NSOLO WA PFUNDZIRO 8
Thangwi Yanji Tisafunika Kupereka Takhuta?
“Perekanimbo takhuta.”—AKOL. 3:15.
NYIMBO 46 Tikupereka Takhuta Yahova
PINAFUNA IFE KUPFUNDZA *
1. Kodi Nsamariya adawangiswa na Yezu apangiza tani kupereka kwace takhuta?
AMUNA khumi akhali m’makhaliro akunentsa kakamwe. Iwo akhali na matanya, pontho nee akhali na cinyindiro cakuti mbadawanga. Mbwenye ntsiku inango, iwo aona nakutali Yezu, wakuti ndi Pfundzisi Wankulu. Iwo akhadabva kuti Yezu awangisa anthu akuti akhali na mautenda akusiyana-siyana, pontho iwo akhali na cinyindiro cakuti mbadawangiswambo. Natenepa iwo akhuwa mbalonga: “Yezu, Mpfundzisi, tibverenimbo ntsisi!” Anyamatanya khumi awangiswa. Mwakukhonda penula, onsene akomerwa na kukoma ntima kwa Yezu. Mbwenye m’bodzi wa iwo wakuti akhali Nsamariya acita pizinji kupiringana kukomerwa, iye aenda kapereka takhuta * kuna Yezu. Iye akulumizika toera kusimba Mulungu “mwakugaluza.”—Luka 17:12-19.
2-3. (a) Thangwi yanji m’midzidzi inango tisaduwala kupereka takhuta? (b) Tinapfundzanji mu nsolo uno?
2 Ninga Nsamariya, ife tisafunikambo kupereka takhuta kuna anthu anaticitira pinthu pyadidi. Mbwenye m’midzidzi inango, panango tisaduwala kupereka takhuta thangwi ya pidalonga peno pidaticitira anango.
3 Mu nsolo uno tinapfundza kuti thangwi yanji tisafunika kupereka takhuta kubulukira m’mafala na picita ife. Tinapfundza kubulukira ku pitsandzo pya anthu analongwa m’Bhibhlya akuti apereka takhuta na anango adakhonda kupereka takhuta. Buluka penepo, tinapfundza njira zingasi zakuti tinacita tani pyenepi.
THANGWI YANJI TISAFUNIKA KUPEREKA TAKHUTA?
4-5. Thangwi yanji tisafunika kupereka takhuta?
4 Yahova ndi citsandzo cadidi kakamwe cakupereka takhuta. Njira ibodzi inacita iye pyenepi ndi kupasa nkhombo ale anacita pinafuna iye. (2 Sam. 22:21; Masal. 13:6; Mat. 10:40, 41) Pontho, Bhibhlya isalonga kuti ninga anace akufunika, ‘tisafunika kutowezera Mulungu.’ (Aef. 5:1) Natenepa thangwi ibodzi inaticitisa kupereka takhuta ndi yakuti ife tisafunika kutowezera Yahova.
5 Cincino tendeni tione thangwi inango inaticitisa kupereka takhuta. Kupereka takhuta kwalandana na cakudya cinaphikwa mwadidi toera kudya pabodzi na axamwali. Ife tingacitira anango pinthu pyadidi iwo asakomerwa kakamwe. Iwombo angapangiza kupereka kwawo takhuta thangwi ya pidacita ife, tisakhalambo akutsandzaya kakamwe. Munthu adaticitira pinthu pyadidi peno adatipasa cinthu cikhafuna ife, asapibva kuti kuwangisira kwace kwaphata basa. Pyenepi pisacitisa kuti uxamwali wathu na munthu unoyu ukhale wakuwanga.
