1-2. (a) Ɛbɛ ɖa-tɩŋa payɩ ɖɩsɔɔlaa? (b) Tɔm ndʋ yɔɔ pɩtɩpɔzɩ se ɖɩpɩtɩ?

ÐA-TƖŊA ɖɩñɩnɩɣ se pɔsɔɔlɩ-ɖʋ. Nɛ ɖa-tɩŋa ɖɩñɩnɩɣ ɖɔɖɔ se pataamuli-ɖʋ. Ye paawɩlɩɣ-ɖʋ sɔɔlɩm yaa siɣsiɣ wɛtʋ ɖoŋ ɖoŋ yɔ, pɩpɩzɩɣ nɛ pɩlabɩ-ɖʋ ɛzɩ ɖɩfɛyɩ wazaɣ nɛ ɖɩfɛyɩnɩ ɖɔɖɔ lidaʋ nakʋyʋ yɔ.

² Yehowa nawa se sɔɔlɩm nɛ siɣsiɣ wɛtʋ tɔm cɛyɩ siŋŋ ɖɛ-ɛsɩndaa. (Keɣa 32:5) Pɩtʋʋ fɛyɩ se Yehowa sɔɔlɩ-ɖʋ siŋŋ nɛ ɛtɩsɔɔlɩ ɖɔɖɔ se pomuli-ɖʋ. Ɛtɩŋnɩ Moyizi yɔɔ nɛ ɛɖʋ Izrayɛɛlɩ samaɣ Paɣtʋ natʋyʋ. Ye ɖɩtazɩɣ paɣtʋ ndʋ tɩ-taa yɔ, ɖɩnaɣ ɛ-sɔɔlɩm nɛ e-siɣsiɣ wɛtʋ kpayɩ kpayɩ. Ye lalaa ɩɩwɩlɩɣ-ŋ pɔ-sɔɔlɩm yaa pomuluu-ŋ hɔɔlɩŋ nɩɩyɩ taa nɛ pɩwɛɛ nɛ pɩcɛyɩɣ-ŋ yɔ, ɖitendi-ŋ na ɛzɩma Moyizi Paɣtʋ * wɩlɩɣ se Yehowa maɣzɩɣ ɛ-samaɣ yɔɔ camɩyɛ yɔ.

3. (a) Ɛzɩ Roma 13:8-10 yɔɔdʋʋ yɔ, alɩwaatʋ ndʋ ɖɩkpɛlɩkɩɣ Moyizi Paɣtʋ yɔ, ɛbɛ ɖɩnaɣ? (b) Tɔm pɔzʋʋ mbʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

³ Alɩwaatʋ ndʋ ɖɩkpɛlɩkɩɣ Moyizi Paɣtʋ yɔ, ɖɩnaɣ ɛzɩma ɖɛ-Ɛsɔ kʋsɔɔlʋ Yehowa sɔɔlɩ-ɖʋ siŋŋ yɔ. (Kalɩ Roma mba 13:8-10.) Tɔm ñʋʋ kʋnɛ kɩ-taa ɖɩkaɣ tazʋʋ paɣtʋ ndʋ Ɛsɔ kaaɖʋ Izrayɛɛlɩ samaɣ yɔ tɩ-taa natʋyʋ taa, nɛ ɖicosi ɖɔɖɔ tɔm pɔzʋʋ pʋnɛ pɩ-yɔɔ: Ɛbɛ yɔɔ ɖɩpɩzɩɣ nɛ ɖɩyɔɔdɩ se sɔɔlɩm kaakɛnɩ Moyizi Paɣtʋ tigiɖe? Ɛbɛ yɔɔ ɖɩpɩzɩɣ nɛ ɖɩyɔɔdɩ se Moyizi Paɣtʋ sɩɣaɣnɩ ɛyaa se pɛwɛɛnɩ siɣsiɣ wɛtʋ? Mba paawɛnɩ waɖɛ se pahʋʋ tɔm yɔ, ɛzɩma pɩɩwɛɛ se palabɩnɩ tʋmɩyɛ Moyizi Paɣtʋ? Nɛ ɛyaa mba yɔɔ ɖeyi ɖeyi Moyizi Paɣtʋ kandɩyaɣ? Ye ɖɩnɩ tɔm tʋnɛ tɩ-taa camɩyɛ yɔ, pɩpɩzɩɣ nɛ pɩhɛzɩ  ɖa-laŋa, pɩha-ɖʋ lidaʋ nɛ ɖɩñɔtɩnɩ ɖɔɖɔ ɖa-Caa kʋsɔɔlʋ nɛ pɩkpaɖɩ.​—Tʋma 17:27; Roma 15:4.

4. (a) Ɛbɛ yɔɔ ɖɩpɩzɩɣ nɛ ɖɩyɔɔdɩ se sɔɔlɩm kɛnɩ Moyizi Paɣtʋ tigiɖe? (b) Paɣtʋ ndʋ yɔɔ Yesu ñɩɣ niye Maatiyee 22:36-40 taa?

