1. Yini umSamariya lebekaphiliswe nguJesu layenta kute akhombise kutsi uyabonga?

EMADVODZA lalishumi bekasesimeni lesimatima kakhulu. Bekanebulephelo, futsi bekete litsemba lekutsi atawuba ncono. Ngalelinye lilanga, abona kuchamuka Jesu uMfundzisi Lomkhulu. Bekevile kutsi Jesu bekelaphe bantfu lebebanekugula lokwehlukahlukene, futsi bekaciniseka kutsi nabo utawubaphilisa. Ngako amemeta kakhulu atsi: “Jesu, Mfundzisi, sihawukele!” Lamadvodza lalishumi abesalaphekile. Asingabati kutsi onkhe ajabula ngenca yekutsi Jesu wawabonisa umusa. Lenye yalamadvodza yajabula kakhulu kangangekutsi yaya kuJesu yayobonga. * Lendvodza lengumSamariya lebeyiphilisiwe yakhutsateka kutsi ‘ikhatimulise Nkulunkulu ngelivi lelikhulu.’—Luk. 17:12-19.

2-3. (a) Yini lengasenta sikhohlwe kubonga? (b) Sitawucoca ngani kulesihloko?

² NjengalomSamariya, natsi sifuna kubabonga bantfu labanemusa. Ngalesinye sikhatsi kungenteka sikhohlwe kubonga nome kukhombisa labanye indlela lesitiva ngayo ngemusa labasibonise wona.

³ Kulesihloko sitawucoca ngekutsi kubaluleke ngani kukhombisa ngemavi nangetento kutsi siyabonga. Sitawufundza ngetibonelo letiseBhayibhelini tebantfu lebebabonga nalabo lebebangabongi ngaloko bebentelwe kona.

4-5. Kubaluleke ngani kubonga?

⁴ Jehova usibekela sibonelo sekubonga. Lenye indlela lakwenta ngayo loko kutsi ubaniketa umvuzo labo labamlalelako. (2 Sam. 22:21; Hla. 13:6; Mat. 10:40, 41) ImiBhalo isikhutsata kutsi ‘silingise Nkulunkulu njengebantfwana labatsandzekako.’ (Ef. 5:1) Sizatfu lesiyinhloko sekutsi sibonge kutsi sifuna kulingisa Jehova njengobe asibonelo setfu.

⁵ Ase sicoce ngalesinye sizatfu sekutsi kungani kufanele sibabonge labanye bantfu. Kubonga kufanana nekudla lokumnandzi futsi kuba mnandzi kakhulu nangabe sikudla nalabanye. Siyajabula nangabe labanye babonga ngalesibentela kona futsi nabo bayajabula nasibabonga. Nangabe sibonga lotsite, sisuke simkhombisa kutsi loko lasentele kona noma lasisite ngako kuligugu kitsi. Umphumela waloko uba kutsi bungani betfu naloyo muntfu buyacina.

6. Emavi ekubonga afana njani nelihhabhula leligolide?

⁶ Kubalulekile kubonga ngetintfo lesentelwa tona. LiBhayibheli litsi: “Livi lelikhulunywe ngesikhatsi lesifanele lifanana nemahhabhula egolide labekwe etindishini tesiliva.” (Taga 25:11) Cabanga kutsi libukeka lilihle kangakanani lihhabhula lelakhiwe ngeligolide lelisesitjeni lesakhiwe ngelisiliva. Cabanga kutsi lingaba ligugu kakhulu kangakanani. Ungativa njani nawungatfola sipho lesinjalo? Emavi ekubonga lowasho kulabanye abaluleke njengalesipho. Cabanga ngaleliciniso: Lihhabhula lelakhiwe ngeligolide lingahlala sikhatsi lesidze kakhulu. Ngendlela lefanako, indlela lokhombisa ngayo kutsi uyabonga itawuhlale ikhunjulwa futsi iligugu kuloyo lowambonga.

