1. Samariapita juk nunaqa, ¿imanötaq Jesusta agradecikunqanta rikätsikurqan?

LEPRA qeshyayoq chunkaq nunakunaqa alläpachi kachakëta munayarqan. Kë nunakunaqa qeshyëkaqkunata Jesus kachakätsita puëdinqantam wiyashqa kayarqan, tsëmi pëkunatapis kachakätsinampaq kaqta següru këkäyarqan. Juk kutim Jesusta rikëkurnin kënö qayakuyarqan: “¡Jesus, Maestru, ankupëkalläyämë!”. Tsënö mañakuyaptinmi Jesusqa llapanta kachakäratsirqan. Jesus tsënö ruranqampitaqa alläpachi agradecikuyarqan. * Tsënö kaptimpis jukllëllam alläpa agradecikunqanta nirirqan. Kë nunaqa Samariapita karnimpis, Diostam alabar qallëkurqan (Lüc. 17:12-19).

2, 3. (1) ¿Imanirtaq höraqa agradecikoq kanqantsikta rikätsikushwantsu? (2) ¿Imapitataq yachakushun?

² Lepra qeshyayoq nunanöllam, noqantsikpaq rurayämunqampita agradecikïta munantsik. Tsënö kaptimpis höraqa, parlakïnintsikwan y rurënintsikwan agradecikïtaqa qonqarishwanmi.

³ Kë yachatsikïchömi rikäshun, agradecikoq kanqantsikqa imanö yanapakunqanta. Y Bibliachö parlanqan agradecikoq nunakunapita y mana agradecikoq nunakunapitam yachakushun. Jina yachakushunmi agradecikoq kanqantsikta imanö rikätsikunapaq kaqtapis.

4, 5. ¿Imanirtaq agradecikoq kanqantsikta rikätsikushwan?

⁴ Agradecikoq kanapaqqa Jehovämi yachatsimantsik. Porqui sirweqninkunata bendicirninmi agradecikunqanta rikätsikun (2 Sam. 22:21; Sal. 13:6; Mat. 10:40, 41). Jina Palabran Bibliachömi kënö mandamantsik: “Kuyashqa tsurinkuna kayanqëkirëkur Diosnö këta tïrayë” (Efesius 5:1). Awmi, agradecikoq këtaqa munantsik teytantsik Jehovänö këta munarninmi.

⁵ Jina maslla entiendinapaq juk ejempluta rikärishun. Agradecikoq këqa juk alli mikïta mikïnömi, porqui wakinkunawan juntu mikurninqa mas kushishqam sientikuntsik. Tsënömi wakin agradecimashqaqa alläpa kushikuntsik. Tsënöllam noqantsik agradecikunqantsikta rikätsikushqaqa, wakimpis kushishqa sientikuyanqa. Porqui yanapamanqantsik o qomanqantsikkuna alläpa yanapamanqantsiktam rikäyanqa. Jinamampis, mas amïgu kanapaqmi yanapamäshun.

6. ¿Imanirtaq shumaq parlakurnin agradecikunqantsikqa örupita rurashqa manzänanö?

⁶ Parlakurnin agradecikunqantsikqa alläpam yanapakun. Bibliam kënö nin: “Qellëpita shumaq rurashqachö churaraq örupita manzänanömi precisaq tiempuchö alli palabrakunaqa” (Prov. 25:11). Alläpa shumaqchi rikakunman örupita rurashqa manzäna juk shumaq chipapaq adornuchöqa, y tsëtaqa alläpachi valorashwan. Pillapis tsënö qarënintsik qarëkamashqaqa alläpa kushishqachi sientikushwan. Tsënöllam pitapis shumaq palabrakunawan agradecikushqaqa alläpa yanapanqa. Örupita rurashqa manzänata shumaq cuidashqaqa manam imëpis ushakanqatsu, tsënöllam agradecikunqantsiktaqa imëpis qonqayanqatsu.

7. (1) Salmus 27:4 ninqannöpis, ¿imanötaq Davidqa agradecïdu kanqanta rikätsikurqan? (2) Y Asafpa familiankunaqa, ¿imanötaq agradecïdu kayanqanta rikätsikuyarqan?

