1. 1 Бутрус 3:8 ајәсинә әсасән, нәјә ҝөрә әтрафымызда бизә ҹан јандыран инсанларын олмасыны хошлајырыг?

ӘТРАФЫМЫЗДА бизи дүшүнән, бизә ҹан јандыран инсанларын олмасы һәр биримиз үчүн хошдур. Онлар өзләрини бизим јеримизә гојмаға чалышыр. Көмәјә еһтијаҹымызын олдуғуну дујуб, бәзән биз демәмиш јардым әли узадырлар. Дәрдимизә шәрик олан * инсанлар бизим үчүн чох әзиздир. (1 Бутрус 3:8 ајәсини охујун.)

2. Нәјә ҝөрә инсанларын дәрдинә шәрик олмаг үчүн өз үзәримиздә ишләмәлијик?

² Һәр бир мәсиһи башгаларынын дәрдинә шәрик олмаға чалышыр. Лакин бу, һеч дә һәмишә асан олмур. Нә үчүн? Сәбәбләрдән бири гејри-камил олмағымыздыр (Ром. 3:23). Биздә анаданҝәлмә худбинлик хүсусијјәти вар вә онунла мүбаризә апармалыјыг. Бундан әлавә, бәзиләринә алдығы тәрбијәјә вә ја кечмишдә јашадыгларына ҝөрә башгаларынын һиссләрини дујмаг чәтиндир. Диҝәр сәбәб исә әтрафдакы инсанларын тәсиридир. Јашадығымыз ахырзаманда чохлары худбиндир, башгаларынын һиссләринә гаршы лагејд јанашыр (2 Тим. 3:1, 2). Бәс инсанларын дәрдинә шәрик олмағы неҹә өјрәнә биләрик?

3. а) Инсанларын дәрдинә шәрик олмағы неҹә өјрәнә биләрик? б) Бу мәгаләдә нәји арашдыраҹағыг?

³ Јеһова Аллаһын вә Иса Мәсиһин нүмунәси инсанларын дәрдинә шәрик олмағымыза көмәк едә биләр. Јеһова мәһәббәтли Аллаһдыр вә башгаларынын гајғысына галмагда ән ҝөзәл өрнәкдир (1 Јәһ. 4:8). Иса Мәсиһ Атасынын хүсусијјәтләрини мүкәммәл шәкилдә әкс етдирирди (Јәһ. 14:9). Онун јерүзү һәјаты инсанын неҹә шәфгәтли ола биләҹәјини ҝөстәрир.  Бу мәгаләдә Јеһованын вә Иса Мәсиһин инсанларын гајғысына галдығыны ҝөстәрән нүмунәләри арашдыраҹаг вә онлардан неҹә өрнәк ала биләҹәјимиз һагда данышаҹағыг.

4. Әшија 63:7—9 ајәләри Јеһованын бәндәләринин һиссләринә биҝанә олмадығыны неҹә ҝөстәрир?

⁴ Мүгәддәс Китабдан өјрәнирик ки, Јеһова хидмәтчиләринин һиссләринә биҝанә дејил. Мисал үчүн, Јеһованын гәдимдә Исраил халгынын үзләшдији чәтинликләрә неҹә јанашдығына нәзәр салаг. Кәламда јазылыб: «Онлар әзаб чәкәндә О да әзаб чәкди». (Әшија 63:7—9 ајәләрини охујун.) Јеһова даһа сонра Зәкәријјә пејғәмбәр васитәсилә билдирмишди ки, халгына гаршы олунан пис рәфтары Өзүнә гаршы едилән пислик һесаб едир. О, хидмәтчиләринә демишди: «Сизә тохунан Мәним ҝөз бәбәјимә тохунур» (Зәк. 2:8). Јеһова халгынын гајғысына галдығыны неҹә дә ҝүҹлү сөзләрлә тәсвир едиб!

5. Јеһова әзаб чәкән бәндләринә көмәк етмәк үчүн кечмишдә һансы тәдбирләри ҝөрмүшдү?

