1-2. a) I mpsini leswi hinkwerhu hiswi lavaka? b) I yini lexi hinga tiyisekaka hi xona?

HINKWERHU haswi lava kurhandziwa ni kukhomiwa hi ndlela leyi lulameke. Hi mhaka leyo, hi titwa hinga pfuni nchumu hi tlhela hi heleliwa hi ntshembo loko minkama yinyingi hinga kombiwi lirhandzu kumbe loko hi khomiwa hi ndlela leyinga lulamangiki.

² Yehovha waswi tiva leswaku hi ni xilaveko xa kukombiwa lirhandzu ni kukhomiwa hi ndlela leyi lulameke. (Pis. 33:5) Hikolaho, ahi tiyisekeni leswaku yena wahi rhandza swinene naswona a lava leswaku hi khomiwa hi ndlela leyinene. Nawu lowu awu nyikeke tiko la yena la Israyele hi kutirhisa Moxe wuswi veka livaleni leswo. Hikolaho, loko kuli leswaku u hlomuka mbilu hikolaho ka leswi vangaku kombiki lirhandzu kumbe hileswi vaku khomaka hi ndlela leyinga lulamangiki, haku rhamba leswaku u kambisisa hi wukheta a Nawu wa Moxe. * Wutaku kholwisa leswaku Yehovha a ni mhaka na wena.

3. a) Hilaha swi kombisiwaka ha kona ka Varhoma 13:8-10, hi tsumbula swaku yini loko hi kambisisa Nawu wa Moxe? b) Hita hlamula swivutiso swihi ka djondzo leyi?

³ Loko hi kambisisa Nawu wa Moxe, hi tsumbula leswaku Yehovha ahi rhandza hintamu swinene. (Lerha Varhoma 13:8-10.) Ka djondzo leyi, hita kambisisa yin’wana ya minawu leyi Yehovha aayi nyike Vayisrayele ivi hi hlamula swivutiso leswi: Hayini hinga vulaka leswaku xisekelo xa Nawu i lirhandzu? Hayini hinga vulaka leswaku Nawu awu khutaza vanhu kukhoma van’wana hi ndlela leyi lulameke? Lava a va li ni wulawuli ava fanele vawu tirhisisa kuyini a Nawu? Xana a Nawu awu sirhelela vamani hi kukongoma? Tinhlamulu ta swivutiso leswi titahi chavelela, tihi  nyika ntshembo ti tlhela ti tiyisa wuxaka la hina ni B’ava wa hina wa lirhandzu, Yehovha. — Mint. 17:27; Rhom. 15:4.

4. a) Hayini hinga vulaka leswaku Nawu wa Moxe wu seketeliwe ka lirhandzu? b) Hilaha swi kombisiwaka ha kona ka Matewu 22:36-40, hi yihi minawu leyi Yesu ayi kandziyiseke?

⁴ Hinga vula leswaku xisekelo xa Nawu wa Moxe i lirhandzu hikuva lirhandzu hi lona li susumetelaka swiyendlo hinkwaswu swa Yehovha. (1 Yoh. 4:8) Yehovha a yendle leswaku minawu hinkwayu leyi vumbaka Nawu wa Moxe yi seketeliwa ka swilo swimbirhi — kurhandza Xikwembu ni munhukuloni. (Lev. 19:18; Det. 6:5; lerha Matewu 22:36-40.) Hikolaho, ahi tiyisekeni leswaku minawu hinkwayu leyi tlulaka 600 leyi vumbaka Nawu wa Moxe yihi djondzisa swotala hi lirhandzu la Yehovha. Ahi voneni swikombiso swingaliswingani.

5-6. I yini leswi Yehovha aswi languteleke ka nuna na nsati naswona i yini leswi aswi vonaka? Nyikela xikombiso.

