1. Imnis 1 Petrus 3:8 ya, rosai ḇefnai fa na komarisen kaku rofyor kofanam kuker snonkaku ḇefawi mnis sneḇaḇir ma fafisu koḇena?

ROFYOR kofanam kuker snonkaku ḇefawi mnis sneḇaḇir ma fafisu koḇena ido, na komarisen kaku. Sisewar fa sifawi mnis roi kokara ma koḇaḇir na. Sifawi roi kofandun na ma simarisen sifnoḇek ko, iba syadi fyor kor na ḇaim. Koḇesyowi kaku snonkaku ḇefasnai ”ḇaḇaḇir oser” * faro ko kwar.​—Wasya 1 Petrus 3:8.

2. Rosai ḇefnai fa kona ḇaḇaḇir oser kuker snonkaku sya inema roi ḇepyan risyaḇa?

² Snonkaku Kristen koine kam, komarisen kona ḇaḇaḇir oser kuker snonkaku sya. Ḇape, inema roi ḇepyan risyaḇa. Rosai ḇefnai ya? Oser ya, snar koinema snonkaku ḇenapes ḇa si ko. (Rm. 3:23) Ras-ras na, kokara ker mankun ko ḇardi. Inja, kosewar kaku fa kokara snonkaku ḇesesya. Osower ido, nyan sifaduru ko isof koba ḇaido roi ḇekur ko ro fafisu iwara, na nafrur samswen ko fa kakḇaḇir snonkaku ḇesesya moḇ sḇaḇir raya. Snonkaku ḇeḇarek ro ris koḇedi sya na sawyaye ko kako. Ro ras-ras ḇepupes ine, snonkaku sibor ”siswar mankunsi ḇardi” ma sfandun ḇa faro sneḇaḇir snonkaku ḇesesya. (2 Tim. 3:1, 2) Rariso insamaido samswen anna nadwarek awer ko?

3. (a) Rosai na ḇefnoḇek ko fa kakfasnai rari ḇaḇaḇir oser ine fa ipyum syadi? (b) Rosai na kawos ro farkarkor inena?

³ Koso Allah Yahwe ma Rumkun Ḇyedi, Yesus Kristus nyan suḇena kada, na kakfasnai rari ḇaḇaḇir oser ine fa ipyum syadi. Allah Yahwe ikada isaswar, ma fyandun kaku  sneḇaḇir snonkaku sya. Ine nyan ḇepyum kaku fyasnai ḇe ko. (1 Yoh. 4:8) Yesus iso mnis kaku Kmari rari Ḇyena. (Yoh. 14:9) Fafisu ikenem ḇe snonkaku ro supswan, Yesus fyasnai moḇsa snonkaku sya sfasnai sawarwar ya rai. Ro farkarkor ine, na kawos rariso Yahwe ma Yesus sufasnai sufawi mnis snonkaku sya sneḇaḇir sena. Ramnai, na kawos moḇsa kakso nyan suḇena rai.

4. Rariso Yesaya 63:7-9 ya, fyarkor ko Yahwe ima fyandun kaku faro manfamyan Ḇyesya sneḇaḇir sena?

⁴ Refo fyarkor ko, Yahwe ima fyandun kaku faro manfamyan Ḇyesya sneḇaḇir sena. Imnis raris, komam kada moḇsa Yahwe ḇyaḇir rai fafisu er Israel ro ḇepon iwara sismai kandera nabor. Refo doḇe, ”Rofyor sekandera, I kako ḇyekandera.” (Wasya Yesaya 63:7-9.) Ḇarpur mura, roro Nabi Zakharia, Yahwe doḇe rofyor sifrur mnis kawasa Ḇyesya ḇa ido, ine imnis ra sifrur ḇe Yahwe mankundi. Ikofen ḇe kawasa Ḇyansi ḇo doḇe, ”Mansei monda ḇepan mko ima span mkamor Ayesuine.” (Za. 2:8) Wos peper ine fyasnaiḇos Yahwe iswar kaku kawasa Ḇyesya!