7. UmBhalo weTihlabelelo 27:4 utsi Davide kanye nalabanye babhali betihlabelelo bakhombisa njani kutsi bayabonga?

⁷ Tinceku taNkulunkulu letinyenti tasesikhatsini  lesengcile betikhombisa kutsi tiyabonga. Davide bekangulomunye wato. (Fundza Tihlabelelo 27:4.) Bekakhombisa indlela lebekakutsandza ngayo kukhonta lokuhlantekile futsi tento takhe betikhombisa indlela labetiva ngayo. Wanikela ngetintfo letinyenti letiligugu kute kwakhiwe lithempeli. Titukulwane ta-Asafa takhombisa kubonga ngekutsi tibhale tihlabelelo nobe tingoma tekudvumisa. Kulenye yetingoma, letitukulwane tabonga Nkulunkulu futsi tababata imisebenti yaJehova “lemangalisako.” (Hla. 75:1) Kuyacaca kutsi Davide kanye netitukulwane ta-Asafa bebafuna kukhombisa Jehova kutsi bayabonga ngetintfo lebekababusise ngato. Cabanga ngetintfo longatenta kute ulingise labahlabeleli?

8-9. Umphostoli Pawula wakhombisa njani kutsi uyababonga bazalwane nabodzadze, futsi kungenteka waba yini umphumela?

⁸ Umphostoli Pawula bekabatsandza bazalwane nabodzadze futsi loko wakukhombisa ngendlela labebakhulumisa ngayo. Nakathantaza bekahlale abonga Nkulunkulu ngabo. Waphindze wakhombisa kutsi babalulekile kuye ngekutsi ababhalele tincwadzi. Emavesini langu-15 encwadzi yaRoma sehluko 16, Pawula ubita emaKhristu langu-27 ngemagama. Pawula watsi boPhrisila na-Akhwila “babeka kuphila kwabo engotini” ngenca yakhe waphindze watsi Foyibe “ube ngumvikeli walabanyenti,” lokufaka ekhatsi Pawula. Waphindze wabancoma labazalwane nabodzadze lebebasebenta kamatima.—Rom. 16:1-15.

⁹ Pawula bekati kutsi labazalwane nabodzadze bebanesono, futsi ekwephetseni kwencwadzi yakhe leya kubantfu baseRoma, wakhetsa kunaka kakhulu buntfu babo lobuhle. Cabanga kutsi labazalwane nabodzadze bakhutsateka kangakanani nakufundvwa lencwadzi ebandleni! Asingabati kutsi loko kwabucinisa bungani babo naPawula. Uvamile yini kubonga ngetintfo letinhle bazalwane nabodzadze labasebandleni lokulo labatishoko nalabatentako?

10. Yini lesingayifundza endleleni Jesu labonga ngayo balandzeli bakhe?

¹⁰ Nakabhalalela emabandla latsite ase-Asia Minor, Jesu wabonga balandzeli bakhe ngemsebenti lebebawenta. Nasi sibonelo, ngaphambi kwekusho umlayeto wakhe ebandleni laseThiyathira, wacala ngemavi latsi: “Ngiyatati tento takho, lutsandvo, kukholwa, umsebenti, nekucinisela kwakho, nekutsi tento takho tanyalo tiyatendlula tasekucaleni.” (Semb. 2:19) Jesu akazange akhulume ngekukhula kwelizinga labenta ngalo umsebenti kodvwa waphindze wabancoma ngebuntfu babo lobubenta bentele labanye tento temusa. Ngisho nome kwadzingeka kutsi Jesu anikete labanye bazalwane baseThiyathira seluleko, wacala ngekubancoma waphindze waphetsa ngekubakhutsata. (Semb. 2:25-28) Cabanga ngeligunya Jesu lanalo njengobe ayinhloko yemabandla. Akaphoceleleki kutsi asibonge ngemsebenti lesimentela wona. Nobe kunjalo, uyasibonga ngalesimentela kona. Lesi sibonelo lesihle kakhulu kulabadzala belibandla!

11. Ngekusho kwaHebheru 12:16 ngusiphi simo sengcondvo Esawu labenaso mayelana netintfo letingcwele?

¹¹ Kuyadzabukisa kutsi labanye lokukhulunywa ngabo eBhayibhelini abazange bakhombise kubonga. Nasi sibonelo, nanobe Esawu bekakhuliswe batali labatsandza Jehova futsi labamhloniphako, akazange akhombise kubonga ngetintfo letingcwele. (Fundza Hebheru 12:16.) Wabonakala njani kutsi abengumuntfu longabongi? Watsengisa ngebutibulo bakhe kumnakabo lomncane Jakobe kute atfole sitjulo.  (Gen. 25:30-34) Ngekuhamba kwesikhatsi, Esawu wadzabuka futsi watisola ngesento labesentile. Akazange abonge ngetintfo labenato, ngako bekete sizatfu sekukhonona ngekutsi akazange atfole tibusiso tekuba litibulo.

