1-2. (a) Chumanyi chitwakeñaña wejima wetu? (b) Chumanyi chitwatela kwiluka?

WEJIMA wetu twakeñaña netu atumwekesheleña kukeña. Nawa twakeñaña kutwila chiwahi. Neyi anakutumwekeshela wanyi kukeña niwuñanji, tunateli kumona neyi twashikilamu wanyi nawa tunateli kuneña.

² Yehova weluka nindi twakeñaña netu atumwekesheleña kukeña nikutwila chiwahi. (Mas. 33:5) Twatela kwiluka netu Nzambi yetu watukeña nankashi nawa wakeñaña nindi atwileña chachiwahi. Twelukaña chumichi neyi tushinshika haNshimbi jahaniniyi Yehova kudi aIsarela kuhitila mudi Mosi. Neyi mwaneñaña muloña wakwila ayilaña chatama hela ayimwekeshelaña wanyi kukeña kudi akwenu, talenu Nshimbi yaMosi * chiyinakumwekesha chatiyañayi Yehova nawantu jindi.

3. (a) Neyi chinalumbululiwu haAroma 13:8-10, yumanyi yitwelukaña neyi tutaña Nshimbi jaMosi? (b) Malwihwinyi itukwakula muchinu chibaaba?

³ Neyi tunakutaña Nshimbi jaMosi, twelukaña chatiyañayi Nzambi yetu wukweti kukeña, Yehova. (Tañenu Aroma 13:8-10.) Muchinu chibaaba, tukuhanjeka hanshimbi jantesha jayinkeliwu aIsarela nawa tukwakula awa malwihu: Muloñadi chitukuhoshela netu Nshimbi jashindameneni hakukeña? Tukuhosheladi netu Nshimbi jakwashileña antu kusompesha mwawuñanji? Antu adiña nawuswa ateleleli kuzatisha  ñahi Nshimbi? Nawa anyi sweje-e akiñileñawu kudi Nshimbi? Ñakwilu yanawa malwihu yinateli kutukundeja, yikutukwasha kwikala nakuchiñeja nawa tukuswina kwakwihi naTata yetu wukweti kukeña.—Yil. 17:27; Rom. 15:4.

4. (a) Tukuhosheladi netu Nshimbi jaMosi jashindameneni hakukeña? (b) Nshimbinyi yashimwiniyi Yesu yekala haMatewu 22:36-40?

⁴ Tunateli kuhosha netu Nshimbi yaMosi yashindameneni hakukeña muloña yuma yejima yelañayi Yehova yashindamena hakukeña. (1 Yow. 4:8) Nshimbi jamwinkeliwu Mosi kudi Yehova jashindameneni hayuma yiyedi, kumukeña Nzambi nikukeña akwetu antu. (Lev. 19:18; Kuhit. 6:5; tañenu Matewu 22:36-40.) Dichi twatela kwiluka netu nshimbi jejima kubadika ku 600 jatuña Nshimbi jaMosi, jamwekeshaña kukeña kwekala naYehova. Tuhanjekenu haNshimbi jikwawu.

5-6. Yehova wakeñaña nindi adisumbula eleñadi, nawa chumanyi chashinshikañayi? Shimunenu chakutalilahu.

⁵ Ikalenu ashinshika kudi mwinikwenu nawa akamenenuña anyanenu. Yehova wakeñaña nindi adisumbula atwalekihu kwikala adikeña chikupu. (Kutach. 2:24; Mat. 19:3-6) Muntu neyi yela wujila, himuloña weneni chikupu muloña namwekeshi kukeña wanyi. Dimuloña waweni Nshimbi yamu 7 yekala hakachi kaNshimbi 10, yakaanishili kwila wujila. (Kuhit. 5:18) Neyi muntu yela wujila ‘hinshidi kudi Nzambi’ nawa nateli kumuneñesha mwinikwindi. (Kutach. 39:7-9) Muntu wukweti mwinikwindi wuneli wujila nateli kuneña hadi yaaka yayivulu.

⁶ Yehova wamonaña chadihembañawu eyala namumbanda. Wakeñeleña nindi aIsarela ahembeña chiwahi añodijawu. Iyala walemesheli Nshimbi, wadiña wamukeña ñodindi nawa hamuseñeleña hanyiloña yabula kushikilamuku. (Kuhit. 24:1-4; Mat. 19:3, 8) Ilaña neyi kunamwekani kukala kweneni wamuseñeleña nawa wamwinkeleña mukanda wakuseña nachu. Iwu mukanda wadiña nakumukiña mumbanda kulonda abuli kumutwambila nawu welili wuvumbi. Kubombelahu, henohu iyala kanda yamwinki ñodindi mukanda wakumuseñelahu, wayileña ntahi nakwihula akulumpi amumusumba. Neyi yela mwenimu, akulumpi esekeleña kuyikwasha kulonda ahembi wulu wawu. Bayi neyi mpinji yejima Yehova welileñahu chuma neyi kaIsarela yaseña ñodindi hakubula muloñaku. Hela chochu, wadiña nakushinshika chadilileña mumbanda anaseñiwu nawa watiyileña kutama.—Mal. 2:13-16.

