1. Σαρ σικαντάς εκτίμηση εκ Σαμαρείτης σο κερντάς-λες λατσσές ο Ιησούς;

Ο ΝΤΕΣ μουρσά ισινέ απελπισμέ. Ισινέ λεπροί ντα να μπεκλεντίνενας ότι κα αβένας λατσσές. Εκ ντιβές όμως, ντικχλέ ντουράλ ι Ιησούς, ι Μπαρέ Δασκαλός. Ασουντέας ότι ο Ιησούς κερέλας λατσσές σαβέ τι μανγκές νασφαλίματα, ντα ισινέ σίγουροι ότι τθερέλας ι ζορ τι κερέλ λατσσές λεν-ντα. Οτθάρ, ντινέ βίκος: «Ιησού, Δάσκαλε, τζίτζινε αμένγκε!» Ο ντες μουρσά αβιλέ ντιπ λατσσές. Σίγουρα σαρέ νιωσάλε εκτίμηση ι λατσσιμάσκε σο σικαντάς λένγκε ο Ιησούς. Αλλά εκ τανό λένταρ να νιωσάλο απλά εκτίμηση, αλλά σικαντάς πι εκτίμηση * κο Ιησούς. Οντουβά τζενό σο ισινέ Σαμαρείτης, μανγκλάς τι δοξάνελ ι Ντεβλές «ζουρανέ φωνιάσαρ».​—Λουκ. 17:​12-19.

2, 3. (α) Σόσκε μπορεί μα τι σικαβάς πάντα εκτίμηση; (β) Σο κα ντικχάς ανταλέ μαθημάστε;

² Σαρ ο Σαμαρείτης, αμέν-ντα μανγκάσα τι σικαβάς αμαρί εκτίμηση οντουλένγκε σο σικαβένα λατσσιπέ. Αλλά μπάζιμα μπορεί τι μπιστράσα τι σικαβάς εκτίμηση αμαρέ λαφίντζαρ ή οντουλέντζαρ σο κεράσα.

³ Ανταλέ μαθημάστε, κα ντικχάς σόσκε ισί σημαντικός τι σικαβάς εκτίμηση οντουλέντζαρ σο βακεράσα ντα κεράσα. Κα σικλιάς κατά Γραφή τζενένγκε σο σικαβένας εκτίμηση ντα γιαβερένγκε σο να σικαβένας. Σοράν κα ντικχάς σαρ μπορίνασα τι σικαβάς εκτίμηση.

4, 5. Σόσκε πρέπει τι σικαβάς εκτίμηση;

⁴ Ο Ιεχωβά σικαβέλα αμένγκε σαρ τι σικαβάς εκτίμηση. Εκ τρόπος σο κερέλα-λες ανταβά ισί κάνα ευλογίνελα οντουλέν σο κερένα λέσκο γκι. (2 Σαμ. 22:​21· Ψαλμ. 13:6· Ματθ. 10:​40, 41) Η Γραφή βακερέλα αμένγκε “τι μοιάζας κο Ντεβέλ, αφού ισινάμ λέσκε αγαπημέ τσσαβέ”. (Εφεσ. 5:1) Άρα, εκ μπουτ σημαντικός λόγος για τι σικαβάς εκτίμηση ισί ότι μανγκάσα τι μοιάζας κο Ιεχωβά.

⁵ Σκεφτίνεν καβά ισί εκ γιαβέρ-ντα λόγος για τι σικαβάς εκτίμηση κο γιαβερά. Η εκτίμηση ισί σαρ εκ σουκάρ χαμπέ​—απολαμβάνασα-λες πιο μπουτ κάνα χάσα-λες αμαρέ αμαλέντζαρ. Κάνα νιωθίνασα ότι εκτιμίνενα-αμέν ο γιαβερά, ισινάμ αμέν ευτυχισμέ. Κάνα σικαβάσα αμαρί εκτίμηση, κεράσα ι γιαβερέν ευτυχισμέ. Οντουβά σο σικαντάμ λέσκε εκτίμηση τζανέλα ότι ο προσπάθειες σο κερντάς για τι βοηθίνελ-αμέν ή για τι ντελ-αμέν κάτι σο χρειαζίντιβασα, βοηθιντέ-αμέν μπαγιά. Οτθάρ, η φιλία σο τθεράσα οντουλέ τζενέσαρ αβέλα ατζέ πιο ζουρανί.