⁵ Tshembeka ka lweyi u chadeke na yena naswona khatalela vana va wena. Yehovha a lava leswaku nuna ni nsati va rhandzana swinene. A lava leswaku lirhandzu leli linga heli. (Gen. 2:24; Mat. 19:3-6) Kambe xin’we xa swilo swa kubiha swinene lexi munhu lweyi a chadeke angaxi yendlaka ivi a hohlota lirhandzu leli i kumbuyeta. Hi mhaka leyo, nawu wa wu-7 ka Minawu ya 10 awu tsimbisa kumbuyeta. (Det. 5:18) Kumbuyeta i ‘kudjohela Xikwembu’ naswona kutsema nhlana wa lweyi a hoxeliweke. (Gen. 39:7-9) Swi teka malembe leswaku kuvava loku munhu lweyi a hoxeliweke aku twaka kukhaluta.

⁶ Yehovha wayi vona ndlela leyi nuna ni nsati va khomanaka ha yona. Hi xikombiso, a alava leswaku Muyisrayele amu khoma kahle nsati wa yena. Nuna lweyi a hloniphaka Nawu aatamu rhandza nsati wa yena naswona aangata dlaya wukati hi swivangelo leswinga twaliki. (Det. 24:1-4; Mat. 19:3, 8) Kambe loko hi swivangelo leswi twalaka a boha kudlaya wukati, a afanele amu nyika papela la kudlaya wukati. Papela leli ali sirhelela wansati leswaku anga hehliwi hi kuva a tikhome hi ndlela yobiha hi tlhelo la masangu. Hambileswo, swi tikomba ingi na angesemu nyika a afanele a rhanga hi kuvulavulisana ni lava a va li ni wulawuli la kuyavanyisa timhaka ka doropa. Hi ndlela leyi, valawuli avata va ni mukhandlu wa kuringeta kumu pfuna leswaku a pfuxeta wukati la yena. Ahi minkama hinkwayu leyi Yehovha a anghenela timhaka hi xikombiso, hi kutirhisa madoda ni vaprofeta loko nuna a tshuka a dlaya wukati na kunga li hi swivangelo leswi twalaka. Hambiswilitano, aayi vona mihloti ni kuvaviseka ka wansati lweyi a tshikiweke. — Mal. 2:13-16.

7-8. a) Hi xihi xileriso lexi Yehovha axi nyikeke vapsali? (Vona xifaniso xa tluka lorhanga.) b) Hi djondza yini ka minawu leyi?

⁷ Nawu wa Moxe wu tlhela wuhi pfuna kuvona leswaku Yehovha a lava leswaku vana va rhandziwa va tlhela va titwa va sirhelelekile. Yehovha a lerise vapsali leswaku va nyika vana va vona hinkwaswu leswi lavekaka leswaku va kula kahle ni kutlhela vava pfuna leswaku va yaka wuxaka lelinene ni Xikwembu. Vapsali va fanele va tirhisa mukhandlu wun’wana ni wun’wana lowu vanga na wona leswaku va pfuna vana va vona kuva va twisisa ni kunyika lisima a Nawu wa Yehovha. (Det. 6:6-9; 7:13) Phela Yehovha a tshame a khatisa tiko la yena hi mhaka ya leswi ali khoma van’wana va vana va lona hi ndlela leyi biheke. (Yer. 7:31, 33) Hikolaho, Vapsali ava fanelanga va cuvuka vana va vona ongi hiloko vo va ‘xilo’ xokarhi lexi faneleke xi khomiwa hi ndlela leyi biheke kumbe lexinga fanelangiki xi khataleliwa. Kuhambana ni leswo, va fanele va languta vana tani hi tshomba, nyiko leyi taka hi ka Yehovha, leyi va faneleke vayi nyika lisima. — Pis. 127:3.

⁸ Leswi minawu leyi yihi djondzisaka swona: Yehovha wayi vona ndlela leyi nuna ni nsati va khomanaka ha yona. A lava leswaku vapsali va rhandza vana va vona naswona a vula leswaku loko vanga yendli leswo vata khatisiwa.

9-11. Hayini Yehovha a nyikele nawu lowu tsimbisaka kunavela swa van’wana?

