1. Uw rogon ni dag fare moon nu Samaria ni kan golnag nib ga’ fan u wan’ e n’en ni ke rin’ Jesus ngak?

BAY ragag e pumoon ni kar gafgowgad, ya ke yib e daraw ngorad ma dakuriy e athap rorad ni ku yad ra gol bayay. Machane me yan i reb e rran mar guyed Jesus ni ir e Bin Th’abi Fel’ e Sensey u orel. Kar rung’aged ni ke golnag Jesus gubin mit e m’ar, ma ke mich u wan’rad ni ku rayog rok ni nge golnagrad. Ere ra tolulgad ni yad be gaar: “Jesus! Masta! Mu runguymad!” Ma aram me golnag fa ragag i pumoon. Dabisiy ni yad gubin nrib ga’ fan u wan’rad rogon ni ke gol Jesus ngorad. Machane taa bagayad ko pi pumoon ney e gathi kemus nib ga’ fan u wan’ e n’en ni ke rin’ Jesus, ya ki pining e magar * ngak. Re moon ney nu Samaria e ke lemnag nrib ga’ fan ni nge pining e sorok ngak Got nib “ga’ laman.”​—Luke 17:12-19.

2-3. (a) Mang fan nrayog ni nge dab da pininged e magar? (b) Mang e gad ra weliy u lan e re article ney?

² Gad baadag ni ngad boded fare moon nu Samaria, ni aram e ngad pininged e magar ngak e piin ni yad ba gol. Machane yu ngiyal’, e sana gad ma pag talin ni ngad pininged e magar, ara daged nib ga’ fan u wan’dad rogon ni kan gol ngodad.

³ U lan e re article ney e gad ra weliy feni ga’ fan ni nge m’ug ko thin nge ngongol rodad, nib ga’ fan u wan’dad e n’en ni yima rin’ ni fan ngodad. Ku gad ra fil boch ban’en ko girdi’ kakrom ni bay murung’agen u lan e Bible, u rogon ni kar daged nib ga’ fan u wan’rad e tin ni kan rin’ ni fan ngorad, nge boch e girdi’ ndar rin’ed ni aray rogon. Ma aram ma gad weliy boch e kanawo’ u rogon nrayog  ni ngad pininged e magar ko n’en ni yima rin’ ni fan ngodad.

4-5. Mang fan ni ngad pininged e magar?

⁴ Ke dag Jehovah e kanawo’ ngodad u rogon ni ngan pining e magar. Reb e kanawo’ ni ma rin’ e re n’ey riy, e aram e ma tow’athnag e piin ni yad ba fel’ u wan’. (2 Sam. 22:21; Ps. 13:6; Matt. 10:40, 41) Be pi’ e Thin nu Bible e athamgil nga lanin’dad ni ngad ‘folwokgad rok Got, ni bochan e gadad pi fak ni gadad ba t’uf rok.’ (Efe. 5:1) Ere bin th’abi ga’ fan ni ngad pininged e magar, e bochan ni gad baadag ni ngad folwokgad rok Jehovah.

⁵ Am lemnag reb i fan ni ngad pininged e magar ngak e girdi’. Ra ni pining e magar ngak e girdi’, ma gowa bod ni ngam koy e ggan nib manigil. Ga ra felfelan’ u nap’an ni ga ra pining be’ ni ngam abichgow u taabang. Ere nap’an ni gad ra nang nib ga’ fan u wan’ e girdi’ e n’en ni gad be rin’ ni fan ngorad, ma gad ma felfelan’. Ma nap’an ni gad ra pining e magar ngak e girdi’ maku yad ra felfelan’. Ya facha’ ni kad pininged e magar ngak e ke nang ni athamgil ni be tay ni nge ayuwegdad, ara ban’en ni ke pi’ ngodad e ban’en nib ga’ fan u wan’dad. Ere angin nra yib riy e ra chugur e tha’ u thildad facha’.

6. Mang boch ban’en nib taareb rogon u thilin e thin ni yima yog ni ngan pining e magar, nge gol ni kan ayliy nga daken e silber?

