1, 2. а) Мар кулэ котькуд адямилы? б) Малы ми оскыны быгатӥськомы?

 КОТЬКУД адямилэн потэ, сое мед яратозы но мукетъёсыз асьсэды соин шонерлыко мед возёзы шуыса. Нош милемыз уг ярато ке но милемын асьсэды шонерлыко уг возё ке, ми шӧдыны быгатомы, ми номырлы ярасьтэмесь но шуг-секытысь потэммы уг луы шуыса.

² Иегова тодэ, милемлы яратон но шонерлык туж кулэ шуыса (Пс. 32:5). Оскыны луэ: Инмар милемыз туж яратэ, но солэн потэ, мукетъёсыз асьсэды милемын шонерлыко мед возёзы шуыса. Ми сое адӟыны быгатомы, куке малпаськомы Закон вылын, кудзэ Иегова Израильлы Моисей пыр сётӥз. Тӥледыз уг ярато шуыса, сюлэмды висе ке яке, шонерлыктэм ужъёсын пумиськыса, мылкыдды усиз ке, малпаське, кызьы Моисейлэн законысьтыз b адӟыны луэ, Иегова ас калыксэ яратэ шуыса.

3. а) Мае адӟыны луэ, Моисейлэн законэз вылын малпаськыса, кызьы гожтэмын Римъёслы 13:8—10? б) Кыӵе юанъёсты ми та статьяын эскеромы?

³ Моисейлэн законэз вылын малпаськыса, адӟыны луэ, макем шуныт шӧдонъёссэ милемлы возьматэ яратӥсь Иегова Инмармы. (Лыдӟе Римъёслы 13:8—10.) Та статьяын ми эскеромы Израильлы сётэм куд-ог законъёсты но та юанъёслы валэктонъёс шедьтомы: малы вераны луоз, Закон Иеговалэсь яратонзэ возьматэ вал но адямиослэсь асьсэды шонерлыко возьыны мылкыдзэс ӝутэ вал шуыса? Кызьы кивалтӥсьёслы Законэз уже кутоно вал? Кинэ тужгес но утиз Закон? Та юанъёслы валэктонъёс милемыз буйгатыны, милемлы оскон сётыны  но Инмарен кусыпъёсмес юнматыны быгато (Ап. уж. 17:27; Рим. 15:4).

4. а) Малы вераны луэ, Моисейлэн законэз Инмарлэсь яратонзэ возьматэ шуыса? б) Кыӵе курон-косонъёс валтӥсь луо, кызьы адӟиське Иисуслэн кылъёсысьтыз, кудъёсыз гожтэмын Матфейлэн 22:36—40?

⁴ Малы вераны луоз, Закон Иеговалэсь яратонзэ возьматэ шуыса? Малы ке шуоно ваньзэ, мае лэсьтэ Иегова, со яратэменыз лэсьтэ (1 Иоанн 4:8). Законысь вань куронъёс, кудъёссэ сётӥз Иегова, инъяськемын кык валтӥсь курон-косонъёс вылэ: Иеговаез яратыны но аслэсьтыд матысьтэ яратыны (Лев. 19:18; К. Зак. 6:5; лыдӟе Матфейлэсь 22:36—40). Соин ик вераны луэ: котькудаз 600-лэсь тросгес курон-косонъёсысь адӟиське, кызьы Инмар яратонзэ пӧртэм сямен возьматэ. Эскеромы куд-ог примеръёсты.

5, 6. Мае Иегова кузпалъёслэсь возьма но мае со адӟе? Вералэ пример.

⁵ Кузпалдылы оскымон луэ но нылпиосты сярысь сюлмаське. Иеговалэн потэ, кузпалъёслэн яратонзы ноку но медаз кысы шуыса (Ул.-выл. 2:24; Матф. 19:3—6). Кузпаллэн азон-калгон сьӧлыке пыремез — со одӥгез тужгес но лек уж, кудзэ адями лэсьтыны быгатэ. Соин ик Дас курон-косонъёс пӧлысь сизьыметӥяз гожтэмын: «Азон-калгон сьӧлыке эн пыры» (К. Зак. 5:18). Со, кин азон-калгон сьӧлыке пыре, Инмар азьын туж сьӧлыка но кузпалэзлы туж вӧсь каре (Ул.-выл. 39:7—9). Куддыръя со вӧсь луон кема дыр ӵоже уг ортчы.

