1. Sar o Samarićanco kas o Isus sačardža mothodža soj tano zahvalno?

O DEŠ manuša hine ki but phari situacija. On hine ljen guba hem na hine ljen nada so ka sačon. Ama jekh dive dural dikhlje e Bare Učitelje, e Isuse. Šundže so o Isus sačardža sa o nabormipa hem hine sigurna so šaj te sačari hem oljen. Odoljese vičindže: „Isuse, Učitelju, nek ovel tut milost premalo amende!“ Adžahar o Isus sačardža e dešen gubavcon. Sigurno sare on hine zahvalna so o Isus hine odobor šukar premalo oljende. Ama jekh oljendar na samo so osetindža zahvalnost *, već hem mothodža la. Odova manuš kova sačilo hem kova hine Samarićanco, manglja te slavini e Devlje „sa pe glasoja“ (Luka 17:12-19).

2-3. (a) Sose dijekhvar na mothovaja zahvalnost? (b) Sostar ka vačera ko akava članko?

² Sar o Samarićanco hem amen mangaja te mothova zahvalnost nekase kova hine šukar premalo amende. Dijekhvar šaj te desini pe te bistra te mothova zahvalnost, bilo lafenca bilo odoljeja so čeraja.

³ Ko akava članko ka vačera odoljestar sose tano važno amare lafenca hem odoljeja so čeraja te mothova cenjenje. Ka dikha nekobor biblijake primerija ando manuša kola hine zahvalna hem disave kola na hine zahvalna. Palo odova, ka dikha ko save konkretna načinija šaj te mothova amari zahvalnost.

4-5. Sose valjani te mothova zahvalnost?

⁴ Kotar Jehova sikljovaja sar te mothova zahvalnost. Jekh način sar ov odova čerela tano adžahar soj tano šukar premalo okola so trudinena pe te šunen lje hem nagradini ljen (2. Sam. 22:21; Ps. 13:6; Mat. 10:40, 41). A e Devljeso Lafi podstaknini amen: „Oponašinen e Devlje, sar oljese manglje čhave“ (Efe. 5:1). Odoljese, o glavno razlog sose mangaja te mothova zahvalnost tano sose adžahar oponašinaja e Jehova.

⁵ Te dikha pana jekh razlog sose amen mangaja averendže te mothova zahvalnost. I zahvalnost tani sar jekh ukusno habe – pobuter uživinaja ked delinaja lje averenca. Ked osetinaja so avera tane amendže zahvalna, tegani amen hijam bahtalje. Ked amen mothovaja amari zahvalnost premalo avera, tegani on tane bahtalje. O manuš kase mothodžam zahvalnost džanela so oljeso trud te pomožini amen ja te del amen diso so valjani amendže nane uzaludno. Adžahar amaro amaljipe odolje manušeja ovela pana pozoralo.

6. Sose o lafija koljenca mothovaja zahvalnost šaj te uporedina e zlatno phabajenca?

⁶ Amare lafija koljenca mothovaja zahvalnost tane but vredna. I Biblija phenela: „Sar o zlatna phabaja ko srebrna čare, asavke tane o lafija vačerde ko pravo vreme“ (Godž. 25:11). Zamislin kobor bi ovena šuže o zlatna phabaja ko srebrna čare! Hem kobor bi ovena vredna. Sar bi osetineja tut ked bi tu dobineja ljen sar poklon? Amare lafija koljenca mothovaja averendže zahvalnost tane isto adžahar vredna. Razmislin kotar akava: I phabaj koja tani čerdi ando zlato šaj but te trajini. Isto adžahar hem teklje lafija šaj trajno te ačhon ko vilo okoljese kase vačerdžan ljen.

