1-2. (a) Yumi olgeta i laik bai ol narapela i soim wanem pasin long yumi? (b) Yumi inap bilip tru long wanem samting?

YUMI olgeta i laik bai ol narapela i laikim yumi na mekim fea pasin. Sapos ol i no mekim olsem, yumi bai pilim yusles na pilim olsem laip bilong yumi i no gat mining.

² Jehova i save olsem yumi laik tru bai ol narapela i laikim yumi na mekim fea pasin. (Sng. 33:5) Yumi ken bilip tru olsem God i laikim yumi tumas na em i laik bai ol narapela i mekim fea pasin long yumi. Dispela i kamap klia long Lo em Jehova i givim long lain Israel long rot bilong Moses. Sapos yu hangre tru long ol narapela i mas soim pasin laikim long yu o yu bel hevi tru bikos ol man i no mekim fea pasin long yu, orait i gat risen na yu ken belgut: Lo Bilong Moses * i soim klia olsem Jehova i tingim tru ol manmeri bilong em.

3. (a) Olsem Rom 13:8-10 i kamapim, yumi luksave long wanem samting taim yumi stadi long Lo Bilong Moses? (b) Dispela stadi bai bekim wanem ol askim?

³ Taim yumi stadi long Lo Bilong Moses, yumi luksave long ol gutpela pasin bilong God Jehova. (Ritim Rom 13:8-10.) Long dispela atikol, yumi bai skelim sampela lo em God i bin givim long lain Israel. Yumi bai kisim bekim bilong ol dispela askim: Wai na yumi inap tok olsem pasin laikim i as bilong dispela Lo? Wai na yumi inap tok olsem Lo i kirapim ol manmeri long mekim fea pasin? Taim ol hetman na ol jas i yusim Lo Bilong Moses, ol i mas bihainim wanem pasin?  Lo i lukautim husat lain? Ol bekim bilong ol dispela askim inap mekim gut bel bilong yumi, givim hop, na helpim yumi long i go klostu moa long gutpela Papa bilong yumi.—Apo. 17:27; Rom 15:4.

4. (a) Bilong wanem yumi inap tok olsem pasin laikim i as bilong Lo Bilong Moses? (b) Long Matyu 22:36-40, Jisas i strongim wanem ol lo?

⁴ Yumi inap tok pasin laikim i as bilong Lo Bilong Moses bikos pasin laikim i stiaim olgeta samting Jehova i mekim. (1 Jon 4:8) Tupela bikpela lo i stap olsem astok bilong olgeta dispela lo—laikim God, na laikim ol narapela. (Wkp. 19:18; Lo 6:5; ritim Matyu 22:36-40.) Olgeta wan wan bilong ol dispela 600 lo i skulim yumi long pasin laikim bilong Jehova. Yumi ken skelim sampela eksampel.

5-6. (a) Jehova i laik bai ol marit i mekim wanem? (b) Jehova i lukim klia wanem samting? Stori long wanpela eksampel.

⁵ Stap gut long poroman marit, na lukautim ol pikinini. Jehova i laik bai ol marit i laikim tru narapela narapela long laip olgeta bilong ol. (Stt. 2:24; Mat. 19:3-6) Pasin adaltri em pasin i nogut tru na i soim olsem man i no gat tru pasin laikim. Olsem na namba 7 lo bilong Tenpela Lo i tambuim pasin adaltri. (Lo 5:18) Man i mekim pasin adaltri i “mekim sin long ai bilong God” na em i bagarapim tru bel bilong poroman marit. (Stt. 39:7-9) Poroman marit bai stap bel hevi inap planti yia.

⁶ Jehova i save lukim klia olgeta pasin ol poroman marit i mekim long narapela narapela. Em i tokim lain Israel olsem maritman i mas mekim gut long meri bilong em. Sapos maritman i rispektim Lo, em bai laikim tru meri bilong em na em i no inap divosim nating meri long olgeta kain liklik samting. (Lo 24:1-4; Mat. 19:3, 8) Tasol sapos bikpela hevi i kamap na man i divosim meri, orait em i mas givim divos setifiket long meri. Dispela setifiket bai lukautim meri na ol narapela i no inap sutim tok olsem meri i mekim pasin pamuk. Na tu, paslain long man i givim divos setifiket long meri, em i mas i go toktok wantaim ol hetman bilong taun long dispela samting. Long dispela rot, ol hetman bai traim long helpim dispela tupela marit long stretim hevi. Em tru olsem Jehova i no inap pasim man Israel taim man i tingim laik bilong em yet tasol na em i divosim meri. Maski i olsem, God i save lukim aiwara bilong meri na em i pilim tru bel hevi bilong em.—Mal. 2:13-16.

