1. Taita Diosta agradicishcata ricuchingapaca ¿imatata shuj samaritano jarica rurarca?

CHUNGAPURA jaricunaca lepra ungüihuan caimandami ninanda sufrinajurca. Imapash ungüihuan caj gentecunata Jesús jambijujtami paicunaca uyashca carca. Chaimi paicunaca paicunatapash jambi ushangami nishpa tucui shunguhuan crinajurca. Shuj punllaca, Jesusta ricushpami cashna ninajurca: “Ñucanchita llaquihuayari, Yachachij Apunchi Jesús nishpa caparinajurca”. Jesús chaita uyashpami chungapura jaricunata jambirca. Shina jambijpica paicunaca ninandami cushijushcanga *. Shinapash chai jaricunamandaca shujllami Jesustaca agradicirca. Chai jarica Samaria llactamandami carca. Ña ali tucushcata ricushpami, ‘Taita Diostaca punchapambagumi cangui nishpa caparijurca’ (Luc. 17:12-19).

2, 3. a) ¿Imamandata huaquinbica na agradicinchi? b) Cai temapica ¿imatata yachajupashun?

² Shinaca chai jarimandaca ¿imatata yachajupanchi? Chai jari cuendami, pipash ñucanchimanda imagutapash rurajpica tucui shunguhuan agradicinatami yachajuna capanchi. Huaquinbica imagutapash paicunamanda ruranata o agradicinatapash cunganchillami.

³ Cai temapimi imamanda agradicina minishtirishca cashcata yachajupashun. Shinallata Punda tiempopi causashca gentecuna agradicishcamanda, shujcuna na agradicishcamandapashmi yachajupashun. Jipaca imamandapacha agradicina cashcatami yachajupashun.

4, 5. ¿Imamandata shujcunata pagui nina capanchi?

⁴ Agradicishcataca ¿imashinata Jehová Diosca ricuchin? Paita  tucui shunguhuan sirvijcunaman ashtaca bendiciongunata cushpami Jehová Diosca agradicishcata ricuchin (2 Sam. 22:21; Sal. 13:6; Mat. 10:40, 41). Bibliapica ninmi: “Taita Dios juyashca huahuacuna cashpami, paishnallapacha causana canguichi” nishpa (Efes. 5:1). Shinaca Jehovashna cangapaca agradicinatami yachajuna capanchi.

⁵ Cunanga caipi pensaripashunchi. Micunaguta pimanbash carashpaca ninandami cushijupanchi. Shina cuendami shujcunata agradicishpaca ninanda cushijupanchi. Shinaca imagutapash ñucanchi carajpi paicuna ñucanchita pagui nijpica paicunatapash yali cushillami sintiripanchi. Cutin ñucanchicuna shujcunata pagui nijpica paicunaca ninandami cushijunga. ¿Imamandata cushijunga? Imatapash minishtijushcatapacha carashcamanda o minishtijujpipacha ayudashcamandami paicunaca ninanda cushijunga. Shinami alipacha amigo cashpa catita ushapanchi.

6. Agradicinataca ¿imahuanda chimbapuran?

⁶ Agradicinaca minishtirishcapachami can. Bibliapica ninmi: “Aliguta yarishpa rimashca shimicunaca, oro manzanapi culquita churashpa, juyaillaguta rurashcashnami” can nishpa (Prov. 25:11). Orohuan rurashca manzanaca ninan valishcami can. Orohuan rurashca manzanata pipash carajpica ¿nachu ninanda cushijunchiman? Ari, ninandami cushijunchiman. Pitapash agradicingapaj tiempoguta llujchishpaca ninandami cushichinchiman. Orohuan rurashca manzanata carajpica cushijushpami chai carashcataca nunca na cunganchiman. Shina cuendami tucui shunguhuan pitapash agradicijpica nunca na cungangachu.

7. a) Salmo 27:4​pi nishca shinaca Davidca ¿imashinata Jehovata agradicishcata ricuchirca? b) Asaf runagupa miraicunaca ¿imashinata Jehovata agradicishcata ricuchirca?