⁴ Ðɩpɩzɩɣ nɛ ɖɩyɔɔdɩ se Moyizi Paɣtʋ tigiɖe lɛ sɔɔlɩm mbʋ pʋyɔɔ yɔ, sɔɔlɩm ɖiyiɣni Yehowa lakasɩ kpeekpe. (1 Yoh. 4:8) Moyizi Paɣtʋ tɩŋa ñɩkaɣ niye paɣtʋ sɔsɔtʋ naalɛ tʋnɛ tɩ-yɔɔ: Sɔɔlɩ Ɛsɔ nɛ ŋsɔɔlɩ ño-koobu. (Lev 19:18; Wp 6:5; kalɩ Maatiyee 22:36-40.) Paɣtʋ ndɩ ndɩ ndʋ tɩɩcɛzɩ 600 nɛ payaɣ-tʋ se Moyizi Paɣtʋ yɔ tɩ-taa paa ndʋ lɛ, tɩwɩlɩɣ Ɛsɔ sɔɔlɩm hɔɔlʋʋ nakʋyʋ. Iyele nɛ ɖɩna kɩɖaŋ nɩɩyɩ.

5-6. (a) Ɛbɛ Yehowa sɔɔlaa se mba pɔɖɔkɩ nesi yɔ pala? (b) Nɛ ɛbɛ ɛnaɣ? Ha kɩɖaʋ nakʋyʋ.

⁵ Ñɔɔnɩ ñɛ-tɛŋga nɛ ŋcɔnɩ ɖɔɖɔ ñe-piya yɔɔ camɩyɛ. Yehowa sɔɔlaa se mba pɔɖɔkɩ nesi yɔ, pɛcɛyɩsɩ sɔɔlɩm mbʋ pɩwɛ pɛ-hɛkʋ taa yɔ nɛ piyele nɛ pɔsɔɔlɩ ɖama pe-wezuu kpeekpe. (Kiɖe 2:24; Mat. 19:3-6) Kañatʋ lakasɩ sɔsɔsɩ nzɩ ɛyʋ pɩzɩɣ nɛ ɛla yɔ, sɩ-taa nasɩyɩ lɛ acɛyɛ. Pʋyɔɔ Paɣtʋ Hiu ndʋ Ɛsɔ kaaha Izrayɛɛlɩ samaɣ yɔ, tɩ-taa lʋbɛ ñɩndʋ yɔɔdɩ kpayɩ se nesi ɖɔkɩyaa ɩkpa pa-tɩ nɛ acɛyɛ. (Wp. 5:18) Weyi ɛlakɩ kɩdɛkɛdɩm mbʋ yɔ, ‘ɛɖʋʋ Ɛsɔ ɖɩwɩzɩyɛ’ nɛ ɛlakɩ ɛ-tɛŋga kañatʋ siŋŋ. (Kiɖe 39:7-9) Weyi palabɩ-ɩ kañatʋ ndʋ yɔ, pɩwɩlɩɣ se ɛ-tɛŋga lɩ ɛ-wayɩ nɛ pɩwɛɣ nɛ pɩɖʋʋ-ɩ ɖɩwɩzɩyɛ pɩnzɩ sakɩyɛ.

⁶ Yehowa naɣ lakasɩ nzɩ nesi ɖɔkɩyaa lakɩ ɖama yɔ. Ɛɛsɔɔlɩ siŋŋ se Izrayɛɛlɩ abalaa ɩtaala pa-halaa ñaŋ. Abalʋ weyi ɛñaŋ Moyizi Paɣtʋ yɔ, ɛsɔɔlʋʋ ɛ-halʋ nɛ ɛɛkaɣ ñɩnʋʋ kawanaɣ nakɛyɛ se ɛ nɛ ɩ pɛcɛ nesi. (Wp. 24:1-4; Mat. 19:3, 8) Ɛlɛ ye tɔm sɔsɔtʋ natʋyʋ ɛkɔm pɛ-hɛkʋ taa nɛ pɩpɔzɩ se pɛcɛ nesi yɔ, pɩwɛɛ se ɛcɛlɩ-ɩ nesi cɛbʋ takayaɣ. Takayaɣ kanɛ kakandɩyɩɣ halʋ yɔɔ se pataakpa-ɩ ɖulum se ɛlabɩ acɛyɛ. Pɩtasɩ lɛ, pʋcɔ nɛ abalʋ cɛlɩ ɛ-halʋ nesi cɛbʋ takayaɣ lɛ, pɩtʋʋ fɛyɩ se pɩwɛɛ se ɛna tɛtʋ taa ɛzʋtʋyaa. Ɛlabɩ mbʋ yɔ, pɩhaɣ paba waɖɛ se pana se papɩzɩɣ nɛ pasɩnɩ-wɛ nɛ pataakizi ɖama. Ye piɖeni men-ɖeke wɛtʋ yɔɔ abalʋ nɔɔyʋ ekiziɣ ɛ-halʋ yɔ, Yehowa eekiziɣni-i. Paa mbʋ yɔ, Yehowa naɣ halʋ ɛnʋ ɛ-ɛsɩtɛɣlɩm nɛ ɛnɩɣ ɖɔɖɔ ɛ-wɩzasɩ.​—Mal. 2:13-16.

