1. Hombar tu 1 Petrus 3:8, boasa las rohanta molo rap dohot angka dongan na mamparrohahon jala manarihon hita?

TONTU, las do rohanta molo rap dohot angka dongan na mamparrohahon jala manarihon hita. Alana, marsitutu do nasida patuduhon roha sapangkilalaan. Jala rade do nasida mangurupi hita nang pe ndang tapangido dope. Tontu, mandok mauliate do hita tu angka dongan na patuduhon roha “sapangkilalaan” * tu hita.​—Jaha 1 Petrus 3:8.

2. Boasa ndang mura hita patuduhon roha sapangkilalaan?

² Sude hita halak Kristen, lomo do rohanta patuduhon roha sapangkilalaan. Alai taboto, ndang mura mangulahon i. Boasa? Alana hita ndang sempurna. (Rom 3:23) On mambahen hita holan mamingkirhon diri sandiri. Olo do ala nunga somal hita ndang patuduhon roha sapangkilalaan di keluarganta. Manang ala hea dibahen halak na so denggan tu hita na mambahen hita maol patuduhon roha sapangkilalaan. Asing ni i, olo do ala songon i angka dongan di humaliangta. Di ari parpudi on, godang do angka halak ndang mamingkirhon pangkilalaan ni na asing. Gariada, “mangkaholongi dirina sandiri” do nasida. (2 Tim. 3:1, 2) Alani i, ingkon marsitutu do hita mamingkirhon halak na asing jala marsitutu patuduhon roha sapangkilalaan. Aha do na boi mangurupi hita mangulahon i?

3. (a) Songon dia do asa lam mura hita patuduhon roha sapangkilalaan? (b) Aha do na laho taulas di parsiajaran on?

³ Molo tatiru Jahowa dohot Jesus, lam mura ma hita patuduhon roha sapangkilalaan. Debata na parholong do Jahowa, jala Ibana ma sitiruon na dumenggan taringot  patuduhon roha sapangkilalaan. (1 Joh. 4:8) Jala denggan do ditiru Jesus parange ni Jahowa i. (Joh. 14:9) Tingki di tano on, dipatudu Jesus do songon dia patuduhon asi ni roha. Di parsiajaran on, taulas ma songon dia Jahowa dohot Jesus patuduhon roha sapangkilalaan. Jala songon dia hita boi maniru nasida.

4. Songon dia do Jesaya 63:7-9 patuduhon na disarihon Jahowa do naposona?

⁴ Songon na taparsiajari di Bibel, sai disarihon Jahowa do angka naposona. Umpamana, pingkirhon ma songon dia pangkilalaan ni Jahowa tingki bangso Israel najolo mangadopi hasusaan. Didok, “Di nasa hagogotannasida, dohot ibana targogot.” (Jaha Jesaya 63:7-9.) Asing ni i, marhite panurirang Sakaria, dipaboa Jahowa do songon dia pangkilalaanna molo dibahen susa angka naposona. Didok Ibana, ‘Ai manang ise na manjama hamu, anak ni matangku jinamana disi.’ (Sak. 2:12) Sada tudosan na mansai denggan do on!

5. Bahen ma contoh songon dia Jahowa paluahon naposona.

⁵ Ndang holan asi roha ni Jahowa tingki mangida naposona susa. Alai adong do na diulahon Ibana laho mangurupi nasida. Umpamana, tingki ditawan halak Israel di Mesir, diboto Jahowa do arsak ni roha ni nasida. Didok Jahowa ma tu si Musa, “Nunga tangkas huida pardangolan ni bangsongku . . . , jala nunga hutangihon angguhangguknasida . . . ai nunga huboto parniahapannasida i. Ala ni umbahen tuat Ahu paluahon nasida sian tangan ni halak Misir.” (2 Mus. 3:7, 8) Ala marasi ni roha Jahowa tu naposona, dipalua ma nasida sian Mesir. Dung i muse, susa do halak Israel dibahen angka musu tingki di Tano na Dijanjihon. Songon dia do pangkilalaan ni Jahowa? “Asi ma roha ni Jahowa tu nasida ala ni orongorongnasida binahen ni hinahansit dohot sitaononnasida”. Ala marasi ni roha, taronjar ma roha ni Jahowa laho paluahon nasida. Disuru Jahowa do angka hakim paluahon halak Israel sian angka musu.​—Hak. 2:16, 18, Bibel siganup ari.