6. Σαρ μοιάζενα χρυσέ πφαμπαΐντζαρ ο λάφια σο βακεράσα για τι σικαβάς εκτίμηση;

⁶ Η εκτίμηση σο σικαβάσα ισί πολύτιμη. Η Γραφή βακερέλα: «Σαρ χρυσά πφαμπαγιά αντρέ σε ασημένιους δίσκους ισί ο λάφι σο βακέρντιβελα κο σωστός σαάτι». (Παρ. 25:​11) Σκεφτίνεν καζόμ σουκάρ κα ντικχίντιβελας εκ χρυσή πφαμπάι αντρέ σε εκ ασημένιος δίσκος! Σκεφτίνεν επίσης καζόμ πολύτιμη κα αβέλας! Σαρ κα νιωθίνενας άμα κα κερένας τουμένγκε εκ ασακό δώρος; Ο λάφια-ντα σο βακερένα για τι σικαβέν εκτίμηση μπορεί τι αβέν αζόμ πολύτιμα. Σκεφτίνεν ακαβά-ντα: Εκ χρυσή πφαμπάι ατσσικιαρέλα μπουτ καιρός. Αντικάς ο τζενέ-ντα μπορεί τι ντεν-πες γκοντί σαρέ  πουμαρέ ζωγιάτε ο πολύτιμα λάφια σο βακερντέν για τι σικαβέν λένγκε εκτίμηση.

7. Σαρ σικαντάς πι εκτίμηση ο Δαβίδ, σαρ ντικχάσα κο Ψαλμός 27:4, ντα σαρ σικαντέ-λα γιαβερά τζενέ σο γραφιντέ ψαλμοί;

⁷ Μπουτ υπηρέτες ι Ντεβλέσκε κο πουρανέ μπρεσά σικαβένας εκτίμηση. Εκ ανταλένταρ ισινέ ο Δαβίδ. (Διαβάνεν Ψαλμός 27:4) Εκτιμίνελας μπαγιά ι πάκι λατρεία ντα σικαντάς-λες ανταβά οντουλέντζαρ σο κερέλας. Ντινάς σαστί περιουσία για τι χτίντιβελ ο ναός. Οντουλά σο αστάρντιβενας κατά Ασάφ σικαντέ πουμαρί εκτίμηση κάνα γραφιντέ ψαλμούς, δηλαδή ύμνους για τι δοξάνεν ι Ντεβλές. Σε εκ ύμνος, βακερντέ ευχαριστώ κο Ιεχωβά ντα σικαντέ πουμαρί εκτίμηση “ι σουκάρ πραγματένγκε σο κερέλα”. (Ψαλμ. 75:1) Σίγουρα, ο Δαβίδ ντα οντουλά σο αστάρντιβενας κατά Ασάφ μανγκένας τι σικαβέν κο Ιεχωβά καζόμ μπουτ εκτιμίνενας σαρέ ο ευλογίες σο τθερένας λέσταρ. Τουμέν σκεφτίνενα σαρ μπορίνενα τι μοιάζεν οντουλέ τζενέντε σο γραφιντέ ψαλμοί;

8, 9. Σαρ σικαβέλας ο απόστολος Παύλος εκτίμηση ι πφραλένγκε ντα ι πφενίνγκε, ντα καβά ισινέ ο αποτέλεσμας;

⁸ Ο απόστολος Παύλος εκτιμίνελας πι πφραλέν ντα πι πφενίν ντα ανταβά αγαντίντιβελας κο τρόπος σο κερέλας λάφι λένγκε. Πι προσευχιέντε, πάντα βακερέλας ευχαριστώ κο Ντεβέλ λένγκε. Σικαντάς επίσης πι εκτίμηση κάνα γραφιντάς λένγκε επιστολές. Κο κεφάλαιος 16 κι επιστολή Ρωμαίους, κο πρώτα 15 εδάφια, ο Παύλος βακερέλα 27 ναβά πφραλένγκε ντα πφενίνγκε. Ο Παύλος αντάς πι γκοντιάτε ότι η Πρίσκα ντα ο Ακύλας «τσσουντέ σε κίνδυνος πουμαρί ζωή» λέσκε, ντα βακερντάς ότι η Φοίβη «υπερασπιντάς μπουτέν», αντρέ οντουλέντε λες-ντα. Ισαρντάς οντουλέ αγαπητέ πφραλέν ντα πφενίν σο κερένας μπουτ πράγματα.​—Ρωμ. 16:​1-15.