⁷ Punda tiempopi Jehovata sirvij Davidca Jehovata agradicishcatami ricuchirca (Salmo  27:4, liingui). Davidca tucui shunguhuan Jehovata sirvijushcataca ruraicunahuanmi ricuchirca. Por ejemplo, Davidca Taita Diospa templo huasita shayachichunmi culquiguhuan, shuj cosascunahuanbash ayudarca. Shinallata Asaf runapa miraicunapashmi Jehovata agradicishcata ricuchirca. ¿Imashnata agradicishcata ricuchirca? Paicunaca Jehovata jatunyachingapaj nishpami salmos librocunapi candana letracunata escribirca. Shuj salmopica paicunaca cashnami nirca: Jehová Dios ‘juyaillata can rurashcacunamandaca’ ninandami cushijupanchi nishpa. Shinami Jehovata agradicishcata paicunaca ricuchinajurca (Sal. 75:1). Imashinami ricupanchi, Davidpash, Asaf runagupa miraicunapash Jehová Diospa bendiciongunamandaca tucui shunguhuanmi agradicirca. Ñucanchica ¿imatata paicunamandaca yachajupanchi?

8, 9. a) Apóstol Pabloca ¿imashinata huauquipanicunata alicachishcataca ricuchirca? b) Apóstol Pablo shina rurashcamandaca ¿imata tucurca?

⁸ Apóstol Pabloca huauquipanicunamanda aliguta parlashpami paicunapa ruraicunata alicachishcata ricuchirca. Apóstol Pabloca Jehovata mañajushpaca siempremi huauquipanicunamandaca agradicin carca. Shinallata cartacunata escribijushpaca huauquipanicunata ninanda juyashcatami escribirca. Por ejemplo, Romanos 16:1-15​pica 27 Jesuspa catijcunapa shuticunatami apóstol Pabloca escribirca. Chai Jesusta catijcunapuramandaca Priscila, Áquila cusahuarmimandami parlarca. Paicunaca apóstol Pablota ayudaimandami casi “huañurca”. Shinallata Febe huarmigumanda apóstol Pabloca nircami “Paimi shujcunatapash, ñucatapash aliguta ayudarca” nishpa. Shinaca apóstol Pablo chai huauquipanicunamanda ali cosascunata parlashpami paicunapa ruraicunata ninanda alicachishcata ricuchirca.

⁹ Apóstol Pabloca huauquipanicuna juchayucuna cashcataca alimi yacharca. Chaita yachashpapash Roma llactamanda huauquipanicunata escribijushpaca, paicunapa ali cualidadcunamandami apóstol Pabloca escribirca. Chai cartata Roma llactamanda huauquipanicunaman liijpica, apóstol Pablo paicunamanda ali parlajushcata uyashpaca ninandami cushijushcanga. Shinallata chai huauquipanicunahuan ashtahuan ali amigocunami apóstol Pabloca tucushcanga. Shinaca ¿apóstol Pabloshnachu ñucanchipash huauquipanicunapa nishcacunamanda, ruraicunamanda agradicinchi?

10. Jesusca ¿imashinata huauquipanicunapa ruraicunata alicachishcata ricuchirca? Chaimandaca ¿imatata yachajupanchi?

¹⁰ Jesusca Asia Menor llactacunamanda huauquipanicunapa ruraicunata ninanda alicachishcatami parlarca. Por ejemplo, Tiatira llactamanda huauquipanicunamanga cashnami nirca: “Ñucata juyashpami, ñucata crij cashpa, ali servishpa, alitalla rurashpa, ali shunguhuambacha causajungui. Cri callarijushpa rurajushcataca, ashtahuan yalimi cunambica rurajungui. Chaitaca ricujunimi” nishpa (Apoc. 2:19). Chai huauquipanicuna alita rurajushcamandallaca Jesusca na felicitarcachu. Ashtahuangarin ali cualidadcunata charishcamandami felicitarca. Shinallata chai congregacionmanda huaquin huauquipanicunata consejashca jipaca cushichij shimicunahuanmi animarca (Apoc. 2:25-28). Jesusca tucui congregaciongunatami ñaupaman pushajun. Chaimi Jesusca paimanda imata rurashcata ñucanchita agradicina obligaciondaca na charinllu. Shina jahuapash Jesusca ñucanchicuna paimanda imata rurashcataca ninandami alicachin. Shinaca anciano huauquicunaca Jesushna cangapami esforzarina can.

11. Hebreos 12:16​pi nishca shinaca Esauca ¿imashinata espiritual cosascunata nalicachishcata ricuchirca?

¹¹ Bibliapi parlashca huaquin Jehovata sirvijcunaca na agradicinllu carca. Esaú runamanda yachajupashunchi. Esaupa taitamamacunaca  Jehová Diosta juyashpa, respetanmi carca. Shinapash Esauca espiritual cosascunataca nalicachinllu carca (Hebreos 12:16, liingui). Esauca ¿imashinata espiritual cosascunata nalicachishcata ricuchirca? Esauca punda churi cana derechotami lentejas plato micunamandalla jaturca. Shinami Esaú punda churi cana derechotaca paipa huauqui Jacobman jaturca (Gén. 25:30-34). Esaú shina rurashcamanda, punda churi cana bendicionda chingachishcamandami jipamanga ninanda llaquirirca. Shinapash Esauca na llaquirinachu carca. Paica espiritual cosascunataca nalicachinllu carca.

