1. Petero Ginigunana 3:8 ena hereva bamona, dahaka dainai iseda namo idia laloa bada bona iseda hemami idia lalopararalaia taudia huanai ita noho neganai ita moale?

BEMA iseda namo idia laloa bada bona iseda hemami idia lalopararalaia taudia huanai ita noho, do ita moale. Badina idia ura ita idia durua. Nega haida, heduru totona ita do noinoi lasi neganai, ita idia durua. Iseda ‘hemami idia laloa’ * bada taudia dekenai ita moale.​—1 Petero 3:8 duahia.

2. Dahaka dainai ita gaukara goada hebogahisi ita hahedinaraia totona?

² Ita be Keristani taudia dainai, ita ura ma haida dekenai hebogahisi ita hahedinaraia. To nega haida ia auka unai bamona ita karaia totona. Dahaka dainai? Badina ita be goevadae lasi taudia. (Roma 3:23) Unai dainai, namona be ita gaukara goada haida ita laloa bada totona. Danu nega haida hebogahisi ita hahedinaraia be auka badina reana iseda ruma bese ena noho dalana eiava guna ia vara karana ta dainai. Reana ita be inai tanobada taudia edia kara ita tohotohoa. Hari inai nega dokodia ai, taunimanima momo be ma haida edia hemami idia laloa lasi. To “sibodia do idia laloa bada.” (2 Tim. 3:1, 2) Dahaka ese ita do ia durua unai bamona kara ita hanaia bona haida edia hemami ita laloa bada totona?

3. (a) Edena dala ai ita hahedinaraia haida edia hemami ita laloa bada? (b) Inai stadi atikol ai dahaka do ita herevalaia?

³ Iehova Dirava bona iena Natuna, Iesu Keriso ita tohotohoa neganai, haida edia hemami do ita laloa bada. Iehova be lalokau Diravana, bona haida edia hemami laloa bada karana dekenai ia be haheitalai namona. (1 Ioa. 4:8) Iesu ese ena  Tamana ena kara ia tohotohoa namo herea. (Ioa. 14:9) Taunimanima ese hebogahisi karana idia hahedinaraia dalana be Iesu ese tanobada ai ia haheitalaia. Inai stadi atikol lalonai Iehova bona Iesu ese haida edia hemami idia laloa bada dalana bona edia haheitalai ita tohotohoa daladia do ita herevalaia.

4. Isaia 63:7-9 ena hereva bamona, dahaka ese ia hahedinaraia Iehova be ena hesiai taudia edia hemami ia laloa bada?

⁴ Baibel ese ita ia hadibaia Iehova be iena hesiai taudia edia hemami ia laloa bada. Hegeregere, idaunegai Israela taudia be hisihisi idia davaria neganai, Iehova ena hemami mani ita laloa. Baibel ia gwau: “Edia lalometau negadia ibounai ai ia lalometau.” (Isa. 63:7-9, NWT) Gabeai, Iehova be peroveta tauna Sekaraia amo ia hahedinaraia iena taunimanima idia hahisia neganai, toana be edia hisihisi ia mamia danu. (Sekaraia 2:8 duahia.) * Iehova ese iena taunimanima edia hemami ia laloa bada karana ia haheitalaia namo herea!

