1-2. (a) Dahme kitail koaros kin men pehm? (b) Dahme kitail kak kamehlele?

KITAIL koaros kin men pehm me mie me kin poakohng kitail. Oh kitail koaros kin men meteikan en kasalehda wiewia pahrek ong kitail. Ma kitail sohte pwurupwurehng ale mepwukat, ele kitail pahn pehm me sohte katepatail oh sohte atail koapworopwor.

² Siohwa mwahngih me kitail kin men pehm limpoak oh pwung pahrek. (Mel. 33:5) Kitail kak kamehlele me atail Koht uhdahn ketin poakohng kitail oh kupwurki wiewia pahrek en kohwong kitail. Met kin sansalda ni atail kadehde mwahu duwen Kosonnedo me Siohwa ketikihong wehin Israel ni eh ketin doadoahngki Moses. Ma ke uhdahn nsensuwed pwehki meteikan ar sohte kin kasalehda limpoak oh pwung pahrek, menlau tehk ia duwen Kosonned en Moseso * eh kin kasalehda duwen Siohwa eh ketin nsenohki sapwellime kan.

3. (a) Nin duwen me Rom 13:8-10 kawehwehda, dahme kitail sukuhlki ni atail onopki duwen Kosonned en Moseso? (b) Peidek dah kan me iren onop wet pahn sapengala?

³ Ni atail kin onopki Kosonned en Moseso, kitail kin sukuhlki duwen limpoak mehlel me atail Koht, Siohwa, sapwellimanki. (Wadek Rom 13:8-10.) Nan iren onop wet, kitail pahn tehk ekeite kosonned me kohwong mehn Israel kan oh sapengala peidek pwukat: Dahme kahrehda kitail kak nda me Kosonnedo poahsoankihda limpoak? Dahme kahrehda kitail kak nda me Kosonnedo kin kangoange aramas en pahrek? Ia duwen irail kan me ahneki manaman ar anahne kapwaiada Kosonnedo? Oh ihs me Kosonnedo kin keieu pere? Pasapengpen peidek pwukat kak kansenamwahwihala  kitail, kihong kitail koapworopwor, oh kakaranihala kitail rehn Samatailo me limpoak.​—Wiewia 17:27; Rom 15:4.

4. (a) Dahme kahrehda kitail kak nda me Kosonned en Moseso poahsoankihda limpoak? (b) Nin duwen me Madiu 22:36-40 kasalehda, kehkehlik dah kan me Sises ketin kasalehda?

⁴ Kitail kak nda me Kosonned en Moseso poahsoankihda limpoak pwehki limpoak kin kamwakid soahng koaros me Siohwa kin ketin wia. (1 Sohn 4:8) Kosonned koaros me Siohwa ketikihda me wiahda Kosonned en Moseso kin poahsoankihda kehkehlik mengei riau​—poakohng Koht, oh poakohng mehn mpomw. (Lip. 19:18; Deud. 6:5; wadek Madiu 22:36-40.) Eri kitail kak kasik me ehuehu kosonned 600 samwa ko me wiahda Kosonnedo kin padahkihong kitail mehkot duwen sapwellimen Siohwa limpoak. Kitail kilang ekei karasaras kan.

5-6. Dahme Siohwa ketin kupwurki pwopwoud kan en wia, oh dahme e ketin mwahngih? Menlau kihda ehu karasaras.

⁵ Loalopwoatohng omw pwoud, oh nsenohki noumw seri kan. Siohwa kupwurki pwopwoud kan en kakairada limpoak me inenen laud me kahrehda e kak poatopoat. (Sen. 2:24; Mad. 19:3-6) Kamwahl iei ehu mwekid me keieu suwed me emen kak wiahda ong eh pwoudo. Pwehki kahrepe mwahu ehu, keisuh en kosonned nan Kosonned Eiseko koasoia me kitail en dehr kamwahl. (Deud. 5:18) E wia dihp ehu “mwohn Koht” oh mwekid lemei ehu ong ahn emen eh pwoud. (Sen. 39:7-9) Ahn mehmeno me wiahda kamwahlo eh pwoud ele pahn medengkihla eh salelepek erein sounpar tohto.

