ເຈົ້າຮູ້ບໍ?
ໂຮງທຳໃນສະຕະວັດທຳອິດ ຮູບນີ້ສະແດງໃຫ້ເຫັນໂຄງສ້າງຂອງໂຮງທຳຊາວຢິວຢູ່ເມືອງກຳລາ ເຊິ່ງຢູ່ຫ່າງຈາກທະເລຄາລິເລໄປທາງຕາເວັນອອກສຽງເໜືອປະມານ 10 ກິໂລແມັດ. ນີ້ເຮັດໃຫ້ເຮົາເຫັນພາບວ່າໂຮງທຳຂອງຊາວຢິວມີລັກສະນະເປັນແນວໃດ.
ໂຮງທຳຂອງຊາວຢິວມີຄວາມເປັນມາແນວໃດ?
ຄຳວ່າ “ໂຮງທຳ” ມາຈາກຄຳພາສາເກັຣກທີ່ມີຄວາມໝາຍວ່າ “ການປະຊຸມ” ຫຼື “ການມາເຕົ້າໂຮມກັນ.” ຊື່ນີ້ເໝາະສົມຫຼາຍເພາະໂຮງທຳເປັນສະຖານທີ່ປະຊຸມເພື່ອຈະໄດ້ຮັບການສອນແລະເພື່ອນະມັດສະການພະເຈົ້າໃນຊຸມຊົນຊາວຢິວທີ່ມີມາຕັ້ງແຕ່ສະໄໝບູຮານ. ພະຄຳພີພາກພາສາເຫບເລີບໍ່ໄດ້ເວົ້າກ່ຽວກັບໂຮງທຳຢ່າງຈະແຈ້ງ ແຕ່ພະຄຳພີພາກພາສາເກັຣກສະແດງໃຫ້ເຫັນຢ່າງຈະແຈ້ງວ່າໂຮງທຳຂອງຊາວຢິວມີຢູ່ທົ່ວໄປຢູ່ແລ້ວໃນສະຕະວັດທຳອິດ.
ນັກວິຊາການສ່ວນຫຼາຍເຊື່ອວ່າໂຮງທຳຂອງຊາວຢິວເລີ່ມມີຕອນທີ່ຊາວຢິວຖືກຈັບໄປເປັນຊະເລີຍຢູ່ບາບີໂລນ. ປຶ້ມສາລານຸກົມຈູໄດກາ ໃຫ້ເຫດຜົນວ່າ: “ເນື່ອງຈາກຊາວຢິວເຫຼົ່ານັ້ນຖືກເນລະເທດໄປຢູ່ໄກຈາກວິຫານຂອງພະເຈົ້າ ແລະໄປຢູ່ໃນດິນແດນຂອງຄົນຕ່າງຊາດ ເຂົາເຈົ້າຈຶ່ງຕ້ອງການກຳລັງໃຈເພື່ອບັນເທົາຄວາມທຸກລຳບາກ ເຂົາເຈົ້າຈະມາພົບກັນເປັນບາງຄັ້ງບາງຄາວເຊິ່ງອາດຈະເປັນວັນຊະບາໂຕ ແລະອ່ານພະຄຳພີ.” ຫຼັງຈາກຖືກປົດປ່ອຍຈາກການເປັນຊະເລີຍ ເບິ່ງຄືວ່າຊາວຢິວກໍຍັງມາປະຊຸມຮ່ວມກັນເພື່ອອະທິດຖານ ອ່ານພະຄຳພີ ແລະເຂົາເຈົ້າໄດ້ສ້າງໂຮງທຳຢູ່ທົ່ວທຸກບ່ອນທີ່ເຂົາເຈົ້າໄປຢູ່.
ເມື່ອຮອດສະໄໝສະຕະວັດທຳອິດ ໂຮງທຳຂອງຊາວຢິວກໍກາຍເປັນສູນກາງຂອງສາສະໜາຢິວ ແລະເປັນບ່ອນລວມຕົວຂອງຊາວຢິວທີ່ກະແຈກກະຈາຍແຖວເມດີແຕລາເນ ທົ່ວຕາເວັນອອກກາງ ແລະໃນອິດສະລາແອນ. ສາດສະດາຈານ ລີ ເລີເວັນຈາກມະຫາວິທະຍາໄລເຫບເລີໃນເຢຣຶຊາເລມບອກວ່າ: “ໂຮງທຳຂອງຊາວຢິວເປັນບ່ອນສຶກສາຄົ້ນຄວ້າ ກິນອາຫານມື້ສັກສິດ ຕັດສິນເລື່ອງຄະດີຄວາມ ຈັດການເລື່ອງເງິນກອງທຶນບ້ານ ລວມເຖິງຈັດການປະຊຸມທາງການເມືອງແລະສັງຄົມ.” ລາວບອກອີກວ່າ: “ທີ່ສຳຄັນທີ່ສຸດຄືເປັນບ່ອນເຮັດກິດຈະກຳທາງສາສະໜາ.” ນີ້ຈຶ່ງເຮັດໃຫ້ເຮົາບໍ່ແປກໃຈວ່າເປັນຫຍັງພະເຍຊູຈຶ່ງມັກໄປໂຮງທຳຂອງຊາວຢິວເລື້ອຍໆ. (ມໂກ. 1:21; 6:2; ລືກາ 4:16) ເພິ່ນໄປທີ່ນັ້ນເພື່ອສອນ ໃຫ້ຄຳແນະນຳ ແລະໃຫ້ກຳລັງໃຈຜູ້ຄົນ. ຫຼັງຈາກທີ່ປະຊາຄົມຄລິດສະຕຽນກໍ່ຕັ້ງຂຶ້ນແລ້ວ ໂປໂລກໍມັກໄປປະກາດຢູ່ໂຮງທຳຄືກັນ. ເນື່ອງຈາກຄົນທີ່ຢາກໃກ້ຊິດພະເຈົ້າມັກໄປບ່ອນນັ້ນ ດັ່ງນັ້ນ ເມື່ອໂປໂລເຂົ້າໄປເມືອງໃດ ລາວກໍຈະໄປທີ່ໂຮງທຳກ່ອນເພື່ອປະກາດຢູ່ຫັ້ນ.—ກິດ. 17:1, 2; 18:4