5. Iehova be dahaka ia karaia ena hesiai taudia ia durua totona?

⁵ Iehova be ena hesiai taudia ia hebogahisi henia sibona lasi, to idia ia durua totona kara ta ia karaia danu. Hegeregere, Israela taudia be Aigupito ai hesiai gaukara idia karaia neganai, Iehova be idia abia hisihisi ia lalopararalaia bona kara ta ia karaia idia ia durua totona. Iehova be Mose ia hamaoroa, ia gwau: ‘Momokani, lauegu bese taudia edia hisihisi Aigupito dekenai lau itaia vadaeni . . . , edia taitai, be lau kamonai vadaeni, badina be edia hisihisi lau diba vadaeni. Lau diho mai inai, Aigupito taudia edia imana dekena amo do lau hamauridia totona.’ (Eso. 3:7, 8) Iehova ese ena taunimanima edia hemami ia laloa bada dainai, igui hesiai amo ia ruhadia. Lagani handred momo murinai Gwauhamata Tanona ai, Israela taudia be edia inai taudia ese idia tuari henidia. Iehova be edena dala ai idia ia durua? Baibel ia gwau: “Lohiabada ese Israela taudia ia hamauria, idia tuari henidia taudia dekena amo. Badina be idia dagedage henidia, bona idia hisihisi henidia taudia dainai idia taitai neganai ibounai, Lohiabada ese idia ia bogahisihisi henia.” Iehova  be ena taunimanima ia hebogahisi henia dainai idia ia durua. Ia ese hahemaoro taudia ia siaia Israela taudia be edia inai taudia amo ia hamauridia totona.​—Gun. 2:16, 18.

6. Edena dala ai Iehova ese Iona ena lalohadai kererena ia hamaoromaoroa?

⁶ Iehova ese ena taunimanima edia hemami ia laloa bada​—ena be nega haida edia lalohadai be kerere. Mani Iona ena haheitalai ita laloa. Dirava ese ia siaia Nineva taudia dekenai hahemaoro sivaraina do ia harorolaia totona. To, idia helalo-kerehai neganai, Dirava ese idia ia hamasea lasi. Iona be unai ia moalelaia lasi, to ia “badu” badina ia perovetalaia hadikaia herevana be ia vara lasi. To Iehova be Iona ena hemami ia laloa bona ena lalohadai kererena ia hamaoromaoroa. (Iona 3:10–4:11) Gabeai Iona be Iehova ese ia dekenai ia hadibaia gauna ia lalopararalaia bona ia ese unai sivarai ia torea iseda namo totona.​—Roma 15:4. *

7. Iehova ese ena hesiai taudia ia kara henia dalana amo dahaka ita dibaia?

⁷ Iehova ese ena hesiai taudia ia kara henia dalana amo ita diba ia be idia ia hebogahisi henia. Ia be ita ta ta iseda hisihisi ibounai ia diba. Iehova be “taunimanima ibounai edia [kudouna] ia diba.” (2 Siv. 6:30) Ia ese iseda lalohadai, hemami, bona iseda goada ena hetoana ia diba. Bona ‘dala do ia kehoa lasi iseda goada ia hereaia hedibagani ita davaria totona.’ (1 Kor. 10:13) Unai gwauhamata herevana ese ita ia hagoadaia bada!

8-10. Edena badina toi ese Iesu ia durua haida edia namo ia laloa bada totona?

⁸ Iesu be tanobada ai ia noho neganai, haida edia hemami ia laloa bada. Gau toi ese Iesu ia durua haida edia hemami ia laloa bada totona. Badina ginigunana be, Iesu ese ena Tamana ena kara ia tohotohoa namo herea. Ia be ena Tamana bamona, taunimanima ia lalokau henia. Ena be mai moale ida Iehova ia durua gau ibounai idia karaia, to Iesu be ‘tanobada  . . . taudia ibounai dekenai ia moale noho.’ (Aon. 8:31) Lalokau dainai Iesu ese haida edia hemami ia laloa bada.

⁹ Badina iharuana be, Iehova bamona, Iesu be taunimanima edia ura bona hemami ia diba. (Mat. 9:4; Ioa. 13:10, 11) Iesu ia itaia taunimanima idia lalohisihisi neganai, dala ia karaia idia ia durua bona hagoadaia totona.​—Isa. 61:1, 2; Luka 4:17-21.

