1-2. (1) ?Ngue yɛ e kwlakwla e kunndɛ-ɔ? (2) ?Ngue yɛ e kwla lafi su-ɔ?

E KWLAKWLA e kunndɛ kɛ e wiengu’m be klo e yɛ be bu e sran. Ɔ maan, sɛ e wun kɛ be kloman e naan be bu e lufle titi’n, e sa sin kwla bubu e. Kpɛkun e su buman e wun sran.

² Zoova si kɛ e klɔ sran mun e kunndɛ klolɛ nin sa nga be yo i i nuan su’n. (Jue. 33:5) E kwla lafi su kɛ e Ɲanmiɛn klo e tankaan kpa, yɛ ɔ kloman kɛ be bu e lufle. I sɔ liɛ’n i ɲin fite Mmla nga Zoova maan Moizi klɛ mannin Izraɛli nvle’n, i nun. Sɛ amun wiengu’m be bu amun lufle annzɛ be kloman amun sa naan i sɔ’n ti’n amun fɛ’n, maan amun fa amun ɲin sie i Moizi Mmla’n * su. I liɛ’n amún wún kɛ Zoova niɛn i sufuɛ’m be lika.

3. (1) ?Kɛ nga Rɔmunfuɛ Mun 13:8-10 fa kan sa’n, kɛ e fa e ɲin e sie i Moizi Mmla’n su kpa’n, ngue yɛ e wun i wlɛ-ɔ? (2) ?Kosan benin mun yɛ é wá wún be su tɛlɛ’n like suanlɛ nga nun-ɔn?

³ Kɛ e fa e ɲin e sie i Moizi Mmla’n su kpa’n, e wun kɛ Zoova klo sran dan. (An kanngan Rɔmunfuɛ Mun 13:8-10 nun.) Like suanlɛ nga nun’n, é wá fá e ɲin síe i mmla sɔ’m be nun wie’m be su. Kpɛkun, é tɛ́ kosan nga’m be su: ?Ngue ti yɛ e kwla se kɛ Mmla sɔ’m be taka Ɲanmiɛn nin sran klolɛ su-ɔ? ?Ngue ti yɛ e kwla se kɛ Mmla’n wla e fanngan kɛ e yo sa i nuan su-ɔ? ?Wafa sɛ yɛ ɔ fata kɛ be nga be le kwlalɛ’n be nanti Mmla’n su-ɔ? ?Sran akpasua benin mun yɛ Mmla’n sasa be kpa-ɔ? Kosan fanunfanun  sɔ’m be su tɛlɛ’n kwla wla e fanngan. Kpɛkun, ɔ́ yó maan e wla gúa ase, yɛ é fá e wun mántan e Si Ɲanmiɛn kpa.—Yol. 17:27; Rɔm. 15:4.

4. (1) ?Ngue ti yɛ e kwla se kɛ Moizi Mmla’n taka klolɛ su-ɔ? (2) ?Kɛ nga Matie 22:36-40 fa kan sa’n, mmla benin mun yɛ Zezi fa e ɲin sie su-ɔ?

⁴ E kwla se kɛ Moizi Mmla’n taka klolɛ su. Afin, like kwlaa nga Zoova yo’n, ɔ yo i klolɛ su. (1 Zan 4:8) Mmla kwlaa nga Zoova mannin’n yo maan e klo Ɲanmiɛn nin sran. (Sau. 19:18; Mml. 6:5; an kanngan Matie 22:36-40 nun.) Mmla 600 tra su nga Zoova fa mannin Izraɛlifuɛ’m be kwlakwla be yi i nglo kɛ Zoova klo sran. Maan e fa e ɲin e sie i be nun wie’m be su.

5-6. (1) ?Ngue yɛ Zoova kunndɛ kɛ yasua kun nin i yi be yo-ɔ? (2) ?Ngue su yɛ ɔ fɛ i ɲin sie-ɔ? An fa sa kun yiyi nun.

