1. Сар јекх Самарјани сикавѓа кај ценинела адава со сасљарѓа ле о Исус?

ДЕШ мануша сине ки бут пхари ситуација. Сине лен лепра хем на сине лен надеж кај ка сасљон. Ама јекх диве дурал дикхле е Исусе, е Баре Учителе. Шунѓе кај ов сасљарѓа манушен со сине лен различна насвалипа хем сине сигурна кај шај те сасљарел лен да. Адалеске викинѓе: „Исус, Учителе, ов милостиво спрема аменде!“ Тегани о Исус сасљарѓа е деше лепрозна манушен. Сигурно ола сине леске благодарна. Ама јекх лендар на само со осетинѓа благодарност, него исто аѓаар сикавѓа леске пло ценење. * Адава мануш, кова со сине Самарјани, сине поттикнимо те славинел е Девле „цело гласоја“ (Лука 17:12-19).

2-3. а) Соске понекогаш на успејнаја те сикава ценење? б) Башо со ка кера лафи ки акаја статија?

² Исто сар о Самарјани, амен да мангаја те сикава благодарност некаске со сине шукар спрема аменде. Ама, понекогаш шај бистраја те сикава ценење амаре лафенцар или постапкенцар.

³ Ки акаја статија ка кера лафи башо адава соске тано важно амаре лафенцар хем постапкенцар те сикава амаро ценење. Ка кера лафи башо несаве мануша тари Библија со сине благодарна хем башо несаве со  на сине. Пало адава ка дикха сар шај конкретно те сикава ценење ко различна подрачја таро амаро живото.

4-5. Соске ваљани те сикава ценење?

⁴ О Јехова секогаш сикавела ценење, хем адалеа дела аменге совршено пример. Јекх начин сар керела адава тано аѓаар со наградинела адален со служинена леске (2. Сам. 22:21; Пс. 13:6; Мат. 10:40, 41). Е Девлескоро Лафи поттикнинела амен: „Постапинен сар о Девел, сар лескере мангле чхаве“ (Еф. 5:1). Јекх главно причина соске ваљани те сикава ценење тани адалеске со мангаја те постапина сар о Јехова.

⁵ Те дикха панда јекх причина соске мангаја те сикава е јаверенге кај ценинаја лен. Кеда о јавера сикавена кај ценинена амен, амен сием бахтале. Кеда амен сикаваја кај ценинаја лен, о јавера тане бахтале. Кеда некаске сикаваја благодарност адалеске со поможинѓа аменге или денѓа аменге нешто, сикаваја кај чаче врединела адава со трудинѓа пе. Аѓаар амаро амалипе адале манушеа овела панда позорало.

6. Сави сличност иси машкар амаре лафија коленцар со сикаваја благодарност хем о златна пхабаја?

⁶ О лафија коленцар со сикаваја благодарност тане бут вредна. Јекх библиско изрека вакерела: „О лафија вакерде ко право време тане сар златна пхабаја ко сребрена чаре“ (Изр. 25:11). Замислин кобор би овена сине шуже хем кобор би врединена сине о златна пхабаја ко сребрена чаре! Сар ка осетине тут ако добинеа лен сар поклон? Исто добором шај те врединен амаре лафија коленцар со сикаваја благодарност. Размислин башо акава: И пхабај сој керди таро злато шај вечно те трајнел. Слично аѓаар, кеда некаске ка сикава кај ценинаја ле хем кај сием леске благодарна башо нешто, ов шај ка памтинел адава цело пло живото.

7. Спрема Псалм 26:6-8, сар о Давид сикавѓа пли благодарност, хем сар керѓе адава јавера псалмистија?

⁷ Бут слуге е Девлескере таро пурано време сикавѓе благодарност. Јекх лендар сине о Давид. (Читин Псалм 26:6-8.) Ов бут ценинѓа о чачутно обожавање, а адава дикхела пе сине таро лескере постапке. Ов денѓа баро барвалипе те шај те керел пе о храми. Јавер пример тане е Асафескере потомција кола со сикавѓе пло ценење адалеа со пишинѓе псалмија, гиља коленцар со фалинела пе е Девле. Ки јекх гили, благодаринѓе е Девлеске хем сикавѓе кај тане воодушевиме таро чудесна буќа со керѓа лен ов (Пс. 75:1). Хем о Давид хем е Асафескере потомција мангле те сикавен е Јеховаске кобор ценинена са о берекетија со денѓа ленге. Сар шај ту да те кере адава со керѓе о псалмистија?

8-9. Сар о апостол Павле сикавѓа кај ценинела пле пхрален хем пхењен хем сар влијајнѓа адава упри ленде?

⁸ О апостол Павле ценинела сине пле пхрален хем пхењен, а адава дикхела пе сине таро начин сар керела сине лафи баши ленде. Ов секогаш благодаринела сине е Девлеске ки молитва баши ленде. Исто аѓаар, таро писмија со пишинѓа ленге шај те дикха кај ценинела лен сине. На пример, ко Римјаните 16:1-15, о Павле спомнинѓа 27 пхрален хем пхењен ко анав. Ов конкретно пхенѓа кај и Приска хем о Акила „анѓе пло живото ки опасност“ баши лесте, а и Фива поможинѓа буте џененге хем леске да. Ов фалинѓа адале мангле хем буќарне пхрален хем пхењен (Рим. 16:1-15).

