1-2. (a) Atuheni otwa hala shike? (b) Otatu vulu okukala nuushili wuni?

ATUHENI otwa hala okukala tu holike. Otwa hala wo tu ungaungiwe natse nawa. Ngele otwa kala ihaatu ulukilwa ohole nokuungaungiwa natse pauyuuki, otashi vulika tu kale tu uvite kaatu na oshilonga nokaatu na etegameno lyasha.

² Jehova oku shi kutya otwa halelela okuulukilwa ohole nokuungaungiwa natse pauyuuki. (Eps 33:5) Otatu vulu okukala nuushili kutya Kalunga oku tu hole noonkondo nokwa hala tu ungaungiwe natse pauyuuki. Shika oshi iwetikile mompango ndjoka Jehova a li a pe oshigwana shaIsraeli okupitila muMoses. Ngele owu uvite nayi noonkondo, molwaashoka yalwe inaaya ungaunga nangoye pahole nenge pauyuuki, tala nkene Ompango yaMoses * tayi holola kutya Jehova oha kala e uvitile ngiini oshigwana she.

3. (a) Ngaashi sha yelithwa mAaroma 13:8-10, uuna tatu konakona Ompango yaMoses, ohatu ilongo mo shike? (b) Omapulo geni taga ka yamukulwa moshitopolwa shika?

³ Uuna tatu konakona Ompango yaMoses, ohatu mono nkene Jehova, Kalunga ketu, e tu hole. (Lesha Aaroma 13:8-10.) Moshitopolwa shika, otatu ka kundathana oompango dhimwepo ndhoka dha li dha pewa Aaisraeli, e tatu yamukula omapulo ngaka: Omolwashike tatu vulu okutya Ompango yaMoses oya li ya kankamena kohole? Omolwashike tatu vulu kutya Ompango ndjono oya li tayi humitha komeho uuyuuki? Aakwatelikomeho oya li ye na okulandula ngiini Ompango ndjono? Ompango ndjoka  oya li ya gamene oolye kondandalunde? Omayamukulo gomapulo ngoka, otaga vulu oku tu hekeleka, oku tu pa etegameno noku tu hedhitha popepyeelela naTate gwetu omunahole. — Iil. 17:27; Rom. 15:4.

4. (a) Omolwashike tatu vulu okutya Ompango yaMoses oya li ya kankamena kohole? (b) Ngaashi sha popiwa muMateus 22:36-40, iipango yini Jesus a tsu omuthindo?

⁴ Otatu vulu okutya Ompango ndjoka ya li ya pewa Moses kuKalunga, oya li ya kankamena kohole, molwaashoka kehe shoka Jehova ha ningi, ohi inyengithwa kohole. (1 Joh. 4:8) Jehova okwa li a tula po oompango dha kankamena kiipango iyali, ohole yokuhola Kalunga nohole yokuhola aantu ooyakwetu. (Lev. 19:18; Deut. 6:5; lesha Mateus 22:36-40.) Onkee ano, otatu vulu okutya oompango adhihe dhi vulithe po 600 ndhoka dhi li mOmpango yaMoses, otadhi tu longo sha kombinga yohole yaJehova. Natu ka taleni kiiholelwa yimwepo.

5-6. Jehova okwa hala aaihokani ya ninge shike, noha kala e wete shike? Gandja oshiholelwa.

⁵ Kala omudhiginini kukuume koye kopandjokana nokusila oshimpwiyu aamwoye. Jehova okwa hala aaihokani ya kale ye holathane noonkondo, opo ohole ndjoka yi kalelele. (Gen. 2:24; Mat. 19:3-6) Oluhondelo olwo lumwe lwomomayono ngoka ga kwata miiti. Onkene oshipango oshitiheyali shomIipango Omulongo, otashi indike oluhondelo, omolwetompelo ewanawa. (Deut. 5:18) Oluhondelo eyono “kuKalunga” nohalu uvitha nayi lela kuume kopandjokana ngoka kee na ondjo. (Gen. 39:7-9) Kuume ngoka ohashi vulika a kale e shi uvitile nayi uule womimvo odhindji.