⁹ Ο Παύλος τζανέλας ότι ο πφραλά ντα ο πφενιά ισινέ ατελείς, αλλά κο τελευταία λάφια κι επιστολή Ρωμαίους, τραμπιντάς τι γραφίνελ σάντε ο λατσσέ ιδιότητες λένγκε. Σκεφτίνεν καζόμ ενθαρρύντιλε οντουλά πφραλά ντα πφενιά κάνα ασουντέ τι διαβάνεν κι κχανγκιρί ο λάφια ι Παυλόσκε! Η φιλία σο τθερένας ι Παυλόσαρ αβιλί σίγουρα πιο ζουρανί. Σικαβένα τουμέν εκτίμηση ι λατσσέ πραγματένγκε σο βακερένα ντα κερένα ο πφραλά τουμαρέ κχανγκιριάταρ;

10. Σο σικλιάσα κατά τρόπος σο σικαβέλας ο Ιησούς εκτίμηση πι μαθητένγκε;

¹⁰ Κάνα κερντάς λάφι κο κχανγκιριά κι Μικρά Ασία, ο Ιησούς σικαντάς εκτίμηση για το έργος σο κερένας λέσκε μαθητές. Για παράδειγμας, ο πρώτα λάφια σο βακερντάς κι κχανγκιρί κο Θυάτειρα ισινέ: «Τζανάβα ο πράγματα σο κερέσα, ντα τι αγάπη ντα τι πίστη ντα το έργος ντα τι υπομονή, ντα ότι οντουλά σο κερέσα ακανά τελευταία ισί πιο μπουτ οντουλένταρ σο κερέας πριν». (Αποκ. 2:​19) Ο Ιησούς να βακερντάς σάντε ι μπουτέ πραγματένγκε σο κερένας, αλλά ισαρντάς-λεν για το ιδιότητες-ντα σο τσσίντενας-λεν τι κερέν λατσσέ πράγματα. Παρόλο σο χρειαζίντιβελας τι ντελ συμβουλή μερικέ πφραλέντε κο Θυάτειρα, αρχισάλο ντα τελειωσάλο ενθαρρυντικέ λαφίντζαρ. (Αποκ. 2:​25-28) Σκεφτίνεν ι εξουσία σο τθερέλα ο Ιησούς σαρ σορό σαρέ ι κχανγκιρίνγκο. Παρόλο σο νανέ υποχρεωμέ τι βακερέλ αμένγκε «ευχαριστώ» για το έργος σο κεράσα λέσκε, να μπιστρέλα τι σικαβέλ πι εκτίμηση. Σο σουκάρ παράδειγμας ι πρεσβυτερόνγκε!

11. Σαρ ντικχάσα κο Εβραίους 12:​16, σαρ ντικχέλας ο Ησαύ ι Ντεβλέσκε πράγματα;

¹¹ Δυστυχώς, μερικά τζενέ σο βακερέλα  λένγκε η Γραφή να σικαντέ εκτίμηση. Για παράδειγμας, ο Ησαύ, παρόλο σο λέσκο ντατ ντα λέσκι ντάι μανγκένας ντα σεβάνενας ι Ιεχωβάς, βοβ να εκτιμίνελας ι Ντεβλέσκε πράγματα. (Διαβάνεν Εβραίους 12:​16) Σαρ αγαντίντιλο ανταβά; Χωρίς τι σκεφτίνελ λατσσές, μπικιντάς πι χουρντέ πφραλέστε, κο Ιακώβ, ο δικαιώματα σο τθερέλας σαρ πρώτος τσσαβό για εκ τσαρό χαμπέ. (Γέν. 25:​30-34) Σοράν, ο Ησαύ μετανιωσάλο μπουτ οντουλέσκε σο κερντάας. Αλλά να εκτιμιντάς οντουλά σο τθερέλας, οτθάρ να ισινέ-λες λόγος τι κερέλ παράπονα κάνα να λιντάς ι ευλογία σο τθερέλας δικαίωμας τι λελ σαρ πρώτος τσσαβό.

