1-2. (1) O tamdaw mitokelay micada to maanan? (2) Ngangaˈay pakasoˈlin kita to maanan?

ANO cimato makalimay kaolahen, mitokel masadafdaf ko picada. Ano aecasa pilifok to olah, mararidho a micada to cowa ka sadafdaf, halafinto wa misakahmaw to niyah, awaay ko hatokel wasaan a miharateng.

² Mafanaˈay ci Yihofa, makalimay kita kaolahen, sadafdafen no tao a micada. (ˈOlic 33:5) Pakasoˈlinay kita maolahay ko Kawas kitaanan, mitokelay to masadafdaf ko macadaay ita. Ano songilaˈen ita a micekiw to pakaynian ni Yihofa ci Mosian a rikec, wa mahapinangto. Cowa pilifok kiso to olah ato kaciharateng no tamdaw han? Cowa ka sadafdaf ko macadaay iso han? Nengnengen ko Rikec ni Mosi * samanay paihkal to ciharatengay ci Yihofa to midokoay Cingraanan a tamdaw.

3. (1) Pakayni Loma 13:8-10, ano calepen ita a cipinang ko Rikec ni Mosi, mamahapinang ko maanan? (2) Oniya lalakaw wa pacaˈof to maanan salicay?

³ Ano calepen ita a cipinang to Rikec ni Mosi, mamahapinang to o damsayay ato ciolahay a Kawas ci Yihofa. (ˈOsien ko Loma 13:8-10.) Oniya lalakaw wa milengo to pina limoˈot no Rikec ni Mosi, halo pacaˈof to laenoay salicay: O Rikec ni Mosi hano o olah ko taˈeneran? O rikec hano misaˈicelay to kalimlaan ko masadafdafay? O cifadangalay a tamdaw sasamaan  mitoor to rikec a midemak? O rikec mikiriwiˈay midipot cimaanan? Ano cipinang kita toniya salicay, wa malifok ko sahinom, matongal ko piingid to ciolahay a Wama.​—Dmak 17:27; Loma 15:4.

4. (1) O Rikec ni Mosi hano o olah ko taˈeneran hani? (2) Pakayni Matay 22:36-40, o maanan ko misaˈicelan ni Yis a limoˈot?

⁴ Kihcod a demak ni Yihofa sahto iraay ko olah, mihaenay o Rikec ni Mosi o olah ko taˈeneran. (1 Yohani 4:8) O polong a Rikec patirengan ni Yihofa i fafekang no tosa a limoˈot—maolah to Kawas ato maolah to tamdaw. (Lifi 19:18; Limoˈot 6:5; ˈosien ko Matay 22:36-40.) Mihaenay, o 600 a limoˈot no Rikec ni Mosi padama kitanan mihapinang to olah ni Yihofa. Nengnengen ita ko pina tinakoan.

5-6. (1) Misaaliay ci Yihofa to tamdaw sasamaan micada to raramod hani? (2) Pakayni Rikec ni Mosi, o maanan ko misaaretengan ni Yihofa?

⁵ Madimadi to raramod, midimokos to wawa. Misaaliay ci Yihofa tangongolen ko olah no raramod, tangasa i kapatay ko olah. (Satapangan 2:24; Matay 19:3-6) O maˈaˈodangay a waywayan awaay ko olah, mansa itini moetep a salimoˈot sakapito mikecengay to tamdaw maˈaˈodang. (Limoˈot 5:18) Maˈaˈodangay tamdaw cowa ko ‘pakararaw aca to Kawas’, pakidemay midokaˈ to ramod. (Satapangan 39:7-9) O makoracay a ramod pinapina poloˈ miheca, kamayanho adada ko falocoˈ pakayni pisafelit no ramod.

⁶ Misaaretengay ci Yihofa to, sasamaan micada to ramod, tokel Ningra ngaˈay ko macadaay no Israil a fafahiyan. Ano misaareteng to sarikec ko faˈinay wa maolah to fafahi ningra, cowa ka tano mimingay raraw a malalikong. (Limoˈot 24:1-4; Matay 19:3, 8) Kawra, ano mafekad ko pakidemay a pasangaray, sapilikongaw ko faˈinay to fafahi, pafelienho ko fafahi to malalikongayto a wacay. Oniya wacay wa midipot to fafahiyan, caka maeko no tao to maˈodangay cingra. Roma i, oniya malalikongay a wacay edengan mikitini i malohomay malitengay no niyaroˈ a micada, mihaen ngaˈ, wa padamaen no malohemay malitengay milidong to raramod nangra. Alatek roma faˈinay tano tekedan lalangian sapilikongaw to fafahi, soˈlin cowa piconged ci Yihofa toniya demak, kawra maˈaraway Ningra ko losaˈ no kasiniˈadaan a fafahi, mahecaday ko adada no falocoˈ Ningra.​—Malaki 2:13-16.