7. Premalo lafija kotar Psalam 27:4, sar o David mothodža piklji zahvalnost, a sar avera psalmistija čerdže odova?

⁷ But e Devljese sluge ko purano vreme mothodže zahvalnost. Jekh oljendar hine o David. (Čitinen Psalam 27:4.) Ov but cenindža so šaj te služini e Devljese, a odova dikhlja pe ko odova so čerdža. O David dindža baro barvaljipe te šaj te čerel pe o hram. E Asafese potomkija mothodže so ceninena so šaj te služinen e Devljese adžahar so pisindže psalmija, kola tane džilja ando hvale. Ki jekh džili zahvalindže pe e Devljese hem mothodže kobor radujinena pe sebepi o buča so ov čerdža (Ps. 75:1). O potomkija ando David hem ando Asaf manglje te mothoven e Jehovase kobor ceninena sa o blagoslovija kola dindža ljen. Sar šaj te ove sar odola psalmistija?

8-9. Sar o apostol Pavle mothodža so cenini pe phraljen hem phenjen hem sar odova verovatno utičindža upro oljende?

⁸ O apostol Pavle cenindža peklje phraljen hem phenjen hem odova dičhilo ko oljese lafija. Uvek zahvalindža pe e Devljese oljendže. Ked pisindža ljendže, uverindža ljen soj tane oljese važna. Ko prva 15 stihija ko 16. šero ko ljil e Rimskonendže, o Pavle pomindža 27 phraljen hem phenjen ko nav. O Pavle konkretno phendža so i Priska hem o Akila „poklo dživdipe čhidže ki opasnost“ sebepi oljeso, a i Fiva „pomožindža butendže“ pa hem oljese. Ov pohvalindža odoljen phraljen hem phenjen kola hine manglje hem bučarne (Rim. 16:1-15).

⁹ O Pavle džandža hem oljenge mane, ama ko krajo ando po ljil kova bičhalža oljendže ov istaknindža o šukar osobine kola hine ljen. Zamislin kobor odola phralja hem phenja hine bahtalje ked šundže e Pavlese lafija dži čitindža pe o ljil anglji celo skupština. Sigurno odova zorjačerdža oljengo amaljipe e Pavleja. Da li isi tut navika te mothove teklje phraljendže hem phenjendže ki skupština so hijan zahvalno sebepi odova so phenena ja čerena?

10. So šaj te sikljova ando odova sar o Isus mothodža zahvalnost peklje učenikondže?

¹⁰ Ked o Isus vačerdža disave skupštinendže ki Mala Azija, ov mothodža so cenini odova so čerdže oljese učenikija. Na primer, i poruka e skupštinače ki Tijatira počmindža akalje lafenca: „Džanava o buča so čerdžan ljen, hem toklo mangipe, i vera, i služba hem i istrajnost, hem so o poslednja buča so čerdžan tane pobuter kotar odola so čerdžan angljeder“ (Puč. 2:19). O Isus na pohvalindža ljen samo so čerdže šukar buča, nego hem so hine ljen osobine kola podstaknindže ljen te čeren odola šukar buča (Puč. 2:25-28). Zamislin samo kobor bari vlast isi lje o Isus sar poglavari upro sa o skupštine. Ov ne mora te zahvalini pe amendže sebepi odova so čeraja oljese. Ama, ov ipak čerela odova hem adžahar istaknini kobor tano važno te mothovi pe zahvalnost. Kobor šukar primer e starešinendže!

11. Premalo lafija kotar Jevrejendže 12:16, savo stav hine lje o Isav premalo sveta buča?

¹¹ Nažalost, disave manuša kola pominena pe ki Biblija na hine zahvalna. Na primer, e Isave barjačerdže o roditeljija kola manglje hem poštujindže e Jehova, ama ov kokri na cenindža o sveta buča. (Čitinen Jevrejendže 12:16.) Sar odova dičhilo? O Isav bikindža pe tikne phraljese,  e Jakovese, poklo pravo kova hine lje sar prvo bijando čhavo, sebepi jekh obično habe (1. Moj. 25:30-34). Palo odova, ov but kajindža pe sebepi odova. Ama odoljese so na hine zahvalno, na hine lje pravo te žalini pe so na dobindža o blagoslov kova bi valjani te ovel lje sar prvo bijando čhavo.

