1, 2. a) ¿Chuqui la com ti lac pejtelel? b) ¿Chuqui miʼ mejlel lac ñop?

TI LAC pejtelel mi lac mulan chaʼan mi laj cʼuxbintel yicʼot chaʼan toj chuqui mi lac melbentel (chaʼlebentel). Cheʼ jajayajl mi laj qʼuel chaʼan maʼañic mi laj cʼuxbintel o mach tojic chuqui mi lac melbentel, tajol mi la cubin chaʼan maʼañix chuqui miʼ mejlel lac mel o mi lac ñaʼtan chaʼan maʼañix laj cʼʌjñibal.

² Jehová yujil chaʼan ti lac pejtelel la com chaʼan mi laj cʼuxbintel yicʼot mi lac melbentel chuqui toj (Sal. 33:5). Miʼ mejlel lac ñop chaʼan Dios miʼ wen cʼuxbiñonla yicʼot yom chaʼan toj chuqui mi lac melbentel. Jiñi Mandar tsaʼ bʌ i yʌqʼue Jehová i tejclum Israel tiʼ tojlel Moisés miʼ pʌsbeñonla chaʼan cheʼʌchi. Mi an a chʼijiyemlel come maʼ wubin chaʼan maʼañic maʼ cʼuxbintel o an toʼol ticʼlʌntiyet, mi caj i ñuqʼuesan a pusicʼal cheʼ maʼ cʌn chaʼan jiñi i Mandar Moisés * miʼ pʌs chaʼan Dios miʼ chʼʌm ti ñuc i wiñicob.

3. a) Cheʼ bajcheʼ miʼ tsictesʌntel ti Romanos 13:8-10, ¿chuqui mi lac taj laj qʼuel cheʼ mi lac tsajin jiñi Mandar tsaʼ bʌ aqʼuenti Moisés? b) ¿Baqui bʌ cʼajtiya tac mi caj i jajqʼuel ti ili temaj?

³ Cheʼ mi lac tsajin jiñi Mandar tac tsaʼ bʌ aqʼuenti Moisés, mi lac taj laj qʼuel chaʼan Dios miʼ wen cʼuxbiñonla (pejcan Romanos 13:8-10). Ti ili temaj mi caj lac tsajin chaʼpʼej uxpʼejl mandar tsaʼ bʌ i yʌqʼue Jehová jiñi israelob, i mi caj lac jacʼ ili cʼajtiya tac: ¿Chucoch miʼ mejlel la cʌl chaʼan chucul ti cʼuxbiya jiñi Mandar? ¿Chucoch miʼ mejlel la cʌl chaʼan miʼ ñijcan jiñi wiñicob xʼixicob (quixtañujob) tiʼ melol chuqui toj? ¿Bajcheʼ yom  miʼ tsʼʌctesañob jiñi waʼchocobiloʼ bʌ tiʼ yeʼtel? Yicʼot, ¿majqui bʌ quixtañujob tsiʼ ñumen coltayob? Jiñi i jacʼbal mi caj i ñuqʼuesan lac pusicʼal, mi caj i yʌqʼueñonla lac pijtaya yicʼot mi caj i ñumen lʌcʼtesañonla tiʼ tojlel lac Tat am bʌ ti panchan (Hch. 17:27; Ro. 15:4).

4. a) ¿Chucoch miʼ mejlel la cʌl chaʼan jiñi i Mandar Moisés chucul ti cʼuxbiya? b) Cheʼ bajcheʼ miʼ yʌl Mateo 22:36-40, ¿baqui bʌ mandar tac tsiʼ taja ti tʼan Jesús?

⁴ ¿Chucoch miʼ mejlel la cʌl chaʼan jiñi i Mandar Moisés chucul ti cʼuxbiya? Come pejtelel chuqui miʼ mel Jehová ñijcʌbil tiʼ cʼuxbiya (1 Jn. 4:8). Jiñi ñumen bʌ ti 600 mandar tsaʼ bʌ ajqʼui yaʼ chucul ti yambʌ chaʼpʼejl mandar, jiñʌch: Cʼuxbin Dios yicʼot cʼuxbin a piʼʌlob (Lv. 19:18; Dt. 6:5; pejcan Mateo 22:36-40). Jin chaʼan, miʼ mejlel lac ñaʼtan chaʼan jiñi mandar tac añʌch bajcheʼ miʼ pʌsbeñonla i cʼuxbiya Jehová. Laʼ laj qʼuel ejemplo tac.

