1. Xana Musamariya lweyi Yesu amu hanyiseke a kukombise kuyini kukhensa?

VAVANUNA va 10 lava a va ni nhlokonho a va li ka xiyimo lexi tsemaka nhlana. Avanga na ntshembo wa leswaku vanga tshuka va hanyisiwa. Kambe siku lin’wana va vone Yesu, Mudjondzisi Lwenkulu. Vona ava tshame va twa leswaku Yesu a ahanyisa mavabyi ya mixaka hinkwayu, kutani ava tshemba leswaku na vona aataswi kota kuva hanyisa. Tani hileswi a ali kule nyana na vona, va huwelelile va ku: “Yesu, Mujondzisi, hitwele vusiwana!” Kutani hi wu-10 ka vona va hanyisiwile hi kuhelela. Handle kokanakana hinkwavu ka vona ava tsakile hi timpsalu leti Yesu ava kombeke tona. Hambiswilitano, kova mun’we ka vona lweyi a yendleke swotlula leswo. Yena a tlhelile leswaku a kombisa  kukhensa * ka Yesu. Wanuna lweyo wa Musamariya lweyi a ahanyisiwile, a titwe a susumeteleke kudzunisa “Xikwembu hi rito leritlakukeke”. — Luk. 17:12-19.

2-3. a) Hayini minkama yin’wana hi tsandzeka kukombisa kukhensa? b) Hita djondza yini ka djondzo leyi?

² Kufana ni Musamariya, hi lava kukombisa kukhensa ka hina ka hinkwavu lavahi kombaka timpsalu. Kambe makhambi man’wana ho rivala kunene kuvula hi ku “khanimambu” kumbe kukombisa leswi hiti twisaka xiswona hi timpsalu leti hi kombiweke tona.

³ Ka djondzo leyi, hita vona leswaku hayini swi li swa lisima kukombisa kukhensa hi marito ni hi swiyendlo. Hita djondza hi swikombiso swa le Bibeleni swa lava kombiseke kukhensa ni swa lavangaku kombisangiki. Hita gama hi vona tindlela leti ha tona hinga kombisaka kukhensa.

4-5. Hayini hi fanele hi kombisa kukhensa?

⁴ Yehovha ahi vekele xikombiso a mhakeni ya kukombisa kukhensa. Yin’we ya tindlela leti Yehovha a kombisaka kukhensa ha tona i kukatekisa vanhu lava yendlaka kurhandza ka yena. (2 Sam. 22:21; Pis. 13:6; Mat. 10:40, 41) Naswona Matsalwa mahi khutaza leswaku hi ringeta “kuva lava vafanaka” na yena. (Efe. 5:1) Kutani xivangelo xikulu xa leswaku hi va lava khensaka hileswaku hi lava kutekelela xikombiso xa Yehovha.

⁵ Vona xivangelo xin’wana lexi yendlaka leswaku hi lava kukombisa kukhensa. Ha tsaka loko van’wana vahi khensa hi leswi hiva yendleleke swona. Na vona va titwa hi ndlela leyi fanaka loko hiva khensa hi leswi vahi yendleleke swona. Munhu lweyi himu khensaka ataswi tiva leswaku hi pfunekile hikolaho ka minzamu leyi angayi yendla leswaku ahi pfuna kumbe ahi nyika swokarhi. A vuyelo la kona hi leswaku a wunghanu la hina na yena lita tiya.

6. Hi kwihi kufana lokunga kona ka marito ya kukhensa ni mansaa ya kusasekisa ya kuhambiwa hi woru?

⁶ Marito ya hina ya kukombisa kukhensa i ya lisima swinene. Bibele li li: “Rito leli vuliwaka hi nkama lowunene li fana ni mansaa ya woru ka xibya xa silivhere”. (Swi. 25:11) Yanakanya hi nsaa la kuyendliwa hi woru leli vekiweke kusasekisa ndlwini. Li voni na li li ka xibya xa silivhere ahenhla ka meza. Xana awungataswi nyika lisima swilo leswi? Loko munhu oku nyika swona awutaswi khomisa kuyini? Leswi hiswi vulaka leswaku hi kombisa khukhensa swi ni lisima leli fanaka. Yanakanya hi mhaka leyi: A nsaa la kuyendliwa hi woru linga heta nkama wa kuleha swinene. Hilaha kufanaka, loko hi vula marito ya kukhensa, munhu lweyi himu byelaka wona angahama hlayisa ivi a tama ama tsundzuka wutomi la yena hinkwalu.