12-13. Ema-Israyeli akhombisa njani kutsi abengabongi, futsi waba yini umphumela?

¹² Ema-Israyeli bekanetizatfu letinyenti tekukhombisa kubonga. Akhululeka ekugcilatweni baseGibhithe ngemuva kwekutsi Jehova aletse Tishayo Letilishumi. Nkulunkulu wawasindzisa enhlekeleleni ngekutsi abhubhise libutfo laseGibhithe eLwandle Lolubovu. Ema-Israyeli ajabula kakhulu aze ahlabela nengoma yekudvumisa Jehova ngenca yekuncoba kwawo. Kepha achubeka abonga yini ngetintfo Jehova labekawentele tona?

¹³ Atsi nakahlangana netinkinga, ngekushesha ema-Israyeli atikhohlwa tonkhe tintfo Jehova labekawentele tona. Loko kwakhombisa kutsi ema-Israyeli abengabongi. (Hla. 106:7) Kanjani? LiBhayibheli litsi: “Sonkhe sive sema-Israyeli sakhonona sisola boMosi na-Aroni ehlane.” Ecinisweni lesive besikhonona ngaJehova. (Eks. 16:2, 8) Jehova wadvumala ngalesento sema-Israyeli. Ngemuva kwaloko, Jehova wabiketela kutsi sonkhe lesive besitawubhujiswa ehlane ngephandle kwaJoshuwa naKhalebi. (Num. 14:22-24; 26:65) Ase sicoce ngekutsi yini lesingayenta kute singalingisi tibonelo letimbi kodvwa silingise letinhle.

14-15. (a) Labashadile bangakhombisa njani kutsi bayajabula ngalabashade nabo? (b) Batali bangabafundzisa njani bantfwana babo kubonga?

¹⁴ Emndenini. Onkhe emalunga emndeni ayazuza nangabe lilunga ngalinye likhombisa kubonga. Kubonga kwenta bantfu labashadile basondzelane kakhulu. Kuba melula kutsi bacolelane nangabe bente emaphutsa. Indvodza lemtsandzako umkayo ayibuki lokuhle lakushoko nalakwentako kuphela, kodvwa iphindze ‘imdvumise.’ (Taga 31:10, 28) Umfati lohlakaniphile uyamtjela umyeni wakhe tintfo latitsandzako kuye.

¹⁵ Batali, ningabafundzisa njani bantfwana benu kubonga? Kufanele ukhumbule kutsi bantfwana bayakulingisa loko lokwentako nalokushoko. Ngako banini sibonelo lesihle ngekutsi nibonge nangabe bantfwana benu banentela tintfo letinhle. Ngetulu kwaloko, fundzisani bantfwana benu kubonga nangabe bantfu babentela tintfo  letinhle. Bente babone kutsi kubonga kusuka ngekhatsi enhlitiyweni futsi emavi abo angaba nemphumela lemihle. Nasi sibonelo, Clary utsi: “Ngesikhatsi make aneminyaka lengu-32, kwadzingeka kutsi akhulise bantfwana labatsatfu. Nasengineminyaka lengu-32, ngatibonela kutsi bekumatima kangakanani kutsi make asikhulise. Ngamtjela kutsi ngimbonga kangakanani ngekutsi wasikhulisa. Usandza kungitjela kutsi emavi ami amtsintsa kakhulu, uhlale awakhumbula futsi ayamjabulisa.”

16. Shano sibonelo lesikhombisa kutsi labanye bayakhutsateka nangabe sibancoma.

¹⁶ Ebandleni. Bazalwane nabodzadze bayakhutsateka nangabe sibabonga. Nasi sibonelo, Jorge longulomdzala welibandla loneminyaka lengu-28 abegula kamatima. Kwaphela inyanga solo angakhoni kuya emihlanganweni. Ngisho noma sekakhona kuya emihlanganweni, bekumatima kutsi afeze tabelo takhe. Jorge utsi: “Bengitiva ngingasilutfo ngenca yekwehluleka kwenta imisebenti yelibandla. Kodvwa ngemuva kwalomunye umhlangano, lomunye umzalwane watsi kimi: ‘Ngikubonga kakhulu ngesibonelo lesihle losibekele umndeni wami. Awati kutsi besitijabulela kangakanani tinkhulumo bewutibeka eminyakeni lembalwa leyendlulile. Tisisitile kutsi sisondzele kakhulu kuNkulunkulu.’ Ngatsintseka kakhulu futsi ngakhala ngobe lomzalwane washo emavi lebengifisa kuweva.”