6. Mafala akupereka takhuta na masau akucitwa na ouro alandana tani?
6 Kupereka kwathu takhuta ndi kwakufunika kakamwe. Bhibhlya isalonga: ‘Mafala adidi angalongwa pa ndzidzi wakuthema akhala ninga kupereka masau a ouro m’mbale ya parata.’ (Mis. 25:11) Tsau yakucitwa na ouro ingaikhwa m’mbale ya parata isabalika kakamwe, pontho isakhala yakufunika kakamwe. Kodi imwe munapibva tani munthu angakupasani muoni ninga unoyu? Mwakukhonda penula munakomerwa. Munjira ibodzi ene, mafala akupereka takhuta analonga imwe kuna anango ndi akufunika kakamwe. Kusiyapo pyenepi, tsau yakucitwa na ouro inakwanisa kukhala mu pyaka pizinji kakamwe. Munjira ibodzi ene, munthu anakwanisa kukumbuka peno kukoya mu umaso wace onsene mafalanu akupereka takhuta thangwi ya pinthu pyadidi pidacita iye peno pidakupasani iye.
IWO APANGIZA KUPEREKA KWAWO TAKHUTA
7. Mwakubverana na Masalmo 27:4, Dhavidhi na ana a Azafe apangiza tani kupereka kwawo takhuta?
7 Atumiki azinji a Mulungu a ndzidzi wakale apangiza kupereka kwawo takhuta. M’bodzi mwa iwo akhali Dhavidhi. (Lerini Masalmo 27:4.) Iye akhafuna kakamwe ulambiri wandimomwene. Natenepa, toera kupangiza kuti akhapereka takhuta, apereka pinthu pizinji pyakufunika toera kuphedzera kumangwa kwa templo. Ana a Azafe apangiza kupereka kwawo takhuta mukulemba masalmo peno nyimbo zakusimba Yahova. Mu nyimbo ibodzi, iwo apereka takhuta kuna Yahova thangwi ya ‘mabasace akudzumisa.’ (Masal. 75:1) Dhavidhi na ana a Azafe akhafuna kupangiza Yahova kuti iwo akhapereka takhuta thangwi ya nkhombo zonsene zikhatambira iwo kubulukira kwa iye. Ndiye tanimbo imwe? Kodi musakwanisa kuona njira zakuti munatowezera anyamasalmo anewa?
Kodi tsamba idalemba Paulu kuna Aroma isatipfundzisanji thangwi yakupereka takhuta? (Onani ndima 8-9) *
8-9. Mpostolo Paulu akhapangiza tani kupereka kwace takhuta kuna abale na alongo, pontho pyenepi pyaaphedza tani?
8 Mpostolo Paulu akhapereka takhuta kuna abale na alongo. Ife tinakwanisa kuona pyenepi munjira idalonga iye thangwi ya iwo. Ndzidzi onsene ukhacita iye phembero akhapereka takhuta kuna Mulungu thangwi ya iwo, pontho iye apereka takhuta kuna iwo mu ndzidzi ukhalemba iye matsamba. M’mavesi 15 a Aroma 16, Paulu alemba madzina a abale na alongo akukwana 27. Paulu alonga kuti Priska na Akila “aikha umaso wawo pangozwi” thangwi ya iye, pontho alonga kuti Febhe ‘aphedza abale azinji’ kuphatanizambo Paulu. Iye apereka takhuta kuna abale na alongo anewa thangwi ya ufuni wawo na basa yawo yaphinga.—Aroma 16:1-15.
9 Paulu akhadziwa kuti abale na alongo ace akhali akusowa ungwiro, mbwenye pikhamalisa iye kulemba tsamba yace kuna Aroma, iye alonga pya makhaliro awo adidi. Mwakukhonda penula, abale na alongo atsandzaya kakamwe mu ndzidzi ukhalerwi tsamba ineyi ya Paulu mu mpingo. Pyenepi pyacitisa kuti uxamwali wawo na Paulu ukhale wakuwanga. Kodi imwe muli na nsambo wakupereka takhuta kuna abale na alongo mu mpingo mwanu thangwi ya pinthu pyadidi pinacita iwo peno pinalonga iwo?