⁷ Diospa sirweqnin Davidpis agradecikoq kanqantaqa rikätsikurqanmi (leyi Salmus 27:4 *). Pëqa rurëninkunawanmi rikätsikurqan, Jehoväta sirwinqampita alläpa agradecïdu kanqanta. Jina templuta rurayänampaqmi imëka väleq cösaskunawan yanapakurqan. Jina Asafpa familiankunapis Diospaq cancionkunata escribirninmi agradecikoq kayanqanta rikätsikuyarqan. Por ejemplu juk escribiyanqan cancionchömi Jehoväta agradecikuyarqan y kamanqankunapita alabayarqan (Sal. 75:1). Këkunam cläru rikätsimantsik David y Asafpa familiankunaqa, Jehovä bendicinqampita agradecikuyanqanta. Y noqantsikqa, ¿imanöraq agradecikoq kanqantsikta rikätsikushwan?

8, 9. (1) ¿Imanötaq apostol Pabluqa rikätsikurqan cristiänu mayinkunata alläpa valoranqanta? (2) Y tsënö ruranqampitaqa, ¿imanötaq cristiänu mayinkunata yanaparqan?

⁸ Y apostol Pablupis cristiänu mayinkunatam rurayanqampita alläpa valorarqan y tsëtaqa ninqankunachömi rikätsikurqan. Por ejemplu mañakunqan höram, pëkunapaq Diosta agradecikoq. Y escribinqan cartakunachömi alläpa kuyanqanta rikätsikurqan. Romänus 16:1-15 textuchömi, 27 cristiänukunapa jutinta escribirqan. Tsëchömi Priscapaq y Äquilapaq kënö nirqan: “Noqarëkurmi kawëninkunata peligruman churayashqa”. Y Fëbipaqpis kënömi nirqan: “Porqui pëpis pï mëtam yanapashqa”. Awmi, Jehoväta sirwir kallpachakuyanqampitam Pabluqa tsë cristiänukunapaq allita parlarqan.

⁹ Pabluqa musyarqanmi jutsasapa karnin imallachöpis pantayanqanta. Tsënö kaptimpis Römachö cristiänukunata cartakunqanchöqa allikunata rurayanqanllapitam masqa escribirqan. Pëkunapaq Pablu tsënö escribinqanta congregacionchö leyiyaptinqa, alläpachi kushikuyarqan. Y tsëchi yanaparqan Pabluta mas kuyayänampaq. ¿Noqantsikqa Pablunöku wawqintsikkunata y panintsikkunata agradecikuntsik?

10. ¿Imatataq Jesuspita yachakïta puëdintsik sirweqninkunata animanqampita?

¹⁰ Jina Jesuspis Asia Menorchö këkaq wakin congregacionkunachö cristiänukunatam Jehoväta sirwir kallpachakuyanqampita felicitarqan. Puntataqa Tiatïra congregaciontam kënö nirqan: “Reqïmi rurënikikunata, kuyakïnikita, markäkïnikita, sagrädu rurënikita y alli tsarakoq kënikita, y tsëllaraq ruranqëkikunaqa qallananchö ruranqëkikunapitapis mas kanqanta” (Rev. 2:19). Jesusqa manam Jehoväta mas sirwiyanqanllapitatsu felicitarqan, sinöqa llapan shonqunkunawan tsëta rurayanqampitam. Peru wakin cristiänukunataqa corregishqam karqan. Tsënö kaptimpis shumaq parlaparninmi rurayanqankunapita animarqan (Rev. 2:25-28). Jesusqa llapan congregacionkunatam dirigin y pëpa mandädunchömi këkäyan. Tsëmi sirwinqantsikpita agradecikamänapaqqa obligädutsu këkan. Tsënö kaptimpis, sirwinqantsikpita agradecimanqantsiktam rikätsimantsik. Jesuspitaqa anciänukunapis yachakïta puëdiyanmi.

11. Hebrëus 12:16 textu ninqannöpis, ¿imanö kanqantataq Esaüqa rikätsikurqan?

¹¹ Diospa wakin sirweqninkunaqa manam agradecikïta yachayarqantsu. Jukqa Esaümi  karqan. Teytankunaqa Jehoväta kuyayarqanmi y respetayarqanmi, peru peqa mana kaqpaqmi Diospa kaqta churarqan (leyi Hebrëus 12:16). Y tsëtaqa rikätsikurqan mayor tsuri derëchunta wawqin Jacobta juk plätu guïsu lentëjallapaq rantikurninmi (Gen. 25:30-34). Tsëpitam tiempuwanqa alläpa llakikur pësakurqan. Porqui mayor tsuri karmi bendicionta chaskinan karqan. Peru kikinmi tsëtaqa mana valoranqanta rikätsikurqan, tsëmi quejakunantsu karqan.

