1. Oinsá mak ema Samaria neʼebé Jesus kura hatudu sai ninia agradese?

MANE naʼin-sanulu iha susar laran. Sira moras-lepra, no sira-nia situasaun sei sai aat liután. Maibé loron ida, sira haree Mestre Boot Jesus husi dook. Sira rona ona katak Jesus kura moras oioin, no sira iha konfiansa katak nia mós bele kura sira. Tan neʼe, sira bolu ho lian makaʼas dehan: “Mestre Jesus, hatudu laran-sadiʼa mai ami!” Mane naʼin-sanulu neʼe sai isin-diʼak duni. Ita la duvida katak sira hotu agradese ba Jesus nia laran-diʼak. Maibé, ema ida husi sira la sente deʼit agradese, nia halo buat seluk tan, nia hatudu sai ninia agradese * ba Jesus. Mane neʼe mak ema Samaria ida, no ninia laran book nia atu “fó hahiʼi ba Maromak ho lian makaʼas”.​—Lc 17:12-19.

2-3. (a) Tanbasá mak dala ruma ita la hatudu agradese? (b) Saida deʼit mak ita sei aprende iha lisaun neʼe?

² Hanesan ema Samaria neʼe, ita hakarak hatudu agradese ba ema neʼebé laran-diʼak ba ita. Maibé dala ruma, karik ita haluha atu hatudu sai ita-nia agradese liuhusi liafuan ka hahalok.

³ Iha lisaun neʼe ita sei aprende tanbasá importante atu hatudu agradese liuhusi liafuan no hahalok. Ita sei aprende husi Bíblia kona-ba ema neʼebé hatudu agradese no mós ema neʼebé la hatudu agradese. Ita mós sei aprende oinsá atu hatudu agradese.

4-5. Tanbasá ita presiza hatudu agradese?

⁴ Jeová hatudu ezemplu diʼak ba ita kona-ba hatudu agradese. Dalan ida neʼebé nia hatudu agradese mak liuhusi  fó kolen ba ema sira neʼebé halo nia kontente. (2 Sam 22:21; Sal 13:6; Mt 10:40, 41) Eskritura sira anima ita atu “halo tuir Maromak nia ezemplu nuʼudar ninia oan doben sira”. (Éf 5:1) Tan neʼe, razaun importante atu hatudu agradese mak tanba ita hakarak halo tuir Jeová nia ezemplu.

⁵ Mai ita hanoin razaun ida tan tanbasá ita hakarak hatudu agradese ba ema seluk. Se ita hatene katak ema seluk hafolin buat neʼebé ita halo, ita sente kontente. Bainhira ita hatudu agradese, ita halo ema seluk kontente. Nia sei hatene katak ninia hakaʼas an ajuda duni ita, ka nia fó buat neʼebé ita presiza. Rezultadu mak, ita-nia relasaun nuʼudar belun sei sai metin liután.

6. Saida mak hanesan entre liafuan agradese no masán osan-mean?

⁶ Hatudu agradese mak folin-boot duni. Bíblia hatete: “Liafuan neʼebé koʼalia iha tempu neʼebé loos mak hanesan masán osan-mean iha bikan osan-mutin nia laran.” (Prov 25:11) Imajina toʼok! Masán osan-mean iha bikan osan-mutin mak furak no folin-boot tebes, loos ka lae? Ita sente oinsá se Ita simu ida-neʼe nuʼudar prezente? Ita-nia liafuan agradese mós iha folin-boot tebes hanesan masán osan-mean neʼe. Hanoin toʼok: Masán osan-mean bele dura ba tempu kleur. Nuneʼe mós, ema bele hanoin-hetan no hafolin Ita-nia liafuan agradese durante sira-nia moris tomak.

7. Oinsá mak David nia liafuan iha Salmo 27:4, no mós hakerek-naʼin seluk ba livru Salmo hatudu sai sira-nia agradese?

⁷ Maromak nia atan barak iha tempu uluk hatudu agradese. Sira ida mak David. (Lee Salmo 27:4.) Nia hafolin tebes adorasaun neʼebé moos no hatudu sai ninia sentimentu liuhusi ninia hahalok. Nia  fó kontribuisaun barak tebes husi ninia rikusoin atu harii templu. Asaf nia jerasaun hatudu agradese liuhusi hakerek salmo sira, ka knananuk hahiʼi nian. Iha knananuk ida, sira fó agradese ba Maromak no fó sai katak sira admira tebes Jeová nia “hahalok furak sira”. (Sal 75:1) David no Asaf nia jerasaun hakarak hatudu ba Jeová katak sira hafolin tebes bensaun hotu neʼebé sira simu husi nia. Hanoin toʼok kona-ba oinsá mak ita bele banati-tuir sira-nia ezemplu.