7. a) Hilaha swi kombisiwaka ha kona ka Tipisalema 27:4, xana Davhida a kukombise kuyini kukhensa? b) Vatsali van’wana va tipisalema vaku kombise kuyini kukhensa?

⁷ Malandza ya Yehovha yotala ya khale ma  kombise kukhensa. Mun’we wa wona kuve Davhida. (Lerha Tipisalema 27:4.) Yena aswi kombise hi swiyendlo leswaku a ateka wugandzeli la ntiyiso li li la lisima swinene. A nyikele nhlayu yikulu ya swilo swa lisima leswaku swi tirhisiwa ka kuyakiwa tempele. Vatukulu va Asafa va kombise kukhensa hi kutsala tipisalema kumbe tinsimu ta kudzunisa. Ka lin’we la tinsimu, va tlangela Xikwembu ni kukombisa kuhlamala ka vona hikolaho ka ‘mintirho ya xona yohlamalisa.’ (Pis. 75:1) Swi le livaleni leswaku Davhida ni vatukulu va Asafa ava navela kukomba Yehovha ndlela leyi ava tlangela ha yona minkateko hinkwayu leyi aava nyike yona. Xana unga pimisa hi tindlela leti ungava tekelelaka ha tona?

8-9. Xana mupostola Pawulo aswi kombise kuyini leswaku aava nyika lisima vamakwerhu, naswona lingava live lihi vuyelo la kona?

⁸ Mupostola Pawulo aava nyika lisima vamakwerhu. Leswo swa tikomba ka ndlela leyi a vulavuleke hi vona ha yona. Ka swikhongelo swa yena a atlangela Xikwembu nkama ni nkama hikolaho ka vona. Nakambe marito lawa aava tsalela wona ama kombisa leswaku aava teka va li va lisima ka yena. Hi xikombiso, ka Varhoma 16:1-15, Pawulo a xaxamete 27 wa mavito ya Vakrestekuloni. A tlhele a vulavula hi kukongoma hi Priska na Akhwila ‘lavanyiketeke vutomi la vona kumuponisa’, Febe lweyi ‘apfuneke lavanyingi’ kukatsa na mupostola Pawulo. A bumabumele vamakwerhu lava rhandzekaka lava ava tirha hi matimba swinene. — Rhom. 16:1-15.

⁹ Pawulo aaswi tiva leswaku vamakwerhu ava hetisekanga. Hikolaho, loko ali karhi a heta a papela la yena leli ali tsaleleke Varhoma, a hlawule kunyikela ngopfu yingiso ka swilo leswinene leswi avaswi yendla. Yanakanya hi ndlela leyi vamakwerhu va titweke ha yona loko va twa marito ya Pawulo ya swibumabumelo mali karhi ma lerhiwa hi rito leli tlakukeke abandleni! A vuyelo la kona, hingaha gimeta hi kuvula leswaku a wunghanu la vona na Pawulo li tiyile swinene. Xana u tolovela kukombisa kukhensa swilo leswinene leswi vamakwerhu va bandla la wena vaswi vulaka kumbe kuswi yendla?