10. Tisapfundzanji kubulukira munjira idapereka Yezu takhuta kuna atowereri ace?
10 Mu mphangwa zidalonga Yezu kuna mipingo mingasi ya Azya Menori, iye apereka takhuta thangwi ya basa ikhacita atowereri ace. Mwacitsandzo, iye alonga kuna mpingo wa ku Tiyatira: “Ine ndisadziwa pinacita iwe, ufuni wako, cikhulupiro cako, utumiki wako na kupirira kwako, pontho ndisadziwa kuti pinacita iwe cincino ndi pizinji kakamwe kupiringana pikhacita iwe kale.” (Apok. 2:19) Yezu nee alonga basi ene kuti iwo akhamwaza mphangwa mwaphinga, mbwenye aasimba thangwi ya kukulisa makhaliro adidi akuti aaphedza toera kucita mabasa anewa adidi. Maseze Yezu akhafunika kupereka uphungu kuna abale anango ku Tiyatira, iye atoma, pontho amalisa na mafala akuwangisa. (Apok. 2:25-28) Nyerezerani basi, Yezu nsolo wa mipingo yonsene nee asadikhirwa kuti apereke takhuta kuna ife thangwi ya basa inancitira ife. Ngakhale tenepo, iye asapereka takhuta. Ceneci ndi citsandzo cadidi kakamwe kuna akulu ampingo.
IWO NEE APEREKA TAKHUTA
11. Mwakubverana na Ahebheri 12:16, kodi Ezau akhaona tani masasanyiro a Yahova?
11 Mwakutsukwalisa, anthu anango analongwa m’Bhibhlya nee apereka takhuta. Mwacitsandzo, Ezau akuzwa pa banja yakuti ikhafuna, pontho ikhalemedza Yahova, ngakhale tenepo iye nee akhalemedza masasanyiro a Yahova. (Lerini Ahebheri 12:16.) Kodi kukhonda kwace kupereka takhuta kwapangizika tani? Kwapangizika mu ndzidzi udagulisa iye ufulu wace ninga mwana wautombo kuna Yakobe wakuti akhali ng’ono wace thangwi ya cakudya. (Gen. 25:30-34) Mukupita kwa ndzidzi, Ezau atsumbikika kakamwe thangwi ya cisankhulo cace. Mbwenye, nakuti iye nee akhapereka takhuta thangwi ya mwai ukhali na iye, nee adungunya pidaluza iye ufulu wakukhala mwana wautombo.
12-13. Aizraeli apangiza tani kuti nee akhapereka takhuta, pontho ninji pidaacitikira?
12 Aizraeli akhali na mathangwi mazinji toera kupereka takhuta kuna Yahova. Iwo asudzulwa mu ubitcu pidamala Yahova kubweresa Miliri Khumi ku Ejitu. Buluka penepo Mulungu aapulumusa pidafudza iye anyankhondo onsene a mu Ejitu pa Bara Yakufwira. Mu ndzidzi unoyu, Aizraeli apereka takhuta kwakuti aimba nyimbo yakuwina toera kusimba Yahova. Kodi iwo apitiriza kupereka takhuta?
13 Mu ndzidzi udatoma Aizraeli kuthimbana na nyatwa zinango, iwo aduwala pinthu pyonsene pyadidi pidaacitira Yahova. Iwo apangiziratu kuti nee akhali anthu akupereka takhuta. (Masal. 106:7) Munjira ipi? Bhibhlya isalonga: ‘Mwinji onsene wa Aizraeli watoma kudungunya kuna Mose na Aroni.’ Mwandimomwene iwo akhadungunyira Yahova. (Eks. 16:2, 8) Yahova atsukwala kakamwe thangwi yakukhonda kupereka takhuta kwa mbumba yace. Mukupita kwa ndzidzi, Yahova alonga kuti ubalwi unoyu onsene wa Aizraeli mbudafa n’thando, kusiyapo Yoswa na Kalebe. (Num. 14:22-24; 26:65) Tinacalira tani pitsandzo pyenepi pyakuipa, mbititowezera pitsandzo pyadidi?
PANGIZANI KUPEREKA KWANU TAKHUTA
14-15. (a) Anyakumanga banja anapangiza tani kuti asapereka takhuta kuna unango na ndzace? (b) Anyakubala anapfundzisa tani anawo toera akhale akupereka takhuta?
