1. Ma lubbe ki 1 Petero 3:8, pingo wamaro bedo kacel ki jo ma giparo pi kit ma wawinyo kwede ki ber bedowa?

WAMARO bedo kacel ki jo ma giparo piwa ki ber bedowa, jo ma gitemme me niang tamwa ki kit ma wawinyo kwede. Giniang mitiwa ci giminiwa kony​—kare mukene bene ma nongo peya wapenyo pire. Wapwoyo jo ma ginyutu cwiny me “kica” * piwa.​—Kwan 1 Petero 3:8.

2. Pingo mitte ni watute matek me nyuto kica pi jo mukene?

² Macalo Lukricitayo, wan ducu wamito nyuto ni waparo pi jo mukene. Ento ki lok ada, timone pe yot kare ducu. Pingo? Tyen lok acel aye ni watye ki roc. (Rom. 3:23) Pi meno, omyero walweny ki miti ma kinywalowa kwede me paro piwa kekenwa. Medo i kom meno, jo mukene ginongo nyuto kica tek pi kit ma gudongo kwede nyo jami mutimme i kwogi. Me agikkine, twero bedo ni kwo pa dano murumowa gudowa matek. I kare man me agikki-ni, pol pa dano pe giparo pi kit ma jo mukene giwinyo kwede. Me ka meno, ‘gimaro komgi kengi.’ (2 Tem. 3:1, 2) Ngo ma romo konyowa me loyo ariya magi wek wamedde ki nyuto ni waparo pi jo mukene?

3. (a) Waromo dongo kerowa me paro pi jo mukene nining? (b) Ngo ma wabinyamo i pwony man?

³ Waromo dongo kerowa me paro pi jo mukene ka walubo lanen pa Lubanga Jehovah gin ki Wode, Yecu Kricito. Jehovah obedo Lubanga ma lamar, dok en oweko lanen maber loyo me paro pi jo mukene. (1 Jon 4:8) Yecu olubo  kit pa Wonne kikome. (Jon 14:9) I kare ma en tye i lobo, en owekiwa lanen maber i kom kit ma dano twero nyuto kwede kica. I pwony man, wabicako ki nyamo kit ma Jehovah gin ki Yecu gunyuto kwede ni giparo pi kit ma jo mukene winyo kwede. I ngeye wabineno kit ma waromo lubo kwede lanengi.

4. I yo ango ma Icaya 63:7-9 nyuto ni Jehovah paro pi kit ma luticce giwinyo kwede?

⁴ Baibul pwonyo ni Jehovah paro pi kit ma luticce giwinyo kwede. Me labolle, tam kong kit ma Jehovah owinyo kwede i kare ma jo Icrael gubedo ka kato ki i pekki mapatpat. Lok pa Lubanga waco ni, “I cangi ducu en bene oneno iye can.” (Kwan Icaya 63:7-9.) Lacen, Jehovah otiyo ki lanebine Jekaria, me wacone ni, ka kiuno jone, en tero ni kitye ka uno en aye. Jehovah owaco ki luticce ni: “Ngat ma ogudo komwu nongo ogudo tong wang Rwot [Jehovah].” (Jek. 2:8 Baibol) Jehovah pud dong otiyo ki labol maber adada me nyuto kit ma eparo kwede pi jone!

5. Mi labol ma nyuto jami ma Jehovah otimo me konyo luticce ma gitye ka deno can.

⁵ Jehovah pe winyo arem pa jone ma gideno can keken ci otum. En bene timo gin ma mitte me konyogi. Me labolle, i kare ma jo Icrael gubedo ka deno can macalo opii i Ejipt, Jehovah oniang aremgi dok man otugo cwinye me konyogi. Jehovah owaco bot Moses ni: ‘Dong atyeko neno atwom pa jona, ka dok awinyo kokogi, i ada angeyo cannegi. Ci dong abilor piny ka larogi ki i cing jo Ejipt.’ (Nia 3:7, 8) Jehovah olaro jone ki i opii pien kica omake i komgi. Lacen i nge mwaki mapol, ma jo Icrael gitye i Lobo ma Kiciko Pire, lumonegi gubedo ka lweny i komgi. Jehovah odok iye nining? “Kica yam mako Rwot [Jehovah] i komgi kare ki kare ka gicur i kom jo ma unogi kun gidiyogi ki tek.” Pud dok aye, kica otugu cwiny Jehovah me konyo jone. En ocwalo lungolkop me laro jo Icrael ki i cing lumonegi.​—Lungol. 2:16, 18.