⁶ Иегова адӟе, кызьы кузпалъёс асьсэды ог-огенызы возё. Солэн туж потэ вал, Израиль калыкысь пиосмуртъёс кышноосынызы асьсэды умой мед возёзы шуыса. Законэз гажась карт кышнозэ яратэ вал но огшоры муген соин уг люкиськы вал (К. Зак. 24:1—4; Матф. 19:3, 8). Кузпалъёс куспын секыт югдур кылдыку, пиосмурт люкиськыны ужпум кутэ вал ке, солы кышноезлы люкиськон сярысь гожтэт сётоно вал. Та гожтэт кышномуртэз утиз шонертэм янгыше уськытонъёслэсь, со азон-калгон сьӧлыке пыриськиз шуыса. Со сяна, гожтэтэз кышноезлы сётэмезлэсь азьло картлы карлэн тӧроосызлы вазиськоно вал, вылды. Солы луыса тӧроослэн луонлыксы кылдэ вал, кузпалъёслы семьязэс утьыны юрттон понна. Израиль калыкысь пиосмурт аслыз пайда утчаса люкиське вал ке, Иегова сое та ужлэсь котьку ик ӧз куты. Озьы ке но Иегова кышномуртлэсь синкылизэ адӟе вал но вӧсь луэмзэ шӧдэ вал (Мал. 2:13—16).

7, 8. а) Мар карыны косӥз Иегова анай-атайёсты? б) Кыӵе йылпумъянъёс лэсьтыны луэ?

⁷ Озьы ик Законысь адӟиське: Иеговалэн потэ, нылпиос шуодоесь мед луозы но соослы номыр кышкытлык медаз вайы шуыса. Инмар анай-атайёсты нылпиоссылэн сиён-юонзы, дӥськутсы, улон интызы мед луоз шуыса гинэ сюлмаськыны ӧз косы, но озьы ик юрттыны косӥз соослы Инмарен умой кусыпъёс возьыны. Анай-атайёслы котькуд учыре нылпиоссэс Иеговалэсь Законзэ дунъяны но Инмарез яратыны дышетоно вал (К. Зак. 6:6—9; 7:13). Израиль калыкысь анай-атайёс нылпиосынызы асьсэды лек возизы. Со одӥгез муг, малы Иегова соосты кыл кутытӥз (Иер. 7:31, 33). Анай-атайёслы малпано ӧй вал, нылпиосынызы мар каремзы потэ, сое ик карыны быгато шуыса, нош соос шоры учконо вал «Кузё-Инмарлэн сётэм люкетэз» шоры кадь, кудзэ дунъяны кулэ вал (Пс. 126:3).

⁸ Йылпумъянъёс. Иегова адӟе, кызьы кузпалъёс асьсэды ог-огенызы возё. Солэн потэ, анай-атайёс нылпиоссэс мед яратозы шуыса. Нош соос асьсэды нылпиосынызы лек возё ке, Инмар соосты кыл кутытоз.

9—11. Малы Иегова «Кулэ эн кары» шуыса курон-косон сётӥз?

⁹ «Кулэ эн кары». Дас курон-косонъёс пӧлысь берпуметӥез вормыны косэ вал тырмостэм сямез — мукет адямилэсь марзэ ке но кулэ карон мылкыдэз (К. Зак. 5:21; Рим. 7:7).  Та законэз сётыса, Иеговалэн туж кулэезлы дышетэмез потэ вал: аслэсьтыд сюлэмдэ утёно, яке чаклано, кыӵе тынад малпанъёсыд но шӧдонъёсыд. Со тодэ, шонертэм малпанъёс но мылпотонъёс урод ужъёсы вутто шуыса (Мад. 4:23). Израиль калыкысь адями сюлмаз шонертэм мыл потонъёслы каръяськыны лэзе вал ке, бератаз со мукетъёслы яратонзэ уг возьматы вал, вылды. Ӵапак сыӵе янгыш лэсьтӥз Давид эксэй. Со умой адями вал, но одӥг пол мукет адямилэсь кышнозэ аслыз каремез потӥз. Та мыл потон сое сьӧлыке вуттӥз (Иак. 1:14, 15). Давид со кышномуртэн азон-калгон сьӧлыке пыриз, солэсь картсэ пӧяны тыршиз но югдуръёсты тупатӥз озьы, картэз мед кулоз шуыса (2 Экс. 11:2—4; 12:7—11).