7-8. (a) Yehova wayilejaña anvwali kwiladi? (Talenu mwevulu wudi hakava.) (b) Yumanyi yitunadiziliku?

⁷ Nshimbi yamwekeshaña cheñi nawu Yehova wakeñaña nindi anyana ekaleña namuzañalu nawa akiñewa. Yehova walejeli anvwali kukeñela anyanawu yuma yakumujimba nikuyikwasha kulonda ekali nawubwambu wawuwahi naNzambi. Anvwali azatileña nañovu kukwasha anyanawu kwiluka Nshimbi jaYehova nikumukeña. (Kuhit. 6:6-9; 7:13) Yehova wadiña cheñi nakuyibabesha aIsarela muloña akabishileña anyanawu. (Yere. 7:31, 33) Anvwali hiyateleleli kumona anyanawu neyi amukunkulwayi hela kuyila chatamaku, ilaña ateleleli kuyimona neyi hiwuswana, chawana chalema kufuma kudi Yehova.—Mas. 127:3.

⁸ Yuma yitunateli kudizilaku: Yehova wamonaña chadihembañawu eyala namumbanda. Wakeñaña nindi anvwali akeñeña anyanawu nawa wakayisompesha neyi abula kuhemba anyanawu chiwahi.

9-11. Muloñadi Yehova chahaniniyi nshimbi yakaanishili kwikala nalwisu?

⁹ Bayi mwikala nalwisuku. Nshimbi yakukumishaku hanshimbi 10, yakaanishili  lwisu hela kufwila chuma chamukwenu. (Kuhit. 5:21; Rom. 7:7) Yehova wahanini iyi nshimbi kulonda antu jindi ahembeña muchima niyitoñojoka yawu. Weluka nindi yuma yatama yatachikilaña mumuchima nimuyitoñojoka. (Yish. 4:23) Neyi kaIsarela yeteja yitoñojoka yatama kwikala mumuchima windi, wayikoñeleña akwawu chatama. Mwanta Davidi welili chuma chamuchidiwu. Wadiña muntu wamuwahi, ilaña ifuku dimu wafwilili ñoda mukwawu. Kufwila kwindi kwatama kwamuleñeleli kukoña nshidi. (Yak. 1:14, 15) Davidi welili wujila, wesekeli kumudimba mwini mumbanda, nkumininaku wamujahili.—2 Sam. 11:2-4; 12:7-11.

¹⁰ Neyi kaIsarela yafumpa nshimbi yahosheleña halwisu, Yehova welukileña, muloña yena welukaña yuma yitwatoñojokaña mumuchima. (1 Kushi. 28:9) Nshimbi yahosheleña halwisu yashimwini cheñi nawu antu jindi atela kutondolwela yitoñojoka yinateli kuyileñela kukoña yuma yatama. Mwalala Yehova hiTata wukweti kukena.

¹¹ Yuma yitunateli kudizilaku: Bayi neyi Yehova wamonaña muntu kumesu hohuku, ilaña wamonaña mukachi kamuchima wetu. (1 Sam. 16:7) Yuma yejima yitwatoñojokaña niyitwelaña yidi nzekesi kumesu indi. Wamonaña yuma yayiwahi mudi etu nawa watukoleshaña kutwalekahu kwila yuma yayiwahi. Ilaña wakeñaña nindi twilukeña nikutondolwela yitoñojoka yatama henohu kanda tukoñi yuma yatama.—2 Kushi. 16:9; Mat. 5:27-30.

12. Nshimbi jaMosi jakonkomwenaña hachumanyi?

¹² Nshimbi jaMosi jakonkomwenaña cheñi nawu Yehova wakeña wuñanji. (Mas. 37:28; Isa. 61:8) Wamwekesha chitunateli kushakama nawantu amakwawu. Yehova wadiña nakuyikiswila aIsarela neyi ovwahila nshimbi jayinkeliyi. Ilaña neyi abula kwovwahila nshimbi jindi jaloña adiña nakumona kukala. Shinshikenu nshimbi jikwawu jiyedi jekala hakachi kaNshimbi 10.

13-14. Nshimbi jiyedi jatachi jekala hakachi kaNshimbi 10 jalejeleña antu kwiladi, nawa yumanyi yafumineñamu neyi aIsarela ovwahila iji nshimbi?