7-8. (a) Ɛbɛ Yehowa pɔzɩ lʋlɩyaa se pala? (Cɔnɩ takayaɣ huyuu yɔɔ kɩlɛmʋʋ.) (b) Lɔŋ weyi pɩkpɛlɩkɩɣ-ɖʋ?

⁷ Moyizi Paɣtʋ wɩlɩɣ ɖɔɖɔ se Yehowa maɣzɩɣ piya yɔɔ siŋŋ nɛ ɛsɔɔlaa se piɖeni-sɩ. Yehowa kaaɖʋ paɣtʋ lʋlɩyaa se pɔcɔnɩ pe-piya fezuu taa nɛ tomnaɣ yɔɔ kɩcɛyɩm ɖeɖe camɩyɛ. Pɩɩwɛɛ se lʋlɩyaa ɩtɩŋnɩ nʋmɔŋ kpeekpe yɔɔ nɛ pasɩnɩ pe-piya nɛ sɩtɩlɩ Yehowa Paɣtʋ nɛ sɩsɔɔlɩ-tʋ ɖɔɖɔ, nɛ sɩkpɛlɩkɩ ɖɔɖɔ ɛzɩma sɩwɩlɩ-ɩ sɩ-sɔɔlɩm yɔ. (Wp. 6:6-9; 7:13) Kɩdɛkɛdɩm mbʋ pɩ-yɔɔ Yehowa kaahɔm Izrayɛɛlɩ piya nɩŋgbaŋʋʋ yɔ, pɩ-taa nabʋyʋ lɛ se sɩlakaɣ si-piya nasɩyɩ kañatʋ siŋŋ. (Yer. 7:31, 33) Yehowa tɩsɔɔlɩ se lʋlɩyaa ɩkpaɣ pe-piya ɛzɩ mbʋ papɩzɩɣ nɛ pala pɩ-yɔɔ kaakendu yɔ nɛ pawɩlɩɣ-sɩ ñaŋ, ɛlɛ pɩwɛɛ se pana se sɩkɛ kʋjɔŋ weyi ɩlɩnɩ Yehowa cɔlɔ yɔ nɛ pɩpɔzʋʋ se pɔsɔɔlɩ-sɩ.​—Keɣa 126:3.

⁸ Lɔŋ weyi pɩkpɛlɩkɩɣ-ɖʋ yɔ: Yehowa naɣ lakasɩ nzɩ nesi ɖɔkɩyaa lakɩ ɖama yɔ. Ɛsɔɔlaa se lʋlɩyaa ɩsɔɔlɩ pe-piya nɛ ɛkaɣ-wɛ pɔzʋʋ akɔnta pɩlɩɩnɩ lakasɩ nzɩ palakɩ-sɩ yɔ sɩ-yɔɔ.

9-11. Ɛbɛ yɔɔ Yehowa ɖʋ paɣtʋ se Izrayɛɛlɩ piya ɩkpa sɩ-tɩ nɛ ɛsɩyɛ ɖʋʋ?

⁹ Taaɖʋ ɛsɩyɛ. Paɣtʋ Hiu ndʋ Ɛsɔ kaaha Izrayɛɛlɩ piya yɔ, tɩ-kɛdɛzaɣ ñɩndʋ pɔzaɣ-sɩ se sɩkpa sɩ-tɩ nɛ ɛsɩyɛ ɖʋʋ yaa mbʋ lɛlʋ wɛna yɔ pɩ-yɔɔ lɩmaɣza kɩdɛkɛda wɛnʋʋ. (Wp. 5:21; Roma 7:7) Yehowa tɩŋnɩ paɣtʋ tʋnɛ tɩ-yɔɔ se ɛwɩlɩ-sɩ lɔŋ ɩnɛ: Pɩwɛɛ se ɛ-samaɣ taa  paa weyi lɛ, ɛcɔnɩ ɛ-laŋɩyɛ yɔɔ pʋ-tɔbʋʋ se ɛ-maɣzɩm nɛ ɛ-yɔɔdaɣ yɔɔ camɩyɛ. Ɛnawa se lɩmaɣza kɩdɛkɛda yekina nɛ ɛyʋ lakɩ lakasɩ kɩdɛkɛdɩsɩ. (Adu. 4:23) Ye Izrayɛɛlɩ pɩɣa nakɛyɛ eyeba nɛ lɩmaɣza kɩdɛkɛda wɛɛ ka-laŋɩyɛ taa yɔ, pɩtʋʋ fɛyɩ se kakaɣ labʋ lalaa kañatʋ. Kpaca ŋgʋ kɩ-taa Wiyaʋ Daviid kaatɔlaa. Toovenim lɛ, Daviid kaakɛ ɛyʋ kɩbanʋ. Ɛlɛ alɩwaatʋ natʋyʋ taa lɛ, ɛkɔma nɛ ɛɖʋ ɛsɩyɛ lɛlʋ halʋ yɔɔ. Ɛ-lɩmaɣza kɩdɛkɛda ana ayeba nɛ ɛla kɩwɛɛkɩm. (Yak. 1:14, 15) Daviid labɩ acɛyɛ nɛ pɩtɛ lɛ, ɛñaɣ pana se epeɣzi halʋ weyi ɛ nɛ ɩ palabɩ acɛyɛ yɔ ɛ-walʋ, nɛ pʋwayɩ eyele nɛ pakʋ-ɩ.​—2 Sam. 11:2-4; 12:7-11.