5. Fawarpan moḇsa Yahwe ifnoḇek manfamyan Ḇyesya ḇekandera sya rai.

⁵ Rofyor manfamfyan Ḇyesya sekandera, Yahwe iswar si monda ḇa. Mboi ifnoḇek si kako. Imnis raris, fafisu er Israel sekandera kaku fyor sewomen si ro Masir, Yahwe fyawi mnis kaku sneḇaḇir sena ma iḇe ifnoḇek si. Yahwe ikofen ḇe Moses i, ”Yamam kwar moḇsa kawasa Yesi sifrur mnis si ḇa . . .  ma yarower kwar sar naḇa fa sor fafnoḇek . . . Yafawi kaku kandera sena. Nari yado fa yafasparbur si ro snonkaku Masir sya.” (Kel. 3:7, 8) Snar Yahwe iswar kawasa Ḇyesya, inja fyasparbur si ro ḇaḇewomen ya. Taun-taun ḇenande mura, fyor er Israel sḇarek ro Sup Ḇeḇeasas kwar, mbroḇ sya imbe smunsi. Moḇsa Yahwe ḇyaḇir rai? ”Yahwe sneri iso si fyor ryower skanes snar sewayam ma sifrurpyum si ḇa.” Snar fyawi mnis kaku sneḇaḇir kawasa Ḇyesya, inja imbe ifnoḇek siwer. Ikanow mankara sya fa sfasparbur Israel si ro mbroḇ sesi.​—Hak. 2:16, 18.

6. Fawarpan moḇsa Yahwe fyasnai fyandun faro sneḇaḇir kawasa Ḇyesi rai, iba syadi fafisu nyan kakara sena naḇese ro I?

 ⁶ Yahwe fyandun faro sneḇaḇir kawasa Ḇyesi, iba syadi fafisu nyan kakara sena naḇese ro Yahwe I. Kwarapan Yunus farfyar ḇyeja. Allah iwan nabi ine fa ikofenḇair anun samamyai faro kawasa Niniwe. Snar simbror, Allah myunpres si ḇa. Ḇape, Yunus imarisen faro Allah snemuk Ḇyedine ḇa. Yunus ”imsor fafayaḇa” snar anun ḇyaryas ya ryarirya ḇa. Imbape, Yahwe ikḇaḇ faro Yunus i ma ifnoḇek i fa fyadwer nyan kakara ḇyena. (Yun. 3:10–4:11) Ḇarpur mura, insape Yunus fyawi rosai Yahwe fyarkor ḇe i na, ma Yahwe I kako ḇye i fa fyas farfyar ani insama kosmai fainda.​—Rom. 15:4. *

7. Nyan Yahwe fyasnai saswar faro kawasa Ḇyesya, nbuk kakakyar ḇe ko faro rosai?

⁷ Nyan Yahwe fyasnai saswar faro kawasa Ḇyesya, nbuk kakakyar ḇe ko snar ifawi mnis sneḇaḇir sena. Ifawi rofyor ko oser-oser koḇesaneso ma koḇekandera. Yahwe ”ifawi pyum kaku roi ḇero snonkaku sya sisnesna”. (2 Taw. 6:30) Fyawi kam rosai kokara na, sneḇaḇir koḇena, ma ḇaḇeraryarḇa koḇena. Osower ido, ”Nari myam monda [koḇa] ro fafrowes ḇesyadi ro samambraḇ [koḇena]”. (1 Kor. 10:13) Asas ine nḇuk sneprei kaku ḇe ko!

8-10. Roi rikyor risai ḇefrur fa Yesus ifawi mnis snonkaku ḇese sneḇaḇir sena?

⁸ Fafisu Yesus ikenem ḇe snonkaku ro supswan, Yesus ifawi mnis sneḇaḇir snonkaku sya. Roi rikyor nasya ḇefnai fa Yesus ḇyaḇir rarirya. Oser ya, imnis ḇeḇeyap kwar, Yesus rari ḇyena namnis kuker Kmari. Imnis raris Kmari, Yesus iswar snonkaku sya. Rofyor ifnoḇek Yahwe fa sufrur roi ḇeborkam, Yesus imarisen kaku faro roi sufrur kwar anna. Ḇape ”imarisen syadi faro snonkaku sya”. (Ams. 8:31) Snar iswar snonkaku sya, inja fyandun kaku faro sneḇaḇir sena.

⁹ Ḇesuru ya, raris Yahwe, Yesus nya samambraḇ fa myam roi ḇero sne. Ifawi rosai snonkaku sya sḇaḇir na ma rosai ḇefnai fa sifrur roi oso. (Mat. 9:4; Yoh. 13:10, 11) Inja, fyor Yesus myam snonkaku sesanekar ido, fyawi mnis sneḇaḇir sena, ma imarisen ifnoḇek si.​—Yes. 61:1, 2; Luk. 4:17-21.

