1. Ль гора 1 Пәтрус 3:8, чьрʹа әм хԝә баш тʹәхмин дькьн тʹәви мәрьвед кӧ дьлшәԝат ьн?

ӘМ ХԜӘ баш тʹәхмин дькьн нава ԝан мәрьвада, йед кӧ һьндава мәда шәԝат ьн у бона һʹалхԝәшийа мә хәм дькьн. Әԝана хԝә датиньн дәԝса мә, сәва фәʹм бькьн әм чь тʹәхмин дькьн у чь дьфькьрьн. Әԝана тедәрдьхьн чь мәрʹа лазьм ә у али мә дькьн, щара һәла һе һьнге жи, гава мә аликʹари жь ԝана нәхԝәстийе. Әм мәрьвед кӧ һьндава мәда шәԝат ьн, * гәләк ԛимәт дькьн. (Бьхунә 1 Пәтрус 3:8.)

2. Чьрʹа дьбәкә мәрʹа лазьм бә сәр хԝә бьхәбьтьн, ԝәки шәԝат бьн?

² Әм һʹәму Мәсиһи дьхԝазьн дьлшәԝат бьн һьндава мәрьва. Ле йәкә һеса нинә әԝи һʹӧнӧри бьдьнә кʹьфше. Чьрʹа? Бәре әʹԝльн, чьмки әм гӧнәкʹар ьн (Рʹом. 3:23). Мәрʹа хәйсәт ә хԝәһʹьз бьн, ләма әм гәрәке сәр хԝә бьхәбьтьн, ԝәки бона мәрьва хәм кьн. Ӧса жи бона мә һьнәка чәтьн ә шәԝат бьн, чьмки әм щурʹәки майин һатьнә мәзьнкьрьне, йан жи ԛәԝьмандьнед кӧ әʹмьре мәда ԛәԝьминә, сәр мә һʹӧкӧм бунә. Һьн жи әм рʹожед ахьрийеда дьжин у мәрьвед дорбәре мә жи сәр мә һʹӧкӧм дькьн, чьмки хԝәһʹьз ьн у накʹәвьнә һʹәйра мәрьва (2 Тимтʹ. 3:1, 2). Чь дькарә али мә бькә, ԝәки һьндава мәрьва шәԝат бьн?

3. а) Әм ча дькарьн дьһа шәԝат бьн һьндава мәрьвада? б) Ве готареда әме чь шеԝьр кьн?

³ Һәрге әм чʹәʹв бьдьнә Йаһоԝа у Кӧрʹе ԝи Иса Мәсиһ, әме дьһа шәԝат бьн у бькʹәвьнә һʹәйра мәрьва. Йаһоԝа Хԝәдейе һʹьзкьрьн ә, ләма әԝи мәсәләкә лапә баш мәрʹа  һиштийә, кӧ ча һьндава мәрьвада шәԝат бьн (1 Йуһʹн. 4:8). Иса һәр тьштида чʹәʹв дьда Баве хԝә (Йуһʹн. 14:9). Әԝи нишан кьр кӧ чаԝа мәрьв дькарьн һьндава һәвда дьлшәԝат бьн. Ве готареда пешийе әме шеԝьр кьн, кӧ чаԝа Йаһоԝа у Иса һьндава мәрьвада дьлшәԝатийе дьдьнә кʹьфше, у паше әме пебьһʹәсьн ча әм дькарьн чʹәʹв бьдьнә ԝан.

4. Ишайа 63:7-9 ча дьдә кʹьфше, ԝәки Йаһоԝа бона хьзмәткʹаред хԝә хәм дькә?

⁴ Кʹьтеба Пироз мә һин дькә, ԝәки Йаһоԝа хьзмәткʹаред хԝә фәʹм дькә у дькʹәвә һʹәйра ԝан. Мәсәлә, дина хԝә бьдьне Йаһоԝа чь тʹәхмин кьр, гава щьмәʹта ԝи Исраел тәʹли-тәнгийада бу. Хәбәра Хԝәдеда те готьне: «Дь тәнгасийа ԝан һʹәмуйада әԝ ащьз бу». (Бьхунә Ишайа 63:7-9.) Ԝәʹдә шунда Йаһоԝа бь сайа Зәкәрйа пʹехәмбәр әʹлам кьр, кӧ һәрге кәсәк һьндава щьмәʹта ԝида хьраб бә, әԝ һʹәсаб дькә кӧ әԝана һьндава ԝида хьраб ьн. Йаһоԝа хьзмәткʹаред хԝәрʹа гот: «Йе дәсте хԝә ль ԝә дьхә, әԝ ль бибока чʹәʹве мьн дьхә» (Зәкәр. 2:8, ДТʹ). Рʹасти жи әԝ гьли чьԛас ԛәԝи нә у дьдьнә кʹьфше, ԝәки Йаһоԝа ча бона щьмәʹта хԝә хәм дькә!

