KAONGORA IBUKIN TE REIREI 9
Te Tangira ao te Kaetitaeka ae Riai i Iteraera Rimoa
“E tangira te raoiroi ao te kaetitaeka ae riai. E buta aonnaba n ana tangira ae koaua Iehova.”—TAIARE. 33:5.
ANENE 3 Korakorara, Ara Kantaninga, Ara Mwioko
KANOANA *
1-2. (a) Tera ae ti bane n tangiria? (b) Ao tera ae ti kona ni kakoauaa raoi?
TI BANE ni kan tangiraki, ao ti tangiria bwa e na karaoaki ae riai nakoira. Ngkana ti aki tangiraki ao e kakaraoaki te ribuaka nakoira, ti kona n namakina ae akea uaara ao akea ara kantaninga.
2 E ataia Iehova bwa ti rangi ni kan tangiraki ao ti tangira te kaetitaeka ae riai. (TaiAre. 33:5) Ti kona ni kakoauaa ae e rangi n tangirira Atuara ao e kani karaoa ae riai nakoira. E kakoauaaki aei ngkana ti iangoa raoi te Tua are e anga Iehova nakon te natannaomata ae Iteraera rinanoni Mote. Ngkana ko namakina ae ko kan tangiraki ke ko karawawataaki n te ribuaka, taiaoka n iaiangoa te Tua Rinanoni Mote * ae kaotaki iai aron Iehova n tabeakinia ana aomata.
3. (a) N aron ae taekinaki n I-Rom 13:8-10, tera ae ti kona n ataia ngkana ti nenera te Tua Rinanoni Mote? (b) Baikara titiraki aika a na kaekaaki n te kaongora aei?
3 Ngkana ti nenera te Tua Rinanoni Mote, ti a ataa iai ana namakin Atuara ae tatangira ae Iehova. (Wareka I-Rom 13:8-10.) N te kaongora aei, ti na neneri tuua tabeua ake a anganaki tibun Iteraera ao ni kaekai titiraki aikai: E aera bwa ti kona n taekinna bwa e aanaki te Tua n te tangira? E aera bwa ti kona n taekinna ae e boutokaa te kaetitaeka ae riai te Tua? Tera aroia ae riai naake iai mwaakaia ni kairiri ni kamanena te Tua? Ao antai aika kamanoaki riki n te Tua? A kona kaekaan titiraki aikai n anganira te kabebeteaki, te kantaninga, ao ni kaanira riki ma Tamara ae tatangira.—Mwa. 17:27; IRom 15:4.
TE TUA AE AANAKI N TE TANGIRA
4. (a) E aera ngkai ti kona n taekinna bwa e aanaki n te tangira te Tua Rinanoni Mote? (b) N aron ae koreaki ni Mataio 22:36-40, baikara tuua ake e kamataatai Iesu?
4 Ti kona n taekinna bwa e aanaki n te tangira te Tua Rinanoni Mote ibukina bwa Iehova e kairaki n te tangira bwa e na karaoi bwaai nako ake e karaoi. (1Ioa. 4:8) E kabotoi Iehova tuua ni kabane i aon tuua aika uoua aikai—tangira te Atua, ao tangira raom n aomata. (NakIbo. 19:18; TuaKau. 6:5; wareka Mataio 22:36-40.) Ngaia are ti kona ni kantaningaia bwa tuua ni kabane aika 600 ao ake tabeua riki ake kanoan te Tua, a kaotiota ana tangira Iehova. Ti na nori katoto tabeua.
5-6. Tera ae e tangiria Iehova bwa a na karaoia taanga ni mare, ao tera ae e ataia? Taekina te katoto.
5 Kakaonimaki ni koaua nakoni buum ni mare, ao tabeakinia natim. E tangiriia taanga ni mare Iehova bwa a na karikirakea aia tangira ae korakora i marenaia n aki toki. (KBwaai 2:24; Mat. 19:3-6) Te wene ni kimoa bon te bure ae kakaiaki ae kaotaki iai akean te tangira, are e kona temanna ni karaoia. Ngaia are e bon riai ngkai e katabuakaki te wene ni kimoa n te kaitiua n tua n Tuua Ake Tebwina. (TuaKau. 5:18) Bon te bure “nakon te Atua” ao te iowawa nakon te buu ni mare. (KBwaai 39:7-9) E kona te rao are wene ni kimoa buuna n namakina te maraki i nanon ririki aika bati man te mwakuri n aki kakaonimaki anne.
