1-2. (a) Rosai komarisen ḇesesya sifrur yoḇ ko na? (b) Rosai kokyar kaku na?

KOKAME komarisen snonkaku ḇese siswar ko ma sifrur pyum ko. Rofyor sifrur ker ko rarirya ḇa ido, na kokara sifandun ko ḇa ma koḇesanekar.

² Yahwe ifawi koma komarisen kaku rofyor ono sisya siswar ko ma sifrur pyum ko. (Mz. 33:5) Na kokyar kaku Allah ima iswar ko ma imarisen insama sifrur pyum ko. Komam ido, roi ine nasnai kaku ro Sasoser Yahwe ḇyuk ḇe snonkaku Israel roro Moses i. Inja, rofyor sne Bedi ḇyesneso snar snonkaku ḇese siswar Au ḇa ḇaido sifrur pyum Au ḇa ido, mam kada moḇsa Sasoser Moses * fyasnaibos Yahwe fyandun kaku kawasa Ḇyesi raya.

3. (a) Ro Roma 13:8-10, rosai na kofawi fafisu kofarkor Sasoser Moses ya? (b) Fakfuken risai na neḇekarem ro farkarkor ine?

³ Fafisu kofarkor Sasoser Taurat ḇaido Sasoser Moses, na kofawi Allah koḇedi Yahwe I, iswar kaku ko. (Wasya Roma 13:8-10.) Ro farkarkor ine, na kawos sasoser ḇeḇeso monda Allah ḇyuk ḇe snonkaku Israel sya. Ma na kokarem fakfuken ḇeuser nane: Rosai ḇefasnaiḇair Sasoser Moses ḇyeknam ro saswar ya? Rosai ḇefasnaiḇair Sasoser Moses ikanowser ḇaḇenanapes ya? Rariso ḇena papoik sya sisouser Sasoser Moses i rai? Ma mansei na ḇesmai kaku kadaunwarek ro Sasoser Moses i? Kankarem faro fakfuken anane na nḇuk sneprei ḇe ko, saneraro, ma nafrur fa kofanam syadi ḇe Kma ḇesaswar koḇedi.​—Kis. 17:27; Rm. 15:4.

4. (a) Rosai ḇefasnaiḇair Sasoser Moses ḇyeknam ro saswar ya? (b) Raris ḇeḇefas ro Matius 22:36-40, sasoser rosai Yesus ikofenḇair na?

⁴ Roi Yahwe ifrur nakam ndramuma ro saswar ya. (1 Yoh. 4:8) Inja, Sasoser Moses ḇyeknam ro saswar kako snar ryamuma ro Yahwe I. Ifrur Sasoser Moses nasiper fa neknam ro sasoser ḇeba syadi risuru, isoine saswar faro Allah ma saswar faro snonkaku ḇesesya. (Im. 19:18; Ul. 6:5; wasya Matius 22:36-40.) Inja, na kokyar kaku Sasoser Moses ḇeser sasoser syadi ri 600, oser-oser na fyarkor ko Yahwe saswar Ḇyedi. Mkorama komam conto ḇeḇeso.

5-6. Rosai Yahwe imarisen imbeswa sya sifrur ya, ma rosai Yahwe myam kaku na? Buk contoh.

⁵ Kwain faswef kuker swambri, ma faduru pyum romawa besi. Yahwe imarisen ḇeḇe imbeswa suswaryae su, rirya kaḇrai saswar suḇena nako isof fyoro. (Kej. 2:24; Mat. 19:3-6) Roi ḇeḇyeḇa kaku snonkaku ḇefarḇuk kwar ifrur ḇe suminya iso fyarḇuk wer. Iso eḇedari, sasoser ḇefik ro Sasoser Risamfur idwarek kaku fararur farḇuk. (Ul. 5:18) Ima ”sasar faro Allah” rirya ma roi ḇeḇyeḇa kaku oso ifrur ḇe swari. (Kej. 39:7-9) Sumin ḇefrur sasar oḇa nari sneri iduf kawan kaku snar swari ibur i kwar.