8-9. Oinsá mak apóstolu Paulo hatudu katak nia hafolin irmaun-irmán sira? Neʼe lori rezultadu saida?

⁸ Apóstolu Paulo hafolin tebes ninia irmaun-irmán sira no hatudu neʼe liuhusi dalan neʼebé nia koʼalia kona-ba sira. Nia sempre fó obrigadu ba Maromak kona-ba sira iha ninia orasaun. Nia mós hatudu ninia agradese bainhira nia hakerek karta ba sira. Iha Roma 16:1-15, Paulo temi maluk Kristaun naʼin-27 nia naran. Paulo temi Prisca no Áquila neʼebé “tau sira-nia moris iha perigu laran” tanba nia, no nia temi Febe nuʼudar ema neʼebé “defende ona maun-alin barak”, inklui Paulo. Nia gaba irmaun-irmán doben sira-neʼe neʼebé serbisu makaʼas.

⁹ Paulo mós hatene katak ninia maluk sira la perfeitu, maibé bainhira nia remata ninia karta ba ema Roma, nia hili atu tau fokus ba sira-nia hahalok diʼak. Klaru katak irmaun-irmán sira-neʼe hetan duni anima bainhira rona Paulo nia liafuan neʼebé sira lee iha kongregasaun! Tan neʼe ita bele fiar katak sira-nia relasaun nuʼudar belun sai metin liu. Ita mós sempre hatudu agradese ba buat diʼak neʼebé ema iha kongregasaun laran koʼalia no halo ka lae?

10. Saida mak ita aprende husi dalan neʼebé Jesus hatudu ninia agradese ba nia dixípulu sira?

¹⁰ Iha Jesus nia lia-menon ba kongregasaun balu iha Ázia Menór, nia hatudu agradese ba serbisu neʼebé ninia dixípulu sira halo. Porezemplu, nia komesa ninia lia-menon ba kongregasaun iha Tiatira, hodi dehan: “Haʼu hatene ó-nia hahalok sira, ó-nia domin, ó-nia fiar, ó-nia serbisu ba Maromak no ó tahan susar oioin, no haʼu hatene katak ó-nia hahalok ikus diʼak liu fali uluk nian”. (Apok 2:19) Jesus la temi deʼit kona-ba serbisu barak neʼebé sira halo ona maibé nia mós gaba sira tanba sira-nia hahalok neʼebé motiva sira atu hatudu hahalok diʼak. Maski Jesus presiza fó konsellu ba ema balu iha Tiatira, nia nafatin komesa no remata ninia lia-menon ho liafuan anima. (Apok 2:25-28) Hanoin toʼok kona-ba podér neʼebé Jesus iha nuʼudar kongregasaun hotu nia ulun. Nia la presiza fó obrigadu ba ita tanba serbisu neʼebé ita halo ba nia. Maski nuneʼe, nia hatudu agradese. Jesus hatudu duni ezemplu diʼak ba katuas kongregasaun sira!

11. Tuir Ebreu 12:16, Esaú hatudu atitude saida kona-ba buat neʼebé sagradu?

¹¹ Triste mak ema balu iha Bíblia la hatudu agradese. Porezemplu, maski Esaú nia inan-aman hadomi no respeitu Jeová, maibé nia la hafolin buat neʼebé sagradu. (Lee Ebreu 12:16.) Tanbasá mak ita hatene ida-neʼe? Esaú ho ansi faʼan ninia direitu nuʼudar oan primeiru ba ninia alin Jacob, ho folin koto-mean manko ida. (Gén 25:30-34) Ikusmai, Esaú sente triste tebes ho desizaun neʼebé nia halo ona. Maibé tanba nia la hatudu agradese  ba buat neʼebé nia iha, nia la iha razaun atu muramura bainhira nia la simu bensaun nuʼudar oan primeiru.

