1. Sigun iti 1 Pedro 3:8, apay a maragragsakantayo a makikadua kadagiti maseknan iti rikrikna ken pagimbagantayo?

MARAGRAGSAKANTAYO a makikadua kadagiti tattao a maseknan iti rikrikna ken pagimbagantayo. Ikabkabilda ti bagida iti kasasaadtayo, tapno matarusanda ti pampanunoten ken rikriknatayo. Pampanunotenda dagiti kasapulantayo ken ibagada a kayatda ti tumulong​—no dadduma, sakbay pay a kiddawentayo dayta. Maapresiartayo dagiti mangipakita kadatayo iti “simpatia.” *​—Basaen ti 1 Pedro 3:8.

2. Apay a mabalin a marigatantayo a mangipakita iti empatia?

² Kas Kristiano, kayattayo amin nga ipakita ti empatia, wenno simpatia. Ngem ti agpayso, marigatantayo a mangipakita iti dayta no dadduma. Apay? Umuna, imperpektotayo. (Roma 3:23) Isu a masapul a labanantayo ti natural a tendensiatayo a mangpanunot laeng iti bagitayo. Maikadua, dadduma kadatayo ti marigatan a mangipakita iti empatia gapu iti pannakapadakkel wenno napalabastayo. Maikatlo, mabalin a maimpluensiaantayo iti kababalin dagiti tattao iti aglawlawtayo. Kadagitoy maudi nga al-aldaw, adu ti awan bibiangna iti rikrikna ti sabsabali, ta ‘ay-ayatenda laeng ti bagbagida.’ (2 Tim. 3:1, 2) Ania ti makatulong kadatayo a manglaban kadagitoy a karit iti panangipakita iti pannakaseknan iti rikrikna ti sabsabali?

3. (a) Kasanotayo nga ad-adda a maipakita ti simpatia? (b) Ania ti usigentayo iti daytoy nga artikulo?

³ Ad-adda a maipakitatayo ti simpatia no tuladentayo ni Jehova a Dios ken ti Anakna, ni Jesu-Kristo. Ni Jehova ket  Dios ti ayat, ket impakitana ti kasayaatan nga ulidan ti panangipakita iti pannakaseknan iti sabsabali. (1 Juan 4:8) Naan-anay a tinulad ni Jesus ti personalidad ni Amana. (Juan 14:9) Idi adda ditoy daga, impakitana no kasano a maipakita ti tao ti panangngaasi. Iti daytoy nga artikulo, umuna nga usigentayo no kasano nga impakita ni Jehova ken ni Jesus ti pannakaseknan iti rikrikna ti sabsabali. Kalpasanna, usigentayo no kasanotayo a matulad ti ulidanda.

4. Kasano nga ipakita ti Isaias 63:7-9 a maseknan ni Jehova iti rikrikna dagiti adipenna?

⁴ Isursuro ti Biblia a maseknan ni Jehova iti rikna dagiti adipenna. Kas pagarigan, kitaentayo ti nariknana idi agrigrigat dagiti nagkauna nga Israelita. “Iti amin a panagrigatda, naparigatan met,” kuna ti Sao ti Dios. (Basaen ti Isaias 63:7-9.) Idi agangay, babaen ken propeta Zacarias, imbaga ni Jehova a masaksaktan no mamaltrato ti ilina. Imbagana kadagiti adipenna: “Asinoman a mangsagid kadakayo, sagsagidenna ti alintatao ti matak.” (Zac. 2:8) Nagsayaat daytoy a panangiladawan iti pannakaseknan ni Jehova iti ilina!

