1. Saashin 1 Pedro 3:8, ¿jamüsü anaka waaʼin namaa na kachipünaakana aaʼin wakuwaʼipa otta na achekakana anain waya?

ANASÜ waaʼin wapüshuaʼa namaa na wayuu kachipünaakana aaʼin wakuwaʼipa otta na achekakana anain waya. Naya wayuukana amülialaasü naaʼin waalin, nayaawata aaʼu kasain jülüjain waaʼin otta jamüin waaʼin. Nayaawata aaʼu kasain choʼujaain wamüin jee nakaalinjain waya, jaʼitasü nnojoluin wachuntuin kaalinwaa namüin. Kojutushii wamüin na wayuu amülialaakana aaʼin waalin * maʼaka süküjain 1 Pedro 3:8 (paashajeʼera).

2. ¿Kasa kapüleeka atuma sümülialaain waaʼin naalin na waneinnua?

² Wayakana anoujashiikana, amülialaainjatü waaʼin naalin na waneinnua. Eepejeʼe kapüleere wamüin waaʼinrüin tia. ¿Jamüsüche kapüleeka tia wamüin? Shia süka eein tü kasa mojukat watuma otta eesü suchuntaale waaʼin kapülain waaʼin wakuwaʼipa wamüiwaʼa (Roma 3:23). Eesü kapüleere wamüin wamülialüin naaʼin na waneinnua süka nnojoluin anain wepijia otta sünainjee tü kasa alatakat wamüin paala. Jee eesü müle wakuwaʼipa sutuma weʼrüin sukuwaʼipa wayuu. Süka sülüʼülüin süpüla sajaʼttüin kasa mojusü, eesü wayuu nnojotka kachipünaain aaʼin nakuwaʼipa na waneinnua, kapülasü naaʼin nakuwaʼipa neʼe namüiwaʼa (2 Tim. 3:1, 2). ¿Kasache waaʼinrajatka süpüla nnojoluin müin wakuwaʼipa? ¿Kasache waaʼinrajatka süpüla kapülain waaʼin nakuwaʼipa na waneinnua?

3. (1) ¿Kasa waaʼinrajatka süpüla sümülialaain waaʼin naalin na waneinnua? (2) ¿Kasa wekirajaainjatka anain sünain ekirajaayakat tüü?

³ Amülialaajeerü waaʼin naalin na waneinnua müleka waaʼinrüle tü naaʼinrakat Jeʼwaa nümaa Jesukürisüto, chi Nüchonkai.  Aisü wayuu nüpüla Jeʼwaa, müinjatia wakuwaʼipa maʼaka nukuwaʼipa (1 Juan 4:8). Otta müshia Jesuu, ayatüsü maʼin nukuwaʼipa chi Nüshikai nutuma (Juan 14:9). Yaaiwaʼaya nia Mmapaʼa, niiʼiyatüin jamüinjatüin sukuwaʼipa watuma sümülialaale waaʼin saalin wayuu. Sünain ekirajaayakat tüü, wekirajaweerü anain tü naaʼinrakat Jeʼwaa nümaa Jesuu süka sümülialaain naaʼin saalin wayuu otta tü waaʼinrajatkat süpüla müinjatüin wakuwaʼipa.

4. Sünainjee tü sümakat Isaías 63:7-9, ¿jamüsü watüjaaka saaʼu kachipünaain naaʼin Jeʼwaa namüliala na aʼyataakana nümüin?

⁴ Saashin tü Wiwüliakat, kachipünaasü naaʼin Jeʼwaa namüliala na aʼyataakana nümüin. Jülüjataa waaʼin jamüin naaʼin wanaa sümaa niʼrüin namüliala na israeliitakana. Anuu sünüiki tü Wiwüliakat: «Soʼunnaa mojuin maʼin naaʼin nayakana, mojusia naaʼin Maleiwa saalinjee niʼrüin namüliala» (paashajeʼera Isaías 63:7-9). Otta nüküjain Jeʼwaa mapa nükajee Zacarías, alin nümüin sümüliala nupueulose, müshi niakaijaʼa müliain atumawaa. Anuu nünüiki namüin na aʼyataashiikana nümüin: «Na wayuu müliakana atuma jia, müshii nachüütakai saaʼin toʼu» (Zac. 2:8). ¡Kachipünaasü naaʼin Jeʼwaa tü alatakat sümüin nupueulose!

5. ¿Kasa naaʼinraka Jeʼwaa sümaiwa paala napüleerua na israeliitakana?