5, 6. a) ¿Chuqui yom Jehová tiʼ tojlel jiñi ñujpuñemoʼ bʌ? b) ¿Chuqui muʼ bʌ i wen qʼuel Jehová? Alʌ jumpʼejl ejemplo.

⁵ Jiñi mandar chaʼan yom xucʼulob jiñi ñujpuñemoʼ bʌ yicʼot chaʼan i cʌntʌntel alʌlob. Jehová yom chaʼan jiñi ñujpuñemoʼ bʌ miʼ cʼotel i wen cʼuxbiñob i bʌ tiʼ pejtelel ora (Gn. 2:24; Mt. 19:3-6). Cheʼ juntiquil ñujpuñem bʌ miʼ piʼlen yambʌ mach bʌ i piʼʌlic, jiñʌch jiñi ñumen lecoj bʌ miʼ melben i piʼʌl. Machʌch toʼolic cheʼ yaʼ tiʼ wucpʼejlel mandar tsaʼ tijqʼui iliyi (Dt. 5:18). Jiñi muʼ bʌ i piʼlen yambʌ mach bʌ i piʼʌlic woli (choncol) ti «mulil tiʼ contra Dios», i miʼ mejlel i wen low i yijñam o i ñoxiʼal (Gn. 39:7-9). Jiñi i cʼuxel i pusicʼal muʼ bʌ i yʌqʼuen, miʼ mejlel ti jalʼan cabʌl jab.

⁶ Jehová miʼ wen qʼuel bajcheʼ miʼ chaʼleñob i bʌ jiñi ñujpuñemoʼ bʌ. Yaʼ ti Israel, tsiʼ wen chʼʌmʌ ti ñuc bajcheʼ miʼ chaʼlentelob jiñi ijñamʌlob. Jiñi ñoxiʼal muʼ bʌ i qʼuel ti ñuc jiñi Mandar miʼ cʼuxbin i yijñam, i maʼañic miʼ chaʼlen i bʌ ti divorciar tiʼ caj chuqui tac jach (Dt. 24:1-4; Mt. 19:3, 8). Pero mi tsaʼ ujti tsʌts bʌ wocol i miʼ chaʼlen i bʌ ti divorciar yicʼot i yijñam, yom miʼ yʌqʼuen jumpʼejl i juñilel cʌy bʌ. Jiñi jun miʼ coltan chaʼan maʼañic miʼ jopʼbentel i mul chaʼan tsʼiʼlel. Cheʼ jaʼel, cheʼ maxto aqʼuenti ili jun, jiñi ñoxiʼal yom miʼ ñaxan pejcan jiñi ancianojob yaʼ ti tejclum. Cheʼ bajcheʼ jiñi, miʼ mejlel i coltañob jiñi xñujpuñel. Jehová mach tiʼ pejtelel ora miʼ yotsan i bʌ, tajol tiʼ tojlel jiñi ancianojob o xʼaltʼañob i chaʼan, cheʼ juntiquil ti Israel miʼ chaʼlen i bʌ ti divorciar chaʼan toʼol yom jach, pero mucʼʌch i chʼʌm ti ñuc i yuqʼuel jiñi ijñamʌl i cʼux miʼ yubin (Mal. 2:13-16).

7, 8. a) ¿Chuqui tsiʼ yʌlʌ Jehová chaʼan yom miʼ mel jiñi tatʌlob? (Qʼuele jiñi dibujo am bʌ tiʼ tejchibal) b) ¿Chuqui mi laj cʌn chaʼan jiñi?