⁶ Ba ga’ fan e magar ni gad ma pining ngak e girdi’. Be gaar e Bible: “Ba tafinay nni weliy nib fel’ rogon nge tamilangan’uy riy e bod rogon e gol ni kan ngongliy nib fel’ yaan kan ayliy nga daken e silber.” (Prov. 25:11) Am lemnag feni fel’ yaan e gol ni kan tay nga daken e silber! Kum lemnag feni rib ga’ fan e re n’ey! Uw rogon u wan’um nfaanra pi’ be’ ba tow’ath ngom ni aray rogon? Ere ku aray rogon feni ga’ fan e thin ni ga ma yog ni ngam pining e magar ngak e girdi’. Kum lemnag e re n’ey: Gol e rayog ni nge par nib n’uw nap’an. Ere gad ra pining e magar ngak e girdi’, ma aram e rayog ndab ra paged talin u n’umngin nap’an e yafos rodad.

7. Uw rogon ni ke pining David e magar ngak Jehovah nrogon ni bay ko Psalm 27:4, ma uw rogon yugu boch e girdi’ nra yoloyed e pi tang ni ku ra pininged e magar ngak Jehovah?

⁷ Boor e tapigpig rok Got kakrom ni yad ma pining e magar. Bagayad ko pi cha’ney e David. (Mu beeg e Psalm 27:4.) Rib ga’ fan e bin riyul’ e liyor u wan’, ma re n’ey e m’ug ko tin ni i rin’. Boor ban’en ni immoy rok nrib ga’ fan ni pi’ ni fan ko fare tempel ni yibe toy. Ma pi fak Asaph e ur pininged e magar u daken e pi tang, ni ur yoloyed ni yad be pining e sorok riy ngak Got. Bay reb ko pi tang ney ni yad be weliy riy rogon e “pi maang’ang” ni ke rin’ Got. (Ps. 75:1, BT) Ere ba tamilang ni baadag David nge pi fak Asaph, ni ngar pininged e magar ngak Jehovah ko gubin e tow’ath ni ke pi’ ngorad. Gur, rayog ni ngam lemnag boch e kanawo’ nrayog ni ngam folwok rok e piin nra yoloyed e pi tang?

8-9. Uw rogon ni ke pining apostal Paul e magar ngak e pi walag? Mang angin ndabisiy ni yib riy?

⁸ Rib ga’ fan e pi walag u wan’ apostal Paul, ma re n’ey e ke m’ug u rogon ni i weliy murung’agrad. Gubin ngiyal’ mi i pining e magar ngak Got nbochan e pi walag ney u nap’an ni be meybil ni yigoo ir. Miki pining e magar ngak e pi walag u lan e pi babyor ni yoloy nge yan ngorad. Roma guruy ni 16 ko verse 1 nge mada’ ko 15, e weliy Paul riy murung’agen 27 e walag ni Kristiano, ni yog fithingrad ni be’ nge be’. Ke weliy murung’agen Priska nge Aquila ni kar “pagew fan e pogofan rorow” ni bochan, miki yog ni Febe e “ba ga’ e ayuw ni ke pi’ ngak boor e girdi’” nib muun Paul ngay. Ke pining e magar ngak e pi walag nem ni yad ba t’uf rok ko maruwel nib gel ni yad be tay.​—Rom. 16:1-15.

⁹ Manang Paul ndawori flont e pi walag nem, machane tin tomur e thin ni yoloy nge pi’ ngak piyu Roma e dugliy ni nge tiyan’ nga fel’ngirad nib manigil. Am lemnag gelngin e athamgil ni ke yib nga laniyan’ e pi walag u nap’an nni beeg e n’en ni yog Paul ni nge rung’ag gubin e girdi’ u lan e ulung! Angin ni yib riy e dabisiy nri chugur e tha’ u thilrad Paul. Ere gur, gubin ngiyal’ ni ga ma pining e magar ngak e pi walag ko tin ni yad be yog nge tin ni yad be rin’ nib fel’, fa?