7-8. (a) Jehova i laik bai papamama i mas mekim wanem? (Lukim fran pes piksa.) (b) Yumi kisim wanem skul?

⁷ Lo i soim tu olsem Jehova i tingim tru sindaun bilong ol pikinini. Jehova i laik bai papamama i lukautim gut pikinini long ol samting olsem haus, klos, na kaikai, na helpim pikinini long pas gut wantaim God. Oltaim papamama i mas painim rot bilong skulim gut pikinini long Lo Bilong Jehova na kisim pasin bilong laikim God. (Lo 6:6-9; 7:13) Jehova i bin panisim lain Israel bikos ol i mekim nogut tru long ol pikinini bilong ol. (Jer. 7:31, 33) Papamama i mas tingim pikinini olsem presen i kam long Jehova, na i no olsem samting nating na ol i mekim nogut long em.—Sng. 127:3.

⁸ Skul: Jehova i lukim klia olgeta pasin ol poroman marit i mekim long narapela narapela. Em i laik bai papamama i laikim pikinini. Em bai skelim na kotim ol sapos ol i no lukautim gut pikinini.

9-11. Bilong wanem Jehova i givim lo i tambuim pasin mangal?

⁹ No ken mangal. Long lista bilong Tenpela Lo, laspela lo i tambuim pasin mangal.  (Lo 5:21; Rom 7:7) Jehova i givim dispela lo bilong skulim ol manmeri long wanpela bikpela samting—ol i mas lukautim gut bel, olsem tingting, filings, na astingting bilong ol. God i save olsem taim man i kisim tingting nogut, dispela bai kirapim em long mekim pasin nogut. (Prov. 4:23) Sapos man Israel i larim ol laik nogut i kamap bikpela insait long bel, dispela bai kirapim em long mekim rong long narapela. Dispela samting i bin kamap long King Devit. Em i gutpela man. Tasol wanpela taim em i mangalim meri bilong narapela man. Dispela pasin mangal i kirapim em long mekim sin. (Jems 1:14, 15) Devit i mekim pasin adaltri, na em i traim long giamanim man bilong dispela meri, na bihain em i wokim plen long kilim man i dai.—2 Sml. 11:2-4; 12:7-11.

¹⁰ Jehova i save taim man Israel i mekim pasin mangal bikos Em inap lukim laik i stap insait long bel. (1 Sto. 28:9) Lo i kamapim klia long ol manmeri olsem ol i mas sakim ol tingting we inap kirapim ol long mekim rong. Jehova i pulap tru long savetingting na em i laikim tru yumi!

¹¹ Skul: Jehova i lukim pasin bilong yumi, na em i lukim tu ol tingting na laik i stap insait long bel. (1 Sml. 16:7) I no gat wanpela tingting, filings, na pasin i stap hait long ai bilong em. Em i laik bai yumi bihainim stretpela pasin. Tasol em i laik bai yumi luksave na kontrolim ol tingting nogut na bai yumi no ken mekim rong.—2 Sto. 16:9; Mat. 5:27-30.

12. Lo Bilong Moses i kamapim klia wanem samting?

¹² Lo Bilong Moses i kamapim klia olsem Jehova i laikim jastis. (Sng. 37:28; Ais. 61:8) Em i stap gutpela eksampel long mekim fea pasin. Taim lain Israel i bihainim ol lo em Jehova i givim, em i blesim ol. Taim ol i sakim ol stretpela lo bilong em, hevi i painim ol. Skelim 2-pela moa lo i stap long lista bilong Tenpela Lo.

13-14. (a) Fes 2-pela lo long lista bilong Tenpela Lo i kirapim lain Israel long mekim wanem? (b) Taim lain Israel i bihainim ol dispela lo, wanem gutpela samting i kamap?