14 M’banja. Anthu onsene m’banja angakhala akupereka takhuta, banja isakhala yakutsandzaya. Anyakumanga banja angapereka takhuta kuna unango na ndzace, ufuni wawo usathimizirika, pontho pisaaphedza toera alekererane unango na ndzace angadawirana. Mamuna wakuti ali na nsambo wakupereka takhuta kuna nkazace, nee asaona basi ene pinthu pyadidi pinalonga iye peno pinacita iye, mbwenye ‘asansimba.’ (Mis. 31:10, 28) Pontho nkazi waudziwisi asapereka takhuta kuna mamunace thangwi ya pyonsene pinancitira iye.
15 Anyakubala, munacitanji toera kupfundzisa ananu kuti akhale akupereka takhuta? Kumbukani kuti kazinji kene anapiana asatowezera pinacita imwe na pinalonga imwe. Natenepa ananu angakucitirani pinthu pyadidi, perekani takhuta kuna iwo. Pontho, apfundziseni kuti apereke takhuta angacitirwa pinthu pyadidi na anango. Aphedzeni toera abvesese kuti mafala akupereka takhuta angabulukira muntima, asaphedza kakamwe. Mwacitsandzo, ntsikana anacemerwa Clary alonga: “Pikhali mama na pyaka 32 pyakubalwa, asiyiwa na ana atatu toera kuakuza ekhene. Pikhali ine na pyaka 32, ndadzindikira kuti pikhali pyakunentsa kakamwe kwa iye kukuza anapiana ekha. Natenepa ndampanga kuti ndisapereka takhuta kakamwe thangwi ya pinthu pyonsene pidacita iye toera kukuza ine na abale anga. Ndzidzi ungasi nduli, iye andipanga kuti ndzidzi onsene unakumbuka iye mafala anga asakhala wakutsandzaya kakamwe.”
Pfundzisani ananu toera apereke takhuta (Onani ndima 15) *
16. Perekani citsandzo cinapangiza kuti mafala athu akupereka takhuta anakwanisa kuwangisa anango.
16 Mu mpingo. Ife tinawangisa kakamwe abale na alongo tingapereka takhuta thangwi ya pinacita iwo. Mwacitsandzo, nkulu wa mpingo anacemerwa Jorge wa pyaka 28 pyakubalwa, akhabva kupha kakamwe. Iye amala mwezi wamumphu nee kuenda kumisonkhano. Ngakhale pidatoma iye kuenda kumisonkhano, nee akhakwanisa kucita makhundu. M’bale Jorge alonga: “Ndikhali ninga munthu wakusowa basa, thangwi nee ndikhakwanisa kucita pizinji mu mpingo. Mbwenye ntsiku inango pidamala nsonkhano, m’bale m’bodzi alonga: ‘Ndisapereka takhuta thangwi yacitsandzo cadidi cinapereka imwe kuna banja yanga. Ife tikhakomerwa kakamwe na nkhani zikhacita imwe mu pyaka pya nduli. Nkhani zenezi zatiphedza kakamwe toera kuwangisa cikhulupiro cathu.’ Mafala anewa andikhuya kakamwe mbinditoma kulira. Anewa ndi mafala akhafuna ine kubva mu ndzidzi unoyu.”
17. Mwakubverana na Akolose 3:15, tinapangiza tani kupereka kwathu takhuta kuna Yahova thangwi ya pinthu pinatipasa iye?
17 Kuna Mulungu wathu wakupasa mwakudzala manja. Yahova asaphatisira njira zizinji kakamwe toera kutipfundzisa mafalace. Mwacitsandzo, iye asaphatisira misonkhano, marevista na masaiti athu toera kutipfundzisa. Kodi mwabva kale nkhani, kuleri revista, peno kuona broadcast mbamulonga: ‘Nkhani ineyi, peno nsolo unoyu walemberwa ine’? Mphapo, tinapangiza tani kupereka kwanu takhuta kuna Yahova? (Lerini Akolose 3:15.) Njira ibodzi yakucita pyenepi ndi kunsimba m’maphembero athu thangwi ya miyoni ineyi yadidi.—Tiya. 1:17.
