1. Domu bani 1 Petrus 3:8, mase marosuh hita anggo adong na parduli hubanta?

MAROSUH do hita anggo adong halak na sapangahapan atap parduli hubanta. Halani boi ibayangkon ia dirini ibagas situasinta, gabe iarusi ia ma pangahap ampa pingkiranta. Gabe ibotoh ia ma aha na iporluhon hita. Dob ai, mintor iurupi ia ma hita hassi pe lape ipindo hita. Tontu martarima kasih do hita bani halak na patuduhkon uhur na “sapangahapan” * hubanta.​—Basa 1 Petrus 3:8.

2. Mase lang urah patuduhkon uhur na sapangahapan?

² Ganup hita sihol patuduhkon uhur na sapangahapan. Tapi lang sai urah patuduhkon ai. Mase? Halani hita lang sempurna. (Rom 3:23) Jadi maningon marusaha ma hita manlawan harosuhta na mamontingkon diri sandiri. Leganni ai, ra do humbani na etek lang dong na parduli hubanta, jadi sunsah ma hita parduli bani halak na legan. Dob ai, halani bahat halak sonari on “mangkaholongi dirini”, ra do gabe songon sidea hita. (2 Tim. 3:1, 2) Aha ma na boi mangurupi hita ase tongtong patuduhkon uhur na sapangahapan janah parduli bani na legan?

3. (a) Sonaha hita boi patuduhkon uhur na sapangahapan? (b) Aha ma na laho iulas hita bani artikel on?

³ Ase boi tongtong patuduhkon uhur na sapangahapan, tiru hita ma Jahowa pakon Jesus Kristus, Anak-Ni in. Halani Naibata ai ma haholongon, Ia do siusihan na sidearan pasal patuduhkon uhur na sapangahapan. (1 Joh. 4:8) Jesus  pe mangusihi Bapani. (Joh. 14:9) Sanggah ia i tanoh on, ibahen ia do siusihan sonaha manisia boi patuduhkon uhur na sapangahapan. Bani artikel on, iulas hita ma sonaha Jahowa pakon Jesus parduli bani halak na legan. Anjaha iulas hita homa sonaha hita boi maniru sidea.

4. Sonaha Jesaya 63:7-9 patuduhkon anggo Jahowa parduli bani juakjuak-Ni?

⁴ Songon na iparlajari hita hun Bibel, iarusi Jahowa do pangahap ni juakjuak-Ni. Umpamani, sanggah sunsah pangahap ni halak Israel sapari, sunsah do homa pangahap ni Jahowa. (Basa Jesaya 63:7-9.) Dob ai, marhitei nabi Sakaria ipatugah Jahowa do anggo adong na jahat hubani juakjuak-Ni, dos songon na mambahen hu Bani do ai. Ia mangkatahon, “Barang ise na manjamah hanima, anak ni mata-[Ku] do na jinamahni ijai.” (Sak. 2:12) Sosok tumang do limbaga ai patuduhkon anggo Jahowa parduli bani juakjuak-Ni.

5. Bere ma contoh sonaha Jahowa mangurupi juakjuak-Ni na marsitaronon.

⁵ Lang pitah maridop ni uhur Jahowa mangidah juakjuak-Ni na marsitaronon. Tapi adong do na ibahen Ia laho mangurupi sidea. Umpamani, iarusi Jahowa do pangahap ni halak Israel na iparjabolon i Masir. Ihatahon Ia ma bani si Musa, “Domma tangkas Huidah sahit ni panaronon ni bangsang-Ku . . . , anjaha domma Hutangar doruh-doruh ni sidea . . . domma Hubotoh sitaronon ni sidea. Halani ai do ase tuad Ahu paluahkon sidea hun tangan ni halak Masir.” (2 Mus. 3:7, 8) Halani idop uhur-Ni, ipaluah Jahowa ma sidea humbani parjabolonan. Dob ai, sanggah i Tanoh Parpadanan halak Israel, roh ma munsuh laho mamorangi sidea. Sonaha pangahap ni Jahowa mangidah ai? Tong do ‘marpangulaki uhur ni Jahowa halani doruh-doruh ni sidea ibahen halak na mangarsik pakon na manosak sidea’. Halani mangarusi pangahap ni sidea, iurupi Ia ma sidea. Isuruh do panguhum laho paluahkon sidea humbani munsuh ni sidea.​—Panguh. 2:16, 18.