¹⁰ Alɩwaatʋ ndʋ Izrayɛɛlɩ pɩɣa nakɛyɛ maɣnɩ ɛsɩyɛ ɖʋʋ paɣtʋ yɔɔ yɔ, Yehowa naɣ kpaagbaa mbʋ pʋyɔɔ yɔ, ɛnaɣ ɛyaa laŋa taa. (3 Aw. 28:9) Ɛsɩyɛ ɖʋʋ yɔɔ paɣtʋ wɩlaɣ samaɣ se pɩcɛyaa se kekizi lɩmaɣza wena ayeki nɛ ɛyʋ la lakasɩ kɩdɛkɛdɩsɩ yɔ. Tɔm tʋnɛ tɩwɩlɩɣ se Yehowa kɛ Caja kɩbanʋ weyi ɛwɛ lɔŋ pɩdɩɩfɛyɩ yɔ!

¹¹ Lɔŋ weyi pɩkpɛlɩkɩɣ-ɖʋ yɔ: Pɩtɩkɛ mbʋ pɩnaɣ ɛsa yɔɔ yem yɔ pi-ɖeke Yehowa naɣ, ɛlɛ ɛnaɣ pɩkpɛndɩnɩ laŋɩyɛ taa. (1 Sam. 16:7) Lɩmaɣza naayɛ yaa lakasɩ nasɩyɩ fɛyɩ se ɖɩpɩzɩɣ nɛ ɖɩmɛsɩ-ɩ sɩ. Ɛñɩnɩɣ se ɛna wɛtʋ kɩbandʋ ndʋ ɖɩwɛna yɔ, nɛ eseɣtiɣ-ɖʋ se ɖɩñɔɔnɩ-tʋ. Ɛlɛ ɛsɔɔlaa se ɖɩtɩlɩ lɩmaɣza kɩdɛkɛda wena añɔʋ ɖa-laŋa taa yɔ nɛ ɖɩlɩzɩ-yɛ kpaagbaa nɛ ataakɔɔ nɛ atuzi-ɖʋ nɛ ɖɩla lakasɩ kɩdɛkɛdɩsɩ.​—4 Aw. 16:9; Mat. 5:27-30.

12. Lɩmaɣzɩyɛ nɖɩ Moyizi Paɣtʋ wɩlaɣ kpayɩ kpayɩ?

¹² Moyizi Paɣtʋ wɩlɩɣ kpayɩ kpayɩ se Yehowa sɔɔlɩ siɣsiɣ wɛtʋ. (Keɣa 36:28; Iza. 61:8) Ɛha-ɖʋ siɣsiɣ wɛtʋ kɩɖaʋ ŋgʋ kɩtalɩ pilim yɔ. Alɩwaatʋ ndʋ Izrayɛɛlɩ piya ñaŋaɣ Yehowa paɣtʋ yɔ, ɛwazaɣ-sɩ. Nɛ alɩwaatʋ ndʋ sikizaɣ tɩ-yɔɔ ɖɔm yɔ, pɩkɔŋaɣnɩ-sɩ kʋñɔmɩŋ sakɩyɛ. Iyele nɛ ɖɩyɔɔdɩ Paɣtʋ Hiu ndʋ Yehowa kaaɖʋ Izrayɛɛlɩ piya yɔ, tɩ-taa paɣtʋ naalɛ lɛɛtʋ tɔm.

13-14. (a) Suwe Paɣtʋ Hiu taa kajalaɣ ñɩndʋ nɛ naalɛ ñɩndʋ pɔzaɣ? (b) Nɛ ɛzɩma tɩyɛ tɩ-ñam wazaɣ Izrayɛɛlɩ piya?

