1. Otja ku 1 Petrus 3:8, ongwaye tji tu tjaterwa okukara mokati kovandu mbe ripurira kweṱe nongaro mu tu ri?

TU TJATERWA okukara mokati kovandu mbe ripurira kweṱe nongaro mu tu ri. Owo ve kondja okuritwa mozongaku zetu, kutja ve tjiwe kutja tu ri mongaro iṋe nu matu ripura na iye. Owo ve tjiwe kutja matu hepa ombatero nu ve tu vatera, nandarire ngunda atu he ve ningira. Eṱe tu nondangi tjinene kovandu mbe raisa kutja ve tu ‘ṱira ondjenda.’ *​—Lesa 1 Petrus 3:8.

2. Ongwaye tji matu sokukondja nomasa okuraisa ondjenda?

² OtjOvakriste eṱe atuhe tu vanga okuraisa otjari, poo okuṱira varwe ondjenda. Mouatjiri okutjita nao katjiṋa otjipupu. Ongwaye? Omena rokutja kaweṱe ohomonena. (Rom. 3:23) Kunao matu sokurwisa ongaro yokuripurira kweṱe oveni ndjo. Wina tjiva vetu mape ya ave munu ouzeu okuraisa otjari mena romuano mbu ve kurisiwa poo mena roviṋa mbya tjitwa ku wo rukuru. Otjisenina, mape ya tu raisa ongaro ndjo mena rovandu mbe ri ongondoroka na eṱe. Momayuva omasenina nga, ovandu ovengi kave nondjenda novandu varwe. Nungwari, owo ve ‘ripahera oveni ouwa.’ (2 Tim. 3:1, 2) Ovikwaye mbi mavi yenene okutuvatera kutja tu nakaure ongaro yokuhina okurikendera varwe?

3. (a) Omomuano uṋe mu matu raisa kutja tu rikendera ku varwe? (b) Morupa ndwi matu katara ku ye?

³ Eṱe matu yenene okuripurira ku varwe indu tji matu horere ku Jehova Mukuru nOmuna we, Jesus Kristus. Jehova oMukuru  worusuvero, nu we tu raisira otjihorera otjisembasemba tjokuripurira ku varwe. (1 Joh. 4:8) Jesus aa horere kovikaṋena vya Ihe nawa. (Joh. 14:9) Ngunda e rikombanda yehi, eye wa raisa omuano omundu mu ma yenene okuraisa otjari. Morupa ndwi, rutenga matu katara komuano Jehova na Jesus mu va raisa kutja ve rikendera kovandu varwe. Okuzambo atu tara kutja omomuano uṋe mu matu horere ku wo.

4. Omuano uṋe Jesaja 63:7-9 mu ri raisa kutja Jehova u rikendera kovakarere ve?

⁴ Ombeibela i honga kutja Jehova u ṱondjenda novakarere ve. Otjotjihorera, tara komuano Jehova ma ṱondjenda notjiwaṋa tjOvaisrael tji tja ri momauzeu pekepeke. Embo ra Mukuru ri tja: “Ozombamisiro zawo azehe, ze mu hihamisa.” (Jes. 63:7-9, NW) Kombunda okupitira momuprofete Sekarja, Jehova wa tja indu ovakarere ve tji mave tjindwa navi, i ri tjimuna eye ongu ma tjindwa navi. (Lesa Sakarja 2:8) Tjiri imbo omuano omuwa Jehova ma raisa kutja u rikendera kovakarere ve!