⁷ Jiñi mandar miʼ pʌs jaʼel chaʼan Jehová miʼ wen chʼʌm ti ñuc jiñi alʌlob. Mach cojach tiʼ sube jiñi tatʌlob chaʼan yom miʼ yʌqʼueñob chuqui i cʼʌjñibalob i chaʼan, yom miʼ coltañob jaʼel bajcheʼ añob yicʼot Dios. Yom miʼ cʼʌñob pejtelel jiñi ora muʼ bʌ i mejlelob chaʼan miʼ cʌntesañob i qʼuel ti ñuc jiñi i mandar tac Dios yicʼot chaʼan miʼ coltañob i cʼuxbin Dios (Dt. 6:6-9; 7:13). Junchajp chucoch Jehová tsiʼ yʌqʼue i toj i mul jiñi israelob, jin cheʼ cabʌl tatʌlob wen pʼumpʼun jax chuqui tsiʼ melbeyob i yalobilob (Jer. 7:31, 33). Jiñi tatʌl mach yomic miʼ qʼuel i yalobil bajcheʼ jumpʼejl chubʌʼañʌl mach bʌ cʼʌñʌlic miʼ cʌntan o mejl bʌ i ticʼlan, jiñʌch i majtan tilem bʌ ti Jehová yom bʌ miʼ cʌntan yicʼot cʼuxbiya (Sal. 127:3).

⁸ Muʼ bʌ laj cʌn: Jehová miʼ wen qʼuel bajcheʼ miʼ chaʼleñob i bʌ jiñi ñujpuñemoʼ bʌ. Yom chaʼan jiñi tatʌlob miʼ cʼuxbin i yalobilob, i Dios miʼ chʼʌm tiʼ wenta bajcheʼ yilal miʼ melob tiʼ tojlel i yalobilob.

9-11. ¿Chucoch tsiʼ yʌcʼʌ Jehová jiñi mandar chaʼan mach yom mi lac mulan mach bʌ lac chaʼañic?

 ⁹ Jiñi mandar chaʼan i cʌlʌx mulʌntel i chubʌʼan yambʌlob. Jiñi i lujumpʼejlel mandar miʼ yʌl chaʼan mach yomic mi lac tsʌjyun o mi laj cʌlʌx mulan chuqui an i chaʼan yambʌ quixtañu (Dt. 5:21; Ro. 7:7). Ti ili mandar, an chuqui wen ñuc bʌ tsiʼ pʌsbe Jehová jiñi i wiñicob: Yom miʼ cʌntañob i pusicʼal, yom i yʌl, jiñi i pensar yicʼot bajcheʼ miʼ yubiñob i bʌ. Yujil chaʼan jiñi lecoj bʌ lac melbal jiñʌch tiʼ caj cheʼ mach weñic chuqui an ti lac pensar yicʼot muʼ bʌ la cubin (Pr. 4:23). Mi juntiquil miʼ yʌcʼ ti colel mach bʌ weñic tiʼ pusicʼal, wocol chaʼan muʼto caj i cʼuxbin yambʌ i piʼʌlob. Cheʼʌch tsaʼ ujti jiñi rey David. Mach jontolic bʌ wiñic, pero ti jumpʼejl bʌ qʼuin tsaʼ caji i mulan juntiquil ñujpuñem bʌ xʼixic, i tsiʼ chaʼle mulil (Stg. 1:14, 15). Tsiʼ piʼle jiñi xʼixic, tsiʼ ñopo i lotiben i ñoxiʼal i tsaʼto i yʌcʼʌ ti tsʌnsʌntel (2 S. 11:2-4; 12:7-11).

¹⁰ Jehová miʼ mejlel i qʼuel chuqui an ti lac pusicʼal, jin chaʼan, yujil cheʼ bʌ juntiquil ti Israel miʼ ñusan jiñi mandar i miʼ tech i mulan chuqui mach bʌ i chaʼañic (1 Cr. 28:9). Ili mandar miʼ pʌsben jiñi i wiñicob chaʼan mach yomic miʼ yʌcʼob ti ochel mach bʌ weñic tiʼ pensar, come miʼ pʌyonla ti mulil. ¿Mach ba jiñʌch Jehová juntiquil Tatʌl wen am bʌ i ñaʼtʌbal yicʼot yujil bʌ cʼuxbiya?

