1. Na faapefea ona faaalia e se tamāloa Samaria na faamālōlōina e Iesu lona lotofaafetai?

NA MATUĀ mafatia ni tamāloloa se toʻa 10. Na latou aafia i le lepela ma na foliga mai ua leai so latou faamoemoe. Ae i se tasi aso, na latou iloa mamao atu ai Iesu le Faiaʻoga Sili. Na latou faalogo sa ia faamālōlōina ituaiga maʻi eseese uma, ma na latou mautinoa e mafai ona ia faamālōlōina i latou. O lea na latou alalaga atu ai: “Iesu e, le Faiaʻoga, ia e alofa mai iā i matou!” Na faamālōlōina e Iesu nei tamāloloa e toʻa 10, ma e mautinoa lo latou talisapaia o le agalelei o Iesu. Peitaʻi, e na o le toʻatasi le tamāloa sa ia lagona ma faaalia le lotofaafetai * iā Iesu. Na uunaʻia lenā tamāloa Samaria ua faamālōlōina, ina ia “vivii leotele atu i le Atua.”​—Luka 17:12-19.

2-3. (a) Aiseā e tatou te lē taulau ai i nisi taimi i le faaalia o le lotofaafetai? (e) O le ā o le a tatou iloiloina i lenei mataupu?

² E pei o le tamāloa Samaria, e tatou te mananaʻo e faaalia lo tatou lotofaafetai i ē e agalelei mai. Peitaʻi, e iai taimi atonu e galo ai ona faaleo ma faaali atu lo tatou lotofaafetai.

³ I lenei mataupu, o le a tatou iloiloina ai le tāua o le faaalia o le lotofaafetai i a tatou upu ma gaoioiga. O le a tatou iloiloina foʻi nisi o faaaʻoaʻoga faale-Tusi Paia o nisi na faaalia le lotofaafetai, faapea ma nisi e leʻi faia faapea. E lē gata i lea,  o le a tatou iloiloina ni auala patino e tatou te faaalia ai le lotofaafetai.

4-5. Aiseā e tatau ai ona tatou faaalia le lotofaafetai?

⁴ Ua faataatia e Ieova se faaaʻoaʻoga mo i tatou i le faaalia o le lotofaafetai. O se tasi o auala ua ia faia ai faapea, o le tauia lea o i latou e faafiafiaina o ia. (2 Samu. 22:21; Sala. 13:6; Mata. 10:40, 41) Ua faalaeiauina foʻi i tatou ina “ia faaaʻoaʻo i le Atua e faapei o lana fanau pele.” (Efe. 5:1) O lea, o se māfuaaga tāua e tatau ai ona tatou faaalia le lotofaafetai, ona e tatou te mananaʻo e mulimuli i le faaaʻoaʻoga a Ieova.

⁵ Seʻi o tatou iloiloina se isi māfuaaga e tatau ai ona faaalia le lotofaafetai. O le lotofaafetai e tai pei o se taumafataga o loo tatou olioli faatasi ai ma isi. Pe a faaalia mai e isi le lotofaafetai, e tatou te lagona le fiafia. Pe a tatou faaalia atu foʻi le lotofaafetai i isi, o le a latou lagona le fiafia. Pe a tatou faaalia le lotofaafetai i sē na fesoasoani mai iā i tatou, o le a ia iloa ai le aogā o ana taumafaiga. O le iʻuga, o le a faamalosia ai la tatou faauōga ma lenā tagata.

6. O ā itu e tutusa ai faaupuga e faailoa atu ai le lotofaafetai ma ni apu auro?

⁶ E tāua tele faaupuga e faaalia atu ai lo tatou lotofaafetai. Ua taʻua i le Faataoto 25:11, “o le upu e fai atu i le taimi tatau, e pei o apu auro i totonu o mea siliva ua togitogiina.” Seʻi mafaufau i le matagofie ma le tautele o ni apu auro ua tuuina i totonu o se mea siliva. O ā ni ou faalogona pe a e mauaina se meaalofa faapena? E faapena le tautele o faaupuga e faailoa atu ai i isi lou lotofaafetai. E lē gata i lea, o se apu auro e tumau mo se taimi umi. I se tulaga talitutusa, o faaupuga e faaalia atu ai lou lotofaafetai i se isi tagata, o le a ia manatua ma faatāuaina i lona olaga atoa.