¹⁰ Ḇekyor ya, Yesus daksmai samswen ḇekur snonkaku sya. Imnis raris, rya kina ḇefaduru Yesus sesabarar. Fafisu dakfararur fnoḇek kma ḇefan i, Yusuf i, Yesus dakfarkor fa fyararur marḇak. (Mat. 13:55; Mrk 6:3) Imbude, Yusuf imar fyoro ḇaim fafisu Yesus irandak fararmyan ḇyena. Dakfafardun kako rofyor snonkaku iswar ya ryoe. Kina ḇyesi ono sna kakyar oser kuker i ḇa. (Yoh. 7:5) Snar Yesus daksmai roi ḇeradine ma roi ḇesena kako, inja fyawi mnis samswen snonkaku sya ma moḇsa sḇaḇir kaku raya.

11. Fafisu risai Yesus rari ḇaḇaḇir oser ḇyena neḇemambos kaku? Fasnaiḇairpan. (Mam sonin ḇero ḇarpon.)

¹¹ Yesus rari ḇaḇaḇir oser ḇyena neḇemambos kaku rofyor ifrur mujisat. Yesus ifrur mujisat snar iso roi fandun fa ifrur na monda ḇa. Mboi, snar ”saswar ya dek ro Yesus sneri” fafisu myam snonkaku sya sekandera. (Mat. 20:29-34; Mrk. 1:40-42) Imnis raris, wawasenpan rosai Yesus ḇyaḇir na isof dun snon ḇeproi oso fa subur kawasa ḇebor ansi, ramnai  ḇye i fa iprei. Wawasenpan kako rosai Yesus ḇyaḇir na isof ro imarisen ḇyawes kaḇer bin kabom oso, roma mandos ḇyedi. (Mrk. 7:32-35; Luk. 7:12-15) Snaro Yesus ifawi mnis sneḇaḇir snonkaku ansya, inja imarisen ifnoḇek si.

12. Rariso Yohanes 11:32-35 ya, fyasnai Yesus rari ḇaḇaḇir oser ḇyedi faro Marta ma Maria su?

¹² Yesus dakfasnai rari ḇaḇaḇir oser ine faro Marta ma Maria su. Fafisu myam sufarfardun snaro srar suḇedi Lazarus imar, ”fyor ani Yesus kyanes”. (Wasya Yohanes 11:32-35.) Kyanes snaro bati ḇyedine ibur i kwar monda ḇa. Yesus ifawi kako, kerower na ḇyawes kaḇer Lazarus i. Mboi, snar bati ḇyansuya susneso, inja Yesus sneri iso su ḇo dakanes.

13. Fainda rosai kosmana fyor kofawi Yesus ifawi mnis snonkaku ḇese sneḇaḇir sena?

¹³ Fyor kofawi Yesus ifawi mnis snonkaku ḇese sneḇaḇir sena, nane nun fainda faro ko. Koswar i snar ifrur pyum snonkaku ḇesesya kuker sawarwar. (1 Ptr. 1:8) Fafisu kofawi Yesus isya ḇyepoik ḇe Raja ro Karajan Allah ro kirine, ine syambraḇser ko. Kerower, nari ipyos kandera nakam. Fafisu iwara Yesus ikenem ḇe snonkaku ro supswan, inja myam ro mankundi fafardun ma kandera snonkaku sismai na snar Setan i. Rarirya, Yesus iso ḇesrow kaku fa ḇefaspar snonkaku koine. Kakuḇae na komarisen kaku kakna Raja ”ḇemam monda ko ro raryar ḇa koḇena.”​—Ibr. 2:17, 18; 4:15, 16.

14. Ro Efesus 5:1, 2 ya, danun ko fa kofrur rosai?

¹⁴ Kokarauser Yahwe ma Yesus nyan suḇena ido, nane nadif ko fa kakfasnai rari ḇaḇaḇir oser. (Wasya Efesus 5:1, 2.) Kakuḇae, kona samambraḇ raris suḇa fa komam roi ḇero sne ya. Rariryaido, na kosewar kaku fa kofawi mnis snonkaku ḇese sneḇaḇir sena ma roi sfandun na. (2 Kor. 11:29) Koma kakmnis snonkaku ḇero dunya ine ḇa sya, ḇefandun mankunsi, mboi ’kosewar fandun mankun koḇena awer, ḇape fandun snonkaku ḇesesya kako’.​—Flp. 2:4.