5. Мәсәле гьли кьн кӧ Йаһоԝа ча жь дьлшәԝатийа хԝә али щьмәʹта хԝә дькьр.

⁵ Дьле Йаһоԝа дьшәԝьтә чахе хьзмәткʹаред ԝи кӧл-дәрда дькʹьшиньн, у әԝ пе кьре хԝә әве йәке дьдә кʹьфше, демәк али ԝан дькә. Мәсәлә, чахе Исраели Мьсьреда хӧлам бун у дьчәрчьрин, Йаһоԝа еша дьле ԝан дьдит у хԝәст ԝана жь ве еше аза кә. Йаһоԝа готә Муса: «Бәле мьн щәфе щьмәʹта хԝә . . . дит у ԛарʹә-ԛарʹа ԝан . . . бьһист, . . . әз һаш жь тәнгасийа ԝан һәмә. Әз пәйа бум ԝана жь дәсте мьсьрийа аза кьм» (Дәркʹ. 3:7, 8). Йаһоԝа гӧне хԝә щьмәʹта хԝә ани, ләма әԝи ԝана жь хӧламтийе аза кьр. Ԛьрʹнә дәрбаз бун, Исраели Әʹрде Создайида кʹәтьнә дәсте дьжмьнед хԝә. Ле Йаһоԝа чь кьр? Дьле Йаһоԝа шәԝьти сәр щьмәʹта ԝи, чьмки әԝана дьнәʹлийан дәсте дьжмьнада у дәсте ԝан мәрьвада йед кӧ нәһәԛи ԝан дькьрьн. Диса жи Йаһоԝа жь дьлшәԝатийа хԝә али щьмәʹта хԝә кьр. Әԝи һʹакьм шандьн, сәва Исраелийа жь дәсте дьжмьнед ԝан хьлаз кә (Һʹакьм. 2:16, 18).

6. Мәсәле биньн кӧ чаԝа Йаһоԝа дьлшәԝатийа хԝә да кʹьфше һьндава ԝи кәси, кʹе нәрʹаст дьфькьри.

 ⁶ Йаһоԝа һьнге жи һьндава щьмәʹта хԝә дьлшәԝат ә, һәрге жи щара ньһерʹандьна ԝан нәрʹаст ә. Дина хԝә бьдьнә мәсәла Уньс. Хԝәде әв пʹехәмбәр шандә бал щьмәʹта Нинәԝайе, сәва диԝана ԝи ԝанрʹа әʹлам кә. Чахе ԝана гӧне хԝә да рʹуйе хԝә, Хԝәде сафи кьр ԛьрʹа ԝан нәйнә. Ле әԝ сафикьрьн дьле Уньс нәһат. Әԝ «һерс кʹәт», чьмки пʹехәмбәртийа ԝи дәрһәԛа диԝане нәһатә сери. Ле Йаһоԝа бь сәбьр бу һьндава Уньс у али ԝи кьр, кӧ ньһерʹандьна хԝә бьгӧһезә (Унс. 3:10–4:11). Ԝәʹдә дәрбаз бу, Уньс фәʹм кьр кӧ Йаһоԝа чь дьхԝәст ԝи һин кьра, у Йаһоԝа һәла һе жи бона кʹара мә сәрһатийа ԝи дайә ньвисаре (Рʹом. 15:4). *

7. Әԝ йәк кӧ Йаһоԝа һьндава хьзмәткʹаред хԝә ча нә, чьда дьле мә рʹьһʹәт дькә?