⁶ Siohwa uhdahn ketin mwahngih duwen ahn pwopwoud kan ar wiewia ong emenemen. E kupwurki wiewia pahrek en kohwong lih pwopwoud en Israel kan. Ohl pwopwoud men me wauneki Kosonnedo pahn poakohng eh pwoud oh sohte pahn mweisang ih ni soh kahrepe mwahu. (Deud. 24:1-4; Mad. 19:3, 8) Ahpw ma kahpwal laud ehu pwarada oh e mweisang liho, e anahne kihong eh pwoudo doaropwehn mweipeseng. Doaropwehn mweipeseng wet kin pere lih emen sang meteikan ar pahn karaunehki ih tiahk samin me pid wia nsenen pwopwoud. Patehng met, mwohn ohl pwopwoudo kak kihong eh pwoudo doaropwehn mweipeseng, e anahne ale kaweid sang kaun akan en kahnimwo. Ni ahl wet, kaun ako pahn kak song en sewese pwopwoudo kamwahwihala ara mouren pwopwoudo. Ni ahnsou me ohl en Israel men mweisang eh pwoudo pwehki kahrepe roporop kan, Siohwa sohte kin ahnsou koaros ketin kauhdi dahme wiawi. Ahpw, e mahsanih uwen liho eh lokolok oh sengiseng, oh ketin mwahngih nsensuwed laud me liho ahneki.​—Mal. 2:13-16.

7-8. (a) Dahme Siohwa ketin kaweid pahpa nohno kan en wia? (Menlau kilang kilel ni kilin Kahn Iroir wet.) (b) Iren mehn kasukuhl dah kan me kitail sukuhlki?

⁷ Kosonnedo pil kasalehda me Siohwa ketin kupwurki seri kan en peren oh dehr perki mehkot. Siohwa ketin kaweid pahpa nohno kan en kihong neirail seri kan dahme re anahne ni arail kekeirda oh pil sewese irail en ahneki nanpwungmwahu reh. Pahpa nohno kan anahne isaneki ahnsou mwahu koaros en sewese neirail seri kan en kesempwalki sapwellimen Siohwa Kosonned oh sukuhlki en poakohng ih. (Deud. 6:6-9; 7:13) Ehu kahrepe me mehn Israel ko ale kalokolok sang Siohwa iei pwehki arail wiakauwe ekei neirail seri kan ni ahl me inenen suwed. (Ser. 7:31, 33) Pahpa nohno kan anahne wiahki neirail seri kan sohso ehu oh kisakis kesempwal ehu sang rehn Siohwa, ahpw kaidehn mehkot me ren wiakauwe de sohte nsenohki.​—Mel. 127:3.

⁸ Iren mehn kasukuhl kan: Siohwa kin ketin tehk duwen ahn pwopwoud kan ar wiewia ong emenemen. E ketin kupwurki pahpa nohno kan en poakohng neirail seri kan, oh e pahn ketin kadeik pahpa nohno kan ma re wiakauwe irail.

9-11. Dahme kahrehda Siohwa ketikihda kosonnedo en dehr noahrok?

⁹ Dehr noahrok. Imwiseklahn kosonned nan Kosonned Eiseko koasoia me emen en dehr  noahrok, de kakairada ineng sapwung en men ahneki mehkot me kaidehn ah. (Deud. 5:21; Rom 7:7) Siohwa ketikihda kosonned wet pwehn kasalehda iren mehn kasukuhl kesempwal ehu—sapwellime aramas akan anahne pere mohngiongirail, me iei, arail madamadau, oh pepehm kan. E ketin mwahngih me wiewia suwed kin tepisang pepehm oh madamadau suwed. (Lep. Pad. 4:23) Ma mehn Israel men mweidohng ineng sapwung kan en kekeirda nan eh mohngiong, eh wiewia ong meteikan pahn kakete sansalda ni ahl ehu me sohte limpoak. Karasepe, Nanmwarki Depit wiahda soangen sapwung wet. E wia ohl mwahu men. Ahpw ehu ahnsowo, e noahrokehda ahn emen ohl eh pwoud. Eh inengo kahrehda en dipada. (Seims 1:14, 15) Depit wiahda dipen kamwahl, song en pitihdi ahn liho pwoudo, oh eri kahrehiong ohlo en kamakamala.​—2 Sam. 11:2-4; 12:7-11.