5. Mangted iti pagarigan no kasano a nagtignay ni Jehova a tumulong kadagiti adipenna nga agrigrigat.

⁵ Saan laeng a maasian ni Jehova kadagiti adipenna nga agrigrigat. Agtignay a tumulong kadakuada. Kas pagarigan, idi agrigrigat dagiti Israelita kas ad-adipen idiay Egipto, ammo ni Jehova ti saem a marikriknada ket natignay a tumulong. Imbaga ni Jehova ken ni Moises: “Nakitak ti nakaro a kasasaad ti ilik . . . , ket nangngegko ti panagpakpakaasida . . . ammok dagiti panagrigrigatda. Tulongak ida ken isalakanko ida manipud kadagiti Egipcio.” (Ex. 3:7, 8) Gapu ta naasian ni Jehova iti ilina, winayawayaanna ida. Ginasut a tawtawen kalpasanna, idiay Naikari a Daga, dimmarup dagiti kabusorda. Ania ti inaramid ni Jehova? “Naasian . . . iti panagrigrigatda gapu kadagiti mangidaddadanes ken mangmalmaltrato kadakuada.” Naasian manen ni Jehova iti ilina ket tinulonganna ida. Nangibaon kadagiti ukom a mangisalakan kadagiti Israelita manipud kadagiti kabusorda.​—Uk. 2:16, 18.

6. Mangted iti pagarigan no kasano nga inkonsiderar ni Jehova ti rikrikna ti maysa a di umiso ti panangmatmatna.

 ⁶ Nakonsiderar ni Jehova iti rikna dagiti adipenna​—uray no di umiso ti panangmatmatda no dadduma. Kitaentayo ti kasasaad ni Jonas. Imbaon ti Dios ti propetana a mangipakaammo iti mangukom a mensahe maibusor kadagiti taga-Nineve. Saan ida a dinadael ti Dios idi nagbabawida. Ngem saan a naragsakan ni Jonas. “Nakapungtot” ta saan a natungpal ti impadtona a pannakadadael. Ngem inan-anusan ni Jehova ni Jonas ket tinulonganna a mangbalbaliw iti panangmatmatna. (Jon. 3:10–4:11) Idi agangay, naawatan ni Jonas ti kayat nga isuro ni Jehova, ket inusarna pay ketdi a mangirekord iti daytoy a salaysay tapno magunggonaantayo.​—Roma 15:4. *

7. Ania ti ipasigurado kadatayo ti pannakilangen ni Jehova kadagiti adipenna?

⁷ Ti pannakilangen ni Jehova iti ilina ipasiguradona kadatayo nga adda empatiana kadagiti adipenna. Ammona ti saem ken panagrigrigat ti tunggal maysa kadatayo. ‘Pudno nga ammo ni Jehova ti puso ti tao.’ (2 Cron. 6:30) Maawatanna ti amin a pampanunoten, emosion, ken limitasiontayo. Ken ‘dina ipalubos a masulisogtayo iti ditay kabaelan.’ (1 Cor. 10:13) Anian a makaliwliwa dayta a pammasiguro!

8-10. Ania dagiti posible a makagapu no apay a maseknan ni Jesus iti sabsabali?

⁸ Kas maysa a tao, maseknan unay ni Jesus iti sabsabali. Mabalin nga adda tallo a makagapu no apay a maseknan. Umuna, kas nadakamaten, naan-anay nga impakita ni Jesus ti personalidad ti nailangitan nga Amana. Kas ken Amana, ay-ayaten ni Jesus dagiti tattao. Nupay naragsakan ni Jesus iti amin a banag a timmulonganna ken Jehova nga aramiden, ‘nangnangruna a pakaragsakanna dagiti annak ti tattao.’ (Prov. 8:31) Ayat ti nangtignay ken Jesus a mangipakita iti pannakaseknan iti rikrikna ti sabsabali.

⁹ Maikadua, kas ken Jehova, mabasa ni Jesus ti puso. Kabaelanna nga ammuen ti motibo ken rikrikna dagiti tattao. (Mat. 9:4; Juan 13:10, 11) Isu a no makita ni Jesus a masaksaktan ti puso dagiti tattao, liwliwaenna ida ta maseknan kadakuada.​—Isa. 61:1, 2; Luc. 4:17-21.

