1, 2. a) ¿Imashina tratachunda tucuicunallata munapanchi? b) ¿Imatata seguro cana capanchi?

TUCUICUNALLATAMI ali tratachun, juyachun munapanchi. Shinapash gentecuna ñucanchita na juyajpi, nali tratajpimi llaquilla sintiripanchi. Shina sintirimandami huaquinbica imapapash na sirvinichu nishpa pensai callarishcanchi.

² Jehová Diosca alimi yachan ñucanchicunata ali tratachun munashcata (Sal. 33:5). Jehová Diosca tucuicunatallata juyaihuan tratan. Chaitaca tucuicunallatami seguro cana capanchi. Chaitaca ¿imashinata yachai ushapanchi? Punda tiempopi israelitacunaman paipa leyta Moisesman cushpami juyashcata ricuchirca. Tal vez shujcuna na ali tratajpichari llaquilla causajupangui. Shinaca Moisesman cushca leyta yachajunami cushilla sintirichun ayudanga *. Chaipica Jehová Dios paita sirvijcunata imashina juyashcatami yachajui ushapangui.

3. a) Romanos 13:8-10​pi nishca shinaca Moisesman cushca leycunapica ¿imatata yachajupashun? b) Cai temapica ¿ima tapuicunamandata yachajupashun?

³ Moisesman cushca leycunamanda yachajushpaca Jehová Dios ñucanchicunata juyashcatami cuenta japipanchi (Romanos 13:8-10, liingui). Cai temapica israelitacunaman cushca huaquin leycunamandami yachajupashun. Shinallata cai tapuicunamandapashmi yachajupashun: Moisesman cushca leycunapica ¿imashinata juyaihuan yachachishcata ricuchirca? ¿Imashinata imatapash alita ruraj cashcata ricuchirca? ¿Israelitacunata ñaupaman pushajcunaca ¿imashinata chaitaca pactachina carca?  Chai leytaca ¿picunahuanda ashtahuanbachaca pactachina carca? Caicunamanda yachajunami ama llaquilla sintirichun, Jehová Diospa nishcacunapi tucui shunguhuan confiachun ayudanga. Shinallata Jehovata ashtahuan juyashpa catichunbashmi ayudanga (Hech. 17:27; Rom. 15:4).

4. a) Moisesman cushca leycunapica ¿imashinata juyaihuan yachachishcata ricuchirca? b) Mateo 22:36-40​pi nishca shinaca Jesusca ¿ima ishcai leycunamandata parlarca?

⁴ Moisesman cushca leycunapica ¿imashinata juyaihuan yachachishcata ricuchirca? Jehová Diosca imata rurashpapash siempremi juyaihuan rurashcata ricuchin (1 Juan 4:8). Moisesman cushca leycunaca 600 yali leycunami carca. Shinapash chai leycunamandaca ishcai leycunami ashtahuanbachaca minishtirishca carca: Taita Diosta juyana, shuj gentecunatapash juyana (Lev. 19:18; Deut. 6:5; Mateo 22:36-40, liingui). Shinaca Taita Diosta juyana o shuj gentecunata juyana cashcatami ricuchina carca. Chaipaca huaquin ejemplocunata ricupashunchi.

5, 6. a) Cusahuarmicuna ¿imashina causachunda Jehová Diosca munan? b) Jehová Diosca ¿imatata ricujun? Shuj ejemplomanda parlapai.

⁵ Moisesman cushca leycunapica cusaca paipa huarmiguta, paipa huahuacunata juyaihuan tratanatami yachachin. Cusahuarmicuna siempre juyarishpa causachunmi Jehová Diosca munan (Gén. 2:24; Mat. 19:3-6). Cazarashca jahua shuj jarihuan o shuj huarmihuan faltapi urmashpaca shuj jatun juchatami ruran. Moisesman cushca leypica cazarashca jahua, ama shujhuan causanguichu nircami (Deut. 5:18). Cusahuarmimanda maijanbash falta urmajpica shuj jatun llaqui causaitami apamunga. Chaimandami Bibliapica cashna nin: “¿Imashpata ñucaca cai jatun nalita rurashpa juchata rurashpa, Taita Diosta fiñachishayari?” nishpa (Gén. 39:7-9). Cusahuarmimanda maijanbash falta urmashca cajpica chai rurashcataca nunca na facil cungai usharingachu.