¹⁰ Иегова тодӥз, ку адями та законэз тӥя вал, малы ке шуоно со тодэ, мар котькуд адямилэн сюлмаз (1 Пар. 28:9). Закон, кудӥз тырмостэм сямез вормыны косэ вал, адямиослэсь мылкыдзэс ӝутӥз палэнтыны малпанъёсты, кудъёсыз урод ужъёсы вуттыны быгатысалзы. Татысь адӟиське Иегова Атаймылэн яратӥсь но визьлыко луэмез.

¹¹ Йылпумъянъёс. Иегова уг учкы адямилэн вылтусыз шоры. Со учке солэн сюлмыз шоры, мар адямилэн пушказ (1 Экс. 16:7). Инмар адӟе ваньзэ: малпанъёсмес, шӧдонъёсмес но ужъёсмес. Иегова сюлмысьтымы умойзэ адӟыны тырше но умойгес луыны мылкыдмес ӝутэ. Со сяна, Инмарлэн потэ, ми шонертэм малпанъёсты адӟыны мед быгатомы но соослы урод ужъёс лэсьтыны мылкыдмес ӝутыны медам лэзе шуыса (2 Пар. 16:9; Матф. 5:27—30).

12. Мае ми эшшо тодӥськомы на Моисейлэн законысьтыз?

¹² Озьы ик Моисейлэн законысьтыз ми тодӥськомы, Иегова шонерлыкез яратэ шуыса (Пс. 36:28; Ис. 61:8). Со туж умой адӟем карон возьматэ, кызьы мукетъёсыныз астэ шонерлыко возёно. Куке израиль калык Иеговалэсь курон-косонъёссэ быдэсъя вал, со соосты бакель карылӥз. Нош куке калык Инмарлэн шонерлыко эсэпъёсызлэсь уг кылзӥськы вал, со шуг-секытъёсын пумиськылӥз. Ойдолэ эскеромы Дас курон-косонъёс пӧлысь эшшо кыксэ.

13, 14. Мар кырыны куро вал Дас курон-косонъёс пӧлысь нырысетӥ кыкез но кызьы соослэсь кылзӥськон израиль калык вылын шӧдӥськиз?

¹³ Иеговалы гинэ ужалэ-тырше. Дас курон-косонъёс пӧлысь нырысетӥ кыкез куро вал, израиль калык Иеговалы гинэ оскымон мед луоз шуыса, но сульдэръёслы-идолъёслы йыбыртъямлэсь алӥз (Пот. 20:3—6). Иегова та курон-косонъёсты аслыз пайда утчаса ӧз пукты. Соос калыклы пайда вайысалзы. Куке израиль калык Иеговалы оскымон вал, соос азинлыко улӥзы. Нош куке соос мукет калыкъёслэн инмаръёссылы йыбыртъяло вал, соос шуг-секытъёсын пумиськылӥзы.

¹⁴ Ойдолэ малпаськомы хананей калык сярысь. Соос улэп, зэмос Инмарлы ӧз йыбыртъялэ, нош лултэм сульдэръёслы-идолъёслы йыбыртъязы. Соин ик соос уродгес но уродгес луизы (Пс. 113:12—16). Кылсярысь, хананей калыклэн осконэз пӧлы пыро вал азон-калгонэн герӟаськем юрӟым ужъёс но нылпиосты курбонэ вайылонъёс. Куке израиль калык Иеговаез вунэтэ вал но сульдэръёслы-идолъёслы йыбыртъяны кутске вал, соос но юрӟым ужъёс лэсьтылӥзы но матысь адямиоссэс вӧсь карылӥзы (2 Пар. 28:1—4). Со сяна, кивалтӥсьёс Инмарлэн шонерлыко эсэпъёсызъя ӧз улэ. Соос асьсэлы пайда утчаса кивалтӥзы, озьы ик ултӥязы ляб адямиосты но соосты, кинъёслэн утисьсы ӧй вал (Иез. 34:1—4). Иегова алӥз ас калыксэ, со судъялоз шуыса соосты, кинъёс палкышноосын но нылпиосын асьсэды лек возё (К. Зак. 10:17, 18; 27:19). Нош израиль калыкысь адямиос  Инмарлы оскымон кылё вал ке но ог-огенызы асьсэды шонерлыко возё вал ке, со соосты бакель карылӥз (3 Экс. 10:4—9).