7. E tusa ai ma le Salamo 69:30, na faapefea ona faaalia e Tavita ma isi faisalamo lo latou lotofaafetai?

⁷ Na faaalia e le toʻatele o auauna a le Atua i aso ua mavae le lotofaafetai. O se tasi o i latou o Tavita. (Faitau le Salamo 69:30.) Na ia matuā talisapaia le tapuaʻiga mamā, ma na atagia mai lea i ana gaoioiga. Sa ia foaʻi le tele o lona tamaoaiga mo le fausiaina o le malumalu. Na faaalia e ē na tupuga mai iā Asafo le lotofaafetai e ala i le tusiaina o salamo po o pese o viiga. I se tasi o pese, na latou faafetai ai iā Ieova ma faalauiloa atu ana “galuega ofoofogia.” (Sala. 75:1) E manino mai na mananaʻo Tavita ma ē na tupuga mai iā Asafo, e faailoa atu iā Ieova lo latou matuā talisapaia o faamanuiaga uma ua latou maua mai iā te ia. Pe e mafai ona e mafaufau i ni auala e te faaaʻoaʻo ai i nei faisalamo?

8-9. Na faapefea ona faaalia e le aposetolo o Paulo le lotofaafetai i ona uso ma tuafāfine, ma o le ā le iʻuga?

⁸ Na talisapaia e le aposetolo o Paulo ona uso ma tuafāfine, ma na atagia mai lea i le auala na ia talanoa ai e faatatau iā i latou. Na masani ona ia faafetai iā Ieova mo i latou pe a tatalo na o ia. Na faaalia foʻi lona lototalisapaia e ala i ana tusi na avatu iā i latou. I uluaʻi fuaiupu e 15 o le Roma mataupu e 16, na taʻua ai e Paulo igoa o Kerisiano e toʻa 27. Na taʻua patino e Paulo ia Akula ma Pisila “o ē na lamatia o la ola” ona o ia, ae na ia faamatalaina Fipe o sē na “fesoasoani i le toʻatele” e aofia ai ma ia. Na ia faamālō atu i na uso ma tuafāfine pele o ē na galulue mamafa.​—Roma 16:1-15.

⁹ Na amanaʻia e Paulo e lē lelei atoatoa ona uso ma tuafāfine, ae ina ua faaiʻu lana tusi i Kerisiano i Roma, na ia uaʻi atu i o latou uiga lelei. Seʻi manatu i le faalaeiauina o na uso ma tuafāfine a o latou faalogo atu o faitau leotele mai le tusi a Paulo i le faapotopotoga. O le iʻuga, e mautinoa na matuā faamalosia ai la latou faiā ma Paulo. Pe e masani ona e faaalia atu le lotofaafetai mo galuega ma faamatalaga lelei e faia e sui o lau faapotopotoga?

10. O le ā e tatou te aʻoaʻoina mai i le auala na faaalia ai e Iesu le lotofaafetai i ona soo?

¹⁰ O feʻau na avatu e Iesu i nisi o faapotopotoga i Asia Itiiti, na faaalia atu ai lona talisapaia o galuega a ona soo. O se faaaʻoaʻoga, ina ua amata lana feʻau na avatu i le faapotopotoga i Tuatira, na ia faapea atu: “Ua ou iloa au galuega, ma lou alofa, o lou faatuatua, o lau faiva ma lou tumau, ma ua sili atu au galuega i le taimi nei nai lo o le taimi muamua.” (Faaa. 2:19) E lē gata na taʻua e Iesu le tele o a latou galuega lelei, ae na ia faamālō atu foʻi mo uiga lelei na uunaʻia ai i latou e faia na galuega lelei. E ui na manaʻomia ona avatu e Iesu aʻoaʻiga i nisi i Tuatira, ae na amata ma faaiʻu lana feʻau i le avatu o le faamālō. (Faaa. 2:25-28) Seʻi manatu i le telē o le pule o loo iai iā Iesu i le avea ai ma ulu o le faapotopotoga. E lē manaʻomia ona ia tau faafetai mai mo galuega lelei e tatou te faia mo ia. E ui i lea, e faaalia mai lava lona lotofaafetai. Maʻeu se faaaʻoaʻoga lelei ua ia faataatia mo toeaina!

11. E tusa ai ma le Eperu 12:16, o le ā le vaaiga a Esau i mea paia?

¹¹ E faanoanoa ona e iai nisi i le Tusi Paia e latou te leʻi faaalia le lotofaafetai. O se faaaʻoaʻoga, e ui na tausia aʻe Esau e ni mātua e alolofa ma faaaloalo iā Ieova, ae e na te leʻi talisapaia mea paia. (Faitau le Eperu 12:16.) Na faapefea ona faamaonia lenā tulaga?  Na vave ona faatau atu e Esau lona tofi o le ulumatua i lona uso laʻitiiti o Iakopo, mo na o sina ipu sitiū. (Kene. 25:30-34) Mulimuli ane, na matuā salamō Esau i lana filifiliga. Peitaʻi, e leʻi tatau ona ia faitio ina ua ia lē maua faamanuiaga o le tofi o le ulumatua, talu ai e na te leʻi talisapaia lenā tofi.