⁶ Cusahuarmicuna imashina tratarijtaca Jehová Diosca alimi yachan. Israelitacuna paicunapa huarmicunata imashina tratajtaca Jehová Diosca alimi yacharca. Moisesman cushca leyta cazuj cusaca paipa huarmigutaca juyaihuanmi tratan carca. Shinallata na yangamanda divorciarinachu carca (Deut. 24:1-4; Mat. 19:3, 8). Shuj cusa paipa huarmimanda divorciarinapacha cajpica chai cusaca shuj cartatami escribina carca. Shina escribinami paipa huarmigu juchapi urmashca nishpa pipash ama yangata parlachun ayudan carca. Shinapash chai cartata nara cushpallatami cusaca israelitacunata ñaupaman pushajcunahuan parlana carca. Shinami paicuna ama divorciarichun ayudana carca. Shuj israelita paipa munaimandalla yangata paipa huarmimanda divorciaringapaj munajujpica Jehová Diosca na alicachishpami ricun carca. Chai huarmigucuna llaquirishpa huacanajujtapash Jehová Diosca ricujurcami (Mal. 2:13-16).

7, 8. a) Taitamamacunataca ¿imatata Jehová Diosca mandarca? (Callari dibujota ricupangui). b) Chai callari dibujomandaca ¿imatata yachajupanchi?

⁷ Moisesman cushca leypica huahuacunatapash ali cuidachunmi yachachirca. Shinallata Jehová Diosca taitamamacunata mandarcami huahuacunata cuidachun, Jehovamanda yachachichunbash. Tucui horasmi huahuacunamanga Jehovapa mandashcacunata yachachingapaj, Jehovata tucui shunguhuan juyachun yachachina carca (Deut. 6:6-9; 7:13). Punda tiempopica ¿imamandata chai llactamanda gentecunata llaquichirca? Paicunapa huahuacunata rupachinajujpimi llaquichirca (Jer. 7:31, 33). Israelitacunaca paicunapa huahuacunataca Jehová Dios carashca herencia cuenda cashcata ricushpami, juyaihuan viñachina carca. Huahuacunataca na yangata tratashpa charinachu carca (Sal. 127:3).

⁸ ¿Imatata yachajupanchi? Cusahuarmi imashina tratarijtaca Jehová Diosca alimi ricujun. Shinallata taitamamacuna paicunapa huahuacunata  juyaihuan tratachunmi munan. Huahuacunata yangata tratajpica Jehová Diosca ricujunmi.

9-11. Chai leyta cushpaca ¿imatata yachachingapaj munarca?

⁹ Moisesman cushca leycunapica ansiarishpa ashtahuan charijyangapaj munanaca nali cashcatami yachachirca. Chai leypica shujcunapa charishcacunata ñucapaj cashcanman nishpa ansiarijuna na ali cashcatapashmi yachachirca (Deut. 5:21; Rom. 7:7). Chai leyta israelitacunaman cushpaca Jehová Diosca ¿imatata yachachijurca? Paicunapa shungu ucupi imata charijta, imata pensashcatami paicunaca cuidarina carca. Shungu ucupi nali munaicuna tiajpi, nali pensamientocuna tiajpimi nalicunataca ruranlla. Chaitaca Jehová Diosca alimi yachan (Prov. 4:23). Shuj israelita paipa shungupi nali munai mishachun saquishpaca shujcunata juyaihuan trataitaca na ushanmanllu carca. Cunanga rey Davidhuan ima pasashcata yaripashunchi. Rey David nali cashcataca na nijunllu. Shinapash paica shuj punlla shuj cazada huarmitami munashpa ricurca. Shina munashpa ricujuimandami Davidca faltapi urmarca. Shinami shuj jatun juchata rurarca (Sant. 1:14, 15). Davidca chai huarmihuan faltapi urmashca jipaca, chai huarmipa cusata umachishpami macanajuchun cacharca. Shinami macanajuipi huañuchichun saquirca (2 Sam. 11:2-4; 12:7-11).