10. Hinga djondza yini ka ndlela leyi Yesu a kombiseke kukhensa ha yona ka valandzeli va yena?

¹⁰ Ka rungula la yena leli ali kongomiseke ka mabandla yokarhi ya Ásia Menor, Yesu a kombise kukhensa hikolaho ka ntirho lowu valandzeli va yena vawu yendleke. Hi xikombiso, ka rungula leli aali yisa ka bandla la Tiyatira, a sungule hi kuvula a ku: ‘Nitiva mintirho ya wena, rirhandzu ra wena ni kutshembeka ka wena, ni migingiriko ya wena, ni kutiyisela ka wena, ni leswaku mintirho ya wena ya swoswi yitlula leyosungula.’ (Nhla. 2:19) Yesu angayo vulavula hi kukula ka ntirho wa vona ntsena kambe atlhele ava bumabumela hikolaho ka leswinga susumetela swiyendlo swa vona leswinene. Hambileswi a alava kulaya van’wana aTiyatira, a sungule rungula la yena a tlhela ali pfala hi marito ya kuva khutaza. (Nhla. 2:25-28) Yanakanya hi wulawuli leli Yesu anga na lona tani hi nhloko ya mabandla hinkwawu. Aswi bohi leswaku ahi bumabumela hikolaho ka ntirho lowu himu yendlelaka wona. Hambileswo, awa kombisa kukhensa. Hakunene, lexo i xikombiso lexinene ka madoda ya bandla!

11. Hilaha swi kombisiwaka ha kona ka Vaheveru 12:16 hi lihi langutelo leli Esawu a ali na lona hi swilo swokwetsima?

¹¹ Lexi twisaka kuvava hi leswaku kuni vanhu aBibeleni vokala vanga kombisanga kukhensa. Hi xikombiso, hambileswi Esawu a kulisiweke hi vapsali lava ava rhandza Yehovha va tlhela vamu hlonipha, yena aangaswi nyiki lisima swilo swokwetsima. (Lerha Vaheveru 12:16.) Xana kunga khensi ka yena kutikombekise kuyini? Hi magugu, Esawu a xavise mfanelo ya yena ya kuva mativula ka makwavu wa yena Yakobe hi paratu la tinyawa. (Gen. 25:30-34) Ndzhaku nyana Esawu a tisolile hikolaho ka xiboho lexi axi yendleke.  Kambe tani hileswi a akombise kupfumala kukhensa, aanga fanelanga a khala hi leswi aata tsoniwa minkateko leyi fambisanaka ni kuva mativula.

12-13. Vayisrayele vaswi kombise kuyini leswaku avanga na kukhensa, naswona kuve lihi vuyelo la kona?

¹² Vayisrayele a va ni swivangelo swinyingi swa kukombisa kukhensa. Xikwembu xi wise 10 wa makhombo ka Vagibita leswaku xiva humesa awukaraweni. Ndzhaku ka leswo, xiva ponisile ka khombo hi kulovisa ntlawa hinkwawu wa nyimpi wa Vagibita ka lwandle lopshuka. Vayisrayele va tlangele swinene la kakuva va yimbelela lisimu la kuhlula va dzunisa Yehovha. Kambe xana va tame va va vanhu vokhensa?

¹³ Loko vali karhi va langutana ni swikarhato leswimpsha, Vayisrayele ava hlwelanga kukhohlwa swilo hinkwaswu leswinene leswi Yehovha aava yendlelile. Hi ndlela leyo, va kombise kupfumala kukhensa. (Pis. 106:7) Hi ndlela yihi? “Nhlengeletano hinkwayu ya Vayisrayele yisungule kungurangurela Moxe na Aroni” — Kahlekahle, ava ngurangurela Yehovha. (Ekso. 16:2, 8) Yehovha anga tsakanga hikolaho ka kupfumala kukhensa loku vanhu va yena va kukombiseke. Hi kufamba ka nkama a vule leswaku xintukulwana lexiyani hinkwaxu xa Vayisrayele axita lova amananga, ntsena akuto pona Kalebe na Yoxuwa. (Tinhl. 14:22-24; 26:65) Ahi voneni leswaku hingaswi papalatisa kuyini kutekelela swikombiso leswi swobiha kambe hi tekelela swikombiso leswinene.

14-15. a) Xana nuna na nsati vangaswi kombisa kuyini leswaku va nyikana lisima? b) Vapsali vangava djondzisisa kuyini vana va vona kukombisa kukhensa?

