1. Kerea tau esẹ Samaria seng nipakapiang i Yesus něnodẹ pěngangarěga?

MAPUL᷊ONG katau esẹ nakahombang situasi makạsusah naung. I sire masakị kusta, kụ nẹ̌pěndang sakị ene tawe mapia. Katewe piạ su sahěllo, bọu marau i sire nakasilo si Yesus, Guru Mawantugẹ̌. I sire bọu nakaringihẹ̌ i Yesus napakapia haghing sakị, kụ i sire mangimang Yesus lai botonge mapakapia si sire. Hakị u ene i sire nẹ̌kui dingangu tingihẹ̌ maihạ, ”Yesus, Guru, tal᷊ěntukeko i kami!” Mapul᷊ong katau esẹ ene kahěngang-hěngang napia. I sire kěbị tantu sěbạe nakitarimakasẹ ual᷊ingu kapiang i Yesus. Katewe, sěngkatau bọu i sire tawe kětạeng nẹ̌pěndang makitarimakasẹ, i sie kai něnodẹ pěngangarěgane * si Yesus. Tau Samaria seng nipakapia ene nakanoạ naunge gunang mẹ̌dalo Mawu ”dingangu tingihẹ̌ maihạ”.​—Luk. 17:12-19.

2-3. (a) Aramanung kawe nụe i kitẹ tawe něnodẹ tatarimakasẹ? (b) Apa sarung ěndungang i kitẹ su pěngangěndungang ini?

² Kere tau Samaria, i kitẹ mapulu měnodẹ tatarimakasẹ si sire apang mapia. Katewe, su piram baụ situasi aramanung i kitẹ niwul᷊e měnodẹ pěngangarěga bọu bawera dingangu kakanoạ.

³ Su pěngangěndungang ini, i kitẹ sarung měngěndung kawe nụe penting měnodẹ pěngangarěga bọu bawera lai kakanoạ. I kitẹ měngěndung bọu contoh su Alkitapẹ̌ soal u i sai něnodẹ tatarimakasẹ dingangu i sai tala. Bọu ene i kitẹ lai  měngěndung carane měnodẹ tatarimakasẹ i kitẹ.

4-5. Kawe nụe i kitẹ harusẹ̌ měnodẹ pěngangarěga?

⁴ Yehuwa něgělị contoh měnodẹ pěngangarěga. Sěmbaụ carane ute i Sie něngal᷊amatẹ̌ si sire apang nakal᷊uasẹ̌ naung’E. (2 Sam. 22:21; Mz. 13:6; Mat. 10:40, 41) Alkitapẹ̌ němahansang si kitẹ, ”Pẹ̌těnọe Mawu kere anạ ikẹ̌kěndagẹ̌.” (Ef. 5:1) Hakị u ene, alasang kahumotongange i kitẹ měnodẹ pěngangarěga ute ual᷊ingu i kitẹ mapulu mẹ̌těno si Yehuwa.

⁵ Pẹ̌tiněna alasang bal᷊inẹ. Pěngangarěga ene mẹ̌sul᷊ungu kaěng matemang. I kitẹ limembong mal᷊uasẹ̌ mạeng měmahiạ kaěng ene su taumata wal᷊inẹ. Su tempong i kitẹ makapěndang taumata měngẹ̌ngarěga si kitẹ, i kitẹ mal᷊uasẹ̌. Su tempong i kitẹ měnodẹ pěngangarěga, i kitẹ makakoạ taumata wal᷊inẹ mal᷊uasẹ̌. Mạeng i kitẹ makitarimakasẹ su tau seng nẹ̌tul᷊ung si kitẹ arau něgělị kebutuhan i kitẹ, i sie sarung makasingkạ kěbị apa nikoạe ene piạ gunane si kitẹ. Hasile, pẹ̌dal᷊ahapị i kitẹ dingange sarung limembong matoghasẹ̌.