¹⁰ Moisesman cushca leycunapica shuj israelita ansiarishpa ashtahuan charijyangapaj munanajujta, shungupi imata charijtapash Jehová Diosca alimi yacharca (1 Crón. 28:9). Chai leyta yachanami israelitacuna nali pensamientocunata ama charichun, nali ruraicunata ama rurachun ayudarca. Chaita yachanaca Jehová Dios juyaj, ali yachaj cashcatapashmi paicunaca cuenta japirca.

¹¹ ¿Imatata yachajupanchi? Jehová Diosca gentecuna ricushcatallaca na ricunllu. Ashtahuangarin Jehová Diosca ñucanchi shungu ucupi imata charijtami ali yachan (1 Sam. 16:7). Shinaca Jehová Diosmanga nimata na pacai ushanchichu. Imata pensashcata, imashina sintirishcata, imata rurashcatapash na pacai ushanchichu. Shinapash Jehová Diosca ñucanchicuna alita rurashcata, alita rurashpa catichunbashmi ricujun. Shinallata nali munaita charijta ñucanchillata cuenta japishpa, chai nali munaita saquichunbashmi Jehová Diosca munan (2 Crón. 16:9; Mat. 5:27-30).

12. Moisesman cushca leycunapica ¿imatata ashtahuanbachaca yachajupanchi?

¹² Moisesman cushca leycunapica ashtahuanbachaca imatapash alita ruraj Jehová Dios cashcatami yachachin (Sal. 37:28; Is. 61:8). Chaitaca ¿imashinata Jehová Diosca ricuchirca? Shuj gentecunata juyaihuan tratashpami imatapash alita ruraj cashcata ricuchirca. Chai leycunata israelitacuna cazushpaca ashtaca bendiciongunatami chasquin carca. Shinapash maijambash chai leycunata na cazushpaca paicunallatami sufrin carca. Chaipaca Moisesman cushca 10 leycunamanda ishcai leycunata yachajupashunchi.

13, 14. a) Chai leypica ¿imatata pundapica mandarca? b) Chai mandashcata israelitacuna cazushpaca ¿imatata chasquigrinajurca?

¹³ Chai leycunapica Jehová Diostalla sirvina nircami. Chai punda leypica ¿imatata mandarca? Israelitacunataca mandarcami Jehová Diostalla sirvishpa, shuj yanga dioscunataca na sirvinachu canguichi nishpa (Éx. 20:3-6). Chai mandashcata cazushpaca israelitacunallatami cushilla causai ushana carca. Shina rurashpaca tucui shunguhuan Jehovata sirvijushcatami ricuchina carca. Shuj llactamanda yanga dioscunata sirvishpaca paicunallatami nali causan carca.

¹⁴ Cunanga Canaán llactapi causajcunahuan ima pasashcata ricupashunchi. Paicunaca Jehovata sirvinapa randica yanga dioscunatarami sirvi callarirca (Sal. 115:4-8). Paicunaca yanga dioscunapa ñaupajpimi huainayashpa, paicunapa huahuacunata rupachinajurca. Huaquin israelitacunaca Jehovata na cazushpami yanga dioscunata sirvishpa paicunapa familiatapash  ninanda llaquichirca (2 Crón. 28:1-4). Israelitacunata ñaupajman pushajcunaca Jehová Diospa mandashcacunata na cazushpami viuda huarmigucunata, taita illaj huahuacunatapash ninanda llaquichinajurca (Ezeq. 34:1-4). Shina tratajta ricushpami Jehová Diosca paicunata llaquichisha nirca (Deut. 10:17, 18; 27:19). Cutin Jehovapa mandashcacunata cazuj, alita ruraj israelitacunataca ninandami bendiciarca (1 Rey. 10:4-9).

15. Jehová Diosca ¿imatata ali yachan?

¹⁵ ¿Imatata yachajupanchi? Jehová Diosta sirvinchi nishpapash huaquingunaca Jehovapa mandashcacunata na tucui shunguhuan cazuimandami huauquipanicunata llaquichishpa causan. Shina gentecuna tiashcamandaca Jehová Diosca na culpata charinllu. Ashtahuangarin shina llaqui apanajujtaca Jehová Diosca alimi yachan. Shuj mamaca paipa huahua sufrijujtaca alimi intindin. Shinallatami Jehová Diosca ñucanchicunata yangamanda llaquichijujtaca ali yachan (Is. 49:15). Na ali trataj gentecuna na arripintirijpica Jehová Diosca shuj punlla paicunataca llaquichingami.