¹³ Sɛɛ Yehowa ɖeke koŋ. Paɣtʋ Hiu taa kajalaɣ ñɩndʋ nɛ naalɛ ñɩndʋ pɔzaɣ Izrayɛɛlɩ piya se sɩsɛɛ Yehowa ɖeke nɛ sɩkpa sɩ-tɩ nɛ sɩɩnaa latʋ. (Ejl. 20:3-6) Paɣtʋ ndʋ, pɩtɩkɛ Yehowa tɩwazaɣ. Ɛlɛ ɛɛɖʋ-tʋ se tɩwazɩ ɛ-samaɣ. Alɩwaatʋ ndʋ pɔɖɔŋaɣ ɛ-paɣtʋ yɔɔ siɣsiɣ yɔ, piɖeɣaɣni-wɛ. Ɛlɛ alɩwaatʋ ndʋ pɛsɛɣaɣ ajɛɛ lɛɛna taa ɛsɔnaa yɔ, pɩkɔŋnaɣ-wɛ kʋñɔmɩŋ ndɩ ndɩ.

¹⁴ Ðɩkpaɣ Kanaŋ ñɩma kɩɖaʋ. Pataasɛɣ Ɛsɔ ɛsadʋ, ɛlɛ pɛsɛɣaɣ sɩʋ kpelisi nzɩ siifeziɣ yɔ. Piyeba nɛ pɛpɛ pa-tɩ tɛtɛ. (Keɣa 113B:4-8) Kʋzʋʋ lakasɩ kɩdɛkɛdɩsɩ kaakɛ pɛ-ɛsɔnaa mba, pɛ-sɛtʋ hɔɔlʋʋ nakʋyʋ. Pakpakaɣ ɖɔɖɔ pe-piya nɛ pañaɣzɩɣ-sɩ miŋ. Mbʋ ɖɔɖɔ alɩwaatʋ ndʋ Izrayɛɛlɩ piya yekaɣ Yehowa sɛʋ nɛ sɩsɛɣ sɩɩnaa yɔ, sɩpɛŋaɣ sɩ-tɩ tɛtɛ, nɛ pɩkɔŋnɩ ɖɔɖɔ kʋñɔmɩŋ sɩ-hɔŋ yɔɔ. (4 Aw. 28:1-4) Mba paawɛnɩ waɖɛ se peɖiyi samaɣ yɔ, peyebi Yehowa paɣtʋ yɔɔ ɖɔm. Peɖiyaɣ lalaa nɛ kañatʋ nɛ palakɩ ñaŋ ajamaa nɛ pɩlabɩmwaa. (Ezek. 34:1-4) Yehowa heyi Izrayɛɛlɩ piya se ɛkaɣ hʋnʋʋ tɔm mba pawɩlɩɣ ñaŋ halaa nɛ piya nzɩ sɩfɛyɩnɩ nɔɔyʋ se ɛkandɩyɩ sɩ-yɔɔ yɔ. (Wp. 10:17, 18; 27:19) Ɛlɛ Yehowa wazaɣ Izrayɛɛlɩ piya yɔɔ alɩwaatʋ ndʋ sɩɖɔŋaɣ ɛ-paɣtʋ yɔɔ siɣsiɣ nɛ siimuluu ɖama yɔ.​—1 Aw. 10:4-9.

15. Lɔŋ weyi Yehowa tɔm kpɛlɩkɩɣ-ɖʋ?

¹⁵ Lɔŋ weyi pɩkpɛlɩkɩɣ-ɖʋ yɔ: Ye mba pamaɣzɩɣ se pɛwɛɛ nɛ pɛsɛɣ Yehowa yɔ, paaɖɔŋ ɛ-paɣtʋ yɔɔ nɛ palakɩ kañatʋ ɛ-samaɣ yɔ, pɩtɩlɩɩnɩ Yehowa cɔlɔ. Ɛlɛ Yehowa sɔɔlɩ-ɖʋ  nɛ alɩwaatʋ ndʋ pomuluu-ɖʋ yɔ eɖiɣni naʋ. Ɛnɩɣ ɖa-wɩzasɩ halɩ pɩkpaɖɩ ɛzɩma ɖoyo nɩɣ ɛ-pɩɣa wɩzasɩ yɔ. (Iza. 49:15) Paa ɛɛlakɩ nabʋyʋ kpaagbaa se mulum lakasɩ nzɩ sɩsɩɩ tɩnaɣ yɔ, ɛkaɣ pɔzʋʋ akɔnta kɩdɛkɛdɩm laɖaa mba paakpiɖiɣ po-mulum lakasɩ nzɩ sɩ-yɔɔ yɔ.

16-18. (a) Hɔɔlɩŋ ndɩ ndɩ weyi tɔm Moyizi Paɣtʋ yɔɔdaɣ? (b) Nɛ lɔŋ weyi pɩkpɛlɩkɩɣ-ɖʋ?

