1. Menurut 1 Petrus 3:8, ngkai maka meriah siakap ndeher ras kalak si ermediate man perasan ras keadanta?

MERIAH siakap ndeher ras kalak si ermediate man perasan bage pe keadanta. Iusahakenna ngangkai perukuren ras perasanta. Itehna kai si iperluken kita janah nggit ia nampati kita ope lenga pe sipindo. Siergai kel kalak si “sepenggejapen” * ras kita.​—Baca 1 Petrus 3:8.

2. Engkai maka labo lalap menukah sepenggejapen?

² Selaku kalak Kristen, ateta sepenggejapen ras kalak si deban. Tapi labo lalap menukah ngelakokenca. Engkai? Lit piga-piga alasenna. Salah sadana eme perban kita la sempurna. (Rom. 3:23) Emaka riahen siakap ngukuri diri sendiri janah mesera kel siakap ngukuri kalak si deban. Selain si e, carata ipebelin ntah pe si pernah terjadi bas geluhta banci saja erban mesera siakap sepenggejapen. Kita pe banci ka terpengaruh perbahanen kalak i sekelilingta. Bas wari-wari pendungi enda, nterem kalak “ngkelengi dirina saja” janah la diatena perasan kalak. (2 Tim. 3:1, 2) Uga carana ngatasi tantangen-tantangen e?

3. (a) Uga carana gelah reh ulina kita i bas ncidahken sipat sepenggejapen? (b) Kai si man bahasenta bas artikel enda?

³ Banci kita reh ulina i bas ncidahken sipat sepenggejapen adi siusih Dibata Jahwe ras AnakNa, Jesus Kristus. Jahwe e Dibata si tuhu-tuhu perkeleng, janah Ia me usihen si mehulina i bas ncidahken sipat sepenggejapen. (1 Joh. 4:8) Iusih Jesus sipat Bapakna alu sempurna. (Joh. 14:9) Sanga Jesus nggeluh i doni, ibanna usihen kerna uga carana ncidahken perkuah ate. Bas artikel enda, sibahas kari uga Jahwe ras Jesus ngangkai perasan  kalak. Kenca si e, sibahas ka uga kita banci ngusihsa.

4. Menurut Jesaya 63:9, kai buktina iperdiateken Jahwe perasan umatNa?

⁴ Iajarken Pustaka maka iperdiateken Jahwe perasan umatNa. Misalna, mari sibahas uga perasan Jahwe sanga melala kel kesusahen bangsa Israel mbarenda. Nina Pustaka, “Sanga susah kalak e, Ia pe susah iakapNa.” (Baca Jesaya 63:9, Terjemahan Dunia Baru [NW]; * 63:7, 8) Bas pudi wari, arah Nabi Sakaria, ikataken Jahwe maka adi la mehuli perbahanen kalak man umatNa, situhuna man Jahwe nge kalak e la mehuli. Nina man umatNa, “Ise si mekpek kam, anak matangKu jine kap si ipekpekna e.” (Sak. 2:8) Enda tuhu-tuhu mbuktiken maka iperdiateken Jahwe umatNa!

5. Ceritaken contoh si mbuktiken maka isampati Jahwe umatNa sanga susah.

⁵ Jahwe labo saja rate mekuah ngidah umatNa susah. IsampatiNa ka kalak e. Misalna, sanga susah bangsa Israel perban jadi budak i Mesir, iangkai Jahwe perasan kalak e janah tersuruh ukurNa nampati kalak e. Nina Jahwe man Musa, “Enggo Kuidah kuga serana akap bangsangKu . . . Enggo Kubegi ia nderkuh man bangKu . . . Kueteh kerina kiniseranna. Emaka Aku enggo nusur mulahi ia i bas kuasa bangsa Mesir nari.” (Kel. 3:7, 8) Perban mekuah ate Jahwe man umatNa, ibebaskenNa kalak e gelah lanai jadi budak. Ertahun-tahun kenca si e, sanga bangsa Israel tading i Taneh Perjanjin, iserang musuh me kalak e. Uga perasan Jahwe? “Mekuah ate [Jahwe] man bangsa e, erkiteken nderkuh ia i teruh kiniseran ras penindih kalak.” Perban iangkai Jahwe perasan umatNa, tersuruh ka ukurNa nampati kalak e. IangkatNa hakim-hakim guna nelamatken Israel arah musuh.​—Hak. 2:16, 18.

