1. Ulume u Samaria wa sakuiwa la Yesu wa lekisa ndati olopandu?

ALUME ekũi, va kala vekalo limue lisumuisa calua. Ovo va kuata ovilundu kuenda ka va lavokaile nda eteke limue va ka sakuiwa. Pole eteke limue ocipãla, va mola Yesu, Ulongisi Wavelapo. Va yevele ale okuti, Yesu wa sakula olombeyi vialua kuenje va kolelele okuti ovo va ka sakuiwavo. Kuenje va kaluka vati: “A Yesu, Ulongisi, tu kuatele ohenda!” Alume ekũi va sakuiwa. Ocili okuti vosi yavo va sanjukila ohenda Yesu a lekisa. Pole, pokati kavo umosi lika wa limbuka uwa va va lingila noke wa eca olopandu * ku Yesu. Ulume wa sakuiwa u Samaria, wa vetiyiwa oku “kaluka” loku sivaya Suku.—Luka 17:12-19.

2-3. (a) Nye ci pondola oku tu tateka oku eca olopandu? (b) Ovina vipi tu lilongisa vocipama cilo?

² Tu sukila oku eca olopandu ku vosi va tu lingila ohenda, ndeci ca linga ulume u Samaria. Olonjanja vimue tu ivalako oku eca olopandu ku vakuetu kolondaka, ale kovilinga.

³ Vocipama cilo, tu konomuisa esunga lieci ci kuetele esilivilo oku eca olopandu kolondaka kuenda kovilinga. Tu lilongisa ovolandu omanu va lekisa olopandu va tukuiwa Vembimbiliya, la vana ka va lekisile. Tu konomuisavo olonjila tu sukila oku lekisa olopandu vietu.

4-5. Momo lie tu sukilila oku eca olopandu?

⁴ Yehova ongangu yiwa yoku eca olopandu. Eye o ci linga poku sumũlũisa vana vo sanjuisa. (2 Sam. 22:21; Osa. 13:6; Mat. 10:40, 41) Ovisonehua vi tu vetiya oku ‘linga olosetukuli via Suku ndomãla va soliwe.’ (Va Efe. 5:1) Omo liaco, ci kuete esilivilo oku eca olopandu, momo tu yongola oku setukula Yehova.

⁵ Tu konomuisi esunga likuavo lieci tu ecela olopandu ku vakuetu. Olopandu vi sokisiwa ndokulia kumue kuwa kuenda kupepa vali, nda tu lia kumosi la vakuetu. Eci tu limbuka okuti vakuetu va eca olopandu kueci tua va lingila, tu kuata esanju. Eci tu eca olopandu, tu sanjuisa vakuetu. Omunu una tu ĩha olopandu, o limbuka okuti alikolisilo aye oku tu kuatisa, helivovako. Poku ci linga, ukamba wetu lomunu waco u livokiya.

6. Olondaka violopandu vi sokisiwa ndati lapako a pangiwa lulu?

⁶ Oku kuata ocituwa coku eca olopandu, ci kuete esilivilo lialua. Embimbiliya li popia hati: “Ondaka ya popiwa yu ya soka lotembo yaco ya linga ndapako ulu velonga liopalata.” (Olosap. 25:11) Sokolola oku fina kuepako limue lia pangiwa lulu kuenda opalata! Sokolola esilivilo nda lia kuata! Nda wa liyeva ndati poku tambula ombanjaile ndeyi? Olondaka violopandu eca ku vakuene, vi sokisiwa ndocina cimue ca posoka. Sokolola kocindekaise eci: Epako lia pangiwa lulu, li kala otembo yalua. Cimuamue haico okuti, olondaka viove violopandu, vi pondola oku ivalukiwa lomunu wa vi tambula vokuenda kuomuenyo waye wosi.