¹⁶ Moyizi Paɣtʋ yɔɔdaɣ Izrayɛɛlɩ piya wezuu caɣʋ hɔɔlɩŋ sakɩyɛ tɔm. Pʋyɔɔ lɛ, pɩɩcɛyaa se sɔsaa mba paawɛnɩ waɖɛ se pahʋʋ tɔm Ɛsɔ samaɣ taa yɔ, pahʋʋ-tʋ siɣsiɣ. Pɩtɩkɛ Ɛsɔ sɛtʋ paɣtʋ yɔɔ maʋ tɔm ɖeke pahʋwaɣ, ɛlɛ pahʋwaɣ ɖɔɖɔ tɔm pɩlɩɩnɩ kañatʋ lakasɩ nɛ tɔm ndʋ tɩkɔŋnɩ ɖama kɩɩnɩnʋʋ ɛyaa hɛkʋ taa yɔ, tɩ-yɔɔ ɖɔɖɔ. Iyele nɛ ɖɩyɔɔdɩ kɩɖaŋ nɩɩyɩ tɔm.

¹⁷ Ye Izrayɛɛlɩ pɩɣa ɛkʋ ko-koobu yɔ, pɩtɩwɩlɩ kpaagbaa se kamʋnɩ sɩm. Pɩwɛɛ se tɛtʋ taa ɛzʋtʋyaa ɩtazɩ tɔm taa nɛ pana se toovenim lɛ, kamʋnɩ sɩm yaa we. (Wp. 19:2-7, 11-13) Ɛzʋtʋyaa hʋwaɣ tɔm pɩlɩɩnɩ wezuu caɣʋ hɔɔlɩŋ lɛɛŋ yɔɔ ɖɔɖɔ: Tɔm ndʋ tɩkɔŋ ɛyaa hɛkʋ taa pɩlɩɩnɩ ñɩm nabʋyʋ yɔɔ yɔ, nɛ tɔm ndʋ tɩkɔŋ nesi ɖɔkɩyaa hɛkʋ taa yɔ. (Ejl. 21:35; Wp. 22:13-19) Alɩwaatʋ ndʋ ɛzʋtʋyaa hʋʋ tɔm siɣsiɣ nɛ Izrayɛɛlɩ mba ñaŋ Paɣtʋ yɔ, pɩwazaɣ pa-taa paa anɩ nɛ samaɣ kpeekpe ɖʋʋ hɩɖɛ ɖɔɖɔ Yehowa.​—Lev. 20:7, 8; Iza. 48:17, 18.

¹⁸ Lɔŋ weyi pɩkpɛlɩkɩɣ-ɖʋ yɔ: Ðe-wezuu caɣʋ hɔɔlɩŋ kpeekpe tɔm cɛyɩ Yehowa ɛsɩndaa. Ɛsɔɔlaa se ɖɩwɩlɩ siɣsiɣ wɛtʋ nɛ sɔɔlɩm lalaa. Ɛnɩɣ tɔm ndʋ ɖɩyɔɔdʋʋ yɔ nɛ ɛnaɣ ɖɔɖɔ mbʋ ɖɩlakɩ yɔ, halɩ pɩkpɛndɩnɩ alɩwaatʋ ndʋ ɖɩwɛ ɖe-ɖeke yɔ.​—Ebr. 4:13.

19-21. (a) Ɛzɩma pɩɩwɛɛ se tɛtʋ taa ɛzʋtʋyaa nɛ tɔm hʋyaa pɔcɔnɩ Ɛsɔ samaɣ yɔɔ? (b) Ɛzɩma Moyizi Paɣtʋ kandɩyaɣ Ɛsɔ samaɣ yɔɔ? (c) Nɛ lɔŋ weyi pɩkpɛlɩkɩɣ-ɖʋ?

¹⁹ Yehowa kaasɔɔlaa se ɛkandɩyɩ ɛ-samaɣ yɔɔ nɛ ajɛɛ wena aañɔtɩnɩ-kɛ yɔ, ataaɖɛzɩ-kɛ a-lakasɩ kɩdɛkɛdɩsɩ. Pʋyɔɔ ɛɛpɔzɩ ɛzʋtʋyaa nɛ tɔm hʋyaa se pataawɛɛnɩ tɛ yɔɔ tɛ yɔɔ lakasɩ, alɩwaatʋ ndʋ palakɩnɩ tʋmɩyɛ Paɣtʋ yɔ. Paa mbʋ yɔ, pɩtɩpɔzɩ se tɔm hʋyaa ɩlakɩ kañatʋ. Ɛlɛ pɩɩwɛɛ se pɔsɔɔlɩ siɣsiɣ wɛtʋ.​—Wp. 1:13-17; 16:18-20.

