1. ¿Imatataj uj runa ruwasqa sanoyachisqa kaspa?

CHUNKA lepra onqoyniyoj runasmanta parlarina. Paykunaqa onqoyninkumanta mayta phutikorqanku. Chaywanpis paykunaqa uyarisqanku Jesucristo tukuy laya onqoykunata jampiyta atisqanta. Creerqankutaj paykunatapis jampiyta atisqanta. Chayrayku uj kutipi Jesusta rikuytawan karullamanta qhaparerqanku: “¡Jesús, Yachachejníy! Khuyarikuwayku ari”, nispa. Jesustaj paykunata uyarerqa, chunkantinkutataj sanoyacherqa. Paykunataj Jesús sanoyachisqanmanta maytachá sonqonkupi agradecekorqanku. * Chaywanpis chay chunka runasmanta, ujlla jatunmanta Diosta jatunchaspa Jesuspaman kuterqa. Jesusmantaj mayta agradecekusqanta nerqa. Chay runaqa samaritano karqa (Luc. 17:12-19).

2, 3. 1) ¿Imaraykutaj wakin kuti agradecekuyta qonqapusunman? 2) ¿Imatataj qhepan parrafospi yachakusunchej?

² Wajkuna imatapis ruwapuwajtinchejqa, chay lepra onqoyniyoj runa jinallataj agradecekunanchej tiyan. Chaywanpis wakin kutispi ichá qonqapusunman wajkunata agradecekuyta, chayri “gracias” niyta.

³ Qhepan parrafospeqa yachakusunchej imaraykuchus agradecekunapuni kasqanta. Chaypajtaj ñaupa tiempo runasmanta parlarisunchej. Paykunamanta wakenqa agradecekuyta yacharqanku, wakintaj mana agradecekuyta yacharqankuchu. Yachakullasuntaj imaynasmantachus agradecekuyta atisqanchejta.

4, 5. ¿Imaraykutaj agradecekuyta yachananchej kasqa?

⁴ Jehová Diosqa agradecekuyta yachan. Chaytataj tukuy imaymanamanta rikuchin. Por ejemplo, payta kusichejkunaman agradecekunanpaj tʼinkata qon (2 Sam. 22:21; Sal. 13:6; Mat. 10:40, 41). Bibliataj niwanchej: “Diospa munasqa wawasnin kaspa, pay jina ruwaychej”, nispa (Efe. 5:1). Chayrayku Jehová Dios jina kanapaj agradecekuyta yachananchej tiyan.

⁵ Chantapis agradecekuyta yachanallanchejtaj tiyan wajkunata kusichinapaj. Chayta astawan entiendenapaj wajkunawan mikhurisqanchejpi piensarina. Wajkunawan mikhurispaqa aswan miskʼita mikhunchej, kusirikunchejtaj. Ajinallataj agradecekuyta yachajtinchejpis. Agradecekuspaqa wajkunata kusichinchej, imaynatachus wajkuna agradecekuwajtinchej kusikunchej, ajinata. Agradecekuspaqa reparachinchej yanapanawanchejpaj kallpachakusqanku chayri necesitasqanchejta qoriwasqanchej mana qhasichu kasqanta. Ajinamantataj paykunawan aswan ujchasqa kanchej.

6. ¿Imaraykutaj nisunman agradecekuy uj qori manzana jina kasqanta?

⁶ Agradecekoyqa may sumajpuni. Biblia niwanchej: “Maychus tiempompi uj palabrata nisqaqa qolqewan tʼikanchasqa qori manzana jina”, nispa (Pro. 25:11). Qolqewan tʼikanchasqa qori manzanaqa may kʼachitu, may valorniyojtaj. Chay jina regalota japʼispa mayta kusikusunman. Agradecekunapaj imallatapis neyqa uj qori manzanatapis regalashasunman jina. Uj qori manzanata japʼispaqa unayta jallchʼakusunman. Agradecekorqanchej chay runapis ichá mana jaykʼajpis qonqanqachu imatachus nisqanchejta.

7. Salmo 27:4 nisqanman jina, ¿imaynatataj Diosta agradecekorqanku Davidwan Asafpa mirayninwan ima?

⁷ Diospa ashkha kamachisnenqa agradecekuyta yacharqanku. Paykunamanta ujnintaj  David karqa (Salmo 27:4 leey). Tukuy sonqo Jehová Diosta yupaychasqanrayku, ashkha imasta Jehová Diospaj ruwarqa. Por ejemplo, tukuy kapuyninta churarqa Diospa Templon ruwakunanpaj. Asafpa mirayninmantañataj parlarina. Paykunaqa Diosta agradecekunankupaj salmosta escriberqanku, nisunman Diosta alabanapaj takiykunata. Ujnin takiypi nerqanku: ‘Graciasta qoyku, Diosniyku. Kʼacha ruwasqasniykeqa tʼukunapaj’, nispa (Sal. 75:1). Reparanchej jina, Davidwan Asafpa mirayninwanqa, mayta Jehová Diosman agradecekorqanku ashkha bendicionesta japʼisqankumanta. Noqanchejpis piensarisunman imaynasmantachus Diosta agradecekunanchejpi.

