1, 2. (1) Peb txhua leej txhua tus xav tau dabtsi? (2) Peb yeej ntseeg li cas?

PEB txhua leej txhua tus yeej xav kom luag hlub peb thiab xav kom luag ua ncaj rau peb. Yog luag tsis hlub thiab tsis ua ncaj rau peb, tej zaum yuav ua rau peb xav tias peb tsis muaj nuj nqes dabtsi thiab ntau zaus kuj ua rau peb tag kev cia siab.

² Yehauvas paub zoo tias peb yeej ntshaw kom luag hlub thiab ua ncaj rau peb. (Ntawv Nkauj 33:5) Peb yeej ntseeg tias peb tus Vajtswv hlub peb heev thiab xav kom luag ua ncaj rau peb xwb. Txoj Kevcai uas Yehauvas tau muab rau haiv neeg Yixayee yuav pab peb pom tseeb txog qhov no. Yog koj xav tias tsis muaj leejtwg hlub thiab ua ncaj rau koj, cia li mus kawm txog Mauxe Txoj Kevcai. * Koj yuav pom tias Yehauvas txhawj xeeb nws cov tibneeg npaum li cas.

3. (1) Raws li Loos 13:8-10, thaum peb kawm txog Mauxe Txoj Kevcai, peb kawm tau li cas? (2) Zaj no yuav teb cov lus nug twg?

³ Thaum peb kawm txog Mauxe Txoj Kevcai, peb pom peb tus Vajtswv Yehauvas txojkev hlub. (Nyeem Loos 13:8-10.) Hauv zaj no, peb yuav kawm txog ob peb txoj kevcai uas tau muab rau cov Yixayee coj thiab yuav teb cov lus nug no: Ua li cas thiaj hais tias vim Yehauvas hlub nws cov tibneeg nws thiaj muab txoj Kevcai rau lawv coj? Ua li cas thiaj hais tias txoj Kevcai txhawb tau tibneeg ua qhov ncaj? Cov uas tuav haujlwm yuav tsum siv txoj  Kevcai li cas? Thiab txoj Kevcai tiv thaiv leejtwg xwb? Cov lus teb rau cov lus nug ntawd yuav nplig tau peb lub siab, pab tau peb muaj kev vam khom, thiab rub tau peb txav ze rau peb Leej Txiv uas hlub peb.​—Tubtxib Tes Haujlwm 17:27; Loos 15:4.

4. (1) Ua li cas thiaj hais tias vim Yehauvas txojkev hlub thiaj tsa muaj Mauxe Txoj Kevcai? (2) Raws li Mathai 22:36-40, Yexus qhia tias 2 txoj kevcai twg thiaj yog 2 txoj tseem ceeb dua ntais?

⁴ Vim Yehauvas txojkev hlub, nws thiaj tsa muaj Mauxe Txoj Kevcai. (1 Yauhas 4:8) Txhua txoj kevcai hauv Mauxe Txoj Kevcai nyob tag nrho rau hauv 2 nqes no: Hlub Vajtswv thiab hlub kwvtij zej zog. (Levi Tej Kevcai 19:18; Kevcai 6:5; nyeem Mathai 22:36-40.) Yog li ntawd, peb thiaj paub tias 600 tawm lo lus sam hwm uas nyob hauv txoj Kevcai yuav tsum qhia txog Yehauvas txojkev hlub. Cia peb mus tham txog ob peb txoj kevcai ntawd.

5, 6. Yehauvas xav kom tej txij nkawm coj li cas, thiab Yehauvas yeej paub txog dabtsi? Piav txog tus qauv.

⁵ Muab siab npuab koj tus txij nkawm, thiab tsom kwm koj cov menyuam. Yehauvas xav kom tej txij nkawm ib leeg hlub ib leeg mus txog thaum laus nkoos. (Chiv Keeb 2:24; Mathai 19:3-6) Txojkev mus deev luag poj luag txiv yog ib txojkev txhaum uas loj tshaj plaws. Vim li no, hauv 10 Txoj Kevcai, txoj 7 thiaj txwv tsis pub mus deev luag poj luag txiv. (Kevcai 5:18) Kev mus deev luag poj luag txiv yog “ua txhaum rau Vajtswv” thiab yog ua siab phem rau yus tus txij nkawm. (Chiv Keeb 39:7-9) Tus uas tus txij nkawm tau mus deev luag poj luag txiv, tej zaum nws lub siab yuav mob ncuj ncia mus ntev niaj ntau xyoo.