⁵ Nán e kunndɛ bla e yi bo, annzɛ bian e wun bo. Yɛ e nian e mma’m be lika. Zoova kunndɛ kɛ yasua kun nin i yi be klo be wun lelee saan wie’n, yɛ ɔ titi be nun-ɔn. (Bob. 2:24; Mat. 19:3-6) Be yi bo bla kunndɛlɛ’n annzɛ be wun bo bian kunndɛlɛ’n ti sa tɛ dan. Mmla’n i nso su’n, ɔ kle sɔ weiin. (Mml. 5:18) Sran ng’ɔ yo sɔ’n, nn w’a ‘wɔ Ɲanmiɛn i safle.’ Kpɛkun ɔ yo i wiengu kun’n i abɔlɛ tɛ kpa. (Bob. 39:7-9) Sran nga be yoli i sa’n, i awlɛn kwla kpɔtɔ i klun cɛ kpa.

⁶ Zoova fɛ i ɲin sie i wafa nga yasua kun nin yi be tran’n su kpa. Ɔ klo kɛ Izraɛlifuɛ’m be nian be yi’m be lika kpa. Izraɛlifuɛ ng’ɔ nanti Mmla’n su’n, ɔ́ kló i yi’n, yɛ ɔ su yrɛmɛn i sa ngbɛn wie ti. (Mml. 24:1-4; Mat. 19:3, 8) Sanngɛ, sɛ ndɛ cinnjin wie ti ɔ yrɛ i’n, maan ɔ klɛ fluwa wlɛ i sa nun kɛ w’a yrɛ i. I liɛ’n, be su tɔnman bla’n i suɛn kɛ w’a kunndɛ bian i wun bo. Sanngɛ, kwlaa naan yasua’n w’a fɛ i yi’n i yralɛ fluwa’n w’a mɛn i’n, ɔ fata kɛ ɔ ko wun klɔ’n su kpɛnngbɛn’m be wun. Blɛ sɔ nun’n, be kwla fa ajalɛ kɛ bé síesíe yasua’n nin i yi’n, be afiɛn. Sɛ Izraɛlifuɛ kun bɔbɔ i ɲinfu yrɛ i yi’n, Zoova miɛnmɛn i kɛ ɔ fɛ i kekle nun. Sanngɛ, Zoova i ɲin su kpaman bla’n i sunlɛ nin i kokolɛ’n su.—Mal. 2:13-16.

7-8. (1) ?Ngue yɛ Zoova kunndɛ kɛ siɛ nin niɛn’m be yo-ɔ? (2) ?Ngue yɛ ndɛ sɔ’n kle e-ɔ?

⁷ Mmla’n kle ekun kɛ ba kanngan’m be ndɛ lo Zoova. Zoova kunndɛ kɛ siɛ nin niɛn’m be nian be mma’m be lika kpa. Ɔ klo kɛ be kle be like naan be klo i nin i mmla mun. I liɛ’n, be nin i be afiɛn kwla mantan kpa. (Mml. 6:6-9; 7:13) Sa nga ti yɛ Zoova tuli Izraɛli nvle’n be fɔ kekle kpa’n, i kun yɛle kɛ be kleli be mma’m be ɲrɛnnɛn dan. (Zer. 7:31, 33) Ɔ fata kɛ siɛ nin niɛn’m be wun i wlɛ kɛ ba’m be ti kɛ like nanndoliɛ kun mɔ Zoova fa wlali be sa nun kɛ be niɛn i lika’n sa. I sɔ’n ti’n, ɔ fataman kɛ siɛ nin niɛn’m be yo be mma’m be finfin.—Jue. 127:3.

⁸ Like nga ndɛ sɔ’n kle e’n: Zoova fɛ i ɲin sie i wafa nga yasua kun nin yi be tran’n su kpa. Ɔ kunndɛ kɛ siɛ nin niɛn’m be klo be mma mun. Sɛ be yo be mma’m be tɛtɛ’n, Zoova nin be le i.

9-11. ?Ngue ti yɛ Zoova seli Izraɛlifuɛ’m be kɛ nán be ɲin blo sran like su-ɔ?