¹⁰ Badina ihatoina be, Iesu be tanobada ai ia noho neganai taunimanima ese idia davaria hekwakwanai ia mamia danu. Hegeregere, reana Iesu be ogogami ruma besena lalonai ia tubu daekau. Tanobada ai ia noho neganai ena tamana Iosepa amo gaukara metaudia karaia dalana ia diba. (Mat. 13:55; Mar. 6:3) Iesu be ena haroro gaukara tanobada ai ia do haorea lasi neganai, reana Iosepa ia mase. Unai dainai ita lalokau henia bada tauna ta ia mase neganai ia vara hisihisi be Iesu ia mamia danu. Iseda ruma bese lalonai haida be ita abia dae gaudia idia abia dae lasi, bona Iesu be unai ia lalopararalaia. (Ioa. 7:5) Unai badina toi bona gau ma haida ese Iesu ia durua taunimanima edia hekwakwanai bona edia hemami ia lalopararalaia totona.

11. Edena dala ai Iesu ese ia hahedinaraia haida edia hemami ia laloa bada? Gwauraia hedinarai. (Rau 1 ena laulau itaia.)

¹¹ Iesu be hoa karadia ia karaia neganai, ia hahedinaraia ma haida edia namo ia laloa bada. Maduna dainai unai ia karaia lasi. To, hisihisi idia abia taudia “ia hebogahisi” henia dainai unai ia karaia. (Mat. 20:29-34; Mar. 1: 40-42) Hegeregere, Iesu ese taia kudima tauna ta be hutuma amo ia hakaua siri bona ia hanamoa, eiava vabu ta ena natuna tamona ia hatoreaisi lou neganai, mani iena hemami oi laloa. (Mar. 7:32-35; Luka 7:12-15) Iesu be edia hemami ia laloa bada dainai ia ura idia ia durua.

12. Ioane 11:32-35 ena hereva bamona, Iesu be edena dala ai ia hahedinaraia Mareta bona Maria edia hemami ia laloa bada?

¹² Iesu be Mareta bona Maria edia hemami ia laloa bada. Idia ruaosi edia taihuna, Lasaro ia mase dainai idia lalohisihisi bada bona edia taitai ia itaia neganai, “Iesu ena mata ranu ia diho.” (Ioane 11:32-35 duahia.) Ia tai ena badina be iena turana namona do ia itaia lou lasi, a? Lasi, to ia diba Lasaro do ia hatoreaisi lou. To, ia tai ena badina be iena turadia edia lalohisihisi ia lalopararalaia bona ia mamia.

13. Iesu ese taunimanima ia hebogahisi henia karana ita dibaia neganai, dahaka dainai unai ese ita ia hagoadaia?

¹³ Iesu ese haida ia hebogahisi henia karana ita dibaia neganai, namo ita abia. Momokani ita be Iesu bamona lasi. To ia ita lalokau henia badina ia be mai hebogahisi ida ma haida ia kara henia. (1 Pet. 1:8) Hari Iesu be Dirava ena Basileia ena King, unai ese ita ia hagoadaia dainai, ita diba momokani ia ese kahirakahira hisihisi ibounai do ia haorea. Iesu be guna tanobada ai ia noho dainai, ia be hegeregere momokani Satani ena lohia dalana amo idia vara hisihisi ibounai do ia haorea bona taunimanima do ia durua. Unai dainai ita gwau diba, ia be Lohia Tauna namona “iseda manoka ia mamia momokani” bona ia lalopararalaia.​—Heb. 2:17, 18; 4:15, 16.

14. Efeso 5:1, 2 ena hereva bamona, Iehova bona Iesu edia haheitalai ese ita ia hagoadaia dahaka ita karaia totona?

¹⁴ Iehova bona Iesu edia haheitalai ita laloa neganai, unai ese ita ia hagoadaia ma haida edia hemami ita laloa bada totona. (Efeso 5:1, 2 duahia.) Ita be taunimanima edia ura bona hemami ita diba lasi, to ita ura edia hemami bona idia ura gaudia ita lalopararalaia toho. (2 Kor. 11:29) Ita be hari inai negai sibona edia namo idia laloa bada taudia bamona ita laloa lasi, to namona be ‘ma haida edia namo danu do ita laloa.’​—Fili. 2:4.