8, 9. 1) ¿Imajtintaj nisunman apóstol Pablo hermanosta allinpaj qhawasqanta? 2) Pabloj cartan congregacionpi leekojtin, ¿hermanos kusikusqankuchu?

⁸ Apóstol Pabloqa hermanosta allinpaj qhawarqa. Chayrayku paykunamanta allinta parlarqa. Pabloqa orakuspa hermanosmanta Diosman agradecekorqa. Cartasninpitaj nerqa paykunata mayta munakusqanta. Uj pacha Pabloqa, Romanos 16:1 al 15 versiculospi 27 hermanospa sutisninta oqharerqa. Por ejemplo, Priscamanta Aquilamantawan jinata nerqa: “Paykunaqa kausayninkutapis noqarayku wañuy pataman churarqanku”, nispa. Febe sutiyoj hermanamantataj nerqa: “Payqa ashkha hermanosta yanaparqa, noqatapis yanapallawarqataj”, nispa. Tukuy yanapakoj hermanostataj sumajta ruwashasqankuta nerqa.

⁹ Pabloqa yacharqa hermanos pantaj runas kasqankuta. Chaywanpis hermanospa allin ruwaykunasninkumanta parlarqa Romanosman cartanpa tukukuyninpi. Chay carta congregacionpi leekojtintaj, hermanosqa maytachá kusikorqanku Pablo paykunamanta allinta parlasqanmanta. Chantapis chay hermanosqa astawanchá Pablowan ujchakorqanku. Noqanchejpis piensarisunman hermanosninchej allinta ruwasqankumanta chayri sumajta parlarisqankumanta, Pablo jinachus hermanosninchejta agradecekushasqanchejpi chayri manachus.

10. ¿Imatataj Jesusmanta yachakusunman?

¹⁰ Jesusqa Asia Menorpi kaj wakin congregacionesman nerqa imastachus allinta ruwashasqankuta. Tiatira congregacionmanta parlaspa, Jesusqa nerqa: “Yachani imastachus ruwasqaykita, munakusqaykita, creesqaykita, Diosta sirvisqaykita, aguantasqaykitapis. Yachallanitaj kunallanraj ruwasqasniykipis, ñaupaj ruwasqasniykimanta nisqaqa aswan sumaj kasqanta”, nispa (Apo. 2:19). Jesusqa mana nillarqachu ruwasqasninku, ñaupaj ruwasqasninkumanta nisqaqa aswan sumaj kasqanta. Manachayqa nerqa ajinata ruwanankupaj munakuyninku, creeyninku, aguantasqanku ima yanapasqanta. Jesusqa chay congregacionmanta wakin hermanosta kʼamirispapis paykunata kallpachaspa parlayta qallarerqa, tukucharqataj (Apo. 2:25-28). Jesusqa congregacionespa uman, nisunman tukuy congregaciones paypa cargonpi kashanku. Chayrayku payqa imastachus payrayku ruwasqanchejmanta mana agradecekunawanchejpunichu tiyan. Chaywanpis payqa agradecekuwanchejpuni. Ancianosqa maytapuni Jesusmanta yachakunkuman.

11. Hebreos 12:16 nisqanman jina, ¿Esaú Diospata kaj imasta jatunpajchu qhawasqa?

¹¹ Bibliaqa mana agradecekuyta yachaj runasmanta parlallantaj. Paykunamanta ujnenqa Esaú karqa. Esauj tatasnenqa Jehová Diosta munakorqanku, jatunpajtaj qhawarqanku. Chaywanpis Esauqa “Diospata kaj imasta pisipaj” qhawarqa (Hebreos 12:16 leey). Esauqa kuraj kaj wawa kasqanrayku imatachus japʼinanta, uj plato mikhunaraykulla Jacobman chhalarparerqa. Jacobqa sullkʼa hermanon karqa (Gén. 25:30-34). Tiemponmantaj Esauqa chhalarpasqanmanta pesachikorqa. Jatunmanta qhaparispataj  mayta waqarqa imatachus japʼinan karqa chayta mana japʼisqanmanta. Chaywanpis qhasillata waqarqa. Imaraykuchus ruwasqanwan rikucherqaña kuraj kaj wawa kasqanrayku imatachus japʼinanta pisipaj qhawasqanta.