6. Apa sul᷊unge bawera tatarimakasẹ dingangu apel wul᷊aeng?

⁶ Tatarimakasẹ nitodẹ i kitẹ ene sěbạe maarěga. Alkitapẹ̌ naul᷊ị, ”Mẹ̌sul᷊ungu apel wul᷊aeng su wohogẹ̌ perak, kerene lai bawera nihabarẹ̌ su tempo nẹ̌tatahino.” (Amsl. 25:11) Pẹ̌tiněna kal᷊ěnggihe apel wul᷊aeng su wohogẹ̌ perak! Kụ, pẹ̌tiněna lai arěgane! Kerea pěndangu mạeng makatarimạ hadiah kerene? Sěběnarẹ̌e tatarimakasẹ nitodẹ i kitẹ bọu bawera ene maarěgạ kere apel wul᷊aeng. Bọu ene, pẹ̌tiněna lai fakta ini: Apel nikoạ bọu wul᷊aeng ene matahang marěngụ. Kerene lai, mạeng i kau měnodẹ pěngangarěga, tau nakatarimạ ene aramanung sarung mẹ̌tahěndung dingangu měngarěga ene su kanandụu wiahe.

7. Kerea i Daud, kere nal᷊ahẹ su Mazmur 27:4, dingangu manga měmamohẹ mazmur wal᷊inẹ něnodẹ pěngangarěgang i sire?

⁷ Lawọ ělangu Mawu su tempong tamai něnodẹ tatarimakasẹ. Sěngkatau wọu i sire ute i Daud. (Basa Mazmur 27:4.) I sie sěbạe měngẹ̌ngarěga ibadah wurěsi kụ pěngangarěgane nal᷊ahẹ bọu apa nikoạe. I sie něgělị lawọ arětạe gunang paketang měmangung bait. Hiteng i Asaf lai něnodẹ pěngangarěga su tempong i sire němohẹ mazmur, arau kakantarị daralo. Su sěmbaụ kakantarị, i sire nakitarimakasẹ su Mawu dingangu něhabarẹ̌ i sire mạherang nakasilo ”hal᷊ẹ̌ makạlaherang” nikoạ i Yehuwa. (Mz. 75:1) Nal᷊ahẹ, i Daud dingangu hiteng i Asaf mapulu měnodẹ si Yehuwa i sire sěbạe měngẹ̌ngarěga kěbị al᷊amatẹ̌ seng nitarimạ i sire bọu i Sie. Apa i kau botonge mẹ̌tiněna cara mẹ̌těno su manga pemazmur ene?

8-9. Kerea Rasul Paulus něnodẹ pěngangarěga su anạu sěmbaụe, kụ aramanung apa hasile?

⁸ Rasul Paulus měngẹ̌ngarěga anạu sěmbaụe, kụ ene kẹ̌kasilong bọu cara i sie mẹ̌bisara soal i sire. Su tempong nẹ̌doa sẹ̌sane, i sie sěntiniạ makitarimakasẹ su Mawu ual᷊ingu piạ anạu sěmbaụ kere i sire. I sie lai něnodẹ pěngangarěgane si sire bọu suratẹ̌ niwohẹe gunang i sire. Su Roma 16:1-15, i Paulus nẹ̌sěbạ 27 areng anạu sěmbaụe. Paulus lai nẹ̌sěbạ i Priska dingangi Akuila tawe matakụ mate gunang mẹ̌tul᷊ung si sie. I sie lai nẹ̌sěbạ i Febe ”seng nẹ̌tul᷊ung lawọ anạu sěmbaụ”, lai nẹ̌tul᷊ung si Paulus. I sie makěndagẹ̌ su anạu sěmbaụ ene, kụ nẹ̌dalo kěbị hal᷊ẹ̌ nikoạ i sire.

⁹ Paulus masingkạ anạu sěmbaụe tawe nasukụ. Katewe, su bageang pěngěnsuenge bọu surate su anạu sěmbaụ su Roma, i sie němile mẹ̌bisara soal u sipatẹ̌ mapia bọu i sire. Anạu sěmbaụ sene tantu sěbạe natoghasẹ̌ su tempong bawerang i Paulus niwasa dingangu tingihẹ̌ maihạ su sidang! Hasile, pẹ̌dal᷊ahapị i sire dingangi Paulus aramanung sauneng kakạtoghase. Apa i kau lai sěntiniạ měnodẹ pěngangarěga ual᷊ingu barang mapia nikoạ arau niwerang anạu sěmbaụ su sidang?