16-18. a) Moisesman cushca leycunaca ¿imacunapillata ayudan carca? b) Jehovamandaca ¿imatata yachajupanchi?

¹⁶ Moisesman cushca leycunaca shuj shuj cosascunapimi israelitacunataca ayudan carca. Shinallata israelitacunata ñaupajman pushajcunaca Jehová Diosmandallaca na yachachinachu carca. Ashtahuangarin problemacunata charijpi, plituricuna tiajpi, pitapash huañuchijpimi ayudana carca. Chaimi israelitacunata ñaupaman pushajcunaca Moisesman cushca leycunata ali ricushpa ayudana carca. Cunanga huaquin ejemplocunata ricupashunchi.

¹⁷ Shuj israelita pitapash huañuchijpica ¿imatata rurana carca? Huañuchishca nishpallaca na huañuchinallachu carca. Ashtahuangarin chai llactamanda israelitacunata ñaupaman pushajcunaca, imamanda shina pasashcataca ali alimi ricuna carca. Ña ali ali intindishca jipami imata ruranatapash ricuna carca (Deut. 19:2-7, 11-13). Shinallata imacunamanda shina tucushcata, cusahuarmi imamanda culirarishcatapashmi ali ali tapuchina carca. Ña yachashpami imata ruranatapash ricuna carca (Éx. 21:35; Deut. 22:13-19). Israelitacunata ñaupan pushajcuna Moisesman cushca leycunata cazushpa, imagutapash ruranata agllajpica tucuicunallatami cushilla sintin carca. Shinallata chai llactapi causajcunaca tucuicunallatami Jehová Diostapash jatunyachin carca (Lev. 20:7, 8; Is. 48:17, 18).

¹⁸ ¿Imatata yachajupanchi? Jehová Diosca ñucanchi causaipi imata rurajtapash ali alimi yachan. Shuj gentecunata juyaihuan tratachun, imatapash alita rurachunbashmi Jehová Diosca munan. Shinallata huasipi cashpa imata rurajujta, imata parlajtapash Jehová Diosca ricujunmi (Heb. 4:13).

19-21. a) Israelitacunata ñaupaman pushajcuna, juezcunaca ¿imashinata gentecunataca tratana carca? b) Ama shujtalla llaquichichunga ¿ima leyta tiarca? c) Jehovamandaca ¿imatata yachajupanchi?

¹⁹ Israel llacta ladopi causajcunaca nalicunatalla rurashpa causaj gentecunami carca. Jehová Diosca paita sirvijcuna chai gentecunashna ama  cachunmi israelitacunata ñaupajman pushajcuna, juezcuna imata rurana cashcata mandarca. Shinallata paicunataca na ñavita ricushpalla, na llaquichinachu canguichi nishpapashmi mandarca. Shinami Moisesman cushca leypica imatapash alita ruraj cashcata juyaihuan ricuchichun mandarca (Deut. 1:13-17; 16:18-20).

²⁰ Tucuicunata juyaimandami Jehová Diosca shujtalla llaquichishpa tratachunga na saquin carca. Chaimandami leycuna tiachun saquirca. Chai leycunami yangamanda juchachichun na saquin carca. Chaipaca shuj ejemplota ricupashunchi. Pitapash yangamanda juchachijpica ¿imatata rurai usharca? Pundapica pi paita juchachijujtami yachana carca (Deut. 19:16-19; 25:1). Shinaca paita juchachichunga shuj o ishcai testigomi tiana carca (Deut. 17:6; 19:15). Shinaca shuj jatun juchata rurashca cajpica shuj testigolla tiajpica ¿imatata rurana carca? Chai juchata rurajca na pensanachu carca, ñuca munaihuanmi yalisha nishpa. Shina pensajujpipash Jehová Diosca tucui tucuitami ricujurca. Taitacunaca familia ucupica paicunami mandana derechota charin. Shinapash na paipa munashcatalla ruranachu can. Punda tiempopi familia ucupi imapash problemacuna tiajpica, israelitacunata ñaupaman pushajcunamanmi villana carca. Shinami paicunaca imata ruranata ricuna carca (Deut. 21:18-21).