6. Ceritaken contoh si mbuktiken maka iperdiateken Jahwe perasan umatNa aminna pe salah cara kalak e rukur.

 ⁶ Iperdiateken Jahwe perasan umatNa aminna pe salah cara kalak e rukur. Cuba ukuri kerna Juna. Isuruh Dibata nabi e mberitaken berita penghakimen man Niniwe. Sanga kalak e ertobat, la surung ikernepken Dibata kalak e. Tapi, la senang Juna man keputusen Dibata e. “Merawa ia” perban la terjadi berita si nggo ipesehna. Tapi sabar Jahwe man Juna janah isampatiNa ia gelah lanai salah carana rukur. (Jun. 3:10–4:11) Dungna, iangkai Juna kai si iajarken Jahwe man bana, janah igunaken Jahwe ka ia nulisken kisah e guna man banta.​—Rom. 15:4. *

7. Cara Jahwe erurusen ras umatNa erban kita tek kerna kai?

⁷ Arah cara Jahwe erurusen ras umatNa, tek kita iangkaiNa perasan kalak e. ItehNa kesusahen ras kesedihen tiap kalak. Tuhu-tuhu ‘iteh Jahwe isi perukuren manusia.’ (2 Kro. 6:30) IangkaiNa perukurenta, perasanta, bage pe keterbatasenta. Janah “labo ipediatNa [kita] icubai lebih asa gegeh[ta].” (1 Kor. 10:13) Janji e tuhu-tuhu ngapuli kita!

8-10. Kai telu alasen si erbanca banci iangkai Jesus perasan kalak?

⁸ Sanga Jesus i doni jadi manusia, iangkaina kel perasan kalak. Silang-langna lit telu alasen ngkai maka ia bage. Si pertama, bagi si nggo ikataken ndai, bali kel sipat Jesus ras Bapakna. Bali bagi Bapakna, keleng ate Jesus manusia. Sanga isampatina Jahwe nciptaken kerinana, meriah kel akap Jesus ngidah kerina si iciptaken e. Tapi khususna ‘jadi kel atena manusia.’ (Kua. 8:31, NW) Perban keleng ate Jesus manusia, iperdiatekenna perasan kalak e.

⁹ Si peduaken, bali bagi Jahwe, iteh Jesus isi pusuhta. Itehna uga perasan kalak ras ngkai maka bage perbahanenna. (Mat. 9:4; Joh. 13:10, 11) Emaka sanga idah Jesus lit kalak si ceda kel ukurna, iangkaina perasan kalak e janah nggit ia nampatisa.​—Jes. 61:1, 2; Luk. 4:17-21.

¹⁰ Si peteluken, pernah iadapi Jesus piga-piga masalah si iadapi kalak. Misalna, banci saja keluarga Jesus kalak mesera. Sanga erdahin Jesus ras bapak angkatna eme Jusup, erlajar ia ngelakoken dahin si mberat. (Mat. 13:55; Mrk. 6:3) Banci jadi, Jusup nggo mate la ndekah sope imulai Jesus pelayanenna. Emaka banci saja pernah Jesus erceda ate sanga kalak si ikelengina mate. Janah iteh Jesus uga nanamna adi lit anggota keluargata si la sada kiniteken ras kita. (Joh. 7:5) Perban pernah igejapken Jesus si e kerina bage pe masalah si debanna, banci iangkaina masalah ras perasan kalak.

11. Kai buktina Jesus e sepenggejapen? Jelasken. (Nen gambar bas sampul majalah enda.)

¹¹ Banci siteh Jesus e sepenggejapen khususna sanga ibanna mukjizat. Ibanna mukjizat labo saja perban arus ilakokenna e, tapi “erkiteken mekuah atena” man kalak si susah. (Mat. 20:29-34; Mrk. 1:40-42) Misalna, bayangkenlah kai si igejapken Jesus si erbanca ibabana  sekalak dilaki si pasek ndauh arah jelma si nterem, kenca si e ipepalemna. Bayangken ka kai si igejapken Jesus si erbanca nggit ia mpekeke anak tonggal sekalak diberu si nggo mbalu. (Mrk. 7:32-35; Luk. 7:12-15) Perban iangkai Jesus perasan kalak e, nggit ia nampatisa.

12. Menurut Johanes 11:32-35, kai buktina sepenggejapen Jesus ras Marta bage pe Maria?

¹² Jesus pe sepenggejapen ras Marta bage pe Maria. Sanga idahna kalak e erceda ate perban nggo mate turang kalak e eme Lasarus, “tangis Jesus.” (Baca Johanes 11:32-35.) Tangis ia labo saja perban nggo lanai lit temanna e. Situhuna itehna nge maka kentisik nari ipekekena me Lasarus. Tangis Jesus perban igejapkenna ka perasan teman-temanna si sangana erceda ate.

13. Kai saja gunana adi siteh maka iangkai Jesus perasan kalak?

¹³ Melala sidat gunana adi sipelajari maka iangkai Jesus perasan kalak. Reh kelengna ateta ia perban siteh maka mekuah atena kalak si deban. (1 Pet. 1:8) Terpegegehi kel kita perban siteh gundari ia nggo merentah jadi Raja bas Kerajan Dibata. Lanai ndekah, isasapkenna me kerina kesusahen. Perban Jesus pernah nggeluh i doni jadi manusia, ia me si cocokna mbebasken manusia gelah lanai susah ras sedih akibat pemerentahen Setan. Ngata bujur kel kita perban Rajata banci “ngangkai kelemahenta.”​—Heb. 2:17, 18; 4:15, 16.

