1-2. (a) Yika yetweswe twakuzanga? (b) Shindakenyo yika mutuhasa kupwa nayo?

TULIESWE twakuzanga hanga akwetu atuzange. Nawa twakuzanga hanga atusolwele ululi. Nyi akwetu mahona kutusolwela zango ni ululi, mutuhasa kulivwa ngwe kutushi ulemu ni kuhona kutalatala.

² Yehova kananyingika ngwenyi, twakufupiwa zango ni ululi. (Samu 33:5) Mutuhasa kupwa ni shindakenyo ngwetu, Zambi yetu kakutuzanga chinji nawa kanazange hanga atusolwele ululi. Chino chakusoloka muze mutuhengwola Shimbi yize Yehova ahanyine kuli A-Izalele kupalikila muli Mose. Nyi wakulivwa ngwe akwenu keshi kukuzanga hanji kukusolwela ululi, tala chize Shimbi * ya Mose yinasolola kulihulumba cha Yehova hali atu jenyi.

3. (a) Ngwe chize analumbununa ha A-Roma 13:8-10, yika twakunyingika nyi twalilongesa Shimbi ya Mose? (b) Yihula yika mutukumbulula ha mutwe uno?

³ Muze twakulilongesa Shimbi ya Mose, twakumona zango lia Zambi yetu, Yehova. (Tanga A-Roma 13:8-10.) Ha mutwe uno mutulilongesaho jimwe shimbi jize ahanyine kuli A-Izalele ni kukumbulula yihula yino: Mumu liaka mutuhasa kwamba ngwetu, Shimbi yakatukile ha zango? Mumu liaka mutuhasa kwamba ngwetu, Shimbi te yakusolola ululi? Kuchi waze te akwete wata atamba kukaula Shimbi? Aya waze Shimbi te yakufunga chinji? Makumbululo a yihula yino mahasa kututakamisa,  kutwaha kutalatala ni kukolesa usepa ni Tata yetu wa zango.—Yili. 17:27; Roma 15:4.

4. (a) Mumu liaka mutuhasa kwamba ngwetu shimbi ya Mose yakatukile ha zango? (b) Kulita ni Mateu 22:36-40, shimbi jika Yesu ashindakenyene?

⁴ Mutuhasa kwamba ngwetu, Shimbi ya Mose yakatukile ha zango, mumu Yehova kakulinga yuma yeswe ni zango. (1 Yoa. 4:8) Shimbi ya Mose yize Yehova ahanyine yinatale ha yikuma yaali yilemu—kuzanga Zambi ni kuzanga mwenyembo we. (Levi 19:18; Shimbi 6:5; tanga Mateu 22:36-40.) Kashika mutuhasa kwamba ngwetu shimbi 600, hita yimwe ha Shimbi jacho yakusolola zango lia Yehova. Tutalenu yimwe yilweza.

5-6. Yika Yehova anazange kuli waze alimbata, nawa yika Yehova ananyingika hali ayo? Hana chilweza.

⁵ Shishika kuli yoze walimbata nenyi, nawa funga kanawa ana je. Yehova kakuzanga hanga waze alimbata alizange chinji umwe ni mukwo. (Uputu. 2:24; Mateu 19:3-6) Utanji uli shili yinene yize yakusolola ngwo yoze wayilinga keshi zango. Kashika shimbi yamuchishimbiali ha Shimbi Kumi yakanjishile utanji. (Shimbi 5:18) Shili yacho yili “kuvulumuna Zambi” nawa yili chuma chipi kuli yoze walimbata nenyi. (Uputu. 39:7-9) Lunga hanji pwo nyi malinga utanji, chino muchihasa kuneha yikola ku mbunge lia mukwo ha miaka yinji.

⁶ Yehova kananyingika chize waze alimbata atamba kutwama umwe ni mukwo. Mu Izalele, iye kazangile hanga malunga atwame kanawa ni mapwo jo. Lunga yoze te wakuvumbika Shimbi te katamba kuzanga mukwo-pwo nawa te katambile kumulakula ha chikuma cheswacho. (Shimbi 24:1-4; Mateu 19:3, 8) Alioze nyi malinga shili yinene, nawa lunga malilakula nenyi, katamba kumwaha mukanda wa kulakula. Mukanda wacho te wakufunga pwo hanga ahone kumusuma mulonga wa utanji. Chikwo nawa, shimbu lunga kanda achihana mukanda wa kulakula kuli mukwo-pwo, iye kota te kakulianga kuhanjika ni makulwana amu mbonge. Hachino, makulwana te kakupwa ni uhashi wakwakwasa hanga afunge ulo wo. Nyi lunga Ka-Izalele malakula mukwo-pwo chakuhona chitela, kanji-kanji Yehova te keshi kulinga nichimwe. Chipwe chocho, iye te kakumona lamba ni kulila chenyi, nawa te kakulisa mu chihela chenyi.—Mala. 2:13-16.

