ARTIKLU GĦALL-ISTUDJU 9
L-imħabba u l-ġustizzja f’Iżrael tal-qedem
“Hu jħobb is-sewwa u l-ġustizzja. Bil-qalb tajba bl-imħabba taʼ Ġeħova mimlija l-art.”—SALM 33:5.
GĦANJA 3 Ġeħova jqawwina, ifarraġna, u jtina tama
ĦARSA BIL-QUDDIEM *
1-2. (a) X’jixtieq kull wieħed minna? (b) Minn xiex nistgħu nkunu ċerti?
ILKOLL kemm aħna nixtiequ nkunu maħbubin. U kull wieħed minna jixtieq li jiġi trattat b’mod ġust. Meta għal darba wara l-oħra niġu mċaħħdin mill-imħabba u l-ġustizzja, jistaʼ jkun li nħossuna ma niswew għal xejn u bla tama.
2 Ġeħova jaf li aħna nixtiequ ħafna li nintwerew imħabba u li nixxennqu għall-ġustizzja. (Salm 33:5) Nistgħu nkunu ċerti li Alla tagħna jħobbna ħafna u jixtieqna niġu trattati b’mod ġust. Dan narawh ċar meta nistudjaw sew il-Liġi li Ġeħova ta lill-poplu t’Iżrael permezz taʼ Mosè. Jekk tħossok imdejjaq ħafna minħabba li oħrajn ma ttrattawkx bi mħabba jew ġustizzja, jekk jogħġbok ara kif il-Liġi Mosajka * turi kemm Ġeħova jimpurtah min-nies tiegħu.
3. (a) Kif inhu spjegat f’Rumani 13:8-10, x’nitgħallmu meta nistudjaw il-Liġi Mosajka? (b) F’dan l-artiklu liema mistoqsijiet se nwieġbu?
3 Meta nistudjaw il-Liġi Mosajka, nitgħallmu dwar l-affezzjoni tenera li għandu Alla tagħna kollu mħabba, Ġeħova. (Aqra Rumani 13:8-10.) F’dan l-artiklu, se neżaminaw fid-dettall ftit biss mil-liġijiet li ngħataw lill-Iżraelin u se nwieġbu dawn il-mistoqsijiet: Għala nistgħu ngħidu li l-Liġi kienet mibnija fuq l-imħabba u inkuraġġiet lin-nies ikunu ġusti? Dawk fl-awtorità kif kellhom ipoġġu l-Liġi fil-prattika? U l-Liġi lil min ipproteġiet b’mod speċifiku? It-tweġibiet għal dawn il-mistoqsijiet jistgħu jipprovdu faraġ, jagħtuna tama, u jressquna eqreb lejn Missierna kollu mħabba.—Atti 17:27; Rum. 15:4.
LIĠI MIBNIJA FUQ L-IMĦABBA
4. (a) Għala nistgħu ngħidu li l-Liġi Mosajka kienet mibnija fuq l-imħabba? (b) Bħalma hu miktub f’Mattew 22:36-40, liema kmandamenti enfasizza Ġesù?
4 Nistgħu ngħidu li l-Liġi Mosajka kienet mibnija fuq l-imħabba għax kulma jagħmel Ġeħova hu motivat mill-imħabba. (1 Ġw. 4:8) Ġeħova bbaża l-liġijiet kollha li fformaw il-Liġi Mosajka fuq żewġ kmandamenti bażiċi—imħabba għal Alla u mħabba għall-proxxmu. (Lev. 19:18; Dt. 6:5; aqra Mattew 22:36-40.) Allura nistgħu nistennew li kull wieħed mis-600 kmandament u iktar li jifformaw il-Liġi jgħallimna xi ħaġa dwar l-imħabba taʼ Ġeħova. Ejja nagħtu ħarsa lejn xi eżempji.
5-6. Ġeħova xi jridhom jagħmlu lill-miżżewġin, u hu x’jaf eżatt? Agħti eżempju.