⁶ Yehauvas yeej pom thaum ob niam txiv ib tug ua zoo ua phem rau ib tug. Nws xav kom cov txivneej Yixayee paub hlub lawv cov pojniam. Tus txiv uas hwm txoj Kevcai hlub nws tus pojniam thiab tsis lam tau lam muab nws tus pojniam nrauj pov tseg. (Kevcai 24:1-4; Mathai 19:3, 8) Tiamsis yog muaj teeb meem loj es nws txiav txim siab muab nws tus pojniam nrauj, nws yuav tau mus ua ntawv nrauj. Daim ntawv nrauj yuav tiv thaiv tus pojniam kom luag thiaj liam tsis tau tias nws tus pojniam ua nkauj ua nraug. Tsis tas li ntawd xwb, tus txiv yuav tau mus cuag cov kev txwj laus hauv lub nroog nws mam ua tau ntawv nrauj cev rau tus pojniam. Ua li no, lawv thiaj muaj sijhawm pab nkawd thiab. Thaum ib tug txivneej Yixayee lam tau lam nrauj nws tus pojniam, ntau zaus Yehauvas tsis cuam tshuam. Txawm li ntawd los, Yehauvas yeej pom tus pojniam lub kua muag poob, thiab nws yeej nrog tus pojniam mob siab.​—Malakhi 2:13-16.

7, 8. (1) Yehauvas sam hwm kom cov niam txiv coj li cas? (Saib daim duab ntawm lub khaum.) (2) Peb kawm tau li cas?

⁷ Txoj Kevcai kuj qhia tias Yehauvas mob siab tej menyuam heev. Nws xav kom lawv muaj kev zoo siab thiab nyob nyab xeeb. Yehauvas thiaj sam hwm kom cov niam txiv saib xyuas lawv tej menyuam kom muaj noj muaj haus thiab muaj kev ntseeg. Cov niam txiv yuav tsum siv txhua lub sijhawm los qhia menyuam kom paub hwm Yehauvas txoj Kevcai thiab paub hlub nws. (Kevcai 6:6-9; 7:13) Ib qhov uas Yehauvas rau txim rau cov Yixayee twb yog tej kev phem kev limhiam uas lawv ua rau lawv cov menyuam. (Yelemi 7:31, 33) Cov niam txiv yuav tsum tsis txhob muab lawv tej menyuam saib zoo li tej qhov txhia chaw es tsis quav ntsej lossis ua phem rau lawv, tiamsis yuav tsum muab lawv saib zoo li tej qub txeeg qub teg ntawm Yehauvas es ua tib zoo tu lawv.​—Ntawv Nkauj 127:3.

⁸ Peb kawm tau li cas: Yehauvas yeej ntsia ntsoov tej txij nkawm seb lawv coj li cas. Nws xav kom cov niam txiv hlub lawv cov menyuam. Yehauvas yuav txiav txim rau lawv yog lawv tsis hlub lawv cov menyuam.

9-11. Ua li cas Yehauvas thiaj muab txoj kevcai kom tsis txhob ua siab hlob?

 ⁹ Tsis txhob ua siab hlob. Hauv 10 Txoj Kevcai, txoj 10 txwv tsis pub ua siab hlob, lossis muaj lub siab mus ntshaw luag tug. (Kevcai 5:21; Loos 7:7) Yehauvas muab txoj kevcai no los qhia txog ib yam uas tseem ceeb heev. Nws qhia tias nws cov tibneeg yuav tsum ceev lawv lub siab thiab lawv txojkev xav. Nws paub tias tej kev phem yog pib hauv lub siab tuaj. (Paj Lug 4:23) Yog ib tug Yixayee pheej xav txog qhov phem hauv nws lub siab ces nws yuav mus ua phem. Vajntxwv Davi tau ua li ntawd. Nws yeej yog ib tug neeg zoo. Tiamsis muaj ib zaug, nws ua siab hlob xav tau luag poj luag sev. Nws txojkev ntshaw ntawd thiaj coj tau nws mus ua txhaum. (Yakaunpau 1:14, 15) Davi mus deev luag pojniam, dag rau tus txiv, thiab muab tus txiv tua.​—2 Xamuyee 11:2-4; 12:7-11.