7-8. (1) Misaaliay ci Yihofa to wama wina misamaan ko demak? (Nengnengen ko papotalay coka) (2) O maanan ko mananamay ita?

⁷ Pakayni Rikec ni Mosi mahapinangay ita, ciharatengay ci Yihofa to lipahak ato dipayal no wawa. Palimoˈotay ci Yihofa to wama wina midimokos to saali no wawa, padama cangranan malo widang no Kawas. Padama cangranan cipinang ato misaareteng to sarikec ni Yihofa, maolah ci Yihofaan. (Limoˈot 6:6-9; 7:13) Hano mafanaˈ kita to misaaretengay ci Yihofa to pihaen no wama wina to demak hani? Samanen o roma Israil tamdaw tano kaˈangian a pakayraan ko picada to wawa, teloc i, misayfangan ni Yihofa cangra. (Yirimiya 7:31, 33) Caka ngaˈay hawaden mirikec anca mikariˈang to wawa, o mikitiniay ci Yihofaan a kalimlaan a hafay han ko pinengneng to wawa, ka olahen cangra.​—ˈOlic 127:3.

⁸ O maanan ko mananamay ita? Misinanotay ci Yihofa samaanay ko mararamoday macacada, misaaliayho to wama wina mikaolah to wawa, wa pasowal cangra ci Yihofaan to samanay ko niyah micada to wawa.

9-11. Hano milasil ci Yihofa to aka maˈanof a sarikec hani?

⁹ Aka maˈanof. Saikor no 10 a sarikec  mikecengay to tamdaw maˈanof, mikeceng to maˈanof a maˈinal to cowa ko niyah a dafong. (Limoˈot 5:21; Loma 7:7) Milasil ci Yihofa toniya rikec o papasifanaˈ to finawlan Ningra to kalimlaan a kimad—dipoten ko falocoˈ ato harateng no niyah. Mafanaˈay ko Kawas, o mararaway harateng ato coos mikayatay to tamdaw midemak to tatiihay. (Taneng 4:23) Ano pakiyadi han ko mararaway a coos lomahad i falocoˈ no Israil tamdaw, wa cato ka tano olah micada to tao. Na mararaway ci Tafiti to hatiniay a raraw. O moecelay a tamdaw cingra, kawra kinacecayay maˈinalay to fafahi no tao, telocto taˈangayay ko raraw. (Yakop 1:14, 15) Mararaway ci Tafiti to maˈodangay, milipalawayho to faˈinay no tao, mihalaka mipatay to ˈorip ningra.​—2 Samuil 11:2-4; 12:7-11.

¹⁰ Pafeselay ko pinengneng ni Yihofa to falocoˈ no tamdaw, ato o cima ko misafelitay to “aka maˈanof” a sarikec. (1 Rayray 28:9) Mikecengay ko rikec to maˈanofay, pasifanaˈay to finawlan no Kawas, aka ira ko mamikayat to sakararawaw a harateng nangra. Mahapinangay ita, tada citanengay ato ciolahay ci Yihofa!

¹¹ O maanan ko mananamay ita? Cowa ko waywayan aca, misaaretengan ni Yihofa ko ikemoday falocoˈ ita. (1 Samuil 16:7) Ihkalay ko kafanaˈ ni Yihofa to harateng, falocoˈ ato waywayan no mita. Mikilimay to kangaˈayan ita padama kitaanan matatodong ko demak, mitokelay Cingra mahapinang to icowaay ko mararaway harateng no niyah, misaˈicel miwanik to tatiihay harateng, ho eca ka mararaw ko waywayan.​—2 Rayray 16:9; Matay 5:27-30.

12. Rikec ni Mosi misaˈicelay to maanan hani?

¹² Rikec ni Mosi misaˈicelay to maolahay ci Yihofa to masadafdafay. (ˈOlic 37:28; Isaya 61:8) Malefotay ko taˈarawan ni Yihofa, pasifanaˈ kitaanan tano masadafdafay micada to tamdaw. Ano midofdof ko Israil tamdaw to Rikec ni Mosi a dademak, wa palemeden ni Yihofa cangra, ano eca pidofdof to moecelay a palinian no Kawas, wa maroray ko kaˈorip nangra. Dotocto nengnengen ita ko roma tosa a sarikec.

13-14. (1) Salakatay tosa no 10 sarikec, misaˈosiay to Israil tamdaw to manan? (2) Ano midofdof cangra toniya tosa sarikec, wa macada ko manan a epoc?