Kutsalakana mwadidi Nyumba ya Umambo ndi njira ibodzi yakupangiza kupereka kwathu takhuta (Onani ndima 18)
18. Tinapangiza tani kupereka takhuta thangwi ya Nyumba yathu ya Umambo?
18 Kutsalakana mwadidi Nyumba yathu ya Umambo ndi njira inango yakupangiza kupereka kwathu takhuta kuna Yahova. Ndzidzi onsene tisafunika kuwangisira toera kuphedzera kucenesa na kusasanyira papswa Nyumba za Umambo. Abale anaphatisira mitcini yakugaluza mafala mu mpingo asafunika kuitsalakana mwadidi. Tingatsalakana mwadidi Nyumba yathu ya Umambo, tinacalira kuphatisira kobiri izinji toera kuisasanyira papswa. Tingacita pyenepi, tinaphedzera gulu toera ikhale na kobiri yakumanga peno kusasanyira Nyumba za Umambo zinango pa dziko yonsene yapantsi.
19. Tisapfundzanji na pidacitikira muyang’aniri wa cisa na nkazace?
19 Kuna ale anaphata basa mwaphinga toera kutiphedza. Tingapereka takhuta kuna munthu, panango mafala athu anakwanisa kuphedza munthu unoyu toera kuthimbana na pinentso pyace. Onani pidacitikira muyang’aniri wa cisa na nkazace. Pakumala ntsiku yonsene mbakamwaza mphangwa mu ndzidzi wa khoni, iwo abwerera kunyumba idafikira iwo akuneta kakamwe. Ntsiku ineyi kukhatonthola kakamwe kwakuti nkazi agona na kapoti wace. Mangwana mwace namacibese, iye apanga mamunace kuti nkhabe dziwa khala anakwanisa kupitiriza m’basa yakucedzera mipingo. Mbwenye namacibese mabodzi ene, atambira tsamba yakubuluka ku Bheteli ikhadalemberwa iye. Tsamba ineyi ikhansimba thangwi ya basa yonsene inacita iye, kutawira kwace kugona m’mbuto zakusiyana masumana onsene, pontho ikhansimba thangwi ya kupirira kwace. Mamunace alonga: “Mafala akuwangisa akhali mu tsamba ineyi am’phedza kakamwe kwakuti nee alongabve pya kusiya basa yakucedzera mipingo. Buluka penepo, iye andiwangisa kazinji kene pikhanyerezera iye kusiya basa ineyi.” Banja ineyi yapitiriza m’basa yakucedzera mipingo cifupi na pyaka 40.
20. Tisafunika kucitanji ntsiku zonsene, pontho thangwi yanji?
20 Natenepa, mu pyonsene pinacita ife na pinalonga ife ntsiku na ntsiku, tendeni tipangize kuti tisapereka takhuta. Panango takhuta wanu wakubulukira pantsi pantima ndiye akhafuna m’bale peno mulongo toera akwanise kuthimbana na nyatwa za ntsiku ineyi mu dziko ino yakuipa. Tingakhala na nsambo wakupereka takhuta, tinawangisa uxamwali wathu na abale na alongo, pontho uxamwali unoyu unakwanisa kukhala kwenda na kwenda. Cakufunika kakamwe, tingacita pyenepi, tikutowezera citsandzo ca Babathu wakupasa mwakudzala manja, Yahova.
NYIMBO 20 Mwapereka Mwananu Wapantima
^ ndima 5 Kodi citsandzo ca Yahova, Yezu na Nsamariya wamatanya cisatipfundzisanji thangwi yakupereka takhuta? Mu nsolo uno tinapfundza pitsandzo pyenepi na pinango. Tinapfundza kuti thangwi yanji ndi pyakufunika kakamwe kupereka takhuta, pontho tinapfundza njira zingasi zakuti tinacita tani pyenepi.
^ ndima 1 MABVEKERO A MAFALA ANANGO: Kupereka takhuta kuna munthu pisabveka kusimba munthu thangwi ya cinthu cidatipasa iye peno cidaticitira iye.
^ ndima 55 PITHUNDZITHUNDZI: M’bale akuleri tsamba idalembera Paulu mpingo wa ku Roma; Akila, Prisila, Febhe na anango akomerwa pidabva iwo madzina awo mbalongwa.
^ ndima 57 PITHUNDZITHUNDZI: Mai akupangiza mwanace wantsikana kuti anapereka tani takhuta thangwi ya citsandzo cadidi cinapangiza mulongo wakugwesera.