6 E atai Iehova baika kakaraoi raao ni mare nakoia buuia. E tangiria bwa e na karaoaki ae riai nakoia buu aine aika tibun Iteraera. Te buu te mwaane ae karinea te Tua, e tangira buuna ao e aki kona ni buuraure ma ngaia i aani bukina aika aki riai. (TuaKau. 24:1-4; Mat. 19:3, 8) Ma ngkana e riki te kangaanga ae kakaiaki ao e buuraure ma neiei, e riai n anganna te beeba ni buuraure. E kamanoaki iai te aine mani bukibuki aika kairua ibukin te wene ni bure. Irarikin anne, imwain are e na anga te beeba ni buuraure te buu te mwaane nakon te buu te aine, e riai ni kaongoia unimwaanen te kaawa. N te aro aei, e a kona n reke aia tai unimwaane ni buoka te taanga anne bwa e na aki uruaki aia mare. Ngkana e buuraure te mwaane ae tibun Iteraera ma buuna i aani bukina aika aki riai, e aki tuka rikin anne Iehova n taai nako. Ma e bon nora rannimatan te buu te aine ao e namakina naba marakin neiei.—Maraki 2:13-16.
(Nori barakirabe 7-8) *
7-8. (a) Tera ae e tua Iehova bwa a na karaoia kaaro? (Nora te taamnei ni moan te maekatin.) (b) Baikara reireiara aika ti karekei?
7 E kaotaki naba n te Tua bwa Iehova e rangi n tabeakina mweraoia ataei. E tua Iehova nakoia kaaro bwa a na karekei baika a kainnanoi natiia n te itera n rabwata ao n te itera naba n taamnei. A riai ni kamanenai aia tai ni kabane ni buokiia natiia bwa a na atai ana Tua Iehova ao n reiakinia bwa a na tangira Iehova. (TuaKau. 6:6-9; 7:13) Bukina naba teuana ae a katuuaaeaki iai tibun Iteraera iroun Iehova bwa a karaoa ae rangi ni buakaka nakoia natiia tabeman. (Ier. 7:31, 33) A aki riai kaaro n iangoiia natiia bwa kaanga bwaai ake a kona n aki tabeakinia ke ni karaoa ae aki riai nakoia, ma a na iangoiia bwa tibwanga mairoun Iehova ke bwaai n tituaraoi aika a na nabeaki raoi.—TaiAre. 127:3.
8 Reireiara: E nori Iehova baike a kakaraoi raao ni mare nakoia buuia. E tangiriia kaaro bwa a na tangiriia natiia, ao e na motiki taekaia ni kaineti ma aroia nakoia natiia.
9-11. E aera ngke e katabuaka te mataai Iehova n te tua?
9 Tai Mataai. Te kabanea n tua man Tuua Aika Tebwina e katabuaka te mataai, ke karikirakeani mataaiakinan ana bwai temanna. (TuaKau. 5:21; IRom 7:7) E anga te tua aei Iehova ibukin te reirei ae kakawaki aei—a riai ana aomata ni kawakin nanoia, ae taekan aia iango, ao aia namakin. E ataia bwa mwakuri aika buakaka a ueke man iango ao namakin aika bubuaka. (TaeRab. 4:23) Ngkana e kariaia tangirani baika bubuaka tibun Iteraera bwa e na rikirake i nanona, e na bae ni karaoa ae aki riai nakoia tabemwaang. Te katoto iai bon te Uea ae Tawita. Bon te mwaane ae raoiroi. Ma n te taina, e a mataaiakina buun temanna. E kairia nanona anne bwa e na karaoa te bure. (Iak. 1:14, 15) E wene ni kimoa Tawita ao e kataia ni mwamwanaa buun te aine anne, ao imwina e tua kamatean teuanne.—2Tam. 11:2-4; 12:7-11.
10 Ngkana iai tibun Iteraera ae urua te tua ibukin te mataai e bon noria Iehova ibukina bwa e kona n nori naano. (1Rong. 28:9) A tuangaki n te tua ibukin te mataai ana aomata bwa a riai n rarawa nakon iango aika a na kairiia nakon te aroaro ae buakaka. Ai wanawanara te Tama ae Iehova ae tatangira!
11 Reireiara: E aki tii nora tinanikun te aomata Iehova. E nori raoi nanora. (1Tam. 16:7) Akea te iango, te namakin, ke te mwakuri ae kona n raba mairouna. E ukera te raoiroi i nanora ao e kaungaira. Ma e tangiria bwa ti na atai iango aika kairua ao n taobarai imwain ae ti karaoa te bure.—2Rong. 16:9; Mat. 5:27-30.