¹⁰ Siohwa ketin mwahngih ni mehn Israel men eh sapeikiong kosonnedo me pid noahrok. E kak ketin mwahngih dahme kitail kin medewe oh pehm. (1 Kron. 28:9) Kosonnedo me pid en dehr noahrok padahkihong sapwellime aramas akan me ren soikala madamadau kan me kak kahrehiong irail en wia soahng suwed kan. Ia uwen Samatailo Siohwa eh sapwellimanki erpit oh limpoak!

¹¹ Iren mehn kasukuhl kan: Siohwa ketin mwahngih laudsang dahme mi mas likin aramas emen. E ketin mwahngih dahme uhdahn mi loalatail, nan atail mohngiong. (1 Sam. 16:7) Sohte madamadau, pepehm, wiewia me kak wia mehkot rir mwohn silangi. E kin ketin rapahki oh kangoange dahme mwahu rehtail. Ahpw e ketin kupwurki kitail en esehda oh kaunda madamadau sapwung kan mwohn ar wiahla wiewia sapwung kei.​—2 Kron. 16:9; Mad. 5:27-30.

12. Dahme Kosonned en Moseso kasalehda?

¹² Kosonned en Moseso pil kasalehda me Siohwa ketin poakohng pwung pahrek. (Mel. 37:28; Ais. 61:8) E ketin kasalehda mehn kahlemeng me keieu mwahu me pid ia duwen atail en kasalehda wiewia pahrek ong meteikan. Ni ahnsou me mehn Israel kan peikiong kosonned kan me Siohwa ketikihda, e kin ketin kapaiahda irail. Ni ahnsou me re kin pohnsehsehla sapwellime kaweid kan me pwung oh pahrek, re kin lokolok. Pil tehk kosonned riau tohrohr sang nan Kosonned Eiseko.

13-14. Dahme mehn Israel ko anahne wia me pid tepin kosonned riau ko nan Kosonned Eiseko, oh ia duwen arail peikiong kosonned pwukat eh wia kamwahu ong irail?

¹³ Kaudokiong Siohwa kelehpw. Tepin kosonned riau ko nan Kosonned Eiseko kasalehda me mehn Israel kan anahne kaudokiong Siohwa kelehpw oh kehkehlingki ren dehr kaudokiong dikedik kan. (Eks. 20:3-6) Kosonned pwukat kaidehn ong sapwellimen Siohwa kamwahu. Ahpw, re wia kamwahu kei ong sapwellime aramas akan. Ni sapwellime aramas akan ar kin kolokolete arail loalopwoatohng ih, re kin pweida mwahu. Ni arail kin kaudokiong koht en wehi teikan, re kin lokolok.

¹⁴ Medewehla duwen mehn Kenan kan. Re kin kaudokiong dikedik kan a kaidehn Koht mehlelo me ketin ieias. Imwilahn met, re kin kanamenekihala pein irail. (Mel. 115:4-8) Re kin wia soahng kasaut kan me pidada tiahk samin me pid wia nsenen pwopwoud oh meirongkihla neirail seri kan ni ahl me uhdahn suwed oh mepwukat wia kisehn arail kaudok. Pil duwehte met, ni mehn Israel kan ar pohnsehsehla Siohwa oh pilada en kaudokiong dikedik kan, re kanamenekihala pein irail oh kamedekihala arail peneinei kan. (2 Kron. 28:1-4) Irail kan me ahneki manaman kesehla sapwellimen Siohwa koasoandi pwung pahrek kan. Re doadoahngki ni ahl sapwung arail manaman en kaunda oh wiakauwe me luwet akan oh irail kan me sohte sawasparail. (Esek. 34:1-4) Siohwa ketin kehkehlikihong mehn Israel kan me e pahn ketin kadeikada irail kan me kin wiakauwe lih oh seri kan me sohte sawasparail. (Deud. 10:17, 18; 27:19) Weksang met, Siohwa ketin kapaiahda sapwellime aramas akan ni arail kin loalopwoatohng ih oh kasalehda wiewia pahrek ong emenemen.​—1 Nan. 10:4-9.