⁹ Nán e ɲin blo sran like su. Mmla blu’n i nun kasiɛn’n, se kɛ nán e ɲin blo sran like su. (Mml. 5:21; Rɔm. 7:7) Zoova si kɛ sran i awlɛn’n nun yɛ sa tɛtɛ kwlaa fin-ɔn. I sɔ’n ti’n, ɔ mɛnnin i nvle nunfuɛ’m be mmla naan be nian be wun su. I liɛ’n, be akunndan su  tranman like ng’ɔ ti tɛ’n su. (Nya. 4:23) Sɛ Izraɛlifuɛ kun w’a niɛnmɛn i wun su naan i akunndan’n tran like tɛ wie su’n, ɔ cɛman naan w’a bu i wiengu lufle. I sɔ sa yɛ ɔ juli Famiɛn Davidi su-ɔ. Famiɛn Davidi ti sran kpa. Sanngɛ cɛn kun’n, i ɲin bloli i wiengu kun i yi’n su. I sɔ’n ti’n, ɔ yoli sa tɛ. (Zak. 1:14, 15) Ɔ nin bla sɔ’n be lali. Kɛ bla’n wunnzɛli’n, i waan ɔ́ yó naan bla’n i wun’n, ɔ bu i kɛ i yɛ ɔ wunnzɛli i yi’n niɔn. Kɛ mɔ i sɔ’n w’a yoman ye ti’n, ɔ yoli maan be kunnin bian’n.—2 Sam. 11:2-4; 12:7-11.

¹⁰ Sɛ Izraɛlifuɛ kun i ɲin blo sran like su’n, Zoova si nun. Afin ɔ nian sran’n i awlɛn nun yɛ ɔ si i klun akunndan’n kwlaa. (1 Nyo. 28:9) Sɛ Izraɛlifuɛ’m be nanti Zoova i mmla’m be su naan be ɲin w’a bloman be wiengu like su’n, be su buman akunndan tɛ. Ɔ maan be su yoman sa tɛ. I sɔ’n kle kɛ e Si Ɲanmiɛn Zoova si ngwlɛlɛ dan naan ɔ klo sran.

¹¹ Like nga ndɛ sɔ’n kle e’n: Zoova si sran wafa nga sran kun ti’n, ɔ si akunndan ng’ɔ bu’n, nin like ng’ɔ o i awlɛn’n nun. (1 Sam. 16:7) Like fi timan fiawa Zoova i ɲrun. Ɔ fɛ i ɲin sie i like nga e yo m’ɔ ti kpa’n su. Sanngɛ ɔ kunndɛ kɛ e bɔbɔ e sie akunndan tɛtɛ nga be ba e ti nun’n be nzɔliɛ, naan e kpalo be ndɛndɛ. I liɛ’n, e su yoman sa tɛ.—2 Nyo. 16:9; Mat. 5:27-30.

12. ?Ngue yɛ Moizi mmla’n kle e-ɔ?

¹² Moizi mmla’n kle e kɛ Zoova klo sa nga be yo i nuan su sɛsɛsɛ’n. (Jue. 37:28; Eza. 61:8) Zoova bɔbɔ kle e wafa ng’ɔ fata kɛ e nin e wiengu mun e tran’n i kpa. Kɛ Izraɛlifuɛ’m be nanti Mmla’n su’n, ɔ yra be su. Sanngɛ, kɛ be nantiman su’n, be wun be ɲrun. Maan e fa e ɲin e sie i Mmla blu’m be nun nɲɔn su.

13-14. (1) ?Ngue yɛ Mmla blu’m be nun klikli nɲɔn’m be waan Izraɛlifuɛ’m be yo-ɔ? (2) ?Kɛ be nanti mmla sɔ’n su’n, i su ye benin yɛ be ɲɛn i-ɔ?

¹³ Maan e su Zoova kunngba cɛ. Mmla blu’m be nun klikli nɲɔn’m be waan ɔ fata kɛ Izraɛlifuɛ’m be su Zoova kunngba cɛ, yɛ nán be koto like wie fi bo. (Tul. 20:3-6) Nán Zoova bɔbɔ liɛ ti yɛ ɔ mannin mmla sɔ mun-ɔn. Izraɛlifuɛ’m be kpa yolɛ ti-ɔ. Afin kɛ be nin Zoova be nanti klanman titi’n, be liɛ yo ye. Sanngɛ kɛ be sɔ nvle nga be o be wun lɛ’n be amuin mun wie’n, be wun be ɲrun dan kpa.