6. Bere ma contoh na patuduhkon iarusi Jahowa do pangahap ni juakjuak-Ni hassi pe lepak na ipingkirhon sidea.

 ⁶ Iarusi Jahowa do homa sonaha pangahap ni juakjuak-Ni hassi pe lepak pingkiran ni sidea. Pardiateihon ma pangalaman ni nabi Jona. Isuruh Jahowa ma ia padaskon barita panguhuman hu halak Ninive. Halani ra sidea mubah, gabe lang saud iuhum Jahowa sidea. Tapi “manringis” ma si Jona halani ai. Age pe sonai, sabar do Jahowa mangurupisi ase mangarusi pingkiran-Ni. (Jon. 3:10–4:11) Ujungni gabe iarusi si Jona ma aha do na sihol iajarhon Jahowa hu bani. Anjaha isuruh do si Jona manuratkon sarita ai bahen parlajaran hubanta.​—Rom 15:4. *

7. Humbani contoh na dob iulas hita, aha ma na ibotoh hita pasal Jahowa?

⁷ Humbani contoh-contoh nongkan ai, gabe porsaya ma hita parduli do homa Jahowa hubanta. Ibotoh Ia do sonaha sitaronon ampa pusok ni uhurta. Janah ‘itanda Jahowa do uhur ni jolma manisia’. (2 Kron. 6:30) Iarusi Ia do sonaha pangahap, pingkiran, ampa hahuranganta. Anjaha, ‘seng paturuton-Ni hita lajouon lobih humbani gogohta’. (1 Kor. 10:13) Tontu tarapoh do uhurta mambotoh janji-Ni ai!

8-10. Mase Jesus boi patuduhkon uhur na sapangahapan?

⁸ Sanggah i tanoh on Jesus, parduli do ia bani halak na legan. Siotikanni dong tolu alasan na mangurupi ia boi patuduhkon uhur na sapangahapan. Na parlobei, itiru Jesus do paruhuran ni Jahowa songon na ipatugah nongkan ai. Songon Bapani, ihaholongi ia do manisia. Hassi pe marosuh ia bani ganup tompaon ni Jahowa, tapi rosuhan do uhurni hubani manisia. (Pod. 8:31) On ma na mangurupi Jesus boi mangarusi pangahap ni halak.

⁹ Na paduahon, songon Jahowa ibotoh Jesus do homa aha na ibagas uhur. Ibotoh ia do sonaha pingkiran ampa pangahap ni jolma. (Mat. 9:4; Joh. 13:10, 11) Jadi anggo adong ididah Jesus na marpusok ni uhur, gabe tarojur ma ia laho mangapoh sidea.​—Jes. 61:1, 2; Luk. 4:17-21.

¹⁰ Na patoluhon, ongga do iahapkon Jesus hasunsahan na somal iahapkon jolma. Umpamani, ibagas kaluarga na masombuh do Jesus ipagodang. Maningon martukang do ia mangurupi si Josep, bapani ai. (Mat. 13:55; Mrk. 6:3) Ra, domma matei si Josep paima Jesus mangidangi. Jadi ibotoh Jesus do sonaha pusok ni uhur anggo matei na hinaholonganta. Anjaha ibotoh Jesus do sonaha pangahap ni halak na lang sahaporsayaon pakon kaluargani. (Joh. 7:5) Halani situasi sisonai ampa na leganni, gabe iarusi Jesus ma sonaha pangahap ni jolma.

11. Aha do na patuduhkon anggo Jesus parduli bani na legan? Bere ma contoh. (Tonggor ma gambar sampul.)

¹¹ Taridah do homa anggo Jesus parduli bani halak na legan sanggah ia mambahen halongangan. Sedo halani maningon ase ia mambahen halongangan tapi halani ‘maidop uhurni’ mangidah halak na marsitaronon. (Mat. 20:29-34; Mrk. 1:40-42) Umpamani, iarusi Jesus do sonaha pangahap ni sahalak na nengel  ampa na bisu. Halani ai iboan Jesus ma ia hu ianan na suhi, anjaha ipamalum ma ia ijai. Leganni ai, ipapuho Jesus do anak sasada ni naboru na mabalu. (Mrk. 7:32-35; Luk. 7:12-15) Tontu halani iarusi Jesus do pangahap ni halak ase ra ia mangurupi sidea.

12. Sonaha Johannes 11:32-35 patuduhkon anggo Jesus mangarusi pangahap ni si Marta pakon si Maria?

¹² Iarusi Jesus do homa pangahap ni si Marta pakon si Maria. Sanggah ididah ia pusok uhur ni sidea halani matei si Lasarus, “Jesus pe tangis ma”. (Basa Johannes 11:32-35.) Sedo halani hamagouan hasoman ase pusok uhurni. Ibotoh ia na laho papuhoonni do si Lasarus. Tapi, tangis pe Jesus halani dihut do ia marpusok ni uhur sanggah mangidah hasomanni marpusok ni uhur.