10. Apa kaěndungang i kitẹ bọu cara Yesus měngẹ̌ngarěga tumatol᷊ene?

¹⁰ Su tatanatane gunang piram baụ sidang su Asia Kadodọ, Yesus něnodẹ pěngangarěgane ual᷊ingu apa seng nikoạu tumatol᷊ene. Contone, tatanatane su sidang Tiatira nitětạ dingangu bawera, ”Iạ masingkạ apa nikoạ i kamene, lai kakěndagẹ̌, pangangimang, pelayanan, dingangu kasasabarẹ̌ i kamene. Iạ lai masingkạ apa nikoạ i kamene buhu ini něngělembo bọu kal᷊imona.” (Why. 2:19) Yesus tawe kětạeng nẹ̌sěbạ kegiatan nikoạ i sire sauneng kakạtambane, katewe i sie lai nẹ̌dalo sipatẹ̌ mapia nakakoạ si sire někoạ ene. Maning i Yesus harusẹ̌ měgělị sasasa su pirang katau su Tiatira, su tětạe dingangu pěngěnsuengu sasasane i sie něpakẹ bawera makatoghasẹ̌. (Why. 2:25-28) Pẹ̌tiněna kawasang i Yesus ual᷊ingu i sie těmbonangu sidang. I sie tawe harusẹ̌ makitarimakasẹ si kitẹ ual᷊ingu apa seng nikoạ i kitẹ gunang i sie. Maning kerene, i sie tatapẹ̌ něnodẹ pěngangarěga. Ini contoh sěbạe mapaelẹ̌ su manga penatua!

11. Kere nitodẹ su Ibrani 12:16, kerea pěndang i Esau su manga hal᷊ẹ̌ masusi?

¹¹ Katewe, piạ tokoh Alkitapẹ̌ tawe něnodẹ pěngangarěga. Contone, maning i Esau nihikingu matimadẹ̌ makěndagẹ̌ dingangu měngẹ̌ngadatẹ̌ si Yehuwa, i sie tawe něngarěga manga hal᷊ẹ̌ masusi. (Basa Ibrani 12:16.) Apa buktine i sie tawe měngẹ̌ngarěga? Esau masahawụ nẹ̌bal᷊ụ hakẹ̌ kaiakanenge su tuarine, i Yakub, kětạeng gunang sěmbohogẹ̌ gul᷊ẹ  mahamụ. (Kej. 25:30-34) Bọu ene, i Esau sěbạe nẹ̌sasěsilẹ̌ ual᷊ingu putusange ene. Katewe, i sie seng tawe něngarěga apang piạ si sie. Hakị u ene, sěběnarẹ̌e i sie tawe wotonge měmorotesẹ̌ mạeng i sie tawe nakatarimạ al᷊amatẹ̌ gunang anạ kaiakanenge.

12-13. Kerea tau Israel tawe něnodẹ pěngangarěga, kụ apa tětal᷊e?

¹² Piạ lawọ alasang su tau Israel gunang měnodẹ pěngangarěga. I sire seng nawebasẹ̌ bọu pẹ̌tatahuělang su tempong Yehuwa napakarěntang Mapul᷊o Tulah su Misirẹ̌. Bọu ene, Mawu něnal᷊amatẹ̌ si sire su tempong i Sie něminasa těntarang Misirẹ̌ su Laudẹ̌ Mahamụ. Tau Israel sěbạe mal᷊uasẹ̌ hakị u ene i sire nẹ̌kantarị kakantarị u kal᷊auntung gunang mẹ̌dalo si Yehuwa. Katewe apa i sire turusẹ̌ něnodẹ tatarimakasẹ?

¹³ Su tempong tau Israel nakahombang sasal᷊ukạ buhu, i sire apidu niwul᷊e kěbị barang mapia seng nikoạ i Yehuwa gunang i sire. Bọu ene, i sire někoạ barang nakal᷊ahẹ i sire seng něngědọ něnodẹ pěngangarěga. (Mz. 106:7) Apa ene? ”Kěbị jamaatu Israel němorotesẹ̌ si Musa dingangi Harun”, kụ sěběnarẹ̌e i sire němorotesẹ̌ si Yehuwa. (Kel. 16:2, 8) I Yehuwa nasusah naung ual᷊ingu tau Israel tawe něnodẹ pěngangarěga. Samurine, i Sie něněbal᷊ẹ̌ kěbị generasi tau Israel sarung mate su kěhu l᷊inggi, kecuali i Yosua dingangi Kaleb. (Bil. 14:22-24; 26:65) Mahịe měngěndung carane tadeạu i kitẹ tawe mẹ̌těno contoh ral᷊akị dingangu kerea mẹ̌těno contoh mapaelẹ̌.

14-15. (a) Kerea sěngkawingang botonge měnodẹ pěngangarěga sěmbaụ su wal᷊inẹ? (b) Kerea matatimadẹ̌ botonge měněntiro anạ i sire gunang měnodẹ pěngangarěga?