⁷ Йаһоԝа пе кьред хԝә щьмәʹта хԝәрʹа дьдә кʹьфше, ԝәки әԝ һьндава хьзмәткʹаред хԝәда дьлшәԝат ә. Әԝ һаш еша дьле мә һәр кәси һәйә у дәрде мә жи занә. Тʹәне Йаһоԝа «дьле мәрьва» занә (2 Дир. 6:30). Әԝ фәʹм дькә һәр фькьр, синоред мә у ӧса жи кӧ әм кʹурайа дьле хԝәда чь тʹәхмин дькьн. У «әԝ наһелә кӧ [әм] жь ԛәԝата хԝә дәр бенә щерʹьбандьне» (1 Корн. 10:13). Әԝ соз рʹасти жи дьле мә гәләк һеса у рʹьһʹәт дькә.

8-10. Кʹижан тьштед сәрәкә али Иса кьрьн, кӧ бона мәрьва хәм бькә?

⁸ Чахе Иса сәр әʹрде бу, әԝи гәләк хәм дькьр бона мәрьва. Лапә кем се тьштед фәрз али ԝи кьрьн, кӧ дьлшәԝат бә һьндава мәрьвада. Йа пешьн, чаԝа мә жорʹе гот, Иса бь тʹәмами чʹәʹв дьда хәйсәт-һʹӧнӧред Баве хԝәйи әʹзмана. Әԝ жи мина Баве хԝә мәрьв һʹьз дькьрьн. Бәле, әԝ һәр тьштирʹа ша дьбу чь кӧ әԝи тʹәви Йаһоԝа әʹфьранд, ле илаһи әшԛа ԝи «әԝләдед инсен бу» (Мәтʹлк. 8:31). Иса жь һʹьзкьрьне дькʹәтә һʹәйра мәрьва.

⁹ Йа дӧда, мина Йаһоԝа, Иса дькарьбу дьле мәрьва бьдита. Әԝи нет-мәрәм у фькьред ԝан заньбу (Мәт. 9:4; Йуһʹн. 13:10, 11). Ләма жи чахе Иса дьдит кӧ мәрьв дьлшкәсти нә, дьле ԝи дьшәԝьти у әԝи дьлбини дьда ԝан (Иша. 61:1, 2; Луԛа 4:17-21).

¹⁰ Йа сьсийа, Иса жи мина мәрьвед дьн рʹасти чәтьнайа дьһат. Мәсәлә, ча те кʹьфше Иса малбәтәкә нәдәԝләтида мәзьн бу. Тʹәви баве хԝә Усьв, әԝ һин бу кӧ хәбата гьран бькә (Мәт. 13:55; Марԛ. 6:3). Ӧса жи, ча те кʹьфше Усьв мьр һьнә ԝәʹдә пешийа дәстпека хьзмәткьрьна Иса. Ләма жи Иса ԝе һаш пе һәбуйа, кӧ дәрде мьрьне ешәкә чьԛас мәзьн тинә. У Иса заньбу кӧ чьԛас чәтьн ә чахе баԝәрийа нәфәра, жь баԝәрийа тә щӧдә дьбә (Йуһʹн. 7:5). Әԝ һʹәму дәрәщә али Иса кьрьн, ԝәки фәʹм бькә чәтьнайи у һʹале мәрьва.

11. Илаһи кʹәнге дьлшәԝатийа Иса дьһатә кʹьфше? Шьровәкьн. (Бьньһерʹә шькле рʹуйе журнале.)

¹¹ Дьлшәԝатийа Иса илаһи һьнге әшкәрә дьһатә кʹьфше, чахе әԝи кʹәрәмәт дькьрьн. Иса әԝ кʹәрәмәт дькьрьн нә сәва ве йәке кӧ әԝ борщдар бу, ле чьмки әԝи гӧне хԝә мәрьва дьани, йед кӧ кӧл-дәрд дькʹьшандьн (Мәт. 20:29-34; Марԛ. 1:40-42). Мәсәлә, бьдьнә бәр чʹәʹве хԝә, кӧ Иса чь тʹәхмин дькьр чахе әԝи мәрьве  кәрʹ-лал жь нав әʹлаләте дәрхьст у ԛәнщ кьр, йан жи чахе әԝи кӧрʹе жьнәбике кʹижан тайе тʹәне бу, жь мьрьне рʹакьр (Марԛ. 7:32-35; Луԛа 7:12-15). Дьле Иса бона ԝан мәрьва дьшәԝьти у ләма әԝи дьхԝәст али ԝан бькә.