17. Ngekusho kwemBhalo waKholose 3:15, singakhombisa njani kutsi siyambonga Jehova ngetipho lasipha tona?

¹⁷ Kubonga Nkulunkulu wetfu lowephanako. Jehova usinikete imfundvo lenyenti lemayelana naye. Sibonelo saloko kutsi sitfola ticondziso letilusito emihlanganweni yebuKhristu, kubomagazini kanye naku-website yetfu. Kwake kwenteka yini kutsi walalela inkhulumo letsite, wafundza sihloko lesitsite, noma wabukela luhlelo lwe-Broadcast wase utsi, ‘Nguloko kanye lebengikudzinga’? Singakhombisa njani kutsi siyambonga Jehova? (Fundza Kholose 3:15.) Lenye indlela kutsi njalo nasithantaza simbonge ngetintfo letinhle lasipha tona.—Jak. 1:17.

18. Singakhombisa njani kutsi siyabonga ngekuba nemaHholwa eMbuso?

¹⁸ Sikhombisa kutsi siyambonga Jehova ngekutsi sigcine indzawo lesikhontela kuyo ihlantekile futsi icocekile. Sibakhona njalo nakuhlantwa liHholwa leMbuso, noma nangabe lilungiswa futsi bazalwane labasebentisa imishini ye-sound noma yekudlala ema-video bayiphatsa kahle. Nangabe siwanakekela  emaHholwa eMbuso atawuhlala sikhatsi lesidze futsi angeke kube nesidzingo lesikhulu sekuwalungisa. Loko kutawusita kutsi kwakhiwe lamanye emaHholwa eMbuso emhlabeni wonkhe futsi alungiswe.

19. Yini loyifundzile kulokwenteka kulomunye umbonisi wesigodzi nemkakhe?

¹⁹ Kubonga bazalwane labasebenta kamatima ngenca yetfu. Lesikushoko nasibonga labanye kungahle kushintje indlela labativa ngayo ngetinkinga labanato. Cabanga ngalokwenteka kulomunye umbonisi wesigodzi nemkakhe. Ngalelinye lilanga bebasensimini ebusika, futsi ngemuva kwekushumayela babuyela lapho bebahlala khona badzinwe kakhulu. Bekubandza kakhulu kangangekutsi umkakhe walala agcoke lijazi ngalelolanga. Ekuseni wavuka watjela umyeni wakhe kutsi angeke asakhona kuchubeka nemsebenti wekuvakashela emabandla. Ngemuva kwesikhashana kwafika incwadzi lebuya ehhovisini leligatja futsi beyibhalelwe yena. Lencwadzi beyimbonga kakhulu ngemsebenti lawentako kanye nekucinisela kwakhe. Lencwadzi yachaza kutsi kumatima kakhulu kutfutsa njalo ngeliviki. Umyeni wakhe utsi: “Lencwadzi yamjabulisa kakhulu kangangekutsi akazange aphindze atsi siyekele umsebenti wekujikeleta. Ecinisweni, etikhatsini letinyenti nangicabanga kuyekela, nguye lebekangikhutsata kutsi ngichubeke.” Bachubeka bavakashela emabandla iminyaka lecishe ibe ngu-40.

20. Yini lokufanele setame kuyenta onkhe malanga, futsi leni?

²⁰ Shengatsi onkhe malanga tento tetfu kanye nemavi etfu angahlale akhombisa kutsi sibantfu lababongako. Emavi etfu lasuka enhlitiyweni kanye netento tetfu angahle asite labanye bakhone kubeketelela tinkinga labanato, kanye nekucindzeteleka lababhekana nako kulelive leligcwele bantfu labangabongi. Kubonga kutawenta kutsi bungani betfu nalabanye buhlale njalo. Lokubaluleke kakhulu kutsi sitawube silingisa sibonelo lesihle saJehova longuBabe wetfu lowephanako nalobongako.