¹⁴ Kɛ Kanaanfuɛ’m be yacili Ɲanmiɛn lɛ mɔ be sɔli amuin’n, be yoli wannzo. (Jue. 115:4-8) Amuin sɔ’m be sɔlɛ ti’n be kunndɛli bla nin bian sukusuku, yɛ be fali be klun ba be yili tɛ. I wafa kunngba’n, kɛ Izraɛlifuɛ’m be yacili Zoova i sulɛ mɔ be sɔli amuin’n, be yoli wannzo kpɛkun be kleli be awlo nunfuɛ’m be ɲrɛnnɛn. (2 Nyo. 28:1-4) Izraɛli kpɛnngbɛn’m be kusu be yacili Zoova i mmla’m be su nantilɛ. Ɔ maan, be kleli be nvle nunfuɛ’n be ɲrɛnnɛn tɛtɛ kpa. (Eze. 34:1-4) I sɔ’n ti’n, Zoova seli be kɛ ɔ́ wá tú be nga be kle bla nin ba kanngan’m be ɲrɛnnɛn’n, be fɔ kekle kpa. (Mml. 10:17, 18; 27:19) Sanngɛ kɛ Izraɛlifuɛ’m be ɲin yi Zoova mɔ be nin be wiengu’m be tran klanman’n, Zoova yra be su.—1 Fam. 10:4-9.

15. ?Ngue like yɛ sa nga e kannin be ndɛ lɛ’n, be kle e Zoova su-ɔ?

¹⁵ Like nga ndɛ sɔ’n kle e’n: Sɛ e wun kɛ be nga be se be wun kɛ be su Zoova’n, be nantimɛn i mmla’m be su naan be kle  i sufuɛ nanwlɛfuɛ’m be yalɛ’n, ɔ fataman kɛ e fa e ya’n e guɛ i Zoova su. Nán e wla fi su kɛ Zoova klo e. Kɛ be bu e lufle’n, ɔ wun i. Sɛ bla ta kun i wa’n su fɛ’n, ɔ si i aunnvuɛ. Wafa nga Zoova si e aunnvuɛ’n, ɔ tra bla ta’n i liɛ’n. (Eza. 49:15) Zoova su yiman atrɛ naan e su afɛ’m be ka lɛ be wie. Sanngɛ, ɔ́ tú be nga be kle i sufuɛ’m be yalɛ’n, be fɔ kekle kpa blɛ ng’ɔ ti su’n, i su.

16-18. (1) ?Ngue ndɛ yɛ Moizi Mmla’n kan-ɔn? (2) ?Ngue like yɛ Mmla sɔ’n kle e-ɔ?

¹⁶ Moizi Mmla’n kan sa ng’ɔ fata kɛ Izraɛlifuɛ kun yo’n, ɔ nin ng’ɔ fataman kɛ ɔ yo’n, be ndɛ. Ɔ maan, ɔ fata kɛ nvle’n i su kpɛnngbɛn’m be di Zoova i sufuɛ’m be jɔlɛ kɛ ɔ nin i fata’n sa. Sɛ Izraɛlifuɛ kun fɔn Zoova wun’n, annzɛ sɛ ndɛ tɔ ɔ nin sran uflɛ be afiɛn’n, annzɛ ɔ yo i wiengu i like yaya’n, nvle’n i su kpɛnngbɛn mun yɛ ɔ fata kɛ be kan ndɛ’n niɔn.

¹⁷ I wie yɛle kɛ sɛ Izraɛlifuɛ kun, ɔ kun sran’n, be kaman lɛ be kunmɛn i wie. Klɔ’n su kpɛnngbɛn’m be dun mmua usausa nun kpa. I liɛ’n, sɛ ɔ fata kɛ be kun i wie’n, yɛ bé kún i-ɔ. (Mml. 19:2-7, 11-13) Sɛ ndɛ tɔ yasua kun nin i yi be afiɛn annzɛ sran kun saci i wiengu kun like’n, klɔ’n su kpɛnngbɛn mun yɛ be siesie-ɔ. (Tul. 21:35; Mml. 22:13-19) Kɛ klɔ’n su kpɛnngbɛn’m be di nanwlɛ’n, mɔ Izraɛlifuɛ’m be nanti Mmla’n su’n, be ngba be ɲan su ye. Yɛ Zoova kusu ɲan kɔmin.—Sau. 20:7, 8; Eza. 48:17, 18.