⁶ Yahwe myam kaku moḇsa imbeswa sukenem rai. Ro Israel ḇepon iwara, ḇepon syadi Yahwe imarisen insama eḇe snon sya sifrur pyum binswa sesi. Snonswa ḇesyowi Sasoser Moses nari iswar swari ma iburi ḇa snar knam famfnom monda. (Ul. 24:1-4; Mat. 19:3, 8) Ḇape, samswen ḇeba isya ma snonswa ya imḇe fyaspar swari ido, fandun fa ḇyuk syapram fasaspar ḇe i. Syapram ani na nḇuk fadadiren ḇe eḇe bin ya insama skursof awer ifrur farḇakḇuk famfnom kwar. Osower ido, rofyor snonswa ḇyuk syapram fasaspar ḇaim ḇe eḇe binya, fandun fa ifuken ḇepon faro manfarkin ḇero moḇya. Rarirya, manfarkin sya sna swaf fa sifnoḇek imḇeswa ani insama suḇesisye ḇa. Kakuḇae, fafisu snonswa fyaspar eḇe bin ya snar fyandun mankundi ido, Yahwe na ifrur mnai beri samswen ani ḇa. Ḇape, Yahwe isya myam kankanes mkarui ro binswa ani ma dakḇaḇir kandera ḇyena.​—Mal. 2:13-16.

7-8. (a) Rosai Yahwe dor ro sinan sya? (Mam sonin ḇero ḇarpon.) (b) Farkarkor rosai kun ya?

⁷ Sasoser Moses fyasnaiḇair Yahwe myam ḇaido fyandun romawa sya kako. Imarisen insama sismai aski ma payamyum. Yahwe iwan sinan sya fa sfamfon fandandun romawa sesya ras ḇe ras monda ḇa, mḇoi sifnoḇek si fa sfanam ḇe Allah. Sinan sya fandun fa sḇuk swaf sena fa sifnoḇek romawa sesya infa sesyowi Yahwe Sasoser Ḇyena ma sfarkor si fa siswar I. (Ul. 6:6-9; 7:13) Roi oso eḇedari Yahwe ḇyuk samamyai ḇe snonkaku Israel sya isoine snar sifrur mnis romawa sesya ḇa kaku. (Yer. 7:31, 33) Sinan sya sipok smam awer romawa sesya simnis ra roieḇor sfandun ḇa na ḇaido sifrur mnis na ḇa. Imbape, fandun fa smam romawa sesya raris arasai, ḇaido roi ḇepyum ḇemaeja kaku ḇerama ro Yahwe.​—Mz. 127:3.

⁸ Farkarkor ya: Yahwe myam kaku moḇsa imbeswa sufrur pyumyae su rai. Imarisen sinan sya fa siswar romawa sesi, ma na ḇyemankara sinan sya fyor sifrur pyum romawa sesya ḇa.

9-11. Rosai ḇefnai fa Yahwe ḇyuk sasoser ḇewan snonkaku oso sne ḇyedi ryo snonkaku ḇesesya roi snana awer?

⁹ Kosnemna ndro ḇesesya roi snana awer. Parenta ḇesamfur ro Sasoser Risamfur ikofen snonkaku sya sisnesna ndro snonkaku ḇesesya roi snana awer. (Ul. 5:21; Rm. 7:7) Yahwe ḇyuk sasoser ine fa fyarkor roi ḇefandun kaku oso: Kawasa ḇyesi fandun fa sfaduru sne sena, isoine kakara sena, ma roi sḇaḇir na. Yahwe ifawi  kaku ḇaḇeḇarḇor ndramuma ro swaruser ma sneḇaḇir ḇesasar. (Ams. 4:23) Rofyor snonkaku Israel sisawen roi ḇesasar ḇero swaruser sena ḇa ido, na siswar ma sifrur pyum ḇesesya ḇa. Imnis ra, Raja Daud i, ima snonkaku ḇepyum rirya, mḇoi dakfrur roi ḇesasar. Ḇape ras oso, sne ḇyedi ryo snon oso ḇese swari. Iso eḇedari ifrur roi ḇesasar. (Yak. 1:14, 15) Daud ifrur fararur farḇuk kuker bin ani, ḇarpurya syewar fa dankar bin ani swari, ma myuni.​—2 Sam. 11:2-4; 12:7-11.