6. Mi labol ma nyuto kit ma Jehovah onyuto kwede ni eparo pi laticce ma tamme pe tye kakare.

 ⁶ Jehovah paro pi kit ma jone giwinyo kwede​—kadi bed i kare mukene tamgi pe tye kakare. Tam kong i kom gin mutimme i kom Yona. Lubanga ocwalo laticce man ni ocit ka tito kwena me ngolo kop i kom jo Nineve. I kare ma gungut i kom balgi, Lubanga otimigi kica. Ento, Yonacwinye pe obedo yom pi tam ma Jehovah omoko-ni. “Kiniga omake” pien lok ma en otito, ni kibijwero Nineve pe ocobbe. Ento Jehovah odiyo cwinye i kom Yona dok okonye me loko tamme. (Yon 3:10–4:11) I nge kare mo, Yona oniang gin ma Jehovah obedo ka pwonye kwede, dok Jehovah otiyo kwede me coyo lok mutimme i kome wek wanong adwogi maber ki iye.​—Rom. 15:4. *

7. Kit ma Jehovah otero kwede jone i kare mukato nyuto gin ango?

⁷ Kit ma Jehovah otero kwede jone nyuto ni en paro pi luticce. En ngeyo arem ki can pa wan ducu ki acel acel. Jehovah ‘ngeyo kit cwiny pa dano ducu.’ (2 Tekwaro 6:30) En niang tam ma tye i cwinywa, kit ma wawinyo kwede, wa ki gorowa. Dok en ‘pe biye ni gibitwa matek makato ma waromo cirone.’ (1 Kor. 10:13) Man pud dong cuko cwinywa ya!

8-10. Ngo ma okonyo Yecu me nyuto kica pi jo mukene?

⁸ I kare ma Yecu tye i lobo, en onyuto ni eparo pi jo mukene. Tye jami ma romo adek ma okonyo Yecu me paro pi jo mukene. Mukwongo, kit ma waneno kwede con, Yecu onyuto kit pa Wonne ma i polo kikome i kwone. Calo Wonne, Yecu onongo maro dano. Kadi bed ni cwiny Yecu obedo yom i kom jami ducu ma en okonyo Jehovah me yubone, ento tutwalle ‘cwinye obedo yom i kom litino pa dano.’ (Car. 8:31) Mar otugo cwiny Yecu me paro pi kit ma jo mukene giwinyo kwede.

⁹ Me aryo, calo Jehovah, Yecu onongo twero ngeyo gin ma tye i cwiny dano. En onongo niang mitigi ki kit ma giwinyo kwede. (Mat. 9:4; Jon 13:10, 11) Pi meno, i kare ma Yecu oniang ni dano onongo cwinygi otur, kica otugo cwinye me kweyo cwinygi.​—Ic. 61:1, 2; Luka 4:17-21.

¹⁰ Me adek, Yecu kikome bene okato ki i pekki ma jo mukene gikato ki iye. Me labolle, Yecu nen calo odongo i paco ma jone onongo lucan. Wonne ma opite, Yucepu, opwonyo Yecu me bedo latic matek. (Mat. 13:55; Mar. 6:3) Nen calo Yucepu oto ma Yecu peya ocako ticce me pwony. Ka tye kit meno ci Yecu oniang maber arem me cola ma iwinyo ka irwenyo danoni me amara. Dok en oniang kit ma bedo i gang ma jone dinigi opokke tek kwede. (Jon 7:5) Kwo ma Yecu okato ki iye-ni okonye me niang pekki ma jo mukene-ni gikato ki iye ki kit ma giwinyo kwede.

11. Awene ma onen ka maleng ni Yecu paro pi jo mukene? Tit kong. (Nen cal ma tye i pok ngeye.)

¹¹ Kica ma Yecu tye kwede pi jo mukene onongo nen ka maleng i kare ma en timo tango. Yecu pe otimo tango pien ni obedo ticce. “Kica omako Yecu” i kom jo ma onongo gitye ka deno can. (Mat. 20:29-34; Mar. 1:40-42) Me labolle, go kong kit ma Yecu owinyo kwede i kare ma en  okwanyo lading-it mo ki i kin lwak, otere cen ci ocange nyo i kare ma en ocero wod pa dato me Nain. (Mar. 7:32-35; Luka 7:12-15) Kica omako Yecu i kom jo magi dok onongo mito konyogi.

12. I yo ma nining ma Jon 11:32-35 nyuto ni Yecu onongo paro pi Marita ki Maliam?

¹² Yecu onyuto ni eparo pi Marita ki Maliam. I kare ma en oneno kumugi pi to pa omingi Lajaro, “Yecu okok ki pig wange.” (Kwan Jon 11:32-35.) En pe okok pien ni erwenyo lareme ma emaro. En onongo ngeyo ni ebicero Lajaro woko. Me ka meno, Yecu okok pien en oniang cwercwiny ma lureme gitye ka winyone pi to pa Lajaro.

13. I yo ango ma pwonyo lok i kom kica pa Yecu cuko cwinywa?

¹³ Pwonyo lok i kom kit ma Yecu onyuto kwede kica cuko cwinywa. Ngene kene ni, wan pe watye labongo roc calo Yecu. Ento, wamare pien en otero jo mukene i yo me kica. (1 Pet. 1:8) Ngeyo ni Yecu tye ka loc i polo macalo Kabaka me Ker pa Lubanga cuko cwinywa adada. Ma pe otero kare malac, en bijwayo pekki ducu. Yecu aye ngat maber loyo ma twero konyo dano me cang ki i arem ki can ma loc pa Catan okelo, pien en bene kong okwo i lobo macalo dano. Lok ada, watye ki mot me bedo ki Laloc ma “winyo arem kacel kwedwa pi gorowa.”​—Ibru 2:17, 18; 4:15, 16.