14. Menurut Epesus 5:1, 2, teriahken kita guna ngelakoken kai?

¹⁴ Adi siukuri contoh Jahwe ras Jesus, teriahken kita gelah lebih sepenggejapen. (Baca Epesus 5:1, 2.) Memang, la banci siteh isi pusuh kalak, bagi Jahwe ras Jesus. Amin gia bage, banci siusahaken ngangkai perasan ras kebutuhen kalak si deban. (2 Kor. 11:29) Kita la bagi kalak bas doni enda si egois. Siusahaken mperdiateken “kepentingen kalak si deban labo kepentingen[ta] saja.”​—Pil. 2:4.

15. Ise si terutama perlu ncidahken sipat sepenggejapen?

¹⁵ Pertua-pertua me si terutama perlu ncidahken sipat sepenggejapen. Iteh kalak e maka ertanggung jawap kalak e man Jahwe kerna uga cara kalak e ngurus biri-biriNa. (Heb. 13:17) Arus iangkai pertua uga perasan turang senina i bas runggun gelah banci isampatina kalak e. Uga carana pertua ncidahken sipat sepenggejapen?

16. Kai buktina sekalak pertua ncidahken sipat sepenggejapen, janah ngkai maka e penting?

¹⁶ Sekalak pertua si sepenggejapen nggit mereken waktuna man turang seninana. Isungkunna kalak e janah ibegikenna jawapen kalak e alu sabar janah tutus. Enda penting kel khususna adi lit arah kalak e si atena nceritaken perasanna tapi la itehna kai si man belasenken. (Kua. 20:5) Adi sekalak pertua nggit mereken waktuna man turang senina, reh deherna me kalak e, sikeleng-kelengen, janah siteken sada ras si debanna.​—Perb. 20:37.

17. Menurut nterem turang seninata, sipat kai nge si pentingna lit bas pertua? Ceritaken contohna.

¹⁷ Enterem turang seninata ngataken maka menurut kalak e, sipat sepenggejapen me sipat si pentingna lit bas pertua. Engkai? Nina Adelaide, “Reh nukahna siakap ngerana ras kalak e, perban siteh  pasti iangkaina perasanta.” Nina ka, “Arah uga tanggapen sekalak pertua sanga ngerana kita ras ia, banci siteh iusahakenna ntah lang ngangkai perasanta.” Sekalak turang seninata si dilaki ngata bujur ia perban lit sekalak pertua si mperdiateken ia. Nina, “Sanga kuceritaken uga keadanku, kuidah nggo ndeher iluhna. La kel terlupaken aku.”​—Rom. 12:15.

18. Uga carana gelah banci sicidahken sipat sepenggejapen?

¹⁸ Labo pertua saja ngenca si arus ncidahken sipat sepenggejapen. Kerina kita banci ncidahken sipat enda. Uga carana? Usahakenlah ngangkai masalah si iadapi anggota keluargata bage pe turang seninata. Siperdiateken anak-anak muda bas runggunta, turang seninata si sakit, si nggo metua, bage pe si erceda ate perban kalak si ikelengina mate. Sungkuni uga berita kalak e. Begikenlah alu tutus sanga iceritakenna uga perasanna. Usahakenlah gelah igejapken kalak e maka tuhu-tuhu iangkaindu keadanna. Sungkuni ia kai si banci isampatindu. Adi silakoken si e kerina, teridah me kekelengenta si rehna i bas pusuh nari.​—1 Joh. 3:18.

19. Sanga siusahaken nampati kalak, ngkai maka arus banci kita nyesuaiken diri?

¹⁹ Sanga siusahaken nampati kalak, arus banci kita nyesuaiken diri. Engkai maka bage? Perban la seri kerina cara kalak ngadapi masalah. Lit si nggit nceritakensa, lit ka si lang. Emaka aminna pe nampati ateta, ula siban penungkunen si erbanca la ntabeh iakapna. (1 Tes. 4:11) Mon-mon, aminna pe lit si nggit nceritaken masalahna, banci saja lit kata-katana si kurang siakap pasna. Tapi, perlu siinget maka bage me sangana perasan kalak e. Arus kita nggit lebe megiken janah ula minter ngerana.​—Mat. 7:1; Jak. 1:19.

20. Kai si man bahasenta bas artikel berikutna?

²⁰ Labo bas runggun saja kita arus sepenggejapen. Arus ka sicidahken sipat si mehuli e bas pelayanenta. Uga carana ncidahken sipat e sanga nampati kalak jadi murid? Sibahas kari e bas artikel berikutna.