15. Кыӵе йылпумъянъёс ми лэсьтыны быгатӥськомы?

¹⁵ Йылпумъянъёс. Иеговаез янгыше уськытоно ӧвӧл, куке адямиос, кудъёсыз верало Инмарлы ужало-тыршо шуыса, солэн эсэпъёсызъя уг уло но солэсь ужась-тыршисьёссэ вӧсь каро. Иегова яратэ милемыз но адӟе, куке ми шонерлыктэм ужъёсын сэрен курадӟиськомы. Ӵошатоно ке анаен, кудӥзлэн нылпиез курадӟе, Иегова милесьтым вӧсь луэммес золгес шӧдэ. Со югдурез соку ик уг тупаты ке но, ас дыраз со кыл кутытоз соосты, кинъёс мукетъёсыныз асьсэды лек возё но уг ӧпкелё.

16—18. Улонлэн кыӵе удысъёсаз Моисейлэсь законзэ улонэ кутыны луэ но кыӵе йылпумъянъёс ми лэсьтыны быгатӥськомы?

¹⁶ Моисейлэсь законзэ израиль калыклэн улонэзлэн пӧртэм удысъёсаз уже кутыны луэ вал. Соин ик израиль тӧроослы Иеговалэсь калыксэ шонерлыко судъяны туж кулэ вал. Соос Инмарлы йыбырттонэн герӟаськем юанъёсты гинэ ӧз эскере, но озьы ик адямиослэн улонэнызы но катъёсты тӥянэн герӟаськем ужъёсты но эскеризы. Учкомы куд-ог примеръёсты.

¹⁷ Израильысь пиосмурт кинэ ке вие вал ке, со ӧз возьматы, сое соку ик виёзы шуыса. Карысьтыз тӧроос, луэм учырлэсь вань югдуръёссэ эскеремзы бере, ужпум куто вал, виёно-а сое, ӧвӧл-а (К. Зак. 19:2—7, 11—13). Со сяна, соос эскеризы калыклэн улонэныз герӟаськем пӧртэм ужъёсты: ваньбурен герӟаськем юанъёсты но, семья куспын кылдэм ченгешонъёсты но (Пот. 21:35; К. Зак. 22:13—19). Тӧроос шонерлыко ужпумъёс куто вал ке но калык Законэз быдэсъя вал ке, со ваньмызлы пайда вайылӥз, но калык Иеговаез данъялляз (Лев. 20:7, 8; Ис. 48:17, 18).

¹⁸ Йылпумъянъёс. Иегова чакла, кызьы ми асьмемыз возиськомы улонмылэн котькуд удысъёсаз. Солэн потэ, мукетъёсыныз кусып возьыкумы, ми яратон но шонерлык сярысь медам вунэтэ шуыса. Со адӟе, мар ми вераськомы но лэсьтӥськомы, дорамы огнамы кыльыкумы но (Евр. 4:13).

19—21. а) Кызьы тӧроослы но судьяослы Инмарлэн калыкеныз асьсэды возёно вал? б) Мар Иегова лэсьтӥз, ас калыксэ шонерлыктэм ужъёслэсь утён понна, но кыӵе йылпумъянъёс лэсьтыны луэ?

¹⁹ Иеговалэн потэ вал, артысь калыкъёслэн асьсэды шонертэм воземзы Израиль калыклы медаз пыӵа шуыса. Соин ик со тӧроосты но судьяосты Законэз уже кутыны косӥз, ваньзэ лыдэ басьтыса. Соослы калыкен асьсэды лек возёно ӧй вал, нош шонерлыкез яратоно вал (К. Зак. 1:13—17; 16:18—20).

²⁰ Иегова ужась-тыршисьёссэ жаля, соин ик со сюлмаськиз, соосты шонерлыктэм ужъёслэсь утён понна. Кылсярысь, Законлы луыса адямиез лэсьтымтэ йыруж понна шергес янгыше уськытыны быгатӥзы. Янгыше уськытэм адями тодыны быгатэ вал, кин сое янгыше уськытэ (К. Зак. 19:16—19; 25:1). Адямиез  янгыш шуыса лыдъяны быгато вал кык адӟись муртъёслэн верамзыя гинэ (К. Зак. 17:6; 19:15). Нош адӟись мурт одӥг гинэ вал ке? Янгыше уськытэм мурт уг быгаты вал малпаны, со кыл кутытэмын уз луы шуыса, малы ке шуоно Иегова ваньзэ адӟиз. Семья йыръёслэн кивалтыны правозы вал, но соослы асьсэлы но кинлэсь ке но кылзӥськоно вал. Куд-ог учыръёсын семья куспын кылдэм ченгешонъёсты тӧроослы эскероно вал, но со юан пумысен соослы ик ужпум кутоно вал (К. Зак. 21:18—21).