²⁰ Yehowa naɣaɣ ɛ-sɛyaa pʋtɔdɩyɛ, pʋyɔɔ ɛɛɖʋ paɣtʋ se tɩkandɩyɩ pɔ-yɔɔ nɛ pataamuli ɖama. Kɩɖaʋ nakʋyʋ lɛ se paaɖʋ paɣtʋ ndʋ tiyeki nɛ pɩwɛɛ kaɖɛ se papɩzɩ nɛ pɛcɛtɩnɩ ɛyʋ taa se ɛlabɩ kɩwɛɛkɩm sɔsɔm nabʋyʋ yɔ. Pʋdʋ ɛnʋ ɛwɛnɩ waɖɛ se ɛñɩnɩ nɛ ɛtɩlɩ mba pɛcɛtɩɣnɩ ɛ-taa tɔm yɔ. (Wp. 19:16-19; 25:1) Nɛ pʋcɔ nɛ pakʋ ɛ-tɔm lɛ, pɩwɛɛ se aseɣɖe tɩnaa naalɛ ɩlɩzɩ aseɣɖe nɛ pɩwɩlɩ kpayɩ kpayɩ se ɛlabɩ kɩwɛɛkɩm. (Wp. 17:6; 19:15) Nɛ ye aseɣɖe tʋ kʋɖʋm ɛnanɩ Izrayɛɛlɩ pɩɣa ŋga kalabɩ kɩwɛɛkɩm yɔ? Kaapɩzɩɣ nɛ kamaɣzɩ  se kalabɩ mbʋ yɔ, paakaɣ ka-nɩŋgbaaŋ hɔm pɩ-yɔɔ. Yehowa na mbʋ kalaba yɔ. Hɔʋ taa lɛ, cajanaa paaha waɖɛ se pɛkɛ ñʋndɩnaa, ɛlɛ po-ɖoŋ kaawɛnɩ kamaɣ. Nabʋyʋ taa ye tɔm natʋyʋ ɛkɔm hɔʋ taa ñɩma nabɛyɛ hɛkʋ taa yɔ, tɛtʋ taa ɛzʋtʋyaa kaawɛnɩ waɖɛ se paɖʋ pɔ-nɔɔ tɔm ndʋ tɩ-taa nɛ pɔcɔnɩ ti-ɖeɖe.​—Wp. 21:18-21.

²¹ Lɔŋ weyi pɩkpɛlɩkɩɣ-ɖʋ yɔ: Yehowa haɣ-ɖʋ kɩɖaʋ ŋgʋ kɩtalɩ pilim yɔ. Ɛɛlakɩ mulum lakasɩ kaaʋ. (Keɣa 88:15) Ɛwazɩɣ mba pɔɖɔŋ ɛ-paɣtʋ yɔɔ yɔ, nɛ ɛhɔŋ mba palakɩnɩ tʋmɩyɛ wala wena paha-wɛ yɔ nɛ kañatʋ yɔ, pa-nɩŋgbaaŋ. (2 Sam. 22:21-23; Ezek. 9:9, 10) Nabɛyɛ pɩzɩɣ nɛ pala kɩwɛɛkɩm nɛ pamaɣzɩ se nɔɔyʋ ɛɛkaɣ pa-nɩŋgbaaŋ hɔm, ɛlɛ alɩwaatʋ ndʋ Yehowa ɖʋwa yɔ, tɩtalɩɣ lɛ, ɛkaɣ yebu nɛ pahʋʋnɩ-wɛ tɔm. (Adu. 28:13) Ɛlɛ ye petikpiɖaa yɔ, pakaɣ ɖiɣzinuu se “pɩkɛ sɔɔndʋ tɔm se ɛyʋ ɛtɔlɩ Ɛsɔ ɛsadʋ nesi tɛɛ.”​—Ebr. 10:30, 31.

22-24. (a) Ɛyaa mba yɔɔ ɖeyi ɖeyi Moyizi Paɣtʋ kandɩyaɣ? (b) Nɛ ɛbɛ pɩkpɛlɩkɩɣ-ɖʋ Yehowa yɔɔ? (c) Ejipiti Lɩʋ 22:21-23 pakɩ-ɖʋ suwe?

²² Paɣtʋ kandɩyaɣ mba pataapɩzɩɣ se pakandɩyɩ pa-maɣmaɣ pa-tɩ yɔɔ yɔ, ɛzɩ solisi, lelaa, nɛ agɔma mbʋ yɔ. Paɣtʋ kaaheyi paa tɔm hʋyʋ weyi lɛ se: “Taakʋ ɛgɔm nɛ soliɣa pɔ-tɔm nɛ taakpaɣ lelu pɩsaʋ ɛ-kɩmɩyɛ ɖeɖe.” (Wp. 24:17) Pɩwɩlɩɣ se Yehowa maɣzaɣ mba paakɛ ajamaa siŋŋ samaɣ taa yɔ pɔ-yɔɔ. Nɛ ɛpɔzaɣ akɔnta mba palakɩ-wɛ kañatʋ yɔ.​—Kalɩ Ejipiti Lɩʋ 22:21-23.