¹³ Difukulenuña hohu kudi Yehova. Nshimbi jiyedi jatachi jekala haNshimbi 10 jahosheleña nawu aIsarela ateleleli kudifukula hohu kudi Yehova nawa ayikaanishili kudifukula kudi ankishi. (Kwid. 20:3-6) Bayi neyi Yehova washiliku iji nshimbi kulonda jimukwasheña yenaku, ilaña jikwasheña antu jindi. Antu jindi ashakamineña chiwahi neyi amwovwahila. Ilaña adiña nakumona yihuñu neyi atachika kudifukula kudi anzambi acheñi.

¹⁴ Talenu chuma chayimwekeneni aKenani. Adiña nakudifukula kudi ankishi chatela adifukuleña kudi Nzambi walala nawa wamumi. Nkumininaku, atachikili kwila yuma yansonyi. (Mas. 115:4-8) Mukudifukula kwawu mwadibombeleli wuvumbi nikulambula anyanawu. Munjila yoyimu, neyi aIsarela aleka kumwovwahila Yehova nakutachika kudifukula kudi ankishi, elileña yuma yansonyi nawa akabishileña yisaka yawu. (2 Kushi. 28:1-4) Akulumpi alekeli kulondela nshimbi jaYehova jahosheleña hawuñanji. Atachikili kuzatisha wuswa chatama nawa atachikili kukabisha antu akabakeneña niabulili wakuyikwasha. (Ezek. 34:1-4) Yehova wayisoñamishili aIsarela nindi wakababesha antu akabishileña antuluwa nianshona. (Kuhit. 10:17, 18; 27:19) Ilaña Yehova wayikiswilileña antu jindi neyi ekala ashinshika kudi yena nawa aleka kudikabisha wumu namukwawu.—1 Anya. 10:4-9.

15. Yumanyi yitwadizaña hadi Yehova?

¹⁵ Yuma yitunateli kudizilaku: Hitwatela  kumwinka Yehova nyiloña neyi antu elaña nawu amukalakelaña adiwula nshimbi nawa atachika kukabisha antu jindiku. Hela chochu, Yehova watukeña nawa wamonaña neyi anakutukabisha. Watiyaña kutama kubadika chatiyañayi mama yawantu neyi mwanindi nakukabakana. (Isa. 49:15) Hela chakwila hanateli kukañesha yuma yamuchidiwu kumwekanaku, ilaña kudi mpinji yakayisompeshayi antu abulaña kubalumuka mumuchima akabishaña akwawu.

16-18. Nshimbi jaMosi jahosheleña hayumanyi, nawa yumanyi yitunadiziliku?

¹⁶ Nshimbi jaMosi jahosheli nankashi hachihandilu chawaIsarela, dichi akulumpi atondeliwu kusompesha antu jaYehova ateleleli kusompesha munjila yaloña. Awa akulumpi adiña nakusompa nyiloña yakundamini kukudifukula kudi Yehova, kubula kutiyashana nikudijaha. Talenu iyi yakutalilahu.

¹⁷ Neyi kaIsarela yajaha mukwawu, hiyashikeneneña kumujahaku. Akulumpi amumusumba akeñakeñeleña wunsahu kulonda eluki neyi nakoñi muloña wakumujahilahu. (Kuhit. 19:2-7, 11-13) Akulumpi adiña cheñi nakusompa nyiloña yejima yamwekeneña, kushilahu ninyiloña yamuwulu. (Kwid. 21:35; Kuhit. 22:13-19) Neyi aIsarela atwalekahu kwovwahila Nshimbi nawa akulumpi niwena asompa chiwahi nyiloña, antu ejima adiña nakushakama chiwahi nawa aleteleña kalemesha kudi Yehova.—Lev. 20:7, 8; Isa. 48:17, 18.

¹⁸ Yuma yitunateli kudizilaku: Yehova wamonaña yuma yejima yitwelaña muchihandilu. Wakeñaña nindi tuyikeñi akwetu nikushakama nawu chiwahi. Nawa watiyaña yuma yitwahoshaña niyitwelaña hela chakwila tudi kwankawetu.—Heb. 4:13.

19-21. (a) Akulumpi niansompeshi ateleleli kusompesha ñahi antu jaNzambi? (b) Nshimbinyi yahaniniyi Yehova, nawa yumanyi yitunadiziliku?

¹⁹ Yehova wadiña nakukiña antu jindi kulonda abuli kuyiluwañesha kudi antu akunyuza yayinyeñumukili. Dichi, wakeñeleña nindi akulumpi niansompeshi azatisheña Nshimbi chakadi chaambu. Hela chochu, antu asompesheleña hiyateleleli kuzuwila hela kuyila antu jindi chatamaku. Ilaña ateleleli kusompa mwawuñanji.—Kuhit. 1:13-17; 16:18-20.

