1. How the Samaritan man wey Jesus cure show say e value the good wey Jesus do?

TEN men get leprosy, they no know wetin to do, and they no get hope say they go ever well. But one day, they see Jesus, the Great Teacher as e de come from far. They don hear say Jesus cure people wey get different kind of sickness, and they believe say Jesus go fit cure them too. So they shout and talk say: ‘Jesus, Teacher, feel pity for us!’ Jesus cure them, and their sickness comot finish. The truth be say all of them like the good wey Jesus do for them, no be so? But na only one of them do pass to like wetin Jesus do. E show say e value or appreciate * the good wey Jesus do. The man na Samaritan person. The thing wey Jesus do move the man to praise God “with loud voice.”​—Luke 17:12-19.

2-3. (a) Wetin fit make us no value the good wey other people do? (b) Wetin we go talk about for this topic?

² Like the Samaritan man, na fine thing if we de value the good wey people do. But sometimes, we fit forget to say thank you or show how we feel for the good wey other people do.

³ For the things wey we de talk and do, e dey important for us to show say we value the good wey people do. For this topic, we go talk about why e dey important. We go learn from the example of some people for Bible wey show say they value good thing wey people do and some wey no value-am. We go still talk about some ways wey we fit use show say we de value the good wey people do.

4-5. Why e good make we de show say we value the good wey people do?

⁴ Jehovah de show say e value the good wey person do, and na better example for us to follow. One way e de do-am, na as e de bless people wey de do wetin e want. (2 Sam. 22:21; Ps. 13:6; Matt. 10:40, 41) Bible encourage us say make we “de follow God example as children wey e love well-well.” (Eph. 5:1) So, one main reason wey go make us de value the good of others na because we want follow the example of Jehovah.

⁵ Make we see another reason wey go make us show say we value the good wey people do. To value something be like to chop food. Na when we chop food together with people we de enjoy-am pass. When we know say other people value wetin we do for them we de happy. When we show say we value the good wey other people do, we de make them happy. The person wey we thank for the good wey e do, go know say wetin e do really help us and we like-am. And this one go really make the friendship wey we get with the person strong more-more.

6. When we show say we value the good wey other people do, how e be like apple wey they make with gold?

⁶ Na really better thing to show say we value the good wey people do. Bible talk say: “Any word wey person talk for the right time be like golden apples for inside silver designs wey they carve.” (Prov. 25:11) Just think-am. Apple wey they use gold make, then come arrange-am for design wey they make with silver, how you think say e go be? E go really fine and get value well-well! How you go feel if person give you that kind gift? Na so e still be with the way others de feel when we show them say we value the good wey they do. Think about this one: Apple wey  they use gold make fit last for long time. Na so e still be with wetin we talk or do, people fit remember and value-am for their whole life.

7. How David for Psalm 27:4, and other people wey write psalms, show say they value all the blessing from Jehovah?

⁷ For Bible time, many servants of Jehovah show say they value the good wey God and other people do. One of them na David. (Read Psalm 27:4.) E really value pure worship and e show how e feel with the thing wey e do. E contribute plenty money and things wey get value to support the construction of the temple. One generation from the family of Asaph write psalms or songs of praise for Bible. They use one of the song to thank Jehovah and show say they like the “wonderful things” wey e de do. (Ps. 75:1) This one make-am clear say David and Asaph generation really thank Jehovah to show say they value all the blessing wey they get from Jehovah. You fit think of ways wey you fit imitate their example?

8-9. Wetin apostle Paul do to show say e value e brothers and sisters, and how that one go don make them feel?

⁸ Apostle Paul value e brothers and sisters, and e show this one for the way e talk about them. E de always thank God for them when e de pray. E still show say e value them for the letter wey e write to them. For the first 15 verse of Romans 16, Paul mention the name of 27 Christian brothers and sisters. Paul talk wetin Prisca and Aquila do. E talk say ‘they risk their life’ to save e own life. And e still talk wetin Phoebe do. E say Phoebe “don help plenty people,” and Paul dey among them. Paul really value those brothers and sisters, and e thank them for their hard work.—Rom. 16:1-15.

⁹ Paul know say e brothers and sisters no dey perfect. But for the ending of e letter, e choose to talk only about their good character. Just think of how the brothers and sisters go happy when they hear the things wey Paul talk about them, as them de read the letter for congregation! This one really encourage them, and we dey sure say e make their friendship with Paul dey tight more-more. You de always show say you value the good things wey brothers and sisters for congregation de talk and do?

10. Wetin we fit learn from the way Jesus show say e value e disciples?

¹⁰ For the message wey Jesus send to some congregations for Asia Minor, e show say e value the work wey e disciples do. For example, see how e start the message wey e send to the congregation for Thyatira. E say: “I know wuna work and love and faith and how wuna de preach, and de endure. And say the work wey wuna de do now better pass the one wey wuna first do.” (Rev. 2:19) Jesus no only talk about the more work wey they do. E still thank them for the good character wey move them to do that work. Even though say Jesus need to warn some people for Thyatira, e still start and end e message with better word wey encourage them. (Rev. 2:25-28) Just think of the kind authority wey Jesus get as the head of all the congregations. E no need to thank us for the work wey we de do for e name. Even with that one, Jesus take-am as important thing to always show say e value wetin people do. This one na better example for elders to follow!

11. As e dey for Hebrews 12:16, which kind mind Esau show say e get for holy things?

¹¹ The bad thing be say, some people for Bible no show say they value wetin God do  for them. One example na Esau. E papa and mama love and respect Jehovah, but Esau no value holy things. (Read Hebrews 12:16.) So how this kind mind wey Esau get come show? E sell e birthright to Jacob wey be e younger brother just because of one plate of stew. (Gen. 25:30-34) After, Esau feel bad for the thing wey e do, e regret-am. But because e no appreciate the thing wey e first get, e no get any reason to complain when e no receive the blessing wey e suppose get because of the birthright.