12. Йуһʹәнна 11:32-35 ча дьдә кʹьфше, ԝәки дьле Иса бона Мәрйәм у Мәртʹайе шәԝьти?

¹² Дьле Иса шәԝьти чахе әԝи дит, кӧ Мәртʹа у Мәрйәме дәрд дькʹьшандьн жь бо мьрьна бьре хԝә Лазар. Дьле Иса ӧса ешийа, кӧ әԝ «гьрийа». (Бьхунә Йуһʹәнна 11:32-35.) Иса гьрийа нә бона ԝе йәке кӧ һәвале хԝәйи незик ӧнда кьр, чьмки заньбу ԝәки ԝе ԝи жь мьрьне рʹакә. Бь рʹасти, Иса гьрийа чьмки фәʹм дькьр у тʹәхмин дькьр еша дьле һәвалед хԝәйи дәлал.

13. Чьрʹа дьле мә ша дьбә, кӧ әм заньн ԝәки Иса дьлшәԝат ә?

¹³ Әм дьлбинийе дьстиньн жь ве йәке кӧ заньн, ԝәки Иса һьндава мәрьвада дьлшәԝат бу. Әм ԝи һʹьз дькьн, чьмки әԝи бона мәрьва хәм дькьр (1 Пәт. 1:8). Әм заньн кӧ ньһа әԝ Пʹадшатийа Хԝәдеда пʹадшатийе дькә, у әԝ йәк дьлбинийе дьдә мә. Зутьрәке әԝ ԝе һʹәму кӧл-дәрда бьдә һьлдане. Иса хԝәха сәр әʹрде дьжит ча мәри у ләма әԝ дькарә дьһа баш али инсанәте бькә у ԝана жь һʹәму зийана кӧ сәрԝертийа Шәйтʹан анийә, хьлаз кә. Бь рʹасти әԝ кʹәрәмәкә мәзьн ә, кӧ Сәрԝерәки мәйи ӧса һәйә, кӧ «тәнгасийед мәда» дьле ԝи сәр мә дьшәԝьтә (Ибрн. 2:17, 18; 4:15, 16).

14. Ль гора Әфәси 5:1, 2, әм чьда дьхԝазьн чʹәʹв бьдьнә Йаһоԝа у Иса?

¹⁴ Чахе әм дьфькьрьн сәр мәсәла Йаһоԝа у Иса, әм дьхԝазьн һе зедә дьлшәԝатийе нишан кьн. (Бьхунә Әфәси 5:1, 2.) Рʹаст ә әм мина ԝан нькарьн дьла бьвиньн, ле йәкә әм дькарьн фәʹм бькьн, кӧ мәри чь тʹәхмин дькьн у чьда ԝанрʹа аликʹари лазьм ә (2 Корн. 11:29). Әԝ дьнйа хԝәһʹьз ә, ле әм дьхԝазьн нә кӧ «тʹәне ль кʹара хԝә» бьгәрʹьн, ле «кʹара һәвале хԝә» (Фили. 2:4).

15. Илаһи кʹе гәрәке дьлшәԝатийе бьдә кʹьфше?

¹⁵ Гәләк фәрз ә ԝәки рʹуспийед щьвате дьлшәԝат бьн. Әԝана заньн ԝәки щабдар ьн кӧ мьԛати пәзед Йаһоԝа бьн (Ибрн. 13:17). Рʹуспи сәва кӧ аликʹарийе бьдьнә хушк-бьра, гәрәке фәʹмкʹар бьн. Ле әԝана ча дькарьн дьлшәԝатийе бьдьнә кʹьфше?

16. Рʹуспийе дьлшәԝат чь дькә, у чьрʹа әԝ йәк гәләк фәрз ә?

¹⁶ Рʹуспийе дьлшәԝат бона хушк-бьред хԝәйә щьвате ԝәʹдә дьвинә. Әԝ пьрса дьдә ԝан, паше бь сәбьр гӧһ дьдә ԝан. Әԝ йәк илаһи фәрз ә, чахе хушк йан бьра кʹәла дьле хԝә дьхԝазә бьрʹежә, ле ньзанә ча бежә (Мәтʹлк. 20:5). Чахе рʹуспи бона хушк-бьра ԝәʹдә дьвинә, әԝ йәк итʹбари, һәвалти у һʹьзкьрьна ԝан һьндава ԝида һе ԛәԝи дькә (Кʹар. Шанд. 20:37).