7-8. (a) Yika Yehova analweze yisemi hanga alinge? (Tala chizulie ha chifukilo.) (b) Malongesa aka twawanaho?

⁷ Shimbi te yakusolola nawa ngwo, Yehova kakuzanga hanga ana atwame kanawa. Yehova kalwezele yisemi hanga akwase ana jo hi wika ko ku musunya, alioze ni ku spiritu. Yisemi te kakuzachisa uhashi weswawo ali nawo hanga akwase ana jo kunyingika ni kulemesa Shimbi ja Yehova ni kumuzanga. (Shimbi 6:6-9; 7:13) Kumwesa ana lamba chapwile chimwe chitela chize chatwalile Yehova kuhana kastigu kuli A-Izalele. (Jere. 7:31, 33) Yisemi kaalwezele ngwo, kanda amona ana jo ngwe chimwe chuma chize kuchishi ulemu, alioze katamba kwamona ngwe chihinga hanji chawana cha kuli Yehova chize atamba kulemesa.—Samu 127:3.

⁸ Malongeso: Yehova kakumona chize waze alimbata akutwama umwe ni mukwo. Nawa kanazange hanga yisemi azange ana jo, mumu makaapatwila ha chize akufunga ana jo.

9-11. Mumu liaka Yehova ahanyine shimbi yize te yakukanjisa kuzo?

⁹ Kanda wivwa kuzo. Shimbi Yamuchikumi yakanjishile kuzo, hanji kwivwila chipululu yuma ya akwetu. (Shimbi 5:21; Roma 7:7) Yehova kahanyine shimbi yacho hanga atwehe longeso lilemu—ngwo atu jenyi katamba kufunga mbunge jo, chekwamba, manyonga ni yitanga  yo. Iye kananyingika ngwenyi, yitanga yipi yakukatuka ku manyonga api. (Yishi. 4:23) Nyi Ka-Izalele umwe mecha manyonga api akole mu mbunge yenyi, acho muchihasa kupwa chikalu kuzanga akwo. Chakutalilaho, Mwanangana Ndawichi, kafwile mu muheto wacho. Kwamba pundu, iye kapwile mutu mupema. Alioze ha limwe shimbu, yevwila pwo liambala kuzo. Manyonga jacho yamutwala ku shili. (Tia. 1:14, 15) Ndawichi yalinga utanji, yafupa kwonga lunga lia pwo wacho, kusulaho yamushihisa.—2 Samwe. 11:2-4; 12:7-11.

¹⁰ Yehova te kakunyingika nyi umwe Ka-Izalele mehuka shimbi yize te yakukanjisa kuzo, mumu kakumona yize yili ku mbunge. (1 Sango 28:9) Shimbi yacho yambile hali atu jenyi ngwo, ayo katamba kwehuka manyonga waze te maatwala ku yitanga yipi. Chino chinasolola ngwo, Yehova kali Tata wa zango nawa wa mana.

¹¹ Malongeso: Yehova keshi kutala wika chifwa cha mutu. Iye kakutala chize twapwa muchima, chekwamba mu mbunge yetu. (1 Samue. 16:7) Kukushi manyonga, hanji yitanga yize Yehova keshi kumona. Iye kakumona yuma yacho nawa kakutukolweza tulinge yuma yipema. Alioze kanazange hanga tunyingike ni kwehuka manyonga jetu api, shimbu kanda achitutwala ku yitanga yipi.—2 Sango 16:9; Mateu 5:27-30.

12. Yika Shimbi ya Mose yinatulongesa?

¹² Shimbi ya Mose yinatulongesa ngwo Yehova kakuzanga ululi. (Samu 37:28; Iza. 61:8) Iye hanatwehe chilweza chingunu cha chize twatamba kusolwela akwetu ululi. Muze te A-Izalele akwononokena shimbi jize Yehova aehele, iye te kakwawahisa. Alioze muze te akwehuka shimbi jenyi ja ululi, ayo te kakumona lamba. Tutalenu shimbi jaali ha Kumi lia Shimbi.

13-14. Yika shimbi jaali jitangu hakachi ka Kumi lia Shimbi jambile, nawa kuchi kwononokena shimbi jacho te chakuyukisa A-Izalele?

¹³ Kuwayila wika Yehova. Shimbi jaali jitangu hakachi ka Kumi lia Shimbi te jakwamba ngwo, A-Izalele katamba kuwayila wika Yehova nawa te jakwakanjisa kuwayila tuponya. (Kutuhu. 20:3-6) Shimbi jino te kujishi kuyukisa Yehova. Alioze te jakuyukisa wika atu jenyi. Muze A-Izalele te akununga ni kushishika kuli iye, ayo te kakuyuka chinji. Alioze muze te akuwayila tuzambi twa akwa-mavungu, ayo te kakumona lamba linji.