⁹ Unga naveli swa van’wana. A Nawu wa wugamu ka minawu ya 10 awu tsimbisa kunavela kobiha ka swilo swa van’wana. (Det. 5:21; Rhom. 7:7) Yehovha  a nyike Vayisrayele a nawu lowu leswaku ava djondzisa mhaka ya lisima — ava fanele va sirhelela mbilu ya vona, kunga mimpimiso ni ndlela leyi ava titwa ha yona. Yehovha waswi tiva leswaku munhu ango suketana a yendla minchumu ya kubiha. A rhanga hi kutshamela kuyi pimisa. (Swi. 4:23) Loko Muyisrayele owo tshamela kupimisa hi swilo swa kubiha ambilwini ya yena, swinga yendleka aata gama a khoma van’wana hi ndlela leyi biheke. Hosi Davhida a wile ka ntlhamu lowu. Akusunguleni a ali munhu wamunene. Kambe ka khambi lin’wana a navele nsati wa munhu mun’wana. Kunavela ka yena kumu wisele xidjoheni. (Yak. 1:14, 15) A mbuyetile, a lava ni tindlela ta kukanganyisa nuna wa wansati lweyi a mbuyeteke na yena naswona hi wugamu a yendle leswaku wanuna lweyi a dlayiwa. — 2 Sam. 11:2-4; 12:7-11.

¹⁰ Yehovha aaswi tiva loko Muyisrayele wokarhi a tsandzeke kuyingisa nawu wa kupapalata kunavela swilo swa van’wana. Phela, waswi tiva leswi hiswi pimisaka ni ndlela leyi hi titwaka ha yona. (1 Tikro. 28:9) Nawu wa kupapalata kunavela swilo swa van’wana awu djondzisa vanhu va yena leswaku ava fanele va papalata mimpimiso leyi ayitava susumetela kuyendla swilo swa kubiha. Xana nawu lowu awuswi kombisi leswaku Yehovha i Xikwembu xa lirhandzu ni wutlharhi?

¹¹ Leswi minawu leyi yihi djondzisaka swona: Yehovha a vona swa kutlula leswi hinga xiswona hi le handle. A nyikela yingiso ka leswi hinga xiswona hi le ndzeni, ambilwini ya hina. (1 Sam. 16:7) Aku na nchumu lexi hingaxi fihlelaka Yehovha. Hambileswo, anga tshameli kulavetela swa kubiha ka hina. A lava leswinga swinene naswona a navela leswaku timbilu ta hina ti tala hi leswinene. Ahi khutaza leswaku hi tikambela akuva hi vona ni kudlaya mimpimiso ya kubiha leyingaha sungulaka kukula atimbilwini ta hina. — 2 Tikro. 16:9; Mat. 5:27-30.

12. I mpsini swin’wana leswi Nawu wa Moxe wuhi djondzisaka swona?

¹² Nawu wa Moxe wu tlhela wuhi djondzisa leswaku Yehovha a rhandza wululami. (Pis. 37:28; Esa. 61:8) Ahi vekela xikombiso lexi hetisekeke a mhakeni ya kukhoma van’wana hi ndlela leyi lulameke. Loko Vayisrayele va yingisa minawu leyi aava nyika yona, aava katekisa. Loko vangayi yingisi minawu ya yena leyi lulameke, ava xaniseka. Ahi voneni swikombiso swa minawu yimbirhi ka minawu ya 10 leyi aava nyike yona.

13-14. Minawu yimbirhi ya kusungula ka minawu ya 10 ayi lerisa Vayisrayele kuyendla yini naswona hi wahi mavuyelo lawa avama kuma loko vayi yingisa?

¹³ Gandzela Yehovha ntsena. Minawu yimbirhi yakusungula ka minawu ya 10 ayi lerisa Vayisrayele leswaku va gandzela Yehovha ntsena ni kutivonela leswaku vanga gandzeli swikwembu swin’wana. (Ekso. 20:3-6) Matshan’wini ya kuvuyelisa Yehovha, a minawu leyi ayi vuyelisa vona. Loko va tshembeka ka Yehovha ivi va gandzela yena ntsena, swilo aswiva fambela kahle kambe loko va gandzela swikwembu swa matiko man’wana, ava xaniseka.