¹⁰ Yehauvas yeej paub thaum ib tug Yixayee hla txoj kevcai ntawd vim nws paub tej uas nyob hauv neeg lub siab. (1 Vaj Keeb Kwm 28:9) Txoj kevcai txog kev ua siab hlob pab tau Yehauvas cov tibneeg kom tsis txhob xav txog tej uas yuav coj tau lawv mus ua phem. Yehauvas yeej yog Leej Txiv uas muaj tswvyim thiab kev hlub heev!

¹¹ Peb kawm tau li cas: Yehauvas tsis yog pom tus neeg sab nraud xwb, nws pom tshab rau hauv peb nruab siab seb peb zoo li cas tiag. (1 Xamuyee 16:7) Nws pom tej peb xav thiab tej peb ua huvsi. Nws nrhiav qhov zoo thiab txhawb kom peb rau siab ntso ua qhov ntawd. Tiamsis nws xav kom peb paub tias dabtsi nyob hauv peb lub siab xwv peb thiaj paub tswj thiab thiaj tsis mus ua phem.​—2 Vaj Keeb Kwm 16:9; Mathai 5:27-30.

12. Mauxe Txoj Kevcai qhia li cas?

¹² Mauxe Txoj Kevcai kuj qhia rau peb tias Yehauvas nyiam qhov uas ua ncaj xwb. (Ntawv Nkauj 37:28; Yaxaya 61:8) Yehauvas tso tau ib tug qauv zoo heev txog qhov no. Thaum cov Yixayee mloog Yehauvas lus, nws foom koob hmoov rau lawv. Thaum lawv tsis quav ntsej nws tej kevcai ncaj ncees, lawv raug kev txom nyem. Cia peb mus kawm txog 2 txoj kevcai ntxiv hauv 10 Txoj Kevcai.

13, 14. Hauv 10 Txoj Kevcai, txoj 1 thiab 2 qhia li cas, thiab thaum cov Yixayee ua raws li 2 txoj kevcai ntawd pab tau lawv li cas?

¹³ Pe hawm Yehauvas tib leeg xwb. Hauv 10 Txoj Kevcai, txoj 1 thiab 2 qhia tias cov Yixayee yuav tsum pe hawm Yehauvas tib leeg xwb thiab yuav tsum tsis txhob mus pe hawm tej dab mlom. (Khiav Dim 20:3-6) Ob txoj kevcai no tsis yog tsa los pab Yehauvas, tiamsis yog tsa los pab nws cov tibneeg. Thaum lawv muab siab npuab Yehauvas, lawv lub neej yeej vam meej. Tiamsis thaum lawv mus pe hawm lwm haiv neeg tej vajtswv, lawv raug kev txom nyem.

¹⁴ Xav txog cov neeg Khana-as. Lawv tsis pe hawm Yehauvas tus uas muaj sia zees nyob, tiamsis lawv pe hawm tej dab mlom uas twb tsis muaj sia, lawv thiaj ua tej uas qias vuab tsuab. (Ntawv Nkauj 115:4-8) Ib feem ntawm lawv txojkev pe hawm yog kev ua nkauj ua nraug thiab kev fij menyuam. Thaum cov Yixayee tso Yehauvas tseg mus pe hawm tej dab mlom, lawv kuj mus ua qias vuab tsuab thiab ua rau lawv tsev neeg raug ploj raug tuag. (2 Vaj Keeb Kwm 28:1-4) Cov thawj los tsis kam ua raws li Yehauvas tej kevcai ncaj ncees lawm. Lawv yuam cai thiab quab yuam cov uas qaug zog. (Exekhee 34:1-4) Yehauvas ceeb toom cov Yixayee tias nws yuav rau txim rau cov uas yuam cai ua siab phem rau tej pojniam menyuam uas tsis muaj txiv pab. (Kevcai 10:17, 18; 27:19) Tiamsis thaum cov Yixayee muab siab npuab Yehauvas es ib leeg ua ncaj rau ib leeg, nws foom koob hmoov rau lawv.​—1 Vajntxwv 10:4-9.

15. Peb kawm tau li cas txog Yehauvas?

¹⁵ Peb kawm tau li cas: Yeej tsis yog tim Yehauvas thaum cov uas hais tias lawv teev tiam  Yehauvas tiamsis ho hla nws tej kevcai mus ua phem rau nws cov tibneeg. Yehauvas hlub peb heev, nws paub thaum luag ua tsis ncaj rau peb. Nws tseem mob siab peb tshaj ib leej niam mob siab nws tus menyuam mos. (Yaxaya 49:15) Txawm nws tsis tshem kiag peb qhov teeb meem tamsid los thaum txog caij txog nyoog, nws yeej yuav rau txim rau cov neeg phem uas tsis ntxeev dua siab tshiab.