12, 13. a) Israelitacunaca ¿imashinata Jehovata na agradicishcata ricuchirca? b) Israelitacunahuanga ¿imata pasarca?

¹² Israelitacunaca Jehovataca ashtaca cosascunamandami agradicina carca. Jehová Diosca Egipto llactaman diez plagacunata cachashpami israelitacunataca chai llactamanda salvarca. Chai jipaca Faraonda, paipa soldacunatapash mar Rojo yacucunapimi tucuchirca. Shina salvashcamanda Jehová Diosta agradicingapami israelitacunaca shuj cancionda paiman candarca. Shinapash israelitacunaca na siempre Jehovata agradicircachu.

¹³ Shuj llaquicunata charishpaca israelitacunaca Jehová Dios paicunamanda imata rurashcatami cungarca. Shinami Jehová Diosta na agradicishcata israelitacunaca ricuchirca (Sal. 106:7). Bibliapica ninmi: ‘Jichushca pambapica, tucuilla tandanajushca israelitacunami Moisestapash, Aarondapash fiñashpa nalicachinajurca’ nishpa. Israelitacuna shina rurashpaca Jehová Diostami nalicachinajurca (Éx. 16:2, 8). Israelitacuna shina rurashcamandaca Jehová Diosca ninandami llaquirirca. Chaimi Jehová Diosca paicunata cashna nirca, cai miraicunaca cai chaquishca pambapimi huañunga. Shinapash Josué, Caleb runacunallami cai chaquishca pambapica na huañunga nishpa (Núm. 14:22-24; 26:65). Ñucanchicunaca Bibliapi parlashca Jehovata nali sirvijcunashnaca na cangapaj munanchichu. Shinaca ¿imashinata Bibliapi parlashca Jehovata ali sirvijcunashna caita ushapanchi? ricupashunchi.

14, 15. a) Cusahuarmicunaca ¿imashinata agradicishcata ricuchita ushan? b) Huahuacuna agradicinata yachajuchunga ¿imashinata taitamamacunaca ayudana can?

¹⁴ Familiata. Familiata ayudangapaca agradicinatami yachajuna capanchi. Shinaca cusata o huarmitaca imagutapash rurashcamandami agradicina capanchi. Shina rurashpaca pandarishcacunamanda perdonarinaca ashtahuan facilmi canga. Ali Cusaca paipa huarmipa parlocunatalla o ruraicunatallaca na ricunachu can. Ashtahuangarin punllandimi paipa huarmita ‘alicachijuna’ can (Prov. 31:10, 28). Cutin ali  huarmiguca cusapa ima rurashcacunata alicachishcatami nin.

¹⁵ Huahuacuna agradicinata yachajuchunga ¿imashinata taitamamacunaca ayudana can? Huahuacunaca taitamamacuna imata rurajta, imata nishcatami yachajun. Chaimandami taitamamacunaca huahuacuna imagutapash rurajpica agradicina can. Shinami huahuacunaca pipash paicunamanda imagutapash rurajpica agradicinata yachajunga. Shinallata shungumanda agradicichunmi huahuacunataca yachachina can. Ashtahuanbash imagutapash nishpa shujcunata ayudana cashcatami yachajunga. Por ejemplo, Clary paniguca ninmi: “ñuca mamaca 32 huatata charijpimi, quimsa huahuacunata viñachina tucurca. Tiempohuanga 32 huatata charishpaca pensarircanimi, ñucanchicunata viñachinaca ñuca mamapaca shinlli cashcanga. Chaimi shuj punllaca ñuca mamataca ñucanchita viñachingapaj ninanda esforzarishcamanda agradicircani. Chairallami ñuca mamaca nihuarca, quiquinba ali shimicunataca siempremi yarini, ñucapa shungupimi charini. Chai shimicunata cada punlla yarishpami ninanda cushijuni” nishpa.