12-13. Oinsá mak ema Izraél la hatudu agradese, no neʼe lori rezultadu saida?

¹² Ema Izraél iha razaun barak atu hatudu agradese. Sira sai livre ona husi rai-Ejitu depois Jeová hamosu tiha Susar Sanulu ba Ejitu. Tuirmai Maromak salva sira husi perigu liuhusi halakon tropa Ejitu iha Tasi Mean. Ema Izraél agradese tebes toʼo sira kanta knananuk manán nian hodi hahiʼi Jeová. Maibé sira kontinua hatudu agradese ka lae?

¹³ Bainhira ema Izraél hasoru susar foun, sira haluha kedas buat diʼak hotu neʼebé Jeová halo ona ba sira. Sira la hatudu agradese. (Sal 106:7) Oinsá? “Ema Izraél tomak hahú muramura hasoru Moisés no Arão”, maibé tuir loloos sira muramura hasoru Jeová. (Éx 16:2, 8) Nia la kontente tanba sira la hatudu agradese. Ikusmai nia fó-hatene nanis katak jerasaun neʼe tomak sei mate iha rai-fuik, só deʼit Josué no Caleb mak sei la mate. (Núm 14:22-24; 26:65) Mai ita haree oinsá mak ita bele hasees an hodi la halo tuir ezemplu aat sira-neʼe, maibé banati-tuir ezemplu diʼak sira.

14-15. (a) Oinsá mak kaben-naʼin sira hatudu agradese ba malu? (b) Oinsá mak inan-aman bele hanorin sira-nia oan atu hatudu agradese?

¹⁴ Iha família laran. Família tomak sei hetan benefísiu bainhira ema ida-idak iha família laran hatudu agradese. Bainhira kaben-naʼin sira hatudu agradese ba malu, sira sei sai besik liután. Sira mós sei sente fasil liu atu perdua malu. Laʼen neʼebé hatudu agradese ba ninia feen sei haree buat diʼak neʼebé ninia feen hatete no halo, no mós “hamriik no gaba nia”. (Prov 31:10, 28) No feen neʼebé matenek fó-hatene ninia laʼen kona-ba buat espesífiku neʼebé nia hafolin husi ninia laʼen.

¹⁵ Inan-aman sira, oinsá mak Ita bele hanorin Ita-nia oan atu hatudu agradese? Hanoin-hetan katak sira sei halo tuir buat neʼebé Ita hatete no halo. Tan neʼe hatudu ezemplu diʼak hodi dehan obrigadu bainhira sira halo buat ruma ba Ita. Liután neʼe, hanorin Ita-nia oan atu hatoʼo obrigadu bainhira ema halo buat ruma ba sira. Ajuda sira komprende katak hatudu agradese tenke mai husi laran no katak sira-nia liafuan bele lori buat diʼak barak. Porezemplu, feto ida  naran Clary hatete: “Bainhira haʼu-nia inan idade 32, derrepente deʼit nia mesak mak haboot ninia oan naʼin-tolu. Bainhira haʼu idade 32, haʼu hanoin kona-ba susar neʼebé nia hasoru iha idade hanesan neʼe. Tan neʼe, haʼu hatete ba nia katak haʼu hafolin tebes ninia sakrifísiu atu haboot haʼu no haʼu-nia maun-alin sira. Foin lalais neʼe nia hatete ba haʼu katak nia rai metin haʼu-nia liafuan iha ninia laran, no dala barak nia hanoin kona-ba liafuan sira-neʼe, no neʼe halo nia sente kontente.”

16. Fó toʼok ezemplu ida oinsá mak hatudu agradese bele anima ema seluk.

¹⁶ Iha kongregasaun. Bainhira ita hatudu agradese ba ita-nia irmaun-irmán sira, ita sei anima sira. Porezemplu, Jorge, katuas kongregasaun ida neʼebé idade 28, nia sai moras tebes. Nia labele tuir reuniaun ba fulan ida. Bainhira nia tuir fali reuniaun, nia nafatin labele halo diskursu. Jorge dehan: “Haʼu sente folin-laek tanba haʼu-nia limitadu no haʼu labele halaʼo haʼu-nia responsabilidade iha kongregasaun. Maibé, depois reuniaun ida remata, irmaun ida hatete ba haʼu: ‘Haʼu hakarak hatoʼo obrigadu ba ita-nia ezemplu diʼak neʼebé ita hatudu ba haʼu-nia família. Ami gosta tebes ita-nia diskursu sira durante tinan hirak-neʼe. Diskursu sira-neʼe hametin tebes ami-nia fiar.’ Neʼe book tebes haʼu-nia laran no halo haʼu matan-been nakonu. Ninia liafuan mak buat neʼebé haʼu presiza tebes atu rona iha momentu neʼe.”