15. Daidia ese ma haida edia hemami idia laloa bada be namo?

¹⁵ Kongrigeisen elda taudia ese ma haida edia hemami idia laloa bada be namo. Idia diba edia maduna be Iehova ena mamoe do idia naria. (Heb. 13:17) Tadikaka taihu durua totona, elda taudia ese hebogahisi karana idia hahedinaraia be namo. Edena dala ai elda taudia ese ma haida edia hemami idia laloa bada?

16. Ma haida edia hemami ia laloa bada elda tauna be dahaka do ia karaia, bona dahaka dainai unai be mai anina bada?

¹⁶ Ma haida edia hemami ia laloa bada elda tauna be ena nega ia henia ena Keristani tadikaka taihu totona. Tadikaka taihu ese idia herevalaia gaudia dekenai henanadai ia henia bona ia kamonai namonamo. Unai kara be mai anina bada badina nega haida ia auka tadikaka ta o taihu ta ese iena lalohadai o hemami ia gwauraia totona. (Aon. 20:5) Bema elda tauna be mai ena ura ida iena nega ia henia, tadikaka taihu be ia hereva henia totona do idia gari lasi, iena hetura karana do idia moalelaia, bona ia do idia ura henia.​—Kara 20:37.

17. Tadikaka taihu momo ese edena dala ai elda taudia idia herevalaia? Haheitalai ta gwauraia.

¹⁷ Kongrigeisen lalonai elda taudia ese ma haida edia hemami idia laloa bada karana be tadikaka taihu momo ese idia moalelaia. Dahaka dainai? Adelaide ia gwau: “Elda taudia ese haida edia hemami idia laloa bada neganai, do ia auka lasi idia oi hereva henia badina emu hemami idia lalopararalaia. Oi idia hereva henia dalana amo do oi diba idia be  emu hemami idia lalopararalaia.” Tadikaka ta be elda ta ena kara ia laloa bada, ia gwau: “Egu hekwakwanai lau gwauraia neganai, ia tai. Unai do lau laloaboio lasi.”​—Roma 12:15.

18. Edena dala ai haida edia hemami ita laloa bada karana ita hahedinaraia?

¹⁸ Momokani, elda taudia sibona lasi, to ita ibounai ese ma haida edia hemami ita laloa bada be namo. Edena dala ai? Namona be iseda ruma bese taudia bona tadikaka taihu ese idia davaria hekwakwanai ita lalopararalaia toho. Kongrigeisen lalonai idia noho matamata taudia, gorere, buruka, bona mase dainai idia lalohisihisi taudia edia namo ita laloa bada. Edia hemami idia gwauraia neganai, oi kamonai namonamo. Idia oi durua unai amo do idia diba oi be edia hemami oi lalopararalaia. Unai bamona ita karaia neganai, iseda lalokau be hereva sibona amo lasi, to iseda kara amo ita hahedinaraia danu.​—1 Ioa. 3:18.

19. Dahaka dainai haida ita durua neganai, edia hemami ita laloa danu be namo?

¹⁹ Haida ita durua neganai, edia hemami ita laloa danu. Dahaka dainai? Badina taunimanima ese idia davaria hekwakwanai be dala idauidau ai idia haheaukalaia. Haida be edia hekwakwanai idia herevalaia, to ma haida be edia hekwakwanai idia ura lasi idia gwauraia. Unai dainai idia durua totona, edia hemami ia hadikaia henanadai ita gwauraia lasi be namo. (1 Tes. 4:11) Bema haida be edia hekwakwanai idia herevalaia, reana idia herevalaia gaudia haida dekenai do ita lalotamona lasi. To, namona be ita laloparara unai be edia hemami. Ita ura edia hereva ita kamonai namonamo to ita hereva haraga lasi.​—Mat. 7:1; Iam. 1:19.

20. Stadi atikol 13 ai dahaka do ita herevalaia?

²⁰ Haida edia hemami laloa bada karana be kongrigeisen lalonai sibona lasi, to ita ura iseda haroro gaukara ai unai kara namona ita hahedinaraia danu. Edena dala ai haroro bona hahediba taudia halaoa gaukarana ai haida edia hemami ita laloa bada? Unai henanadai ena haere be stadi atikol 13 ai do ita herevalaia.