¹⁴ Su keluarga. Sěmbaụ keluarga sarung makaěbạ gunane mạeng kěbị anggotane měnodẹ pěngangarěga. Mạeng sěngkawingang sěntiniạ měnodẹ tatarimakasẹ sěmbaụ su wal᷊inẹ, pẹ̌kakawing i rẹ̌dua sarung limembong matoghasẹ̌. I rẹ̌dua lai limembong gampang měgělị ampung. Esẹ měngẹ̌ngarěga kawinge tawe kětạeng měmanda barang mapia niul᷊ị arau nikoạ u kawinge, katewe i sie lai ”dumarisị dingangu mẹ̌dalo kawinge”. (Amsl. 31:10, 28) Kụ, kawing wawine matahuěna sarung maul᷊ị su kawinge hal᷊ẹ̌ apa lẹ̌arěgange bọu kawinge.

¹⁵ Matatimadẹ̌, kerea i kamene měněntiro anạ gunang měnodẹ pěngangarěga? Pẹ̌tahěndung, manga anạu sarung mẹ̌těno apa niwera dingangu nikoạu. Hakị u ene pěgělị contoh mapaelẹ̌ si sire, carane ute paul᷊ị kasẹ bue  su tempong i sire měkoạ sěmbaụ hal᷊ẹ̌ gunang i kau. Bọu ene, těntiroi anạu makitarimakasẹ su tempong taumata wal᷊inẹ někoạ sěmbaụ hal᷊ẹ̌ gunang i sire. Tul᷊ungko i sire makaěna bawera tatarimakasẹ ene harusẹ̌ bọu naung kụ bawera ene piạ lawọ gunane. Contone, wawine mangudạ arenge Clary naul᷊ị, ”Su tempong umuri Mamạku 32 su taunge, i sie sěngkělěndịu harusẹ̌ sẹ̌sane měhiking tatělu anạe. Su tempong umurẹ̌ku 32 taung, iạ nẹ̌tiněna kerea kasigěsạe i sie su tempo ene. Hakị u ene, iạ naul᷊ị si Mamạku iạ měngẹ̌ngarěga kěbị pengorbanan seng nikoạe gunang měhiking si kami tělu. Buhu ini, i Mamạ naul᷊ị si siạ baweraku sěbạe nakakanoạ naunge. I Mamạ lai naul᷊ị i sie hanesẹ̌ mětẹ̌tiněna baweraku, kụ ene nakakoạ pěbawiahe limembong mal᷊uasẹ̌.”

16. Gělịko contoh měnodẹ pěngangarěga ene makatoghasẹ̌ taumata wal᷊inẹ.

¹⁶ Su sidang. Su tempong i kitẹ měnodẹ pěngangarěga su anạu sěmbaụ, i kitẹ makatoghasẹ̌ si sire. Contone, sěngkatau penatua umure 28 su taunge arenge Jorge masakị mawěhạ. Sěmbul᷊ang i sie tawe nakarěnta něngibadah. Bọu ene, maning seng nakarěnta su pěngangibadang, i sie bědang tawe makamampo měkoạ hal᷊ẹ̌ su sidang. Jorge naul᷊ị, ”Iạ nẹ̌pěndang tawe maarěga ual᷊ingu tawe makakoạ hal᷊ẹ̌ su sidang. Katewe sěnsul᷊ẹ tempo nasueng ibadane, sěngkatau saudara naul᷊ị, ’Iạ mapulu makitarimakasẹ ual᷊ingu i kau seng nakoạ pẹ̌tatěnoěng mapia su kěluargang i kami. I kami sěbạe mal᷊uasẹ̌ dụdaringihẹ̌ nasẹ̌u pira taung tamai. Kěbị ene nakatoghasẹ̌ kerohanian i kami.’ Iạ narěmasẹ̌, kụ ěllo mataku něnětạ timědọ. Bawerane sěbạe nakatoghasẹ̌ si siạ.”

17. Kere nilahẹ su Kolose 3:15, kerea i kitẹ botonge měnodẹ pěngangarěga si Yehuwa ual᷊ingu kal᷊aělug’E?

¹⁷ Su Mawung i kitẹ maělugẹ̌. Yehuwa seng něgělị si kitẹ lawọ kaěng rohani. Contone, i kitẹ nakatarimạ laahạ bọu pěngangibadang, bawasang, dingangu situs web i kitẹ. Apa i kau bọu nakaringihẹ̌ nasẹ̌, nẹ̌basa artikel, arau nẹ̌biala video kụ nẹ̌tiněna, ’Ini sěbạe nẹ̌tatahino dingangu situasiku’? Kerea i kitẹ botonge měnodẹ pěngangarěga si Yehuwa? (Basa Kolose 3:15.) Sěmbaụ carane ute sěntiniạ makitarimakasẹ si Sie su ral᷊ungu daroa ual᷊ingu kěbị gaghělị mapaelẹ̌ ini.​—Yak. 1:17.