¹⁸ Like nga ndɛ sɔ’n kle e’n: Zoova fɛ i ɲin sie i like kwlaa nga e yo’n su. Ɔ kunndɛ kɛ e yo sa’n i nuan su yɛ e nin e wiengu mun e tran klanman. Kpɛkun ɔ fɛ i ɲin sie i ndɛ nga e kan’n nin like nga e yo be nvialiɛ nun’n, be su wie.—Ebr. 4:13.

19-21. (1) ?Wafa sɛ yɛ klɔ’n su kpɛnngbɛn nin jɔlɛ difuɛ’m be nian Zoova i sufuɛ’m be lika-ɔ? (2) ?Ngue yɛ Zoova yoli naan b’a bumɛn i sufuɛ’m be lufle-ɔ? (3) ?Ngue yɛ i sɔ’n kle e-ɔ?

¹⁹ Zoova kunndɛ kɛ ɔ́ sɛ́sɛ́ i sufuɛ mun naan nvle nga be bo sin yia be’n, be ayeliɛ tɛtɛ’n w’a saman be. I sɔ’n ti’n, ɔ kunndɛ kɛ, kɛ klɔ’n su kpɛnngbɛn nin jɔlɛ difuɛ’m bé kán ndɛ’n, be jran Moizi Mmla’n su. Yɛ kɛ bé kán ndɛ’n, nán be yo sran’m be finfin. Sanngɛ maan nanwlɛ dilɛ’n yo be fɛ.—Mml. 1:13-17; 16:18-20.

²⁰ Zoova si i sufuɛ’m be aunnvuɛ. I sɔ’n ti yɛ ɔ mannin be mmla wie mun naan b’a buman be wiengu lufle-ɔ. I wie yɛle kɛ Mmla’n ti’n, Izraɛlifuɛ’m be tɔnman be wiengu suɛn ngbɛnngbɛn. Yɛ sɛ Izraɛlifuɛ kun tɔn i wiengu kun i suɛn’n, ɔ fata kɛ be nɲɔn’n, be ɔ jɔlɛ difuɛ’m be ja su naan be ko kɛn i sɔ ndɛ’n. (Mml. 19:16-19; 25:1) Sɛ be fa sran kun kɔ jɔlɛ difuɛ’m be ja su’n, kwlaa naan b’a bu i fɔ’n,  ɔ fata kɛ i wun lalo difuɛ’m be yo sran nɲɔn. (Mml. 17:6; 19:15) ?Yɛ sɛ Izraɛlifuɛ kun yoli sa tɛ naan sran kunngba yɛ ɔ wunnin i nin? Ɔ kwlá seman kɛ w’a fite nun. Afin Zoova wunnin sa tɛ ng’ɔ yoli’n. Kannzɛ awlobo kpɛn’m be le kwlalɛ’n, sanngɛ Zoova w’a manman be atin kɛ be yo like ngba. Ɔ ju wie’n, kɛ ndɛ tɔ awlobo kun nun’n, be fa ndɛ’n kɔ klɔ’n su kpɛnngbɛn’m be ja su naan be siesie.—Mml. 21:18-21.

²¹ Like nga ndɛ sɔ’n kle e’n: Zoova yo sa’n i nuan su titi. I lɛ nun’n, ɔ kle e ajalɛ kpa. (Jue. 9:8) Ɔ yo be nga be mian be ɲin be nanti i mmla’m be su’n, be ye. Sanngɛ, ɔ tu be nga be le kwlalɛ mɔ be yo be nga be sie be’n be finfin’n, be fɔ. (2 Sam. 22:21-23; Eze. 9:9, 10) Sran wie’m be yo klunwi sa mun. Yɛ be bu i kɛ b’a ɲan be ti. Sanngɛ Zoova tú be fɔ blɛ ng’ɔ ti su’n, i su. (Nya. 28:13) Sɛ b’a kaciman be nzuɛn’n, ɔ cɛ kan’n, bé wún i wlɛ kɛ ‘sran ng’ɔ tɔ Ɲanmiɛn m’ɔ lafiman’n i sa nun’n, i yako!’—Ebr. 10:30, 31.