 ²³ Paɣtʋ kandɩyaɣ ɖɔɖɔ hɔʋ taa ñɩma yɔɔ kʋzʋʋ kɩdɛkɛdʋʋ wezuu caɣʋ nʋmɔʋ taa, nɛ tɩyɔɔdʋʋ kpayɩ se hɔʋ kʋɖʋmʋʋ taa ñɩma ɖama sʋnʋʋ kɛ kɩwɛɛkɩm sɔsɔm. (Lev. 18:6-30) Ajɛɛ wena aacɔ Izrayɛɛlɩ nɛ ata yɔ, a-taa ɛyaa ñataamaɣzɩɣ se lakasɩ nzɩ sɩkɛ kɩdɛkɛdɩm sɔsɔm, nɛ halɩ lalaa ñamaɣzaɣ se wɛtʋ ndʋ tɩwɛ ɖeu. Ɛlɛ pɩɩwɛɛ se Yehowa samaɣ ɛwɛɛnɩ lɩmaɣza wena ɛ-maɣmaɣ ɛwɛna yɔ. Ana lɛ se lakasɩ nzɩ sɩkɛ lakasɩ kɩdɛkɛdɩsɩ siŋŋ.

²⁴ Lɔŋ weyi pɩkpɛlɩkɩɣ-ɖʋ yɔ: Yehowa sɔɔlaa se mba pɛwɛnɩ waɖɛ se pɔcɔnɩ ɛ-samaɣ yɔɔ yɔ, pɔcɔnɩ ka-taa paa weyi ɛ-yɔɔ nɛ sɔɔlɩm. Ɛpaɖɩɣ kʋzʋʋ kɩdɛkɛdʋʋ nɛ ɛsɔɔlaa se pakandɩyɩ nɛ pɔcɔnɩ paa anɩ ɛ-yɔɔ camɩyɛ kɔzɩ kɔzɩ mba pɛkɛ ajamaa siŋŋ yɔ.

25-26. (a) Ɛbɛ yɔɔ ɖɩpɩzɩɣ nɛ ɖɩyɔɔdɩ se sɔɔlɩm nɛ siɣsiɣ wɛtʋ pɛwɛ ɛzɩ helim nɛ wezuu yɔ? (b) Tɔm ñʋŋ naanza weyi ɩkaɣ-ɖʋ sɩnʋʋ se ɖa-taa ɛtɛ se Yehowa cɔŋnɩ ɖɔ-yɔɔ yɔ, ɩ-taa naalɛ ñɩŋgʋ kaɣ yɔɔdʋʋ ɛbɛ tɔm?

²⁵ Tɛtʋ yɔɔ cɩnɛ, sɔɔlɩm nɛ siɣsiɣ wɛtʋ pɛwɛ ɛzɩ helim nɛ wezuu yɔ. Ye helim ɛfɛyɩ, wezuu ɛɛwɛɣ ɖɔɖɔ. Mbʋ sɔɔlɩm nɛ siɣsiɣ wɛtʋ pɛwɛɛ. Ye ɖa-taa ɛtɛma se Yehowa lakɩ-ɖʋ mbʋ yɔ pɩwɛ siɣsiɣ yɔ, piyeki nɛ ɖɩsɔɔlɩ-ɩ nɛ pɩkpaɖɩ. Nɛ alɩwaatʋ ndʋ ɖɩsɔɔlʋʋ Ɛsɔ nɛ ɛ-paɣtʋ yɔ, pɩkaɣ-ɖʋ seɣtuu nɛ ɖɩsɔɔlɩ ɛyaa lalaa nɛ ɖɩwɩlɩ-wɛ siɣsiɣ wɛtʋ.

²⁶ Moyizi Paɣtʋ yeba nɛ taabalɩyɛ kɩbanɖɛ wɛɛ Yehowa nɛ Izrayɛɛlɩ piya pɛ-hɛkʋ taa. Paa mbʋ yɔ, sɔnɔ Ɛsɔ sɛyaa ɩɩtasɩɣ ɖɔm Moyizi Paɣtʋ yɔɔ mbʋ pʋyɔɔ yɔ, Yesu yeba nɛ tɩsɩɩ tɩnaɣ. Pɛlɛɣzɩ-tʋ nɛ mbʋ pɩkpaɖɩ ɖeu yɔ. (Roma 10:4) Apostoloo Pɔɔlɩ yɔɔdɩ Moyizi Paɣtʋ tɔm se tɩkɛ “wondu kɩbandʋ ndʋ tɩkaɣ kɔm yɔ tɩ-kɩlɛmʋʋ.” (Ebr. 10:1) Tɔm ñʋŋ naanza weyi ɩkaɣ-ɖʋ sɩnʋʋ se ɖa-taa ɛtɛ se Yehowa cɔŋnɩ ɖɔ-yɔɔ yɔ, ɩ-taa naalɛ ñɩŋgʋ kaɣ yɔɔdʋʋ wondu kɩbandʋ ndʋ tɩ-tɔm, nɛ ɛzɩma sɔɔlɩm nɛ siɣsiɣ wɛtʋ tɔm cɛyɩ Krɩstʋ ɛgbɛyɛ taa yɔ.