⁶ Jehova oha kala e wete nkene aaihokani taya ihumbatelathana. Okwa li lela ha kala a hala aakulukadhi Aaisraeli ya ungaungiwe nayo nawa. Omusamane ngoka a li a simaneka Ompango, okwa li e na okukala e hole omukadhi noke na oku mu henga po miinima yaafele. (Deut. 24:1-4; Mat. 19:3, 8) Ihe uuna pwa holoka uupyakadhi wa kwata miiti, e te mu henge po, okwa li he mu pe onzapo yehengo. Onzapo ndjoka oya li hayi gamene omukiintu ngoka, opo kaa lundilwe kutya okwa ya moluhondelo. Shimwe ishewe, omusamane manga inaa gandja onzapo ndjoka komukadhi, okwa li tango ha ka popya naakuluntu yoshilando. Momukalo ngoka, aakuluntu mboka oya li haya kambadhala ya kwathele aaihokani mboka kaaya hengane. Uuna omulumentu Omuisraeli a henge po omukadhi, omolwomatompelo gokwiihola mwene, Jehova ka li aluhe ha yi mo olunyala. Ihe okwa li ha kala e wete nkene omukulukadhi ta mono iihuna naasho ta lili, nosha li hashi mu yemateke. — Mal. 2:13-16.

7-8. (a) Jehova okwa lombwela aavali ya ninge shike? (Tala ethano lyokombanda.) (b) Oshike tatu ilongo mo?

⁷ Ompango otayi ulike wo kutya Jehova oku na ko nasha nonkalonawa yaanona. Okwa li a lombwele aavali ya sile oshimpwiyu oyana palutu noku ya kwathela ya kale ye na ekwatathano ewanawa naKalunga. Aavali oya li haya longitha ompito kehe ya kwathele oyana, opo ya uve ko Ompango yaJehova nokukala ye yi lenga nosho wo okukala ye mu hole. (Deut. 6:6-9; 7:13) Etompelo limwe kutya omolwashike Jehova a li a geele Aaisraeli, olyo kutya oya li ya ungaunga naanona yawo yamwe, momukalo omunyanyalithi. (Jer. 7:31, 33) Aavali kaya li ye na okukala ya tala ko oyana kaaye na oshilonga nenge ya ungaunge nayo nayi, ihe oku ya tala ko ye li omagano ga za kuJehova, ngoka ye na okukala ya lenga. — Eps. 127:3.

⁸ Iiyilongomwa: Jehova oha mono nkene aaihokani taya ihumbatelathana. Okwa hala aavali ya kale ye hole oyana nota ka geela aavali mboka haya ningi nayi oyana.

9-11. Omolwashike Jehova a li a tula po ompango tayi indike okuhaluka iinima yaantu?

⁹ Ino haluka shaashoka shamukweni.  Oshipango shahugunina shomIipango Omulongo itashi popile okuhaluka nenge okwiihalela oshinima shagulwe. (Deut. 5:21; Rom. 7:7) Jehova okwa li a gandja oshipango shoka a longe oshigwana she oshinima sha simana kutya oshi na okutonatela omitima dhasho, ano omadhiladhilo, omaiyuvo nomainyengotompelo gasho. Oku shi shi kutya omuntu manga inaa ninga oshinima oshiwinayi, tango oha tameke te shi dhiladhila. (Omayel. 4:23) Uuna Omuisraeli a etha omahalo omawinayi ga koke muye, osha li hashi vulu oku mu ningitha a ungaunge nayalwe nayi. Pashiholelwa, omukwaniilwa David okwa li a ningi oshinima sha faathana. Ye mwene okwa li omulumentu e li nawa. Ihe pompito yimwe, okwa li a haluka omukulukadhi gwamukwawo. Omahalo ge oge mu ningitha a yone. (Jak. 1:14, 15) David okwa li a hondele, e ta kambadhala okukengelela omusamane gwomukulukadhi ngoka a yi naye momilalo, e te mu dhipagitha nokuli. — 2 Sam. 11:2-4; 12:7-11.