¹¹ Muʼ bʌ laj cʌn: Jehová mach jin jach miʼ qʼuel bajcheʼ yilalonla tiʼ wut yambʌlob. Miʼ qʼuel lac pusicʼal, majquiyonla tiʼ sujmlel (1 S. 16:7). Maʼañic miʼ mejlel lac mucben chuqui an ti lac pensar, bajcheʼ mi lac cubin lac bʌ mi jiñic lac melbal. Miʼ qʼuel jiñi wem bʌ lac melbal loqʼuem bʌ ti lac pusicʼal, i yom chaʼan mi lac ñumen weñʼesan. Pero yom chaʼan mi laj cʌn jaʼel mi an chuqui mach weñic ti lac pensar i mi lac ticʼ chaʼan maʼañic miʼ yʌcʼonla ti mulil (2 Cr. 16:9; Mt. 5:27-30).

12. ¿Chuqui tsiʼ pʌsʌ jaʼel jiñi i Mandar Moisés?

¹² Jiñi i Mandar Moisés tsiʼ pʌsʌ jaʼel chaʼan Jehová miʼ qʼuel ti ñuc cheʼ miʼ mejlel chuqui toj (Sal. 37:28; Is. 61:8). Jiñʌch tsiʼ pʌsʌ chuqui yom i yʌl cheʼ mi lac mel chuqui toj tiʼ tojlel yambʌlob. Cheʼ bʌ jiñi israelob miʼ jacʼbeñob i mandar miʼ yʌqʼueñob bendición, pero mi tsiʼ ñusayob ti pʼis miʼ cʌy chaʼan miʼ yilʌbeñob i wocolel. Laʼ laj qʼuel chaʼpʼejl mandar chaʼan iliyi.

13, 14. a) ¿Chuqui miʼ yʌl jiñi ñaxam bʌ chaʼpʼejl mandar? b) ¿Bajcheʼ miʼ coltan jiñi israelob muʼ bʌ i jacʼob jiñi chaʼpʼejl mandar?

¹³ Jiñi mandar chaʼan cojach yom miʼ chʼujutesañob Jehová. Jiñi ñaxam bʌ chaʼpʼejl mandar tsiʼ yʌlʌ chaʼan jiñi israelob cojach yom miʼ chʼujutesañob Dios (Éx. 20:3-6). Tiʼ sujm, ili mandar tac jiñʌch tsiʼ colta jiñi israelob, mach jiñic Jehová. Cheʼ bʌ xucʼulob ti Dios wen añob, pero cheʼ miʼ chʼujutesañob yambʌ dios tac miʼ tajob wocol.

¹⁴ Laʼ cu lac ñaʼtan tsaʼ bʌ ujti tiʼ tojlel jiñi chumuloʼ bʌ ti Canaán. Cheʼ tsiʼ chʼujutesayob jiñi dios tac mach bʌ cuxulic, i mach jiñic jiñi isujm bʌ Dios yicʼot cuxul bʌ, maʼañobic i cʼʌjñibal tsiʼ meleyob i bʌ (Sal. 115:4-8). Chaʼan miʼ chʼujutesañob i dios tac, tsiʼ meleyob bibiʼ jax bʌ tsʼiʼlel yicʼot tiʼ tsʌnsayob alʌl bajcheʼ majtañʌl. Cheʼ jaʼel, cheʼ bʌ jiñi israelob tsiʼ ñusʌbeyob i tʼan Jehová i tsiʼ chʼujutesayob diosteʼ tac, maʼañic tsiʼ qʼueleyob i bʌ ti ñuc i tsiʼ ticʼlayob i familia (2 Cr. 28:1-4). Jiñi añoʼ bʌ ñuc bʌ i yeʼtel tsiʼ cʌyʌyob i jacʼben i mandar tac Jehová, mach weñic tsiʼ meleyob i yeʼtel yicʼot pʼumpʼun tsiʼ ticʼlayob jiñi cʼuñoʼ bʌ yicʼot mach bʌ cabʌlic i chubʌʼañob (Ez. 34:1-14). Jehová tiʼ sube jiñi tejclum chaʼan jiñi muʼ bʌ i ticʼlañob jiñi xʼixicob yicʼot alʌlob, mi caj i tojob i mul (Dt. 10:17, 18; 27:19). Pero cheʼ bʌ jiñi  israelob xucʼul tsaʼ ajñiyob yicʼot tsiʼ meleyob chuqui toj, tsiʼ yʌqʼueyob bendición (1 R. 10:4-9).

