1. Биске 1 Петр 3:8-ле болзо, улус бисти килеп турза, нениҥ учун јарап јат?

УЛУС бисти килеп турза, биске јарап јат эмей. Темдектезе олор бистиҥ сезимдеристи, санааларысты ла керексиништеристи оҥдоорго, бойын бистиҥ ордыбыска тургузарга албаданат, анайда ок кезикте болушты сурагалагыста да болужарга белен болот. Бисти оҥдоп, килеп турган * улусты бис баалап јадыс. (1 Петр 3:8 кычырыгар.)

2. Биске нениҥ учун улусты килеерге кезикте јеҥил эмес?

² Христиан болгон кийнисте, улусты килеп турарга кӱӱнзейдис. Је кезик улуска килеҥкей болорго јеҥил эмес. Нениҥ учун дезе, баштапкызында, бис толо кемдӱ эмезис (Рим. 3:23). Оныҥ учун јаҥыс бойысты сананатан кӱӱнле тартыжар керек. Андый кӱӱн энедеҥ чыкканыстаҥ ала болот. Экинчизинде, кемге де чыдап ӧскӧн айалганаҥ улам эмезе јӱрӱминде болгон кандый бир учуралдаҥ улам улусты килеерге кӱч болот. Ӱчинчизинде, бис айландыра улустыҥ кӱӱн-санаазын алынардаҥ айабазыс. Бу калганчы кӱндерде кӧп улус ӧскӧ улусты керекке албай да јат. Агару Бичик андый улусты «јаҥыс бойын сӱӱр» улус деп айдат (2 Тим. 3:1, 2). Бу буудактарды ӧдӱп чыгарга ла улустыҥ сезимдерин оҥдоп турарга нени эдер керек?

3. а) Улусты килееринде оноҥ јакшы ӱренип аларга биске не болужар? б) Бу јӧрмӧлдӧ нени шӱӱжерис?

³ Улусты килееринде оноҥ јакшы ӱренип аларга, Иегованаҥ ла оныҥ Уулынаҥ, Иисус Христостоҥ, тем алар керек. Иегова — сӱӱштиҥ Кудайы, ол оныҥ учун улустыҥ сезимдерин оҥдоп турарыныҥ эҥ јакшы темин кӧргӱзет (1 Иоанн 4:8).  Иисус Адазынаҥ темди канайып алатанын толо кеминде кӧргӱскен (Иоанн 14:9). Иисус јерде јӱрерде улусты канайып килеериниҥ темин артыргыскан. Бу јӧрмӧлдӧ бис озо баштап Иегова ла Иисус улустыҥ сезимдерин канайып оҥдогонын шӱӱжерис. Оноҥ олордоҥ кандый тем аларын кӧрӧрис.

4. Исаия 63:7—9-таҥ Иегова ишчилериниҥ сезимдерин ајаруга алат деп, канайып кӧрӱнет?

⁴ Агару Бичиктеҥ кӧргӧнисте Иегова ишчилериниҥ сезимдерин ајаруга алат. Темдектезе, израильтяндарда кӱчтер болуп турарда, Иеговада кандый сезимдер болгонын сананып ийектер. Оныҥ Сӧзинде мынайып айдылган: «Олордыҥ кыйналганы сайын, ол до кыйналган». (Исаия 63:7—9 кычырыгар *.) Судурчы Захария ажыра Иегова бойыныҥ ишчилерине мынайып айткан: «Слерге тийген кижи, мениҥ кӧзимниҥ каразына тийгендий болот» (Зах. 2:8). Бу сӧстӧрлӧ болзо, Кудайдыҥ албатызына калју баштанганы, Кудайга калју баштангандый болот. Мынайып айдылганынаҥ Иегова бойыныҥ албатызын килеп турган деп, сӱрекей јакшы кӧрӱнет.

5. Иегова тӱбекке тӱшкен бойыныҥ ишчилерине канайып болушкан?

