1. Sar jekh Samarjani sikavgja kaj ceninela adava so sasljargja le o Isus?

DEŠ manuša sine ki but phari situacija. Sine len lepra hem na sine len nadež kaj ka sasljon. Ama jekh dive dural dikhle e Isuse, e Bare Učitele. Šungje kaj ov sasljargja manušen so sine len različna nasvalipa hem sine sigurna kaj šaj te sasljarel len da. Adaleske vikingje: „Isus, Učitele, ov milostivo sprema amende!“ Tegani o Isus sasljargja e deše leprozna manušen. Sigurno ola sine leske blagodarna. Ama jekh lendar na samo so osetingja blagodarnost, nego isto agjaar sikavgja leske plo cenenje. * Adava manuš, kova so sine Samarjani, sine pottiknimo te slavinel e Devle „celo glasoja“ (Luka 17:12-19).

2-3. a) Soske ponekogaš na uspejnaja te sikava cenenje? b) Bašo so ka kera lafi ki akaja statija?

² Isto sar o Samarjani, amen da mangaja te sikava blagodarnost nekaske so sine šukar sprema amende. Ama, ponekogaš šaj bistraja te sikava cenenje amare lafencar ili postapkencar.

³ Ki akaja statija ka kera lafi bašo adava soske tano važno amare lafencar hem postapkencar te sikava amaro cenenje. Ka kera lafi bašo nesave manuša tari Biblija so sine blagodarna hem bašo nesave so  na sine. Palo adava ka dikha sar šaj konkretno te sikava cenenje ko različna podračja taro amaro životo.

4-5. Soske valjani te sikava cenenje?

⁴ O Jehova sekogaš sikavela cenenje, hem adalea dela amenge sovršeno primer. Jekh način sar kerela adava tano agjaar so nagradinela adalen so služinena leske (2. Sam. 22:21; Ps. 13:6; Mat. 10:40, 41). E Devleskoro Lafi pottikninela amen: „Postapinen sar o Devel, sar leskere mangle čhave“ (Ef. 5:1). Jekh glavno pričina soske valjani te sikava cenenje tani adaleske so mangaja te postapina sar o Jehova.

⁵ Te dikha panda jekh pričina soske mangaja te sikava e javerenge kaj ceninaja len. Keda o javera sikavena kaj ceninena amen, amen siem bahtale. Keda amen sikavaja kaj ceninaja len, o javera tane bahtale. Keda nekaske sikavaja blagodarnost adaleske so pomožingja amenge ili dengja amenge nešto, sikavaja kaj čače vredinela adava so trudingja pe. Agjaar amaro amalipe adale manušea ovela panda pozoralo.

6. Savi sličnost isi maškar amare lafija kolencar so sikavaja blagodarnost hem o zlatna phabaja?

⁶ O lafija kolencar so sikavaja blagodarnost tane but vredna. Jekh biblisko izreka vakerela: „O lafija vakerde ko pravo vreme tane sar zlatna phabaja ko srebrena čare“ (Izr. 25:11). Zamislin kobor bi ovena sine šuže hem kobor bi vredinena sine o zlatna phabaja ko srebrena čare! Sar ka osetine tut ako dobinea len sar poklon? Isto doborom šaj te vredinen amare lafija kolencar so sikavaja blagodarnost. Razmislin bašo akava: I phabaj soj kerdi taro zlato šaj večno te trajnel. Slično agjaar, keda nekaske ka sikava kaj ceninaja le hem kaj siem leske blagodarna bašo nešto, ov šaj ka pamtinel adava celo plo životo.

7. Sprema Psalm 26:6-8, sar o David sikavgja pli blagodarnost, hem sar kergje adava javera psalmistija?

⁷ But sluge e Devleskere taro purano vreme sikavgje blagodarnost. Jekh lendar sine o David. (Čitin Psalm 26:6-8.) Ov but ceningja o čačutno obožavanje, a adava dikhela pe sine taro leskere postapke. Ov dengja baro barvalipe te šaj te kerel pe o hrami. Javer primer tane e Asafeskere potomcija kola so sikavgje plo cenenje adalea so pišingje psalmija, gilja kolencar so falinela pe e Devle. Ki jekh gili, blagodaringje e Devleske hem sikavgje kaj tane vooduševime taro čudesna bukja so kergja len ov (Ps. 75:1). Hem o David hem e Asafeskere potomcija mangle te sikaven e Jehovaske kobor ceninena sa o bereketija so dengja lenge. Sar šaj tu da te kere adava so kergje o psalmistija?

8-9. Sar o apostol Pavle sikavgja kaj ceninela ple phralen hem phenjen hem sar vlijajngja adava upri lende?

⁸ O apostol Pavle ceninela sine ple phralen hem phenjen, a adava dikhela pe sine taro način sar kerela sine lafi baši lende. Ov sekogaš blagodarinela sine e Devleske ki molitva baši lende. Isto agjaar, taro pismija so pišingja lenge šaj te dikha kaj ceninela len sine. Na primer, ko Rimjanite 16:1-15, o Pavle spomningja 27 phralen hem phenjen ko anav. Ov konkretno phengja kaj i Priska hem o Akila „angje plo životo ki opasnost“ baši leste, a i Fiva pomožingja bute dženenge hem leske da. Ov falingja adale mangle hem bukjarne phralen hem phenjen (Rim. 16:1-15).