14. Jo Epeco 5:1, 2 cuko cwinywa me timo gin ango?

¹⁴ Ka watamo i kom lanen ma Jehovah gin ki Yecu guwekiwa, cuko cwinywa me tute me nyuto kica. (Kwan Jo Epeco 5:1, 2.) Wan pe watye calo Jehovah gin ki Yecu ma gitwero ngeyo gin ma tye i cwiny dano. Kadi bed kit meno, waromo temme me niang kit ma giwinyo kwede. (2 Kor. 11:29) Pe calo jo me lobo man ma orumowa-ni ma giparo pigi kengi, wan watute matek ‘pe me tamo pi gin ma konyowa keken ento pi gin ma konyo jo mukene bene.’​—Pil. 2:4.

15. Angagi tutwalle ma myero gunyut ni giparo pi luwotgi?

¹⁵ Tutwalle luelda me kacokke aye omyero gupar pi jo mukene. Gingeyo ni Lubanga bipenyogi pi ticgi me gwoko romi ma en omiyo i cinggi. (Ibru 13:17) Wek luelda gukony luye luwotgi, omyero guniang kit ma giwinyo kwede. Luelda ginyuto nining ni giniang kit ma jo mukene winyo kwede?

16. Gin ango ma laelda ma lakica timo, dok pingo man pire tek?

¹⁶ Laelda ma lakica kwanyo kare me bedo ki omegine ki lumegine. En penyogi lapeny ci ciko ite me winyo lokgi kun diyo cwinye. Man pire tek tutwal ka romo mo mito tito tamme ki kit ma ewinyo kwede ento nongo tek. (Car. 20:5) Ka laelda miyo karene me bedo ki omege, ci gen, mar, ki dong wat i kingi doko matek.​—Tic 20:37.

17. Kit ango ma omege ki lumege mapol giwaco ni pire tek loyo pi luelda? Mi labol mogo.

¹⁷ Omege ki lumege mapol giwaco ni kit ma pire tek loyo pi luelda aye paro pi jo mukene. Pingo? Laminwa Adelaide owaco ni: “Man weko bedo yot me lok kwedgi, pien nongo ingeyo ni gibiniang lokki.” En omedo ni: “Itwero neno ni giparo piri i kit ma gidok kwede i kom pekoni ma itittigi.” Omego mo ma tye ki pwoc pi kit ma laelda mo otere kwede otito ni: “Aneno ka pig wang laelda meno cwer i kare ma otamo i kom peko ma atye  ka kato ki iye. Gin man pe birweny ki i wiya.”​—Rom. 12:15.

18. Watwero dongo cwiny me paro pi jo mukene nining?

¹⁸ Ngene kene ni, pe luelda keken aye myero gupar pi jo mukene. Wan ducu watwero dongo kit man. Nining? Omyero watute me niang pekki ma lupacowa ki luye luwotwa gitye ka kato ki iye. Nyut miti i kom lutino me mwaka apar ki wiye ma gitye i kacokkewu, kacel ki jo ma komgi lit, jo mutii, ki jo ma gurwenyo danogi me amara i to. Penygi kit ma gitye kwede. Cik iti iwiny lokgi maber ka gitito kit ma giwinyo kwede. Konygi me neno ni iniang peko ma gitye ka lweny kwede. Jalle me konyogi i yo mo keken ma itwero. Ka watimo kit meno, nongo watye ka nyuto mar me ada.​—1 Jon 3:18.

19. Pingo omyero walok yo ma watiyo kwede ka watye ka temme me konyo jo mukene?

¹⁹ Omyero walok yo ma watiyo kwede ka watye ka temme me konyo jo mukene. Pingo? Pien dano gidok i kom pekkigi i yo mapatpat. Jo mogo gimaro lok, kun mukene pe gimito lok i kom pekkigi. Dong kadi bed wamito miyo kony, omyero wagwokke ki penyo lapeny ma lano dano. (1 Tec. 4:11) Kadi bed jo mukene gutitiwa kit ma giwinyo kwede, twero bedo ni nongo tamwa pe rwatte ki megi. Ento, omyero wiwa opo ni meno aye kit ma giwinyo kwede. Wamito ni wawiny lok oyotoyot dok pe warune ka gamone.​—Mat. 7:1; Yak. 1:19.

20. Ngo ma wabinyamo i pwony ma lubo man?

²⁰ Medo i kom nyuto cwiny me kica i kacokke, mitte bene ni wanyut kit man i ticwa me pwony. I yo ango ma waromo nyuto kwede ni waparo pi dano i ticwa me pwony? Wabigamo lapeny meno i pwony ma lubo man.