12, 13. Σαρ να σικαντέ εκτίμηση ο Ισραηλίτες, ντα καβά ισινέ ο αποτέλεσμας;

¹² Ο Ισραηλίτες τθερένας μπουτ λόγους για τι σικαβέν εκτίμηση. Ελευθερωσάλε κατά δουλεία κάνα ο Ιεχωβά αντάς ο Ντες πληγές κι Αίγυπτος. Σοράν ο Ντεβέλ σωντάς-λεν κάνα καταστραφιντάς σαρό ο αιγυπτιακός στρατός κι Ερυθρά Θάλασσα. Ο Ισραηλίτες ισινέ πφερντέ εκτίμηση ντα γκιλιαντέ εκ ύμνος για τι δοξάνεν ι Ιεχωβάς. Ατσσικιαρντέ όμως πουμαρί εκτίμηση;

¹³ Κάνα ο Ισραηλίτες τθερένας νεβέ δυσκολίες, μπισταρντέ σουγκό σαρέ ο λατσσέ πράγματα σο κερντάας λένγκε ο Ιεχωβά. Σοράν να σικαντέ εκτίμηση. (Ψαλμ. 106:7) Σαρ; «Σαρέ ο Ισραηλίτες αρχισάλε τι γκρινιάνεν ντα τι τζαν κόντρα κο Μωυσής ντα κο Ααρών». Κι πραγματικότητα, γκρινιάνενας ντα τζάνας κόντρα κο Ιεχωβά. (Έξοδ. 16:2, 8) Βοβ στεναχωρισάλο σο να σικαβέλας εκτίμηση λέσκο λαός. Σοράν βακερντάς ότι σαρί οντιά γενιά ι Ισραηλιτένγκι κα μερέλας κι έρημος εκτός κατά Ιησούς του Ναυή ντα κατά Χάλεβ. (Αριθ. 14:​22-24· 26:​65) Ακανά κα ντικχάς σο κα κεράς για μα τι αβάς σαρ οντουλά τζενέ σο να σικαντέ εκτίμηση αλλά σαρ οντουλά σο σικαντέ.

14, 15. (α) Σαρ μπορίνενα ο αντρόγυνα τι σικαβέν ότι εκτιμίνενα ο εκ ι γιαβερές; (β) Σαρ μπορίνενα ο νταντά ντα ο νταγιά τι σικλιαρέν πουμαρέ τσσαβέν τι σικαβέν εκτίμηση;

¹⁴ Κι φαμιλί. Σαρί η φαμιλί βοηθίντιβελα κάνα ο κάθε εκ τζενό σικαβέλα εκτίμηση. Καζόμ πιο μπουτ σικαβένα ο αντρόγυνα πουμαρί εκτίμηση ο εκ ι γιαβερέσκε, αζόμ πιο πασέ αβένα. Ντα ισί λένγκε πιο εύκολος τι συγχωρίνεν ο λάθη ο εκ ι γιαβερέσκε. Εκ μουρς σο εκτιμίνελα πι ρομνιά, να ντικχέλα σάντε ο λατσσέ πράγματα σο βακερέλα ντα κερέλα βόι, αλλά επίσης «ιστίλα ντα ισαρέλα-λα». (Παρ. 31:​10, 28) Ντα εκ τζουβέλ σο τθερέλα σοφία βακερέλα πι ρομέσκε συγκεκριμέ πράγματα σο εκτιμίνελα λέστε.