¹⁴ Pimisa hi Vakanana. Matshan’wini ya kugandzela Xikwembu xa ntiyiso, ava gandzela swifaniso swaku ni kuhefemula aswinga hefemuli. Hi mhaka leyo, a kugandzeleni ka swona, ava yendla swilo swa kunyenyentsa swinene. (Pis. 115:4-8) Ava yendla timhaka ta masangu hi tindlela ta kunyenyentsa swinene va tlhela va nyikela hambi hi vana leswaku va va magandzelo. Minkama yin’wana Vayisrayele avangaxi yingisi Xikwembu naswona ava tekelela mikhuva leyi. Xana ali li lihi vuyelo loko va yendla leswo? Mindjangu ya vona ayi hlupheka. (2 Tikro. 28:1-4) Lava a va ni wulawuli avanga landzi minawu ya Yehovha leyi lulameke. Ava tirhisa wulawuli la vona hi ndlela leyi biheke, va xanisa lava tsaneke ni va xiyimo xa le hansi. (Ezek. 34:1-4) Yehovha a byele Vayisrayele leswaku aata yavanyisa lava khomaka hi ndlela yobiha vafelakazi ni vana lava feliweke hi mamana kumbe b’ava. (Det. 10:17, 18; 27:19) Kambe a kuhumelela yini loko va yingisa va tlhela va khomana hi ndlela leyi lulameke? Yehovha aava katekisa. — 1 Tiho. 10:4-9.

15. Hi djondza yini hi Yehovha?

¹⁵ Leswi minawu leyi yihi djondzisaka swona: Ahi fanelanga hi nyika nandzu Yehovha loko lava vulaka leswaku va gandzela Xikwembu vanga yingisi minawu  ya xona ivi va xanisa vanhu va yena. Ahi tiyisekeni leswaku Yehovha waswi vona loko hi khomiwa hi ndlela leyinga lulamangiki. Kuvava loku aku twaka kutlula loku twiwaka hi mamana wokarhi loko a vona n’wana wa yena a hlupheka. (Esa. 49:15) Kukala anga tekeli kunghenela mhaka aswi vuli leswaku angata yendla nchumu. Hi nkama lowu faneleke, ata yavanyisa hinkwavu lava khomaka van’wana hi ndlela leyinga lulamangiki.

16-18. Nawu wa Moxe awu khumba swiyenge swihi swa wutomi naswona wuhi djondzisa yini?

¹⁶ Nawu wa Moxe awu vulavula hi swiyenge swinyingi swa wutomi. Hikolaho, a madoda ama fanele ma yavanyisa vanhu va Yehovha hi ndlela leyi lulameke. Ama fanele ma yendla leswo kunga li loko ma yavanyisa timhaka leti yelanaka ni kugandzela Yehovha ntsena, kambe ni loko ma yavanyisa timhaka leti yelanaka ni kuholovisana kokarhi kumbe loko kutluliwe nawu. Ahi voneni swikombiso swingaliswingani.

¹⁷ Loko Muyisrayele a dlaya munhu wokarhi, aanga tekeli kudlayiwa. Madoda lama yavanyisaka timhaka ka doropa la yena ama fanele ma kambisisa kahle mhaka mangase yendla xiboho xa kuva a dlayiwa. (Det. 19:2-7, 11-13) Madoda ama tlhela ma yavanyisa timhaka tin’wana leti yelanaka ni swilo swa siku ni siku. Hi xikombiso, loko vanhu va holovisana hi terenu, yindlo kumbe masimu ava fanele va yisa mhaka leyi ka madoda; loko nuna ni nsati va tsandzeka kululamisa timhaka ta vona, na vona ava fanele vati yisa ka madoda. (Ekso. 21:35; Det. 22:13-19) Loko madoda ma yavanyisa hi ndlela leyi lulameke naswona Vayisrayele va yingisa Nawu, hinkwavu ava vuyeliwa naswona tiko hinkwalu ali yendla leswaku vito la Yehovha li dzunisiwa. — Lev. 20:7, 8; Esa. 48:17, 18.