¹³ Misacecay maolah ci Yihofaan. Salakatay tosa no 10 sarikec misaˈosiay to edengan ci Yihofa ko dadokoen no Israil tamdaw, mirikec cangranan aka midoko to samiyay. (Kasadakan 20:3-6) Milasil ci Yihofa toniya sarikec cowa ko saka ciepoc no Niyah, pakayniay saka ciepoc no finawlan Ningra. Ano madimadi ko Israil tamdaw ci Yihofaan, polong no kitakit lomahaday a macowat, ano midoko cangra to makaniway kawas, tahalifaay to adihayay a roray.

¹⁴ O Kanan tamdaw cowa pidoko to maˈoripay a Kawas, midokoay to awaay ko ˈorip a samiyay, mahecaday o miripaˈay to pising no niyah. (ˈOlic 115:4-8) O lisin nangra mahawpay ko kaackan madadiˈiyay a waywayan, ato mitodoh to wawa a patoˈaya. Ano mahecad cangra to Kanan tamdaw, caka pisikor ci Yihofaan midoko to samiyay, o midokaˈay to paro no lomaˈ, mifalah to pising no niyah. (2 Rayray 28:1-4) O roma, cifadangalay a Israil tamdaw cowa pidofdof to moecelay palinian ni Yihofa, mikasimaan to fadangalan, misamsam to malonayay. (Icikil 34:1-4) Mirikecan ni Yihofa ko Israil tamdaw, wa patado Cingra a misawkit, misayfang to mikariˈangay to pakoyocay ato maponengay. (Limoˈot 10:17, 18; 27:19) Kawra ano madimadi cangra to Kawas, masadafdaf ko picada to tao, wa palemeden no Kawas cangra.​—1 Hongti 10:4-9.

15. Samaanay a Kawas ci Yihofa, mananamay ita ko maanan?

 ¹⁵ O maanan ko mananamay ita? Ano caka pidofdof ko salikaka to palinian no Kawas a midokaˈ kitaanan, kita i, hamaan miroroh ci Yihofaan. Maolahay ci Yihofa kitaanan, mafanaˈay to cowa ka sadafdaf ko macadaay ita. Marocekay ko kafanaˈ ni Yihofa to roray ita, mataˈlifay to kafanaˈ no wina to roray no wawa. (Isaya 49:15) Soˈlin cowa ko tatangsol Cingra a midemak, kawra ano maraod ko misaˈosian a toki, wa sawkiten Ningra ko mikariˈangay to tao cowa pasasiyor a tamdaw.

16-18. O Rikec ni Mosi mahawpay ko maanan? O maanan ko mananamay ita?

¹⁶ O Rikec ni Mosi mahawpay ko polong no kaˈorip no Israil tamdaw, masakalimlaan tano masadafdafay ko pisawkit no malohemay malitengay. Cowa ko midokoay aca to Kawas a demak, misaysayho to lacongis ato mararaway a demak. Nengnengen ita ko laenoay tinakoan.

¹⁷ Ano mipatay to tamdaw, cowa ko tatangsol a sawkiten mipatay. Wa mikadkad ko malohemay malitengay toniya demak, ikor ngaˈ misawkit to papatayen hokira. (Limoˈot 19:2-7, 11-13) Misawkitho ko malohemay malitengay to polong a demak i nokaˈorip, misaysay tono paycian ato pasangaray no raramod. (Kasadakan 21:35; Limoˈot 22:13-19) Ano masadafdaf ko pisaysay, midofdof ko Israil tamdaw to sarikec, wa ciepoc ko polong a tamdaw paˈdil ci Yihofaan.​—Lifi 20:7, 8; Isaya 48:17, 18.

¹⁸ O maanan ko mananamay ita? Mitokelay ci Yihofa tano olah ato masadafdafay micada to tamdaw i nokaˈorip. Misinanotay Cingra to sasowalen ato waywayan ita, mafanaˈay tono tekedan a demak ita.​—Hipray 4:13.

19-21. (1) O malohemay malitengay no Israil ato misawkitay sasamanen micada to finawlan no Kawas? (2) O Rikec ni Mosi samanay midipot to kahacecay tamdaw masadafdaf ko macadaay hani? O maanan ko mananamay ita?

¹⁹ Cowa pitokel ci Yihofa mafiyor no taliyokay kitakit ko finawlan Ningra, mansa misaaliay Cingra to malohemay malitengay ato misawkitay midofdof to Rikec ni Mosi halo masadafdafay ko pisawkit. Ano misaysay to demak i, aka mariˈang a mitoor to harateng no niyah, o papaihkalen ko olah ato masadafdafay.​—Limoˈot 1:13-17; 16:18-20.