TE TUA AE BOUTOKAA TE KAETITAEKA AE RIAI
12. Tera ae kamatataaki n te Tua Rinanoni Mote?
12 E kamatataaki naba n te Tua Rinanoni Mote bwa e tangira Iehova te kaetitaeka ae riai. (TaiAre. 37:28; Ita. 61:8) E katea te katoto ae kororaoi ni kaineti ma te aroaro ae riai nakoia tabemwaang. Ngkana a ongeaba tibun Iteraera n tuua ake e angania Iehova, e boni kakabwaiaia. Ngkana a aki mutiakin ana kaetieti aika riai ao n raoiroi, a boni karawawataaki. Iangoi tuua riki aika uoua man Tuua Ake Tebwina.
13-14. Tera ae tangiraki n te moan ao te kauoua n tua man Tuua Ake Tebwina, ao a na kangaa ni kakabwaiaaki tibun Iteraera ngkana a ongeaba n tuua akanne?
13 Taromauria Iehova n tii ngaia. Te moan ao te kauoua n tua man Tuua Ake Tebwina a tuangaki iai tibun Iteraera bwa a na taromauria Iehova n tii ngaia ao a na aki taromaurii bouannanti. (TeOti. 20:3-6) Tuua akanne tiaki ibukini kabwaian Iehova ma bon ibukini kakabwaiaaia ana aomata. Ngkana a teimatoa ni kakaonimaki ni koaua nakoina, a boni kakabwaiaaki. Ngkana a taromaurii atuaia natannaomata ake i rarikia, a boni karawawataaki.
14 Iangoa rongorongoia tibuni Kanaan. A taromaurii bouannanti aika akea te maiu i nanoia ao a aki taromauria te Atua ae koaua ae maiu. Ibukin anne, a a kamwaraeia i bon irouia. (TaiAre. 115:4-8) A karaoi aaro ni wene ni bure aika kammaira ao mwakuri aika rangi ni buakaka ni kaineti ma kareanakia ataei, bwa kanoan naba aia taromauri. N aron anne, ngkana a aki mutiakina Iehova tibun Iteraera ao a rineia bwa a na taromaurii bouannanti, a boni kamwaraeia iai i bon irouia ao ni kammarakiia aia utu. (2Rong. 28:1-4) A kitan ana kaetieti Iehova ibukin te kaetitaeka ae riai naake iai mwaakaia ni kairiri. A kabongana buaka mwaakaia ao a karawawataia aika mamaara ao aika akea korakoraia. (Etek. 34:1-4) E kauringia Iehova tibun Iteraera bwa e na motiki taekaia naake a karaoi mwakuri n ribuaka nakoia aine ao ataei aika aki kona ni kamanoia. (TuaKau. 10:17, 18; 27:19) Ma ni kaitaraan anne, e kakabwaiaia ana aomata Iehova ngkana a kakaonimaki ni koaua nakoina ao ni kakaraoa ae riai i marenaia.—1Uea 10:4-9.
E tangirira Iehova ao e norira ngkana ti aitara ma te ribuaka (Nora barakirabe 15)
15. Tera reireiara ibukin Iehova?
15 Reireiara: Ngkana a aki mutiakin ana kaetieti Ita. 49:15) E ngae ngkana e aki ibuobuoki n te tai ae waekoa, ma e na boni motiki taekaia taani bure aika aki rairi nanoia ibukin aia mwakuri n ribuaka n taina ae riai.
Iehova naake a taku bwa a beku irouna ao a karawawataia ana aomata, e aki riai ni bukinaki Iehova iai. E ngae n anne, e tangirira Iehova ao e norira ngkana ti aitara ma te ribuaka. E korakora riki rotakina ngkana ti maraki ni kabotauaki ma rotakin te tina ngkana e maraki natina. (E KANGAA NI KAMANENAAKI TE TUA?
16-18. Tera ae irekereke ma te Tua Rinanoni Mote, ao tera reireiara iai?
16 E irekereke te Tua Rinanoni Mote ma iterani maiuia nako tibun Iteraera, ngaia are e kakawaki bwa unimwaane aika mwiokoaki a na motiki taekaia ana aomata Iehova n te motikitaeka ae raoiroi. Tiaki tii tabeia rinanoani bwaai n taamnei ma tabeia naba rinanoani kauntaeka ao mwakuri n iowawa. Nori katoto aikai.