¹³ Lotuim Jehova wanpela tasol. Fes 2-pela lo long lista bilong Tenpela Lo i tok lain Israel i mas lotuim Jehova wanpela tasol na ol i no ken lotuim ol imis. (Kis. 20:3-6) Ol dispela lo i no bilong helpim Jehova, nogat. Ol i bilong helpim ol manmeri bilong em. Taim ol i stap gut long God, gutpela samting i save painim ol. Taim ol i lotuim ol god bilong ol narapela lain, hevi i painim ol.

¹⁴ Tingim lain Kenan. Ol i lotuim ol imis i no gat laip na ol i no lotuim God tru i gat laip. Olsem na ol i kamap wankain olsem ol dispela imis. (Sng. 115:4-8) Ol i mekim olgeta kain pasin sem na kukim ol pikinini olsem ol sakrifais long ol imis. Taim lain Israel i givim baksait long Jehova na lotuim ol imis, ol i bagarapim ol yet na famili bilong ol. (2 Sto. 28:1-4) Ol man i gat namba long mekim wok bos i sakim ol stretpela lo bilong Jehova. Ol i mekim wok nogut long namba bilong ol na daunim tru ol manmeri i no gat strong. (Ese. 34:1-4) Jehova i tok lukaut long lain Israel olsem em bai givim strafe long ol man i mekim nogut tru long ol meri na ol pikinini. (Lo 10:17, 18; 27:19) Tasol Jehova i blesim ol taim ol i stap gut long em na mekim fea pasin long narapela narapela.—1 Kin. 10:4-9.

15. Yumi kisim wanem skul long pasin bilong Jehova?

¹⁵ Skul: Taim ol manmeri i sakim ol lo bilong Jehova na ol i mekim nogut long  ol narapela, ol i no inap sutim tok long God. Jehova i laikim yumi na em i luksave taim ol narapela i no mekim fea pasin long yumi. Mama inap lusim tingting long bebi bilong em, tasol Jehova i no inap tru long lusim tingting long yumi. (Ais. 49:15) Maski em i no kirap kwik long givim strafe long ol man nogut, bihain em bai kotim ol long pasin nogut bilong ol.

16-18. (a) Lo Bilong Moses i gat tok long wanem ol samting? (b) Yumi kisim wanem skul?

¹⁶ Lo Bilong Moses i gat tok long planti samting long laip bilong ol manmeri. Olsem na em i bikpela samting long ol hetman i mas bihainim ol stretpela lo taim ol i mekim kot. Ol i gat wok long stretim ol hevi long sait bilong bilip, sait bilong famili, sindaun bilong ol manmeri, na pasin raskol. Yumi ken skelim sampela eksampel.

¹⁷ Sapos wanpela man Israel i kilim narapela, ol i no inap kilim em wantu tasol, nogat. Em i gat asua long kilim man, tasol ol hetman bilong taun bai mekim wok painimaut paslain long ol i mekim disisen sapos i stret long kilim em. (Lo 19:2-7, 11-13) Ol hetman i skelim tu planti samting long sindaun bilong ol manmeri—olsem tok pait bilong graun o hevi i stap namel long tupela marit. (Kis. 21:35; Lo 22:13-19) Taim ol hetman i mekim fea pasin na lain Israel i bihainim Lo, olgeta manmeri i stap gut, na ol i givim ona long Jehova.—Wkp. 20:7, 8; Ais. 48:17, 18.

¹⁸ Skul: Jehova i skelim olgeta samting yumi mekim. Em i laik bai yumi mekim fea pasin na soim pasin laikim long ol narapela. Em i harim ol tok yumi mekim na lukim ol samting yumi mekim maski yumi stap wanpis long haus.—Hib. 4:13.

19-21. (a) Ol hetman na ol jas i mas bihainim wanem pasin taim ol i mekim kot? (b) Jehova i putim wanem ol lo bilong lukautim ol manmeri? (c) Yumi kisim wanem skul?

¹⁹ Jehova i no laik bai ol manmeri bilong em i bihainim pasin nogut bilong ol narapela lain. Taim ol hetman na ol jas i yusim Lo Bilong Moses long mekim kot, Jehova i laik bai ol i mekim fea pasin. Ol i no ken mekim hatpela pasin long ol manmeri. Ol i mas laikim jastis, olsem mekim fea pasin.—Lo 1:13-17; 16:18-20.