¹⁰ Yahwe ifawi roi ḇero snonkaku sya sisnesna. Inja, na ifawi rofyor snonkaku Israel iyuk sasoser ḇewan snonkaku oso sneri ryo snonkaku ḇese roi nyana awer. (1 Taw. 28:9) Sasoser ine fyarkor Allah kawasa Ḇyesi fa sifawi fandun fa sḇinkwanbur kakara na ḇeyun si fa sifrur sasar na. Yahwe ima Kma ḇefawinanem ma ḇesaswar kaku!

¹¹ Farkarkor ya: Yahwe myam ko ro ḇandi monda ḇa. Mboi, Yahwe myam kaku roi ḇero kosnesna dori. (1 Sam. 16:7) Roi oso ḇaberi ḇero kakara koḇena, sneḇaḇir koḇena, ma roi kofrur na nayokef buro Yahwe I ḇa. Isewar rari-rari ḇepyum koḇena ma imarisen fa kofasnai na pdef. Ḇape, imarisen kako fa komamḇir kakara ḇesasar na ma kofara kakara koḇena insama kofrur roi ḇesasar awer.​—2 Taw. 16:9; Mat. 5:27-30.

12. Rosai Sasoser Moses fyarkor ya?

¹² Sasoser Moses fyarkor ko snar Yahwe ima iswar nanapes ya. (Mz. 37:28; Yes. 61:8) Yahwe fyasnai nyan ḇemnis kaku moḇsa ifrur pyum snonkaku ḇesesya kuker nanapes ya. Snonkaku Israel sisouser Yahwe sasoser ḇenapes Ḇyena ido, na ḇyebarakas si. Ḇape, oroḇa ido, na sismai kandera. Mkorama kawos sasoser ḇese risuru ḇero Sasoser Risamfur.

13-14. Rosai sasoser risuru ḇerandak ro Sasoser Risamfur, ma fainda rosai na snonkaku Israel sismai na fyor sisouser na?

¹³ Samsyom faro Yahwe I monda. Sasoser risuru ḇerandak ro Sasoser Risamfur dor kaku snonkaku Israel fa sisyom faro Yahwe I monda ma amfyanir ḇa. (Kel. 20:3-6) Yahwe ifrur parenta anna faro fandun Ḇyena monda ḇa. Imbape, faro faḇaḇye kawasa Ḇyesi. Rofyor sisoasuser Yahwe I pdef ido, sismai payamyum. Ḇape, sisyom allah ḇekaku ḇa er ḇese sisyom na ido, nari sekandera.

¹⁴ Kwarapan snonkaku Kanaan sya. Sisyom amfyanir ḇekenem ḇa, ḇardibur sisyom Allah ḇekaku ma ḇekenem ya. Bon ya iso, sifrur mamyai mankunsi. (Mz. 115:4-8) Ro samsyom sena, sifrur roi ḇeḇyeḇa kaku ma srap romawa sesya ḇe farsarser. Rofyor, snonkaku Israel simewer srower Yahwe I ma skinfir fa sisyom amfyanir ido, sifrur mamyai mankunsi ma sifrur kandera kina sesya. (2 Taw. 28:1-4) Snonkaku Israel ḇena papoik sya spampum sasoser ḇenapes Yahwe Ḇyena. Sḇuk papoik sena kuker nyan ḇesasar fa sifrur samswen snonkaku ḇena roi noḇa sya. (Yeh. 34:1-4) Yahwe ḇyuk swarapepen ḇe snonkaku Israel nari ḇyuk samamyai ḇe snonkaku ḇefrur pyum kabom ma romawa awak sya ḇa. (Ul. 10:17, 18; 27:19) Ḇape, Yahwe na ḇyebarakas kawasa Ḇyesi rofyor sisouser I ma sifrur pyum snonkaku ḇesesya kuker nanapes.​—1 Raj. 10:4-9.

15. Rosai kofarkor ro Yahwe?

¹⁵ Farkarkor ya: Fafisu snonkaku ḇekarem ḇefarmyan ḇe Yahwe mboi isouser sasoser Ḇyena ḇa ma ifrur samswen kawasa Ḇyesi ido, na kopok koḇuk sasar ḇe Yahwe I ḇa. Imḇape, Yahwe iswar ko ma ifawi rofyor ono sisya sifrur pyum ko ḇa.  Yahwe dakḇaḇir saneso koḇena, syadiḇur awin oso ḇeḇaḇir kandera ro kapira ikapar ya. (Yes. 49:15) Imbude na ifrur samswen ya fa imnai beri ḇa. Imbape, ro fafisu dap kwar, nari ḇyemankara snonkaku ḇefrur roi ḇeḇarḇor faro ḇesesya ma ḇemewer ḇemḇror sya.