⁵ Nnojoishi neʼe amülialaain Jeʼwaa naalin na aʼyataashiikana nümüin, nükaalinjain naya müliale naya atumawaa. Jamüsüjaʼa wanaa sümaa achepchieein na israeliitakana chaa Egipto, aisü nümüin Jeʼwaa tü alatakat namüin, müshiijeseʼe niyuʼluin naya chejee. Anuu nünüiki nümüin Moisés: «Teʼrüin sümüliala tapueulose [...], taapüin nanüiki sümaa müliain maʼin naya [...]. Tatüjaa aaʼu namüliala. Ashakateechi taya süpüla tasaajüin naya namaʼanajee na egipciokana» (Éx. 3:7, 8). Niyuʼluin naya Egiptojee süka sümülialaain naaʼin naalin. Kakalia süchikijee tia, soʼu chajanain naya suluʼu tü Mma Aapünakat namüin, ashutuna aaʼuchii sutuma tü pueulo eejatkat naʼütpünaa. ¿Kasache naaʼinraka Maleiwa niʼrapa tia? Saashin tü Wiwüliakat, aisü nümüin Jeʼwaa namüliala na israeliitakana saaʼujee müliain naya atumawaa. Nükaalinjain naya süka kachipünaain naaʼin tü alatakat namüin, müshiijeseʼe kekiipüʼüin naya nutuma süpüla nakaalinjünüin noulia naʼünüü (Juec. 2:16, 18).

6. ¿Kasa naaʼinraka Jeʼwaa sükajee kachipünaain naaʼin tü jülüjakat naaʼin Jonás?

 ⁶ Kachipünaasü naaʼin Jeʼwaa namüliala na aʼyataashiikana nümüin jaʼitasü nnojoluin pansaain tü jülüjakat naaʼin. Jülüjataa waaʼin tü alatakat nümüin Jonás. Nüjütüin nia Jeʼwaa chamüin Nínive süpüla nüküjain namüin na wayuu chajanakana najaʼttirajanain naya Jeʼwaa. Nnojoliipejeʼe naya outuin süka nayaawajaain suulia naainjala. Aisü maʼin tia nümüin Jonás, «jashichijaakalaka nia» süka nnojoluin shikeraajüin tü nüküjakalü achiki. Nnojoipejeʼe aashichijaain Jeʼwaa nümüin, nükaalinjain nia süpüla nnojoluin jülüjain naaʼin tia (Jon. 3:10–4:11). Mapa, niyaawata aaʼu Jonás jamüin nnojoliika najaʼttirüin Jeʼwaa na chajanakana Nínive. Nüshajirüin nia Maleiwa tü alatakat nümüin süpüla watüjain sünainjee (Roma 15:4). *

7. ¿Kasa wayaawataka aaʼu sutuma tü naaʼinrakat Jeʼwaa napüleerua na aʼyataashiikana nümüin?

⁷ Sutuma tü naaʼinrakat Jeʼwaa napüleerua naya wayuukana, wayaawata aaʼu sümülialaain naaʼin naalin na aʼyataakana nümüin. Nütüjaa aaʼu kasain alin wamüin otta kasain müliain atuma waya. Nütüjaa aaʼu kasain suluʼuin naaʼin na wayuukana (2 Crón. 6:30). Niyaawata aaʼu kasain jülüjain waaʼin otta kasain isain wachiki. Nüküjain wamüin wounteerüin wachecherüin waaʼin soʼunnaa suuʼulakünüin waaʼin süka nükaalinjeenain waya (1 Cor. 10:13). ¿Aashin sümülialaain waaʼin sutuma watüjaain saaʼu tia?

8-10. ¿Jarat tü apünüinsükat kasa sümülialaaka anainjee naaʼin Jesuu saalinjee wayuu?

⁸ Yaaiwaʼaya Jesuu Mmapaʼa, kachipünaasü naaʼin sümüliala wayuu. Eesü apünüinsü kasa naaʼinraka anainjee tia. Tü palajatkat shia, ayatüin nukuwaʼipa chi Nüshikai nutuma. Aisü wayuu nüpüla maʼaka alin shia nüpüla Jeʼwaa. Sünainjee tü kasairua nukumajiraaka nümaa chi Nüshikai, shia aireeka wayuu nüpüla (Prov. 8:31). Kachipünaasü naaʼin kasain alatüin sümüin wayuu süka alin shia nüpüla.

⁹ Tü wane kasa nümülialaakalü anainjee Jesuu saalinjee wayuu shia süka nütüjaain saaʼu kasain suluʼuin saaʼin. Nütüjaa aaʼu kasain saaʼinrüin anainjee wanee kasa otta jamüin saaʼin, nuuntuin tia maʼaka nuuntuin shia Jeʼwaa (Mat. 9:4; Juan 13:10, 11). Wanaa sümaa niyaawatüin saaʼu Jesuu mojuin naaʼin na wayuukana, nümülialüin naaʼin süka kachipünaain naaʼin nakuwaʼipa (Is. 61:1, 2; Luc. 4:17-22).