⁹ О Павле сине свесно башо ленгере маане, ама ко крајо таро пло писмо ов истакнинѓа ленгере шукар особине. Замислин кобор сине охрабриме адала пхраља хем пхења кеда шунѓе е Павлескере лафија џикоте читинела пе сине о писмо англо цело собрание. Сигурно адава керѓа позорало ленгоро амалипе е Павлеа. Дали иси тут навика те сикаве тле пхраленге хем пхењенге ко собрание тло ценење башо нешто со вакерена или со керена?

10. Со шај те сикљова таро адава сар о Исус сикавѓа кај ценинела пле следбеникон?

¹⁰ Ко пле пораке џи ко несаве собранија ки Мала Азија, о Исус сикавѓа кај ценинела адава со керена лескере следбеникија. На пример, пли порака џи ко собрание ки Тијатира почминѓа ла акале лафенцар: „Џанава о буќа со керѓан лен, хем тло мангипе, и вера, и служба хем и истрајност, хем кај о последна буќа со керѓан лен тане повише таро англуне“ (Отк. 2:19). О Исус на фалинѓа лен само башо адава со трудинѓе пе ки служба башо Девел, него башо особине да кола со поттикнинѓе лен те керен шукар буќа. Иако о Исус ваљанѓа те дел совет несавенге ки Тијатира, сепак ов почминѓа хем завршинѓа пло писмо адалеа со охрабринѓа лен (Отк. 2:25-28). Размислин само кобор баро авторитети иси е Исусе сар поглавари ко са о собранија. Ов на ваљани те благодаринел аменге башо адава со кераја леске. Ама, ов керела адава хем аѓаар истакнинела кобор тано важно те сикавел пе ценење. Адалеа дела бут шукар пример е старешиненге!

11. Спрема Евреите 12:16, саво стави сине е Исаве башо света буќа?

¹¹ Жално тано адава со несаве мануша кола сој спомниме ки Библија на сикавѓе ценење. На пример, иако о Исав сине воспитимо таро родителија кола со мангена сине е Јехова, ов на ценинѓа о света буќа. (Читин Евреите 12:16.) Котар џанаја адава? О Исав бикинѓа пло право сар  прво бијамо чхаво пле потикне пхралеске е Јаковеске баши јекх чинија хабе (1. Мој. 25:30-34). Пало адава, ов пело бут пишмани. Ама адалеске со на сине благодарно, на сине ле право те жалинел пе со на добинѓа о берекетија со ваљани сине те добинел о првобијамо чхаво.

12-13. Сар сикавѓе о Израелција кај нане лен ценење хем саве сине о последице?

¹² Е Израелцон сине лен бут причине те сикавен благодарност. О Јехова ослободинѓа лен таро ропство хем мукхља упро Египќанија деш неволје. А кеда о Египќанија геле пали ленде те астарен лен, о Јехова спасинѓа лен аѓаар со керѓа и египетско војска те тасљол ко Црвено море. О Израелција сине добором благодарна со гиљавѓе јекх гили баши победа те шај те фалинен е Јехова. Ама, дали пало адава ачхиле благодарна?

¹³ Кеда о Израелција аракхлиле ко јавера пхаре ситуацие, ола сигате бистерѓе са о шукарипе со керѓа ленге о Јехова. Адалеа сикавѓе кај нане лен ценење (Пс. 106:7). Сар? Са о Израелција почминѓе те бунинен пе против о Мојсеј хем о Арон, а адалеа уствари жалинена пе сине против о Јехова (2. Мој. 16:2, 8). О Јехова сине разочаримо соске на сине благодарна. Пало адава ов вакерѓа кај цело адава поколение ка мерел ки пустина, освен о Исус Навин хем о Халев (4. Мој. 14:22-24; 26:65). Те дикха акана сар шај амен те на кера исто асавки грешка хем сар шај те сикава ценење.

14-15. а) Сар о ром хем и ромни шај те сикавен кај ценинена јекх јекхе? б) Сар шај о родителија те поможинен пле чхавенге те сикавен ценење?

¹⁴ Ки фамилија. Кеда секова јекх ки фамилија сикавела кај ценинела е јавере, адава користинела цело фамилијаке. Кобор повише о ром хем и ромни сикавена кај ценинеа јекх јекхе, добором попаше ка овен. Тегани ка овел ленге полокхо те простинен јекх јекхеске. Јекх ром кова со ценинела пле ромња на само со приметинела о шукар буќа со вакерела лен хем со керела лен ој, него исто аѓаар фалинела ла (Изр. 31:10, 28). А и мудро ромни вакерела пле ромеске со конкретно ценинела ки лесте.