²⁰ Yehova wadiña nakutiyila antu jindi wushona, dichi washiliku nshimbi kulonda antu jindi abuleña kuyikabisha. Chakutalilahu, Nshimbi jakiñileña muntu kulonda abuli kumutwambila nawu nakoñi muloña. Muntu enkeleñawu muloña wadiña nawuswa wakwiluka muntu wunakumwinka muloña. (Kuhit. 19:16-19; 25:1) Nawa henohu kanda amwinki muloña, kwateleleli kwikala ayinsahu ayedi kulonda alumbululi. (Kuhit. 17:6; 19:15) Indi neyi kaIsarela yakoña muloña nawa hekala hohu chinsahu wumu? Iwu muntu  wateleleli wanyi kutoñojoka nindi akumuleka hachuma chatama chinakoñiyi. Yehova wamweneña chuma chakoñeliyi. Atata jawantu ayinkeleña wuswa muchisaka, ilaña adiña namwakukumina. Neyi muchisaka mumwekana kukala, akulumpi amumusumba adiña nawuswa wakusompa iyi nsañu nikufuukulahu chatela kwilawu.—Kuhit. 21:18-21.

²¹ Yuma yitunateli kudizilaku: Yehova wamwekesha chitwatela kumwimbujola, kwosi chuma chatama chelañayiku. (Mas. 9:7) Wakiswilaña antu ovwahilaña nshimbi jindi, ilaña wababeshaña antu azatishaña wuswa wawu chatama. (2 Sam. 22:21-23; Ezek. 9:9, 10) Amakwawu anateli kukoña yuma yatama nawa anateli kusweka kulonda abuli kuyibabesha, ilaña Yehova wamonaña nawa washaku mpinji yatelela yakuyisompesha. (Yish. 28:13) Neyi abula kubalumuka mumuchima, dihu helukañawu nawu “kubabeshewa kudi Nzambi wamumi hichuma chakutiyisha woma.”—Heb. 10:30, 31.

22-24. (a) Anyi akiñileñawu nankashi kudi Nshimbi, nawa yumanyi yitunakudizila kudi Yehova? (b) Kusoñamishanyi kwekala haKwidika 22:22-24?

²² Nshimbi yakiñileña sweje-e antu abulili wakuyikwasha, chidi neyi anshona, antuluwa niantu afumini kumatuña acheñi. Dichi ansompeshi amuIsarela ayilejeli nawu: “Bayi wakaheñesha muloña wamwenyi, hela wanshonaku, bayi wakakwatila ihina dantuluwaku.” (Kuhit. 24:17) Yehova wadiña nakuyakamena antu abulili wakuyikwasha muchituñilu.  Nawa wadiña nakubabesha antu akabishileña antu abulili wakuyikwasha.—Tañenu Kwidika 22:22-24.

²³ Nshimbi cheñi yadiña nakukiña antu amuchisaka kulonda abuleña kwila wuvumbi nawantaña jawu. (Lev. 18:6-30) Kwambukaku nawantu akumatuña anyeñumukili aIsarela adiña nakudiñija muyilwilu yamuchidiwu, ilaña antu jaYehova ateleleli kumona yilwilu yamuchidiwu neyi chayimweneñayi Yehova nawu hiyishimashima.

²⁴ Yuma yitunateli kudizilaku: Yehova wakeñaña nindi antu enkayi mudimu wakwakamena akwawu amwekesheña kukeña nikwakamena antu ejima alombolañawu. Wahela antu akaamaña akwawu chakuyikanjikija nawa wakeñaña nindi antu ejima ekali akiñewa nikuyisompela mwawuñanji, sweje-e antu abula wakuyikwasha.

25-26. (a) Tukuhosheladi netu kukeña niwuñanji kudi neyi kwona niwumi? (b) Yumanyi yitukahanjeka muchibaaba chinalondelihu muyinu yibaaba?

²⁵ Kukeña niwuñanji jidi neyi chekala kwona niwumi ahanu heseki; muloña jendelaña hamu. Twaswejaña kumukeña Yehova neyi twiluka netu watwililaña yuma yayiwahi. Nawa neyi tumukeña Nzambi ninshimbi jindi, tukuyikeña akwetu nikuyila mwamuwahi.

²⁶ Nshimbi jaMosi jayikwashileña aIsarela kwikala nawubwambu wawuwahi naYehova. Hela chochu, iji Nshimbi jaMosi jalekeli kuzatika chelili Yesu yashikiji Nshimbi, nawa iyi nshimbi ayisinsili kudi chuma chasweja kuwaha. (Rom. 10:4) Kapostolu Pawulu washimwini nindi Nshimbi himwevulu “wayuma yayiwahi yakenza.” (Heb. 10:1) Chibaaba chinalondelihu muyinu yibaaba chikahosha haniyi yuma yayiwahi nawa chikahosha cheñi chalemena kwikala nakukeña niwuñanji muchipompelu chawakwaKristu.