15. Iren mehn kasukuhl dah kan me kitail sukuhlki duwen Siohwa?

 ¹⁵ Iren mehn kasukuhl kan: Siohwa sohte ketin pwukoahki ni irail kan me kose me re kin papah ih ar pohnsehsehla sapwellime koasoandi kan oh kahrehiong sapwellime aramas akan en mihla nan keper. Ahpw Siohwa ketin poakohng kitail oh mwahngih ahnsou me kitail kin lokolongki wiewia sapahrek. E ketin mwahngih duwen atail lokolok laudsang nohno men eh pehm lokolok me nah serio ahneki. (Ais. 49:15) Mendahki ele e sohte pahn ketin mwadangete sewesehla kitail, ni ahnsou me kileldiong, e pahn ketin kadeik irail kan me sohte koluhkihla arail dihp pwehki arail kasalehda wiewia sapahrek ong meteikan.

16-18. Kosonned en Moseso kin kadoadoahk ong soahng dah kan nan mour, oh iren mehn kasukuhl dah kan me kitail sukuhlki?

¹⁶ Kosonned en Moseso kadoadoahk ong soahng tohto nan mouren mehn Israel men, eri e kesempwal me me mah men me idihdida en kadeik sapwellimen Siohwa aramas akan ni pwung pahrek. Re pwukoahki en kadeik kaidehn ihte soahng kan me pidada kaudok ong Siohwa ahpw pil nanpwung suwed kan oh tiahk mwersuwed kan. Tehk karasaras pwukat.

¹⁷ Ma mehn Israel men kemehla aramas emen, e sohte kin mwadangete kamakamala. Kaun akan en eh kahnimwo pahn tehk mwahu irair ko mwohn ar pilada ma e konehng en kamakamala. (Deud. 19:2-7, 11-13) Me mah ko pil kadeik soahng tohto me kin wiawi rahn koaros, duwehte kapwungala akamai en sahpw oh kahpwal kan nanpwungen pwopwoud ehu. (Eks. 21:35; Deud. 22:13-19) Ni me mah ko ar kasalehda pwung pahrek oh mehn Israel ko peikiong Kosonnedo, irail koaros kin paiekihda, oh wehio kin kawauwihala Siohwa.​—Lip. 20:7, 8; Ais. 48:17, 18.

¹⁸ Iren mehn kasukuhl kan: Soahng koaros nan atail mour kesempwal ong Siohwa. E ketin kupwurki kitail en kasalehda pwung pahrek oh limpoak nan atail wiewia ong meteikan. Oh e kin ketin tehk dahme kitail kin nda oh wia, mehnda ma kitail kelehpwla ni imwatail kan.​—Ipru 4:13.

19-21. (a) Ia pahn mwomwen wiewiahn kaun oh sounkopwung kan ong sapwellimen Koht aramas akan? (b) Ia duwen Kosonned en Moseso eh pere aramas akan, oh iren mehn kasukuhl dah kan me kitail sukuhlki?

¹⁹ Siohwa ketin kupwurki perehsang sapwellime aramas akan madamadau sapwung en wehi kan me karanih irail. Eri e ketin kupwurki me kaun oh sounkopwung kan en doadoahngki Kosonnedo ni ahl me soupoupali. Irail ko me kin wia kadeik sohte pahn kasalehda wiewia lemei ong sapwellime aramas akan. Ahpw, re pahn kasalehda wiewia pahrek ni limpoak.​—Deud. 1:13-17; 16:18-20.

²⁰ Siohwa ketin poakohng sapwellime aramas akan, eri e ketikihda kosonned kan pwe aramas akan en dehr lelohng wiewia sapahrek. Karasepe, Kosonnedo kin katikala ahn meteikan ar pahn karaunehki emen wiewia mwersuwed ehu. Me repen pwungo anahne ese ihs me wiahda karauno. (Deud. 19:16-19; 25:1) Oh mwohn eh pahn dierekda ma e dipada de soh, sounkadehde riemen  de tohtohsang anahne kihda mehn kadehde kan. (Deud. 17:6; 19:15) Ahpw ia duwen ma mehn Israel men wiahda mwersuwed ehu ahpw emente me kilangada? En dehr medewe me e sohte pahn ale kalokepen sapwung me e wiahdao. Siohwa ketin mahsanihada dahme e wiao. Nan peneinei, pahpa kan me ahneki manaman en kaunda, ahpw mie irepen arail manaman. Nan ekei kahpwal kan me pwarada nan peneinei, kaun akan nan kahnimwo ahneki pwukoa en iang pidada oh wiahda uhdahn pilipil ong irairo.​—Deud. 21:18-21.