¹⁴ Achinyonga hali A-Kanana. Ayo te kakuwayila tuponya waze keshi mwono, shimbu awayile Zambi wamwenemwene nawa wa mwono. Hachino, ayo te keshi kuwana ukwaso. (Samu 115:4-8) Mu uwayilo wo, ayo te kakulinga utanji ni kuhana ana jo ngwe yitapo kuli tuzambi a mahuza. Chizechene nawa, muze A-Izalele te akwehuka Yehova hanga awayile tuponya, no te kakuhana ana jo ngwe yitapo kuli tuzambi a mahuza. (2 Sango 28:1-4) Waze apwile ni wata yehuka yiyulo ya Yehova ya ululi. Ayo yalizata mumu lia wata wo, chocho yamwesa lamba waze apwile mushi lio. (Eze. 34:1-4) Yehova yatoweza A-Izalele ngwenyi, te maneha upatwilo hali waze eswe akumwesa lamba twanuke ni mapwo waze keshi ni yoze maakalila. (Shimbi 10:17, 18; 27:19) Alioze, Yehova te kakuwahisa atu jenyi, muze te akushishika kuli iye ni kusolola ululi kuli umwe ni mukwo.—1 Mia. 10:4-9.

15. Malongeso aka twalilongesa hali Yehova?

¹⁵ Malongeso: Yehova keshi ni chitela muze waze akuliamba ngwo, kakumuwayila malengulula shimbi jenyi ni kumwesa atu jenyi lamba. Chipwe chocho, Yehova kakutuzanga,  nawa kakumona muze matulinga yuma ya uhenge. Iye kakwivwa yikola yize twakwivwa, kuhiana yize mama akwivwa hali mwanenyi. (Iza. 49:15) Chipwe ngwe, iye keshi kuhwisa milonga yeswe hazehene, nihindu ha shimbu lialita, iye makapatwila yihenge waze kalikonyekene mumu lia kumwesa akwo lamba.

16-18. Shimbi ya Mose te yakutala ha yikuma yika ku mwono wa atu, nawa yika twalilongesaho?

¹⁶ Shimbi ya Mose te yikwete yuma yinji yize yinatale ha mwono wa hita Ka-Izalele. Kashika chapwile ni ulemu makulwana waze te akutongola apatwile atu ja Yehova ni ululi. Ayo te keshi kusopesa wika ha yikuma ya uwayilo, alioze te kakuchilinga nawa nyi mukupwa mbwanja ni ponde. Tutalenu yilweza yize yinasulaho.

¹⁷ Nyi umwe Ka-Izalele mashiha mukwo, neye te keshi kumushiha hazehene. Makulwana amu mbonge yize atwama te mahengwola kanawa chikuma chacho mba anyingike nyi katamba kumushiha nyi ka. (Shimbi 19:2-7, 11-13) Chikwo nawa, makulwana te kakuhengwola yuma yinji hakutwala ku mwono wo wa hita tangwa hanga anyingike nyi ayo te kakwete kakucha. (Kutuhu. 21:35; Shimbi 22:13-19) Muze makulwana te akusolola ululi ni muze A-Izalele te akwononokena Shimbi ja Zambi, ayo eswe te kakuyuka nawa vungu lieswe te liakuhalisa Yehova.—Levi 20:7, 8; Iza. 48:17, 18.

¹⁸ Malongeso: Hita chuma ku mwono wetu chikwete ulemu kumeso ja Yehova. Iye kanazange hanga tusolole zango ni ululi kuli akwetu. Nawa kakunyingika yuma yeswe yize twakuhanjika ni yize twakulinga, chipwe tuli ukawetu.—Hepre. 4:13.

19-21. (a) Kuchi makulwana ni ngaji te akutwama ni atu ja Zambi? (b) Kuchi Shimbi ya Mose te yakufunga atu, nawa yika twalilongesaho?

¹⁹ Yehova kazangile kufunga atu jenyi ku kalimbalimba wa mavungu waze te asulangana no. Kashika etele makulwana ni ngaji hanga akaule Shimbi ya Mose ni ungunu weswe. Chikwo nawa, waze akusopesa atu te katambile kuchilinga ni ukalu hanji ni uswiyi. Kashika, ayo te katamba kuzanga chinji ululi.—Shimbi 1:13-17; 16:18-20.