12-13. Sar o Izraelcija mothodže so nane zahvalna hem dži soste andža odova?

¹² O Izraelcija hine ljen but razlogija te mothoven zahvalnost. O Jehova oslobodindža ljen ando phanljipe hem andža e Egipćanendže deš nevolje. A ked o Egipćanja dželje palo ljende, o Jehova oslobodindža ljen adžahar so čerdža i egipatsko vojska te tasljol ko Lolo more. O Izraelcija hine odoborkha zahvalna so ki čast e Jehovase džilabdže džili andi pobeda. Ama, da li nastavindže te mothoven zahvalnost?

¹³ Ked hine ljen avera problemija, on bisterdže sa o šukaripe so čerdža o Jehova oljendže. Tegani mothodže so nane zahvalna (Ps. 106:7). Sar? Sa o Izraelcija počmindže te buninen pe protiv o Mojsije hem protiv o Aron, a odoljeja ustvari žalindže pe protiv o Jehova (2. Moj. 16:2, 8). E Jehova razočarindža odova so on na hine zahvalna. Palo odova, ov phendža so celo odova Izraelcengo naraštaj, osim o Ješua (Isus Navin) hem o Halev, ka meren ki pustinja (4. Moj. 14:22-24; 26:65). Ajde te dikha sar šaj te cida amen odoljestar te na čera hem amen asavke greške hem te mothova so hijam zahvalna.

14-15. (a) Sar o rom hem i romni šaj te mothoven so ceninena jekh jekhe? (b) Sar o roditeljija šaj te sikaven pe čhaven te oven zahvalna?

¹⁴ Ki porodica. I porodica ka ovel bahtalji ako sare mothovena zahvalnost jekh jekhese. So pobuter o rom hem i romni mothovena jekh jekhese zahvalnost, pana pobuter ka oven paše jekh jekheja. Tegani tano hem polokho te oprostinen jekh jekhese ked grešinena. O rom kova cenini pe romnja na samo so dikhela sa o šukar so oj phenela hem čerela, nego hem pohvalini la sebepi odova (Godž. 31:10, 28). A i mudro romni vačeri pe romese so konkretno oj cenini koro ljeste.

¹⁵ Dadaljen hem dajaljen, sar šaj te sikaven tumare čhaven te oven zahvalna? Ma bistren so tumare čhave oponašinena tumen ko odova so vačerena hem  so čerena. Odoljese oven šukar primer oljendže hem zahvalinen tumen ked čerena diso tumendže. Isto adžahar, sikaven tumare čhaven averendže te phenen ov sasto ja ov sasti. Pomožinen tumare čhavendže te haljon so i zahvalnost avela ando vilo hem so oljenge lafija andi zahvalnost šaj but te značinen averendže. Na primer, jekh terni romni koja vičini pe Kleri phenela: „Ked mi daj hine la 32 berš, kotar jekhvar ačhilji kokri trine čhavenca. Ked me aljum ko odola berša, razmislindžum kobor samo hine olače pharo ki odija situacija. Phendžum lače so čače ceninava odova so žrtvujindža pe amendže te šaj te barjačeri amen. Akana sigate vačerdža maje so odola lafija khudže lače ko vilo, but puča razmislini oljendar hem adžahar olako dive uvek nakhela šukar.“