15. ¿Chuqui tac mi laj cʌn tiʼ tojlel Jehová?

¹⁵ Muʼ bʌ laj cʌn: Jehová mach i mulic cheʼ an muʼ bʌ miʼ yʌlob chaʼan miʼ melbeñob i yeʼtel (troñel), pero miʼ ñusʌbeñob i mandar yicʼot miʼ ticʼlan yambʌlob. Anquese cheʼ bajcheʼ jiñi, miʼ cʼuxbiñonla yicʼot yujil cheʼ mi lac ticʼlʌntel. Cheʼ miʼ qʼuel chaʼan mi lac ñusan wocol, ñumen cʼux miʼ yubin cheʼ bajcheʼ miʼ yubin juntiquil ñaʼʌl cheʼ an chuqui miʼ chaʼlen i yalʌl miʼ qʼuel (Is. 49:15). Tajol Dios mach ti orajic miʼ yʌqʼuen i toj i mul jiñi muʼ bʌ i mel mach bʌ weñic i maʼañic miʼ cʌy i mul, pero mucʼʌch caj i mel tiʼ yorajlel.

16-18. a) ¿Bajcheʼ tac miʼ coltañob jiñi i Mandar Moisés? b) ¿Chuqui tac miʼ cʌntesañonla?

¹⁶ Jiñi i Mandar Moisés cabʌl bajcheʼ miʼ coltañob tiʼ cuxtʌlel jiñi israelob. Jiñi ancianojob mach cojach miʼ tojʼesañob wocol tac chaʼan bʌ i chʼujutesʌntel Dios, yicʼotʌch yambʌ wocol tac bajcheʼ jumpʼejl leto, jatsʼ o tsʌnsa. Jin chaʼan, i cʼʌjñibal miʼ tsʼʌctesañob ti toj jiñi mandar. Laʼ laj qʼuel ejemplo tac.

¹⁷ Cheʼ bʌ juntiquil ti Israel miʼ tsʌnsan yambʌ i piʼʌl, mach ti orajic miʼ waʼ tsʌnsʌntel. Jiñi ancianojob yaʼ ti tejclum yom miʼ wen tsajiñob bajcheʼ tsaʼ ujti chaʼan miʼ ñaʼtañob mi yomʌch miʼ tsʌnsʌntel jaʼel (Dt. 19:2-7, 11-13). Cheʼ jaʼel, miʼ chaʼleñob meloñel cheʼ bʌ tajol an wocol tiʼ caj chubʌʼañʌl o tiʼ tojlel jumpʼejl xñujpuñel (Éx. 21:35; Dt. 22:13-19). Cheʼ bʌ jiñi ancianojob toj miʼ chaʼleñob meloñel i jiñi israelob miʼ jacʼob muʼ bʌ i yʌl jiñi Mandar, wen miʼ yajñelob i jiñi tejclum miʼ yʌqʼuen i ñuclel Jehová (Lv. 20:7, 8; Is. 48:17, 18).

¹⁸ Muʼ bʌ laj cʌn: Jehová miʼ chʼʌm ti ñuc pejtelel chuqui mi lac mel ti laj cuxtʌlel. Yom chaʼan mi lac pʌsben laj cʼuxbiya yambʌlob yicʼot mi lac mel chuqui toj. I miʼ qʼuel chuqui mi la cʌl yicʼot mi lac mel cheʼto jaʼel cheʼ lac bajñel jach (He. 4:13).