5 Kun leali lejn żewġek jew martek, u ħu ħsieb it-tfal tiegħek. Ġeħova jrid li l-miżżewġin jiżviluppaw imħabba b’saħħitha lejn xulxin, tant li tibqaʼ għal ħajjithom kollha. (Ġen. 2:24; Mt. 19:3-6) L-adulterju huwa wieħed mill-iktar affarijiet koroh li sieħeb fiż-żwieġ jistaʼ jagħmel. Mhux taʼ b’xejn li s-sebaʼ mill-Għaxar Kmandamenti jgħid li m’għandekx tagħmel adulterju. (Dt. 5:18) Huwa dnub “kontra Alla” u xi ħaġa kattiva li wieħed miżżewweġ jistaʼ jagħmel. (Ġen. 39:7-9) Il-parti innoċenti fiż-żwieġ tistaʼ tħoss l-uġigħ li jikkawża l-adulterju għal ħafna u ħafna snin.
6 Ġeħova jaf eżatt kif il-miżżewġin jittrattaw lil xulxin. Hu partikolarment ried li nisa Iżraelin jiġu trattati sew. Raġel li kien jirrispetta l-Liġi kien iħobb lil martu u ma jiddivorzjahiex għal kull ħaġa taʼ xejn. (Dt. 24:1-4; Mt. 19:3, 8) Imma jekk kienet tqum problema serja u jiddivorzjaha, hu kellu jagħtiha ċ-ċertifikat tad-divorzju. Dan iċ-ċertifikat kien jipproteġi lill-mara minn akkużi foloz taʼ immoralità. Barra minn hekk, qabel ma r-raġel setaʼ jagħmel dan, milli jidher kellu jitkellem max-xjuħ tal-belt, jew, mal-irġiel fl-awtorità. B’dal-mod, dawn l-irġiel kien ikollhom l-opportunità jipprovaw jgħinu lill-koppja jsalvaw iż-żwieġ tagħhom. Meta raġel Iżraeli kien jiddivorzja lil martu għal raġunijiet egoistiċi, Ġeħova mhux dejjem kien jintervieni, pereżempju permezz taʼ rġiel fl-awtorità jew profeti. Madankollu, hu kien jara kemm kienet tbati u tibki l-mara, u kien iħoss l-uġigħ tagħha.—Mal. 2:13-16.
Ġeħova ried li t-tfal iħossuhom protetti u fis-sigurtà waqt li bi mħabba jiġu mrobbijin u mgħallmin mill-ġenituri tagħhom (Ara paragrafi 7-8) *
7-8. (a) Ġeħova xi kmandahom jagħmlu lill-ġenituri? (Ara l-istampa tal-qoxra.) (b) X’lezzjonijiet nitgħallmu?
7 Il-Liġi wriet ukoll li Ġeħova jimpurtah ħafna mit-tfal u jridhom ikunu ferħanin u protetti. Ġeħova kmanda lill-ġenituri biex jagħtu lil uliedhom dak li jkollhom bżonn huma u jikbru u anki biex jgħinuhom jibnu ħbiberija tajba m’Alla. Il-ġenituri kellhom jużaw kull opportunità biex jgħinuhom jifhmu u japprezzaw il-Liġi taʼ Ġeħova u jitgħallmu jħobbuh. (Dt. 6:6-9; 7:13) Raġuni waħda għala l-Iżraelin ġew ikkastigati kienet għax trattaw ħażin lil uħud mit-tfal tagħhom b’modi tal-biżaʼ. (Ġer. 7:31, 33) Il-ġenituri kellhom iqisu lil uliedhom mhux bħala xi ħaġa li setgħu jittraskuraw jew jittrattaw ħażin, imma bħala wirt, rigal mingħand Ġeħova li għandhom jgħożżu.—Salm 127:3.
8 Lezzjonijiet: Ġeħova jinnota kif koppja miżżewġin jittrattaw lil xulxin. Hu
jrid lill-ġenituri jħobbu lil uliedhom, u se jiġġudika lill-ġenituri jekk jittrattawhom ħażin.9-11. Ġeħova għala ta l-liġi biex wieħed ma jixxennaqx b’għira?