¹⁰ Maikatlo, napadasan ni Jesus ti dadduma a problema dagiti tattao. Kas pagarigan, dimmakkel ni Jesus iti napanglaw a pamilia. Bayat a nakipagtrabaho ni Jesus iti pannakaamana a ni Jose, nasursurona dagiti nadagsen a trabaho. (Mat. 13:55; Mar. 6:3) Agparang a natay ni Jose sakbay a nangrugi ti ministerio ni Jesus. Isu a narikna la ketdi ni Jesus ti saem ti matayan iti ipatpateg. Ken ammo ni Jesus ti kasasaad ti pamilia a nagduduma ti pammati ti miembrona. (Juan 7:5) Dagita a kasasaad ken ti dadduma pay ti posible a nakatulong ken Jesus a mangtarus kadagiti problema ken rikrikna dagiti ordinario a tattao.

11. Kaano a nangnangruna a makita ti pannakaseknan ni Jesus? Ilawlawag. (Kitaen ti ladawan iti akkub.)

¹¹ Nangnangruna a makita ti pannakaseknan ni Jesus idi nagaramid kadagiti milagro. Saanna nga inaramid dagita gapu laeng ta obligado. “Naasian” kadagidiay agrigrigat. (Mat. 20:29-34; Mar. 1:40-42) Kas pagarigan, panunotem ti marikrikna ni Jesus bayat nga iyad-adayona ti maysa  a tuleng a lalaki kadagiti tattao sa pinaimbagna wenno bayat ti panangpagungarna iti kakaisuna nga anak ti balo a babai. (Mar. 7:32-35; Luc. 7:12-15) Nakipagrikna ni Jesus kadagidiay a tattao ken kayatna ida a tulongan.

12. Kasano nga ipakita ti Juan 11:32-35 a nakisimpatia ni Jesus kada Marta ken Maria?

¹² Nakisimpatia ni Jesus kada Marta ken Maria. Idi nakitana a maladladingitanda iti ipapatay ti kabsatda a ni Lazaro, “nagsangit ni Jesus.” (Basaen ti Juan 11:32-35.) Saan a nagsangit gapu laeng ta napukawna ti maysa a nasinged a gayyemna. Siempre, ammona a pagungarenna ni Lazaro. Nagsangit ni Jesus ta ammona ken nariknana ti saem a marikrikna dagiti dungdungnguenna a gagayyem.

13. Apay a makaparegta a maammuan nga adda empatia ni Jesus iti sabsabali?

¹³ Makaparegta unay a maammuan nga adda empatia ni Jesus iti sabsabali, ken ay-ayatentayo isuna gapu iti naasi a panangtratona iti sabsabali. (1 Ped. 1:8) Makaparegta kadatayo a maammuan nga agturturayen kas Ari ti Pagarian ti Dios. Asidegen nga ikkatenna ti amin a panagrigrigat. Gapu ta napadasan ni Jesus ti agbiag kas tao, isu ti kasayaatan a tumulong iti panagsagaba ti sangatauan a resulta ti panangituray ni Satanas. Wen, nagsayaat ta addaantayo iti Agturay a ‘makaawat kadagiti pagkapuyantayo.’​—Heb. 2:17, 18; 4:15, 16.

14. Ania ti iparparegta ti Efeso 5:1, 2 nga aramidentayo?

¹⁴ No panunotentayo ti ulidan ni Jehova ken ni Jesus, matignaytayo a mangikagumaan a mangipakita iti simpatia. (Basaen ti Efeso 5:1, 2.) Saantayo a kas kadakuada a makabasa iti puso. Ngem mabalin nga ikagumaantayo a tarusan ti emosion ken ti kasapulan ti dadduma. (2 Cor. 11:29) Saan a kas iti managimbubukodan a tattao ditoy lubong, ikagkagumaantayo a ‘sapulen dagiti pagimbagan ti dadduma, saan la a dagiti bukodtayo a pagimbagan.’​—Fil. 2:4.