 ¹⁵ Νταντάλεν ντα νταγιάλεν, σαρ μπορίνενα τι σικλιαρέν τουμαρέ τσσαβέν τι σικαβέν εκτίμηση; Τι ντεν-τουμέν γκοντί ότι τουμαρέ τσσαβέ βακερένα ντα κερένα οντουλά σο βακερένα ντα κερένα τουμέν. Οτθάρ, τι βακερέν «ευχαριστώ» κάνα τουμαρέ τσσαβέ κερένα πράγματα τουμένγκε για τι ντεν-λεν ο λατσσό παράδειγμας. Επίσης, σικλιαρέν-λεν τι βακερέν «ευχαριστώ» κάνα ο γιαβερά κερένα πράγματα λένγκε. Βοηθίνεν τουμαρέ τσσαβέν τι αγαβέν ότι η εκτίμηση νικιόλα αντράλ κατά γκι ντα ότι μπορίνενα τι κερέν μπαρό λατσσιπέ πουμαρέ λαφίντζαρ. Για παράδειγμας, εκ τερνί τζουβέλ, η Κλάρι, βακερέλα: «Μι ντάι κάνα ισινέ 32 μπρεσένγκι, ατσσιλί ξαφνικά κορκορί τρινέ τσσαβέντζαρ. Κάνα με αβιλόμ 32, σκεφτιντόμ καζόμ δύσκολα πρέπει τι ισινέ λάκε αζομάν. Οτθάρ, βακερντόμ λάκε καζόμ εκτιμίναβα σαρέ ο θυσίες σο κερντάς για τι μπαριαρέλ μι πφραλέν ντα μαν. Πριν χάνικ καιρός, βακερντάς μάνγκε ότι οντουλά λάφια γκεραντάς-λεν πι γκίστε, σκεφτίνελα-λεν μπουτ φαρ ντα πάντα ντένα-λα χαρά».

16. Σικαβέν με παράδειγμας σαρ ενθαρρύνασα ι γιαβερέν κάνα σικαβάσα λένγκε εκτίμηση.

¹⁶ Κι κχανγκιρί. Κάνα σικαβάσα αμαρί εκτίμηση κο πφραλά ντα κο πφενιά, ενθαρρύνασα-λεν. Για παράδειγμας, ο Χόρχε, εκ πρεσβύτερος 28 μπρεσένγκο, νασφάλιλο σοβαρά. Εκ σαστό μάσεκ ναστί τζάλας συναθροίσεις. Ατζέ-ντα κάνα αρχισάλο τι τζαλ πάλι ναστί κερέλας μέρη. Ο Χόρχε βακερέλα: «Να τθεράβας ι ζορ τι κεράβ πράγματα σαρ ανγκλέ ντα τι βοηθίναβ κι κχανγκιρί, οτθάρ νιωθίναβας άχρηστος. Αλλά σοράν από εκ συνάθροιση εκ πφραλ βακερντάς μάνγκε: “Μανγκάβα τι ευχαριστίναβ-τουτ σόσκε ισινάν μπουτ λατσσό παράδειγμας μι φαμιλιάκε. Μπεϊντίνασα μπαγιά το ομιλίες ανταλά μπρεσά. Κερντέ αμαρί πίστη πιο ζουρανί”. Λέσκε λάφια ερεσλέ μι γκίστε ντα μο γιακχά πφερντιλέ δάκρυα. Ισινέ ακριβώς οντουβά σο τθεράβας ανάγκη τι ασουνάβ».

17. Σαρ κα σικαβάς εκτίμηση κο Ιεχωβά οντουλένγκε σο ντέλα-αμέν αντράλ πι γκίσταρ σαρ βακερέλα κο Κολοσσαείς 3:15;

¹⁷ Αμαρέ Ντεβλέσκε σο ντέλα αντράλ πι γκίσταρ. Ο Ιεχωβά ντέλα-αμέν μπερεκέτι πνευματικός χαμπέ. Για παράδειγμας, σικλιαρέλα-αμέν αμαρέ λατσσιμάσκε αντράλ κατά συναθροίσεις, κατά περιοδικά ντα κατά ιστότοποι σο τθεράσα. Τυχισάλο τουμένγκε ποτές τι ασουνέν εκ ομιλία, τι διαβάνεν εκ θέμας ή τι ντικχέν κάτι κο Broadcasting ντα τι βακερέν: “Ισινέ ακριβώς οντουβά σο χρειαζίντιβαβας”; Σαρ κα σικαβάς αμαρί εκτίμηση κο Ιεχωβά; (Διαβάνεν Κολοσσαείς 3:​15) Εκ τρόπος ισί  μα τι τσσιναβάς τι ευχαριστίνας-λες αμαρέ προσευχιέντε ανταλέ σουκάρ δωρένγκε.​—Ιακ. 1:17.