²¹ ¿Imatata yachajupanchi? Jehová Diosca tucuicunatami ali tratan. Chaimandami shuj alipacha ejemplo can (Sal. 89:14). Jehovapa mandashcacunata tucui shunguhuan cazujcunataca ninandami bendician. Shinapash Jehovapa mandashcacunata na cazushpaca paicunallatami sufringa (2 Sam. 22:21-23; Ezeq. 9:9, 10). Huaquingunaca nalicunata rurashpachari causanajun. Paicunaca pensanbashchari Jehová Diosca na llaquichihuangachu nishpa. Shinapash Jehovapa punllapica chai gentecunataca llaquichingami (Prov. 28:13). Na arripintirij gentecuna  “Taita Diospaj maquipi urmashpaca, ¡aij jatun manllanayaimari!” canga (Heb. 10:30, 31).

22-24. a) ¿Picunatata ashtahuanbachaca cuidana carca? b) Jehovamandaca ¿imatata yachajupanchi? c) Éxodo 22:22-24​pica ¿imatata nijun?

²² Moisesman cushca leycunapica Israel llactapi causaj juezcunataca cashnami mandarca: “Shuj llactamanda shamushca runagu, taita mama illaj huahuagu japinatallata japinatapash, na shujman tigrachinachu cangui. Sapalla mamagupaj churajunatapash, na prendata japinachu cangui” nishpa (Deut. 24:17). Shina gentecunamandaca Jehová Diosca cada unotami juyaihuan tratan carca. Shinallata chai gentegucunata nali tratajtaca Jehová Diosca ricujurcami (Éxodo 22:22-24, liingui).

²³ Familia ucupurapi causajcunata cuidanamandami Moisesman cushca leycunapica, familia ucupurallata ama faltapi urmanguichichu nishpa mandarca (Lev. 18:6-30). Israel llacta ladopi causajcuna familia ucupura falta urmajpipash alitashnami ricun carca. Shina causaitaca Jehová Diosca nimamanda na ricunayachinllu carca. Shinallatami paita sirvijcunaca nimamanda na ricunayachina carca.

²⁴ ¿Imatata yachajupanchi? Ancianocuna huauquipanicunata juyaihuan ali cuidachunmi Jehová Diosca munan. Jehová Diosca familia ucupura faltapi urmachunga na munanllu. Shinallata huahuacunata violachunbash na munanllu. Imapash nalicunataca nimamanda na ricunayachinllu. Ashtahuangarin taita illajcunata, viuda huarmigucunata cuidachunmi Jehová Diosca munan.

25, 26. a) Jehová juyaj, imatapash alita ruraj cashcata ricuchinataca ¿imahuanda chimbapuran? b) Caishuj temacunapica ¿imatata yachajugripanchi?

²⁵ Gentecuna causangapaca samaitami minishtinchi. Shina cuendami juyaj, imatapash alita ruraj cashcata ricuchinaca minishtirishcapacha can. Jehová Dios juyaita, imatapash alita ruraj cashcata ricushpaca ashtahuanmi juyashpa catipanchi. Shinaca paipa mandashcacunata cazushpaca shuj gentecunatapash juyaihuan tratangapami esforzarishun.

²⁶ Moisesman leycunata cushpami Jehová Diosca shuj pactota Moiseshuan rurarca. Chai leycunata cushcamandami israelitacunaca Jehová Dioshuan ali caita usharca. Tiempohuanga Jesús shamushpa chai leycunata pactachishpami tucuchirca. Shinami ‘Cristopa mandashcata’ callarichirca (Rom. 10:4). Apóstol Pablo chai leymanda parlashpaca nircami, “jipa punllacunapi Dios aliguta caramunata llandushnalla ricuchijllami cashca” nishpa (Heb. 10:1). Caishuj temacunapimi ashtahuan caimanda yachachinga. Shinallata congregación ucupi huauquipanicunapura juyaita charinata, imatapash alita ruranatapash yachajupashun.