⁵ Иегова тӱбекке тӱшкен бойыныҥ ишчилерин јӱк ле оҥдоп турган эмес, је олорго болужып јат. Темдектезе, Египетте кулданышта болгон израильтяндардыҥ коркышту кӱч айалгазын оҥдоп, олорды јайымдаарга кӱӱнзеп, Моисейге мынайып айткан: «Албатымныҥ кыйын-шыразын кӧрӱп јадым... оныҥ ый-сыгыдын угуп јадым... Оныҥ шыралап турганын билерим. Оныҥ учун олорды Египеттиҥ колынаҥ јайымдап аларга барып јадым» (Чыг. 3:7, 8). Анайып, Иегова бойыныҥ албатызын килеп, олорды кулданыштаҥ јайымдап алган. Је качан Берер болгон јерде Израиль албатыга ӧштӱлер табарып турарда Иегова нени сескен? Ол «албатызыныҥ базынчыктадып ла кажы ла јанынаҥ кыспактадып турганынаҥ  улам онту-калагын угуп, олорды карамдаган». Иегова бойыныҥ албатызыныҥ сезимдерин оҥдоп, олорго болужып туратан. Анайып, израильтяндарды ӧштӱлердеҥ корулаарга, јаргычылар ийип туратан (Јарг. 2:16, 18).

6. Иегова бойыныҥ ишчилериниҥ сезимдерин, олор јастыра да сананып турза, оҥдоп турган деп, кандый учуралдаҥ кӧрӱнет?

⁶ Иегова бойыныҥ ишчилериниҥ сезимдерин, керек дезе олор јастыра да сананып турза, оҥдоп јат. Ионаныҥ темин кӧрӱп ийектер. Кудай бу судурчыны Ниневияныҥ улузын јоголторго турганын айтсын деп ийген. Је ниневитяндар јастыразын алынып ийерде, Кудай олорды килеп јат. Бу Ионага јарабаган, не дезе, оныҥ коркышту судуры бӱтпей калган. Је Иегова ого чын кӧрӱмдӱ болорго чыдамкай болушкан (Иона 3:10—4:11). Иона бу учуралдаҥ бойына ӱредӱ алган. Кудай бу учуралды биске де тузалу болзын деп бичидип салган (Рим. 15:4) *.

7. Иегованыҥ бойыныҥ ишчилерин килеп турганы бисти неде бӱдӱмјилейт?

⁷ Бис Иегованыҥ бойыныҥ албатызын килеп турганын кӧрӱп, ол бойыныҥ ишчилериниҥ сезимдерин оҥдоп турган деп бӱдӱмјиленедис. Ол бистиҥ кажыбыстыҥ ла кыйын-шырабысты кӧрӱп јат. Анайда ок Иегова «улустыҥ јӱректерин» билер (2 Лет. 6:30). Ол бистиҥ јажытту санааларысты, сезимдеристи, кӱчис неге једерин ле неге јетпезин билип, «кӱчибис јетпес ченелтелерди болдыртпас» (1 Кор. 10:13). Кандый токуналу сӧстӧр!

8—10. Иисуска улусты оҥдоп турарга не болушкан?

⁸ Иисус јерде јадарда, улусты оҥдоп туратан. Мындый болорго, ого не болушкан? Баштапкызында, ӧрӧги айдылганыла Иисус теҥеридеги Адазынаҥ темди канайып алатанын толо кеминде кӧргӱскен. Ол улусты база сӱӱген. Ол Иеговага ончо немени јайаарында болужарга сӱӱнген, је анчада ла оныҥ «сӱӱнчизи кижи уулдарыла колбулу болгон» (Укаа 8:31). Иисус улусты сӱӱген, оныҥ учун олордыҥ сезимдерин сананган.

⁹ Экинчизинде, Иисус Иегова чылап улустыҥ јӱрегинде не барын билген. Оноҥ улам ол улустыҥ сезимдерин ле немени кандый санаадаҥ улам эдип турганын билер болгон (Матф. 9:4; Иоанн 13:10, 11). Оныҥ учун кемниҥ-кемниҥ кунугып калганын кӧрзӧ, оны килеп, токунадып туратан (Иса. 61:1, 2; Лука 4:17—21).