15. Siasino ti nangnangruna a mangipakita iti simpatia?

¹⁵ Dagiti panglakayen iti kongregasion ti nangnangruna a mangipakita iti simpatia. Ammoda a sungsungbatanda dagiti karnero a naipaaywan kadakuada. (Heb. 13:17) Masapul a mannakaawat dagiti panglakayen tapno matulonganda dagiti kapammatianda. Kasano a maipakitada ti simpatia?

16. Ania ti aramiden ti mannakipagrikna a panglakayen, ken apay nga importante daytoy?

¹⁶ Ti mannakipagrikna a panglakayen ket adda tiempona kadagiti kakabsat. Agsaludsod sa siaanus a dumngeg. Nangnangruna nga importante dayta no kayat ti maysa kadagitoy a napateg a karnero nga iyebkas ti pampanunoten ken rikriknana ngem dina ammo no kasanona nga ibaga. (Prov. 20:5) No ipaay ti panglakayen ti orasna, pabpabilgenna ti panagtalek, pannakigayyem, ken ayatna kadagiti kakabsat.​—Ara. 20:37.

17. Ania ti ibaga ti adu a kakabsat a kangrunaan a maapresiarda kadagiti panglakayen? Mangted iti pagarigan.

¹⁷ Adu a kakabsat ti mangibaga a ti kualidad a kangrunaan a maapresiarda kadagiti panglakayen ket ti pannakaseknanda iti rikrikna ti sabsabali. Apay? “Nalaklaka ngamin ti makisarita kadakuada, ta ammom a maawatandaka,” kuna ni Adelaide. Innayonna: “Mariknam a makisimpatiada kenka iti pamay-anda a sumungbat no makisaritaka kadakuada.” Malagip ti maysa a brother: “Nakitak a nakalua ti  maysa a panglakayen bayat nga ibagbagak ti situasionko. Diakto pulos malipatan dayta.”​—Roma 12:15.

18. Kasanotayo a mapatanor ti simpatia iti sabsabali?

¹⁸ Siempre, saan laeng a dagiti panglakayen ti kasapulan a mangipakita iti simpatia. Kabaelantayo amin a patanoren daytoy a kualidad. Kasano? Ikagumaam a tarusan ti mapaspasaran dagiti kapamiliam ken kapammatiam. Ipakitam a maseknanka kadagiti tin-edyer iti kongregasion kasta met kadagiti masakit, natataengan, ken natayan iti ipatpateg. Komustaem ida. Dumngegka a naimbag no ibagada ti rikriknada. Ipakitam a talaga a matarusam ti situasionda. Ibagam a kayatmo nga aramiden ti aniaman a maitulongmo. No aramidentayo daytoy, ipakpakitatayo ti pudpudno nga ayat.​—1 Juan 3:18.

19. Apay a masapul a mannakibagaytayo no tultulongantayo ti sabsabali?

¹⁹ Masapul a mannakibagaytayo no tumultulongtayo iti dadduma. Apay? Gapu ta agduduma ti reaksion dagiti tattao no maipasangoda iti rigat. Adda dagiti mayat a mangibaga iti problemada, ngem adda met dagiti saan. Isu a nupay kayattayo ti tumulong, saan koma unay a personal dagiti saludsodtayo. (1 Tes. 4:11) Uray no ibaga ti dadduma ti rikriknada, mabalin a saantayo a kanayon nga umanamong iti ibagbagada. Ngem laglagipentayo a dayta ti marikriknada. Kayattayo ti alisto a dumngeg ngem nainayad nga agsao.​—Mat. 7:1; Sant. 1:19.

20. Ania ti usigentayo iti sumaruno nga artikulo?

²⁰ Malaksid iti panangipakita iti simpatia iti kongregasion, kayattayo nga ipakita daytoy a nagsayaat a kualidad iti ministeriotayo. Kasanotayo a maipakita ti simpatia kadagiti kasabaantayo? Usigentayto dayta iti sumaruno nga artikulo.