17 Ngkana iai tibun Iteraera ae tiritiri, e na aki tiringaki ngkekei naba. A na karaoa aia kakaae unimwaane n te kaawa ni kaineti ma te baere riki imwaini motikan taekana bwa e riai ni kamateaki ke e aki. (TuaKau. 19:2-7, 11-13) A karaoa naba te motikitaeka unimwaane ni kaineti ma baika kakaraoaki ni katoabong—ni moa mani kanakoraoani kauntaeka ibukini bwaai ni karokoa raoiakinan aia kangaanga taanga ni mare. (TeOti. 21:35; TuaKau. 22:13-19) Ngkana a aki tabeitera n aia babaire unimwaane ao a ongeaba tibun Iteraera n te Tua, a na bane ni kakabwaiaaki, ao e neboaki iai Iehova.—NakIbo. 20:7, 8; Ita. 48:17, 18.
18 Reireiara: A bane ni kakawaki iroun Iehova iterani maiura nako. E tangirira bwa ti na aki ribuaka ao ti na bwaina te tangira nakoia aomata nako. E nori baika ti karaoi ao n taekin, ngkana tii ngaira naba n ara auti.—Ebera 4:13.
19-21. (a) Tera aroia unimwaane ao taani moti nakoia ana aomata te Atua? (b) E kangaa te Tua Rinanoni Mote ni kamanoia aomata, ao tera reireiara iai?
19 E tangiriia ana aomata Iehova bwa a na aki iraraang n aia waaki ni kairiri aika bubuaka natannaomata ake i rarikia. Ngaia are e tua nakoia unimwaane ao taani moti bwa a na kamanena te Tua n aki inanonano. A aki riai taani moti ni karaoa ae ribuaka nakoia ana aomata ke n tuamatoa. Ma a riai n tangira te kaetitaeka ae riai.—TuaKau. 1:13-17; 16:18-20.
20 E nanoangaiia Iehova ana aomata ngaia are e katei tuua ibukini kamanoaia man te ribuaka. N te katoto, e kona te Tua ni kamanoa te aomata ae bukinaki n te aro ae kewe ibukin te bure ae kakaiaki. Iai riain te aomata anne n ataia bwa antai ae bukinna. (TuaKau. 19:16-19; 25:1) Ao imwain ae e motikaki bwa e bure, a riai taani kakoaua aika e aki kee i aan uoman n anga aia kaotioti. (TuaKau. 17:6; 19:15) Ma tera aron tibun Iteraera ae karaoa te bure ao e noraki iroun te tia kakoaua ae tii temanna? E aki riai n iangoia bwa e na aki katuuaaeaki. E bon noria Iehova. A anganaki te mwaaka ni kairiri taama i nanon te utu ma iai tiani mwaakaia ni kairiri. Ni kaineti ma kangaanga tabeua n te utu, a riai unimwaanen te kaawa n irekereke iai ao a na anga te kabanea ni motikitaeka.—TuaKau. 21:18-21.
21 Reireiara: E katea te katoto ae kororaoi Iehova. E kaetitaeka n ae riai ni bwaai ni kabane ake e karaoi. (TaiAre. 9:7) E angania naake a ongeaba n ana kaetieti kaniwangaia, ao e katuuaaeia naake a kabongana buaka mwaakaia ni kairiri. (2Tam. 22:21-23; Etek. 9:9, 10) A kona tabeman ni karaoa te mwakuri ae buakaka ao a taraa n aki reke kaia, ma e na bon taraia raoi Iehova bwa a na motikaki taekaia n taina ae riai. (TaeRab. 28:13) Ngkana a aki rairi nanoia, a na waekoa n ataia bwa “bon te bwai ae kakamaaku te bwaka nako nanoni bain te Atua ae maiu.”—Ebera 10:30, 31.
ANTAI AIKA KAMANOAKI RIKI N TE TUA?
Ngkana a kaeta te kangaanga unimwaane a riai ni kakairi n aron Iehova n tangiriia aomata ao n tangira te kaetitaeka ae riai (Nora barakirabe 22) *
22-24. (a) Antai aika kamanoaki riki n te Tua, ao tera reireiara iai ibukin Iehova? (b) Tera te kauring ae taekinaki n Te Otinako 22:22-24?
22 A kamanoaki riki n te Tua naake a aki kona ni kamanoia i bon irouia, n aroia ataei aika akea tamaia, aine aika a tia ni mate buuia, ao aomata aika maeka n iruwa. A tuangaki taani moti i Iteraera ni kangai: “Kam na tai kabwaoua motikan taekan te aomata ae maeka n iruwa ke te teei ae akea tamana, ao kam na tai anaa ana kunnikai te aine ae e a tia ni mate buuna bwa te bwai ni kaboomwi ibukin ana tangobwai.” TuaKau. 24:17) E kaota Iehova tabeakinaia aomata aika kainnanoa riki kamanoaia. E na katuuaaeia naake a karaoa ae ribuaka nakoia.—Wareka Te Otinako 22:22-24.