¹⁰ Jehova ngoka ha lesha omitima, okwa li ha vulu okumona Omuisraeli kehe ngoka a haluka oshinima shamukwawo. (1 Ondjal. 28:9) Ompango yi na ko nasha nokuhaluka, oya li yi na uuyelele kombinga yokuyanda omadhiladhilo ngoka haga fala meihumbato ewinayi. Jehova ke shi tuu Tate omunandunge nomunahole!

¹¹ Iiyilongomwa: Jehova ihe tu tala owala kombanda. Oha mono wo nkene tu li momitima. (1 Sam. 16:7) Kapu na shoka sha holekwa momeho ge. Oha mono uuwanawa mutse nohe tu ladhipike tu wu longe. Ihe okwa hala tu kale hatu ndhindhilike mo omadhiladhilo omawinayi noku ga pangela, manga inaage tu ningitha tu yone. — 2 Ondjal. 16:9; Mat. 5:27-30.

12. Ompango yaMoses, otayi tsu omuthindo shike?

¹² Ompango ndjoka ya li ya pewa Moses kuKalunga, oya li ya tsu omuthindo kutya Jehova okuhole uuyuuki. (Eps. 37:28; Jes. 61:8) Okwe tu tulila po oshiholelwa sha dhenga mbanda, shankene tu na okuungaunga nayalwe pauyuuki. Jehova okwa li ha yambeke Aaisraeli, uuna ya vulika koompango dhe. Uuna inaaye shi ninga, oya li haya mono iihuna. Natu ka taleni ishewe kiipango iyali yomIipango Omulongo.

13-14. Iipango iyali yomIipango Omulongo oya li tayi pula shike, noya etele ngiini Aaisraeli uuwanawa, uuna ya li ya vulika kuyo?

¹³ Longela Jehova oye awike. Iipango iyali yopetameko yomIipango Omulongo, oya li tayi pula Aaisraeli ya longele owala Jehova noku ya londodha kaaya longele iikalunga. (Eks. 20:3-6) Iipango mbyoka kaya li yi lile po uuwanawa waJehova. Pehala lyaashono, oya li yi lile po uuwanawa woshigwana she. Osha li hashi pondola, uuna sha vulika kuye, ihe osha li hashi mono iihuna, uuna sha longele iikalunga.

¹⁴ Dhiladhila kAakaanana. Oya li haya longele iikalunga, pehala lyokulongela Kalunga kashili nomunamwenyo. Oshizemo, oyi isitha ohoni yo yene. (Eps. 115:4-8) Sho taya longele iikalunga yawo, oya li haya kutha ombinga miinima ya nyata yi na ko nasha nomilalo noya li haya yamba po oyana. Sha faathana, sho Aaisraeli ya etha po okulongela Jehova, e taya tameke okulongela iikalunga, oya li yi ishundula e taya uvitha nayi omaukwanegumbo gawo. (2 Ondjal. 28:1-4) Aakwatelikomeho yawo, oya li ya etha po omithikampango dhaKalunga dhi na ko nasha nuuyuuki. Oya li haya longitha nayi oonkondopangelo dhawo nokuthindila kongudhi mboka kaaye na oonkondo nokaaye na omukwathi. (Hes. 34:1-4) Jehova okwa li a londodha Aaisraeli kutya ota ka geela mboka haya ningi onyanya aaselekadhi noothigwa. (Deut. 10:17, 18; 27:19) Mepingathano naashono, Jehova okwa li ha yambeke oshigwana she, uuna sha vulika kuye nuuna shi ihumbatelathana pauyuuki. — 1 Aak. 10:4-9.