¹⁰ Ӱчинчизинде, Иисус улустыҥ уур-кӱчтериниҥ кезигин бойы да ӧткӧн. Темдектезе, ол јокту биледе ӧскӧн. Иисус бойыныҥ ӧӧй адазына, Иосифке, болушкан, оныҥ учун уур иштиҥ јеҥил эмезин билер болгон (Матф. 13:55; Марк 6:3). Иисус јуук кижизин јылыйтарыныҥ ачузын сескен, не дезе, Иосиф, Иисус агару ишти баштагалакта, божогон болор. Анайда ок сениҥ кудай јаҥыҥды билеҥниҥ кезик улузы јаратпай турган болзо, кандый болуп турганын билген (Иоанн 7:5). Иисус бу да, ӧскӧ дӧ уур-кӱчтерди ӧдӱп, тегин улустыҥ сезимдерин јакшы оҥдоп баштаган.

11. Иисустыҥ килеҥкейи, анчада ла качан јарт кӧрӱнген? Јартап беригер. (Кадарындагы јурукты кӧрӱгер.)

¹¹ Иисустыҥ килеҥкейи, анчада ла кайкалдар эткенинеҥ јарт кӧрӱнген. Ол бу кайкалдарды, шыралап турган улусты карамдап, акту кӱӱнинеҥ эткен (Матф. 20:29—34; Марк 1:40—42). Сананып ийзеер де, Иисус недеҥ улам ӱскер кижини јазып ийерге «улустаҥ туура јединип» апарган, анайда ок тул ӱй кижиниҥ јаҥыс болчок уулын тирилткен?  (Марк 7:32—35; Лука 7:12—15). Иисус бу улусты килеп, олорго болужарга кӱӱнзеген.

12. Иоанн 11:32—35-ле болзо, Иисус Марфа ла Марияны килегенин канайып кӧргӱскен?

¹² Марфа ла Мария кожо чыккан Лазарьдыҥ божогонына ыйлажып турарда Иисус олорды килей берген. Агару Бичикте айдылганыла, «Иисустыҥ кӧзине јаш келди». (Иоанн 11:32—35 кычырыгар.) Иисус јуук најызын јылыйтканынаҥ ыйлай берген эмес, не дезе, ол оны тиргизип ийерин билер болгон. Је ол Лазарьдиҥ ӧлӱмине ыйлажып турган јуук најыларыныҥ ачузын кӧрӱп, ыйлаган.

13. Иисустыҥ улусты килеп турганын шӱӱп сананганы кӱӱнисти канайып кӧдӱрет?

¹³ Иисустыҥ улусты килеп туратанын шӱӱп сананзаас, бистиҥ кӱӱнис кӧдӱрилет. Бис оны улусты оҥдоп турганы учун баалап, сӱӱп јадыс (1 Петр 1:8). Иисус эмди Кудайдыҥ Каандыгында башкарып турганына сӱӱнип јадыс. Ол удабас ончо кыйын-шыраны јоголтып салар. Кандый да ӧйдӧ Иисус јерде кижи болуп јӱрген, оныҥ учун улуска Сатананыҥ башкарузынаҥ улам болгон каршунаҥ айрыларга јӱк ле ол болужар аргалу. Бистиҥ башкараачыбыстыҥ «чине јогысты оҥдоор аргалу» болгоны кандый јакшы! (Евр. 2:17, 18; 4:15, 16).

14. Ефестегилерге 5:1, 2-де Иегова ла Иисустыҥ теми бисти неге кӱӱнзедет?

¹⁴ Иегова ла Иисустыҥ темин шӱӱп сананып турзаас, бис улусты килеерге кӱӱнзедиледис. (Ефестегилерге 5:1, 2 кычырыгар.) Бис улустыҥ јӱрегинде не барын билбей де турган болзоос, је олордыҥ сезимдерин ле керексиништерин оҥдоп алар аргалу (2 Кор. 11:29). Бу телекейдиҥ јаҥыс бойын сананар улузына кӧрӧ, бис «бойыстыйын эмес, је... ӧскӧ дӧ улустыйын санан[арга]» албаданадыс (Флп. 2:4).

15. Анчада ла кемдер килеҥкей болор учурлу?