9 Tixxennaqx b’għira. L-għaxar kmandament kien kontra li wieħed jixxennaq b’għira, jew, jiżviluppa xewqat ħżiena għal dak li hu taʼ ħaddieħor. (Dt. 5:21; Rum. 7:7) Ġeħova ta din il-liġi biex jgħallem lezzjoni importanti—li n-nies tiegħu kellhom jgħassu qalbhom, jiġifieri, il-ħsibijiet, is-sentimenti, u r-raġunar tagħhom. Hu jaf li azzjonijiet ħżiena jibdew minn ħsibijiet u sentimenti ħżiena. (Prov. 4:23) Jekk Iżraeli kien iħalli xewqat ħżiena jiżviluppaw f’qalbu, probabbilment kien se jittratta lil oħrajn ħażin. Is-Sultan David, pereżempju, waqaʼ f’dan l-iżball. Normalment, hu kien raġel tajjeb. Imma darba xxennaq b’għira għal mara taʼ raġel ieħor. Ix-xewqa tiegħu wasslet għal dnub. (Ġak. 1:14, 15) David għamel adulterju magħha, ipprova jqarraq b’żewġha, u mbagħad qatlu.—2 Sam. 11:2-4; 12:7-11.
10 Ġeħova kien ikun jaf meta Iżraeli ma kienx jobdi l-liġi dwar ix-xenqa b’għira—Hu jaf x’naħsbu u kif inħossuna. (1 Kron. 28:9) Il-liġi dwar ix-xenqa b’għira wriet lill-poplu tiegħu li għandhom jevitaw ħsibijiet li jistgħu jwasslu għal imġiba ħażina. X’Missier taʼ għerf u mħabba hu Ġeħova!
11 Lezzjonijiet: Ġeħova jara ħafna iktar minn dak li persuna hi minn barra. Hu jara x’hemm f’qalbna. (1 Sam. 16:7) L-ebda ħsieb, sentiment, jew azzjoni mhi sigriet għalih. Hu jfittex għat-tajjeb fina, u jixtieq li dak it-tajjeb jikber. Imma hu jixtieqna nagħrfu u nikkontrollaw il-ħsibijiet ħżiena qabel isiru azzjonijiet ħżiena.—2 Kron. 16:9; Mt. 5:27-30.
LIĠI LI INKURAĠĠIET IL-ĠUSTIZZJA
12. Il-Liġi Mosajka x’tenfasizza?
12 Il-Liġi Mosajka tenfasizza wkoll li Ġeħova jħobb il-ġustizzja. (Salm 37:28; Is. 61:8) Hu jagħtina l-aqwa eżempju taʼ kif nittrattaw lil oħrajn b’mod ġust. Meta l-Iżraelin obdew il-liġijiet li Ġeħova tahom, hu berikhom. Meta injoraw il-livelli sewwa u ġusti tiegħu, huma batew. Ikkunsidra żewġ liġijiet oħra mill-Għaxar Kmandamenti.
13-14. L-ewwel żewġ kmandamenti x’kienu jirrikjedu, u l-Iżraelin kif ibbenefikaw meta obdewhom?
13 Qim lil Ġeħova biss. L-ewwel żewġ kmandamenti kienu jirrikjedu li l-Iżraelin iqimu biss lil Ġeħova u wissewhom kontra l-qima lil idoli. (Eżo. 20:3-6) Dawn il-kmandamenti ma kinux għall-benefiċċju taʼ Ġeħova iżda għall-poplu tiegħu. Meta huma baqgħu leali lejh, irnexxew. Meta qiemu allat oħra, batew.