²¹ Iren mehn kasukuhl kan: Siohwa ketikihda mehn kahlemeng me keieu unsek; sohte mehkot me e ketin wia kin sapahrek. (Mel. 9:7) E kin ketin kapaiahda irail kan me kin loalopwoatohng sapwellime koasoandi kan, ahpw e kin ketin kaloke irail kan me kin doadoahngki arail manaman en kaunda ni ahl sapwung. (2 Sam. 22:21-23; Esek. 9:9, 10) Ekei kin wia me suwed oh mwomwen me re kin pitsang kalokolok, ahpw ni ahnsou me Siohwa ketin kilelediong me konehng, e pahn ketin tehk mwahu me re pahn kadeikada. (Lep. Pad. 28:13) Oh ma re sohte koluhla, re pahn esehda me e wia “mehkot kamasepwehk lohdiong pahn limen Koht ieias.”​—Ipru 10:30, 31.

22-24. (a) Ihs me Kosonnedo kin keieu pere, oh dahme kitail sukuhlki duwen Siohwa? (b) Mehn kataman dahieu me Eksodus 22:22-24 kasalehda?

²² Kosonnedo kin keieu pere irail kan me sohte kak pere pein irail, duwehte me sepwoupwou kan, liohdi kan, oh mehn liki kan. Sounkopwung kan en Israel ale kaweid kan, me mahsanih: “Ke sohte pahn kihsang de kauwehla pwungen mehn liki kan, de me sepwoupwou kan; ke sohte pahn  pil kihsang en liohdi men eh likou mehn wia kadehdepen lohn.” (Deud. 24:17) Siohwa ketin kasalehda nsenoh laud ong irail kan me keieu sohte sawasparail. Oh e ketin kaloke irail kan me kasalehda wiewia sapahrek ong irail pwukat.​—Wadek Eksodus 22:22-24.

²³ Kosonnedo pil kin pere emenemen nan peneinei ehu sang soangen wiepen ngengngersuwed koaros. (Lip. 18:6-30) Weksang aramas en wehi kan me kapilpene Israel, me kin mweidada de pil wia tiahk wet, sapwellimen Siohwa aramas akan en tateki tiahk wet duwehte Siohwa eh ketin kalahdeki.

²⁴ Iren mehn kasukuhl kan: Siohwa ketin kupwurki irail me e ketikihong arail pwukoa en ni limpoak nsenohki koaros me re kin apwalih. Siohwa ketin kalahdeki tiahk mwersuwed kan me pidada tiahk samin me pid wia nsenen pwopwoud oh e ketin kupwurki me koaros, ahpw keieu irail kan me sohte sawasparail, en mie pereparail oh ale pwung pahrek.

25-26. (a) Dahme kahrehda kitail kak nda me limpoak oh pwung pahrek duwehte ahng oh mour? (b) Dahme kitail pahn koasoiapene nan keriaun iren onop sang iren onop pahieu ko?

²⁵ Limpoak oh pwung pahrek kin duwehte ahng oh mour; ehu a sohte kak mie ma sohte meteio. Ni atail kamehlele me sapwellimen Siohwa wiewia ong kitail kin pahrek, atail limpoak ong ih kin laudla. Oh ni atail poakohng Koht oh poakohng sapwellime koasoandi kan, met pahn kamwakid kitail en poakohng meteikan oh kasalehiong irail wiewia pahrek.

²⁶ Kosonned en Moseso sewese mehn Israel kan en ahneki nanpwungmwahu keren rehn Siohwa. Ahpw, sapwellimen Koht aramas akan solahr anahne peikiong Kosonnedo mwurin sapwellimen Sises meirong en pweinen pweipwei sapahlo, oh pil mehkot me mwahusang uhd wiliandi Kosonnedo. (Rom 10:4) Wahnpoaron Pohl kawehwehda Kosonnedo nin duwen “mwetehn soahng mwahu kan me pahn kohdo.” (Ipru 10:1) Keriaun iren onop sang iren onop pahieu ko pahn kasalehda duwen ekei soahng mwahu pwukat oh kesempwalpen limpoak oh pwung pahrek nan mwomwohdisohn Kristian.