12-13. Na faapefea ona faaalia e tagata Isaraelu le leai o se lotofaafetai, ma o le ā le iʻuga?

¹² E tele māfuaaga na tatau ai ona faaalia e tagata Isaraelu le lotofaafetai. Na faasaʻolotoina i latou mai i le faapologaina, ina ua uma ona aumaia e Ieova Mala e Sefulu i Aikupito. Na laveaʻia foʻi e le Atua i latou mai i se mala na faaumatia ai ʻautau uma a Aikupito i le Sami Ulaula. O lea, o le lotofaafetai o tagata Isaraelu na latou usuina ai le pese o le manumalo e vivii ai iā Ieova. Ae pe na faaauau ai ona latou lotofaafetai?

¹³ Ina ua feagai tagata Isaraelu ma luʻi fou, na vave lava ona galo iā i latou mea lelei uma na faia e Ieova mo i latou. Na latou faaalia le leai o se lotofaafetai. (Sala. 106:7) E faapefea? “Ua muimui le faapotopotoga atoa o le fanauga a Isaraelu iā Mose ma Arona.” Peitaʻi, o le mea moni na latou faitio iā Ieova. (Eso. 16:2, 8) Na toʻasā Ieova i le leai o se lotofaafetai o ona tagata. O lea, na ia faailoa mai ai o le a feoti i le toafa lenei augātupulaga atoa o le nuu o Isaraelu, seʻi vaganā ai Iosua ma Kalepo. (Nu. 14:22-24; 26:65) Seʻi o tatou iloiloina la pe e faapefea ona ʻalofia le mulimuli i nei faaaʻoaʻoga leaga ae mulimuli i faaaʻoaʻoga lelei.

14-15. (a) E faapefea ona faaalia e paaga faaipoipo le talisapaia e le tasi o le isi? (e) E faapefea ona aʻoaʻo e mātua a latou fanau ina ia faaalia le lotofaafetai?

¹⁴ I le aiga. E maua e sui uma o le aiga aogā pe a faaalia le lotofaafetai. O le tele e faaalia ai e paaga faaipoipo le talisapaia e le tasi o le isi, o le māfana foʻi lenā o la laʻua mafutaga. O le a faigofie ai foʻi ona la fefaamagaloaʻi. O se tane e na te talisapaia lana avā, e lē gata e na te mātauina galuega ma faamatalaga lelei a lana avā, ae e ʻtulaʻi foʻi ma viiviia o ia.’ (Faata. 31:10, 28) O se avā atamai e na te faailoa atu foʻi i lana tane ni mea patino e na te talisapaia ai o ia.

¹⁵ Mātua, e faapefea ona aʻoaʻo a outou fanau ina ia faaalia le lotofaafetai? Ia manatua, e faataʻitaʻi fanau i au gaoioiga ma faamatalaga e fai. O lea, ia faataatia se faaaʻoaʻoga lelei e ala i le faafetai atu i lau fanau pe a latou faia ni mea lelei mo oe. Ia aʻoaʻo foʻi  le fanau e faafetai atu pe a faia e nisi ni mea lelei mo i latou. Ia fesoasoani i tamaiti ina ia malamalama e telē le aogā o le faaleo atu o le faafetai mai i o latou loto. O se faataʻitaʻiga, ua faapea mai se fafine talavou e igoa iā Clary: “O le 32 tausaga o loʻu tinā, na amata ai ona ia tausia toʻatasi i matou e toʻatolu. Ina ua atoa le 32 o oʻu tausaga, na ou mafaufau ai i le matuā faigatā o le tiute tauave na feagai ma loʻu tinā i lenā taimi. O lea na ou faailoa ai iā te ia loʻu matuā talisapaia o faataulaga sa ia faia mo aʻu ma oʻu tuagane. Talu ai nei, na ia faailoa mai ai e ese le tāua iā te ia o laʻu faamatalaga, e masani ona tau i ai lona mafaufau, ma ia maua ai le fiafia.”

16. Aumai se faaaʻoaʻoga o le auala e faalaeiauina ai isi pe a tatou faafetai atu iā i latou.

¹⁶ I le faapotopotoga. E faalaeiauina o tatou uso ma tuafāfine pe a tatou faafetai atu iā i latou. O se faaaʻoaʻoga, o Jorge o se toeaina e 28 tausaga na aafia i se maʻi tugā. E leʻi mafai ona ia toe auai i sauniga mo le masina. E oo lava i le taimi na mafai ai ona ia toe alu i sauniga, e leʻi mafai ona toe faia ni ana vaega. Na ia taʻutino mai: “Na ou manatu ua lē toe iai soʻu aogā ona ua tapulaa mea e mafai ona ou faia, ma ua lē mafai ona toe taulima oʻu tiute tauave i le faapotopotoga. Ae ina ua māeʻa se tasi o sauniga, na faapea mai se tasi uso iā te aʻu: ʻOu te faafetai atu mo le faataʻitaʻiga lelei na e faataatia mo loʻu aiga. E ese lo matou fiafia i au lauga na fai i nai tausaga talu ai nei, ma na fesoasoani iā i matou ina ia tuputupu aʻe ai faaleagaga.’ Sa pāʻia ai loʻu loto ma maligi oʻu loimata. O na faamatalaga o le mea tonu lenā sa ou manaʻomia.”