17. Tuir liafuan neʼebé hakerek iha Koloso 3:15, oinsá mak ita bele hatudu agradese ba Jeová tanba ninia laran-luak?

¹⁷ Ba ita-nia Maromak neʼebé laran-luak. Jeová fó ita ai-han espirituál neʼebé barak. Porezemplu, ita simu hanorin neʼebé ajuda ita liuhusi ita-nia reuniaun, livru, no sítiu sira. Karik ita rona ona diskursu ida, lee informasaun, ka haree broadcasting ida no hanoin: ‘Haʼu presiza duni ida-neʼe.’ Entaun oinsá mak ita bele hatudu agradese ba Jeová? (Lee Koloso 3:15.) Dalan ida mak hodi hatoʼo beibeik agradese ba nia liuhusi orasaun tanba prezente diʼak sira-neʼe.​—Tgo 1:17.

18. Iha dalan saida deʼit mak ita hatudu agradese ba ita-nia Reuniaun-Fatin?

¹⁸ Ita mós hatudu agradese ba Jeová bainhira ita hamoos ita-nia Reuniaun-Fatin. Ita presiza hola parte beibeik atu hamoos no tau matan ba ita-nia Reuniaun-Fatin, no ema neʼebé uza ekipamentu eletróniku sira iha kongregasaun  presiza uza ho kuidadu. Bainhira ita tau matan didiʼak ba Reuniaun-Fatin, neʼe sei dura ba tempu kleur no la presiza hadiʼa buat barak. Hodi halo nuneʼe, ita bele uza didiʼak osan neʼebé iha hodi harii no hadiʼa Reuniaun-Fatin seluk iha mundu tomak.

19. Saida mak Ita aprende husi katuas área no ninia feen nia esperiénsia?

¹⁹ Ba sira neʼebé serbisu makaʼas. Bainhira ita hatudu agradese, karik ita-nia liafuan bele troka ema nia hanoin kona-ba susar neʼebé nia hasoru. Hanoin toʼok esperiénsia husi katuas área ida no ninia feen. Depois haklaken tiha loron tomak iha tempu malirin, sira fila ba sira-nia hela-fatin ho kole tebes. Tanba malirin tebes, feen neʼe toba ho ninia kazaku mahar. Iha dadeer, feen neʼe hatete ba ninia laʼen katak nia la iha ona kbiit atu kontinua serbisu hodi vizita kongregasaun sira. Maibé iha dadeer neʼe, sira simu karta ida husi sukursál, no karta neʼe ba nia. Iha karta neʼe irmaun sira gaba nia tanba ninia serbisu haklaken no la rende an. Irmaun sira rekoñese katak susar atu muda husi uma ida ba uma seluk semana-semana. Ninia laʼen hatete: “Liafuan gaba neʼe kona tebes ninia laran toʼo nia nunka koʼalia tan kona-ba husik serbisu atu vizita kongregasaun sira. Tuir loloos, dala barak nia anima haʼu atu kontinua bainhira haʼu hanoin atu para.” Kaben-naʼin neʼe kontinua serbisu atu vizita kongregasaun sira ba maizumenus tinan 40.

20. Saida mak ita hakarak halo loroloron, no tanbasá?

²⁰ Loroloron, mai ita hakaʼas an atu hatudu agradese liuhusi liafuan no hahalok. Hodi halo nuneʼe, karik ita bele ajuda ema seluk atu tahan hasoru problema iha mundu neʼebé ema la hatudu agradese. Bainhira ita hatudu agradese ita bele haburas relasaun nuʼudar belun neʼebé bele dura ba nafatin. Importante liu mak ita sei banati-tuir ita-nia Aman Jeová neʼebé hatudu laran-luak no agradese.