10. Mang e rayog ni ngad filed u rogon ni pining Jesus e magar ngak pi gachalpen?

¹⁰ U lan e pi babyor ni pi’ Jesus ko pi ulung u lan yu Asia Minor, me pining e magar ngak pi gachalpen ko maruwel ni yad be rin’. Bod ni n’en ni yog ngak e ulung u Thyatira ko som’on e gaar: “Gu manang e n’en ni ga be rin’. Gu manang rogon nib t’uf Got rom nge girdi’, nge fanam yul’yul’, nge pigpig ni ga be tay, nge fanam gum’an’. Gu manang ni ke gel e maruwel ni ga be tay e chiney ko som’on.” (Rev. 2:19) Gathi kemus ni weliy Jesus e mon’og ni yad be tay, ya ki pining e magar ngorad ko pi fel’ngin ni bay rorad, ni ir e be ayuwegrad ni ngar rin’ed e maruwel nib manigil. Yugu aram rogon nib t’uf ni nge fonownag Jesus boch e girdi’ u lan e re ulung nem, machane tin som’on nge tin tomur e thin ni yog ngorad e be pi’ e athamgil nga lanin’rad. (Rev. 2:25-28) Am lemnag mat’awun Jesus ni ir lolugen gubin e ulung. Dariy rogon ni nge pining e magar ngodad ko maruwel ni gad ma rin’ ni fan ngak. Machane, ma pining e magar ngodad. Rib manigil e kanawo’ ni ke dag ni fan ngak e piin piilal!

11. Uw rogon u wan’ Esau e tin nib thothup ban’en nrogon ni bay ko Hebrews 12:16?

¹¹ Ba gel e kireban’ riy, ya bay murung’agen boch e girdi’ u lan e Bible nda ur pininged e magar. Bod rogon Esau, yugu aram rogon ni gallabthir rok nra chuguliyew e ba t’uf Jehovah rorow ma yow ma tayfan, machane ir e de ga’ fa u wan’ e tin nib thothup ban’en. (Mu beeg e Hebrews 12:16.) Uw rogon ni yib i tamilang e re n’ey? Ke pi’ Esau mat’awun ni ir e bin nganni’ ngak Jakob ni ir e bin wen nde fal’eg i lemnag u m’on riy ni bochan e nge kay e flowa nge mame ni kan lith. (Gen. 25:30-34) Boch nga tomuren me kalngan’ Esau ko n’en ni ke dugliy. Ere bochan nde ga’ fan  u wan’ e n’en ni immoy rok, ma aram fan ndariy rogon ni nge gun’gun’ u nap’an ndan tow’athnag ni ir e bin nganni’.

12-13. Uw rogon ni ke dag piyu Israel ndaki ga’ fan u wan’rad e tin ni ke rin’ Jehovah ni fan ngorad? Mang wenegan ni ke yib riy?

¹² Boor fan ni nge pining piyu Israel e magar ngak Jehovah. Ya kan chuwegrad ko sib u Egypt u tomuren ni pag Jehovah fa Ragag i Gafgow nga daken yu Egypt. Ma aram miki ayuwegrad u pa’ e pi salthaw rok piyu Egypt u nap’an nthang e fan rorad u lan fare Red Sea. Kari ga’ fan u wan’ piyu Israel e tin ke rin’ Jehovah ni fan ngorad, ma aram mu ur tanggad ni yad be pining e sorok ngak. Machane gur, ke yag ni ngar pired ni yad be dag nib ga’ fan u wan’rad e re n’ey ni kan rin’ ni fan ngorad?

¹³ Nap’an ni mada’nag piyu Israel boch e magawon bayay, ma rib papey nra paged talin gubin e tin nib fel’ ni ke rin’ Jehovah ni fan ngorad. Ma aram e dakur daged ni yad be pining e magar ngak. (Ps. 106:7) Uw rogon? “Yad gubin nra gun’gun’gad nib togopluw ngak Moses nge Aron” ni bin riyul’ riy e, Jehovah e ir e yad be togopluw ngak. (Ex. 16:2, 8) Ke kireban’ Jehovah ni ke dag e girdi’ rok ndaki ga’ fan u wan’rad e tin ke rin’ ni fan ngorad. Ere boch nga tomuren me yiiynag ni gubin piyu Israel ko re mfen nem e yad ra yim’ u daken e ted, ma kemus ni yigoo Joshua nge Kaleb e yow ra magey nib fos. (Num. 14:22-24; 26:65) Ere ngad weliyed rogon ni ngad siyeged ndab da folwokgad rok boch e girdi’ ndar daged e kanawo’ nib fel’, ma ngad folwokgad rok e piin ni kar daged e kanawo’ nib manigil.

