh wia ahpw e pil kin “kapikapinga” ih. (Lep. Pad. 31:10, 28) Oh lih pwopwoud loalokong men kin ndaiong eh pwoudo dahme e kalahnganki reh.

¹⁵ Pahpa nohno kan, ia duwen amwail kak padahkihong noumwail seri kan en kasalehda kalahngan? Tamataman me noumwail seri kan pahn alasang dahme kumwail kin nda oh wia. Eri wiahda mehn kahlemeng mwahu en nda kalahngan ni ahnsou me noumw seri kan kin wia soahng kan ong uhk. Patehng met, padahkihong noumwail seri kan en nda kalahngan ni  aramas akan ar wia soahng kan ong irail. Sewese noumwail seri kan en wehwehki me kasalehda kalahngan kin kohsang nan mohngiong oh dahme re nda kak wia kamwahu laud. Karasepe, peinakapw men me ede Clary nda: “Ni ei nohno eh sounpar 32, ni soh kasikpe, e anahne kelehpw apwalihada seri silimen. Ni ahnsou me I sounpar 32, I medewehla ia uwen met eh apwal ong ih ni ahnsowo. Eri I ndaiong ih ia uwen ei kalahnganki soahng koaros me e tounmeteikihla pwehn apwalihada ngehi oh riei pwutak ko. Me keren, e ndaiong ie me e uhdahn kesempwalki dahme I ndao, oh e kin kalapw medemedewe, oh ei lokaia ko kin ahnsou koaros kaperenda ih.”

16. Menlau kihda ehu karasaras ong ia duwen kasalehda kalahngan eh kak kangoange meteikan.

¹⁶ Nan mwomwohdiso. Ni atail kin kasalehda kalahngan ong riatail Kristian kan, kitail kin kangoange irail. Karasepe, Jorge, elder men me sounpar 28, uhdahn soumwahuda laud. E sohte kak towehda mihting erein sounpwong ehu. Pil mwurin eh pwurala iang mihting, e sohte kak wia padahk nan prokram en mihting kan. Jorge nda: “I pehm me sohte katepei pwehki ei soh itar kan oh ei sohte kak wia doadoahk kan nan mwomwohdiso. Ahpw mwurin ehu mihting, brother men ndaiong ie: ‘I men kalahngankihong uhk mehn kahlemeng mwahu me ke wiahda ong ei peneineio. Se uhdahn perenki omw padahk kan erein sounpar kan mwoweo. Padahk ko sewese kakehlakahla at pwoson.’ I inenen mwekidkihda met oh pilen mesei ka kohda. Dahme e ndao uhdahn mwahu ong ie.”

17. Nin duwen me Kolose 3:15 kasalehda, ia duwen atail kak kasalehiong Siohwa atail kalahnganki sapwellime kadek?

¹⁷ Ong atail Kohto me ketin kadek. Siohwa ketikihongehr kitail soangen padahk mehlel tohto. Karasepe, kitail kin alehdi kaweid kan sang atail mihting, neitail makasihn oh website kan. Mie pak me ke rong padahk ehu, wadek oaralap ehu sang neitail pwuhk kan, de kilang JW Broadcasting oh nda, ‘Ih met me I uhdahn anahne’? Ia duwen atail kak kasalehda atail kalahngan ong Siohwa? (Wadek Kolose 3:15.) Ehu ahl iei en kaukaule kalahngankihong ih soangen kisakis pwukat nan atail kapakap.​—Seims 1:17.

18. Ni ahl dah me kitail kak kasalehda atail kalahnganki atail Wasahn Kaudok kan?

¹⁸ Kitail pil kin kasalehiong Siohwa atail kalahngan ni atail kin apwalih oh kamwakele atail wasahn kaudok. Kitail kin kaukaule kamwakele oh apwalih mwahu atail Wasahn Kaudok kan, oh irail kan me apwalih palien speaker oh video kan kin kanahieng en dehr kauwehla dipwisou  pwukat. Ni atail kin apwalih mwahu atail Wasahn Kaudok kan, wasa pwukat pahn mihmi werei oh sohte pahn anahne doadoahk laud en kamwahwihala soahng tohto. Ni ahl wet, kitail kin kahrehda en mie mwohni tohto ong kokoudahn oh onohnsapahldahn Wasahn Kaudok teikan nan sampah pwon.

19. Dahme ke sukuhlkihsang emen sounapwalih me kin seiloak oh eh pwoudo?

¹⁹ Ong irail kan me kin doadoahk laud ong kitail. Ni atail kin kasalehda kalahngan, dahme kitail nda kakete wekidala mwomwen emen eh kin kilangwohng eh kahpwal kan. Medewehla dahme wiawihong emen sounapwalih me kin seiloak oh eh pwoudo. Mwurin ara kalohk rahn ehu nan ahnsoun kopou laud, ira pwurala imwarao uhdahn pwangada. Ahnsowo uhdahn kopou me kahrehda sistero en likawihte eh sekido oh meirla. Manda rahno mwuri, e ndaiong eh pwoudo me e pehm me e sohte kak pousehlahte nan doadoahk en seiloako. Mwurin mwo ni mensengohte, kisinlikou ehu kohdo sang ohpis en Sounkadehdehn Siohwa kan, oh kisinlikowo ong ih. Kisinlikowo kapingahkin ih eh doadoahk en kalohk oh eh kin dadaurete. Kisinlikowo pil pohnese uwen apwal en kin keseusang ehu wasa ong ehu wasa tohrohr nan wihk koaros. Eh pwoudo nda: “Lokaiahn kaping ko uhdahn kansenamwahwihala ih oh e sohla pwurehng koasoia duwen kohkohsang doadoahk en seiloak. Ni mehlel, pak tohto ni ei kin medewehda en uhdi, e kin kangoange ie en pousehlahte.” Pwopwoudo wiewiahte doadoahk en sounapwalih me kin seiloak kereniongehr sounpar 40.

20. Dahme kitail anahne wia ehuehu rahn, oh dahme kahrehda?

²⁰ Kitail en song kasalehda atail kalahngan ehuehu rahn sang ni dahme kitail kin nda oh wia. Atail lokaia de wiewia kan kakete wia mehkot me emen anahne pwehn powehdi eh kahpwal de pwunod kan en ehuehu rahn nan sampah ehu me aramas malaulaute kin kasalehda kalahngan. Oh atail kin kasalehda kalahngan pahn kakehlakahla atail nanpwungmwahu rehn meteikan me kak mihmi kohkohlahte. Ahpw keieu kesempwal, kitail pahn alasang Samatailo, Siohwa, me kin ketin kadek oh kalahngan.