12, 13. ¿Imanötaq israelïtakunaqa Diosta mana agradecikuyanqanta rikätsikuyarqan, y imataq pasakurqan?

¹² Jina Jehoväqa imëkatam israelïtakunapaq rurashqa karqan, tsëmi agradecikuyänan karqan. Por ejemplu Egiptuchö esclävu kayanqampita jorqanampaqmi chunka plägakunawan Egiptu nunankunata castigarqan. Jinamampis Puka lamarchö tröpankunata ushakätsirmi salvarqan. Tsëmi israelïtakunaqa Jehoväta alläpa agradecikur juk cancionta cantayarqan. Peru agradecikoq kayanqanqa rasllam ushakärirqan.

¹³ Porqui juk problëmakunapa pasarqa, pëkunapaq Dios ruranqantam qonqariyarqan, y mana agradecikoq kayanqantam rikätsikuyarqan (Sal. 106:7). Bibliam kënö nin: “Y tsunyaq jirkachömi Israelpa llapan tsurinkuna, Moisespaq y Aaronpaq mana allita parlar qallëkuyarqan”. Peru tsënö nirqa Jehoväpaqmi mana allita parlëkäyarqan (Ex. 16:2, 8). Y tsëta rurayanqampitam Jehoväqa alläpa llakikurqan, tsëmi desiertuchö wanuyänampaq kaqta nirqan. Peru Josuëwan Calebqa salvakuyarqanmi (Nüm. 14:22-24; 26:65). ¿Imatataq noqantsikqa këpita yachakuntsik? Rikärishun.

14, 15. (1) Casädukunaqa, ¿imanötaq agradecikoq kayanqanta rikätsikuyanman? (2) ¿Imanötaq teytakunaqa agradecïdu kayänampaq wamrankunata yachatsiyanman?

¹⁴ Familiachö. Familiachö cada ünu agradecikoq karninqa kushishqam kawakuyan. Casädukunapis agradecikoq kayanqanta rikätsikurqa mas unïdum kayanqa, jina perdonanakuyänampaqpis mas fäcilmi kanqa. Warminta valoraq ollquqa manam allita ruranqanllatatsu rikan, sinöqa Biblia ninqannömi sharkur alabapärin (Prov. 31:10, 28). Y warmi kaqpis imata ruranqampita valoranqantam qowanta nin.

¹⁵ Y teytakunaqa, ¿imanötaq wamrankunata yachatsiyanman agradecikoq kayänampaq? Wamrakunaqa teytankuna imata rurayanqanta y niyanqantam rurayan. Tsëmi teytakunaqa  wamrankunata agradecikurnin alli ejemplu kayänan. Y wakinkunata agradecikuyänampaqmi yachatsiyänan. Jina entienditsiyänanmi agradecikoq këqa shonqupita patsë kanqanta, y wakinkunata alläpa yanapanqanta. Clary jutiyoq panim kënö nin: “32 watayoq këkarninmi mamänïqa illaqpita japallanlla quedakurqan, tsëmi ishkan turïkunata y noqata japallanlla wätayämänan karqan. Tsë edäman chärirninmi, japallanlla mamänï wätayämänampaq fäcil mana kashqa kanqanman pensar qallëkurqä. Tsëmi wätayämanqampita alläpa agradecikunqäta nirirqä. Tsënö agradecikunqäpita kananyaq yarparanqanta, y alli sientikunampaq imëpis yanapanqantam nimarqan”.

16. Agradecikoq kanqantsikqa, ¿imanötaq wakinkunata yanapan? Juk pasakunqanwan willakaramï.

¹⁶ Congregacionchö panintsikkunawan y wawqintsikkunawan. Cristiänu mayintsikkunata agradecikushqaqa alläpam yanapanqa. Juk cäsullata rikärishun. 28 watayoq Jorgi jutiyoq anciänum, qeshyanqanrëkur atska killapa reunionkunaman ëwëta mana puëdishqa kanqanta willakun. Y kënömi nin: “Reunionkunaman ëwar qallëkurqa discursukunata rurëtaqa manam puëdirqätsu. Tsëmi, congregacionchö anciänunö yanapakïta mana puëdinqäpita alläpa llakikurqä. Peru tsënö këkaptïmi reunion ushariptin juk wawqi kënö nimarqan: ‘Familiäpaq alli ejemplu kanqëkipitam alläpa agradecikïta munä. Imëpis discursamunqëkikunaqa alläpam gustayämashqa y espiritual kaqchö poquyänäpaqmi yanapayämashqa’. Tsënö nimanqanmi shonqüman chärirqan y waqarmi qallëkurqä. Y tsëqa alläpam yanapamarqan”.