16-18. Roi risai monda Sasoser Moses fyasos mnis kaku na, ma rosai farkarkor ḇyena ḇe ko?

¹⁶ Sasoser Moses fyasos mnis kaku roi nakam snonkaku Israel sifrur ro ras-ras kankenem sena. Inja, manfarkin sinankow sya fandun fa semankara Yahwe kawasa Ḇyesi kuker nanapes. Suf fakamamar ro ḇar rur ya monda ḇa, boi sifrur mnis famfabri ya ma ḇefrur roi ḇeḇarḇor na. Komam conto ḇeuser nane.

¹⁷ Rofyor snonkaku Israel oso myunbos snonkaku oso, na smuni fa imar beri ḇa. Kota ḇyarek ro ya, manfarkin ḇero diwa sya nari skukeḇ roi ḇeḇesya ani, insape sun snemuk nari sḇuk samamyai marmar ḇe i ke roḇa. (Ul. 19:2-7, 11-13) Ro ras-ras na, manfarkin ansine kako na sakmam asuser roi ḇesena wer. Ono sisya sfamfabri kuker nana sena ḇaido samswen ro farbakḇuk ya ido, nari sawos asuser na fa namnai. (Kel. 21:35; Ul. 22:13-19) Manfarkin sya semankara kuker nyan ḇenapes ma snonkaku Israel sisouser Sasoser Moses ido, na sikame sismai payamyum ya, ma Yahwe snonsnon Ḇyedi ismai sanandik.​—Im. 20:7, 8; Yes. 48:17, 18.

¹⁸ Farkarkor ya: Roi nakam kofrur ro kankenem nama nefandun kaku faro Yahwe. Imarisen fa kofrur pyum snonkaku ḇesesya kuker nyan ḇenapes ma saswar. Ma myam kaku roi kokofen na ma kofrur na, iba syadi wer fyor kemir monda ro rum.​—Ibr. 4:13.

19-21. (a) Rariso manfarkin ma mankara Israel sya semankara Allah kawasa Ḇyesi rai? (b) Rariso Sasoser Moses kyadaundawek Allah kawasa Ḇyesi rai, ma farkarkor rosai kun ya?

¹⁹ Yahwe imarisen kyadaunwarek kawasa Ḇyesi ro awyae ḇeḇyeḇa ro er ḇeḇarek fanam si. Inja, dor manfarkin ma mankara Israel sya fa simbranser Sasoser Moses kuker smarḇak ro bar oser ḇa. Mboi, ḇemankara ansine sipok sirarmomen awer faro Allah kawasa Ḇyesi. Imbape, kuker nyan ḇenapes ma saswar.​—Ul. 1:13-17; 16:18-20.

²⁰ Yahwe iswar kaku kawasa Ḇyesi, inja ifrur sasoser fa nakadaunwarek si ro roi ḇenapes ḇa na. Imnis raris, Sasoser Moses nafnoḇek snonkaku oso insama skur famfnom awer i ro, roi ḇeḇarḇor na. Snonkaku ḇesmai safsof ine nya hak fa fyawi mansei ḇekursof i. (Ul. 19:16-19; 25:1) Ma fyor skur ḇaim i ḇe snonkaku ḇeḇesasarya, fandun fa snonkaku risuru susya fa sukofenḇair kakaku ya. (Ul. 17:6; 19:15) Mḇoi snonkaku Israel oso isya ifrur roi ḇeḇarḇor ma  snonkaku oso monda ḇemami ido, na rariso? Ipok kyara awer snar nari ismai samamyai ro sasar ḇyena ḇa. Yahwe myam rosai ifrur na. Ro kina ya dori, ḇeḇe kma sya siso ḇesmai papoik fa ḇemankara, ḇape nasyadadi ḇa. Imnis raris, parkara ḇeḇeso ḇero kina fandun fa manfarkin kota sya sifawi na, ma manfarkin ansine siso nari ḇeyun snemuk ḇepupes ya.​—Ul. 21:18-21.