5. Yandja otjihorera tjomuano Jehova ma vatera ovakarere ve mbu va ri mouzeu.

⁵ Jehova kaṱire ovakarere ve mbe ri momauzeu ondjenda uriri, nungwari u tjita otjiṋa okuvevatera. Otjotjihorera, indu Ovaisrael tjaave munu omauzeu otjovakarere moEngipte, Jehova aa tjiwa omihihamo vyawo, nu ihi tje mu hinga kutja me ve kuture. Jehova wa tja ku Moses: “Ami mba munu nawanawa ouzeu wotjiwaṋa tjandje . . . , nu mba zuu ondjuriro yatjo . . . Ami me tjiwa omihihamo vyatjo. Komuano mbwi otji mba rauka okuvekutura kouvara wOvaengipte.” (Eks. 3:7, 8) Mena rokutja Jehova ee rikendere kovakarere ve, Eye we ve kutura koukarere. Omaserewondo kombunda yanao, indu Ovaisrael tji va ri mEhi Ekwizikwa, owo va rwisiwa i ovanavita nawo. Jehova wa tjita vi? Mukuru wa ṱondjenda nawo “mena rondjemeno yawo kovevetatumise na koveveṋiṋikize.” Rukwao, Jehova wa ṱondjenda novakarere ve, kunao Eye wa tjita otjiṋa okuvevatera. Eye wa hinda ovapangure okukavatera OvaIsrael kovanavita nawo.​—Ovapang. 2:16, 18.

6. Yandja otjihorera tjomuano Jehova mee rikende komundu ngwa ri nouripura mbu ha ri momuhunga omusemba.

 ⁶ Jehova u rikendera kovakarere ve, nandarire indu omeripura wawo tje he ri momuhunga omusemba. Tara kotjihorera tja Jona. Mukuru wa hinda omuprofete ngwi okukazuvarisa ombuze yombanguriro kovandu va Ninive. Indu ovandu va Ninive tji va rundurura ongaro ya wo Mukuru wa tya okuhina okuvenyona. Posi yokutja, Jona ka ri nohange notjiṋa hi. Eye wa “ṱomazenge” mena rokutja omaprofetero wokunyona Ninive kana ya yenenisiwa. Posi yokutja Jehova wa ri nomuretima na Jona, nu we mu vatera okurundurura omeripura we ngo. (Jona 3:10–4:11) Kombunda yoruveze, Jona wa zuva nawa kutja Jehova aa vanga okumuhonga tjike, nu eye wa ka ungurisiwa i Jehova okutjanga ehungi ndi kouwa wetu.​—Rom. 15:4. *

7. Omuano Jehova maa tjindi ovakarere ve ku tu pa ongamburiro yatjike?

⁷ Omuano Jehova maa tjindi ovakarere ve tji tu pa ongamburiro yokutja Eye u ṱondjenda novakerere ve. Eye u tjiwa omihihamo nomauzeu womundu auhe. Jehova tjiri u “tjiwa omeripura wovandu avehe.” (2 Ekuruh. 6:30) Eye tjiri u tjiwa omeripura wetu, ongaro mu tu ri moukoto, nu u tjiwa omasa nomasorere wetu. Nu ‘Eye ke nakumutarera amamu rorwa okukapita omasa weṋu.’ (1 Kor. 10:13) Tjiri ingo omambo omahuhumiṋe!

8-10. Ovikwaye mbya vatera Jesus okurikendera kovandu varwe?

⁸ Jesus tja ri kombanda yehi, ee rikendere tjinene ku varwe. Pe noviṋa 3 mbya vatera Jesus okurikendera ku varwe. Otjitenga, otja tji pa tamunwa rukuru, Jesus aa horere kovikaṋena vya Ihe womeyuru nawa. Tjimuna Ihe, Jesus wa suverere ovandu. Nandarire kutja Jesus wa ri nondjoroka okuvatera Jehova okuuta oviṋa, eye tjinene wa ri ‘nondjoroka novandu.’ (Omiano 8:31) Orusuvero rwa hinga Jesus okurikendera kovandu varwe.

⁹ Otjitjavari, tjimuna Jehova, Jesus aa tjiwa omeripura wovandu. Eye aa yenene okutjiwa ozonḓero noumune wovandu. (Mat. 9:4; Joh. 13:10, 11) Kunao, indu Jesus tja muna kutja ovandu va wire mominyo, eye we ve huhumiṋa.​—Jes. 61:1, 2; Luk. 4:17-21.

¹⁰ Otjitjatatu, Jesus omuini wa muna omauzeu tjimuna ingo wovandu. Otjotjihorera, pemunika tjimuna Jesus we kurira meṱunḓu esyona. Mokuungura kuna tate we Josef ngu hina wa ri ihe we omuini, Jesus we rihonga okuungura oviungura ovizeu. (Mat. 13:55; Mar. 6:3) Wina pemunika tjimuna Josef wa ṱa ngunda Jesus aha uta otjiungura tje tjokuzuvarisa. Kunao Jesus aa tjiwa omuhihamo wokuzepaisa omuseverwa we. Nu wina Jesus aa tjiwa kutja kwa ri vi okukara meṱunḓu rovandu mbe hi nongamburiro imwe. (Joh. 7:5) Ozongaro otja inḓo na zarwe mape ya za vatera Jesus okuzuva nawa omauzeu nomaumune wovandu.