²⁰ Yehova te kakuvwila atu jenyi keke, kashika asele shimbi hanga jikwase hita umwe wa kuli ayo achine kumulinga yuma yipi. Chakutalilaho, shimbi yapwile ni kukwasa atu hanga ahone kulisuma mulonga chakuhona chitela. Kashika, mutu yoze asuma mulonga kapwile ni ulite wakunyingika yoze wamusuma mulonga wacho. (Shimbi 19:16-19; 25:1) Chikwo nawa, mba amuhise, te kwatamba kusoloka yela aali hanga alumbunune kanawa mulonga wacho. (Shimbi 17:6; 19:15) Mba yika mutwamba hali Ka-Izalele yoze walinga mulonga,  alioze mukusoloka chela umuwika? Iye katambile kunyonga ngwo, te kechi kumuzangamisa hamukunda wa mulonga wacho. Mumu Yehova kamwene yize alingile. Mu usoko, atata te kakwete wata, alioze wata wo te ukwete haze wasulila. Milonga yimwe mu usoko, te kakuyisopa kuli makulwana amu mbonge hanga amone chize makwasa asoko jacho.—Shimbi 21:18-21.

²¹ Malongeso: Yehova hanatwehe chilweza chingunu; iye keshi kulinga chuma nichimwe cha uhenge. (Samu 89:14) Iye kakuwahisa waze akukaula shimbi jenyi ni ushishiko weswe, alioze kakuzangamisa waze akuzachisa chipi wata wo. (2 Samue. 22:21-23; Eze. 9:9, 10) Amwe mahasa kulinga upi ni kunyonga ngwe kukuchi kulingiwa nichimwe, alioze ha shimbu lialita Yehova maasolola hanga atambule ukwaso. (Yishi. 28:13) Nyi kalikonyekene, ayo manyingika ngwo, “kuholokela mu moko ja Zambi ya mwono, chuma cha kukolesa woma.”—Hepre. 10:30, 31.

22-24. (a) Aya Shimbi te yakufunga chinji, nawa yika twalilongesa hali Yehova? (b) Utowezo uka uli ha Kutuhuka 22:22-24?

²² Shimbi te yakufunga chinji atu waze keshi ni uhashi wa kulifunga ene, ngwe ana-shiwa, tuliwa ni yilambala. Ngaji amu Izalele kalwezele ngwo: “Kanda nuhengesa upatwilo wa chilambala, chipwe wa shiwa, chipwe kanda nuchiza mazalo a twamishi kupwa chifungo.” (Shimbi 24:17) Yehova kasolwele zango lienyi hali hita mutu yoze te keshi ni ukwaso mu vungu  lia Izalele. Iye te kakupatwila waze akwamwesa lamba.—Tanga Kutuhuka 22:22-24.

²³ Shimbi te yakufunga nawa asoko hanga achine kulimbata ene ni ene hanji ulo wa asonyi. (Ulevi 18:6-30) Kulisa ni akwa-mavungu te atunga hakamwihi ni A-Izalele waze te akutayiza ni kuzanga yitanga yacho, atu ja Yehova te kakumona yitanga wacho ngwe chize Yehova akuyimona—yuma ya lwaji.

²⁴ Malongeso: Yehova kakuzanga waze ali ni wata hanga azange atu eswe waze ayo anasongwela. Iye keshi kuzanga utanji ngwe kulisumbakeya ku tachi ni mutu yoze twalimbachile nenyi hanji kanuke, nawa kanatulweze ngwenyi waze anamono lamba liacho, chipi-chipi waze keshi ukwaso maafunga ni ululi.

25-26. (a) Mumu liaka mutuhasa kwamba ngwetu zango ni ululi yapwa ngwe mwiku ni mwono? (b) Yika mutukalilongesa ha mutwe uze muusulaho wa mitwe yino?

²⁵ Zango ni ululi yapwa ngwe mwiku ni mwono; hano hashi kuhechi kupwa mwono nyi kuheshi mwiku, chizechene nawa, mwiku kuuchi kupwaho nyi kuheshi mwono. Nyi twapwa ni shindakenyo ngwetu, Yehova kakutufunga ni ululi, zango lietu hali iye mulikola. Chikwo nawa, nyi twazanga Zambi ni shimbi jenyi ja ululi, muchitukwasa kusolola zango ni ululi hali akwetu.

²⁶ Usendo wa Shimbi ya Mose wakwashile A-Izalele kupwa ni usepa upema ni Yehova. Alioze yino yinakahwa muze Yesu amanunwine shimbi, ni kusalakanyisaho chuma chahiana ulemu. (Roma 10:4) Postolo Paulu yasoneka hakutwala ku Shimbi yacho ngwenyi, yili ‘chizulie cha yuma yipema yize muyizako.’ (Hepre. 10:1) Ha mutwe uze muusulaho wa mitwe yino, mutushimutwina yimwe yuma yacho yipema ni chize zango ni ululi yakukwasa chikungulwila cha akwa-Kristu.