¹⁴ Andjangwini. Ndjangu hinkwawu wa vuyeliwa loko xirho xin’wana ni xin’wana xi kombisa kukhensa. Loko nuna na nsati va tolovela kukhensana, wunghanu la vona la kula swinene. Leswo swi tlhela swi yendla leswaku swi nabyala kurivalelana. Nuna lweyi amu nyikaka lisima nsati wa yena, anga gameli ka kuxiya ntsena swilo leswi nsati wa yena aswi vulaka kumbe aswi yendlaka, kambe “wapfuka amubumabumela.” (Swi. 31:10, 28) Naswona wansati lweyi atlhariheke a yendla leswaku nuna wa yena aswi tiva leswaku i yini leswi aswi tlangelaka ka yena.

¹⁵ Vapsali, mingava djondzisisa kuyini vana va n’wina leswaku va kombisa kukhensa? Khumbukani leswaku vana va n’wina vata tekelela leswi n’wina muswi vulaka ni leswi muswi yendlaka. Kutani va vekeleni xikombiso lexinene hi kuva byela mi ku “khanimambu” loko vami yendlela swilo. Nakambe va djondziseni kuva va tlangela loko van’wana vava yendlela swokarhi. Pfunani vana wa n’wina kutwisisa leswaku kukombisa kukhensa swi fanele swi huma mbilwini ni leswaku  marito ya vona manga va ni vuyelo lelinene. Hi xikombiso, mumpsha mun’wana waxisati a vitaniwaka Clary a te: “Loko mamana a li ni 32 wa malembe, papayi a khomiwlile a yisiwa djele. Hi mhaka leyo, a boheke kuwundla vana vanharhu na a li yexe. Nkama ninga tlhanganisa 32 wa malembe ni pimisile hi ndlela leyi swinga va swimu karhatele ha yona nkama a ali ni malembe lawa. Kutani nimu tlangele swinene hikolaho ka hinkwaswu leswi anga titsona swona leswaku a kota kuni kulisa swin’we ni vamakwerhu vambirhi va madjaha. Masiku nyana manga hundza ani byele leswaku mbilu ya yena yima tsakele ngopfu marito lawa ningamu byela naswona a tshamela kupimisa hi wona ni leswaku mamu yendla a tsaka siku ni siku.”

16. Nyikela xikombiso xa ndlela leyi kutlangela swi khutazaka van’wana ha yona.

¹⁶ Abandleni. Vamakwerhu va khutazeka loko hiva khensa. Hi xikombiso, Jorge, doda lelinga ni 28 wa malembe, a sungule kuvabya swinene. Hi mhaka leyo, angaswi kotanga kuya minhlanganwini kuringana wheti. A nkama anga sungula kuya minhlanganwini, aangaswi koti kuhetisisa swiyenge swa yena. Yena a li: “Ni titwe ninga pfuni nchumu hileswi ani hluleka kuhetisisa wutihlamuleli la mina abandleni. Kambe siku lin’wana ndzhaku ka minhlangano, makwerhu mun’wana ani byele leswi: ‘Ni navela kuku khensa hikolaho ka xikombiso lexinene lexi uxi vekeleke ndjangu wa mina. Hiti tsakele swinene tinkulumi ta wena leti uti vekeke malembe nyana lawa ma hundzeke. Ti tiyise lipfumelo la hina.’ Ni khumbeke swinene hi leswi angaswi vula la kakuva ni sungule kurila. Marito ya yena ama li hinkwaswu leswi ani lava kuswi twa.”

17. Hilaha swi kombisiwaka ha kona ka Vakolosa 3:15, hingaswi kombisa kuyini leswaku hamu khensa Yehovha hikolaho ka kuhanana ka yena?