15. Oshike tatu ilongo kombinga yaJehova?

 ¹⁵ Iiyilongomwa: Jehova haye e na okupewa ombedhi, uuna mboka taya ti otaye mu longele tayi ipwililikile omakotampango ge nokweehameka oshigwana she. Nonando ongawo, Jehova oku tu hole nohe shi mono, uuna tatu ningilwa okwaanuuyuuki. Oha kala e tu uvitile lela olukeno, e vule omwali nkene ha kala e uvitile okahanona ke hoka taka mono iihuna. (Jes. 49:15) Nonando otashi vulika a kale inaaya mo olunyala nziya, oha ka katukila onkatu omuyoni ngoka ini iyela ombedhi pethimbo lye, omolwomukalo moka ha ungaunga nayalwe.

16-18. Elalakano lyOmpango yaMoses olya li lyashike, notatu ilongo mo shike?

¹⁶ Ompango yaMoses oya li ya kwatela mo iinima oyindji mbyoka Omuisraeli a li ha ningi. Onkee ano, osha li sha simana opo aalumentu mboka ya langekwa po ya kale haya pangula oshigwana shaJehova pauyuuki. Kaya li owala ye na oshinakugwanithwa shokupangula iinima mbyoka yi na ko nasha nokulongela Jehova, ihe nomakuyunguto nosho wo iikulumuna. Natu ka taleni kiiholelwa tayi landula.

¹⁷ Uuna Omuisraeli a dhipaga omuntu, ka li owala ha thikile ta dhipagwa. Aakuluntu yoshilando oya li ye na tango okukonakona shoka sha kwatelwa mo, manga inaaya tokola ngele ngoka a dhipaga omukwawo ota dhipagwa. (Deut. 19:2-7, 11-13) Aakuluntu mboka oya li wo haya pangula iinima yi ili noyi ili yakehe esiku, ngaashi iihokolola yi na ko nasha niiniwe nenge noondjokana. (Eks. 21:35; Deut. 22:13-19) Uuna ye shi ningi pauyuuki, Aaisraeli e taya vulika kompango, kehe gumwe okwa li ha mono uuwanawa, noshigwana osha li hashi simanekitha Jehova. — Lev. 20:7, 8; Jes. 48:17, 18.

¹⁸ Iiyilongomwa: Kehe shoka hatu ningi monkalamwenyo, osha simana kuJehova. Okwa hala tu kale hatu ungaunga nayalwe pauyuuki nonohole. Oha uvu wo shoka tatu popi noha mono shoka tatu ningi, nonando kapu na ngoka e tu wete. — Heb. 4:13.

19-21. (a) Aakuluntu yoshilando naatokolihapu oya li ye na okuungaunga ngiini noshigwana shaKalunga? (b) Ompango ndjoka Jehova a li a tula po, oya li ya gamene aantu ngiini, notashi tu longo shike?

¹⁹ Jehova okwa li a hala a gamene oshigwana she kenwethomo ewinayi lyiigwana mbyoka ye shi kundukidha. Onkee ano, okwa li a tegelela aakuluntu yoshilando naatokolihapu ya pangule pauyuuki. Nonando ongawo, mboka ya li haya pangula kaya li ye na okuungaunga noshigwana she nonyanya. Pehala lyaashono, oya li ye na okukala ye hole uuyuuki. — Deut. 1:13-17; 16:18-20.

²⁰ Jehova oku hole oshigwana she. Onkene okwa li a tula po oompango, opo dhi gamene aantu kaaya ungaungiwe nayo kaashi li pauyuuki. Pashiholelwa, Ompango oya li ye shi ningi tashi wapa, opo okutamanekelwa iinima yiifundja kaaku londe pombanda. Omutamanekwa okwa li e na uuthembahenda wokutseya kutya olye te mu lundile. (Deut. 19:16-19; 25:1)  Manga nokuli inaa monika ondjo, opwa li pu na okukala ngaa nando oonzapo mbali dhi gandje uumbangi. (Deut. 17:6; 19:15) Ongiini kombinga yOmuisraeli ngoka a li a longo omuyonena, ihe okwa monika owala komuntu gumwe? Ka li e na okudhiladhila kutya ote ethiwa inaa geelwa, oshoka Jehova okwa mona shoka a ninga. Momaukwanegumbo, ootate oya li ya pewa oonkondopangelo, ihe odha li dhi na ongamba. Aakuluntu yoshilando oya li ye na oshinakugwanithwa shokuya mo olunyala moontamanana dhomomagumbo gamwe, nokuninga etokolo lyahugunina. — Deut. 21:18-21.