14-15. (a) Uw rogon ni nge pining e piin mabgol e magar ngorad? (b) Uw rogon nrayog ni nge fil e piin gallabthir ngak pi fakrad rogon ni ngar pininged e magar ngak e girdi’?

¹⁴ U lan e tabinaw. Gubin e girdi’ u lan e tabinaw e ra yib angin ngorad ni faanra yad gubin, ma yad ma pining e magar ngorad. Ra i pining e piin mabgol e magar ngorad, ma aram e rayog ni nge chugur e tha’ u thilrad. Re n’ey e ku ma ayuwegrad ni nge mom ni ngar n’aged fan e kireb rorad. Be’ ni figirngiy nib ga’ fan u wan’ leengin, e gathi kemus ni ma guy e tin nib fel’ ni ma yog ara ma rin’, ya ku ma “pining e magar ngak.” (Prov. 31:10, 28) Be’ ni leengiy e ma yog ngak figirngin nib ga’ fan u wan’, ma baadag e n’en ni ma rin’.

¹⁵ Ma piin gallabthir, uw rogon ni ngar filed ngak pi fakrad rogon ni ngar pininged e magar? Dab mu paged talin ni ma folwok pi fakmed ko thin nge ngongol romed. Ere mu dag e kanawo’ nib manigil nrayog ni ngar folwokgad riy, ni aram e ngam pining e magar ngorad, u nap’an ni yad ra rin’ boch ban’en ni fan ngom. Maku reb, mu fil ngak pi fakam ni ngar pininged e magar u nap’an nra rin’ e girdi’ boch ban’en ni fan ngorad. Mu  ayuwegrad ngar nanged nfaanra ngar pininged e magar, ma ban’en ni ke yib u gum’ircha’rad, mab ga’ angin nfaanra m’ug e re n’ey ko thin rorad. Bod reb e rugod ni ka nog Clary ngak e gaar: “Nap’an ni gaman 32 e duw ko chitinag, me yan i magey ni yigoo ir ni nge chuguliy dalip e bitir. Nap’an ni ke gaman 32 e duw rog, ma aram mug lemnag rogon feni mo’maw’ e par rok e ngiyal’ nem ni aram rogon yangaren. Ere ku gog ngak feni rib ga’ fan u wan’ug gubin ban’en ni ke pag fan, ya nge chuguliyeg nge gal walageg. Dawori n’uw nap’an me yog ngog nre n’em ni gog ngak e rib ga’ fan u wan’, ya yu ngiyal’ e ra sul nge lemnag mma yib e felfelan’ ngak.”

16. Mu weliy ban’en ni ke buch ni be dag rogon ni gad ra pining e magar ngak e girdi’, ma aram e ra yib e athamgil nga lanin’rad.

¹⁶ U lan e ulung. Nap’an ni gad ra pining e magar ngak pi walagdad, ma aram e gad be pi’ e athamgil nga lanin’rad. Bod Jorge nreb e piilal ni 28 e duw rok ni yib ba m’ar ngak nib ubchiya’. Ma nap’an reb e pul ndabkiyog ni nge un ko muulung. Machane mus nga nap’an ni sul nge un ko muulung, ma dabkiyog ni nge pi’ e welthin. Ke yog Jorge ni gaar: “Kug lemnag ndakuriy fag nbochan e tin ndabkiyog ni nggu rin’ nge tin nib milfan ngog u lan e ulung. Machane tomuren reb e muulung me yib reb e walag ni pumoon i gaar ngog: ‘Gu baadag ni nggu pining e magar ngom ko kanawo’ nib manigil ni kam dag nrayog ni nggu folwokgad chon e tabinaw rog riy. Ri gamad baadag e pi welthin ni um pi’ u lan fapi duw ni ke yan. Ya ke ayuwegmad ni nge gel e michan’ romad.’ Ku gu felfelan’ ko re n’ey ni ke yog e re walag ney ngog, ma aram mug yor. Thin ni yog e aram e n’en nib t’uf ni nggu rung’ag.”