22-24. (1) ?Wan mun yɛ Mmla’n sasa be kpa-ɔ? (2) ?Ngue like yɛ i sɔ’n kle e Zoova su-ɔ? (3) ? Afɔtuɛ benin yɛ Ezipt Lɔ Tulɛ 22:22-24 man e-ɔ?

²² Be nga be leman wie mun yɛ Mmla’n sasa be kpa-ɔ. Be nun wie yɛle aika ba mun, angbeti bla mun yɛ aofuɛ mun. Mmla’n se jɔlɛ difuɛ’m be kɛ: “Nán amun bu aofuɛ annzɛ aika ba’n i ndɛ kwlɛ. Nán amun fa angboti bla’n i kondro’n wla aowa.” (Mmla’n 24:17) Zoova kleli kɛ be  nga be wiengu’m be bu be lufle’n, be ndɛ lo i kpa. Kpɛkun ɔ tuli be nga be buli be wiengu’m be lufle’n, be fɔ.—An kanngan Ezipt Lɔ Tulɛ 22:22-24 nun.

²³ Mmla’n tannin Izraɛlifuɛ mun kɛ naan be di plɔplɔ. I sɔ’n ti be sasalɛ. (Sau. 18:6-30) Nvle nga be mantan Izraɛlifuɛ’m be lɛ’n, be bumɛn i kɛ plɔplɔ dilɛ’n ti sa tɛ. Sanngɛ Zoova i sufuɛ’m be liɛ’n, akunndan nga Zoova bu’n, i wie yɛ ɔ fata kɛ be bu-ɔ. Ɔ maan, ɔ fata kɛ be bu plɔplɔ dilɛ’n, i like tɛ.

²⁴ Like nga ndɛ sɔ’n kle e’n: Zoova kunndɛ kɛ be nga be le kwlalɛ’n be klo sran nga be sie be’n. Ɔ bu sa sukusuku kɛ plɔplɔ dilɛ nin gblu tɔlɛ’n, yɛ i wunsu sa wie mun ekun be fɔ. Yɛ ɔ klo kɛ be sasa be nga be leman wie’n. Ɔ kloman kɛ be bu sran lufle.

25-26. (1) ?Ngue ti yɛ e kwla se kɛ klolɛ’n nin sa nuan su sɛsɛ yolɛ’n be kɔ likawlɛ-ɔ? (2) ?Ngue yɛ é wá kɛ́n i ndɛ afuɛ 2019, Mɛ Sasafuɛ Tranwlɛ’n i nun like suanlɛ kun nun-ɔn?

²⁵ Klolɛ’n nin sa nuan su sɛsɛ yolɛ’n be kɔ likawlɛ. Sɛ e yi klolɛ’n i nglo’n, saan é yó sa nuan su. Kɛ e wun i wlɛ kɛ Zoova buman e lufle’n, e klo i kpa tra laa’n. Sɛ e klo Ɲanmiɛn yɛ e yo sa’n i nuan su sɛsɛ’n, é kló e wiengu mun kpɛkun e su buman be lufle.

²⁶ Moizi Mmla’n ukali Izraɛlifuɛ mun naan be nin Zoova be afiɛn w’a mantan kpa. Sanngɛ kɛ Zezi wuli’n, Ɲanmiɛn i sufuɛ’m b’a nantiman Moizi Mmla’n su kun. Like kun m’ɔ le ɲrun kpa’n, yɛ Ɲanmiɛn fa kacili Moizi Mmla’n niɔn. (Rɔm. 10:4) Akoto Pɔlu seli kɛ mmla’n ti “ninnge kpakpa nga bé wá bá’n, be nzɔliɛ.” (Ebr. 10:1) ?Kɛ aniaan’m be klo be wiengu mɔ be yo sa’n i nuan su sɛsɛ asɔnun’n nun’n, wafa sɛ yɛ be ngba be ɲan su ye-ɔ? É wá wún kosan sɔ’n i su tɛlɛ’n afuɛ 2019, Mɛ Sasafuɛ Tranwlɛ’n i nun like suanlɛ kun nun.