16. Huauquipanicunataca ¿imashinata cushichita ushapanchi? Shuj experienciamanda parlapai.

¹⁶ Huauquipanicunata. Ñucanchi huauquipanicunata agradicijpica ninandami cushijunga. Cunanga 28 huatacunata charij Jorge huauquimanda yachajupashunchi. Paica anciano shinami sirvijun. Shuj punllaca pai ninan irquilla caimandami shuj quillata tandanajuicunamanga na ri usharca. Ña tandanajuicunaman ri ushashpapash irquilla caimadami discursocunata cuitaca na usharca. Jorgeca ninmi: “Irquilla caimanda congregacionbi na ayudai ushashcamandaca imapapash na valij shinami sintirircani. Shinapash shuj punllaca tandanajui jipami shuj huauqui ñucataca cashna nihuarca: ‘Ñuca familiata ayudashcamandaca ninandami agradicini. Cai tucui huatacunapica quiquinba discursocunataca ninandami alicachishcanchi. Espiritualmente ñaupaman catichunmi ñucanchitaca ayudashca’ nishpa. Chai shimicunata uyashpaca casi huacarcani. Chai shimicunaca ñucataca ninandami shinllichihuarca” nishpa.

17. Colosenses 3:15​pi nishca shinaca Jehovapa carashcacunamanda agradicingapaca ¿imata rurana capanchi?

¹⁷ Jehová Diosta. Jehová Diosca micunaguta caranshnami ñucanchitaca Bibliamanda yachachijun. Por ejemplo, Jehová Diosca tandanajuicunata, revistacunata, Internetpi jw.org paginata, JW Broadcasting programata utilizashpami ñucanchicunataca Bibliamanda yachachijun. ¿Nachu shuj discursota uyashpa o JW Broadcasting programata ricushpaca cushijushcanchi? Shinallata ¿nachu pensaripashcanchi caitapachami minishtijurcani? nishpa. Shinaca  chaicunamandaca ¿imashinata Jehová Diosta agradicita ushapanchi? (Colosenses 3:15, liingui). Jehovata cada punlla mañashpami chaicunamanda agradicina capanchi (Sant. 1:17).

18. Tandanajui Huasicunata charishcamandaca ¿imashinata agradicishcata ricuchipanchi?

¹⁸ Tandanajui Huasita ali, limpio charishpaca Jehová Diosta agradicishcatami ricuchipanchi. Chaimi ñucanchi tandanajui huasitaca fichashpa, cuidana capanchi. Shinallata sonidopi ayudaj huauquicunaca sonidota ali cuidana can. Tandanajui Huasita aliguta cuidajpica cutin cutin arreglanaca ñana minishtiringachu. Chaimi Tandanajui Huasicunata shuj pushtucunapi shayachingapaj, Tandanajui huasicunata arreglangapapash culquiguta charishun.

19. Shuj superintendente huauquimanda, paipa huarmigumandapash ¿imatata yachajupanchi?

¹⁹ Superintendente huauquita, paipa huarmiguta. Huauquipanicunata imaguta rurashcamanda agradicinaca paicuna llaquicunata aguantachunmi ayudan. Cunanga shuj superintendente huauquimanda, paipa huarmigumandapash yachajupashunchi. Paicunaca tamia tamia punllapimi punlla entero villachingapaj llujshirca. Chaimi mingarishca huasiguman shaijushcami paicunaca chayarca. Chiri chiri caimandami paipa huarmiguca puñungapaj rirca. Cayandi punllaca paipa huarmiguca congregaciongunata visitashpa catingapaca ñana munanichu nirca. Chai punllallatami Betelmanda shuj carta paipa huarmiguman chayamurca. Chai cartapica paipa huarmigutaca cashnami nijurca, cada semana shuj shuj huasicunapi mingarina na facil cajpipash Jehovata tucui shunguhuan sirvijushcamandaca felicitapanchi nishpa. Chai huauquica ninmi: “Chai cartapi nishca shimicunaca ñuca huarmigupa shungumanmi chayarca. Congregaciongunata visitanata saquinataca ñuca huarmiguca ñana pensarircachu. Huaquinbica ñucami congregaciongunata visitashpa catingapaca na munan carcani. Shinapash ñuca huarmigumi animahuan carca” nishpa. Cai cusahuarmica 40 huatacunatami congregaciongunata visitashpa catirca.

20. ¿Imatata cada punlla rurana capanchi? ¿Imamandata shina rurana capanchi?

²⁰ Cada punllami agradicishcata ricuchingapaj esforzarina capanchi. Cai nali mundopi causajuimandami huauquipanicunaca cushichichun minishtin. Chaimi ñucanchicunaca imagutapash nishpa o rurashpa paicunataca cushichina capanchi. Shinallata ñucanchi huauquipanicunata imaguta rurashcamanda agradicishpaca paicunahuan ali amigocunami tucushun. Shinaca tucuicunallatami Jehová Dioshna imagutapash carangapaj, agradicingapaj esforzarina capanchi.