²⁰ Jehova i sori tru long ol manmeri bilong em, olsem na em i putim ol lo na bai i no gat man i mekim wansait pasin. Lo i lukautim man na ol narapela i no inap sutim nating tok giaman long em. Man i gat rait long save long husat i sutim tok long em. (Lo 19:16-19; 25:1) Paslain long ol i kotim em, i mas i gat 2-pela witnes bilong givim evidens. (Lo 17:6; 19:15) Olsem wanem sapos man i mekim rong na wanpela witnes tasol i lukim rong em i mekim? Dispela man i no inap abrusim strafe bikos  Jehova i lukim samting em i mekim. Insait long famili, papa i gat namba long mekim wok bos, tasol i gat sampela samting em i no inap long mekim. Long sampela hevi bilong famili, ol hetman bilong taun i gat wok long skelim hevi na mekim disisen long husat i gat asua.—Lo 21:18-21.

²¹ Skul: Jehova i stap nambawan gutpela piksa; oltaim em i save mekim fea pasin. (Sng. 9:7) Em i blesim ol manmeri husat i bihainim ol stretpela lo bilong em, tasol em i givim strafe long ol man i mekim wok nogut long namba bilong ol long mekim wok bos. (2 Sml. 22:21-23; Ese. 9:9, 10) Sampela inap mekim rong na ol i no kisim strafe, tasol long taim stret Jehova bai kotim ol long pasin ol i mekim. (Prov. 28:13) Sapos ol i no tanim bel, ol “i mas pret tru long kisim panismen long han bilong God i gat laip.”—Hib. 10:30, 31.

22-24. (a) Lo i lukautim husat lain? (b) Lo i skulim yumi long wanem pasin bilong Jehova? (c) Kisim Bek 22:22-24 i kamapim wanem tok lukaut?

²² Lo i lukautim ol lain husat i no inap long lukautim ol yet, olsem ol pikinini i no gat papamama, ol wido, na ol manmeri i kam long narapela kantri. God i tokim ol jas long Israel olsem: “Yupela i no ken paulim kot bilong man bilong narapela ples i stap wantaim yupela o bilong pikinini i no gat papa, na yupela i no ken kisim klos bilong wanpela wido olsem mak bilong bekim dinau.” (Lo 24:17) Jehova i tingim tru ol lain i no gat rot bilong kisim helpim long  komiuniti. Na em i givim strafe long ol man i mekim nogut long dispela lain.—Ritim Kisim Bek 22:22-24.

²³ Na tu, Lo i lukautim ol lain em ol wanfamili yet i mekim pasin sem long ol. (Wkp. 18:6-30) Ol manmeri bilong ol narapela lain i orait long dispela kain pasin, tasol Jehova i laik bai ol manmeri bilong em i holim wankain tingting olsem em—ol i mas heitim tru dispela stingpela pasin.

²⁴ Skul: Jehova i laik bai ol man husat i holim namba bilong mekim wok bos i tingim gut ol manmeri i stap aninit long lukaut bilong ol. Em i heitim tru olgeta kain pasin sem, na em i laik bai olgeta manmeri i stap gut, na mekim fea pasin tasol long narapela narapela.

25-26. (a) Bilong wanem jastis na pasin laikim i wok bung wantaim? (b) Neks stadi bai stori long wanem samting?

²⁵ Jastis o fea pasin i no inap kamap sapos i no gat pasin laikim, wankain olsem man i no inap i stap laip sapos em i no pulim win. Sapos yumi bilip tru olsem Jehova i mekim fea pasin long yumi, yumi bai laikim em moa yet. Taim yumi laikim God na ol stretpela lo bilong em, dispela bai kirapim yumi long laikim ol narapela na mekim fea pasin long ol.

²⁶ Kontrak bilong Lo Bilong Moses i helpim lain Israel long pas gut moa wantaim Jehova. Taim Jisas i inapim wok bilong Lo, dispela Lo i no gat wok moa na narapela samting i kisim ples bilong en—em samting i gutpela moa. (Rom 10:4) Aposel Pol i kolim Lo olsem “sedo tasol bilong ol gutpela samting bai kamap bihain.” (Hib. 10:1) Neks stadi bai stori long sampela bilong ol dispela gutpela samting, na olsem wanem pasin laikim na jastis i helpim kongrigesen Kristen.