Otembo yipi olosunangonga via sovuiwa?

ONDAKA “osunangonga” kelimi lio Helasi yi lomboloka “ohongele” ale “oku liongolola pamosi.” Ondaka osunangonga ya sunguluka momo ocitumãlo cimue va Yudea va enda oku liongoluili oco va longisiwe loku fendela tunde kosimbu. Ovisonehua vio Heveru ka vi tukula ondaka sunangonga, pole, Ovisonehua vio Helasi vi lombolola okuti ovitumãlo viaco viefendelo via kala ale tunde kocita catete K.K.

Valua vakuakukonomuisa, va tava okuti olosunangonga via sovuiwa eci va Yudea va kala kupika ko Bavulono. Elivulu limue lia va Yudea li lombolola okuti: “Olomandekua omo okuti va kala kofeka yikuavo kuenje va yonguile oku lembelekiwa, olonjanja vimue citava okuti Volocasapalo va enda oku li sanga oco va tange Ovisonehua.” Eci va yovuiwa kumandekua, va Yudea vamamako oku liongolola oco va likutilile loku tanga Ovisonehua kuenda ovo va sokiya olosunangonga kovitumãlo viosi va endaile.

Kocita catete K.K., olosunangonga via pangele onepa kefendelo lia va Yudea kolonepa viosi vio Mediterrâneo, ko Oriente Médio kuenda ko Isareli. “[Olosunangonga] viaco via kala ovitumãlo vioku tanga, vioku linga ovipito vi kola, kuenda ovina vikuavo, vioku eca ovilumba kuenda olohongele viopulitika,” oco ca popia Lee Levine ulongisi Wosikola ya velapo ya va Heveru ko Yerusalãi. Wamisako vali hati: “Ocina ca kuatele vali esilivilo, ovopange atiamẽla ketavo.” Omo liaco, ka ci komõhisa okuti Yesu wa endavo oku iñila volosunangonga. (Mar. 1:21; 6:2; Luka 4:16) Volosunangonga viaco Yesu wa enda oku vetiya loku lembeleka omanu va kalapo. Noke lioku tumbikiwa kuekongelo Liakristão, upostolo Paulu wa kundilavo calua volosunangonga. Vana va yonguile oku kuata ukamba la Suku va sukilile oku enda vosunangonga, omo liaco, olonjanja viosi eci Paulu a iñila volupale lumue, ocina catete a linga oku enda vosunangonga oku kundilamo.—Ovil. 17:1, 2; 18:4.