⁵ Јеһова бәндәләринин һалына јанмагла јанашы, онлара көмәк етмәк үчүн тәдбир ҝөрүр. Мисал үчүн, Мисирдә гул олан исраиллиләр әзаб чәкәндә Јеһова онларын һалына јанмыш вә хилас етмишди. О, Муса пејғәмбәрә демишди: «Халгымын әзаб-әзијјәтини ҝөрүрәм... етдикләри фәрјадлары ешидирәм, нә чәкдикләриндән аҝаһам. Мән јерә ениб онлары мисирлиләрин әлиндән гуртараҹағам» (Чых. 3:7, 8). Јеһова халгынын һалына јандығы үчүн онлары көләликдән азад етмишди. Әсрләр сонра исраиллиләр Вәд едилмиш дијарда дүшмән һүҹумуна мәруз галан заман да Јеһова онларын һиссләринә биҝанә јанашмамышды. Кәламда јазылыб: «Зүлмкарларын вә залым ганичәнләрин әлиндән халгын етдији фәрјад әршә галханда Јеһованын онлара јазығы [ҝәлди]». Јеһова бу дәфә дә шәфгәт һиссиндән ирәли ҝәләрәк тәдбир ҝөрдү. О, исраиллиләри дүшмән әлиндән гуртармаг үчүн һакимләр ҝөндәрди (Һак. 2:16, 18).

6. Јеһованын јанлыш дүшүнән бәндәсинин һиссләринә анлајышла јанашдығына даир нүмунә чәкин.

⁶ Јеһова һәтта сәһв фикирдә олан бәндәләринин дә һиссләринә анлајыш ҝөстәрир. Јунус пејғәмбәр буна бир мисалдыр.  Аллаһ ону Нејнәваја гаршы һөкм хәбәрини чатдырмаға ҝөндәрмишди. Амма халг төвбә етдији үчүн онлары мәһв етмир. Бу гәрар Јунус пејғәмбәрин үрәјинҹә олмур. Нејнәванын дағылаҹағы илә бағлы сөјләдији пејғәмбәрлијин јеринә јетмәмәси ону бәрк һирсләндирир. Лакин Јеһова Јунусла сәбирлә давраныр вә она дүшүнҹәсини дәјишмәјә көмәк едир (Јун. 3:10—4:11). Чох кечмәмиш Јунус Јеһованын өјүдүнүн мәғзини анлајыр. Үстәлик, Јеһова бизләрә дә нәсиһәт олсун дејә, Јунуса баш верәнләри гәләмә алмағы бујурур (Ром. 15:4) *.

7. Јеһованын бәндәләринә гаршы мүнасибәти бизи нәјә әмин едир?

⁷ Јеһованын халгына мүнасибәти бизи әмин едир ки, бәндәләринин һиссләри Онун үчүн өнәмлидир. Һәр биримизин чәкдији әзаб-әзијјәт, дујдуғу ағры-аҹы Она мәлумдур. Јеһова «инсанын үрәјиндәкиләрдән аҝаһ»дыр (2 Салн. 6:30). О бизим ән дәрин дүшүнҹә вә һиссләримизи, мәһдудијјәтләримизи анлајыр вә гојмаз ки, ҝүҹүмүз чатмајан сынаглара мәруз галаг (1 Кор. 10:13). Доғрудан да, бу вәд инсанын гәлбинә раһатлыг ҝәтирир!

8—10. Иса Мәсиһ нәләрин сајәсиндә инсанлара гајғы ҝөстәрә билирди?

⁸ Јер үзүндә јашајаркән Иса Мәсиһ инсанлара ҹан јандырырды. Ҝәлин она бу саһәдә көмәк едән үч амилә нәзәр салаг. Илк нөвбәдә, артыг гејд етдијимиз кими, Иса Мәсиһ Атасынын хүсусијјәтләрини мүкәммәл шәкилдә әкс етдирирди. Јеһова кими, о да инсанлары севирди. Јеһованын хәлг етдији һәр шејә ҝөрә фәрәһләнсә дә, онун көнлүнү ән чох шад едән «бәшәр өвладлары» иди (Мәс. 8:31). Иса инсанлары севдији үчүн онларын һиссләринә биҝанә гала билмирди.

⁹ Икинҹиси, Иса Мәсиһ инсанларын үрәјиндәкиләри ҝөрүрдү, онларын һансы һиссләр кечирдијини билирди (Мәт. 9:4; Јәһ. 13:10, 11). Буна ҝөрә дә инсанын дәрдли олдуғуну ҝөрәндә она јазығы ҝәлирди вә тәсәлли верирди (Әшј. 61:1, 2; Лука 4:17—21).