²¹ Йылпумъянъёс. Иегова милемлы туж умой адӟем карон возьматэ: ваньмыз, мае со лэсьтэ, шонерлыко (Пс. 88:15). Со бакель каре соосты, кинъёс солэн эсэпъёсызъя уло, но кыл кутытэ соосты, кинъёс асьсэлы пайда утчаса кивалто (2 Экс. 22:21—23; Иез. 9:9, 10). Куддыръя малпан кылдэ, йыруж лэсьтӥсьёс но лек адямиос кыл кутытэмын уг луо шуыса, нош ас дыраз Иегова соосты судъялоз (Мад. 28:13). Соос ӧз ӧпкеле ке, ӝоген тодозы, макем кышкыт «улэп Инмарлэн киулаз сюрыны» (Евр. 10:30, 31).

22—24. а) Кинэ тужгес но утиз Закон но кыӵе йылпумъянъёс лэсьтыны луэ? б) Кыӵе алон гожтэмын Потонын 22:22—24?

²² Закон тужгес но утиз соосты, кинъёслэн утисьсы ӧй вал,— анайтэм-атайтэм нылпиосты, палкышноосты, сьӧрлось лыктэм муртъёсты. Израильысь судьяослы верамын вал: «Сьӧрлось лыктэм муртэ, анайтэм-атайтэм нылпиез умойтэм судить эн кары, пунэмзэ тырытозязлы палкышнолэсь дӥськутсэ ас кияд  эн басьты» (К. Зак. 24:17). Иегова тужгес но сюлмаськиз соос сярысь, кинъёслэн утисьсы ӧй вал, но вӧсь карисьёссэс кыл кутытэ вал. (Лыдӟе Потонэз 22:22—24.)

²³ Озьы ик Закон семьяосты уте вал азон-калгонэн герӟаськем йыружъёслэсь: со ӧз лэзьы матысь ӵыжы-выжыен кузпалъяськыны (Лев. 18:6—30). Артэ улӥсь калыкъёс сыӵе ужъёсысь номыр уродзэ ӧз адӟе. Нош Иеговалэн син азяз со туж юрӟым вал, израиль калыклы но со ужъёс шоры озьы ик учконо вал.

²⁴ Йылпумъянъёс. Иеговалэн потэ, соос, кинъёслы со кивалтыны право сётӥз, мукетъёсызлы яратонзэс мед возьматозы шуыса. Со адӟемпотостэм каре, куке адямиос азон-калгон сьӧлыке пыро. Инмарлэн потэ, нокин но, тужгес но утисьтэк кылем адями, кышкытлыкен но шонерлыктэм ужен медаз пумиськы шуыса.

25, 26. а) Малы яратонэз но шонерлыкез ӵошатыны луэ шоканэн но улонэн? б) Мае ми эскеромы ньыль статьяос пӧлысь мукетаз?

²⁵ Яратонэз но шонерлыкез ӵошатыны луэ шоканэн но улонэн: одӥгез мукетызтэк луыны уг быгаты. Ми оскиськомы ке, Иегова милемын ассэ шонерлыко возе шуыса, милям солы яратонмы юнма. Нош Инмарез но солэсь шонерлыко эсэпъёссэ яратон мылкыдмес ӝутэ мукетъёссэ яратыны но асьмеды соосын шонерлыко возьыны.

²⁶ Моисей законлэн тупанкылыз израиль калыклы Иеговаен матысь кусыпъёс возьыны юрттӥз. Нош куке Иисус Законэз быдэстӥз, Инмарлэн калыкезлы Законлэсь кылзӥськоно ӧй вал ини, со Христослэн законэныз воштэмын вал (Рим. 10:4). Павеллэн верамезъя, Закон «вуоно ӟечлыклэн вужерез» вал (Евр. 10:1). Ньыль статьяос пӧлысь мукетаз ми эскеромы, мар со «ӟечлык», озьы ик вераськомы со сярысь, макем кулэ луо яратон но шонерлык христиан кенешын.