11. Jesus wa raisa vi oukahu kutja ee rikendere kovandu? Kahurura. (Tara kotjiperendero tjokombanda yokambo nga.)

¹¹ Tjinene Jesus aa raisa kutja ee rikendere ovandu mokutjita ovihimise. Jesus kaa tjiti ovihimise mena rokutja aa sokutjita nao. Eye aa ‘ṱondjenda’ na imba mbaave munu omauzeu. (Mat. 20:29-34; Mar. 1:40-42) Otjotjihorera, ripura kutja Jesus wa ri mongaro iṋe indu tja toora omurumendu omboro nekemuverukisira kokure notjimbumba tjovandu, poo tja pendura okazandona komukazendu omuhepundu. (Mar. 7:32-35; Luk. 7:12-15)  Jesus aa ṱondjenda novandu mbo nu aa vanga okuvevatera.

12. Otja ku Johanes 11:32-35, omomuano uṋe Jesus ma raisa ondjenda ku Marta na Maria?

¹² Jesus wina wa ṱondjenda na Marta na Maria. Indu tja muna oruhoze rwawo mena ronḓiro yomuṱena kwawo, Lasarus, “Jesus wa rira.” (Lesa Johanes 11:32-35.) Jesus karirire mena rokutja Lasarus ke po puna wo rukwao. Mena rokutja aa tjiwa kutja me mu pendura. Nungwari eye wa rira mena rokutja aa tjiwa omihihamo vyomapanga we mena ronḓiro ya Lasarus.

13. Okutjiwa kutja Jesus u ṱondjenda novandu matji tu huhumiṋa vi?

¹³ Okutjiwa kutja Jesus aa ṱondjenda novandu otjiṋa otjiyanḓiparise tjinene. Otjingaperi, kutja kaweṱe ohomonena tjimuna ye. Nandarire nao, eṱe twe mu suvera mena rokutja ee rikendere kovandu varwe. (1 Petr. 1:8) Okutjiwa kutja eye nai u honapara Otjombara yOuhona wa Mukuru otjiṋa tji tji tu huhumiṋa. Moruveze rwa tjimanga eye ma isapo omauzeu aehe. Mena rokutja Jesus wa hupire kombanda yehi otjomundu, eye ongu ri omundu omusemba ngu ma yenene okuvatera ovandu komihihamo nomauzeu ngu va muna mena romananeno wa Satan. Otjingaperi, kutja ondaya onene okukara nOmuhonapare ngu ma yenene “okuṱondjenda nomaungundi wetu.”—Hebr. 2:17, 18; 4:15, 16.

14. Ovaefese 5:1, 2, ma ri tu hingi okutjita tjike?

¹⁴ Indu tji matu ripurire kovihorera vya Jehova na Jesus mbi va raisa, vi tu hinga kutja tu raise ondjenda wina. (Lesa Ovaefese 5:1, 2.) Eṱe katu yenene okutjiwa omeripura wovandu tjimuna wo. Posi yokutja, eṱe matu yenene okukondja okutjiwa oumune nozonḓero za varwe. (2 Kor. 11:29) Eṱe katu ‘tara ku imbi ovyetu porwavyo, nungwari tu tara ku imbi ovyovakwetu wina,’ katu ri tjimuna ovandu mouye mbe ripurira ku wo oveni uriri.​—Fil. 2:4.

15. Tjinene oouṋe mbu mave sokuraisa ondjenda?

¹⁵ Tjinene ovanene vombongo mave sokuraisa ondjenda. Owo ve tjiwa kutja ve nomerizirira wokukazira ku Jehova omuano mu mave ṱakamisa ozonḓu ze. (Hebr. 13:17) Kokutja ve yenene okuvatera ovakambure ovakwao, ovanene wombongo mave sokuraisa otjari. Omomuano uṋe ovanene vombongo mu mave yenene okutjita nao?