16-18. Siv tau Mauxe Txoj Kevcai tu tej plaub ntug twg xwb, thiab peb kawm tau li cas?

¹⁶ Mauxe Txoj Kevcai tu tau ntau yam teeb meem hauv tus Yixayee lub neej. Yog li ntawd, tseem ceeb heev rau cov laus neeg tu plaub rau Yehauvas cov tibneeg kom ncaj ncees. Lawv tes haujlwm tsis yog tu tej plaub ntug ntsig txog kev pe hawm xwb tiamsis lawv kuj tu tej plaub ntug thaum tsis muaj kev sib haum xeeb thiab thaum ib tug twg ua txhaum cai. Cia peb mus tham txog ib co qauv.

¹⁷ Yog ib tug Yixayee tua lwm tus tuag, yuav ua li cas rau nws? Cov kev txwj laus yuav tsis cia li muab tus ntawd tua tiamsis lawv yuav tshuaj xyuas seb yog tim li cas tiag tso. Tom qab ntawd lawv mam txiav txim siab seb puas tsim nyog nws raug lub txim tuag. (Kevcai 19:2-7, 11-13) Cov kev txwj laus kuj tu tej plaub ntug hauv lub cuab lub yig, tsis hais teeb meem sib txeeb liaj teb lossis teeb meem ntawm ob niam txiv. (Khiav Dim 21:35; Kevcai 22:13-19) Thaum cov kev txwj laus thiab cov Yixayee ua ncaj thiab coj raws li txoj Kevcai ces muaj kev thaj yeeb thiab ua rau Yehauvas tau koob meej.​—Levi Tej Kevcai 20:7, 8; Yaxaya 48:17, 18.

¹⁸ Peb kawm tau li cas: Txhua yam peb ua hauv peb lub neej puavleej tseem ceeb rau Yehauvas. Nws xav kom peb ua ncaj rau luag thiab hlub luag. Thiab nws pom tej peb hais thiab ua, tsis hais sab nraud lossis hauv peb vaj peb tsev.​—Henplais 4:13.

19-21. (1) Cov kev txwj laus thiab cov uas tu plaub yuav tsum tu plaub li cas rau Vajtswv cov tibneeg? (2) Yehauvas muab txoj kevcai twg rau nws cov tibneeg coj, thiab peb kawm tau li cas?

¹⁹ Yehauvas tsis xav kom nws cov tibneeg coj phem li tej haiv neeg uas nyob ib ncig lawv. Yog li ntawd, nws thiaj kom cov kev txwj laus thiab cov uas tu plaub ua raws li txoj Kevcai tsis txhob xaiv ntsej xaiv muag. Tiamsis nws kuj hais kom cov uas tu plaub tsis txhob ua nruj ua tsiv rau nws cov tibneeg, lawv yuav tsum nyiam ua qhov ncaj xwb.​—Kevcai 1:13-17; 16:18-20.

²⁰ Yehauvas hlub nws cov tibneeg heev, nws thiaj muab kevcai los tiv thaiv lawv kom ib leeg thiaj tsis ua phem rau ib leeg. Xws li, ib leeg lam tau lam iab hiam ib leeg. Tus uas raug iab hiam muaj cai nug seb leejtwg yog tus uas iab hiam nws. (Kevcai 19:16-19; 25:1) Ua ntej yuav teem txim rau tus uas raug iab hiam, yuav tsum muaj 2 tug los 3 tug ua timkhawv tias nws tau ua txhaum lawm tiag. (Kevcai 17:6; 19:15) Ua li, tus Yixayee uas tau ua txhaum tiamsis muaj 1 tug timkhawv xwb ne? Nws tsis txhob xav tias nws yuav dim dawb dim do tsis raug txim. Yehauvas  yeej pom qhov phem uas nws tau ua. Hauv lub cuab lub yig, tus txiv yog tus coj nws tsev neeg, tiamsis tsis yog nws yuav ua txhua yam li nws siab xav. Thaum muaj teeb meem hauv lub cuab lub yig, cov kev txwj laus hauv nroog yog cov yuav los hais thiab tu plaub rau lawv.​—Kevcai 21:18-21.