19-21. a) ¿Bajcheʼ yom miʼ melob jiñi ancianojob yicʼot juezob tiʼ tojlel jiñi tejclum? b) ¿Baqui tac bʌ mandar tsiʼ pʌsʌ chaʼan mach yom miʼ yujtel mach bʌ tojic? c) ¿Chuqui tac mi laj cʌn ti iliyi?

¹⁹ Jiñi yan tac bʌ tejclum am bʌ tiʼ tʼejl jiñi Israel wen jontolob. Jin chaʼan, Jehová tiʼ sube jiñi ancianojob yicʼot xmeloñelob chaʼan junlajal yom miʼ qʼuelob yambʌlob chaʼan jiñi i tejclum maʼañic miʼ taj wocol. Cheʼ jaʼel, tiʼ subeyob chaʼan mach yomic tsʌtsob i pusicʼal, chaʼan yom miʼ mulañob i mel chuqui toj (Dt. 1:13-17; 16:18-20).

²⁰ Jehová añʌch i pʼuntaya, jin chaʼan tsiʼ yʌcʼʌ mandar tac chaʼan maʼañic miʼ yujtel mach bʌ tojic. Laʼ laj qʼuel jumpʼejl ejemplo. Jiñi Mandar miʼ yʌl chuqui yom miʼ mejlel cheʼ miʼ jopʼbentel i mul quixtañu. ¿Chuqui? Ti ñaxan, jiñi quixtañu miʼ mejlel ti aqʼuentel i ñaʼtan majqui tsiʼ jopʼbe i mul (Dt. 19:16-19; 25:1). Cheʼ jaʼel, chaʼan miʼ ñaʼtʌntel chaʼan  añʌch i mul, yom an chaʼtiquil quixtañujob bajcheʼ testigo (Dt. 17:6; 19:15). Pero ¿chuqui miʼ yujtel tiʼ tojlel juntiquil muʼ bʌ i mel mach bʌ weñic i cojach an juntiquil testigo? Jiñi am bʌ i mul mach yomic miʼ ñaʼtan chaʼan tsaʼix i mʌlʌ (joto), come Jehová luʼ qʼuelbilix i chaʼan tsaʼ bʌ ujti. Cheʼ jaʼel tiʼ tojlel jiñi tatʌlob, pʼisbil jach chuqui miʼ mejlel i melob tiʼ familia. Cheʼ an wocol tac ti familia, jiñi ancianojob miʼ coltañob i miʼ yʌlob chuqui yom miʼ mejlel (Dt. 21:18-21).

²¹ Muʼ bʌ laj cʌn: Jehová maʼañic miʼ wis mel mach bʌ tojic, jin chaʼan jiñʌch jiñi ñumen wem bʌ ejemplo lac chaʼan (Sal. 9:7). Miʼ yʌqʼuen i chobejtʌbal jiñi xucʼuloʼ bʌ yicʼot muʼ bʌ i jacʼbeñob i tʼan, pero miʼ yʌqʼuen i toj i mul jiñi ñumeñix bʌ ti pʼis bajcheʼ miʼ melob i yeʼtel (2 S. 22:21-23; Ez. 9:9, 10). Tajol an muʼ bʌ i melob mach bʌ weñic i maʼañic chuqui miʼ tumbentelob yilal, pero Jehová mi caj i chaʼlen meloñel yicʼotob (Pr. 28:13). Mi maʼañic miʼ cʌyob i mul, mach jalic miʼ cʼotel i cʌñob chaʼan «bʌbʌqʼuen jax muqʼuic i yʌqʼueñonla lac toj lac mul jini cuxul bʌ Dios» (He. 10:30, 31).

22-24. a) ¿Majqui tsaʼ ñumen cʌntʌntiyob ti jiñi Mandar? b) ¿Chuqui mi laj cʌn tiʼ tojlel Jehová? c) ¿Baqui bʌ ticʼojel mi lac taj ti Éxodo 22:22-24?