¹⁵ Сар шај те поможинен тумаре чхавенге те сикавен ценење? Ма бистрен кај тумаре чхаве имитиринена тумен ко начин сар керена лафи хем сар постапинена. Адалеске, ден лен шукар пример хем благодаринен тумен ленге кеда керена нешто баши  туменде. Исто аѓаар, сикавен тумаре чхавен те благодаринен пе кеда некој керела нешто баши ленде. Поможинен ленге те хаљовен кај и благодарност авела таро вило хем кај ленгере лафија шај бут те значинен е јаверенге. На пример, јекх пхен со викинела пе Клоди вакерела: „Кеда мле даја сине ла 32 берш, таро јекх пути ачхили коркори хем ваљани сине те грижинел пе трине чхавенге. Кеда ме аљум ко адала берша, размислинѓум кобор сине лаке пхаро те керел адава ко мле берша. Вакерѓум лаке кај чаче ценинава адава со жртвујнѓа пе те бајрарел амен. Акана сигенде вакерѓа манге кај адала лафија ачхиле лаке ко вило, кај бут пути сетинела пе ки ленде хем адава секогаш керела ла бахтали“.

16. Вакер јекх пример кова со сикавела сар влијајнела упро јавера кеда вакераја ленге кај ценинаја лен.

¹⁶ Ко собрание. Амаре пхраља хем пхења тане бут охрабриме кеда сикаваја ленге кобор ценинаја лен. На пример, о Хорхе, кова со служинела сар старешина хем иси ле 28 берш, бут насвалило. Цело масек нашти сине те џал ко состанокија. Ама кеда почминѓа палем те џал, нашти сине те икерел точке. О Хорхе вакерела: „Осетинава ман сине кај на врединава ништо адалеске со нашти сине те керав мле задаче ко собрание. Ама пало јекх состанок јекх пхрал ало ки манде хем вакерѓа манге: ’Мангљум те вакерав туке ов састо со денѓан шукар пример мле фамилијаке. На сиан свесно кобор уживинаја сине ко тле говорија со икереа лен сине англедер. Адала говорија поможинѓе аменге духовно те напредујна‘. Пхердиле мле јакхја асва хем почминѓум те ровав. Лескере лафија але ко право време“.

17. Спрема Колошаните 3:15, сар шај те сикава е Јеховаске кај ценинаја лескири дарежливост?

¹⁷ Амаре дарежливо Девлеске. О Јехова дела аменге бут духовно храна. На пример, ко амаре состанокија, ко списанија хем ки амари интернет-страница иси бут корисна советија. Дали туке да случинѓа пе пало несаво говор, несави статија или е масекоскири емисија те мислине туке: „Акава тано баш адава со ваљанѓа манге“? Сар шај те сикава е Јеховаске кај ценинаја лескири дарежливост? (Читин Колошаните 3:15.) Јекх начин тано ако редовно ки молитва благодаринаја леске башо адала шукар поклонија (Јак. 1:17).

18. Сар шај те сикава кај ценинаја амари дворана?

¹⁸ Амаро ценење е Јеховаске сикаваја исто аѓаар кеда трудинаја амен амари дворана те овел чисто хем са те овел ко пло тхан. Адалеске редовно чистинаја ла хем  одржинаја ла, а окола со керена бути е аудио-видео опремаја пазинена сар користинена ла. Ако одржинаја шукар амаре дворане, ола ка трајнен повише време хем похари ка овел потреба те поправинел пе нешто. Аѓаар штединаја повише паре те шај те керен пе хем те реновиринен пе јавера дворане ко цело свето.

19. Со сикљоваја таро искуство јекхе покраинско надгледникоскоро хем лескере ромњакоро?

¹⁹ Околенге со посебно трудинена пе. Кеда сикаваја кај ценинаја е јаверен, амаре лафија шај те поттикнинен лен појавер те дикхен ко пумаре проблемија. Те дикха со доживинѓе јекх покраинско надгледнико хем лескири ромни. Јекх диве евендаске сине бут шудро, а ола сине цело диве ки служба. Пало адава иранѓе пе ко кхер коте со сине сместиме хем сине бут уморна. Адатхе сине добором шудро со и пхен суќа капутеа. Сабајле пле ромеске вакерѓа кај нашти више те издржинел ки акаја служба. О исто диве ресља јекх писмо тари подружница кова со сине бичхалдо лаке. Ко писмо о пхраља пофалинѓе ла баши лакири служба хем истрајност. Исто аѓаар, вакерѓе кај тано бут пхаро секова курко те сове ко различна тхана. Лакоро ром вакерела: „Добором охрабринѓе ла адала лафија со пало адава никогаш на мангља те чхинавел е патувачко службаја. Чак манде да некобор пути поттикнинѓа ман те истрајнав кеда мангљум те чхинавав акале службаја“. Ола сине ки патувачко служба скоро 40 берш.

20. Со ваљани те трудина амен те кера секова диве хем соске?

²⁰ Те трудина амен секова диве амаре лафенцар хем постапкенцар те сикава амари благодарност. Шај баш адава ваљани некаске те шај те издржинел панда јекх диве ко акава свето со нане благодарно. А адава ка керел те овел амен зорале амалипа кола со ка трајнен вечно. Сој панда поважно, аѓаар ка ова сар амаро Дад, о Јехова кова сој дарежливо хем благодарно.