²¹ Farkarkor ya: Yahwe ḇyuk farari ḇepyum kaku. Roi ifrur nakam nanapes nairi. (Mz. 9:7) Ḇyebarakas ḇesouser sasoser Ḇyena, ḇape ḇyuk samamyai faro ḇembran sasar papoik sena. (2 Sam. 22:21-23; Yeh. 9:9, 10) Snonkaku ḇeḇeso ḇefrur ḇarḇor sya komam kada rya sismai samamyai ḇa. Ḇape, Yahwe nari ḇyemankara si ro fafisu dap kwar. (Ams. 28:13) Simbror ḇa ido, kerower ”nari simkak namsinḇaḇeri, rofyor sisapi ro Allah ḇekenemya ḇramin ḇyesuya”.​—Ibr. 10:30, 31.

22-24. (a) Mansei ḇepon kaku na ḇesmai kadaunwarek ro Sasoser Moses, ma roi risai kofarkor ro Yahwe I? (b) Swarapepen rosai ḇefas ro Keluaran 22:22-24?

²² Ḇepon kaku ya Sasoser Moses kyadaunwarek snonkaku ḇepok fa ḇekadaunwarek mankundi ḇa, raris ḇeḇe awak sya, kabom, ma kawasa ḇemandaman sya. Allah ikofen faro mankara ḇero Israel sya, ”Rofyor mkoḇemankara snonkaku mandaman ḇaido romawa awak sya, mkopambar awer ḇaḇenanapesya, ma mkoposerbur awer sansun ro kabom oso fa ḇe fadwer roi dun  kwar anna.” (Ul. 24:17) Yahwe fyasnaiḇair saswar Ḇyena faro snonkaku ḇefandun syadi fafnoḇek sya. Ma Yahwe ḇyuk samamyai ḇe snonkaku ḇefrur pyum si ḇa sya.​—Wasya Keluaran 22:22-24.

²³ Sasoser Moses kyadaunwarek ḇero kina sya ro farḇakḇuk ḇemnis ḇa, raris idwarek fararur farbuk rofandu snonkaku ḇeḇe karyer ḇefanam kaku. (Im. 18:6-30) Er-er ḇeḇarek fanam Israel sifrur rarirya ḇa, sima smam monda ḇaido srir kawasa sesi sifrur roi ḇeḇyeḇa nane. Ḇape, Yahwe kawasa Ḇyesya sima smam roi ḇeḇarḇor nane nḇe roi ḇefrur ayin kaku, imnis Yahwe myam na raya.

²⁴ Farkarkor ya: Yahwe imarisen insama snonkaku ḇeyuf fakamamar sya fa siswar ma smamwarek snonkaku ḇero fadadiren sena. Dayin kaku farḇakḇuk famfnom sairirya kam. Ma myam kaku insama ḇefandun fafnoḇek sya sekadaunwarek si kuker nanapes.

25-26. (a) Rosai ḇefnai fa saswar ma nanapes supok suḇesisye ḇa? (b) Rosai na kawos ro farkarkor ḇeuser ya?

²⁵ Saswar ya isyaḇa ido, nanapes ya na isyaḇa kako. Snaro saswar ma nanapes supok suḇesisyeḇa. Kokyar Yahwe ifrur pyum ko kuker nanapes ido, nari koswar kaku I. Ma, rofyor koswar Allah ma sasoser ḇenapes Ḇyena ido, nari nadif ko fa koswar min koḇansi ma kofrur pyum si kuker nanapes.

²⁶ Sasoser Moses nafnoḇek snonkaku Israel sya fa sfanam syadi ḇe Yahwe I. Imbape, fafisu Yesus ḇyeimnis Sasoser Moses kwar, Allah kawasa Ḇyesi fandun fa sisouser na werḇa. Sasoser anna sfadwer na kwar kuker roi ḇepyum syadi. (Rm. 10:4) Manwawan Paulus dap Sasoser Moses ḇe ”nin ro [roi ḇepyum] nari ḇeramaya”. (Ibr. 10:1) Farkarkor ḇeuserya nari kawos roi ḇepyum riḇeso anna, ma rariso saswar ma nanapes fandun kaku ro sidang Kristen.