14 Aħseb fil-Kangħanin. Huma qiemu lil allat bla ħajja minflok lill-Alla l-veru u ħaj. B’hekk baxxew lilhom infushom. (Salm 115:4-8) Bħala parti mill-qima tagħhom, ħadu sehem f’affarijiet moqżieża sesswalment u ssagrifikaw lit-tfal b’mod li jwaħħax. L-istess nistgħu ngħidu għall-Iżraelin meta dawn injoraw lil Ġeħova u għażlu li jqimu allat oħra, huma baxxew lilhom infushom u weġġgħu lill-familji tagħhom. (2 Kron. 28:1-4) L-irġiel fl-awtorità rrifjutaw il-livelli ġusti taʼ Ġeħova. Abbużaw mill-qawwa li kellhom u ħaqru lid-dgħajfin u wħud bla protezzjoni. (Eżek. 34:1-4) Ġeħova wissa lill-Iżraelin li kien se jġib ġudizzju fuq min jittratta ħażin lin-nisa u tfal. (Dt. 10:17, 18; ) Mill-banda l-oħra, berikhom meta kienu leali lejh u ttrattaw lil xulxin b’mod ġust.— 27:191 Slat. 10:4-9.
Ġeħova jħobbna u jaf meta niġu trattati b’mod inġust (Ara paragrafu 15)
15. X’lezzjonijiet nitgħallmu dwar Ġeħova?
15 Lezzjonijiet: Mhuwiex it-tort taʼ Ġeħova meta dawk li jgħidu li jaqduh jinjoraw il-livelli tiegħu u jweġġgħu lill-poplu tiegħu. Madankollu, Ġeħova jħobbna u jaf meta nbatu inġustizzja. Hu jħoss l-uġigħ tagħna ħafna iktar minn kemm tħoss omm meta t-tarbija tagħha tbati. (Is. 49:15) Għalkemm jistaʼ jkun li ma jintervenix mill-ewwel, meta jasal il-waqt hu se jiġġudika lil dawk li għamlu l-ħażen u ma nidmux minn kif ittrattaw lil oħrajn.
IL-LIĠI KIF KELLHA TITPOĠĠA FIL-PRATTIKA?
16-18. Għal liema aspetti tal-ħajja kienet tapplika l-Liġi Mosajka, u x’lezzjonijiet nitgħallmu?
16 Il-Liġi Mosajka kienet tidħol f’ħafna aspetti tal-ħajja tal-Iżraelin, u għalhekk kien importanti li l-irġiel fl-awtorità jiġġudikaw lin-nies t’Alla b’ġudizzju ġust. Huma kellhom ir-responsabbiltà li mhux biss jiġġudikaw kwistjonijiet dwar il-qima taʼ Ġeħova imma anki dawk dwar ġlied u atti kriminali. Innota l-eżempji li ġejjin.
17 Kieku Iżraeli qatel lil xi ħadd, hu ma kienx jiġi maqtul awtomatikament. L-irġiel fl-awtorità tal-belt tiegħu kienu l-ewwel jinvestigaw iċ-ċirkustanzi, imbagħad jiddeċiedu jekk ħaqqux il-piena tal-mewt. (Dt. 19:2-7, 11-13) Huma kienu jiġġudikaw ukoll diversi kwistjonijiet oħra tal-ħajja, bħal li jiddeċiedu dwar nuqqas taʼ qbil fuq propjetà u li jirranġaw differenzi bejn il-miżżewġin. (Eżo. 21:35; Dt. 22:13-19) Meta l-irġiel fl-awtorità kienu ġusti u l-Iżraelin obdew il-Liġi, kulħadd ibbenefika, u l-poplu kien iġib unur lil Ġeħova.—Lev. 20:7, 8; Is. 48:17, 18.
18 Lezzjonijiet: Kull ħaġa li nagħmlu f’ħajjitna hija importanti għal Ġeħova. Hu jridna nkunu ġusti u nuru mħabba meta nittrattaw m’oħrajn. U hu jinnota dak li aħna ngħidu u nagħmlu anki meta nkunu waħedna d-dar.—Ebr. 4:13.
19-21. (a) Kif kellhom jittrattaw lill-poplu t’Alla l-irġiel fl-awtorità u l-imħallfin? (b) X’liġijiet għamel Ġeħova biex jipproteġi lin-nies, u x’lezzjonijiet nitgħallmu?