17. Гәләк хушк-бьра кʹижан һʹӧнӧри нав рʹуспийада зәʹф ԛимәт дькьн? Мәсәле биньн.

¹⁷ Гәләк хушк-бьра дьбежьн, ԝәки нав рʹуспийед щьватеда һʹӧнӧрәкә лапә ԛимәт, дьлшәԝати йә. Ле чьрʹа? Хушкәкә мә Аделайда дьбежә: «Һеса йә тʹәви ԝан рʹуспийа хәбәр ди, чьмки зани ԝәки әԝана ԝе тә фәʹм бькьн. Чахе тʹәви ԝан хәбәр дьди, жь щаба ԝан тӧ дькари тедәрхи, ԝәки дьле ԝан бона тә дьшәԝьтә». Бьрак бь рʹазибуне тинә бира хԝә, кӧ рʹуспики һьндава ԝида хԝә ча да кʹьфше: «Чахе мьн жерʹа дәрһәԛа дәрәща хԝә гьли кьр, мьн дит ԝәки чʹәʹве ԝи тʹьжә һесьр бун. Әз ве йәке тʹӧ щар бир накьм» (Рʹом. 12:15).

18. Чаԝа дьлшәԝатийе нав хԝәда пешда биньн?

 ¹⁸ Фәʹмдари йә, нә тʹәне рʹуспи гәрәке дьлшәԝат бьн, ле һәр кәс жь мә гәрәке әԝи һʹӧнӧри нав хԝәда пешда бинә. Чаԝа? Кʹур бьфькьрьн сәва фәʹм кьн, кӧ нәфәред ԝә у хушк-бьред ԝә рʹасти чь чәтьнайа тен. Щьватеда бона щаһьла, нәхԝәша, мәрьвед әʹмьрда мәзьн у йед кӧ мәрьвед хԝә ӧнда кьрьнә, ԝәʹдә бьвиньн у бьпьрсьн һәла әԝана чаԝа ньн. Чахе әԝана дьле хԝә ԝәрʹа вәкьн, рʹьнд гӧһ бьдьнә ԝан. Бьра әԝана тʹәхмин кьн, кӧ һун һʹале ԝана бь рʹасти фәʹм дькьн. У чьԛас дәсте ԝә те, али ԝан бькьн. Һәрге әм һʹәму жи ӧса бькьн, әме һʹьзкьрьна һʹәлал бьдьнә кʹьфше (1 Йуһʹн. 3:18).

19. Чьрʹа чахе әм дьхԝазьн али кәсәки бькьн, гәрәке фәсал бьн?

¹⁹ Чахе дьхԝазьн али кәсәки бькьн, әм гәрәке фәсал бьн. Чьрʹа? Чьмки чәтьнайада һʹәму мәрьв мина һәв хԝә надьнә кʹьфше. Һьнәк дьхԝазьн кӧла дьле хԝә бьрʹежьн, һьнәк жи нахԝазьн дәрһәԛа чәтьнайед хԝә хәбәр дьн. Ләма жи чахе әм дьхԝазьн али ԝан бькьн, гәрәке пьрсед гәләк шәхси нәдьнә ԝан (1 Тʹеслн. 4:11). Һәрге жи әԝана дьле хԝә мәрʹа вәдькьн, щара дьԛәԝьмә әм гьлийед ԝанрʹа ԛайил нибьн. Ле әм гәрәке фәʹм бькьн, кӧ әԝана хԝә ӧса тʹәхмин дькьн. Әм гәрәке бьһистьнеда сәрхԝә бьн, ле хәбәрданеда ләз нәкʹәвьн (Мәт. 7:1; Аԛуб 1:19).

20. Готара дьнда әме чь шеԝьр кьн?

²⁰ Әм гәрәке дьлшәԝатийе бьдьнә кʹьфше нә тʹәне щьватеда, ле ӧса жи хьзмәтийеда. Ле ча әм дькарьн хьзмәтийеда дьлшәԝат бьн? Дәрһәԛа ве йәке әме готара дьнда шеԝьр кьн.