17. Colosensis 3:15 textu ninqannöpis, ¿imanötaq alli kanqampita Jehoväta agradecikushwan?

¹⁷ Jehovä Diosnintsikta. Jehoväqa espiritual kaqchö alli kanapaqmi imëka yanapakïkunata qomantsik. Por ejemplu, reunionkunachö yachakunqantsikkunawan, publicacionkunawan y Internetchö päginantsikwanmi yanapamantsik. Yarpankichi imëllapis juk wawqi discursunchö yachatsikamunqan, Täpakoq revistachö o JW Broadcasting canalchö videu alläpa yanapashunqëkita. Tsë llapampita Jehoväta agradecikunqantsiktaqa, ¿imanötaq rikätsikushwan? (Leyi Colosensis 3:15). Juknöpaqa mañakunqantsikchö imëpis agradecikurninmi (Sant. 1:17).

18. Diosta agradecikunqantsiktaqa, ¿imanö mastaq rikätsikuntsik?

¹⁸ Jina juknöpaqa Jehoväta agradecikunqantsikta rikätsikuntsik, pëta adoranapaq  juntakanqantsik wayikunata limpiuta y ordenäduta katsirninmi. Tsëmi pitsapakur y altsapakurnin imëpis yanapakunantsik. Jinamampis, wiyanapaq y videukunata rikänapaq equïpukunatam shumaq cuidar utilizänantsik. Salonnintsikta tsënö cuidashqaqa mas watapam duranqa y altsatsirnimpis manam alläpaqa gastuta rurashuntsu. Tsënöpam mana gastanqantsik qellëkunata utilicëta puëdiyanqa, entëru Patsachö mas salonkunata rurayänampaq y altsayänampaq.

19. Congregacionkunata watukaq wawqita y warminta pasanqampita, ¿imatataq yachakuntsik?

¹⁹ Diospa kaqchö mas yanapakoqkunata. Shumaq palabrakunawan agradecikushqaqa mana allikunapa pasëkaqkunatam alläpa yanaparinman. Congregacionkunata watukaq wawqita y warminta ima pasanqanta rikärishun. Juk kutim alalë tiempuchö entëru junaq warminwan yachatsikurirnin cuartunkunaman utishqa (pishipashqa) chäriyarqan. Alläpa alalaptinmi, warminqa kaq röpanllawan punukoq ewkurqan. Tsëmi waräninqa tsë carguchö yanapakïta manana munanqanta nunanta nirirqan. Y tsë junaqllam, sucursalpita juk cartata pëpaq chäratsiyarqan. Tsë cartachöqa kuyëpam animayarqan tsënö sirwirnin alli tsarakunqampita, y cada semäna congregacionkunata watukayänampaq viajë fäcil mana kanqantam niyarqan. Y nunanmi kënö willakun: “Tsënö animayanqanmi warmïtaqa alläpa yanaparqan, tsëmi cargükunata jaqiyänäpaq kaqtaqa parlakurqannatsu. Y höraqa noqam tsë cargüta jaqirita munaq kä, peru warmïnam mana dejanäpaq animamaq”. Pëkunaqa, cäsi 40 watapam congregacionkunata watukarnin yanapakuyashqa.

20. ¿Imata ruranapaqtaq cada junaq kallpachakunantsik y imanirtaq tsëta ruranantsik?

²⁰ Agradecikoq kanapaqqa cada junaqmi kallpachakunantsik. Porqui palabrantsikwan y ruranqantsikwan agradecikunqantsikqa, kë mana alli tiempuchö Jehoväta sirwir sïguinampaqmi pitapis alläpa yanaparinman. Jinamampis cristiänu mayintsikkunawan mas alli amïgu kanapaqmi yanapakun y tsëpitapis masqa teytantsik Jehovänömi agradecikoq kanqantsikta rikätsikushun.