¹⁰ Үчүнҹүсү, инсанларын үзләшдији бәзи чәтинликләрлә Иса Мәсиһ өзү дә үзләшмишди. Мәсәлән, чох јәгин ки, о, касыб аиләдә бөјүмүшдү. Атасы Јусифин јанында ишләдији үчүн ағыр зәһмәтин нә демәк олдуғуну билирди (Мәт. 13:55; Марк 6:3). Һәмчинин ҝөрүнүр, Јусиф Иса јер үзү хидмәтинә башламаздан өнҹә өлмүшдү. Одур ки, Иса әзиз инсаны итирмәјин аҹысыны да чәкмишди. Бундан әлавә, инсанын аилә үзвләринин онунла ејни имана саһиб олмамасынын нә демәк олдуғуну билирди (Јәһ. 7:5). Бу кими вәзијјәтләр Иса Мәсиһә ади инсанларын үзләшдикләри чәтинликләри, кечирдикләри һиссләри анламаға көмәк едирди.

11. Иса Мәсиһин инсанларын гајғысыны чәкдији хүсусилә нәдән ҝөрүнүрдү? Изаһ един. (Үз габығындакы шәклә бахын.)

¹¹ Иса Мәсиһин инсанларын дәрдинә шәрик олдуғуну хүсусилә дә ҝөстәрдији мөҹүзәләрдән ҝөрмәк олар. О, буну садәҹә мөҹүзә ҝөстәрмәлидир дејә етмирди, онун әзаб чәкәнләрә јазығы ҝәлирди (Мәт. 20:29—34; Марк 1:40—42). Мисал үчүн, кар адамы издиһамын ичиндән гыраға чәкиб сағалданда, јахуд дул гадынын јеҝанә оғлуну дирилдәндә һансы һиссләри кечирдијини тәсәввүр един (Марк 7:32—35; Лука 7:12—15). Иса онларын һалына јаныр вә онлара көмәк едирди.

12. Јәһја 11:32—35 ајәләри Иса Мәсиһин Мартајла Мәрјәмин дәрдинә шәрик олдуғуну неҹә ҝөстәрир?

 ¹² Иса Мәсиһ Илазәрин өлүмүндән кәдәрә гәрг олан Мартајла Мәрјәмин дә дәрдинә шәрик олмушду. Онларын ҝөз јашларыны ҝөрәндә о, гәһәрләниб ағламышды. (Јәһја 11:32—35 ајәләрини охујун.) Иса јахын достуну итирдији үчүн ағламамышды. Ахы, нәтиҹә етибарилә, Илазәри дирилтмәк үчүн ҝәлмишди. Онун ҝөз јашларына сәбәб јахын достларынын чәкдији әзабы дујмасы иди.

13. Иса Мәсиһин инсанларын һалына јандығыны билмәк бизи нә үчүн руһландырыр?

¹³ Иса Мәсиһин инсанларын дәрдинә шәрик олдуғуну билмәк бизә гәлб раһатлығы верир. Инсанлара шәфгәтлә јанашдығы үчүн биз ону чох севирик (1 Бут. 1:8). Һал-һазырда онун Аллаһын Падшаһлығынын Падшаһы олдуғуну билмәк бизи чох руһландырыр. О, тезликлә бүтүн әзаб-әзијјәтләрә сон гојаҹаг. Иса Мәсиһ Шејтанын идарәчилијинин бәшәријјәтә вурдуғу јаралары сағалтмаға көмәк едә биләҹәк ән доғру шәхсдир. Чүнки о өзү дә јер үзүндә јашајанда һәр ҹүр чәтинлијә вә әзаба дөзмәли олуб. Нә хошбәхтик ки, «зәифликләримизи анлаја» билән Рәһбәримиз вар! (Ибр. 2:17, 18; 4:15, 16).

14. Ефеслиләрә 5:1, 2 ајәләри үрәјимиздә һансы истәји ојадыр?

¹⁴ Јеһова Аллаһын вә Иса Мәсиһин гојдуғу нүмунә һагда дүшүндүкҹә инсан башгаларына даһа чох шәфгәт ҝөстәрмәк истәјир. (Ефеслиләрә 5:1, 2 ајәләрини охујун.) Инсанларын үрәјини охуја билмәсәк дә, онларын һиссләрини анламаға вә нәјә еһтијаҹ дујдугларыны ҝөрмәјә чалыша биләрик (2 Кор. 11:29). Дүнјадакы худбин инсанлардан фәргли олараг, биз чалышырыг ки, тәкҹә өзүмүзү јох, башгаларыны да фикирләшәк (Филип. 2:4).

15. Башгаларынын дәрдинә шәрик олмаг хүсусилә кимләрин мәсулијјәтидир?

¹⁵ Хүсусилә дә ағсаггаллар башгаларынын дәрдинә шәрик олмағы баҹармалыдыр. Ағсаггаллар онлара әманәт олунан гузуларын гејдинә неҹә галдыгларына ҝөрә һесабат верәҹәкләр (Ибр. 13:17). Диндашларына көмәк етмәк үчүн ағсаггаллар анлајышлы олмалыдыр. Бәс онлар башгаларынын дәрдинә шәрик олдугларыны неҹә ҝөстәрә биләр?