²⁰ Matomesay to siniˈada ci Yihofa to finawlan Ningra, mansa pafeli to sarikec hongaˈay masadafdaf ko macadaay no kahacecay tamdaw. Tinakoen, midipotay ko sarikec to tamdaw caka mapatelas a makokot no tao. O mapakokotay tamdaw iraay ko fadangalan mafanaˈ to cima ko mikokotay cingranan. (Limoˈot 19:16-19; 25:1) Roma, awaawasa tatosa ko misawacayay tamdaw, ngaˈ masaˈosi ko raraw no makokotay. (Limoˈot 17:6; 19:15) Ano cecay ko pakaˈaraway to raraw, soˈlin cowa  ko mamasaˈosi ko raraw, kawra wa maliyas ko raraw no niyah cowa ka saan, samanen mafanaˈay ci Yihofa to raraw ningra. Roma pakayraan, soˈlin ira ko fadangalan no wama mikayat to paro no lomaˈ, citolasay ko fadangalan ningra. O pasangaray no paro no lomaˈ misaaliay to pisaysay no malohemay malitengay, o cangra ko mamihererek a misawkit.​—Limoˈot 21:18-21.

²¹ O maanan ko mananamay ita? Kihcod a demak ni Yihofa o masadafdafay, patirengay to malefotay taˈarawan ita. (ˈOlic 89:14) Wa palifonen Ningra ko madimadiay midofdof to palinian Ningra a tamdaw, wa mitefoc to kasimaanay misaka dademak to fadangalan a tamdaw. (2 Samuil 22:21-23; Icikil 8:9, 10) O roma tamdaw mararaway ko demak, cowa picada to sasayfang. Kawra, ano maraod ko misaˈosian ni Yihofa a toki, oha sasawkiten Ningra. (Taneng 28:13) Ano eca ka pasasiyor ko mararaway tamdaw, maraod ko toki wa mafanaˈto cangra, “Tada o katalawan ita ko nipitefoc no maˈoripay a Kawas i titaanan.”​—Hipray 10:30, 31.

22-24. (1) O Rikec ni Mosi mikiriwiˈay midipot cimaanan hani? (2) Pakayni ci Yihofaan mananamay ita ko maanan? (3) Pakayni Kasadakan 22:22-24, mihadakay ci Yihofa to maanan a sarikec?

²² O Rikec ni Mosi mikiriwiˈay midipot to awaay ko ˈicel midipot to niyah a tamdaw, tinakoen o pakoyoc, maponengay, pacarcaray a tamdaw. O misawkitay no Israil “aka pisamsam  to pacarcaray a maroˈ i tamowanan a tamdaw ato pakoyoc. Aka piala to rikoˈ no maponengay to malo sapatampo ningra.” (Limoˈot 24:17) Ciharatengay ci Yihofa to poeneray ko saaroˈan a tamdaw. Ano mikariˈang to hatiniay tamdaw, o sasayfangen ni Yihofa.—ˈOsien ko Kasadakan 22:22-24.

²³ Pakayni pidipot to paro no lomaˈ miliyas to maˈodangay a demak, o Rikec ni Mosi mikecengay to madadiˈiay ko paro no lomaˈ sanay a demak,. (Lifi 18:6-30) I taliyokay no Israil a kitakit micada a pakiyadi sanay to hatiniay a demak, kawra pahecaden no Israil tamdaw ci Yihofaan a miˈinteh to kaackan a demak.

²⁴ O maanan ko mananamay ita? Misaaliay ci Yihofa to cifadangalay tano olah a micada to midimokosan nangra a tamdaw. Ci Yihofa makalimay midipot to finawlan no Niyah, mansa ˈintehay to maˈodangay a raraw, mangalef ko poeneray ko saaroˈan a tamdaw, mitokelay ci Yihofa masadafdaf ko macadaay nangra.

25-26. (1) Tadtaden ko kalaliting no olah ato masadafdafay. (2) O dotoc noniya madadoedoay a lalakaw wa milengo to maanan?

²⁵ O olah ato masadafdafay mahecaday o ˈorip ato selaˈ, cowa ka ngaˈay palicinowasen. Ano pakasoˈlin kita tatano masadafdafay ko picada ni Yihofa kitaanan, matongal ko kaolah ita Cingraanan. Roma, maolah kita ci Yihofaan ato moecelay palinian Ningra, wa maolah to tao a tano masadafdafay a micada cangraanan.

²⁶ Israil tamdaw pakayniay sakiˈok no Rikec ni Mosi patireng to kalawidang ci Yihofaan. Kawra ikor no palaˈosien ni Yis ko Rikec i, cowato ko mamidofdof to Rikec ni Mosi, o malifokay nangra o mikikakaay ko ngaˈay a limasmas. (Loma 10:4) Sowal ni Pawlo, o Rikec ‘o ˈadingo no makapahay limasmas no ikor,’ sanay. (Hipray 10:1) O dotoc noniya madadoedoay a lalakaw wa milengo, oniya makapahay limasmas mahawpay ko maanan, ato kalimlaan ko olah ato masadafdafay i kasakopang no Krisciyang.