⁹ O Pavle sine svesno bašo lengere maane, ama ko krajo taro plo pismo ov istakningja lengere šukar osobine. Zamislin kobor sine ohrabrime adala phralja hem phenja keda šungje e Pavleskere lafija džikote čitinela pe sine o pismo anglo celo sobranie. Sigurno adava kergja pozoralo lengoro amalipe e Pavlea. Dali isi tut navika te sikave tle phralenge hem phenjenge ko sobranie tlo cenenje bašo nešto so vakerena ili so kerena?

10. So šaj te sikljova taro adava sar o Isus sikavgja kaj ceninela ple sledbenikon?

¹⁰ Ko ple porake dži ko nesave sobranija ki Mala Azija, o Isus sikavgja kaj ceninela adava so kerena leskere sledbenikija. Na primer, pli poraka dži ko sobranie ki Tijatira počmingja la akale lafencar: „Džanava o bukja so kergjan len, hem tlo mangipe, i vera, i služba hem i istrajnost, hem kaj o posledna bukja so kergjan len tane poviše taro anglune“ (Otk. 2:19). O Isus na falingja len samo bašo adava so trudingje pe ki služba bašo Devel, nego bašo osobine da kola so pottikningje len te keren šukar bukja. Iako o Isus valjangja te del sovet nesavenge ki Tijatira, sepak ov počmingja hem završingja plo pismo adalea so ohrabringja len (Otk. 2:25-28). Razmislin samo kobor baro avtoriteti isi e Isuse sar poglavari ko sa o sobranija. Ov na valjani te blagodarinel amenge bašo adava so keraja leske. Ama, ov kerela adava hem agjaar istakninela kobor tano važno te sikavel pe cenenje. Adalea dela but šukar primer e starešinenge!

11. Sprema Evreite 12:16, savo stavi sine e Isave bašo sveta bukja?

¹¹ Žalno tano adava so nesave manuša kola soj spomnime ki Biblija na sikavgje cenenje. Na primer, iako o Isav sine vospitimo taro roditelija kola so mangena sine e Jehova, ov na ceningja o sveta bukja. (Čitin Evreite 12:16.) Kotar džanaja adava? O Isav bikingja plo pravo sar  prvo bijamo čhavo ple potikne phraleske e Jakoveske baši jekh činija habe (1. Moj. 25:30-34). Palo adava, ov pelo but pišmani. Ama adaleske so na sine blagodarno, na sine le pravo te žalinel pe so na dobingja o bereketija so valjani sine te dobinel o prvobijamo čhavo.

12-13. Sar sikavgje o Izraelcija kaj nane len cenenje hem save sine o posledice?

¹² E Izraelcon sine len but pričine te sikaven blagodarnost. O Jehova oslobodingja len taro ropstvo hem mukhlja upro Egipkjanija deš nevolje. A keda o Egipkjanija gele pali lende te astaren len, o Jehova spasingja len agjaar so kergja i egipetsko vojska te tasljol ko Crveno more. O Izraelcija sine doborom blagodarna so giljavgje jekh gili baši pobeda te šaj te falinen e Jehova. Ama, dali palo adava ačhile blagodarna?

¹³ Keda o Izraelcija arakhlile ko javera phare situacie, ola sigate bistergje sa o šukaripe so kergja lenge o Jehova. Adalea sikavgje kaj nane len cenenje (Ps. 106:7). Sar? Sa o Izraelcija počmingje te buninen pe protiv o Mojsej hem o Aron, a adalea ustvari žalinena pe sine protiv o Jehova (2. Moj. 16:2, 8). O Jehova sine razočarimo soske na sine blagodarna. Palo adava ov vakergja kaj celo adava pokolenie ka merel ki pustina, osven o Isus Navin hem o Halev (4. Moj. 14:22-24; 26:65). Te dikha akana sar šaj amen te na kera isto asavki greška hem sar šaj te sikava cenenje.

14-15. a) Sar o rom hem i romni šaj te sikaven kaj ceninena jekh jekhe? b) Sar šaj o roditelija te pomožinen ple čhavenge te sikaven cenenje?

¹⁴ Ki familija. Keda sekova jekh ki familija sikavela kaj ceninela e javere, adava koristinela celo familijake. Kobor poviše o rom hem i romni sikavena kaj ceninea jekh jekhe, doborom popaše ka oven. Tegani ka ovel lenge polokho te prostinen jekh jekheske. Jekh rom kova so ceninela ple romnja na samo so primetinela o šukar bukja so vakerela len hem so kerela len oj, nego isto agjaar falinela la (Izr. 31:10, 28). A i mudro romni vakerela ple romeske so konkretno ceninela ki leste.