¹⁷ Ka Xikwembu xa hina lexi hananaka. Yehovha ahi nyike swakudla swa moya swotala. Hi xikombiso, hi yamukela tidjondzo leti pfunaka aminhlanganwini, ka mabuku ni le ka ma site ya hina. Xana swi tshama swiku yendlekela leswaku ndzhaku ka kutwa nkulumi yokarhi, kulerha xihloko xokarhi kumbe kuhlalela broadcasting, uti byela leswi: ‘Leswi hi swona leswi aniswi lava’? Hingaswi kombisa kuyini leswaku hamu khensa Yehovha hikolaho ka swona? (Lerha Vakolosa 3:15.) Yin’we ya tindlela i kuva nkama ni nkama himu byela loko hi khongela leswaku haswi tlangela hinkwaswu leswi ahi nyikaka swona. — Yak. 1:17.

18. Hingaswi kombisa kuyini leswaku hamu khensa Yehovha hikolaho ka Salão do Reino la hina?

¹⁸ Hi tlhela hi kombisa kukhensa Yehovha loko hi hlayisa tindhawu ta hina ta wugandzeli ti basile ti tlhela ti tshamiseka. Hiva kona nkama ni nkama a kubasiseni ni kuhlayiseni ka ma Salão do Reino ya hina naswona lava va khatalelaka a  swikulisa marito ni switirho swa kukombisa mavhidiyo vaswi khatalela kahle leswaku swinga fayeki. Loko hi khatalela a ma Salão do Reino ya hina, mata teka nkama woleha naswona amangata tshamela kulava kulunghisiwa. Hi ndlela leyo, hita popara male yinyingi, naswona leswo swita yendla leswaku kuva ni male ya kuyaka ma Salão do Reino ya nyuwani ni kupfuxeta man’wana amisaveni hinkwayu.

19. U djondze yini ka ntokoto wa mulanguteli wa xifundza ni nsati wa yena?

¹⁹ Ka lava vahi tirhelaka hi matimba. Loko hi kombisa kukhensa, marito ya hina manga yendla leswaku munhu lweyi himu byelaka wona a cinca ndlela leyi a titwaka ha yona hi swikarhato swa yena. Vona xikombiso xa mun’we wa mulanguteli wa xifundza ni nsati wa yena. Siku lin’wana hi wuxika, ndzhaku kova va hete siku hinkwalu antirhweni wochumayela, va muke na va karhalile swinene. Nsati wa kona a fike a ticukumetela amubedwini a yetlela. Aanga finingelanga nchumu. Awo va ni mudjansi lowu a ayambalile. Hi mixo wa kona, makwerhu waxisati a byele nuna wa yena leswaku aangahataswi kota kuya mahlweni ni ntirho lowu. Siku lin’wana nimixo swinene, va yamukele papela leli ali ta hi filiyali, leli ali kongomisiwa ka makwerhu waxisati. Hi ndlela ya lirhandzu, papela lelo ali bumabumela makwerhu waxisati hi ntirho wa yena ni kutiyisela ka yena, hambileswi ntirho lowu awu katsa kurhurharhurha vhiki lin’wana ni lin’wana. Nuna wakona a te: “Xibumabumelo lexo ximu yendle a titwa kahle swinene, la kakuva angaha tlhelanga a vulavula hi kutshika ntirho wa xifundza. Kuvula ntiyiso, makhambi manyingi loko ni pimise hi kunyima, hi yena angani khutaza kuya mahlweni.” Vamakwerhu lava va ye mahlweni ni ntirho wa xifundza kuringana kolomo ka 40 wa malembe.

20. I Yini leswi hi faneleke hi zama kuswi yendla siku ni siku naswona hayini?

²⁰ Onge hinga zama kutikombisa hi li lava khensaka siku ni siku hi marito ni hi swiyendlo swa hina. Loko hi vula kumbe kuyendlela van’wana swilo na swi huma mbilwini, hitava pfuna kulangutana ni swikarhato swa siku ni siku ka misava leyi vanhu vanyingi vanga kombisiki kukhensa. Marito ya hina ya kukhensa, mata yaka wunghanu leli lingaha tshamaka hilaha kunga heliki. Xa lisima swinene, loko hi yendla tano, hita va hi tekelela Yehovha, B’ava wa hina lweyi a hananaka a tlhela a kombisa kukhensa.