13. Aha do gunani dobkonsi ibotoh hita anggo Jesus mangarusi pangahap ni halak?

¹³ Gabe toguh ma uhurta dobkonsi ibotoh hita anggo Jesus mangarusi pangahap ni halak. Ihaholongi hita do ia halani idop uhurni bani na legan. (1 Ptr. 1:8) Tarapoh do homa uhurta halani mambotoh sonari ia domma gabe Raja bani Harajaon ni Naibata. Lang piga dokah nari isasap ia ma ganup sitarononta. Halani ongga iahapkon Jesus sitaronon na somal bani jolma, ibotoh ia ma cara na sidearan laho paluahkon hita humbani sitaronon na ibahen Sibolis. Tontu bahat do pasu-pasu halani Jesus na gabe Rajanta boi “mangahap bani hagalekonta”.​—Heb. 2:17, 18; 4:15, 16.

14. Domu bani Epesus 5:1, 2, aha do na sihol bahenonta?

¹⁴ Anggo irimangi hita siusihan humbani Jahowa pakon Jesus, lambin tarojur ma hita ase mamingkirhon pangahap ni halak. (Basa Epesus 5:1, 2.) Tongon, lang boi ibotoh hita na ibagas uhur ni sidea. Tapi boi do hita mangarusi aha na ipingkirhon ampa na ihaporluhon sidea. (2 Kor. 11:29) Ulang ma hita songon bahat halak i dunia on. Tapi marusaha ma hita ase ‘ulang na porlu banta iparuhurhon hita, tapi dihut ma na bani hasoman’.​—Pil. 2:4.

15. Ise do na maningon patuduhkon uhur na sapangahapan?

¹⁵ Tarlobih ma sintua, porlu do patuduhkon uhur na sapangahapan. Ibere Jahowa do tanggung jawab bani sidea laho mangurus biribiri-Ni. (Heb. 13:17) Ase boi sidea mangurupi sanina botou i kuria, maningon ipatuduh sintua ma uhur na sapangahapan. Sonaha cara ni sidea patuduhkon ai?

16. Sonaha sintua boi patuduhkon uhur na sapangahapan?

¹⁶ Ipasirsir sintua ma panorang laho mangurupi sanina botou, tarlobih ma bani sidea na maretek ni uhur. Ra do sidea sihol marsarita tapi lang ibotoh sonaha mangkatahon ai. Jadi porlu ma sintua manungkun janah sabar manangihon sanggah sidea marsarita. (Pod. 20:5) Anggo sonai ibahen sintua, gabe porsaya ma sanina botou bani sidea. Lambin toguh ma parhasomanan ampa holong ni sidea.​—Lah. 20:37.

17. Aha do na ihatahon sanina botou pasal sintua i kuria ni sidea?

¹⁷ Bahat do sanina botou na mangkatahon ponting tumang do sintua patuduhkon uhur na sapangahapan. Mase? Si Adelaide mangkatahon, “Lambin urah do hita marsarita bani sidea halani pos uhurta iarusi sidea do pangahapta.”  Nini use, “Taridah do sintua ai parduli hubanta humbani cara ni sidea manangar sanggah hita marsarita.” Hasomanta na legan mangkatahon, “Tariluh do sada sintua sanggah husaritahon sonaha situasingku. Tongtong do hudingat ai.”​—Rom 12:15.

18. Sonaha do hita patuduhkon uhur na sapangahapan?

¹⁸ Lang pitah sintua na porlu patuduhkon uhur na sapangahapan. Haganupan hita boi do homa patuduhkon ai. Sonaha carani? Boi do ipingkirhon hita parsualan aha do na iahapkon kaluarganta atap pe sanina botou. Iurupi hita ma na maposo, na boritan, na matua, atap pe halak na marpusok ni uhur halani matei halak na hinaholonganni. Sungkun hita ma sonaha barita ni sidea. Dear ma tangihon hita sanggah sidea marsarita. Patuduh ma iarusi hita do pangahap ni sidea. Anjaha tongtong ma hita sirsir mangurupi sidea. Anggo sonai ibahen hita taridah ma ihaholongi hita do sidea.​—1 Joh. 3:18.

19. Mase maningon ipingkirhon hita cara na sosok laho mangurupi sasada halak?

¹⁹ Maningon ipingkirhon hita do homa cara na sosok laho mangurupi sasada halak. Mase? Halani lang sarupa paruhuran ni ganup halak. Dong do na urah patugahkon na ibagas uhurni, dong homa na lang. Jadi, hassi pe sihol uhurta mangurupi sidea, ulang ma isungkuni hita na mambahen sidea maila. (1 Tes. 4:11) Porini dong halak na ra mansaritahon na ibagas uhurni, lang maningon setuju hita bani ganup hatani ai. Marusaha ma hita mangarusi sonaha pangahap ni sidea. Sirsir ma hita manangihon sidea janah ulang mintor isampangi.​—Mat. 7:1; Jak. 1:19.

20. Bani artikel na mangihut aha do na laho iulas hita?

²⁰ Lang pitah i kuria tumang, tapi sihol do homa hita patuduhkon uhur na sapangahapan sanggah mangidangi. Sonaha carani? Bani artikel na mangihut ulas hita ma ai.