16. Omunene wombongo ngu raisa otjari kovakambure ovakwao u tjita vi, nu ongwaye otjiṋa hi tji tjiri otjinanḓengu?

¹⁶ Omunene wombongo ngu rikendera kovakambure ovakwao u twapo oruveze rokukara pu nawo. Eye u ve pura omapuriro nokuvepuratena nomuretima. Okutjita nao otjiṋa otjinanḓengu tjinene komukambure ngu ma vanga okuhungira oviṋa mbye kondja navyo mourekoto we, nu ngu ha tjiwa kutja nga hungire vi. (Omiano 20:5) Omunene wombongo tji ma yenene okutwapo oruveze rwokukara pu novakambure ovakwao, u tjita kutja owo ve kare nongamburiro mu ye, nu ve kara noupanga ouwa norusuvero pokati kawo.​—Oviung. 20:37.

17. Ovakambure ovengi ve tja otjikaṋena tjiṋe otjinanḓengu ovanene vombongo tji mave sokuraisa? Yandja otjihorera.

¹⁷ Ovakambure ovengi ve tja okurikendera varwe otjikaṋena otjinanḓengu tjinene omunene wombongo tji ma sokuraisa. Omena ratjike? Adelaide u tja: “I rira oupupu okuhungira kuna wo mena rokutja motjiwa kutja mave ku zuu nawa. Komurungu eye wa tja: “Indu tji mo hungire kuna wo, ove u yenena okumuna ongendo yawo momuano mu mave ku ziri.” Omurumendu omukambure ngu nondangi komuano omunene wombongo me mu tjinda, u tja: “Otja tje hungire  kuna omunene wombongo ohunga nongaro yandje, mba muna omahoze momeho we. Tjiri himee roro okuzemba ongaro ndje ndji raisira ndjo.”​—Rom. 12:15.

18. Omomuano uṋe mu matu raisa kutja tu rikendera ku varwe?

¹⁸ Otjingaperi, kutja ka vanene vombongo uriri mbu mave sokurikendera varwe. Atuhe matu yenene okukara notjikaṋena hi. Omomuano uṋe? Kondja okuzuva nawa omauzeu wouṋepo weṱunḓu roye na imbwi wovakambure ovakweṋu. Raisa kutja u rikendera komitanda mombongo yeṋu na imba mba vera novakurundu, na imba mba zepaisa ovasuverwa vawo. Ve pura kutja ve ri vi. Puratena nombango tjiri tji mave ku raere kutja ve ri vi, nu ve raisira kutja mo zuu nawa ongaro mu ve ri. Ve vatera momuano auhe mu mo yenene. Indu tji twa tjiti nao, eṱe matu raisa orusuvero rwa tjiri movitjitwa vyetu.​—1 Joh. 3:18.

19. Ongwaye tji matu sokurira ovapaturuke indu tji matu kondjo okuvatera varwe?

¹⁹ Eṱe matu sokukara ovapaturuke okuvatera varwe. Omena ratjike? Mena rokutja ovandu ve raisa ozongaro pekepeke tji mave munu omauzeu. Tjiva ve kara nonḓero yokuvanga okuhungira ohunga nomauzeu wawo, nu varwe kave vanga. Nandarire kutja matu vanga okuvatera, katu sokupura omapuriro ngu maye ve tjiti kutja ve ṱohoṋi. (1 Tes. 4:11) Nandarire kutja varwe ve tu raere ohunga noumune wawo, eṱe mape ya atu hai kumwe noumune wawo mbo. Nungwari, eṱe matu sokuyakura oumune wawo mbo. Eṱe matu vanga okuhakahana okupuratena nu atu wombo okuhungira.​—Mat. 7:1; Jak. 1:19.

20. Morupa ndu maru kongorere ko matu katara ku tjike?

²⁰ Pendje nokurikendera varwe mombongo uriri, eṱe wina matu vanga okuraisa otjikaṋena otjiwa hi motjiungura tjokuzuvarisa. Omomuano uṋe mu matu yenene okutjita nao? Matu katara kepu ndo morupa ndu ma ru kongorere ko.