6. Nang pe sala pamingkirion ni naposona, aha do na diulahon Jahowa? Bahen ma contoh.

 ⁶ Dipingkirhon Jahowa do pangkilalaan ni naposona, nang pe sipata sala do pamingkirion ni nasida i. Rimangi ma pengalaman ni si Jona. Disuru do ibana paboahon barita panguhuman tu halak Ninive. Ala marhamubaon nasida, gabe ndang saut nasida diuhum Jahowa. Alai gabe jut do roha ni si Jona alani i. Jala mansai muruk ma ibana ala ndang saut panguhuman na dipaboa ibana i. Alai sabar do Jahowa tu si Jona, jala diurupi do ibana asa marpingkiran na denggan. (Jona 3:10–4:11) Ujungna, diantusi si Jona ma boasa dibahen Jahowa songon i. Jala dipangke do ibana laho manurat cerita on asa marlaba tu hita saonari.​—Rom 15:4. *

7. Sian cara ni Jahowa maradophon naposona, aha do na boi paposhon rohanta?

⁷ Dipatudu Jahowa do roha sapangkilalaan tingki maradophon naposona. Diboto Ibana do sude hasusaan na taadopi. Didok do molo Jahowa “umboto pingkiran dohot harohaon ni hajolmaon”. (2 Kron. 6:30, Bibel siganup ari) Diantusi Ibana do pingkiran, pangkilalaan dohot hagaleonta. Jala ‘ndang pasombuonna [hita] diela-ela lobi sian na tolapta’. (1 Kor. 10:13) Tontu, mansai las do rohanta tu janji ni Jahowa on!

8-10. Angka aha do na mangurupi Jesus patuduhon roha sapangkilalaan?

⁸ Tingki di tano on Jesus, dipatudu ibana do roha sapangkilalaan. Jala adong do tolu na mangurupi Jesus patuduhon roha sapangkilalaan. Na parjolo, denggan do ditiru Jesus parange ni Jahowa. Songon Amana, holong do roha ni Jesus tu jolma. Tingki mangurupi Jahowa mambahen sude tompaan, las do roha ni Jesus tu sude tompaan i. Alai ‘hasudungan ni rohana do jolma manisia’. (Poda 8:31) Ala holong do roha ni Jesus, dipingkirhon ibana do pangkilalaan ni na asing.

⁹ Na paduahon, songon Jahowa, boi do diida Jesus aha na di bagas roha ni jolma. Jala diantusi do pangkilalaan ni nasida. (Mat. 9:4; Joh. 13:10, 11) Alani i, tingki diida Jesus halak na marsak, taronjar do rohana laho mangapuli nasida.​—Jes. 61:1, 2; Luk. 4:17-21.

¹⁰ Na patoluhon, hea do Jesus mangadopi hasusaan songon na diadopi halak na asing. Umpamana, magodang di keluarga na pogos do ibana. Gabe tukang hau do ibana rap dohot bapakna si Josep. (Mat. 13:55; Mrk. 6:3) Ra si Josep mate, andorang so dimulai Jesus dope ulaonna marbarita. Tontu dihilala Jesus do songon dia lungunna tingki mate halak na tahaholongi. Jala boi do dihilala ibana songon dia molo adong keluargana na so sisomba Jahowa. (Joh. 7:5) Angka hasusaan na diadopi Jesus i, mangurupi ibana lam mangantusi hasusaan dohot pangkilalaan na diadopi godang halak.

11. Tingki andigan do tarlumobi Jesus patuduhon roha sapangkilalaan? (Ida gambar sampul.)

¹¹ Dipatudu Jesus do muse roha sapangkilalaan tingki mambahen mukjizat. Diulahon Jesus pe i, ndang laho patuduhon na boi ibana mambahen mukjizat. Alai, ala asi do rohana tu halak na susa.  (Mat. 20:29-34; Mrk. 1:40-42) Bayangkon ma songon dia pangkilalaan ni Jesus tingki dipahehe ibana anak sasada ni ina na mabalu manang tingki pamalumhon sahalak baoa na nengel. Diboan Jesus do baoa i dao sian angka natorop. (Mrk. 7:32-35; Luk. 7:12-15) Asi do roha ni Jesus tu angka halak umbahen diurupi ibana nasida.

12. Hombar tu Johannes 11:32-35, songon dia do Jesus patuduhon roha sapangkilalaan tu si Marta dohot tu si Maria?

¹² Dipatudu Jesus do roha sapangkilalaan tu si Marta dohot tu si Maria. Tingki diida ibana mansai lungun roha ni nasida ala mate si Lasarus, “manetek ma ilu ni Jesus”. (Jaha Johannes 11:32-35.) Tangis pe Jesus, ndang ala na mate ale-alena i. Alana diboto ibana do na laho paheheonna si Lasarus. Alai tangis pe Jesus, ala diantusi ibana do songon dia lungun ni roha ni angka donganna i.