7. Ndomo ci lekisiwa Kosamo 27:4 Daviti kuenda ovitumbulukila via Asafe va eca ndati olopandu?

⁷ Afendeli valua va Suku kosimbu va kala vakualopandu. Umue pokati kavo Daviti. (Tanga Osamo 27:4.) Daviti wa kapeleko calua efendelo liocili. Oco eye a lekise olopandu, wa kuatisa lovipako viaye oco ku tungiwe onembele. Ovitumbulukila via Asafe via lekisavo olopandu kolosamo, ale kovisungo viesivayo ovo va soneha. Pokati kovisungo viaco, va eca olopandu ku Suku kuenda va sanjukila “ovikomo” via Yehova. (Osa. 75:1) Ocili okuti, Daviti kuenda ovitumbulukila via Asafe, va yonguile oku lekisa olopandu ku Yehova omo liasumũlũho va tambuile kokuaye. Kovina vipi o pondola oku setukula vakualosamo ava?

8-9. Upostolo Paulu wa lekisa ndati olopandu ku vamanji kuenda onima yipi yeyililako?

⁸ Upostolo Paulu wa kapeleko vamanji kuenda wa ci lekisa konjila ndomo a enda oku va tukula. Volohutililo viaye vio pokolika wa enda oku va panduilako ku Suku. Eye wa lekisa olopandu viaco eci a va sonehela ovikanda. Kelivulu lia va Roma 16:1-15, Paulu wa tukula eci ci soka 27 kolonduko via vamanji. Paulu wa ivaluka okuti Priska la Akuila, “va kapa omuenyo wavo kohele” oco vo popele kuenda wa tukulavo Febe okuti “wa teyuila valua oku” kongelamo Paulu. Paulu wa eca epandiyo ku vamanji vaco omo lialikolisilo avo.—Va Rom. 16:1-15.

⁹ Paulu wa kũlĩhĩle okuti vamanji ka va lipuile, omo liaco, poku sonehela ukanda ku va Roma, wa tiamisila utima kovituwa viavo viwa. Sokolola esanju vamanji va kuata poku yeva oku tangiwa lolukandi ukanda Paulu a tuma vekongelo! Onima yeyililako yeyi okuti, ukamba wavo la Paulu wa pamisiwa calua. Wa siata hẽ oku eca olopandu kovina viwa vamanji vekongelo va siata oku popia levi va siata oku linga?

10. Nye tu lilongisa konjila ndomo Yesu a eca olopandu kolondonge viaye?

¹⁰ Yesu poku tuma asapulo kakongelo amue ko Asia Menor, wa eca olopandu omo liovina viwa olondonge viaye via linga. Ndeci, eye wa sapuila ekongelo lio Tuatera hati: “Nda kũlĩha ovilinga viove, ocisola cove, ekolelo liove, upange wove, lepandi liove kuenda ovilinga viove via sulako via velapo okuti viatete vi sule.” (Esit. 2:19) Yesu ka tukuile lika evokiyo liupange wavo, pole, wa pandiyavo ovituwa via vetiya olondonge oku lekisa ovilinga viwa. Ndaño okuti Yesu wa sukilile oku lungula vamue ko Tuatera, pole, olondaka a fetika lavio, levi a malusula lavio, via kala vievetiyo. (Esit. 2:25-28) Sokolola omoko Yesu a kuete yoku songola akongelo osi. Eye ka kisikiwa oku eca olopandu omo liupange tu u lingila. Ndaño ndoco, eye handi eca olopandu. Eye wa eca ongangu yiwa kakulu vekongelo!

11. Ndomo ca lekisiwa kelivulu lia Va Heveru 12:16 Esau wa tendele ndati ovina vi kola?

¹¹ Ocili okuti, omanu vamue va tukuiwa Vembimbiliya ka va lekisile olopandu. Ndeci, Esau, ndaño okuti wa kulila vepata limue li sole kuenda lia sumbila Yehova, eye ka kapeleko ovina vi kola. (Tanga Va Heveru 12:16.) Ekambo liaye lioku lekisa olopandu lia limbukiwa ndati? Esau wa landisa unuñulu waye ku huvaye umalẽhe Yakoba omo lielonga limosi liakunde. (Efet. 25:30-34) Noke Esau wa livela omo lionjila a nõla. Eye ka lekisile olopandu kovina a kuata, omo  liaco ka kuatele esunga lioku livela omo lioku pumba esumũlũho lioku kala onuñulu.