18. Kerea carane měnodẹ pěngangarěga ual᷊ingu piạ Banalang Kararatuang?

¹⁸ I kitẹ lai měnodẹ pěngangarěga si Yehuwa mạeng i kitẹ měndiagạ tampạ pěngangibadang tatapẹ̌ burěsi dingangu naatorẹ̌. I kitẹ harusẹ̌ marading měmurěsi dingangu  měngurusẹ̌ Banalang Kararatuang. Bọu ene lai, i sire apang měpẹ̌pakẹ peralatan tata suara dingangu video harusẹ̌ maingatẹ̌ abe sarang makarusa ene. Mạeng i kitẹ mapaelẹ̌ měngurusẹ̌ Banalang Kararatuang, Banalang Kararatuang ene sarung mapakẹ marěngụ kụ tawe harusẹ̌ piạ perbaikan gěguwạ. Mạeng měkoạ ene, sarung piạ lawọ doitẹ̌ botonge paketang gunang měkoạ arau měrenovasi Banalang Kararatuang wal᷊inẹ su patikụ dunia.

19. Apa kaěndungangu bọu pengalaman sěngkatau pengawas wilayah dingangu kawinge?

¹⁹ Si sire apang mělẹ̌hal᷊ẹ̌ masěghadẹ̌ gunang i kitẹ. Su tempong i kitẹ měnodẹ pěngangarěga su taumata wal᷊inẹ, bawerang i kitẹ aramanung makawal᷊ui pěndange soal u kasasigěsạ nikahombangenge. Pẹ̌tiněna pengalaman sěngkatau pengawas wilayah dingangu kawinge. Su apang bọu něnginjilẹ̌ su kanandụu ěllo su musim dingin, i rẹ̌dua sěbạe nal᷊owe su tempong nẹ̌bal᷊ị sarang tampạ nikahumpạkeng i sire. Tempo ene sěbạe matěho-těho hakị u kawingu pengawas wilayah ene nẹ̌tikị dingangu jekete masuwenehẹ̌. Dịěllone mal᷊ukadẹ̌, i sie naul᷊ị su kawinge i sie seng tawe makamampo tumol᷊e hal᷊ẹ̌ keliling. Katewe, su mal᷊ukadẹ̌ ene lai, piạ suratẹ̌ bọu kantor cabang nasongo, kụ ene gunang kawingu pengawas wilayah. Suratẹ̌ ene nẹ̌dalo kawingu pengawas wilayah ual᷊ingu pelayanan dingangu kasasabare. Suratẹ̌ ene lai naul᷊ị měngal᷊ing sabang misa ene tawe gampang. Pengawas wilayah ene nẹ̌běke, ”Kawingku sěbạe nahiborẹ̌ ual᷊ingu daralo ene, kụ i sie seng tawe měbẹ̌bisara soal u měngědo bọu hal᷊ẹ̌ keliling. Mạeng iạ mẹ̌tiněna měngědo, i sie pirang sul᷊ẹ měnoghasẹ̌ si siạ gunang turusẹ̌ měkoạ hal᷊ẹ̌ ini.” I rẹ̌dua tatapẹ̌ su hal᷊ẹ̌ keliling maraning 40 su taunge.

20. Apa harusẹ̌ koateng i kitẹ sabang ěllo, kụ kawe nụe?

²⁰ Karimạko i kitẹ sabang ěllo měnodẹ tatarimakasẹ bọu kakanoạ dingangu bawera. Kakanoạ dingangu bawerang i kitẹ bọu dal᷊ungu naung aramanung makatul᷊ung taumata wal᷊inẹ mẹ̌tatahang su dunia běga wue makitarimakasẹ ini. Kụ, bawera tatarimakasẹ i kitẹ sarung makakoạ pẹ̌dal᷊ahapị matahang sarang karěngụe. Limembong penting lai, i kitẹ nẹ̌těno si Yehuwa, i Amang maělugẹ̌ dingangu napenẹu pěngangarěga.