(23 A kamanoaki naba n te Tua kaain te utu mani mwakuri ni kabwaroua n aekana nako. (NakIbo. 18:6-30) E raoiroi te mwakuri aei irouia natannaomata ake i rarikia tibun Iteraera ao e aki bure, ma a riai ana aomata Iehova n iangoa te aeka ni mwakuri aei bwa te bwai ae riribaaki, n aron iangoana iroun Iehova.
24 Reireiara: E tangiriia Iehova taani kariri ake e mwiokoiia bwa a na tabeakinia raoi naake a mena i aan aia kairiri. E riribai mwakuri ni kabwaroua n aekana nako ao e taraia raoi bwa a na kamanoaki aomata nako ao a na anganaki te kaetitaeka ae riai, moarara riki naake a aki kona ni kamanoia.
TE TUA BONI “BANNANI BAIKA RARAOI AIKA A NA ROKO”
25-26. (a) E aera bwa ti kona n taekinna ae te tangira ao te kaetitaeka ae riai kaanga aron te ikeike ao te maiu? (b) Tera ae ti na maroroakinna n te kaongora are imwina ae reitan te reirei aei?
25 Te tangira ao te kaetitaeka ae riai kaanga aron te ikeike ao te maiu. A kainnanoaki baikai ni kauoua i aon te aba. Ngkana ti kakoauaa bwa e karaoa te kaetitaeka ae riai Iehova nakoira, e na rikirake tangirana iroura. Ao ngkana ti tangira te Atua ma ana kaetieti aika raraoi, ti a kairaki iai bwa ti na tangiriia aomata ao ni karaoa ae riai nakoia.
26 A buokaki tibun Iteraera bwa e na kaan riki aia iraorao ma Iehova n te berita n Tua Rinanoni Mote. Ma e toki te Tua ngke e kakororaoia Iesu, ao e oneaki mwina n te bwai ae raoiroi riki. (I-Rom 10:4) E kabwarabwaraa te abotoro Bauro te Tua anne bwa “bannani baika raraoi aika a na roko.” (Ebera 10:1) E na maroroakinaki n te kaongora are imwina tabeua mai buakoni baika raraoi aikai ao kakawakin te tangira ao te kaetitaeka ae riai n te ekaretia ni Kristian.
ANENE 109 Te Tangira ae Korakora Man te Nano
^ bar. 5 Aei te moani kaongora man te kaongora ae aua mwakorona, ake a na maroroakinaki iai bwa e aera ngkai ti kona ni kakoauaa ae e tabeakinira Iehova. Kaongora ake tenua a na rin n Te Taua-n-Tantani ae bwaini Mei 2019. Atuni kaongora akanne bon “Te Tangira ao te Kaetitaeka ae Riai n te Ekaretia ni Kristian,” “Te Tangira ao te Kaetitaeka ae Riai n Aki Ongea te Buakaka,” ao “Kabebeteaia Naake E Karaoaki te Ribuaka Nakoia.”
^ bar. 2 KABWARABWARAANA: Tuua aika 600 ao tabeua riki ake e anga Iehova nakoia tibun Iteraera rinanoni Mote, a aranaki bwa “te Tua,” “te Tua Rinanoni Mote,” ao “taian tua.” Irarikina, moani bokin te Baibara aika nimaua (Karikani Bwaai nakon Te Tua-Kaua) a aranaki n angiin te tai bwa te Tua. N tabetai e kabonganaaki te taeka aei ni kaineti ma te Koroboki ae Tabu n te Taetae n Ebera ae bwanin ae kairaki koreana n te taamnei.
^ bar. 60 TAAMNEI I MOAN TE MAEKATIN: E tangiriia ataei Iehova bwa a na namakina te rau ao te mweraoi n aia tai ni kaikawaaki ao n reireinaki irouia aia karo aika tatangira
KABWARABWARAAN TE TAAMNEI: E maroro te tina ae tibun Iteraera nakoia natina aine ngke a katauraoa te amwarake. Ao mai bukia, bon te karo ae e reireina natina te mwaane aroni kawakinaia tiibu.
^ bar. 64 KABWARABWARAAN TE TAAMNEI: Unimwaane ni mataroan oon te kaawa aika buoka te aine ae e a tia ni mate buuna ma natina ngke e karaoaki te mwakuri n ribuaka nakoia iroun te tia kaboonakoi bwaai.