16. Баҹы-гардашларын һалына јанан ағсаггал нә едир вә бу, нә үчүн ваҹибдир?

¹⁶ Баҹы-гардашларын һалына јанан ағсаггал онлара вахт ајырыр. Суаллар верир, диггәтлә вә сәбирлә онлары динләјир. Бу, олдугҹа ваҹибдир, хүсусилә дә, әҝәр кимсә һиссләрини бөлүшәркән лазыми сөзләр сечмәкдә чәтинлик чәкирсә (Мәс. 20:5). Ағсаггаллар баҹы-гардашлара вахт ајырмаға һазыр оланда онларын арасында етибар, достлуг вә мәһәббәт мөһкәмләнир (Һәв. 20:37).

17. Бир чох баҹы-гардашын ағсаггалларда ән чох дәјәрләндирдији хүсусијјәт һансыдыр? Нүмунә чәкин.

¹⁷ Бир чох баҹы-гардаш ағсаггалларда ән чох дәрдә шәрик олмаг хүсусијјәтини дәјәрләндирдијини дејир. Нә үчүн? Аделајда адлы бир баҹы дејир: «Ағсаггалларын сәнин һиссләрини баша дүшдүјүнү биләндә онунла данышмаг даһа асан олур. Онларла данышаркән ҝөстәрдикләри мүнасибәтдән билинир ки, сәнин һиссләрини дујурлар». Ағсаггалын ҝөстәрдији мүнасибәтә ҝөрә миннәтдар олан бир гардаш дејир: «Ағсаггала өз проблемим һаггында данышанда онун јанағындан јаш сүзүлдүјүнү ҝөрдүм. Бу, һеч вахт јадымдан чыхмаз» (Ром. 12:15).

18. Баҹы-гардашларымызын дәрдинә шәрик олмағы неҹә өјрәнә биләрик?

 ¹⁸ Тәбии ки, башгаларынын дәрдинә шәрик олмаг тәкҹә ағсаггалларын мәсулијјәти дејил. Бу хүсусијјәти һәр биримиз јетишдирә биләрик. Неҹә? Бунун үчүн аилә үзвләринизин вә диндашларынызын нәләр јашадығыны анламаға чалышын. Јығынҹагдакы ҝәнҹләрлә, хәстә оланларла, јашлыларла, әзизләрини итирәнләрлә марагланын. Онларын һалыны сорушун. Һиссләрини бөлүшәркән диггәтлә гулаг асын. Гој онлары һәгигәтән баша дүшдүјүнүзү ҝөрсүнләр. Әлиниздән ҝәлән көмәји тәклиф един. Белә едәндә онлара әсл мәһәббәт ҝөстәрмиш олаҹагсыныз (1 Јәһ. 3:18).

19. Нә үчүн көмәк етмәк истәдијимиз инсанларын вәзијјәтинә ујғунлашмаг ҝәрәкдир?

¹⁹ Баҹы-гардашларымыза көмәк едәркән онларын вәзијјәтләринә ујғунлашмаға чалышын. Нәјә ҝөрә? Чүнки инсанлар чәтинлијә мүхтәлиф јанашыр. Бәзиләри белә вәзијјәтләрдә данышмаға мејилли олур, диҝәрләри исә проблемләри барәдә данышмағы хошламыр. Инсанлара көмәк етмәјә чалышаркән онлары пис вәзијјәтдә гојан суаллар вермәмәлијик (1 Салон. 4:11). Һәтта ола биләр ки, инсан бизимлә һиссләрини бөлүшән заман онун фикирләри илә разы олмајаг. Бу заман баша дүшмәк лазымдыр ки, бу, онун һиссләридир. Одур ки, «ешитмәјә һазыр олмалы», данышмаға тәләсмәмәлијик (Мәт. 7:1; Јаг. 1:19).

20. Нөвбәти мәгаләдә сөһбәт нәдән ҝедәҹәк?

²⁰ Баҹы-гардашларымызын дәрдинә шәрик олмагла јанашы, бу хүсусијјәти хидмәтдә дә тәзаһүр етдирмәк истәјирик. Инсанларын дәрдинә шәрик олдуғумузу шаҝирд һазырламаг ишиндә неҹә тәзаһүр етдирә биләрик? Нөвбәти мәгаләдә бу һагда данышаҹағыг.