¹⁰ Tü apünüinkat kasa nümülialaakalü anainjee Jesuu saalinjee wayuu shia süka niʼrüin nümüliala maʼaka shiʼrüin shia wayuu. Jamüshijaʼa nia, maʼletsesalii na wayuu kachoinkana nia. Aʼyataashi nia nümaa José, chi nüshiyaashikai, jawatüsü tia aʼyatawaakat (Mat. 13:55; Mar. 6:3). Otta müshia nia, eesüjaʼa mojule naaʼin saalinjee outuin José. Alatüsü tia süpülapünaa nuʼttüin Jesuu sünain aküjaa pütchi. Jee wane kasa alataka nümüin Jesuu shia eein kasayuu nünain nnojoliikana anoujain nünain (Juan 7:5). Sünainjee sülatüin tia nümüin, nütüjaa aaʼu sümüliala wayuu otta jamüin saaʼin.

11. ¿Jamüsü watüjaaka saaʼu sümülialaain naaʼin Jesuu saalin wayuu? (Piirakaa sümüin tü ayaakua sünainkat süta tü rewiisütakat).

¹¹ Wayaawata aaʼu alin wayuu nüpüla Jesuu sünainjee tü naaʼinrakat süpüleerua. Nnojotsü naaʼinrüin tia mojusheeka neʼe, naaʼinrüin shia süka sümülialaain naaʼin saalin wayuu eekai müliain (Mat. 20:29-34; Mar.  1:40-42). Jülüjataa waaʼin jamüin naaʼin Jesuu soʼu najattüin wanee wayuu macheʼesai naʼakajee na wayuukana süpüla niiyajüin nia. Otta soʼu nüsoʼireʼerüin naaʼin süchon wanee wayuu outa aʼwayuuset (Mar. 7:32-35; Luc. 7:12-15). Nükaalinjeein Jesuu na wayuukana süka müin niakaijaʼa alatüin amüin tü alatakat namüin.

12. Saashin Juan 11:32-35, ¿jamüsü watüjaaka saaʼu sümülialaain naaʼin Jesuu saalinjee Marta sümaa María?

¹² Amülialaasü naaʼin Jesuu saalin Marta sümaa María wanaa sümaa outuin Lázaro, chi nawalakai. Aʼyalajüshi nia niʼrapa naya sünain aʼyalajaa (paashajeʼera Juan 11:32-35). Nnojoishi aʼyalajüin neʼe Jesuu sünainjee nnojoluichipain chi nütünajutkai nümaa, jama nütüjaain saaʼu nüsoʼireʼereerüin naaʼin. Aʼyalajüshi nia süka niʼrüin müliain saaʼin Marta sümaa María.

13. ¿Jamüsü anaka waaʼin wekirajaale süchiki nümülialaain aaʼin Jesuu saalinjee wayuu?

¹³ Mayaapejeʼe wainmain tü kasa isakat wachiki, anasü waaʼin wekirajaale süchiki nümülialaain Jesuu saalinjee wayuu. Aishi nia wapüla sünainjee tia (1 Ped. 1:8). Anasü waaʼin süka niainjachin Aluwataain Jesuu otta sutuma najaʼttirajatüin tü müliaa weʼrakat, süka jamüin, niʼrüin müliaa maʼaka waaʼin wayakana. Niaʼaya anaka süpüla ajaʼttiraa tü kasa mojusü eekat nutuma Satanaa. Talatüsü waaʼin süka niainjachin Jesuu amülialaaka waalin (Heb. 2:17, 18; 4:15, 16).

14. Sünainjee tü sümakat Éfeso 5:1, 2, ¿kaseerü waaʼinraka müle wakuwaʼipa maʼaka nukuwaʼipa Jeʼwaa otta Jesuu?

¹⁴ Amülialaajeerü waaʼin naalin na waneinnua müle wakuwaʼipa maʼaka nukuwaʼipa Jeʼwaa otta Jesuu (paashajeʼera Éfeso 5:1, 2). Nnojotsü watüjaain saaʼu tü suluʼukat saaʼin wanee wayuu, eepejeʼe süpüla jülüjain waaʼin mojule saaʼin otta kasale choʼujaain sümüin (2 Cor. 11:29). Nnojotsü washatüin nakuwaʼipa na wayuu kapülakana aaʼin nakuwaʼipa namüiwaʼa, shia waaʼinraka tü nümakat Pablo soʼu nümüin: «[Kapüla] jaaʼin nakuaippa na juwalayuukana, nnojo kapülain jaaʼin jukuaippa neʼe jümüiwa» (Filip. 2:4).

15. ¿Jaralii na amülialaʼaleeinjanakana aaʼin naalin na wawalayuukana?