¹⁵ Sar šaj te pomožinen tumare čhavenge te sikaven cenenje? Ma bistren kaj tumare čhave imitirinena tumen ko način sar kerena lafi hem sar postapinena. Adaleske, den len šukar primer hem blagodarinen tumen lenge keda kerena nešto baši  tumende. Isto agjaar, sikaven tumare čhaven te blagodarinen pe keda nekoj kerela nešto baši lende. Pomožinen lenge te haljoven kaj i blagodarnost avela taro vilo hem kaj lengere lafija šaj but te značinen e javerenge. Na primer, jekh phen so vikinela pe Klodi vakerela: „Keda mle daja sine la 32 berš, taro jekh puti ačhili korkori hem valjani sine te grižinel pe trine čhavenge. Keda me aljum ko adala berša, razmislingjum kobor sine lake pharo te kerel adava ko mle berša. Vakergjum lake kaj čače ceninava adava so žrtvujngja pe te bajrarel amen. Akana sigende vakergja mange kaj adala lafija ačhile lake ko vilo, kaj but puti setinela pe ki lende hem adava sekogaš kerela la bahtali“.

16. Vaker jekh primer kova so sikavela sar vlijajnela upro javera keda vakeraja lenge kaj ceninaja len.

¹⁶ Ko sobranie. Amare phralja hem phenja tane but ohrabrime keda sikavaja lenge kobor ceninaja len. Na primer, o Horhe, kova so služinela sar starešina hem isi le 28 berš, but nasvalilo. Celo masek našti sine te džal ko sostanokija. Ama keda počmingja palem te džal, našti sine te ikerel točke. O Horhe vakerela: „Osetinava man sine kaj na vredinava ništo adaleske so našti sine te kerav mle zadače ko sobranie. Ama palo jekh sostanok jekh phral alo ki mande hem vakergja mange: ’Mangljum te vakerav tuke ov sasto so dengjan šukar primer mle familijake. Na sian svesno kobor uživinaja sine ko tle govorija so ikerea len sine angleder. Adala govorija pomožingje amenge duhovno te napredujna‘. Pherdile mle jakhja asva hem počmingjum te rovav. Leskere lafija ale ko pravo vreme“.

17. Sprema Kološanite 3:15, sar šaj te sikava e Jehovaske kaj ceninaja leskiri darežlivost?

¹⁷ Amare darežlivo Devleske. O Jehova dela amenge but duhovno hrana. Na primer, ko amare sostanokija, ko spisanija hem ki amari internet-stranica isi but korisna sovetija. Dali tuke da slučingja pe palo nesavo govor, nesavi statija ili e masekoskiri emisija te misline tuke: „Akava tano baš adava so valjangja mange“? Sar šaj te sikava e Jehovaske kaj ceninaja leskiri darežlivost? (Čitin Kološanite 3:15.) Jekh način tano ako redovno ki molitva blagodarinaja leske bašo adala šukar poklonija (Jak. 1:17).

18. Sar šaj te sikava kaj ceninaja amari dvorana?

¹⁸ Amaro cenenje e Jehovaske sikavaja isto agjaar keda trudinaja amen amari dvorana te ovel čisto hem sa te ovel ko plo than. Adaleske redovno čistinaja la hem  održinaja la, a okola so kerena buti e audio-video opremaja pazinena sar koristinena la. Ako održinaja šukar amare dvorane, ola ka trajnen poviše vreme hem pohari ka ovel potreba te popravinel pe nešto. Agjaar štedinaja poviše pare te šaj te keren pe hem te renovirinen pe javera dvorane ko celo sveto.

19. So sikljovaja taro iskustvo jekhe pokrainsko nadglednikoskoro hem leskere romnjakoro?

¹⁹ Okolenge so posebno trudinena pe. Keda sikavaja kaj ceninaja e javeren, amare lafija šaj te pottikninen len pojaver te dikhen ko pumare problemija. Te dikha so doživingje jekh pokrainsko nadgledniko hem leskiri romni. Jekh dive evendaske sine but šudro, a ola sine celo dive ki služba. Palo adava irangje pe ko kher kote so sine smestime hem sine but umorna. Adathe sine doborom šudro so i phen sukja kaputea. Sabajle ple romeske vakergja kaj našti više te izdržinel ki akaja služba. O isto dive reslja jekh pismo tari podružnica kova so sine bičhaldo lake. Ko pismo o phralja pofalingje la baši lakiri služba hem istrajnost. Isto agjaar, vakergje kaj tano but pharo sekova kurko te sove ko različna thana. Lakoro rom vakerela: „Doborom ohrabringje la adala lafija so palo adava nikogaš na manglja te čhinavel e patuvačko službaja. Čak mande da nekobor puti pottikningja man te istrajnav keda mangljum te čhinavav akale službaja“. Ola sine ki patuvačko služba skoro 40 berš.

20. So valjani te trudina amen te kera sekova dive hem soske?

²⁰ Te trudina amen sekova dive amare lafencar hem postapkencar te sikava amari blagodarnost. Šaj baš adava valjani nekaske te šaj te izdržinel panda jekh dive ko akava sveto so nane blagodarno. A adava ka kerel te ovel amen zorale amalipa kola so ka trajnen večno. Soj panda považno, agjaar ka ova sar amaro Dad, o Jehova kova soj darežlivo hem blagodarno.