12-13. Va Isareli va lekisa ndati ekambo liolopandu kuenda nye ca pita lavo?

¹² Va Isareli va kuata asunga alua oku lekisa olopandu. Ovo va yovuiwa kupika, eci Yehova a nena Afengi Ekũi Kegito. Noke Suku wa va teyuila poku kundula olohoka viosi viasualali vio ko Egito, Vokalunga Kakusuka. Kuenje va Isareli va eca olopandu vialua kuenda va imba ocisungu coku sivaya Yehova. Anga hẽ vamamako oku kala vakualopandu?

¹³ Va Isareli eci va sangiwa vali lovitangi, vepuluvi liaco va ivala ovina viosi viwa Yehova a va lingila. Ovo va lekisa ekambo liolopandu. (Osa. 106:7) Ndamupi? “Ohongele yosi ya va Isareli ya fetika oku lisiõsuĩla Mose la Arone,” pole, ovo va kala oku lisiõsuĩla Yehova. (Etu. 16:2, 8) Yehova wa sumuile calua omo liocituwa afendeli vaye va lekisa. Noke Yehova wa popia okuti epata liosi lia va Isareli li laika oku kunduiwa vekalasoko kuenje pa supa lika Yehosua la Kalembe. (Ate. 14:22-24; 26:65) Tu konomuisi ndomo tu yuvula oku setukula ongangu yĩvi kuenda ndomo tu kuama ongangu yiwa.

14-15. Olohueli vi lekisa ndati olopandu komunu lokuavo? (b) Olonjali vi pondola oku longisa ndati omãla vavo oku lekisa olopandu?

¹⁴ Vepata. Vosi va kuatisiwa eci omunu lomunu vepata, va lekisa olopandu. Eci olohueli vi lekisa olopandu komunu lokuavo, ukamba wavo u pama calua. Handi vali, ci leluka kokuavo oku liecela pokati. Ulume una okuti, wa kapako ovina ukãi a popia levi a linga, ‘u pandula kuenda u sivaya.’ (Olosap. 31:10, 28) Ukãi ukualondunge, o lekisavo olopandu kulume waye.

¹⁵ Ene alonjali vu longisa ndati omãla vene oku lekisa olopandu? Ivaluki okuti omãla vene va ka setukula ovina vu popia levi vu linga. Omo liaco, eca ongangu yiwa poku pandula omãla vove eci va ku lingila ovina viwa. Handi vali, longisa omãla vove oku popia hati, nda pandula, eci va va lingila cimue ciwa. Kuatisa omãla vove oku limbuka okuti, oku eca olopandu te ci tunda vutima kuenda oku popia hati nda pandula ci panga ciwa. Kũlĩhĩsa ulandu wufeko o tukuiwa Clary, eye wa popia hati: “Ina yange eci a kala la 32 kanyamo wa sukilile oku tekula omãla vatatu lika waye. Kuenje eci nda kuatavo 32  kanyamo, nda limbuka okuti ka ca lelukile kokuaye vutunga owu oku ci linga. Omo liaco, nda eca olopandu kokuaye omo lialikolisilo aye oku tu tekula ame la vamanjange. Cilo, ina yange wa popia okuti olondaka viange violopandu via vetiya utima waye kuenje olonjanja viosi o vi sokolola kuenda vi u sanjuisa.”

16. Tukula ulandu umue u lekisa okuti oku eca olopandu ci pamisa vakuetu.

¹⁶ Vekongelo. Eci tu eca olopandu ku vamanji, va pamisiwa. Kũlĩhĩsa ulandu wa manji Jorge, ukulu umue wekongelo o kuete 28 kanyamo, okuti wa vela calua. Olonjanja vimue vosãi, ka ca tavaile oku endaenda kolohongele. Ndaño ceci a fetika vali oku endaenda kolohongele, ka ca lelukile oku panga olonepa. Manji Jorge wa popia hati: “Ame nda litendele okuti si kuete esilivilo omo sia ponduile oku tẽlisa ovikele vekongelo. Noke liohongele yimue, manji umue wa sapuila hati: ‘Hu pandula omo lioku eca ongangu yiwa kepata liange. Kũlĩha okuti, tua siata oku sola calua olohundo viove. Ovio via siata oku pamisa calua ekolelo lietu.’ Olondaka evi via ndi sanjuisa calua kuenda nda lila. Ovio olondaka nda sukilile oku yeva.”