¹⁵ Анчада ла аксагалдар килеҥкей болор учурлу. Нениҥ учун дезе олор Иегованыҥ берген койлоры учун каруулу улус (Евр. 13:17). Ака-эјелерге болужарга, аксагалдарга олордыҥ сезимдерин оҥдоп турар керек. Олордыҥ оҥдоп турганы недеҥ кӧрӱнет?

16. Килеҥкей аксагал ака-эјелерге канайып баштанат, нениҥ учун?

¹⁶ Килеҥкей аксагал ака-эјелерле кӧп ӧй ӧткӱрет. Ол олорго сурактар берип, каруузын лаптап угат. Мындый арга јӱрегинде не барын чыгара айдарга керектӱ сӧстӧр таппай турган кижиге сӱреен јакшы болуш болот (Укаа 20:5). Аксагал бойыныҥ ӧйин кысканбай, ака-эјелерле ӧй ӧткӱрип турза, ака ла олордыҥ колбулары, сӱӱжи ле бой-бойын оҥдооры тыҥыыр (Ап. ижи 20:37).

17. Кӧп ака-эјелер аксагалдардыҥ незин баалап јат? Тем куучындап беригер.

¹⁷ Кӧп ака-эјелер анчада ла аксагалдардыҥ улустыҥ сезимдерин оҥдоп турганын баалап јат. Нениҥ учун? Аделейд деп эје айдат: «Аксагалдар сени оҥдоор деп билип турзаҥ, олорго јууктаарга ла олорло куучындажарга канча киреге јеҥил. Сениҥ сӧстӧриҥди канайып укканынаҥ олор сени оҥдоп турган деп кӧрӱп ийедиҥ». Бир ака аксагалла куучындашканын эске алат: «Мен ого бойымныҥ айалгамды куучындап береримде, оныҥ кӧстӧри јаштала берген. Мыны качан да ундып болбозыҥ» (Рим. 12:15).

18. Бис улуска канайып оноҥ килеҥкей болор аргалу?

¹⁸ Је улусты јӱк ле аксагалдар килеер учурлу эмес. Бис ӱзегис улуска оноҥ килеҥкей болор аргалу. Канайып? Слердиҥ билегердиҥ улузы, јуунныҥ ака-эјелери кандый кӱчтерге туштап турганын оҥдоп аларга албаданыгар. Анайда ок јииттерге,  јажы јаанаган улуска, ооруп турган эмезе јуук кижизин јылыйткан улуска ајару эдип туругар. Олордыҥ керектериле јилбиркеп туругар. Олор бойлорыныҥ уур-кӱчтерин куучындап турза, олорды лаптап угыгар. Анайып, слер олорды чыннаҥ ла оҥдоп турганаар деп, олор сезип турзын. Бого коштой, олорго кӱчигер јеткенче болужып туругар. Анайып этсегер, слер чын сӱӱшти керектереерле кӧргӱзеригер (1 Иоанн 3:18).

19. Улуска болужып тура, кажы ла кижи башка деп нениҥ учун ундыбас керек?

¹⁹ Улуска болужып тура, кажы ла кижи башка деп ундыбас керек. Нениҥ учун дезе кӱчтердиҥ ӧйинде кажы ла кижиниҥ сезими башка болот. Кезик улус айдынып аларга јат, а кезиги туйуктанып јат. Улуска болужарга турган болзоос, олордоҥ эби-јок сурактар сурабас керек (1 Фес. 4:11). Је кем де бисле ачыгынча куучындажып тура, биске јарабагадый неме айдардаҥ айабас. Мындый айалгада кижини капшай ла јаргылаарга меҥдебегер. Карын оны лаптап угыгар. Нениҥ учун дезе ол оныҥ сезимдери (Матф. 7:1; Иак. 1:19).

20. Келер јӧрмӧлдӧ кандый сурак шӱӱжилер?

²⁰ Бис јӱк ле христиан јуунныҥ ака-эјелерин эмес, је јарлап турган улусты да килеерге кӱӱнзейдис. Мыны канайып эдер? Бу сурак келер јӧрмӧлдӧ шӱӱжилер.