17. E pei ona taʻua i le Kolose 3:15, e faapefea ona faaalia lo tatou lotofaafetai iā Ieova mo lona aaofoaʻi?

¹⁷ I lo tatou Atua aaofoaʻi. Ua foaʻi mai e Ieova le anoanoaʻi o taumafa faaleagaga. O se faataʻitaʻiga, ua tatou maua faatonuga aogā mai i a tatou sauniga, mekasini, ma a tatou Upega tafaʻilagi. Pe e iai se taimi na e faalogo ai i se lauga, faitau i se lomiga, pe matamata i se polokalame i le TV i le Initaneti ma e faapea ifo, ʻO le mea tonu lava lea o loo oʻu manaʻomia’? E faapefea ona faaalia lo tatou lotofaafetai iā Ieova? (Faitau le Kolose 3:15.) O se tasi o auala, o le faafetai lea e lē aunoa iā te ia i a tatou tatalo mo nei meaalofa lelei uma.​—Iako. 1:17.

18. O ā auala e faaalia ai lo tatou talisapaia o Maota mo Sauniga?

¹⁸ E faaalia foʻi lo tatou lotofaafetai iā  Ieova e ala i le faamamā ma tausia lelei o a tatou nofoaga mo le tapuaʻiga. E mafai ona faia e lē aunoa so tatou sao i le faamamāina ma le tausia lelei o a tatou Maota mo Sauniga. E tatau i ē e taulimaina masini o loo faaaogā e le faapotopotoga ona faaaogā ma le faaeteete ia vaega. Pe a tausia lelei a tatou Maota mo Sauniga, o le a umi ai ona lelei ma lē tele ni galuega e toe faaleleia ai. O le faia faapea, o le a faasaoina ai le tele o tupe e fausia ma toe faafou ai le tele o Maota mo Sauniga i le lalolagi aoao.

19. O le ā e te aʻoaʻoina mai i le faaaʻoaʻoga a se ovasia matagaluega ma lana avā?

¹⁹ I ē o loo galulue mamafa mo i tatou. Pe a tatou faaalia le lotofaafetai, atonu o le a suia ai le auala e manatu ai se tagata i luʻi o loo ia fesagaʻia. Seʻi mafaufau i le faaaʻoaʻoga a se ovasia matagaluega ma lana avā. Ina ua uma se tasi o aso mālūlū i le talaʻiga, na la toe foʻi ma le vaivai tele i le fale na la faamautū ai. O le maʻatiʻati o le mālūlū na moe ai lava le avā i lona ofu māfiafia na talaʻi ai. Ina ua oo i le taeao, na ia faailoa i lana tane ua ia lē toe gafatia le galuega femalagaaʻi. Peitaʻi, i lenā lava taeao na taunuu mai ai se tusi mo ia mai i le ofisa o le lālā, e faamālō ai iā te ia mo lana faiva ma lona tumau. Na taʻua foʻi i le tusi le faigatā o le suisui o nofoaga e faamautū ai i vaiaso taʻitasi. Ua faapea mai lana tane: “Na matuā pāʻia lona loto i lenei tusi, ma e leʻi toe mafaufau lava o ia e tuua le galuega femalagaaʻi. O le mea moni, na iai taimi na faalaeiau mai ai o ia pe a ou tau faavaivai.” Na galulue pea lenei ulugalii i le galuega femalagaaʻi mo le toetoe 40 tausaga.

20. O le ā e tatau ona tatou faia i aso taʻitasi, ma aiseā?

²⁰ Seʻi o tatou taumafai pea i aso taʻitasi e faaalia lo tatou lotofaafetai e ala i a tatou upu ma gaoioiga. O a tatou upu ma gaoioiga agalelei, atonu o le mea tonu lenā o loo manaʻomia e se isi tagata ina ia fesagaʻia ai popolega o aso taʻitasi. O le faaalia o lo tatou lotofaafetai e mafai ona faamalosia ma faamausalīina ai faauōga. Ae e sili ai ona tāua, o le a tatou faaaʻoaʻo ai i lo tatou Tamā aaofoaʻi ma le lotofaafetai o Ieova.