12, 13. 1) Israelitas agradecekuyta qonqapusqankurayku, ¿imatataj ruwasqanku? 2) Chanta, ¿imataj israelitaswan kasqa?

¹² Israelitasmantañataj parlarina. Paykunaqa ashkha imasmanta Diosta agradecekunanku karqa. Imaraykuchus Diosqa paykunata egipciosmanta kacharicherqa. Chaypajtaj chunka ñakʼariykunawan egipciosta castigarqa. Israelitasta salvallarqataj Puka Qochapi Egiptomanta soldadosta wañurachispa. Israelitastaj Jehová Dios egipciosta atipasqanmanta payman takispa agradecekorqanku. Chaywanpis pisi tiemponmanqa Dios salvasqanmanta qonqaporqanku.

¹³ Israelitasqa yakuta chayri mikhunata pisichikuspa chayri uj llakiypi rikukuspa imastachus Dios paykunarayku ruwasqanmanta qonqaporqanku, agradecekuytapis qonqaporqanku (Sal. 106:7). Chayrayku Bibliapi israelitasmanta nin: “Chay chʼin pampapi ujtawan rimayta qallarerqanku Moisespaj, Aaronpaj ima”, nispa. Israelitasqa Moisespaj, Aaronpajwan rimaspaqa Jehová Diospa contranta rimarqanku (Éxo. 16:2, 8). Israelitasqa maytapuni Diospa sonqonta nanacherqanku. Chayrayku Diosqa nerqa: ‘Kaykunaqa tukuyninku chʼin pampapi wañonqanku, Calebwan Josuellawan mana wañonqankuchu’, nispa (Núm. 14:22-24; 26:65). Kunantaj qhawarinachej imatachus agradecekojkunamanta, mana agradecekojkunamantawan yachakuyta atisqanchejta.

14. ¿Imaynatataj qhariwarmis purajmanta agradecenakunkuman?

¹⁴ Familiapi. Uj familiaqa aswan ujchasqa tukuyninku agradecekuyta yachajtinku. Sichus qhariwarmis sapa kuti purajmanta agradecenakonqanku chayqa, aswan ujchasqas kanqanku, perdonanakuytapis atillanqanku. Señoranta munakoj qosaqa mana señoranpa allin ruwaykunasnillantachu, nitaj sumajta parlasqallantachu allinpaj qhawan, manachayqa sayarispa señoranta “alaban” (Pro. 31:10, 28, Qheshwa Biblia). Sumaj warmitajrí, qosanta sutʼita nin imasta ruwasqanmantachus jatunpaj qhawasqanta.

15. ¿Imaynatataj tatas wawasninkuta agradecekuyta yachachinkuman?

¹⁵ Tatasqa ejemplonkuwan wawasninkuta agradecekuyta yachachinkuman. Wawasqa tatasninku jinallataj imatapis ruwanku, parlankutaj. Chayrayku allin kanman tatas wawasninkuta agradecekunanku imallatapis ruwapojtinku.  Chantapis yachachinkuman wajkunata agradecekuyta imallatapis ruwapusqankumanta. Wawasninkuta entiendechillankumantaj sonqomantapacha agradecekuy allin kasqanta, parlasqankuwantaj wajkunata kallpachayta atisqankuta. Chaymanta parlaspa hermananchej Clarymanta parlarina. Pay nin: “Mamayqa 32 watasniyoj kashaspa sapitallanña iskay hermanosniyta noqatawan uywawarqayku. 32 watasniyoj kaspataj sonqoypi nerqani: ‘Kay edadpi manachá kinsantiykuta uywayta atillawarqaykuchu’, nispa. Chayrayku mamayman nerqani: ‘Maytapuni agradecekuyki atin mana atin uywawasqaykumanta’, nispa. Chaymanta parlaspa kunallanraj mamay niwarqa: ‘Mana qonqanichu imatachus niwasqaykita. Niwasqaykipi piensallanipuni, sapa kuti chayta yuyarikuspaqa sonqoy tʼikarin’, nispa”.

16. ¿Imataj hermanonchej Jorgeta kallpachasqa?