18. Σαρ σικαβάσα εκτίμηση αμαρέ Αιθουσάκε;

¹⁸ Σικαβάσα επίσης εκτίμηση κο Ιεχωβά κάνα ατσσικιαράσα ο τθαν σο ντάσα λατρεία πάκι ντα περιποιημέ. Καθαρίνασα ντα περιποιήνασα ι Αίθουσα Βασιλείας, ντα οντουλά σο χρησιμοποιήνενα ο ηλεκτρονικός εξοπλισμός ι κχανγκιριάκο κερένα-λες ανταβά με προσοχή. Κάνα περιποιήνασα λατσσές ο Αίθουσες Βασιλείας, ατσσικιαρένα πιο μπουτ καιρός ντα να χρειαζίντιβελα τι κεράς μπουτ μπουτί για τι λατσσαράς-λεν. Αντικάς ατσσόνα πιο μπουτ λοβέ για τι χτίνας ντα τι λατσσαράς γιαβερά Αίθουσες Βασιλείας σαρό κο ντουνιάς.

19. Σο σικλιλέν εκχέ επισκοπόσταρ ντα λέσκε ρομνιάταρ;

¹⁹ Οντουλένγκε σο μαρένα-πες αμένγκε. Κάνα σικαβάσα εκτίμηση αμαρέ λαφίντζαρ, μπορεί τι αλλάνας ο τρόπος σο ντικχέλα εκ τζενό πο δυσκολίες. Ντικχέν ι εμπειρία εκχέ επισκοπόσκι ντα λέσκε ρομνιάκι. Εκ ντιβές κο βεν γκιλέας κο έργος ντα σοράν βουρτισάλε μπουτ κχινέ οτθέ σο μπεσένας. Κερέλας αζόμ σιλ σο η πφεν σοτάς πι παλτόσαρ. Πρωί, βακερντάς πι ρομέσκε ότι να νταϊντίνελας γιαβέρ ανταλέ διορισμόστε. Χάνικ πιο σοράν, αβιλό εκ γράμμας κατά γραφείος τμήματος σο ισινέ λάκε. Ο πφραλά οντουλέ γραμμάσαρ ισαρένας-λα για το έργος ντα για την υπομονή σο κερέλας. Αγαβένας καζόμ δύσκολος ισί τι σοβέλ γιαβερέ κχερέστε κάθε εβδομάδα. Ο ρομ λάκο βακερέλα: «Ανταβά ισαριπέ κερντάς-λα τι νιωθίνελ αζόμ λατσσές σο να βακερντάς ατζέκ φαρ τι τσσιναβάς ανταλέ εργόσταρ. Αλλά μπουτ φαρ βόι ενθαρρύνελας-μαν κάνα σκεφτίναβας τι τσσιναβάβ». Ανταβά αντρόγυνος ατσσιλό ανταλέ διορισμόστε σχεδόν 40 μπρεσά.

20. Σο πρέπει τι προσπαθίνας τι κεράς κάθε ντιβές, ντα σόσκε;

²⁰ Τι προσπαθίνας κάθε ντιβές τι σικαβάς εκτίμηση οντουλέντζαρ σο βακεράσα ντα κεράσα. Οντουλά σο βακεράσα ή κεράσα αντράλ αμαρέ γκίσταρ μπορεί τι ισί ακριβώς οντουβά σο χρειαζίντιβελα εκ γιαβέρ τζενό για τι νταϊντίνελ ατζέκ εκ ντιβές ανταλέ ντουνιάστε σο να σικαβέλα εκτίμηση. Ντα κάνα σικαβάσα εκτίμηση κα κεράς αμαλέν σο κα τθεράς-λεν για πάντα. Ο πιο σημαντικός ισί ότι κα μοιάζας αμαρέ Νταντέστε κο Ιεχωβά σο ντέλα αντράλ πι γκίσταρ ντα ισί πφερντό εκτίμηση.