²¹ Peb kawm tau li cas: Yehauvas ua tau qauv zoo heev, tsis muaj ib yam uas nws ua es tsis ncaj li. (Ntawv Nkauj 9:7) Nws muab nqe zog rau cov uas coj raws nraim li nws tej kevcai, tiamsis nws rau txim rau cov uas yuam cai. (2 Xamuyee 22:21-23; Exekhee 9:9, 10) Ib txhia uas tau ua phem rau lwm tus xav tias lawv dim dawb dim do, tiamsis thaum txog Yehauvas lub sijhawm, nws yeej yuav txiav txim rau lawv. (Paj Lug 28:13) Yog lawv tsis ntxeev dua siab tshiab, lawv yeej yuav pom tias “qhov uas poob rau hauv Vajtswv uas muaj txojsia nyob txhais tes yog qhov uas txaus ntshai kawg.”​—Henplais 10:30, 31.

22-24. (1) Txoj Kevcai tiv thaiv cov twg, thiab peb kawm tau li cas txog Yehauvas? (2) Khiav Dim 22:22-24 ceeb toom li cas?

²² Yehauvas tsa txoj Kevcai los tiv thaiv cov uas tiv thaiv tsis tau lawv tus kheej, zoo li cov menyuam ntsuag, cov poj ntsuam, thiab cov uas yog lwm haiv neeg. Yehauvas hais rau cov uas tu plaub rau cov Yixayee tias: “Koj tsis txhob yuam lwm haiv neeg uas nrog nej nyob thiab tej menyuam uas tsis muaj txiv txojcai thiab tsis txhob muab tej poj ntsuam li tsoos tsho coj los yuam nqe.” (Kevcai 24:17) Yehauvas pab cov uas tiv thaiv tsis tau lawv tus kheej. Thiab nws rau txim  rau cov uas quab yuam lawv.​—Nyeem Khiav Dim 22:22-24.

²³ Txoj Kevcai kuj tiv thaiv cov hauv lub cuab lub yig kom tsis txhob ua ntsaum. (Levi Tej Kevcai 18:6-30) Yehauvas cov tibneeg yuav tsum coj txawv tej haiv neeg nyob ib ncig lawv uas coj thiab txhawb tej kev phem kev qias ntawd. Yehauvas cov tibneeg yuav tsum ntxub tej kev txhaum ntawd ib yam li Yehauvas ntxub.

²⁴ Peb kawm tau li cas: Yehauvas xav kom cov uas saib xyuas lwm tus hlub cov uas lawv saib xyuas. Nws ntxub qhov uas ib tug mus txhom mus mos lwm tus. Yehauvas xav tiv thaiv txhua leej txhua tus, tshwj xeeb cov uas tiv thaiv tsis tau lawv tus kheej, thiab nws xav kom lawv tau txais kev ncaj ncees.

25, 26. (1) Ua li cas peb thiaj hais tias kev hlub thiab kev ua ncaj zoo li txoj pa thiab txojsia? (2) Zaj 2 ntawm 4 zag kawm ua ntu zus yuav tham txog dabtsi?

²⁵ Kev hlub thiab kev ua ncaj zoo li txoj pa thiab txojsia. Nyob hauv ntiajteb no, yuav tsum muaj 2 yam ntawd huvsi. Thaum peb pom thiab ntseeg tias Yehauvas ua ncaj rau peb, peb hajyam hlub nws xwb. Thaum peb hlub Vajtswv thiab nyiam nws tej kevcai ncaj ncees, peb yuav xav hlub lwm tus thiab ua ncaj rau lawv.

²⁶ Twb yog muaj Mauxe Txoj Kevcai cov Yixayee thiaj muaj kev sib raug zoo nrog Yehauvas. Tiamsis Yexus yog qhov uas kawg nkaus ntawm txoj Kevcai, Vajtswv cov tibneeg thiaj tsis coj txoj Kevcai lawm. Tau muab ib yam zoo tshaj los pauv txoj Kevcai ntawd. (Loos 10:4) Tus tubtxib Povlauj piav tias txoj Kevcai yog “yam tsim txiaj uas yuav los tom qab tus duab xwb.” (Henplais 10:1) Zaj 2 ntawm 4 zag kawm ua ntu zus yuav tham seb tej “yam tsim txiaj” ntawd yog dabtsi thiab seb kev hlub thiab kev ua ncaj tseem ceeb npaum li cas hauv lub koom txoos Khixatia.