¹⁸ Leswi minawu leyi yihi djondzisaka swona: Swiyenge hinkwaswu swa wutomi la hina i swa lisima ka Yehovha. Hi mhaka leyo, a lava leswaku hi kombisa lirhandzu ni kululama loko hi tirhisana ni vanhu van’wana. Hambiloko hi li hoxe, Yehovha a nyikela yingiso ka leswi hiswi vulaka kumbe kuswi yendla, hambiloko hi li xihundleni akaya ka hina. — Hev. 4:13.

19-21. a) Madoda ni vayavanyisi ava fanele vava khomisa kuyini vanhu va Xikwembu? b) Nawu wa Moxe awuva sirhelelisa kuyini vanhu naswona hi djondza yini ka wona?

¹⁹ Yehovha a alava kusirhelela vanhu va yena ka nkucetelo wobiha wa matiko lawa ama li kusuhi na vona. Hi mhaka leyo, a alava leswaku vayavanyisi ni madoda va landzela Nawu hi ndlela leyi lulameke. Kambe leswo aswinga vuli leswaku lava yavanyisaka ava fanele va khoma lava vava yavanyisaka hi ndlela ya kutika swinene. Matshan’wini ya leswo, ava fanele va kombisa lirhandzu ni wululami. — Det. 1:13-17; 16:18-20.

²⁰ Ntwelawusiwana wa Yehovha wumu susumetela kuveka minawu leyi sirhelelaka vanhu va yena leswaku vanga khomiwi hi ndlela leyinga lulamangiki. Hi xikombiso, Nawu awu yendla leswaku swinga vevuki ku munhu a hehla munhu mun’wana na kunga li na wumboni leli tiyisekisaka mhaka. Hayini hi vula leswo? Hikusa lweyi a hehliwaka a ani mfanelo ya kutiva lweyi amu hehlaka. (Det. 19:16-19; 25:1) Handle ka leswo, aku laveka timboni timbirhi leswaku ti tiyisekisa mhaka na angase nyikiwa nandzu. (Det. 17:6; 19:15) Kambe aswi ku yini loko Muyisrayele a yendle nchumu lexingayo voniwa hi munhu mun’we ntsena? Hambileswi xingayo voniwa hi munhu mun’we ntsena aanga fanelanga a pimisa leswaku aangata yavanyisiwa.  Yehovha aaswi vonile leswi aswi yendleke. Andjangwini, wulawuli ali vekiwe mavokweni ya vapsali. Hambiswilitano, wulawuli la vona ali ni swipimelo. Timhaka tin’wana leti humelelaka ndjangwini ati fanele ti yisiwa ka madoda lawa ama ni wutihlamuleli la kuti kambela ni kuti yavanyisa. — Det. 21:18-21.

²¹ Leswi minawu leyi yihi djondzisaka swona: Yehovha ahi vekela xikombiso lexi hetisekeke. Hinkwaswu leswi aswi yendlaka swi lulamile. (Pis. 9:7) A katekisa hinkwavu lava yingisaka minawu ya yena kambe lava tirhisaka wulawuli la vona hi ndlela leyi hoxeke, wava khatisa. (2 Sam. 22:21-23; Ezek. 9:9, 10) Van’wana vangaha yendla swilo swobiha ivi swi tikomba ingaku ava yendliwi nchumu. Hi nkama lowu faneleke, Yehovha ata yendla leswaku va kuma wuyavanyisi leliva fanelaka. (Swi. 28:13) Loko vanga tisoli, vata tivonela hi voxe leswaku “i mhaka leyichavisaka kuwela mavokweni ya Xikwembu lexihanyaka.” — Hev. 10:30, 31.