²² Jiñi Mandar miʼ wen cʌntan jiñi mach bʌ añic miʼ mejlel i coltañob i bʌ, bajcheʼ jiñi mebaʼ alʌlob, mebaʼ xʼixicob yicʼot tilemoʼ bʌ ti yambʌ lum. Pejtelel jiñi xmeloñelob yom miʼ jacʼob ili mandar: «Mach yomic maʼ ticʼlan jini mach bʌ mero anic i lumal ti laʼ tojlel yicʼot jini mebaʼoʼ bʌ. Mach yomic maʼ chʼʌmben i pislel jini mebaʼ xʼixic chaʼan i qʼuexol i bet» (Dt. 24: 17). Jehová miʼ wen qʼuel ti ñuc ti jujuntiquil jiñi pʼumpʼuñoʼ bʌ i miʼ yʌqʼuen i toj i mul jiñi muʼ bʌ i ticʼlañob (pejcan Éxodo 22:22-24).

²³ Chaʼan maʼañic chuqui miʼ ticʼlan jiñi familia tac, jiñi Mandar tsiʼ yʌlʌ chaʼan mach yomic miʼ piʼleñob i bʌ jiñi chaʼ i familiajoʼ bʌ i bʌ (Lv. 18:6-30). Jiñi yan tac bʌ tejclum, mach lecojic tsiʼ qʼueleyob jiñi. Pero jiñi i tejclum Jehová cheʼʌch yom miʼ qʼuelob bajcheʼ miʼ qʼuel jaʼel, bajcheʼ jumpʼejl tsʌts bʌ mulil.

²⁴ Muʼ bʌ laj cʌn: Jehová yom chaʼan jiñi waʼchocobiloʼ bʌ tiʼ yeʼtel miʼ chʼʌmob ti ñuc pejtelel aqʼuebiloʼ bʌ tiʼ wenta chaʼan miʼ cʌntañob. Tsʼaʼ miʼ qʼuel jiñi ticʼlʌntel chaʼan piʼleya, chaʼ i familiajoʼ bʌ miʼ piʼleñob i bʌ yicʼot cheʼ miʼ ticʼlʌntel jiñi alobob, i yom chaʼan miʼ ñumen cʌntʌntel jiñi maʼañobic bʌ i coltʌntel o i bajñelob jach. Jiñi muʼ bʌ i mel mach tac bʌ weñic, miʼ caj ti mel bʌ tiʼ tojlel Jehová.

25, 26. a) ¿Chucoch miʼ mejlel la cʌl chaʼan jiñi cʼuxbiya yicʼot i melol chuqui toj lajal bajcheʼ jiñi laj cuxtʌlel yicʼot jap icʼ? b) ¿Chuqui mi caj laj qʼuel yaʼ ti yambʌ temaj?

²⁵ Miʼ mejlel la cʌl chaʼan jiñi cʼuxbiya yicʼot i melol chuqui toj, lajal bajcheʼ jiñi laj cuxtʌlel yicʼot jap icʼ, maʼañic miʼ mejlel ti tʼoxtʌl. Cheʼ mucʼʌch lac ñop chaʼan Dios toj chuqui miʼ mel ti lac tojlel, miʼ ñumen colel laj cʼuxbiya tiʼ tojlel. I cheʼ mi laj cʼuxbin Dios yicʼot toj bʌ i mandar tac, mi lac ñumen cʼuxbin yambʌlob i toj chuqui mi lac melbeñob.

²⁶ Jehová yicʼot jiñi israelob wen tsaʼ ajñiyob tiʼ coltaya jiñi Mandar tsaʼ bʌ aqʼuenti Moisés. Pero jiñi Mandar tsaʼ jili i cʼʌjñibal cheʼ bʌ Jesús tsiʼ yʌcʼʌ i cuxtʌlel chaʼan mi laj coltʌntel, i tsaʼ qʼuextʌyi ti yambʌ ñumen wem bʌ (Ro. 10:4). Jiñi apóstol Pablo tsiʼ yʌlʌ chaʼan jiñi Mandar «i yejtal jach jini mero isujm bʌ muʼ bʌ caj i tilel» (He. 10:1). Jiñi yambʌ temaj mi caj i yʌl chuqui tac jiñi wem bʌ mi caj i tilel i chucoch ñuc i cʼʌjñibal jiñi cʼuxbiya yicʼot i melol chuqui toj yaʼ ti congregación.