19 Ġeħova ried jeħles lill-poplu tiegħu mill-influwenza korrotta tal-popli ġirien. Għalhekk, ried li l-irġiel fl-awtorità u l-imħallfin ikunu newtrali meta japplikaw il-Liġi. Però, dawk li jiġġudikaw ma kellhomx jittrattaw lill-poplu tiegħu b’mod aħrax jew strett. Minflok, kellhom iħobbu l-ġustizzja.—Dt. 1:13-17; 16:18-20.
20 Ġeħova għandu l-mogħdrija, u għalhekk għamel liġijiet biex ma jħallix lin-nies jiġu trattati b’mod inġust. Pereżempju, il-Liġi naqqset il-possibbiltà li persuna tiġi akkużata b’mod falz li kisret Dt. 19:16-19; 25:1) U qabel ma jinstab ħati, kien hemm bżonn minn tal-inqas żewġ xhieda. (Dt. 17:6; 19:15) Imma x’kien jiġri jekk Iżraeli jagħmel att kriminali fejn xhud wieħed biss rah? Hu ma kellux jassumi li ma kienx se jiġi kkastigat. Ġeħova ra x’għamel. Fil-familja, il-missirijiet kienu ngħataw l-awtorità, imma din l-awtorità kellha l-limiti. F’ċerti argumenti tal-familja, l-irġiel tal-belt fl-awtorità kellhom ir-responsabbiltà li jkunu involuti u jieħdu l-aħħar deċiżjoni.—Dt. 21:18-21.
il-Liġi. L-akkużat kellu d-dritt ikun jaf min kien qed jakkużah. (21 Lezzjonijiet: Ġeħova jagħtina eżempju perfett. Kulma jagħmel hu ġust. (Salm 89:14) Hu jippremja lil dawk li jobdu b’lealtà l-livelli tiegħu, imma jikkastiga lil dawk li jużaw ħażin l-awtorità tagħhom. (2 Sam. 22:21-23; Eżek. 9:9, 10) Xi wħud jaf jaġixxu ħażin u jidhru li qed jaħarbu l-kastig, imma meta jkun il-waqt Ġeħova se jagħmel ċert li jiġu ġġudikati. (Prov. 28:13) U jekk ma jindmux, dalwaqt se jkunu jafu li “hi ħaġa tal-biżaʼ li taqaʼ f’idejn l-Alla l-ħaj.”—Ebr. 10:30, 31.
IL-LIĠI LIL MIN IPPROTEĠIET B’MOD SPEĊIFIKU?
Meta kien jinqalaʼ argument, l-irġiel fl-awtorità kellhom bżonn jimitaw l-imħabba u l-ġustizzja taʼ Ġeħova (Ara paragrafu 22) *
22-24. (a) Lil min ipproteġiet b’mod speċifiku l-Liġi, u x’nitgħallmu dwar Ġeħova? (b) Liema twissija nsibu f’Eżodu 22:22-24?
22 Il-Liġi pproteġiet b’mod speċifiku lil dawk li ma setgħux jipproteġu lilhom infushom, bħal tfal mingħajr ġenituri, romol, u residenti barranin. Lill-imħallfin f’Iżrael intqalilhom: “Tgħawwiġx il-ġudizzju tar-resident barrani jew tat-tifel bla missier, u taħtafx il-libsa taʼ xi armla Dt. 24:17) Ġeħova kien juri interess personali teneru lejn l-uħud l-iktar dgħajfin fil-komunità. U kkastiga lil dawk li ttrattawhom ħażin.—Aqra Eżodu 22:22-24.
bħala rahan [jew, garanzija].” (23 Il-Liġi pproteġiet ukoll lill-membri tal-familja minn kull forma taʼ inċest, jiġifieri, immoralità sesswali bejn membri tal-familja u qraba. (Lev. 18:6-30) Għall-kuntrarju tan-nies taʼ madwarhom, li ttolleraw jew skużaw din il-prattika, l-Iżraelin kellhom iqisu din il-prattika kif iqisha Ġeħova—xi ħaġa moqżieża.