17. Uw rogon ni ngad pininged e magar ngak Jehovah nrogon ni yog ko Kolose 3:15?

¹⁷ Ngak e Got rodad nib gol. Boor e ggan ni ke pi’ Jehovah ngodad ni fan ko tirok ban’en. Bod ni boor e fonow ni ma ayuwegdad ni yima pi’ u nap’an e pi muulung rodad, nge pi magazine nge fare website rodad. Gur, bay bayay ni kam rung’ag reb e welthin ara kam beeg reb e article ara kam yaliy fare broadcast me lungum, ‘Ri ireray e n’en nib t’uf rog’? Uw rogon ni ngad pininged e magar ngak Jehovah? (Mu beeg e Kolose 3:15.) Reb e kanawo’ e aram e ngad pininged e magar ngak, u daken e meybil ko pi tow’ath nib manigil ni ke pi’ ngodad.​—Jas. 1:17.

18. Mang boch e kanawo’ ni ngad daged riy nib ga’ fan u wan’dad Tagil’ e Liyor rodad?

¹⁸ Ku gad ma pining e magar ngak Jehovah u nap’an ni gad ra tay tagil’ e liyor rodad nib beech mab yaram. Gad ma un i klinnag Tagil’ e Liyor rodad ni gubin ngiyal’, ma gad ma fal’eg e gin ni ke kireb riy. Ma piin nib milfan ngorad boch ban’en ni fan ko sound nge video ni yima fanay u lan e ulung, e yad ma kol ayuw ngay ndabi kireb. Faan gad ra ayuweg Tagil’ e Liyor rodad nib fel’ rogon,  ma aram e rayog ni nge par nib n’uw nap’an me lich e tin ngan fal’eg riy ni ke kireb. Gad ra rin’ ni aray rogon, ma aram e ra magey e salpiy ni ayuw ni ngan toy boch e Tagil’ e Liyor ngay u ga’ngin yang e fayleng, ara ni fal’eg e gin ni ke kireb riy.

19. Mang e rayog ni ngam fil ko n’en ni buch rok e en ni ma lekag e ulung nge ppin rok?

¹⁹ Piin ni yad ma maruwel nib gel ni fan ngodad. Nap’an ni gad ra pining e magar ngak be’, ma thin rodad e rayog ni nge thilyeg rogon ni be lemnag facha’ e magawon ni be mada’nag. Am lemnag e n’en ni buch rok be’ ni ma lekag e ulung nge ppin rok. Reb e rran u tomuren ni kar machibgow u fithik’ e garbeb, ma aram mar sulow nga tabinaw ni ke aw parowrow. Rib gel e garbeb ko re gin nem, ya mol fare pin ni ke chuw nga madan e ulum. Nap’an ni kakadbul, me yog ngak figirngin ndabkiyog rok ni nge rin’ e re maruwel ney ni yibe lekag e ulung. Re kadbul nem, me yib bangi babyor ni ke pi’ e branch ofis ni fan ko fare walag nib pin. U lan e re gi babyor nem e yibe pining e magar ngak ko machib nge athamgil ni be tay, nge feni mo’maw’ rogon nrayog ni nge reb e wik, ma gin ni kan par riy. Ere yog figirngin ni gaar: “Kari felfelan’ ko thin ni bay u lan e re gi babyor nem, ma aram e dakuriy ba ngiyal’ ni yog ndabki un ko re maruwel ney ni ngan lekag e ulung. Bin riyul’ riy e, bay in yay ni ke pi’ e athamgil nga lanin’ug ni nggu ulul ko re maruwel ney u nap’an nra gu lemnag ni nggu tal.” Re wu’ i mabgol ney e ke gaman 40 e duw nra lekag e ulung.

20. Mang e susun ni ngad gayed rogon ni ngad rin’ed ni gubin e rran, ma mang fan?

²⁰ Manga yigi gubin e rran, ma gad gay rogon ni nge m’ug ko ngongol nge thin rodad nib ga’ fan u wan’dad e tin ni yima rin’ ni fan ngodad. Thin ni gad ma yog ni ke yib u gum’ircha’dad ara tin ni gad ma rin’, e rayog ni ireram e tin nib t’uf rok be’ ni nge ayuweg ko magawon ni be mada’nag, nge mochuch ni be fek e re fayleng ney ngak. Re fayleng ney e ba lich e girdi’ riy ni ma pining e magar, ere faan gad ra pining e magar ngak e girdi’, ma rayog ni nge fal’eg e tha’ u thildad nra par ni manemus. Ma bin th’abi ga’ fan riy, e aram e gad be folwok rok Jehovah ni Chitamangidad nib gol.