13. Aha do labana molo taparsiajari roha sapangkilalaan na dipatudu Jesus?

¹³ Godang do laba na tadapot molo taparsiajari taringot Jesus na patuduhon roha sapangkilalaan. Gabe lam holong ma rohanta tu ibana ala denggan ibana maradophon na asing. (1 Ptr. 1:8) Jala dipatogu do rohanta ala taboto nunga gabe Raja ibana saonari di Harajaon ni Debata. Ndang sadia leleng nai, salpuhononna ma sude hasusaan. Ala hea ibana gabe jolma di tano on, tontu diantusi Jesus do songon dia carana padengganhon angka naung disegai Sibolis. Alai mansai las do rohanta ala “diantusi [Jesus] i do hagaleonta”.​—Heb. 2:17, 18; 4:15, 16.

14. Songon na didok di Epesus 5:1, 2, aha do na ingkon taulahon?

¹⁴ Molo tarimangi contoh na dibahen Jahowa dohot Jesus, gabe taronjar ma rohanta laho patuduhon roha sapangkilalaan. (Jaha Epesus 5:1, 2.) Tontu, ndang boi taida aha na di bagas roha ni halak. Alai boi do taantusi pangkilalaan dohot aha na dihaporluhon angka halak. (2 Kor. 11:29) Saonari, godangan halak holan mangkaringkothon dirina sandiri. Alani i, “unang ma holan mamparrohahon na ringkot di [hita], alai parrohahon ma na ringkot di na asing”.​—Plp. 2:4.

15. Ise do na tarlumobi ingkon patuduhon roha sapangkilalaan?

¹⁵ Angka sintua di huria do na tarlumobi ingkon patuduhon roha sapangkilalaan. Alana martanggung jawab do nasida tu Jahowa laho manjaga angka biru-biruna di huria. (Heb. 13:17) Alani i, asa boi mangurupi angka dongan, ingkon dipatudu nasida do roha sapangkilalaan. Songon dia do nasida boi patuduhon i?

16. Aha do na ingkon diulahon sahalak sintua, jala boasa i ringkot?

¹⁶ Sahalak sintua na patuduhon roha sapangkilalaan, olo do mangalehon tingkina tu angka dongan. Tarlumobi tingki adong donganta na marsak jala naeng paboahon na di rohana, alai ndang diboto aha sidohononna. Lambok do sintua i manungkun jala sabar manangihon. (Poda 20:5) Molo rade angka sintua mangalehon tingkina, boi ma lam pos roha ni angka dongan, lam togu parale-aleon dohot holong ni nasida.​—Ul. 20:37.

17. Songon na didok angka donganta, aha do na ingkon dipatudu angka sintua? Paboa ma contohna.

¹⁷ Godang do angka donganta mandok, ringkot do angka sintua patuduhon roha sapangkilalaan. Boasa? Donganta si Adelaide mandok, “Gabe mura do ahu mangkatai tu nasida, ala huboto diantusi  nasida do pangkilalaanku.” Didok muse, “Boi do i taboto sian cara ni nasida mangkatai tu hita.” Donganta na asing mandok, “Hea do huida sahalak sintua tangis tingki hupaboa hasusaan na huadopi. Ndang tarhalupahon ahu i.”​—Rom 12:15.

18. Songon dia hita boi patuduhon roha sapangkilalaan?

¹⁸ Tontu, ndang holan angka sintua na ingkon patuduhon roha sapangkilalaan. Sude do hita boi patuduhon i. Songon dia carana? Pingkirhon ma hasusaan na diadopi keluarganta dohot angka dongan di huria. Parrohahon ma angka na poso di huria, na marsahit, na matua, dohot angka dongan na mate sisolhotna. Boi do tasungkun kabar ni nasida. Denggan ma tatangihon tingki dipaboa nasida na di rohana. Papos ma roha ni nasida na parduli do hita tu nasida, jala taurupi ma nasida. Molo taulahon i, nunga tapatudu holong na sasintongna.​—1 Joh. 3:18.

19. Boasa ingkon marbisuk hita tingki mangurupi angka dongan?

¹⁹ Tingki mangurupi angka dongan, ingkon marbisuk do hita. Alana, marasing-asing do cara ni nasida mangadopi hasusaan. Ra, adong do donganta na olo paboahon hasusaanna. Alai na asing, ndang pola lomo rohana paboahon i. Nang pe lomo rohanta naeng mangurupi, alai unang ma sude tasungkuni na boi mambahen sogo roha ni nasida. (1 Tes. 4:11) Tingki adong donganta na olo paboahon sude na di rohana, olo do ra ndang satolop hita tu na didokna i. Alai taingot ma, i do na dihilala nasida. Alani i, hatop ma hita manangihon, alai manat ma mangkatai.​—Mat. 7:1; Jak. 1:19.

20. Aha do na laho taulas di parsiajaran na mangihut?

²⁰ Asing ni patuduhon roha sapangkilalaan di huria, ingkon tapatudu do muse roha sapangkilalaan tingki marbarita. Alani i, songon dia do carana patuduhon roha sapangkilalaan tingki marbarita? Laho taulas ma i di parsiajaran na mangihut.