¹⁵ Nayainjanapejeʼe na laülaashiikana amülialaʼaleein aaʼin naalin na wawalayuukana, süka jamüin, nasouteenain nümüin Jeʼwaa saaʼu tü kasa naaʼinrakat (Heb. 13:17). Nayaawatüinjatü aaʼu kasain alatüin nümüin wanee wawala süpüla nakaalinjain nia. ¿Kasache naaʼinrajatka süpüla nountuin tia?

16. ¿Kasa naaʼinraka na laülaashii kachipünaakana aaʼin tü alatakat namüin na nawalayuukana? ¿Jamüsü naaʼinraka tia?

¹⁶ Na laülaashii kachipünaakana aaʼin tü alatakat namüin na nawalayuukana, nnojoishii kashaparaliin. Yootushii naya namaa jee naapajüin nanüiki, shialeekajaʼa kapüleere nümüin wanee wawala aküjaa tü alatakat nümüin (Prov. 20:5). Nachajaale sukuwaʼipa na laülaashiikana süpüla kottüin naya namaa na nawalayuukana, aleeweena otta aijiraajeena naya. Jee aneerü naaʼin na wawalayuukana sünain yootoo namaa (Aluw. 20:37).

17. ¿Kasa kamalainka maʼin namüin na wawalayuukana sünainjee nakuwaʼipa na laülaashiikana? Püküja tü namakat waneinnua wawalayuu.

¹⁷ Tü kasa kamalainkat maʼin namüin na wawalayuukana sünainjee nakuwaʼipa na laülaashiikana shia kachipünaale naaʼin jamüin naaʼin na waneinnua. Anuu tü sümakat Adelaide süchiki tia: «Mapüleesat tamüin yootoo namaa süka tatüjaain saaʼu nayaawateerüin saaʼu tü alatakat tamüin». Jee müsü shiaʼaya: «Yootopa taya namaa, müshii nayakaijaʼa  alatüin amüin tü alatakat tamüin». Müshi wanee wawala: «Antüsü suluʼumüin taaʼin tü alatakat wanaa sümaa yootuin taya nümaa wanee laülaashi. Taküjain nümüin wane kasa alataka tamüin, taküjapa tia nümüin aparatsü nuʼwüira chia wawalakai. Nnojotsü motuin taaʼin tia» (Roma 12:15).

18. ¿Kasa waaʼinrajatka süpüla sümülialaain waaʼin naalin na waneinnua?

¹⁸ Nnojoishii nayainjanain neʼe na laülaashiikana amülialaain aaʼin naalin na waneinnua, amülialaainjatü waaʼin wayakanaʼaya. ¿Kasa waaʼinrajatka süpüla wountüin tia? Maa wayakaijaʼa alatüin amüin tü alatakat namüin na wapüshikana jee namüin na wawalayuukana. Kapüla waaʼin nakuwaʼipa na jimaʼaliikana, na laülaayuukana, na ayuuikana jee na anaajaakana apüshi. Wasakira naya sünain jamüin naaʼin otta jülüja waaʼin tü namakat wamüin. Jaʼyainjatü waaʼu kachipünaain waaʼin tü alatakat namüin otta wakaalinjainjana naya. Waaʼinrüle tia, shiimain tü naalinkat wapüla (1 Juan 3:18).

19. ¿Kasa wayaawatüinjatka aaʼu wakaalinjainjatpa wayuu?

¹⁹ Jülüja waaʼin nnojoluin wanaawain sukuwaʼipa wayuu. Naatayaa müsü tü naaʼinrakat sülatapa kasa mojusü namüin, eeshii na yooteekana süchiki, eepejeʼe na kapüleekana amüin aaʼinraa tia. Mayaapejeʼe wakaalinjeein naya, nnojo wasakirüin naya sünain wanee kasa japüliwaajeetka atuma naaʼin (1 Tes. 4:11). Jamüsüjaʼa nüküjale wanee wawala wamüin jamüin naaʼin, eesüjaʼa mojushiire wamüin tü nümakat. Kapülainjatpejeʼe waaʼin tü namakat, jama shiain tü eekat suluʼu naaʼin. Müsüjeseʼe eejüinjatüin waaʼin sünain tü nüküjakat wamüin sümaa nnojoluin wasoutuin pejeewa sünainmüin tü nümakat (Mat. 7:1; Sant. 1:19).

20. ¿Kasa wekirajaainjatka anain sünain tü wane ekirajaayakat?

²⁰ Nnojoishii nayainjanain neʼe wamülialaain aalin na wawalayuukana, amülialaainjatü waaʼin naalin na wayuu waküjakana amüin pütchi. ¿Kasa waaʼinrajatka süpüla wountuin tia? Wekirajaweerü anain tia sünain tü wane ekirajaayakat.