17. Ndomo ca lekisiwa kelivulu lia Va Kolosai 3:15, tu lekisa ndati olopandu ku Yehova omo liocali caye?

¹⁷ Tu lekisi olopandu ku Suku yetu ukuacali. Yehova wa siata oku tu ĩha okulia kualua kuespiritu. Ndeci, tua siata oku tambula ekuatiso pocakati colohongele vietu, colorevista kuenda conumbi yetu yo Internet. Anga hẽ wa yevele ale ohundo yimue, ale wa tangele ocipama cimue kuenda oku tala ocipama cimue co broadcast loku popia hati, ‘Eci oco nda sukilile?’ Tu lekisa ndati olopandu ku Yehova? (Tanga Va Kolosai 3:15.) Onjila yimue yoku ci linga, oku eca olopandu kokuaye olonjanja viosi tu likutilila omo liolombanjaile evi viwa.—Tia. 1:17.

18. Volonjila vipi tu lekisa olopandu Konjango yetu Yusoma?

¹⁸ Tu lekisavo olopandu ku Yehova eci tu yelisa ocitumãlo cetu cefendelo loku ci tata. Tu yelisi ciwa Onjango Yusoma loku yi tata, okuti vana va talavaya lolomakina vioku lekisa olovideo ci va ecelela oku viongotiya ciwa. Nda tu tata ciwa Olonjango vietu Viusoma ka vi nyõleha lonjanga kuenda ka vi ka sukila oku vi semulula olonjanja vialua. Lonjila eyi, tu ka talavaya ciwa lolombongo vi ka ecelela oku tunga loku semulula Olonjango vikuavo Viusoma voluali luosi.

19. Nye wa lilongisa kulandu wa manji ukuakunyula akongelo lukãi waye?

 ¹⁹ Oku lekisa olopandu ku vana va tu lingila upange uwa. Eci tu lekisa olopandu, olondaka vietu vi pondola oku pongolola onjila ndomo omunu a sima catiamẽla kocitangi a kasi oku liyaka laco. Kũlĩhĩsa ulandu wa manji ukuakunyula akongelo kumue lukãi waye. Noke lioku pita eteke liosi lombambi kupange woku kunda, va tiukila konjo yavo lekavo lialua. Ombambi yaluile calua okuti ca sukila ukãi oku pekela losembele yaye yombambi. Eci kuaca ukãi wa sapuila ulume waye okuti, ka pondola vali oku amamako lupange woku nyula akongelo. Noke komẽle yaco wa tambula ukanda umue wa tunda ko filiale wa loña kokuaye. Vukanda waco, mua sonehiwa olondaka vioku pandiya upange kuenda epandi liaye. Owo wa lombololavo okuti ka ca lelukile oku iluka olosemama viosi. Ulume waye wa popia hati: “Ukanda waco wepandiyo, wa vetiya calua ukãi wange kuenje tunde opo lalimue eteke a vanguile vali catiamẽla koku siapo upange woku nyula akongelo. Olonjanja vialua eye wa enda oku mbetiya eci nda kala lovisimĩlo vioku siapo upange waco.” Ohueli eyi yamamako kupange woku nyula akongelo ci pitãhala 40 kanyamo.

20. Nye tu sukila oku linga oloneke viosi kuenda momo lie?

²⁰ Omo liaco, oloneke viosi tu lekisi okuti tuakualopandu kolondaka vietu kuenda kovilinga. Olondaka vietu violopandu, ale ovilinga pamue ovio omunu umue a sukila, oco a kuate ongusu yoku yula ovitangi viaye voluali lulo, ka muli olopandu. Olondaka vietu violopandu, vi pondola oku pamisa ukamba umue u pondola oku kala otembo yenda hũ. Handi vali, ca velapo ceci okuti, o ka setukula Isietu Yehova, ukuacali haeye ukualopandu.