16. Vačer jekh primer kova mothovi sar upro averende utičinena amare lafija andi zahvalnost.

¹⁶ Ki skupština. Amare phraljendže hem phenjendže but značini ked amen mothovaja so but ceninaja ljen. Na primer, o Horhe, kova tano starešina hem isi lje 28 berš, but naborsalo. Masek dive naštine te avel ko sastankija. A ked počmindža te avel, naštine te ičeri govorija. O Horhe phenela: „Osetindžum man samči na hijum nisose, sebepi so naštine te čerav meklje zaduženja ki skupština. Ama palo jekh sastanko, jekh phral alo koro mande hem phendža maje: ’Mangljum te zahvalinav tuče so mothoveja šukar primer me porodicače. Na hijan svesno kobor uživindžam ko teklje govorija kola ičerdžan ljen angljeder. On pomožindže amendže duhovno te napredujina.‘ Me ačhiljum bizo lafija hem počmindže te džan mandar asva. Oljese lafija alje maje ko pravo vreme.“

17. Premalo lafija kotar Koloskonendže 3:15, sar šaj te mothova so hijam zahvalna e Jehovase soj tano phravde vasteso?

¹⁷ Amare Devljese kova tano phravde vasteso. O Jehova dela amen but duhovno habe. Na primer, but korisna savetija dobinaja ko amare sastankija, ko amare časopisija hem ko amare veb-sajtija. Da li hem tuče dijekh puti desisalo palo disavo govor, članko ja e masekosi emisija te vačere: „Akava tano baš maje“? Sar te mothova e Jehovase so hijam zahvalna odoljese? (Čitinen Koloskonendže 3:15.) Jekh način tano ked ki molitva redovno vačeraja so hijam zahvalna odolje šukar poklonendže (Jak. 1:17).

18. Sar mothovaja so hijam zahvalna odoljese so isi amen Dvorana ando Kraljevstvo?

 ¹⁸ Amen mothovaja so hijam zahvalna e Jehovase hem ked daja sa amendar amari Dvorana te ovel čisto hem uredno. Redovno čistinaja la hem održinaja la, a okola so čerena buti e audio hem video opremaja valjani te pazinen sar koristinena la. Ked pravilno održinaja ljen, amare Dvorane ka trajinen pobuter hem pohari ka ovel potreba te popravini pe diso. Adžahar ka ačhon pobuter pare te čeren pe hem te renovirinen pe avera Dvorane ko celo sveto.

19. So sikljovaja ando odova so doživindže jekh pokrajinsko nadgledniko hem oljesi romni?

¹⁹ Okoljendže kola posebno trudinena pe. Ked mothovaja zahvalnost, amare lafija šaj te podstakninen nekas ko peklje problemija te dikhel averčhane. Te dikha so doživindže jekh pokrajinsko nadgledniko hem oljesi romni. Palo odova so celo dive hine ki služba kuri hine but šudro, o solduj irindže pe ko čher kuri hine smestime hem hine but čhinde. Hine odoborkha šudro so oj suča ko kaputi. Sabalje pe romese phendža so našti više te izdržini ki pokrajinsko služba. Odova sabaj, andi podružnica reslja jekh ljil kova hine bičhaldo olače. Ko ljil o phralja pohvalindže la so verno čerela pi služba hem soj tani istrajno. Pomindže hem odova so sigurno tano but pharo svako kurko te džal pe kotar jekh than ko aver. Olako rom phenela: „Odoborkha pogodindža la odija pohvala so niked više na manglja te čhinava i pokrajinsko služba. Čak hem nekobor puča oj man ohrabrindža te istrajinav ked alo maje ki godi te čhinavav i služba.“ On duj hine ki pokrajinsko služba skoro 40 berš.

20. So valjani te čera svako dive hem sose?

²⁰ Te da sa amendar svako dive amare lafenca hem odoljeja so čeraja te mothova zahvalnost. Šaj baš odova ka valjani nekase te šaj te izdržini pana jekh dive ko akava nezahvalno sveto. A odova pana pobuter ka zorjačeri amaro amaljipe averenca kova ka trajini večno. Soj tano pana považno, amen odoljeja ka ova sar amaro Dad, o Jehova kova tano phravde vasteso hem zahvalno.