²¹ Iiyilongomwa: Jehova okwa tula po oshiholelwa dhingi, naashihe shoka ha ningi oshi li pauyuuki. (Eps. 9:7) Oha yambeke mboka haya vulika komithikampango dhe, ihe oha geele mboka haya longitha nayi oonkondopangelo dhawo. (2 Sam. 22:21-23; Hes. 9:9, 10) Yamwe otashi vulika ya longe uuhwapindi, e taya kala ya fa itaaya geelwa, ihe Jehova ote ke ya geela pethimbo lyo opala. (Omayel. 28:13) Ngele oya kala inaayi iyela ombedhi, masiku otaye ke shi mona kutya “iihuna yowala okugwila miikaha yaKalunga omunamwenyo!” — Heb. 10:30, 31.

22-24. (a) Ompango oya li ya gamene oolye kondandalunde, naashoka otashi tu longo shike kombinga yaJehova? (b) Elondodho lini tali adhika muEksodus 22:22-24?

²² Ompango oya li ya gamene kondandalunde mboka ya li itaaya vulu okwiigamena, ngaashi oothigwa, aaselekadhi naakwiilongo. Aatokolihapu oya li ya lombwelwa taku ti: “Ino goyokitha uuthemba waakwiilongo nowoothigwa,  nekumbyatha lyomuselekadhi ino li kwata po ombambyona.” (Deut. 24:17) Jehova okwa li e na ko nasha lela naamboka ihaaya vulu okwiikwathela. Okwa li ha geele mboka taya ungaunga nayi nayalwe. — Lesha Eksodus 22:22-24.

²³ Ompango oya li wo ya gamene iilyo yomaukwanegumbo kaayi ye momilalo naakwanezimo. (Lev. 18:6-30) Iigwana mbyoka ya li ya kundukidha Aaisraeli, oya li ya pitika oshinima shoka. Ihe Aaisraeli oya li ye na okutala ko oshinima shoka kutya osha nyata, ngaashi Jehova e shi tala ko.

²⁴ Iiyilongomwa: Jehova okwa hala mboka a langeka po ya kale haya ungaunga pahole naamboka ye li kohi yetonatelo lyawo. Oku tonde elongithonkondo lyopamilalo nokwa hala ayehe mboka kaaye na ngoka te ya kwathele, ya mone egameno nokuungaungiwa nayo pauyuuki.

25-26. (a) Omolwashike tatu vulu okutya uuyuuki nohole oya fa omufudho nomwenyo? (b) Oshike tatu ka kundathana moshitopolwa tashi landula?

²⁵ Ohole nuuyuuki oya fa owala omufudho nomwenyo. Kombanda yevi itaku vulu okukala ku na oshinima hashi fudha, ihe kashi na omwenyo. Uuna tu shi kutya Jehova ota ungaunga natse pauyuuki, ohole yetu yoku mu hola ohayi koko. Uuna tu hole Jehova nomithikampango dhe dhuuyuuki, ohashi tu inyengitha tu kale tu hole yalwe nokuungaunga nayo pauyuuki.

²⁶ Ompango yaMoses oya li ya kwathele Aaisraeli ya kale ye na ekwatathano lyopothingo naJehova. Nonando ongawo, oshigwana shaKalunga kasha li we shi na okulandula ompango ndjoka, sho Jesus e yi gwanitha po. Oya pingenwa po nokuli naashoka shi li hwepo lela. (Rom. 10:4) Omuyapostoli Paulus okwa popi Ompango yi li “efano lya dhimeya lyiinima iiwanawa tayi ke ya.” (Heb. 10:1) Oshitopolwa tashi landula, otatu ka kundathana kombinga yiinima yimwe iiwanawa nosho wo onkandangala ndjoka ohole nuuyuuki tayi dhana megongalo lyopaKriste.