15. Mansei ḇefasnai ḇepon rari ḇaḇaḇir oser ine ya?

¹⁵ Penatua sya fandun fa sfasnai rari ḇaḇaḇir oser ya. Sfawi sna fakamamar faro Yahwe kuker nyan sfaduru domba-domba Ḇyesi. (Ibr. 13:17) Penatua sya kako fandun fa, sfawimnis sneḇaḇir ro naek srar ḇero sidang sya samaido sifnoḇek si. Moḇsa penatua sya sfasnai rari ḇaḇaḇir oser ya rai?

16. Penatua oso nya rari ḇaḇaḇir oser ya ido, rosai nari ifrur ya, ma rosai ḇefnai fa roi ine fyandun?

¹⁶ Penatua ḇefasnai rari ḇaḇaḇir oser ine, na ḇyuk oras ḇyedi faro naek srar ḇyesi. Na ḇyuk fakfuken ḇe si ma kuker kaḇaḇab ryower pyum kankarem sena. Roi ine ḇyefandun kaku, fafisu domba oso imbe ikofen roi ḇyabir na mboi iboryae moḇsa ikofen na rai. (Ams. 20:5) Rofyor penatua oso ḇyuk oras ḇyedi faro naek srar sya ido, na fyanam kaku kuker si, siswar yae si, ma sikyaryae si.​—Farfyar 20:37.

17. Raris naek srar ḇebor sya sikofen na, rari rosai ḇefandun kaku ro penatua oso? Fawarpan.

¹⁷ Naek srar ḇebor sya sikofen ḇo soḇe roi sakkara na iso, penatua oso fandun fa dakna rari ḇaḇaḇir oser ya. Snaro? Adelaide doḇe ”Napyan fa kawos you si, snar kofawi nari sfawi roi koḇaḇir na,” Ikofen wer, ”Rofyor kawos kuker penatua oso, na kofawi naro moḇsa dawos ḇe ko rai, isya ḇyesewar fa fyawi mnis roi koḇaḇir na ke roḇa.” Naek oso ikofen kasumasa faro sawarwar penatua oso fyasnai ḇe i na,  doḇe, ”Fyor yafawar roi ḇekur ayana, yamam ido penatua ine imbe kyanes kaḇor. Yapok yaḇefnder naba.”​—Rm. 12:15.

18. Moḇsa kofasnai rari ḇaḇaḇir oser ine rai?

¹⁸ Kakuḇae, penatua sya monda ḇa, ḇefasnai rari ḇaḇaḇir oser ya. Kokame fandun fa kofasnai rari ine kako. Moḇsa kofasnai na rai? Kokarapan samswen ḇekur kina ma naek srar koḇesya. Fasnaiḇair komam ma kofandun romawa babo ḇero sidang sya, faro snonkaku ḇeduf sya, ḇesinan kwar sya, ḇaido ḇesneso snar snonkaku siswar sya simar. Kofuken abar sena ma fyor sfawar rosai sḇaḇir na ido, korower pyum si. Kofasnaiḇair ḇe si snar kofawi kaku roi ḇekur si na. Sfandun fafnoḇek koḇedi ido, kofnoḇek si kuker samambrab koḇena ḇesiper. Kofrur rarirya ido, kofasnai koswaryae ko.​—1 Yohanes 3:18.

19. Rosai ḇefnai fa kosewar nyan nabor fa kofnoḇek snonkaku ḇese sya rai?

¹⁹ Rofyor koḇesewar fa kofnoḇek snonkaku ḇese sya ido, fandun fa kosewar nyan risai monda fa kobuki fnoḇek si. Rosai ḇefnai ya? Snaro roi snonkaku sya sismai na neḇeseyae. Sia imḇe sfawar na, siwer ido simewer sfawar na. Inja, imbe kofnoḇek si ḇoi, kopok kobuk fakfuken ḇefrur fa simai. (1 Tes. 4:11) Nanoido, oso isya imbe fyawar samswen ḇyena, imbude komarisen faro rosai ikofen na ḇa. Mboi, koswarepen snar iso roi sḇaḇir na. Inja, kosamberen famkomnaf, ḇape kawos fasaw awer.​—Mat. 7:1; Yak. 1:19.

20. Rosai na kawos ro farkarkor ḇeuser ya?

²⁰ Komarisen kofasnaiḇair rari ḇaḇaḇir oser ine ro sidang, ḇape komarisen kako fa kakfasnai rari ḇepyum ine ro fararmyan koḇena. Rariso na kofasnai na rofyor kofnoḇek snonkaku sya fa sakḇe manfamyan? Na kawos roi ine ro farkarkor ḇeuser ya.