22-24. a) Nawu wa Yehovha awu sirhelela vamani hi kukongoma naswona wuhi djondzisa yini hi Yehovha? b) Hi xihi xibasopiso lexi kumekaka ka Eksoda 22:22-24?

²² Nawu awu sirhelela hi kukongoma lava ava tsandzeka kutisirhelela, votani hi lava feliweke hi b’ava kumbe mamana, vafelakazi ni valuveli. Vayavanyisi ava byeliwe leswi hi Yehovha: “Awufanelanga usoholota wuyavanyisi la munhu wa kuta kumbe la n’wana lweyi afeliweke, naswona awufanelanga utekela mufelakazi nguvu ya yena leswaku yiva xitiyisekiso xa xikweneti.” (Det. 24:17) Yehovha a khatalelile mun’wana ni mun’wana lweyi aanga li na wuswikoti la kutisirhelela naswona a khatise lava ava khoma vanhu lava hi ndlela leyinga lulamangiki. — Lerha Eksoda 22:22-24.

²³ Nawu awu tlhela wu sirhelela swirho swa ndjangu leswaku swinga tshuki swi yendla timhaka ta masangu  hi xiswona. (Lev. 18:6-30) Kuhambana ni vanhu va matiko lawa ama li kusuhi na vona, lava ava pfumelela leswaku swirho swa ndjangu swi va ni timhaka ta masangu hi xiswona, vanhu va Yehovha ava languta swilo leswi hi ndlela leyi Yehovha aaswi languta ha yona — tani hi swilo leswi nyenyentsaka.

²⁴ Leswi minawu leyi yihi djondzisaka swona: Yehovha a lava leswaku lavanga ni wulawuli va khatala hi lavanga hansi ka vona hikusa loko vanga yendli leswo vatati hlamulela ka Yehovha. Phela, waswi nyenya kuvona vanhu va pfinya vatsongwana, va sindzisa van’wana kuyendla timhaka ta masangu na vona kumbe kuvona swirho swa ndjangu wun’we swi va ni timhaka ta masangu hi xiswona. Hikolaho, a lava leswaku hinkwavu, ngopfungopfu lava tsandzekaka kutisirhelela, leswaku va khomiwa hi ndlela leyi lulameke va tlhela va sirheleliwa.

25-26. a) Hayini lirhandzu ni kululama swi fanisiwa ni wutomi ni moya lowu hiwu hefemulaka? b) Hita bula hi yini ka nhlokomhaka leyingata landzela ka nxanxamelo wa tinhlokomhaka leti vulavulaka hi lirhandzu ni wululami la Yehovha?

²⁵ Lirhandzu ni wululami swinga fanisiwa ni moya lowu hiwu hefemulaka ni wutomi. Leswaku xin’we xi va kona kulaveka lexin’wana. Hi ndlela leyi fanaka, kuvona ndlela leyi lulameke leyi Yehovha ahi khomaka ha yona swi yendla leswaku lirhandzu la hina hi yena li kula. Naswona lirhandzu la hina hi Yehovha ni minawu ya yena leyi lulameke lihi susumutela kurhandza van’wana ni kuva khoma hi ndlela leyi lulameke.

²⁶ Nawu wa Moxe wu pfune Vayisrayele leswaku va va ni wuxaka leli tiyeke na Yehovha. Hambiswilitano, vanhu va Xikwembu namuntlha avaha li hansi ka Nawu lowu. Lifu la Kreste liwu hetisisile li tlhela liwu siva hi Nawu wa kuyampsa swinene. (Rhom. 10:4) Mupostola Pawulo a hlamusele leswaku Nawu awu li ‘ndzhuti ntsena wa leswosaseka leswingatahumelela’. (Hev. 10:1) Nhlokomhaka leyingata landzela ka nxanxamelo wa tinhlokomhaka leti vulavulaka hi lirhandzu ni wululami la Yehovha yita vulavula hi swin’wana swa swilo leswo saseka leswingata humelela ni kutlhela yi hlamusela lisima la lirhandzu ni wululami abandleni la Wukreste.