24 Lezzjonijiet: Ġeħova jrid lill-uħud li hu jpoġġi fir-responsabbiltà biex jieħdu interess bi mħabba f’dawk kollha li jieħdu ħsieb. Hu jobgħod l-istupru, l-inċest, u l-abbuż tat-tfal, u jrid jagħmel ċert li kulħadd, speċjalment in-nies l-iktar dgħajfin, jingħataw protezzjoni. Il-persuna responsabbli għall-azzjonijiet ħżiena trid tagħti kont lil Ġeħova.
IL-LIĠI, “DELL TAʼ L-AFFARIJIET TAJBIN LI GĦANDHOM JIĠU”
25-26. (a) Għala nistgħu ngħidu li l-imħabba u l-ġustizzja huma bħan-nifs u l-ħajja? (b) X’se niddiskutu fl-artiklu li jmiss f’din is-serje?
25 L-imħabba u l-ġustizzja huma bħan-nifs u l-ħajja. Dawn ma tistax tisseparahom. Meta nkunu konvinti li Ġeħova qed jittrattana b’mod ġust, l-imħabba tagħna għalih tikber. U meta nħobbu lil Alla u l-livelli ġusti tiegħu, niġu mmotivati nħobbu lil oħrajn u nittrattawhom b’mod ġust.
26 Il-patt tal-Liġi Mosajka għen lill-Iżraelin ikollhom relazzjoni eqreb maʼ Ġeħova. Minkejja dan, il-poplu t’Alla ma kellux għalfejn jibqaʼ jobdi l-Liġi, u din ġiet mibdula maʼ xi ħaġa saħansitra aħjar. (Rum. 10:4) L-appostlu Pawlu ddeskriva l-Liġi bħala “dell taʼ l-affarijiet tajbin li għandhom jiġu.” (Ebr. 10:1) L-artiklu li jmiss f’din is-serje se jiddiskuti ftit minn dawn l-affarijiet tajbin u l-importanza li l-imħabba u l-ġustizzja għandhom fil-kongregazzjoni Kristjana.
GĦANJA 109 Ħobb mill-qalb bil-ħeġġa kollha
^ par. 5 Dan l-artiklu huwa l-ewwel wieħed minn serje t’erbgħa li se jiddiskutu għala nistgħu nkunu ċerti li Ġeħova jimpurtah minna. It-tliet artikli l-oħra se joħorġu fit-Torri tal-Għassa taʼ Mejju 2019. Dawn se jiddiskutu kif Ġeħova juri l-imħabba u l-ġustizzja fil-kongregazzjoni, kif Ġeħova juri l-imħabba u l-ġustizzja meta niffaċċjaw il-ħażen, u kif il-vittmi t’abbuż jistgħu jsibu faraġ.
^ par. 2 ESPRESSJONI SPJEGATA: Is-600 liġi u iktar li Ġeħova ta lill-Iżraelin permezz taʼ Mosè jissejħu “l-Liġi,” “il-Liġi taʼ Mosè,” “il-Liġi Mosajka,” u “l-kmandamenti.” Ukoll, l-ewwel ħames kotba tal-Bibbja spiss jissejħu l-Liġi. Kultant, dan it-terminu jintuża biex jirreferi għall-Iskrittura Ebrajka mnebbħa kollha.
^ par. 60 X’TGĦIDILNA L-ISTAMPA: Waqt li tipprepara l-ikel, omm Iżraelija tieħu pjaċir titkellem mal-bniet tagħha. Fuq in-naħa taʼ wara, missier jittrennja lil ibnu kif jieħu ħsieb in-nagħaġ.
^ par. 64 X’TGĦIDILNA L-ISTAMPA: L-irġiel tal-belt fl-awtorità bi mħabba jgħinu lil armla u binha li ġew trattati ħażin minn bejjiegħ tal-lokal.