12-13. Wetin Israel people do wey show clear say they no value wetin Jehovah do for them, and wetin come happen after?

¹² Israel people get many reason why they need to glad and value the thing wey God do for them. God free Israel people from slave and punish Egypt people with Ten Punishment. God still save them from trouble as e destroy all the army of Egypt people for Red Sea. Israel people glad sotey they sing song to praise Jehovah. But they continue to be like that?

¹³ When things no easy for Israel people, quick-quick they forget all the good things wey Jehovah don do for them. They come show clear say they no value wetin Jehovah don do for them. (Ps. 106:7) Wetin they do to show this bad character? Bible tell us say: “All the people of Israel gather and start to complain against Moses and Aaron.” And this one mean say they complain against Jehovah. (Ex. 16:2, 8) Jehovah no happy as e people show that kind bad character. After, Jehovah talk say all the generation of Israel people go die finish for desert, apart from Joshua and Caleb. (Num. 14:22-24; 26:65) Make we see wetin we go do so that we no go follow all this bad examples, and follow only the good ones.

14-15. (a) How husband and wife fit show say they value each other? (b) How papa and mama fit teach their children to de talk thank you?

¹⁴ For family. The whole family de benefit when everybody for family de show say they value good things. When husband de show e wife say e value the good wey e do, and wife still de show e husband say e value the good wey e do, this one go make their love dey strong more. E go still make-am dey easy for them to de forgive theirself. Husband wey value e wife no go only de see the good things wey e wife de do and talk, but e go still “get up and praise her.” (Prov. 31:10, 28) And wife wey get sense go tell e husband the  particular thing wey e value about the husband.

¹⁵ Papa and mama, how wuna fit teach wuna children to de show say they value the good wey people do for them? Remember say, your pikin go follow your example for wetin you de talk and do. So when your children do things for you, make you show better example and tell them thank you. Still teach your children to talk thank you when people do things for them. Help your children understand say to show say they value good things wey people do, e must come from their heart. And if they talk thank you, e de make other people happy. For example, one young woman wey e name na Clary talk say: “My mother dey 32 years when e start to take care of three children alone. When I reach 32 years, I think of how e go don really hard for my mum to take care of three children alone for that age. So, I thank and tell my mother how I value everything wey e do to train me and my brothers. E no too long, e tell me say that thing wey I talk really sweet e heart, and e de get encouragement anytime wey e think about-am.”

16. Give one example to show say we fit encourage other people when we thank them for wetin they do for us.

¹⁶ For congregation. When we show say we value wetin our brothers and sisters do and thank them, we de encourage them. For example, one elder wey e name na Jorge dey 28 years, and e get one serious sickness. For one month, e no fit go meeting. And even when e start to attend meeting, e never fit de handle parts. The brother talk say: “I feel like say I no be anything again, life tire me because of my condition as I no fit de do work for congregation again. But one day after meeting, one brother tell me say: ‘I want thank you for the fine example wey you don show for my family. You no know how we de enjoy your talks for all those years. Your talks don help us get more faith.’ Wetin the brother talk really touch me sotey I start to cry. Na exactly wetin I need be that.”

17. As e dey for Colossians 3:15, how we fit show Jehovah say we value the open-hand wey e get?

¹⁷ To our God wey get open-hand. We don learn plenty things from Jehovah. For example, we de get direction from our meetings, our magazines, and our websites. You don ever listen to any talk, read any topic from our book, or watch any JW Broadcast and talk say, ‘Na exactly wetin I need be that’? How we fit show say we de value wetin Jehovah de do for us? (Read Colossians 3:15.) One way na to de always thank Jehovah  for prayer for all this fine gifts.​—Jas. 1:17.

18. How we fit show say we value our Kingdom Hall?

¹⁸ We still de show say we value the things wey Jehovah de do for us when we de arrange and clean the place wey we de worship Jehovah. Make we de always join to maintain and clean our Kingdom Hall. The people wey dey in charge of sound and video equipment for congregation go dey careful when them de handle-am. When we de maintain our Kingdom Halls well, they go last long, and they no go de need serious repair. This one go help to save money so that we go get more money to use build or repair other Kingdom Halls for the whole world.

19. Wetin you learn from the experience of one circuit overseer and e wife?

¹⁹ To people wey de work hard because of us. The thing wey we talk to thank person for wetin e do, fit change the way the person de feel about the problems wey e de face. See the example of one circuit overseer and e wife. One day, when they don come back from preaching for winter time, they really tire. Cold too much sotey e wife sleep with the winter coat wey e wear. For morning, e tell e husband say e no think say e go fit continue for the circuit work. After, that same morning, they receive one letter from branch office, and the letter na for e wife. E wife really happy for the letter because the letter talk about the fine work wey e de do and how e de endure for the preaching work. The letter still talk say they understand say e no easy to de move from one house to another every week. The letter really thank and encourage our sister well-well. The husband talk say: “That letter really touch my wife sotey e no ever talk say e go stop travelling work again. Many times way I think of to stop the work na my wife de encourage me to continue.” This circuit overseer and e wife continue for the work for almost 40 years.

20. Wetin we go try to de do everyday?

²⁰ Everyday of our life, make we try to show say we value the good wey people de do with wetin we de talk and do. Many people for this world no de talk thank you. So when e come from our heart to do or talk something wey show say we value people, e fit just be wetin they need to manage the problem wey them de face. And when we de thank people, e go make our friendship strong and last forever. The one wey important pass be say, e go show say we de imitate Jehovah, our Papa wey get open-hand and wey de value the good wey people do.