¹⁶ Congregacionpi. Hermanosninchejta agradecekuspaqa paykunata kallpachasunman. Hermanonchej Jorgemanta parlarina. Payqa anciano, 28 watasniyojtaj. Payqa manchayta onqoykuspa killatapuni mana tantakuykunaman riyta atisqachu. Killamanta tantakuykunaman rispataj mana tantakuykunapi discursayta aterqarajchu. Pay nin: “Wakin imasta mana ruwayta atisqayrayku, congregacionpipis ruwanasniyta mana juntʼayta atisqayrayku ni imapaj valesqayta yuyarqani. Jinallapi uj hermano tantakuy tukukusqantawan niwarqa: ‘Mayta agradecekuyki ejemploykiwan familiayta yanapasqaykimanta. Kay wataspi discursosniykeqa maytapuni kallpachawarqayku. Diosman astawan qayllaykunaykupajtaj yanapawarqayku’, nispa. Chayta uyarispa titilla, waqay ñawillataj qhepakorqani. Chay niwasqanqa maytapuni kallpachawarqa”, nispa.

17. Colosenses 3:15 nisqanman jina, ¿imaynatataj Jehová Diosman agradecekusunman yachachiwasqanchejmanta?

¹⁷ Jehová Diosman agradecekuna. Jehová Diosqa tukuy imaymanamanta yachachiwanchej. Payqa yachachiwanchej tantakuykunanejta, revistasnejta, Internetnejta ima. Wakin discursosta uyarispa chayri uj yachaqanata estudiaspa chayri JW Broadcastingpi kaj videosta qhawaspaqa, ichapis nerqanchej: “Kayqa noqapaj jinapuni karqa”, nispa. Chay jinata Jehová Dios wakichipuwasqanchejmantaqa mayta payman agradecekusunman (Colosenses 3:15 leey). Diosmanqa yachachiwasqanchejmanta agradecekusunman sapa kuti orakushaspa (Sant. 1:17).

18. ¿Imaynatataj Jehová Diosman agradecekullasunmantaj?

¹⁸ Jehová Diosman agradecekullasunmantaj Tantakuna Wasita llimphituta, kʼuchunchasqatataj  japʼispa. Chayrayku sapa kuti kallpachakuna Tantakuna Wasita llimphuchanapaj, allinchanapajtaj. Chantapis sonidomanta encargadosqa sonidopi kaj aparatosta sumajllawan apaykachankuman mana fregarpanankupaj. Tantakuna Wasita allinchasqata japʼejtinchejqa, Tantakuna Wasinchej mosojllapuni kanqa, nitaj arreglanapaj anchata gastanachu kanqa. Ajinamanta qolqe astawan kanqa mundontinpi Tantakuna Wasista sayachinapaj, maukʼa Tantakuna Wasistapis watejmanta sayachinapaj.

19. ¿Imatataj yachakusunman congregacionesta waturikoj hermanomanta señoranmantawan?

¹⁹ Diospaj astawan llankʼajkunata agradecekuna. Agradecekuspaqa wajkunata yanapasunman llakiykunasninkuta atipanankupaj. Uj hermanomanta señoranmantawan parlarinachej. Paykunaqa congregacionesta waturispa sirverqanku. Uj pacha paykunaqa chiri tiempopi predicacionmanta may saykʼusqas alojamientonkuman kutipusqanku. Manchaytapuni chirisqanrayku señoranqa abrigontin puñukanpusqa. Qʼayantintaj qosanman nisqa: “Manaña atiymanchu congregacionesta waturispa sirviyta, ¿saqepusunman chayri?”, nispa. Chantá chay paqarillantaj sucursalmanta uj cartata japʼisqanku. Chay cartataj señoranpaj kasqa. Chay cartapitaj nisharqa: “Hermanáy, maytapuni agradecekuyku sumajta Diosta sirvisqaykimanta, aguantasqaykimantapis. Mana atikullanchu sapa semana uj wasimanta waj wasiman cambiakoyqa”, nispa. Chaymanta parlaspa qosan nin: “Chay cartaqa señoraypa sonqon ukhumanpuni chayarqa. Chay kutimantapachataj manaña ujtawan niwarqachu: ‘Congregacionesta waturiyta, ¿saqepusunman chayri?’, nispa. Astawanpis noqata kallpachawarqa saqepuyta munashajtiy mana saqepunaypaj”, nispa. Paykunaqa casi 40 watasta congregacionesta waturispa sirverqanku.

20. 1) ¿Imapajtaj sapa día kallpachakunanchej kasqa? 2) ¿Imaraykutaj agradecekuyta yachananchej kasqa?

²⁰ Sapa día wajkunata agradecekunapaj mayta kallpachakunanchej tiyan. Ruwasqasninchej, parlasqanchejpis wajkunata yanapanman kay sajra mundopi problemasninkuta atipanankupaj. Agradecekuyta yachaspaqa wiñaypaj sumaj amigosta ruwakusunchej. Chantapis Jehová Dios jina kasunchej. Imaraykuchus Jehová Diosqa qorikoj Dios, agradecekuytataj yachan.